شكرا

كل ثانية ولحظة تمر عليكم وانتوا طيبين
كل سنة وانتوا طيبين عشان عيد الأضحى اللى فات
كل سنة وانتوا طيبين عشان السنة الهجرية الجديدة
كل سنة وانتوا طيبين عشان السنة الميلادية الجديدة
كل سنة وانا بقى طيب بفضل ربنا ثم بيكم عشان عيد ميلادى ستة يناير
كل سنة والبلوج ده طيب عشان سنة عدت عليه بيكم ومعاكم
مش هطول عليكم زى عادتى.. اللى عايز اقوله في بداية سنة جديدة كلمة شكرا
شكرا لربنا سبحانه وتعالى
شكرا لأى حد هيبدأ سنة جديدة بأمال جديدة وطموحات جديدة
شكرا لأى حد عاقل مش هيقبل انه يبدأ أول لحظات سنة جديدة ف عمره بمعصية
شكرا لأى حد اتعلم من أخطاؤه في السنة اللى فاتت..وناوى انه يصلح نفسه السنة دى
شكرا لأى حد حاسب نفسه وشاف إيه اللى حققه وإيه اللى هيحققه لو ليه عمر
شكرا لأى حد فاق من الكآبة وحس إن كل شيء مقدر من عند ربنا وبدأ حياة جديدة بأمل مش بينتهى
شكرا لتمانية وعشرين ألف حد دخل هنا عشان أشرف خلال ست شهور من أول ما بدأ العداد..حتى لو اتعد أكتر من مرة.. يكفى انه يبعد وييجى تانى عشان قلبى يتفتح ليه من جديد بحب وود أكتر
شكرا لأى حد ضحك وانبسط هنا
شكرا لأى حد انتقد ونصح
شكرا لأى حد سأل في غيابى وفرح برجوعى
شكرا لاى حد أخد موضوعاتى أو شعرى اللى هنا أوفى المجلات أو في الجرايد ونشرها باسمه
شكرا لأى حد رد وثار على اللى شكرته في السطر اللى فات
شكرا لكل أخ وأخت عرفتهم هنا
شكرا لأى حد قال كلمة حلوة عنى.. وألف شكر للتانيين
شكرا لأى حد أسعدنى بجد لما حسيت انه سعيد بوجوده هنا
شكرا لأى حد بيستحملنى لما اقصر معاه
شكرا ليكم جميعا
ومش مهم تعليقات المرة دى
الأهم ان تعليقاتكم انا حاسسها
بتوصل هنا من القلب للقلب
ومن غير كتابة ولا كلام
يكفى انها منكم
يا أحلى ناس
كل سنة وانتوا طيبين

أشرف توفيق

الوليد هايص وانا لايص

الشتا دخل.. وقلت اروح بقى أجيب كام طقم شتوى..يوسف قال لى: فيه هدوم حلوة فى كارفور..أنا اقول له ياعم الأسعار هناك غالية وهوه يقول لى لا رخيصة وعلى طريقة حسين رياض لازم تغنى يامنعم قال لى هنروح كارفور يا أشرف

طبعا مادام احنا رايحين كارفور بقى لازم أجهز نفسى بمبلغ محترم.. طلَّعت الميتين جنيه اللى حِيلتى.. وقلت يللا انشالله ماحدّ حَوّش.. أنا هاجيب جاكت وقميص وبنطلون جينز وطبعا هاعزم يوسف عشان المشوار بقى والباقى يكفينى لآخر الشهر
دخلنا كارفور وانا فاكر ان المكان هيبقى فاضى.. كام واحد فى مصر يعنى معاه ميتين جنيه؟؟ لقيت المكان مليان ناس..أكيد الناس دى عاملين جمعيات بقى وقابضين الأول.. المهم مشيت فى المكان أدوّر على أىّ حاجة أساسا تمَنها أقلّ من ميتين جنيه مالقيتش..الجواكت القمصان البناطيل كله أغلى..الحاجة الوحيدة اللى كانت أرخص من ميتين جنيه باكو صابون حلو كده محترم.. بس مرضيتش اشترى باعتبار ان احنا خَدْنا صابونة من غير ما نشترى فوفَّرنا بقى
خرجت من المول بالميتين جنيه بتوعى وانا ماسك قميصى وشايف الناس طالعة محَمّلة حاجات.. وكأنى باقول لهم: استروا عليا الله يستر عليكم
المهم بعد ماروَّحت لقيت خبر لذيذ جميل بيقول ان الأمير الوليد بن طلال اتصنَّف أغنى أغنياء الشرق الأوسط برصيد عشرين مليار دولار
كام صفر دول؟؟؟
أكيد الراجل ده بقى بيشترى من كارفور..أيون حضرتك.. مافيش حد هيشترى مسطرة بخمسة جنيه من كارفور وهيَّه تمنها ربع جنيه من عند مكتبة ابو حمادة إلا الوليد بن طلال
سمعت ان الوليد جوَّز بنتُه قريِّب.. طب جوّزْها مِين.. أكيد جَوِّزها راجل غنى عشان يمكن الوليد طمعان فى فلوس جُوز بنته وللا حاجة..وأكيد لما عرسان كانت بتيجى لبنته كان السؤال التقليدى عندك كام صفر يابنى؟؟
طب الراجل ده معندوش بنت تانية طيب عايزة تتجوز؟؟ أنا اعرف واحد اسمه أشرف ساكن فى المعادى فى عمارة فيها أسانسير وربنا وبواب كمان والشقة شِرحَة وبِرحَة ويرمَحْ فيها الفار
مواصفاتى: أبلغ من العُمر اللى هيه عايزاه..لا طويل ولا قصير .. لا تخين ولا رفيع.. لا ابيض ولا اسمر..كلنا بصوت واحد نقول: عروستى؟؟ أعتمد على ربنا ثم نفسى وان شاء الله بعد الجواز هاعتمد على ربنا ثم فلوسها..أشارك فى الأثاث.. أثاث إيه بالميتين جنيه بتوعك ياعم؟؟ لا أنا هاشارك فى الأثاث بطقم كوبايات نضيف
يسألنى البعض حلوة البعض دى وإيه مواصفاتك فى العروسة بنت الوليد؟؟ أجاوب بكل صدق: عرجاء كسحاء حولاء شمطاء.. لو بنت الوليد هتبقى على قلبى هيفاء
لو باحب واحدة تانية هالطشها بالقلم علطول فداء للعروس.. واقول لها فى ليلة أقل جمالا من هذه الليلة ستأتين إلى خيمتى زاحفة يافرجينيا
يانهار يانهار لو بقيت جوز بنته وبقى معايا فلوس بقى..دانا هاعمل حاجات.. أولا هاروح كارفور.. لازم اتخلص من عقدة النقص بقى..بِفنـُوسى ياكـْناب
فيه ناس أنا شايفها فى آخر البلوج بتقول الغنى غنى النفس وهوه يمكن مش سعيد وأهم حاجة التقوى وربنا الوهاب واللى بيته من إزاز مايغيَّرش هدومُه فى الصالون
بكل فخر هابعت أجيب كبايتين عصير قصب للناس دى واروَّق المحل واقفلُه..اللى عارف رقم تليفون الوليد يجيبه من سُكات ومش عايزين نصايح
طب يعنى يا جدعان الواحد الموظف بيظبَّط بيتُه ازَّاى؟؟دا مرتبه كلُّه يجيب بيه مساطر بس من كارفور..طب ما ينفعش حد يقول لى الوليد بينزل كارفور امتى؟؟ جايز يبقى عنده شوية حَمشنة وجَدعنة ويقف فى وسط المول ويقول لصاحب المول مشاريب الناس دى كلها على حسابى.. قصدى طلبات الناس دى كلهاعلى حسابى.. دا لو الناس دى كلها طلبت وخَدت بعيد الشر بعيد الشر لحمة..يبقوا بيلعبوا فى كام صفر من الأوَّلانيين بتوعُه
يسألنى البعض دول غير البعض الأولانيين وإيه العلاقة فى البوست بينك وبين الوليد؟؟ اقول لكم: أنا كان معايا مبلغ بصفرين والراجل ده معاه مبلغ بحداشر صفر.. يعنى الفرق بينى وبينه يادوووب تسع أصفار..وماتنسوش انه أكبر منى سنا.. يعنى لو قسمنا الأصفار على فرق السن يبقى انا لازم أجيب كل سنتين صفر بالصلا ع النبى..والصفر الأخير ده احتمال يتعبنا شوية بس هنجيبه بعون الله
ويسألنى البعض كل البعوض بقى وهم يشهقون أيوة يشهقون فى المعجم يعنى يضربون صدورهم بأيديهم ويقولون يا لهوى وانت فاكر الصفر سهل؟؟ أقول لهم عارف ان الصفر مش سهل وان مصر بجلالة قدرها جاهدت كتير وتعبت عشان ربنا يوفقها وتجيب صفر ف كاس العالم.. بس بالعزيمة والإصرار ربنا هيوفقنا ونجيب اصفار كلنا..ونلعب بالأصفار لعب..وهنظبط عيالنا بقى.. خد ياحمادة صفرين وهاتلك شيبسى
وعلى رأى أم كلثوم وهيه بتغمز للوليد بن طلال وهيه بتقول
الصفر كله حبيته ليك .. الصفر كله

مرسال لحبيبتى

..حَبِيبْتِي

..شَرْطَه مَايْلَه

..فَرَاغْ
وهَاكْتُبْ لِيهْ حُرُوفْ إِسْمِكْ؟
مَا هُو انْتِي فْ قَلْبِي سَاكْنَه الْقَلْب

عَارْفَه بْقِصِّتِي وْحَالِي
ومِينْ غِيرِكْ فِي قَلْبِي اكْتُبْ لُه مِرْسَالِي؟
..و...... أَمَّا بَعْد

مَانِيشْ عَارِفْ جَوَابِي دَا جَوَابِي الكَّامْ
مَا عُدتِشْ بَاحْسِب الصّفْحَاتْ

مَا عُدتِشْ بَاحْسِب الاّقْلاَمْ
مَا عُدتِشْ بَاحْسِب اللّي ضَاعْ مِن الأَحْلاَمْ
..كِفَايَه انِّي بَاحِبِّكْ بس

..وقَلْبِكْ لَوْ بِقَلْبِي حسّ

أَوْ شَافْ حَالُه فِي بْعَادِكْ
!لَصَلَّى لْرَبُّه واسْتَغْفَرْ لِذَنْبُه...وْصَامْ
قُولِي لِي ازّايْ أَحِبِّكْ حُبّ يِرْضِيكِي؟
أَنَا تَايِهْ... وِنِفْسِي اوْصَلْ أَرَاضِيكِي
دَا لَوْ كَان الْهَوَا بِالسُّهْد

..انَا سِيدُهْ
ولَوْ قُلْتِي انّ حُبِّكْ صُوم

..أَنَا عِيدُهْ
ولَوْ حُبِّك فِدَاهْ قَلْبِي

أَقَطَّعْ قَلْبِي مِيتْ مَرَّهْ

..وَاقَدِّمْ لِكْ عَنَاقِيدُهْ
!وِبِتْقُولِي بَاحِبِّكْ لِيهْ؟

وهُوَّ الْقَلْب مِتْعَذِّبْ كِدَه بْإِيدُهْ؟
بَاحِبِّكْ... حَتَّى لَوْ بِاب الْقُبُول اتْسَدّ
وهَاتْخَيِّلْ صَدَى صُوتِي بِيَاخُدْ كِلْمِتِي وْيِرْجَعْ مَعَاه الرَّدّ
:ولَوْ قُلْتِي لِي مِيتْ مَرَّهْ

.."أَنَا عُمْرِي مَا حَبِّيتْ حَدّ"
هَازيد الْكِلْمَه مِيتْ مَرَّهْ
دِي نُقْطِةْ مَيَّه مِ الْمَطَرَهْ إِذَا فَاضِتْ

..تِهِدّ السَّدّ

وحَتَّى لَوْ فَارِقْتِينِي

..هَاحِبِّكْ فِي الْفُرَاقْ بَرْضُهْ
هَوَاكِي فْ قَلْبِي لَوْ شُفْتِيهْ

..نَوَافْلُه وْسُنِّتُه وْفَرْضُهْ
وحُبِّكْ أَرْضُه

لَوْ تِنْسِيهْ... هَيِنْسَى ازّايْ حَنِينْ أَرْضُهْ؟
ويَامَا فْ نِفْسِي

يَامَا فْ نِفْسِي

تِيجِي لْقَلْبِي وِتْحِنِّي
..ولاَزِمْ تِعْرَفِي إِنِّي

..لاَ انَا عَفْرِيتْ وَلاَ جِنِّي
..بَاحِبِّكْ... بَسّ إِيدِي اقْصَرْ كِتِيرْ مِنِّي
فَمِشْ هَاْقدَرْ

أَجِيبْ لِكْ مِ الدَّهَبْ كَفَّهْ

وَاجِيبْ لِكْ مِ اليَاقُوتْ كَفَّهْ
ومِشْ هَاْقدَرْ

أِجِيب الْوَالِي فِي الزَّفَّهْ
ومِشْ هَاْقدَرْ

أَجِيبْ لِكْ بِيتْ

يِمُوت الْقَطْر لَوْ لَفّ فْ حِمَاه لَفَّهْ
كِفَايَه انِّي بَاحِبِّكْ مُوتْ

وحُبّ النَّاسْ نَدَامَه وْعَارْ

وحُبِّي عَكْسهُمْ عِفَّهْ
ولَوْ تِرْضِي فَعَنْدِي شْرُوطْ
أَنَا طَبْعاً بَاحِبِّكْ مُوتْ

ولَكِنْ بَرْضُه لِيَّه شْرُوطْ
أَنَا عَايْزِكْ تِكُونِي فِي الْوَرِيدْ دَمُّهْ

وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب

غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشي
وعَايِزْ رِمْشِك الْجَارِحْ

صِرَاطْ يِجْرَحْ فُؤَادْ غِيرِي مَايِرْحَمْشِي
وَانَااجِيلِك

أَعَدِّي فُوقْ صِرَاطْ رِمْشِكْ... وَلاَ اخَافْشِي
وحَتَّى لَوْ وِقِعْت فْ يُومْ مِن الْخَضَّهْ

أَقَعْ فِي عْينِيكِي وَاتْوَضَّا
وَاصَلِّي رَكْعِتِينْ لله

وَابُوسْ نِنّ الْعِينِينْ

..وَامْشِي
لاَ انَا طَمَّاعْ

وَلاَ فْ طَبْعِي الأَنَانِيَّهْ
بَاحِبِّكْ

وانْتِي انَا طَبْعاً

ومَا اسْمَحْشِي لِحَدّ يْكُونْ شِرِيكْ فِيَّهْ
وقَبْل مَا يِخْلَص الْمِرْسَالْ

:بَاعِتْ لِكْ مِنْ عِينَيَّه سُؤَالْ
وهُوَّ الْحُبّ كَانْ عِيبَهْ؟
ولَوْ مَرَّهْ حِلِمْت بْضِحْكِتِكْ فِي النُّومْ

عَلَيَّهْ تِتْحَسَبْ غِيبَهْ؟
وفِي الآَخِرْ

بَاعِتْ لِكْ وَيَّا مِرْسَالِي الْجِدِيدْ أَحْلاَمْ
بَلاَشْ تِرْمِيهَا كَالْعَادَه مِنَ اعْلَى الْبُرْجْ
وِخَايِفْ يِبْقَى مِرْسَالِي نِهَايْتُهْ زَيّ أَجْدَادُهْ

!فِي قَلْب الدُّرْجْ
جَنَايِنْ قَلْبِي رَاحْ تِفْضَلْ ولَوْ طَال الْبِعَادْ فَاتْحَهْ
بَاحِبـِّــكْ

قُلْتهَا بِالْكَسْرَهْ

!!!نِفْسِي اسْمَعْهَا بِالْفَتْحَهْ

من ديوان مرسال لحبيبتى للشاعر أشرف توفيق

من أطلق الرصاص على محسن بتاع الفول؟؟

أنا عايز أعرف بقى فيه كام واحد غَنِى فى مصر؟؟

لا حضرتك.. مش الغِنَى العادى بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات 4*4=16 وحمامات السباحة والبودى جاردز اللى الواحد فيهم عضلة دِراعُه أتخَن من بطنى لما آكل مَحشى
كام واحد غَنِى فى مصر بقى؟؟
حضرتك السؤال ده منطقى جدا بعد الوجبة الدسمة من شلل الاطفال اللى شفناها فى مسلسلات رمضان.. والحمد لله كلنا ختمناها وشدِّينا حيلنا كمان فى العشر الأواخر
أنا ماشفتش ولا مسلسل بصراحة إلا أول يوم رمضان عشان كنت فى بيتنا.. المهم خير اللهم اجعله خير المسلسلات كلها عبارة عن عربيات شيروكى وبودى جاردز وحمامات سباحة ومجوهرات ودهب وياقوت واحمدك يارب
والخلافات كلها ازاى الملياردير ده زعَّل الملياردير التانى.. فالملياردير التانى خسَّر الأولانى كام مليار.. وبعدين اتصالحوا فى الآخر وكل ملياردير باس الملياردير التانى من بُقُّه والمسلسل خلص زى الفل
والأخت نادية الجندى.. أخت إيه؟؟؟ نينة نادية الجندى صحفية شريفة أى وعهد الله وبتدافع عن الأخلاق وبتجرى ورا الخبر والمستندات والصحف كلها واقفة على رِجْل
أيوة حضرتك فين الكلام ده بقى؟؟ صحفية إيه اللى بتلفّ وتتعب وتتنكَّر وتتقتَل وتتخطَف عشان خبر وللا قضية فساد؟؟؟
كنتوا اكتبوا فى تِتْر المسلسل بقى هذه الأحداث لا تمت للواقع بصلة وأى تشابه فى أرض الواقع يبقى انتوا اللى هُبْل
كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض..وعدوّ النهاردة حبيب بُكرة..مادام مرتب رئيس التحرير المعارض بيعَدِّى 35 ألف جنيه شهرياً ده غير نِسْبته من الإعلانات تبقى الحياة زى الفل ومفيش مشاكل ولا فساد
فكَّرونى برضُه بأفلام خالد يوسف الأخيرة.. الأبطال كلهم أغنيا بالصلا ع النبى.. حتى البواب عنده هيونداى على قَدُّه.. ورايحين يتفسحوا فى شاليه أى واحد فيهم ما كلهم عندهم شاليهات صلوا ع النبى وبعدين مالقوش حاجة يعملوها ولا يفكروا فيها قالوا يللا نلعب ويجا..طب بالله عليكم حدّ كِدَه يقعد جنب موظف راجع من شغله فى المترو .. ويقول له:لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك
وللا العلاقات بين الجنسين.. دى بقى عايزة بلوج كامل..أى حد مذكر بيروح بيت أى حد مؤنث..والحد المؤنث عايش فى بيت أى حد مذكر..وطلع بالشيفروليه واحنا قاعدين.. وحَمِّل ع الشيفروليه واحنا قاعدين
فى فيلم وسط البلد محمد نجاتى بيقول لهند صبرى تعالى معايا الشقة.. هند صبرى بكل براءة وطُهْر قالت له:مفيش مشكلة..أنا اعرف ان الواحدة تروح شقة الواحد تشرب شاى ..تقعد تتكلم شوية..بس المشكلة ان الناس ممكن يفهموها غلط
طبْ حدّ يجيب كوباية عصير قصب بقى للراجل اللى اتجنَّن ده يااخوانا اللى هوَّه أنا
يعنى الواحدة تروح شقَّة الواحد تشرب شاى..اتمَنَع الشاى من البلد ما عدا فى شقة المحروس؟؟ وانا اللى عامل فيها مابحبِّش الشاى وعُمرى ما شربتُه.. دا انا من بكرة هاشترى مخزون شهر من الشاى من جميع الأنواع
أيوة الغرض من ده كله حاجة واحدة..فين المسلسلات بتاعتنا احنا؟؟
احنا مش بنشوف الحاجات اللى بتحصل دى ياجدعان..حد منكم شاف قصور وبودى جاردز وعربيات زى اللى بيحصل مع ابطال المسلسلات دى؟؟

وحدّ منكم شاف التحرُّر الرهيب ده بين أى بنت وولد فى الحياة..وان البنت تروح له البيت عادى؟؟ وبلاش نتكلم اكتر من كده عشان أنا حاطط وشِّى فى الأرض دلوقتى
ولو موجود يبقى كام فى المِيَّة من سكان مصر المحروسة؟؟
يعنى مش عيب تبقى كل مسلسلات وأفلام مصر عن ناس احنا منعرفهمش..أو حتى عن نسبة لا تتجاوز واحد فى المية من سكان بلدنا الحبيبة بتاعة مشربتش من نيلها؟؟

حد هيقول ده حسد؟؟ اقول له أيون حضرتك .. حسد وحقد وغلّ وكُرْه ومقت ونفسَنَة وما خَفِىَ كان أعظم
فين عربية الفول وساندوتش الكبدة اللى برُبْع جنيه وتذكرة المترو والأتوبيسات الخنقة والموظفين الغلابة اللى فيه فتاوى قالت ان يجوز عليهم الزكاة..والشباب اللى ع القهاوى
فين النت اللى عايزين يحدِّدوه زى النسل وفين مشاكل التأمينات والمعاشات
فين مشاكل الميَّة والزِّبالة اللى بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه
فين مشكلة السَكَن والشباب اللى اتجوَّز على روحُه والبنات اللى بتشَمْشِم على عريس
مش هيَّه دى مصر؟؟؟
وللا مصر شوية صفقات وقصور وعربيات وبنات ستايل فى الجامعة بأحدث موبايلات؟؟
وللا يعنى ده عشان نفضل نقول ياريتنا زيهم.. ونفضفض عن نفسنا شوية
زى إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش فى جَوْدة السَّمنة حضرتك.. المشكلة مين اللى هيجيب لك الأصناف دى؟؟ دى الفرخة عندنا بتتقسم على أربع ليالى.. والشوربة بنشرب فيها أسبوع
وتلاقى الست الوالدة جايبة نفس نوع السَّمنة بس الفرخة مش زى اللى فى التليفزيون
الفرخة بتاعتنا م الآخر هيه فرخة لينا بتاعة مسرحية المتزوجون
دى مش حياتنا
يا جماعة يعنى واحد زى اللى قتل أمه من كام شهر عشان مش راضية تعطيه تلاتة جنيه ..لو شاف مسلسل زى بتاع نينة نادية الجندى والعيلة كلها عندها عربيات.. يعمل إيه؟؟؟
طب صحافة إيه وللا طبّ إيه وللا شغلانة إيه عموما اللى تجيب الفلوس دى كلها؟؟؟ طب حضرتك هما خرِّيجين آداب إنجليزى مش تبع الشغلانات دى يعنى؟؟؟
حتى فى الروايات البوليسية تلاقى كلمة السرّ دايما حاجة مش بتاعتنا..يقول لك مثلا
!!الثلوج تذوب دائما فى الصيف
يردّ عليه
!!ماعدا فى القطب الشمالى
وانا مال اهلى بالقطب الشمالى وللا الجنوبى؟؟
ليه مَتِبْقاش كلمة السر مثلا
موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول:بيقولوا الكارت بعَشْرة بس بيبيعُوه بِحْدَاشَر

يا عينى يا عينى .. عينى ع الولد

رمضان كريم عليكم جميعا وكل سنة وانتوا طيبين
أنا اعرف ان واحد يلطُش واحد قلمين.. يعمل له مَحضر..أو واحد يكتب على وشّ واحد للذكرى الخالدة بالمطوَة يروح برضُه يعمل مَحضر..أو ان انا معرفش ادفع إيجار الشقة كمان كام يوم فصاحب العمارة يعمل لى مَحضر.. ده كله ماشى.. انَّما فيه حدَ يعمل مَحضر فى رئيس الجمهورية؟؟؟ الراجل الكبير؟؟؟هيه الدنيا جرى فيها ايه؟؟ الفرخة كلت بيضها؟؟وعلى يد مُحضَر كمان؟؟؟ومش مَحضر واحد دول اتنين..هيد أندشولدرز يعنى..يعمل مَحضَر وعلى يدّ مُحضَر فى آنٍ واحد
الحكاية الأولى ان فيه محامى أقصد كان فيه محامى قدم بلاغ فى سيادة الريس عشان هوه اتعذب فى السجن من تسع ست سنين كده المحامى اللى اتعذب مش الريس طبعا والريس معملش حاجة ولا خاصم الظباط حتى والبلاغ ده يوصل للريس على يدّ مُحضَر
والحكاية التانية ان فيه شاب ييييييييه أقصد كان فيه شاب من سوهاج راح يعمل محضر فى الريس عشان هوه مش لاقى شغل الواد طبعا اللى مش لاقى شغل مش الريس والحالة صعبة ومش عارف يتجوز المُزَّة اللى بيحبها وبحمد الله وتوفيقه وبمجهود خرافى من جهات عديدة الواد مرجعش لأهله من حوالى سنة ونص
طب الناس دى مش اتعلمت فى مدارس برضه؟؟ يعنى أكيد مرّ عليهم فى الرياضيات المسألة اللى بتقول بما أن فيه بلاغ فى الريس إذن فيه سلخ إن شاء الله.. وأكيد درسوا فى الفيزيا قاعدة النفخ فى الجلود المستطرقة.ودرسوا فى الأحياء إن كل إنسان له عمر افتراضى.ودرسوا فى الكيميا معادلة ان ميّة النار بتعمل طششش وهيه نازلة على الجلد بس لازم عامل مساعد وأكيد البلاغ ده العامل المساعد،وأكيد درسوا فى التاريخ مذبحة المماليك والرُّوس اللى اتعلقت على باب زويلة،وعرفوا من الجغرافيا ان المحصول الرئيسى للتصدير فى مصر هيه العُصْيان..ومادام هما فعلوا الفعل ده فأكيد درسوا فى اللغة العربية ان دايما الفاعل مرفووووع، والقاعدة الأولى فى الإنجليزى ان كًسْر أبدين إز فيرى دِنْجِرَس وعهد الله
طب البلاغ ده آخرته إيه؟؟ يعنى مثلا البوكس ممكن يروح الساعة تلاتة الفجر قصر عابدين؟؟؟
أنا مش زعلان على الاتنين دول.. أنا زعلان على الراجل المُحضَر الغلبان اللى راح بالمَحضَر لقصر عابدين!! تصوروا بقى راجل غلبان مُحضَر لابس البتاعة اللى كانت مغطية دراع الموظفين أيام زمان دى ونازل من على العَجَلة بتاعته قدام قصر عابدين ده لو افترضنا انه هيعرف يقرب ورَكَن العَجَلة على اقرب كُشْك حراسة وقعد يخبَّط على البوابة يا ساااااااتر.. يا جماعة ياللى هناااا.. طبعا بعد الخبْط هيطلع واحد من الحرس فيه إيه ياجدع انت؟؟ يردّ عليه بألاطة الموظفين: فيه هنا مَحضر جاى للمدعو..... استنى أما اشوف لمين..يلبس النضارة كعب الكُبَّاية بس الحارس يزعق له امشى ياجدع انت ده قصر الريس مبارك.. يرد الموظف : مبارك مين ياجدع انت؟؟ ده مش الاسم اللى عندى.. اللى عندى أوّل اسمُه محمد.. الحارس بعد صبر طب هات أمضِيلك على المُحضر.. يرفض الموظف ويقول بألاطة ما ينفعش يا حَضْرة.. لازم الأستاذ محمد بنفسه ييجى يستلم المَحضَر ويمضى .. ده نظام حكومة يا أستاذ مش لعب عيال

طب اللى انا اعرفه ان اللى بيتعمل فيه مَحضر بيروح القِسم .. طب الريِّس هيروح القسم؟؟ بس أكيد هيدهنوا القسم قبلها ويحطوا شوية ورد على قفا كل مسجون ويصرفولهم مكافأة خمس سنين سجن
أيوة أنا عارف الكلام بتاع ان الريس مواطن مصرى زينا ومن حقنا نعمل فيه محضر عادى وده حق يكفله الدستور وتحيا الوحدة العربية والعنب العنب وكل الكلام الجميل ده
بس ده الريس يا حدعاااااااان
وعارف ان لجنة حقوق الإنسان ولجنة الحريات وحركة ماينفعش الكلام ده وحركة لا والله ينفع وحركة سيب اللى ف إيدك وحركة معا ضد العُصيان وحركة رجال ضد السلخ والنفخ وأغنية اضربنى بالقلم وابعد عنى العصاية .. كل دول أثبتوا ان فيه تعذيب فى السجون
بس ده الريس يا جدعاااااان
وعارف ان فيه ناس هتقول ان الجبن مش طبعنا ولازم نقاوم ولازم مانخافش وما نتكسفش وعلى رأى المثل اللى يتكسف من بنت عمه، مايحدفش الناس بالطوب وحان وقت الثورة على الظلم وحان الآن آذان المغرب حسب التوقيت المحلى لمدينة القاهرة، أنا عارف الكلام ده كله
بس ده الريس يا جدعاااااااااان

أبسلوتلى
طب المحامى والشاب دول مش عارفين نتيجة فعلتهم الشنيعة؟؟؟ إذا كانوا مش خايفين على نفسهم طب يخافوا على المُحضَر الغلبان اللى خد المَحضَر.. وللا رئيس المحكمة اللى مَضَى على الأمر.. وللا وزير العدل اللى تبعه المحكمة .. وللا الناس اللى عرفت الخبر .. وللا أنا ياللى نشرت الخبر.. وللا انتوا ياللى قريتوا الخبر
وكمان بتضحكوا على كلامى اللى فيه سيرة الريس؟؟؟
دانتوا هتتسلخوا وتتعلق صوركم فى بانَرات على كل المدونات زى بانَر مصر مش كده .. وهيبقى اسم البانر مصر كده واللى مش عاجبُه والخلفية صورة بحر كبير عشان نشرب منه وانا ياللى كنت هادى وطيب وغلبان وأقدس الحياة الزوجية وأشارك فى الأثاث احتمال بعد ما نشرت الخبر يغيّروا اسم المدونة ويشيلوا كلمة أخفَ من العنوان
طب احنا ذنبنا ايه؟؟
ولذلك أنا من هذا المزنق أحب اوجه نداء لكل الأخوة حماة الوطن اللى متابعين المدونات بأننى بالأصالة عن نفسى وبالنيابة عن كل البلوجرية الغلبانيين مالناش أى صلة بالبلاغات الكيدية المقدَّمة فى الريِّس.. ومفيش تعذيب.. والمية تمام وبتنزل من الحنفية بطعم المانجة والفراولة..واحنا من كتر الشغل شغالين أكتر من شغلانة فى اليوم الواحد رغم اننا مش محتاجين فلوس الشغل لأن الأسعار فى الأرض بس هتعملوا إيه معانا بقى؟؟ شعب بيحب يكنز فلوس على قلبه وخلاص
أما بالنسبة للأخوة .. لأ مش أخوة .. الناس اللى عملوا المحاضر.. فلو كنتوا عايشين يبقى وقوع البلا اهون من انتظاره
وان كنتوا ميتين يبقى مادايم إلا وجه الله وانتم السابقون نحن اللاحقون
وان كنتوا مفقودين يبقى لازم نلبس كلنا أديداس
وكل ما افتكر الخبرين دول افتكر اللمبى وهوه قاعد يشرح لبنت الظابط رياض باشا المنفلوطى ازاى عمه سرق شقته
قام الواد الصغير عمل بلاغ فى عمو الكبير.. تفتكرى الصغير ده يبقى إيه؟؟؟

:قالت له ببراءة

!!دا يبقى حمار حضرتك

استحمِلى

..استحمِلي
..جايْ لِك مع الفجر اللي راجِعْ مهما موج بحرِك عِلِي
..لا يهمّني.. بُعد السَفَر

..ولا حتى سُورِك والغَفَر
..ولا خندق اليأس اللي بإْيدِيكي اتحفَر
..هَانْدَهْ واقول لِك: يا حبيبتي
..أسمع غُناكي وتنزلي
..استحمِلي
..فاضِل مَفِيش
..وعشان نعيش
..لازم يصبّرنا الأمل

..وماتسأليش إيه اللي ممكن يتعمل
!!دا البدر عايش في السما بْيصبُر لحدّ ما يكتمَل
الحلم قرَّب.. قرَّبي
مدِّي إيديكي وْجرَّبي
..وماتِيْئَسِيشْ مِ الحبّ.. لمّا بيتولد ويعيش عفيف
..واطَّمِّني.. أنا مش ضعيف
..ومانيش جبان

..لكن بابان طيِّب قوي
..وباحبّ اكون ابسط من الناس كلها
..لكنْ فى نفسى باكون قَوِى
لا الدنيا تكسر قلبي يوم
..ولا حدّ فيها يهزِّني
..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
..استحمِلي
..أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟
ازَّاي تغنِّي وتلعبي
وف قلبي عُودِك.. ملعبك؟

ازَّاي تذاكري.. ماتنحتيش إسمي فْ قلوب على مكتبِك؟
ازَّاي هتمشي ماتحلميش
إنك تقابليني في أقربْ مُنحنَى؟
ازَّاي تنامي وْتحلمِي بْفارس يجيلِك عَ الحصان
َ!وماكُونش انا؟
وان يوم قِدِرتي على الفراق.. هتكمِّلي؟
..استحمِلي
..دمعِك كِتِر

..حتى امّا اشوف ضحكِك.. بتنزل دمعه تايهه بتعتذِر
..دمعِك طريقي للكسَل
دا انا لما اشوف دمعه فْ عيونِك

..نسْج قلبي بيتنَسَل

..وبيتغسَل
!!من دمع عينِك... والخجَل
..ضحكه فْ عيونك... أبتدي بيها اللي جيّ
..بسمة شفايفِك... قلبي يفضَل بيها حيّ
..خليكي جنبي.. نخلِّي كلّ الدنيا ضيّ
..واستحمِلِي
لكِنْ
..يا نبْض النبْض فيَّه.. وْحِلم عمري وْفرحتُه
..لو يوم رماكِي اليأس في إْيدين الملَل
..ونَدَه خلاص قلبِك عليكي بْدون أمَل
..هاتي الرسايل.. والهدايا.. والصوَر
..بصّي بْخيالِك عَ اللي فات.. والذكريات
..افتِكْري ضحكةْ قلبنا فْ يوم اللُّقا

..افتِكري دمعة قلبنا فْ يوم الشّقَا
..افتِكري كلّ شريط حياتنا وحبِّنا
!!وانسِيه بقَى
..انسِي حبيب ضيَّعْتِي قلبه بْدون سبَبْ
..كان كلّ ذنبُه
..إنُّه قال لِك لمّا شافْ قلبِك تِعِبْ
..استحمِلي"
..جاي لِك معَ الفجر اللي راجِعْ
... "مهما مُوج بحرِك عِلِي

البقاء لله

مش عارف أقول إيه

ربنا يرحمك يا شيكو

اللهم لا تحرمنا أجرها ولا تفتنا بعدها واغفر لنا ولها

وحشتونى .. وهتوحشونى

السلام عليكم
كل سنة وانتوا جميعا طيبين وكل لحظة وانتوا جميعا سعدا يارب العالمين
وحشتونى جدا والله .. وعارف إنى مقصر مع الجميع فى الردود والبوستات والإيميل وكل حاجة بس اللى مصبرنى إنى باتعامل مع أخواتى اللى أكيد مقدرين الظروف
والظروف إنى استقريت فى القاهرة حاليا وطبعا ده سبب لكل اللى أنا فيه من بهدلة وتخبط فى كل حاجة وممكن كمان تضيفوا على ده إنى إلى الآن معنديش وصلة نت بسبب ظروف السيبر اللى هنا وربما تمتد الظروف دى كمان أسبوع أو اتنين وأنا باتكلم دلوقتى من سيبر بينه وبين النت تار بايت .. والنت مش هييجى إلا لما صاحب السيبر يشيل كفنه ويروح للنت الشركة..المهم حاجات كتيرة مخليانى فعلا مشتت ومخنوق من عدم التواصل معاكم على المدونة أو الإيميل ..بس ربنا يسهل
عموما أعتذر مرة تانية عن التعليقات والردود والتواصل على الماسنجر
بس عشان مش هاعرف أسيبكم كده من غير ما نتكلم شوية أنا بس عايز أسأل سؤال محيرنى من فترة وهاسيبكم وهامشى واتصرفوا انتوا بقى فى المدونة
السؤال بيقول ..علل.. يعنى افطن ..ههههههه
لا بجد السؤال بيقول
هوه ازاى الواحد يحافظ على وضعه وبرستيجه ؟؟؟ بأى طريقة؟؟ إنه يقرب من الناس ويتعامل بحب وود مع الجميع سواء صغير أو كبير .. ؟؟ وللا يبعد عشان يبقى عزيز بالنسبة لهم فيبصوا ليه بنظرة إجلال وإكبار؟؟؟ أى طريقة أصح؟؟
طبعا بتسألوا ليه باسأل السؤال ده؟
بصراحة بقالى فترة وأنا باواجه نصايح كتير من اصحابى وعارف انهم بيتمنوا ليا الخير بس احنا مختلفين فى التعامل مع الناس .. وأرجوكم ياريت تفهمونى صح وبلاش حد يظن فيا ظن سوء أو يتخيل إنى باتكلم كده لسبب وحش لا سمح الله
اصحابى بيقولولى ان التعامل بتاعى مع الناس بيقلل قدرى وبيخللى الناس تتجاوز معايا بالألفاظ وخصوصا ان انت شاعر وده كلامهم واتعملت لك ندوات كتير وكسبت فى حاجات كتير وبقى ليك اسم ما فى اللقاءات الأدبية وكمان عشان انت أكبر من معظم اللى انت بتتعامل معاهم .. وده مسبب لهم أزمة إحساسهم بالهزار اللى بينى وبين غيرى حتى لو كانوا اصغر
أنا بالنسبة لى رغم حبى لأصحابى ومعرفتى انهم عايزين مصلحتى وان صورتى تبقى حلوة قدام الناس إلا انى معترض على ده كله .. تعالوا بس نتكلم ببساطة وارجوكم خدوا الموضوع على انه موضوع عام لكل الناس مش منطبق عليا بس عشان اتكلم براحتى ومحسش بحرج

إيه المشكلة فى إنى أضحك مع كل الناس ؟؟ إيه المشكلة فى انى أتعامل ببساطة وأعيش حياتى بهزارها بجدها مع الصغير مع الكبير ؟؟؟ أنا عادة باعمل نفسى أوفلاين على الماسنجر وده مش عشان حاجة لا سمح الله بس عشان أقدر أكلم كل واحد واطمن على كل واحد لوحده مش مجرد كلمتين واكلم غيره .. واللى عارفينى وبيكلمونى عارفين إنى مش باغيب على أى واحد فيهم أكتر من أسبوع وأنا اللى باكلمه.. إيه العيب فى إنى أنا اللى دايما اللى بابدأ الكلام وانا اللى دايما باطمن مش اللى قصادى ؟؟
هوه ده يأثر على برستيج الواحد يعنى ؟؟؟
كان فيه صديقة عزيزة -هيه عارفة نفسها وأكيد بتقرا دلوقتى- فى اللقاءات الأولى بينا على الماسنجر من كتر محاولتى فى انى أطمأن عليها وعلى بعض ظروف عندها زهقت بهزار وقالتلى :انت وكيل نيابة؟؟
إيه العيب فى إنى اتصل بحد عشان اطمن عمل ايه فى الامتحانات مثلا أو فى مشكلة واجهته ؟؟

لازم يعنى استنى ان هوه اللى يتصل عشان أنا أكبر أو عشان أنا على حد قولهم شاعر ولازم يبقى ليا برستيج يعنى ؟؟
والله يا جماعة أنا مش باتكلم عن نفسى تحديدا .. أنا باتكلم عموما عن أى حد .. ليه بقى البرستيج بيتقاس بالبعد عن الناس والوقار المفتعل وإنى أحط رجل على رجل بكل غطرسة واسلم على حد بأربع صوابع ومخبى الخامس
أنا مش هاتكلم كتير يا جماعة تانى .. عشان الكمبيوتر بدأ يطلع لسانه .. أنا هاسيب الموضوع والنقاش مفتوح وأنا والله مش عايز مدح ولا كلام من ده .. لأن احنا متفقين اننا أخوات وانتوا عارفين معزتكم عندى وانا عارف معزتى عندكم .. لكن كل اللى انا عايزه اننا نتكلم ونتناقش .. يا جماعة حب الناس هوه الكنز الحقيقى .. وأى حد بيغلط ويتجاوز باللفظ معايا أو مع غيرى مسيره هيعرف ويرجع فى رأيه لما يحس قد إيه الطرف اللى اتجاوز معاه بيحبه وبيعامله أحسن من معاملته ليه
عموما تانى كل لحظة كل ثانية وانتوا طيبين وبخير
سلام جميل وكبير جدا لكل أهل بورسعيد وكل مدونين بورسعيد اللى اتشرفت انى شفتهم وكلهم أصغر منى بس شرف ليا انى عرفتهم .. كنت سعيد جدا معاكم .. وسعيد بمدونين مصر كمان اللى كانوا موجودين..وسعيد بأحمد فؤاد أخويا الصغير وكل مدونين الشرقية .. وسعيد بصوت على الجميييييييل جدا فى الحفلة وكل حفلة وانت سعيد ومتألق يا على .. وزادنى شرف انى كنت ضيف على صديقى العزيز أحمد عيسى البورسعيدى فى شقتى .. وأنا مش باذلك يا أحمد بس فعلا كنت سعيد بيك جدا ويارب تتكرر.. وبالمناسبة ألف ألف مبارك لمها عيسى يا جماعة على الخطوبة السعيدة .. وكمان ألف مبارك ولو انها متاخرة لإنجى .. بس انتوا عارفين الظروف ومعلش على عدم تظبيط البوست كويس ان الكمبيوتر بيكتب اساسا
مش عارف ليه حاسس ان البوست قلب على برنامج ما يطلبه المستمعون
عمومااااااااااا
هتوحشونى جدا
وربنا ما يحرمنى منكم
دعواتكم

الحقونااااااا بقى

جميل قوى اللى بيحصل ده والله .. جايز أكون هاتكلم عن حاجة قديمة بس انا سمعت عن الموضوع ده من فترة إنما انا لسة شايفه بعينى امبارح .. عارفين طبعا مسابقة ملكة جمال مصر بالصلا ع النبى .. ومادام عارفين مسابقة ملكة جمال مصر يبقوا طبعا عارفين مسابقة ملك جمال مصر بالصلا ع النبى برضه .. ومادام العريس هيتجوز يبقى العروسة هتتجوز ..فيه بعض ناس حااااااااقدين عايزين يبوَّظوا سُمعة المسابقة العظيمة دى اللى هتختار لنا البنت القدوة والولد القدوة .. الاتنين اللى هيشيلوا عَلـَم مصر ويتحزِّموا بيه فى أعرق المسابقات العالمية
الأب والأم شافوا صورة بنتهم ع المجلة فى المسابقة وهيه لا مؤاخذة استغفر الله العظيم يعنى كاشفة شعرها .. العِرْق المصرى الحِمِش اتنفض فى الراجل وقال ازاى بنتى تكشف شعرها والموضوع كِبِر وراحوا عند الحاج وائل الإبراشى فى دريم
الصراحة وائل ما اتأخرش .. جاب الناس كلهم اللى لا مؤاخذة استغفر الله العظيم بناتهم كشفوا شعرهم غصبن عنهم فى المسابقة..والناس التانيين اللى أشرف مِ الشرف وعُمْر شعرهم ما اتكشف على حد .. وكمان جاب واحد اسم الله على جمال أمه كان مرشح ضمن ملوك جمال مصر.. لو وصفتلكوا ثقافته وللا أخلاقه وللا دينه وللا احترامه للقاعدين مش هتصدقوا .. مصر دى عظيمة يا ناس
بدأ الراجل المصدوم يحكى ازاى بنته ربة الصون والعفاف صرف عليها حوالى 50 ألف عشان الإعداد ومامتها سابت ولادها اللى فى الثانوية وقعدت مع بنتها فى شقة مفروشة مخصوص ليها عشان الإعداد..طبعا ما هو ده اسمه إعداد البنية التحتية .. وازاى مامتها علمتها وقالت لها اوعى يا بنتى حد يقول لك اكشفى شعرك .. مايوهات ماشى .. بيكينى عادى .. أحضان ولا يهمك .. إنما أستغفر الله العظيم تكشفى شعرك ؟؟ ده حتى يبقى عيب
الجميل بقى ان الراجل مش متضايق من إن بنته كانت كما ولدتها أمها فى المسابقة .. هوه متضايق بس عشان صورتها جت فى المجلة وشاف الصبيان المراهقين يباخدوا المجلة كل واحد يوم فى بيته زى فيلم ثقافى
وجايبين بقى ناس تدافع عن المسابقة منهم واحدة كانت فى المسابقة والله العظيم ما انا عارف دى كانت بتتسابق ليه .. دى ممكن تمسك لهم الفُوَط عند حمام السباحة .. ده آخرها يعنى .. ومامتها اسم الله صاينها وحارسها
والبنت قاعدة تصرخ انتوا بتظلمونا .. احنا اتعلمنا حاجات كتير..احنا اتعلمنا ازاى نعمل خير.. أفهمها دى بقى !!! يعنى عمل الخير عايز مسابقة وتعليم؟؟ يعنى عشان اروح دار ايتام وللا مكفوفين لازم افتح كتاب كيف تعمل خير؟؟
احنا اتعلمنا ازاى نحب بعض.. أيوة أيوة فعلا .. هما خدوا كل ملكة جمال وقعَّدوها مع ملك جمال وعلموهم ازاى يحبوا بعض ويجيبوا لنا ملوك جمال صغيَّرين نتنطَّط بيهم بقى قدام الشعوب الجهلة التانية
وكله ولا الأستاذ ملك الجمال .. يا عييييييينى .. قمر يا أخواتى قمر .. جايبين صورته وهوه ماشاء الله عريان زى الفل وواقف بيتمنى انه يفوز عشان يمثل مصر ويضحى بعمره فداها زى أجدادنا ما ضحوا عشان احنا نعيش بكرامتنا فى حرب 73 مثلا أو غيرها وتخيلت ان منظم المسابقة بيناوله البشكير عشان يستر نفسه فيقول له شكرا يا فندم .. يرد عليه المنظم ويقول له مصر هيه اللى جايبالك البشكير يا رأفت قصدى يا ميمى
الجميل بقى ان كل أولياء الأمور ماضيين عقد قبل الكلام الفارغ ده على كل اللى هيحصل .. يعنى يا جماعة باختصار كل أب وأم عارفين ان بنتهم على رأى سعيد صالح ماشاء الله ماشاء الله .. بنتك هتشتغل رقاصة ماشاء الله ماشاء الله .. هترقص وتفتح ماشاء الله ماشاء الله
اللى عجبنى ان وائل الإبراشى كان بيعمل اللى عليه بصراحة .. يروح للراجل المنفعل ويقول له والله هما ما شتموش حضرتك هما بس بيقولوا انك بتتاجر ببنتك وزعلان عشان مكسِبِتْش وان هنادى أخدها الوبا زى دعاء الكروان
الراجل يتنرفز ويشتم يروح وائل يقول للتانيين هوه بصراحة مش بيشتمكم بس هوه بيقول ان بنتكم مكنتش بتبات فى الفندق ومشيها بطال وعايزة تتشهر .. بس هوه مشتمش الصراحة
الاب بيقول انه راح لبنته وشافها وسلم على اصحابها الملكات والملوك طبعا وقال لهم شدوا حيلكم ياولاد واطمن جدا طبعا لما لقى ملوك فى القعدة .. عشان لو اى ملكة اتضايقت تلاقى ملك بيهون عليها .. وسبحان الملك
يا جماعة والله العظيم اللى بيحصل ده حراااااااااام .. مصر مش كده يا جماعة ..مش شوية بنات وولاد أقل لفظ يتقال عنهم انهم ما اتربـَُوش حتى .. ده الولد بيقول للمحامى اللى كان قاعد ومتغاظ زيى انت بتسوأ سمعة الشعب المصرى !! ياسلام !! هوه مين اللى بهدل البلد غيركم ؟؟.. جدودنا ضحوا بكتير عشاننا واحنا عاملين مسابقات عشان ملكات وملوك الجمال .. خايف اسأل سؤال الناس تفتكر انى بس واخد المسألة بمنظور دينى .. هيه البنت اللى كانت عريانة طول اليوم .. كانت بتصلى امتى ؟؟ والولد اللى كان فى حمام السباحة طول اليوم مع الملكات وحاطط على شعره نص كيلو جيل مسك المصحف كام مرة .. طب الولد وللا البنت دى يعرفوا ايه عن اى حاجة؟؟؟ طبعا كان باين مستوى ثقافتهم من كلامهم فى الحلقة عشان محدش يظن انى بافترى
أنا مش باتكلم دينيا بس يا جدعان ..أنا باتكلم دينيا ودنيويا وأخلاقيا وعرفيا وكل حاجة ..دا انا معرفتش أحط صورة للمسابقة فوق البوست عشان اتكسفت والله
كل اللى اتمناه ان ينزل قرار من النهاردة بتحريم المسابقات دى من هنا .. بنات مصر مش محتاجين مسابقة عشان يبقوا ملكات جمال .. بنات مصر ملكات اصلا عشان بيحترموا دينهم وأخلاقهم وعاداتهم .. شباب مصر مش محتاج مسابقة عشان يبقوا ملوك جمال .. الشاب المصرى راجل من يومه مش بالجيل ولا البنطلون الواقع ولا الصور العريانة ليه بالملابس الداخلية .. شباب مصر رجالة عشان هما اللى بيصنعوا تاريخ البلد دى..دين .. ادب .. فن .. ثقافة .. معرفة .. فكر .. سلام .. حرب .. شباب مصر فيهم كل حاجة حلوة
بسم الله الرحمن الرحيم
إن الله لا يغير ما بقوم حتى يغيروا ما بأنفسهم

مصطفى الجزار .. سفير الشعر المصرى فى أمير الشعراء

مش هاتكلم كتير عن الشاعر ده .. اقروا وانتم تحكموا
الاسم: مصطفى الجزار
من مواليد محافظة الجيزة، بجمهورية مصر العربية
حاصل على ليسانس الآداب، قسم اللغة العربية، من كلية الآداب بجامعة المنصورة
دبلومة المعهد العالي للدراسات الإسلامية، ودراسات تمهيدية للماجستير
يعمل حالياً مصحِّحاً لُغوياً بكبرى دُور الترجمة والنشر في الوطن العربي
: الإنجازات الأدبية للشاعر
· حصل على المراكز الأولى على مستوى جمهورية مصر العربية في عدة مسابقات شعرية أقامتها وزارة الشباب المصرية ووزارة الثقافة وبعض المؤسسات الأخرى، ومنها
· المركز الأوّل للجمهورية في المسابقة القومية للمناسبات الدينية (غزوة بدر) بقصيدته إن تنصروا الله
المركز الأوّل للجمهورية في مسابقة المجلس الأعلى للثقافة القدس الماضي والحاضر والمستقبل بقصيدته قدساه يا أماه عودي

المركز الأوّل للجمهورية في مسابقة مؤسسة اقرأ الخيرية سنة 1998م بمجموعة شعرية
المركز الأوّل للجمهورية (للمرة الثانية) في مسابقة اقرأ الخيرية سنة 2002م بمجموعة شعرية
· المركز الأوّل للجمهورية في مسابقة وزارة الشباب حول سيرة الرسول (ص) بقصيدته هذا محمد
المركز الأوّل للجمهورية في مسابقة (لقاء الأدباء والشعراء) التي أقامتها وزارة الشباب المصرية بقصيدته حربٌ ضد الـ... إرهاب
المركز الأوّل للجمهورية في مسابقة (أحلُم أن أكون) التي أقامتها مؤسسة الأهرام، ببحث عن شخصية أمير الشعراء أحمد شوقي
·مثَّل مصرَ في لقاءات دولية، في ليبيا عام 2000، وفي سوريا عام 2002، وفي السودان عام 2006
حصل على المركز الأوّل على مستوى الوطن العربي في مهرجان الشباب العربي التاسع الذي اشتركت فيه أربع عشرة دولة عربية، ونال الميدالية الذهبية للمهرجان في مجال الشعر، وذلك عام 1998م بقصيدته عروبتنا تناديكم
له ديوان شعر فصحى بعنوان (لا تذبحوا ضوءَ القمر)، وله عدة أعمال شعرية أخرى تحت الطبع

السيرة الذاتية كده خلصت للشاعر مصطفى الجزار بس السيرة الذاتية للإنسان مصطفى الجزار مش هتخلص إن شاء الله .. لما باشوف مصطفى باحس ان بينطبق عليه الحديث إن ربنا وضع لبعض الناس القبول فى الأرض.. تشوفه تحبه لأخلاقه وأدبه وظرفه وقلبه الأبيض .. وكمان شعره اللى خرج من مصر وبقى فى كل الأقطار العربية
أنا ليه باقول الكلام ده دلوقتى؟؟ وخصوصا انكم مش متعودين البوستات دى منى
مصطفى الجزار يا جماعة تم بحمد الله اختياره من بين أفضل 35 شاعر فى العالم العربى فى مسابقة أمير الشعراء .. والاختيار هيتم بينهم من خلال رأى لجنة التحكيم وكالعادة بتاعة المسابقات من خلال رسائل الموبايل
ميعاد البرنامج

قناة ابو ظبي

كل جمعه الساعه 21:45
برنامج أمير الشعراء
كل اللى نقدر نعمله لمصطفى اننا ندعى ربنا انه يوفقه فى المسابقة لأنه إنسان وشاعر جميل وفخر لكل المصريين ان يتم اختيار واحد من مصر للمرة التانية بعد أحمد شوقى عشان يبقى أمير الشعراء حتى مع الفارق طبعا
وكمان يا جماعة يا ريت شوية رسائل فى الخمسينة للراجل .. نتفرج على البرنامج ونبعت رسايل باسمه للبرنامج عشان ده عامل مهم للفوز واعتبرهم يا عم غلطة الشركة فى الحساب ما هما بينهبوا منا كتير .. واعتبريهم يا ستى شوية رسايل كنتى بتعمليهم لمحمد عطية ..أيام ستار زفت أكاديمى ..الله يحرقه

ربنا يوفقك يا مصطفى
ربنا معاك
أنا باحبك وكلنا بنحبك

تحديث

يا جماعة بداية البرنامج هتبقى يوم 29 .. ياريت نتابع ونشوف رقم مصطفى كام ونبعت بضمير.. ربنا معاك يا مصطفى .. ويخلينا نفوز فى حاجة مفيدة يعنى

حقى وحقك

..كان زمان
..الحِلم كان واحد في قلبي
..إني احبِّكْ
..وامّا حبِّيتِك
..بقى الحِلم اللّي عندي ازّاي احبِّكْ
..داب خلاص الحبّ فينا
..وابتدِينا.. يبقى لِينا

..فوق بحور الشوق سفينه
..بس لازم لجْل ما نكمِّل طريقنا تبقِي عارفـَه
..إن نار الحبّ دايماً عايشَه خايفـَه
واللّي هيخلّيها تطّمّن وتكبرْ
..لو ترقِّي
..وْتعرفي حقِّك... وحقِّي
تعرفي إيه يبقى حقِّك؟
..حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ
وانّي احسّ القلب فاضي
..مهما شال من شوق وجابْ لِكْ
واجري والأشواق بتسبقني
..عشان اوصَل بسرعه.. بسرعه قبلِكْ
..حقِّك انِّ الدمع يفرَحْ
..ينتشِي
..يسكَر
..يدوخْ
..ينزِل بسُرعَه لمّا اقابلِك
..حقّك اني انطق: "باحبّك" كلّ ثانيه
..وارسمِك في القلب دُنيا... دنيا تانيه
..أبقى انا بالحبّ سُورْها
..وانتي تبقِي هناك قَمَرْها
وانتي نورها
..وانتي نارها
..والنجوم سابحه فْ مَدَارها
..وانتي أحلامها وجَمالها
..وانتي وِدْيانها وجبالها
..والكُبار فيها وْعِيالها
دنيا فيها تكوني وحدِك... يبقَى مَالهْا؟
..حقّك اني اكتب في رمش العين قصايدْ
..وفْ سواد العين قصايدْ
..وفْ جمال الروح قصايدْ
حقّك اني اقرا فْ ملامحِك كلّ يوم

..زيّ الجرايدْ
حقّك اني استنىَّ قلبِك
يوم

يومين

شهرين

سنه

للعمر كلـُّه
واني اشِيل مِن شوقنا شوكنا
..وْتاخْدي بسّ الشوق وفُلـُّه
حقّك انّ القلب ينطق
!أحلى شيء في الحبّ ذُلُّه
..حقّك اني ابقَى لِك البحر الحنَيِّنْ
وابقَى لو شدّيتي هادي
..وابقَى لو هدّيتي ليّنْ
..حتى لو مرَّه اتعاتبِنْا

..في العتاب تلِْقيني هيّنْ
..وادفِن الجرح فْ كياني

..مهما كان في عْينَيَّه بيِّنْ
حقّك اني اعمِل لِك انتي كُرسي فوق الشمس
..واعمل بينكو طاقَه
لمّا نور الشمس يضعف
..نورك انتي يْجيب لُه طاقَه
حقّك اني اقفل بيبانِك عن قلوب الخلق
..وادخُل لك بقلبي يكون بِطَاقَه
..حقّك انّي اسمع واسامِحْ
..حقّك انّي ازعَل واصالِحْ
وان قلبي يكون ديوان مُلْكِكْ
ما يدخلهوش في مرّه... وبْأوامرِكْ
..إلاّ أصحاب المصالحْ
..حقّك انيّ اهزمْ ظروفِكْ
..حقّك انىّ امنع خسوفِكْ
..وانيّ اشيل بالحب خوفِكْ

..أمَّا حقِّي يا حبيبتي
...حَقِّي إنـِّي
!!!إنـِّي اشوفـِكْ

دعوة للفهم

بقالى فترة يا جماعة عايز اتكلم فى موضوع مهم جدا..ربما يكون أهم موضوع فى البلوج ده من يوم ما اتعمل
من فترة يا جماعة والبلد بقت على نار ..وياريت تكون نار الأسعار أو نار التعليم أو نار البطالة أو نار أى مشكلة من مشاكلنا .. إنما للأسف النار بقت عبارة عن مجموعة من الآراء الغريبة والفتاوى والنقد الغير بناء بالمرة من المجتمع لبعضه.. طبعا بعضكم هيظن انى هاتكلم عن إرضاع الكبير وبول الرسول صلى الله عليه وسلم وفتوى تحويل الأموال من شبكات المحمول والفتاوى الأخرى الجديدة .. لا ياجماعة ..اللى أثر فيا مش الفتاوى دى .. اللى أثر فيا جدا رد فعلنا إحنا .. هنتكلم بس أولا بالراحة وبهدوء زى أى حوار ناس مثقفة فاهمة مش بتتكلم وخلاص
هنتكلم على الصعيد الدينى أولا
المدونات اتعملت عشان حرية الرأى تقول اللى انت عايزه بس خللى بالك ان حتى الحرية دى ليها ضوابط ..وخاصة إذا كنت هتتكلم عن حاجة انت ملكش فيها أو مش عارف جوانبها .. من فترة بادخل كتير على مواقع ومدونات ألاقى الناس واخدين الأمر بهزااااار شديد .. وكله قاعد يتريق على الدين وأولهم المسلمين نفسهم .. كل واحد وواحدة يمسك فى فتوى إرضاع الكبير مثلا ويقول رأى حضرته بدون حتى ما يكلف خاطره أنه يفتح كتاب ويتأكد قبل ما يتكلم أو حتى يعرف جوانب الموضوع قبل ما يقول رايه .. أنا عموما لا أعترف بحكاية صغر السن .. بس برضه لما يبقى واحد لسه عمره عشرين سنة وقاعد يحلل فى الأمر لمجرد انه قرا كام مانشيت من جرايدنا الموقرة على كام إفيه من برامجنا التافهة يبقى الأمر خطير فعلا يا جماعة .. فيه ناس مؤمنة بقدرة العقل جدا وأنا أول الناس دى وعارف ان ربنا وهبنا العقل ده عشان نحلل ونفكر وده بدليل ان ربنا سبحانه وتعالى قال إنما يخشى الله من عباده العلماء لأن هما الناس اللى بيفكروا وبيكتشفوا بعقلهم دلائل قدرة ربنا .. بس المشكلة إن الإنسان تزيد المسألة معاه قوى ويبدأ يفكر ويعترض ويحلل فى ثوابت الدين نفسه .. بمعنى انى ماينفعش أفكر وأعترض على ان الضهر أربع ركعات .. واقول أنا عايز اعبد ربنا اكتر أنا هاصليها خمسة .. ماينفعش طبعا .. لأن ده من ثوابت الدين ... يبقى الأول قبل ما نتريق ونتكلم لازم نعرف إن الفتاوى الى بتحصل اليومين دول كلها من أحاديث صحيحة لا جدال فيها بتاااااااااتا .. إنما المشكلة فى كيفية تحليل الحديث وبيان كونه حديث عام لكل البشر ام خاص بموقف .. هوه ده الاختلاف .. واللى هيحكم فى الاختلاف ده مش انت ولا انا .. اللى هيحكم فيه أهل الرأى والعلم ..يعنى من الآخر اى اعتراض حتى من باب السخرية فهو اعتراض على حديث صحيييييييييح للرسول .. حتى كلمة ازاى الكلام ده ؟؟؟ اللى بقينا بنقولها ف كل حاجة وكاننا بقينا أعلم العصر ده اعتراض صريح على ربنا والرسول .. ممكن بكل بساطة قبل ما تفتى وتبدأ تعترض وترفض وتقول ازاى وليه تقول لى قريت كام كتاب ؟؟؟ طبعا ممكن حد يقول لى أنا قريت تاريخ جيفارا وكتاب الرأسمالية والأمير لميكافيللى وقصص مترجمة وكلام كبير كده .. لا يا استاذ أنا باسأل حضرتك قريت كام كتاب فى دينك .. تعرف ايه عن علم الرجال؟؟ علم الفقه؟؟علم الحديث؟؟ والأخت اللى قادرة انها تتكلم ولا أجدع شيخ فى البلد ممكن تقول لى ايه الفروق بين اركان الصلاة وواجبات الصلاة وسنن الصلاة؟؟ إيه الفروق بين الماء الطاهر والمطهر والنجس ؟؟ ولو اتكلمنا عن أمورها أو أموره الشخصية تعرفوا ايه عن كيفية الغسل مثلا بعد الجنابة؟؟ مش دى أمور ثوابت .. قبل ما نصل لمرحلة اننا ناخد الأمور بالعقل لازم نملى العقل ده الأول .. حقك تعترض وتقول رايك بس اوعى تدخل فى مناطق انت مش قدها ويغرك عقلك ودماغك فى التفكير .. لأن مش كل الأمور بالعقل وزى ما قالوا لو كان الدين بالعقل لكان المسح على الخفين من أسفل .. مش هوه بيتوسخ من تحت برضه؟؟ .. مش العقل بيقول كده ؟؟.. يا جماعة احنا اللى اتسببنا فى البلبلة دى مش الفتاوى.. يا جماعة دى فتنة خلق القرآن اللى اتعذب فيها الإمام أحمد بن حنبل وغيره .. كانت الناس مستنية برة السجن عشان تشوف الإمام هيقول إيه عشان يسجلوه للتاريخ .. افتحوا بقى الجرايد والمجلات والمدونات وشوفوا كام واحد أحمد بن حنبل بيكتب لمجرد انه بيكتب وان ليه راى رغم ان مصادره غير موثوق بيها أساسا ..ارجع فى كل مجال لأهل العلم بتاعه .. الناس فاهمة غلط .. الواحد فاكر انه لو شتم وكسر التابو الثلاثى المقدس (الدين والجنس والسياسة) وقال كام مصطلح جامد وعرف آراء الناس الشيوعين والماركسين والاشتراكيين وغيرهم يبقى هوه كده المثقف اللى مافيش غيره .. لا يا جماعة بعد إذنكم .. الثقافة عنوانها البساطة .. اتكلم واشرح بس بسط الأمور واتكلم بحب وود ومنطقية لأننا فى الآخر جيل واحد ولازم على الأقل نفهم بعض.. حتى مشايخنا معدش ليهم احترام فى قلوبنا .. أنا عارف ان اختلاف الآراء عامل بلبلة اليومين دول بس ايه يعنى .. من قديم الأزل وفيه اختلافات ومذاهب واحنا اللى استفدنا منها .. يبقى لازم أهل العلم يتم التعامل معهم باحترام وتوقير وخصوصا لو كنت عارف بينك وبين نفسك انك ملكش فى الموضوع من اساسه .. شوف الفتوى واستغرب عادى وابحث بنفسك واسأل غيره وغيره وغيره .. مش ربنا خلقك للعبادة برضه ؟؟؟ مش دينك وأموره عبادة ؟؟؟ ابحث يا عم
والمشكلة أسلوب الحوار نفسه بقى مستفز .. كله بيشتم فى بعضه ومش عاجبه حد .. حد يصدق ان واحدة مفكرة عصرية قالت لو الرسول بنفسه جه وقال لى البسى الحجاب أنا مش هالبسه .. قد ايه ممكن الأسلوب يصل للدرجة دى .. وكمان حد يتريق على أسلوب كلام الشيوخ ونبرة صوتهم كمان .. طب ياستى ما انتى بتسمعى عماد بعرور وسعد الصغير وعادى يعنى مع الاختلاف الشاسع وودانك زى الفل مفيش حاجة
أنا أولا يا جماعة مش تبع أى جماعة عشان المسألة توضح بس أنا مسلم مصرى .. شاغلنى انهيار المسألة معانا للحد ده .. طب شوف القصص دى واحكم على أسلوب الحوار
قالوا للإمام ابن القيم :لقد اختلفت فى بعض الأمور مع ابن تيمية وهو شيخك .. رد وقال ايه؟؟؟؟ قال إن هدهدا جاء وقال لسليمان أحطت بما لم تحط به .. والهدهد هو الهدهد .. وسليمان هو سليمان ..
ياااااااااااااااااااه .. إيه الاحترام ده والعظمة دى .. وشوف دول مين كمان
شوف كمان .. أحد العلماء جاء إلى أمير وفضل ينصحه بعنف وشراسة وكان الأمير حليما فقال له .. يا هذا . إن الله بعث من هو أفضل منك إلى من هو أسوأ منى وقال فقولا له قولا لينا .. يقصد طبعا ربنا لما بعث سيدنا موسى وسيدنا هارون لفرعون
شوفوا الردود يا جماعة والحلم والأدب مع الاختلاف
طب شوف بقى الرجوع للحق والأدب والذوق فى التعامل
كان سليمان بن عبد الملك ماشى فى الموكب فنادى عليه واحد من الرعية عشان مصلحة فلم يلتفت .. وقال للجنود قولوله ييجى فى يوم المصالح فى القصر .. بس الراجل فضل ينادى ينادى .. فتوقف سليمان غاضبا وقال له ماذا تريد ؟؟؟ قال له يا أمير .. إن نملة تكلمت فى موكب سليمان فتوقف وتبسم ضاحكا من قولها .. وأنا لست بنملة وانت لست نبى الله سليمان...
ياااااااااااااه .. يا جماعة والله روعة المواقف دى .. وطبعا نزل الأمبر عن موكبه وأجاب طلبه فورا .. رجوع للحق مش لمجرد الكلام وان كل واحد عايز يبقى هوه الصح
نيجى للصعيد السياسى
نفس الأزمة .. عشان نتكلم وخلاص ونعارض بقينا بنقول أى كلام بلا أى فكر .. وبنمشى تبع الهوجة .. سايبين كل مشاكل بلدنا اللى مأثرة على كل واحد فينا وعاملين بانرات وبوستات عن جواز جمال مبارك مع شتيمة وسب شديد مش عارف ليه .. وكاتبين على البانر .. خديجة آه .. مصر لأ ... يعنى ايه ؟؟؟؟ يعنى مصر من غير جمال هتموت خلاص .. السد هيقع والاقتصاد هيبوظ عشان شهر العسل .. وايه يعنى لما اى حد يتجوز ؟؟؟ إيه المعارضة فى كده ؟؟؟ ولو ما تجوزش برضه هتنزل الصحف .. هوه ما اتجوزش ليه وتطلع كام إشاعة وكلام فارغ وجرايد وصحف فيها 40 ورقة كلام فارغ تتباع وخلاص عشان معارضة زائفة واهية .. وبرضه حتى صورة الريس .. هيه المعارضة انى أجيب الريس بقرنين وللا أتريق عليه ؟؟؟ عايز تنتقد قول ليه ..ومش عايز ده ليه وعايز ده ليه ؟؟؟ بلاش شعارات جوفاء فاضية بتغذيها عقول أفضى ... أظن الحمد لله قصايدى زى باخاف م الحكومة وكله قابض وغيرها تفهم الجميع انا اتجاهى ايه عشان محدش يقول انى بادافع عن حكومة وللا حاجة لا سمح الله .. بس أنا برضه عايز كل واحد يتكلم يقول هوه بيقول ايه وليه .. مش مجرد صور يا جماعة .. خلونا ننزل على أرض الواقع ونشوف البلد باظت قد ايه والسبب ايه بجد .. البلد مش هتنصلح بصور بقرنين يا جماعة ولا بعدم جواز جمال
أنا عارف ان البوست طويل جدا بس والله يا جماعة أنا تعبت من الصحافة اللى بيقولوا عليها حرة واللى بتخصص خمس ست صفحات يوميا أو اسبوعيا شتيمة فى شخص واحد لا غير بدون حتى ما تفيدنى ولا تتكلم عنى .. وفى الآخر تكتشف ان دى كلها أقنعة وسبوبة عشان تكملة الشكل الديمقراطى الهزيل فى البلد ..وأنا ليا أصحاب فى جرايد معارضة كتير بيحكولى على كمية المهازل اللى بتحصل فى دهاليز الصحافة وأخلاق الصحفيين الشرفاء اللى بنعتبرهم قدوة ووطنيين
عايزين نفكر ونعبر ونحلل بجد .. نقرا ونفهم قبل مانتكلم عشان ما نبقاش قشة فى مهب الريح .. اقول لكم حاجة اقروا البروتوكول الثالث عشر من بروتوكولات حكماء صهيون وشوف المخطط بتاع اليهود ماشى صح وللا لأ معانا .. وخللوا بالكم الأممين اللى فى البروتوكول هما اى شعب غير اليهود . إحنا يعنى
البروتوكول الثالث عشر:
ان الحاجة يومياً إلى الخبر ستكره الأممين على الدوام اكراهاً أن يقبضوا ألسنتهم، ويظلوا خدمنا الأذلاء. وان اولئك الذين قد نستخدمه في صحافتنا من الأممين سيناقشون بايعازات منا حقائق لن يكون من المرغوب فيه أن نشير إليها بخاصة في جريدتنا Gazette الرسمية. وبينما تتخذ كل أساليب المناقشات والمناظرات هكذا سنمضي القوانين التي سنحتاج اليها، وسنضعها أمام الجمهور على أنها حقائق ناجزة.
ولن يجرؤ أحد على طلب استئناف النظر فيما تقر امضاؤه، فضلاً عن طلب استئناف النظر فيما يظهر حرصنا على مساعدة التقدم. وحينئذ ستحول الصحافة نظر الجمهور بعيداً بمشكلات جديدة (وأنتم تعرفون بأنفسكم أننا دائماً نعلم الشعب أن يبحث عن طوائف جديدة). وسيسرع المغامرون السياسيون الأغبياء إلى مناقشة المشكلات الجديدة. ومثلهم الرعاع الذين لا يفهمون في أيامنا هذه حتى ما يتشدقون به.
وان المشكلات السياسية لا يعني بها أن تكون مفهومة عند الناس العاديين،ولا يستطيع ادراكها ـ كما قلت من قبل ـ الا الحكام الذين قد مارسوا تصريف الأمور قروناً كثيرة ولكم ان تستخلصوا من كل هذا اننا ـ حين نلجأ إلى الرأي العام ـ سنعمل على هذا النحو، كي نسهل عمل جهازنا كما يمكن أن تلاحظوا أننا نطلب الموافقة على شتى المسائل لا بالافعال، بل بالأقوال. ونحن دائماً نؤكد في كل اجراءاتنا اننا مقودون بالأمل واليقين لخدمة المصلحة العامة. ولكي نذهل الناس المضعضعين عن مناقشة المسائل السياسية ـ نمدهم بمشكلات جديدة. أي بمشكلات الصناعة والتجارة. ولنتركهم يثوروا على هذه المسائل كما يشتهون.
انما نوافق الجماهير على التخلي والكف عما تظنه نشاطاً سياسياً إذا اعطيناها ملاهي جديدة، أي التجارة التي نحاول فنجعلها تعتقد أنها أيضاً مسألة سياسية. ونحن انفسنا اغرينا الجماهير بالمشاركة في السياسيات، كي نضمن تأييدها في معركتنا ضد الحكومات الاممية.
ولكي نبعدها عن أن تكشف بأنفسها أي خط عمل جديد سنلهيها أيضاً بأنواع شتى من الملاهي والألعاب ومزجيات للفراغ والمجامع العامة وهلم جرا.
وسرعان ما سنبدأ الاعلان في الصحف داعين الناس إلى الدخول في مباريات شتى في كل انواع المشروعات: كالفن والرياضة وما اليهما . هذه المتع الجديدة ستلهي ذهن الشعب حتماً عن المسائل التي سنختلف فيها معه، وحالما يفقد الشعب تدريجاً نعمة التفكير المستقل بنفسه سيهتف جميعاً معنا لسبب واحد: هو أننا سنكون أعضاء المجتمع الوحيدين الذين يكونون أهلاً لتقديم خطوط تفكير جديدة.
وهذه الخطوط سنقدمها متوسلين بتسخير آلاتنا وحدها من أمثال الأشخاص الذين لا يستطاع الشك في تحالفهم معنا، أن دور المثاليين المتحررين سينتهي حالما يعترف بحكومتنا. وسيؤدون لنا خدمة طيبة حتى يحين ذلك الوقت.
ولهذا السبب سنحاول ان وجه العقل العام نحو كل نوع من النظريات المبهرجة التي يمكن أن تبدو تقدمية أو تحررية. لقد نجحنا نجاحاً كاملاً بنظرياتنا على التقدم في تحويل رؤوس الأمميين الفارغة من العقل نحو الاشتراكية. ولا يوجد عقل واحد بين الأمميين يستطيع ان يلاحظ انه في كل حالة وراء كلمة "التقدم" يختفي ضلال وزيغ عن الحق، ما عدا الحالات التي تشير فيها هذه الكلمة إلى كشوف مادية أو علمية. إذ ليس هناك الا تعليم حق واحد، ولا مجال فيه من أجل "التقدم" ان التقدم ـ كفكرة زائفة ـ يعمل على تغطية الحق، حتى لا يعرف الحق أحد غيرنا نحن شعب الله المختار الذي اصطفاه ليكون قواماً على الحق.
وحين نستحوذ على السلطة سيناقش خطباؤنا المشكلات الكبرى التي كانت تحير الإنسانية، لكي ينطوي النوع البشري في النهاية تحت حكمنا المبارك ومن الذي سيرتاب حينئذ في اننا الذين كنا نثير هذه المشكلات وفق خطة سياسية لم يفهمها إنسان طوال قرون كثرة
يا جماعة يا ريت نفوق .. قرب من دينك وابحث .. فكر فى بلدك واتكلم بكل ادب وحرية على قد ما تقدر

الشتيمة والبذاءة مش هتفيد

عشان كلنا هنموت وهيفضل الدين

وكلهم هيموتوا وهتفضل مصر

::تحديث

الشيخ ابو إسحق الحوينى قال إن حديث البول غير صحيح .. وأكد صحة الأحاديث الأخرى .. حديث الرضاعة وحديث النخامة كمان... وشرح سبب الأحاديث كلها ورأيه فى بلبلة الرأى والفتاوى ورأيه أعجبنى جدا حيث استنكر مناقشة الأحاديث دى فى هذا الوقت ولم يستنكر صحتها .. ياريت يا جماعة ندخل على يوتيوب ونعمل سيرش على ابو إسحق الحوينى ونسمع رأيه .. ربنا يهدى الجميع

الهرم .. الهرم .. الهرم

الأخ مفيد فوزى كان بيستضيف الأخ زاهى حواس على الأخ التليفزيون المصرى من كام يوم والأخ زاهى هو رئيس المجلس الأعلى لشوية الآثار الباقية.. أنا كنت قاعد عند الأسطى حمادة الحلاق اللى كان قاعد يقص شعرى اللى هوه ثروة قومية زى ما قلت قبل كده ..وعلى حين غرة لقيت الأستاذ مفيد بيسأله ويقول له : إيه رأيك فى الزبالة اللى ورا الهرم الأكبر والمنظر الغير الحضارى ده؟؟ لقيت الدكتور زاهى بيرد : دى مشكلة شعب يا أستاذ مفيد مش حكومة .. احنا عملنا سور والناس برضه رمت الزبالة ورا السور.. نعمل ايه يعنى ؟؟؟ وبعدين الناس دى لازم تعرف انها لازم تحافظ على الهرم ده لأنه في معنى كلامه يعنى سبب الخير اللى احنا فيه ده كله ..وخللى بالكم من كلمة الخير ده كله
أنا أول ما سمعت الكلمة اتنفضت على كرسى الحلاقة وقلت فى حسرة :وأنا اللى كنت فاكر ان أبويا كان له دور فى الخير اللى انا فيه ده .. الراجل ده فضل يضحك عليا ويقول انه بيسافر ويتغرب عشان العيلة والخير لينا وطلع ده كله وهم .. بعد العمر ده كله اكتشفت ان صاحب الفضل الحقيقى بعد ربنا طبعا هوه الهرم
وفضلت اتخيل ازاى الهرم كان بيصحينى من النوم الصبح عشان أروح المدرسة ويدينى المصروف .. وازاى صمم انه يربينى أحسن تربية حتى لو اتهد حجر حجر.. وازاى كان رحيم معايا لما عمى الصغير الهرم منقرع شافنى مع بنت الجيران وقال له سيب الواد يعيش.. وازاى أول ما اتخرجت شغلنى وادانى مرتب محترم وجوزنى وخلانى أخلف مش عارف ازاى وكبر عيالى والمشكلة انه مش صاحب الخير ليا أنا بس .. ده لكل المصريين ..يعنى م الآخر كلكم ولاد هرم واحد .. يعنى احنا أخوات فى الهرم بالصلاة ع النبى
واحد هيقول لى يا عم مصر بيجيلها خير كتير غير الهرم يعنى .. منين يا حسرة ؟؟؟ اوعى تقول لى قناة السويس ... انت بتصدق كلام الناس اللى بيقول لك نصيب الفرد المصرى من القناة كل يوم الصبح 7 دولار؟؟؟ تيجى ازاى يا عم ؟؟ أنا كل اليوم الصبح باقف فى الشباك محدش بييجى بظرف فيه فلوس ولا حاجة .. وبعدين سألت ابويا قال لى الله يكون فى عون الحكومة أصل يابنى فيه دول تانية عايزة تحفر قناة تانية وتكون أوطى من بتاعتنا عشان المية تنزل فى الواطى ويرووا قبلنا .. ويقفلوا الهويس وفؤادة تيجى تفتحه .. وياعينى يا عينى .. عينى ع الولد
ولما سألت جدى قال لى يابنى هوه احنا عندنا قناة اسمها السويس.. وكمان أنا سمعت ان قناة السويس دى اللى جاى على قد اللى رايح .. يعنى مش ملاحقين يصرفوا مرتبات الموظفين اللى فى القناة لدرجة انهم جايبين شوية مراكب كل موظف ينزل ياخد بقية مرتبه لفـّتين فى القناة ع السريع بالمركب
واحد تانى هيقول لى فيه كمان خير السياحة والآثار .. هيه فين الآثار يا حسرة ؟؟ دول كلهم هاجروا برة البلد بعد موسم الامتحانات .. نفرتيتى بعد ما خلصت آداب آثار راحت تكمل فى ألمانيا ومش راضية تيجى عشان النفس.. ده غير كل يوم بيكتشفوا ميت حتة مهاجرة برة البلد
مما سبق يتضح ان فعلا الهرم هوه السبب بعد ربنا فى الخير اللى احنا فيه ده كله .. وخللى بالك لازم قبل ما تطلع من بيتك تبوس ايد الهرم واوعى تزعق له عشان كده عيب وعقوق
أنا مش زعلان من ان الهرم موجود يعنى .. أنا بس زعلان من كلمة الخير ده كله .. نسيت أقول لكم وأنا راجع بقى ورايح اركب من الموقف بتاع العربيات لقيت اتنين سواقين ماسكين بعض مبهدلين بعض شتايم والذى منه عشان مين فيهم هيحمّل عربيته قبل التانى فى الموقف.. واحب اعرفكم ان أجرة العربية كلها تلاتة جنيه ونص .. أول ما شفت المنظر افتكرت كلام الأخ زاهى والخير اللى احنا فيه .. ضحكت ف سرى وقعدت أغنى : الهرم .. الهرم .. الهرم .. ينفع فى شتا أو صيف

أقول لك شعر؟؟

أَقُولْ لِكْ شِعْرْ؟
..سؤال قلتُه بْمَلل ليها وانا مُخنوق
وصاحبي ويّا صاحبتها قُريّبْ منّنا قاعدين
..في رحلة شوق
..عينيه في عْـنيها مش داريين بكلّ الناس
..عيونهم مليانين إحساس
وحتى الرّمش مابيرمشّ

خايف لو تضيع نظره
ونظرتهم تساوي كتير

...ماهيش نظرة عيون وخلاص

..ْعيونُه مركبْ اتطوَّح في بحر عْـنيها بيعافـِر

..وحالف إنه راح يوصل.. ولو طول الحياه سافـِرْ
..وبحر عْـنيها -من حظي- مالوش مَرْسَى

..مالوش آخِرْ

..واقرَّب منها تتّاخِرْ
!!!ومش عارف أنا اعمل إيه
دا انا بالصُّدفه جايْ ويّاه.. وهيّه معاها بالصُّدفه
وانا واقف وكات واقفه
ولاجل الرَّحمه والرأفه
..قعدت معاها نتكلم
..ومِ الأوّل وهيّه عن الكلام صامت.. ما بتردّش

..حاولت اقنعها إن الفيلم مش صامِت.. ما بتردّش
!وإيه الحلّ في اللي انا فيه؟
* * *
أَقُولْ لِكْ شِعْرْ؟
باكلّمها ووِشّي ناحية اصحابنا
..باشوف إيه اللي كان حاصِلْ
..ولسَّه عيونه وِسْط عيونها بتواصِلْ

..ولسَّه إيديه في قلب إيديها بتواصِلْ
!!!وانا قاعد بعيد عنهم... وبيني وبينها ميت فاصِلْ

!وهاعمل إيه؟

مافيش مواضيع
وكل ما اشوف كلام بيضيع
..ولمّا اسأل

تجاوبني على قدّ السؤال بالظبطْ
..وانا اتلخبطت

مش عارف ألاقي سؤال تجاوبُه كمان

..عِرِفْت الإسم والعنوان
..عِرِفت المهنه والكليه واصحابها اللي كانوا زمان
..وعُقدتها مع العربي

..وكانت عِلمي مش أدَبي
ومن ذوقي.. ومن أدَبي
..مانيش عايزُه يكون تحقيق

..أنا عايزُه كلام موصول ما بينـَّا.. من صديق لصديق

ساعتها القـَعْده تِشْرِحْ قلبها وقلبي

..ولو يعني ماهيش طايقاني

!!ليه في الأصل جَتْ جنبي؟
* * *
أَقُولْ لِكْ شِعْرْ؟
..مافيش غيرُه
..ولو قـَعْدتنا هتطوّل.. مافيش غيرُه
..ولو هنعيدها مِ الأوّل.. مافيش غيرُه
:قالتْ لِي بإيدْها

سَمّعني

كما لو كنت انا يعني
..غريق تايه

وهيّه القشه... من غيرها هاباتْ مقتول
وفي الآخر.. بدأت أقول
..عن الأمل اللي تاه ما رجعش من خوفي
..عن الحب اللي كان وانشقّ بظروفي
وفجأه

لقيتها لفّتْ لي.. وبصّتْ لي
وحسّيت الأمل بيعودْ
..وأوّل مرّه بالمح لون عينيها السّودْ
..وانا موعود وقلبي بالعيون السّودْ
ما نقدر مرّه نحْكمهَا
..ومن يومْهَا
..وانا قاعد معاها هناك

..وباسرح جوّا ننّ العين
..وصاحبي ويّا صاحبتها.. قـُريّب منّنا قاعدين
عيوني مركب اتطوّح في بحر عْـنيها بيعافـِرْ
وحالف إنه راح يوصَل.. ولو طول الحياه سافـِرْ
..وبحر عْـنيها -من حظـُّه- مالوش مرسَى

..ْمالوش آخِر
..يقرّب منها تتـَّاخِرْ
واشوف صاحبي بيلمحنا بطرْف عْـنِيِه
:ويهمِس ليها بالرَّاحَه
!!أَقُولْ لِكْ شِعْرْ؟
* * *

كله قابض

اللى مات فى البحر قابض
واللى فاز فى الماتش قابض
واللى بيسمُّوه معارض
برضُه قابض
واللى عَمََّال بسّ يدفع
إحنا مِ القلب اللى نابض
اللى مات فى البحر
مش من حَقـُّه ياخد لو جِنيه
هُوَّه مين كان ذنبـُه إيه؟
السفينه؟؟.. حلوه خالص
والعَدَد والحِمْل؟؟ .. ناقص
واللى قاعدين للطوارئ؟؟
كلهم وفْ صفّ واحد قاموا
بسّ البرْد قارِصْ
ثم إنّ الذنب مش ذنب المِلاحَه
اللى غلطان اللى مَيـِّت
المدارس كلها مكتوب عليها
(عَلّمُوا ولادكو السباحه)
واحنا بنقولها بصراحه
اللى ميـّت ذنبه عقلـُه
والغلََط مش عَ اللى ناقلـُه
الجريح جَابُه الشَبكْ
واللى مَات رِزق السَمَكْ
ثم إنّه مات شهيد
قبَّضوا الميت فى إيده الدايبه كام ألف اعتذار
(ميـِّت شَهيد)
واللى جايب جُون بيقبَض ألف ألف وفى احتفال
أصلـُه شاط الكوره جامِد مِن بعيدْ
واحنا ياللى رضِينا ناكل عِيشنا حَافْ
حَطـُّوا جُوَّه العيش حَديدْ
اللى بيمُوت فى البلد دى
لـُه مكافئة موت كبيره
واللى عايش بَرضُه مَيـِّت
بس مِتسَاق فى المَسيرَه
ياحبيبتى حبىِّ غيرى مش هجيلـِك
اللى عَمَّال بس يدفع
مش هينفع يشتريلـِك
مش هيركب يوم سفينه
أصْلـُه راكباه الهمومْ
وان رِكِبت فْ مرَّه صُدفه
برضُه مش هاغرق واقبض
علـّمونى ازاى اعوم
علـّمونا كتير
عشان نطلع نوابغْ
وامَّا فتـَّحنا اكتشفنا الدنيا .. ماشيه لدنيا تانيه
للى دَاهِن واللى صَابِغْ
كلّ يوم الصّبح ادوَّر عَ الوظيفَه
رِجلى دابِتْ
مش هينفع ابقَى لَعِّيب حتَّى واقبض
اللى ممكن بسّ يقبض
اللى يغرَق
واللى يلعبْ
اللى يلعب فى الملاعب
واللى يلعب فى الأرانب
واللى يهرب بالأرانب
واحنا أجبَن من أرانب
بس لينا شُغـْله حلـْوه
كلـّنا بندفع ضرايب
يا حبيبتى اللى حاصِل شيء يخللى التلج دايبْ
يبقَى بسّ ازّاى هنفضَل يوم حَبايبْ؟
اللى يخلـِصْ

مُش هيخلـَصْ
ابعدى عن حضن قلبى
بس قبل البـُعد
حَاسْبى
اوعِى مَرَّه تحِبّى واحِد
مِ اللى عَمَّال بسّ يدفَع أو يناهِضْ
:اسمَعِى كِلمِة حبيبِك
حِبّى واحِد
مِ اللى قابِضْ

ـــــــــــــــــــــــــــــــــــــ

أشرف توفيق

ابحث عن البوست الضائع

كان فيه هنا بوست بس أنا حذفته يا جدعان..طب ليه حذفته؟ عشان حسيت بجد ان فيه ناس بيدخلوا هنا عشان بيحبوا البلوج ده وعايزين ان دايما يكون فيه الجديد اللى دمه خفيف .. وفعلا حسيت ان فيه ناس متابعة بجد وبيقروا كل البوستات بجد وأول ماشافوا حاجة مش عجباهم الثورة قامت بس مش ثورة وحشة ..لا .. ثورة بكل الحب والود ..أنا سعيد جدا بده وسعيد جدا بمعرفتكم وتشريفكم ليه هنا.

كتير قالوا البوست مكنش دمه خفيف وده فى حد ذاته سبب كافى جدا ليه عشان أحذفه واحرقه بجاز أو سولار أيهما أسرع كمان واللى اتكلم عن موضوع البوست برضه بجد أنا كان قصدى كويس مش وحش يعنى

وكمان باشكر الناس اللى علقت أول ما البوست اتنشر .. باشكر الأباصيرى و camera girl و قاسم أفندى و إسراء و عمرو أحمد و

ابن الدكتور و متغيرة شوية و life و كل اللى بيحب المدونة دى

وان شاء الله اللى جاى يعجبكم

بحبكم قوىىىىىىىىىىىىىىىى

التاج التاج التاج .. أوصفلك يا حبيبى التاج

بقالى كام يوم كل ما أدخل عند حد البلوج بتاعه ألاقيه بيجاوب على شوية أسئلة خير اللهم اجعله خير اسمهم (تاج)..وانا أساسا مش فاهم يعنى ايه تاج .. بس ماشى .. المشكلة ان كل واحد يقولوله تحب تمرر التاج لمين؟ يقول لهم ناس من ضمنهم أنا ..أنا أساسا مستغرب ليه هوه عايز يمرر التاج رغم ان سكره مش كتير يعنى..المهم .. ناس كتير قالت كده زى عمرو وأحمد وزكريا _ إيه الفشر ده ..هوه فيه بلوجر اسمه زكريا أساسا_ المهم استنى يوم .. يومين ..إنى ألاقى حد بيخبط عليا يسلمنى التاج زى الديلفرى مفيش..اكتشفت خير اللهم اجعله خير ان الواحد اللى بيتمرر له التاج بيجاوب عليه من غير ما يروحله .. يعنى م الآخر صاحب محل الديلفرى هوه اللى بيطلب الزبون..وانا اللى قاعد اقول العيال دول كلمنجية ومفيش حد جابلى ولو حتى سؤال صغير ولو بالجبنة حتى
المهم على ما اكتشفت الحقيقة المرة دى ..لقيت ياسمين أحلى إنسانة _مش زينا يعنى_ بتبعتلى تاج تانى بسؤال تانى ..أصل هيه ناقصة..أنا قلت يا واد ادخل اعمل التاجين مع بعض جايز تدخل الخصم ..وللا تبقى أخف دم اتنين فى واحد هيد أند شولدرز يعنى ..وانتوا غلبانين وقلت أعمل التاجين واحد بإيدى اليمين والتانى بالشمال وكأنه صدقة يعنى ..وتبدأ المواجهة ..موسيقى تصويرية أن أن آآآآآآآآآآآآن
إيه اللى هيحصل لإيميلى بعد ما أموت بعد الشر عن حضرتى؟
ما يتحرق بجاز الإيميل .. يعنى انا أطنش العالم التانى اللى انا داخل عليه ده والبلاوى اللى الواحد عملها فى العالم الأولانى المعفن ده واقعد افكر فى أم الإيميل هيحصل فيه إيه؟ هوه إيميل دور كايم ياخى؟
اديت الباسوورد لحد قبل كده؟
لا طبعا.. لسبب منطقى جدا.. إن مفيش حد طلبه يعنى.. أى نعم لو حد طلبه مش هديهوله بس برضه.. مش عشان هوه حاجة رهيبة يعنى .. لأ عشان نوع من الخصوصية وخلاص..مع إن كل اللى عندى على الإيميل رجالة حتى البنات اللى عندى بميت راجل يعنى مفيش خوف .. وكمان الإيميلات معظمها شعر وقصايد لناس عشان اقول رأيى فيها يعنى من الآخر اللى هياخد الباسوورد احتمال يزود عليه رقمين ويجيبهولى تانى
لو آه طبيعة علاقتك بالشخص ده ايه؟
علاقة حلال طبعا.. مش عرفى يعنى
اسمك؟
أشرف توفيق
وبحس أحيانا إن أبويا سمانى كده عشان يشكر فى نفسه .. أشرف توفيق يعنى أحسن توفيق.. كل اما حد ينادينى يعنى بيشكر فيه هوه
اسم الدلع المشهور بيه؟
هوه مش دلع بالمعنى المفهوم .. أهو تغيير وخلاص .. ممكن أشرف باشا..أشرف بيه..شرف.. أشرووف..كده يعنى..إنما أخف دم ده اسم طلعه عليا صاحبى الشاعر الجميل عادل سلامة من زمان وبقت الكلمة معاى بين اصحابنا
عمرك؟
بقالى أربعة وعشرين يوم ابقى كده ستة وعشرين سنة .. لأن عيد ميلادى يوم 6/1/81 .. لا لا لا لا بلاش هدايا ولا فلوس.. خلاص يا ياسمين بقى وانتى يا إنجى ..يا بسمة خلاص انتى ودينا وإسراء وشيكو..والله عيد الميلاد فات يا علياء انتى وشيماء..رجعى فلوسك يا ميمو..وانتى خدى الدبدوب يا نور.. الله .. هوه عيد الميلاد مفيهوش رجالة وللا ايه؟.. مالكش دعوة ياد انت وهوه واطلع من بلوجى
برجك؟
الجدى طبعا..شوفوا انتوا صفاته لأنى متوااااااااااضع مش هاتكلم عن نفسى خاااااالص
مجال دراستك؟
خريج آداب إنجليزى المنصورة .. هما قالولى الإنجليزى حلو وله مستقبل .. والحمد لله مستقبله باين زى الفل بقاله تلت سنين.. يمكن مستقبله قدام شوية؟
شخصيتك نوعها إيه؟
بالكاتشب..بجد من غير هزار.. بسييييييييييط جدا .. آه وربنا .. والحياة بالنسبة لى رغم كل اللى فيها لذيذة يعنى والحمد لله بحاول أحول كل مشاكلى لنقط قوة وبعديها بسهولة.. غير إنى باخد كل الأمور الصعبة بابتسامة ومتساهل جدا فى حقى .. عارف انه عيب فظيع بس أنا كده م الآخر ومش هتغير..إن شاء الله
السفر بالنسبة لك؟
حاجة ممتعة جدا وجميييلة جدا .. أنا يعتبر رحت مصر كلها حتة حتة .. وسافرت بره مصر فى مؤتمر الشعر ممثلا لدولتنا المحروسة كشاعر كبير_حطوا تحت الكلام ده كام خط وغيروا اللون بتاع كلمة كبير_.. وطبعا كانت ذكريات السفر بالطيارة عايزة بوست كامل .. ربنا يسهل وأشرفكم بكتابته
م الآخر أنا بموت فى السفر والحمد لله باعرف أكون صداقات وذكريات جميلة فى كل مكان باروحه
المود بتاعك؟
هاااااااااااااااادى .. بابتسم علطووووووول .. حتى لو مليان مشاكل..زى ما انا كاتب فى البلوج مفيش حد واخد منها حاجة
وقت فراغك بتعمل فيه إيه؟
شوفوا بقى .. وقت فراغى جميل قوى .. أولا الشعر ده مهم جدا .. وخاصة إن المسألة عندى احتراف مش هواية الحمد لله..ثانيا أنا خطاط .. بحاول أطور كتاباتى وخطى.. ثانيا أنا قارئ نهم الحمد لله باحاول أقرأ كتير جدا فى كل المجالات مش الشعر بس..ثانيا النت مهم جدا برضه للتواصل بينى وبين الناس..ثانيا الخروج بره مهم ..لازم كل يوم يبقى فيه جديد .. مكان جديد اروحه..حد جديد قديم أشوفه ..هوه فيه كام ثانيا لغاية دلوقتى؟ المهم ..فيه حاجات تانية بس دى أجرها عند ربنا مالكوش دعوة بيها .. انتوا فاهمين؟
الأكلة المفضلة؟
المحشى.. البسلة ..الكفتة ..الفراخ طبعا..م الآخر اللى تجيبوه هاكله وأنا راضى
الصفات اللى خدتها من بابا؟
أبويا مكبر دماغه ودى أحلى حاجة فيه ودى عندى بقى.. ممكن البيت يبقى مولع من أى حاجة وهوه بيدور فى التليفزيون على فيلم لعادل إمام.. وربنا أبويا ده زى العسل
الصفات اللى خدتها من ماما؟
صاحبة واجب جدا.. ممكن تحرم نفسها من أى حاجة بس تعمل أى واجب تقدر عليه.. ممكن تجوعنى م الآخر عشان خاطر تأكل ابن خالة عمة أم أحمد حماة ابن محسن جارنا
أكتر 6 حاجات باحبها؟
ربنا والرسول صلى الله عليه وسلم والصحابة ومواقفهم اللى بتحسس الواحد قد إيه هوه صغير
الناس
الرحمة
لما حد يحبنى من قلبه
الدم الخفيف
التعرف على الناس وتكوين صداقات حقيقية..وطبعا بشرفهم بمعرفتى
أكتر 6 حاجات باكرهها؟
يادى الفكاكة ياجدعان!!! عكسهم طبعا..وللا طيب نقول
ولاد الخنازير الكفرة فى كل مكان اللى بيسيئوا للإسلام وللرسول
الغل والحقد
الظلم
ان حد يبقى عارف انى صح وبرضه يعمل اللى فى دماغه... ده يبقى غبييييييييييييييييييييييييييي
حد يعاملنى بأقل من قيمتى .. ساعتها التواضع اللى بجد بيظهر
إن حد يمرر لى تاج معفن زى ده ويدبسنى فيه
الشغل بالنسبة لك؟
هوه فين الشغل يا جدعان؟ إحنا هنفشر؟ أنا ممكن أجاوبكم على اعتبار إنه حيوان خرافى بشنب مثلا
الشغل بالنسبة لى كائن خيالى كان موجود فى العصور البالية وقد انقرض منذ سنين .. وقد أكدت تصريحات الحكومة انه انقرض لأن الشعب مش وش نعمة .. وقال آخرون بأنه بعد ظهور مقولة (إن فاتك الميرى اتمسح فى ترابه) أن الحكومة خايفة على هدوم الشعب من التراب
الشغل ؟ ياااااه .. الكلمة دى أنا قريتها فى القاموس يا جدعان..باب الشين فصل الغين وما يثلثهما..فاكرها والله
ع العموم الشغل خير قوم نتصالح .. الشغل خير
أنا طول عمرى الحمد لله حر والشغل مخلينى حر كمان .. يعنى من الآخر أنا داير على حل شغلى
الكمبيوتر والانترنت بالنسبة لى إيه؟
وسيلة جديدة بتخللى الناس تتشرف بمعرفتى
نخلـّى السؤال الأخير لآخر البوست
نيجى للتاج التانى .. عايزين خمس حاجات محدش يعرفهم عنى..طيب
أولا: كنت مش شاطر فى الكيميا بس شاطر فى المواد التانية فى الثانوى فالأستاذ بتاع الدرس كان فاكر من السمعة إنى عبقرى كيميا يعنى..كان بيعمل امتحانات كل خميس وجمعة كل أسبوع..أروح أنا آخد الامتحان من العيال بتوع الخميس وامتحن الجمعة بعد ما أذاكر طبعا وأجيب الدرجة النهائية أو أسيب نقطة عشان أسبك الطبخة..فى يوم بقى الأستاذ خللى الامتحان لكل الناس يوم الجمعة بس..طبعا رحت أنا وبحمد الله جبت 13 من 30..طبعا الأستاذ اتشل فيها وقال لى مالك يا عم أشرف ؟ قلتله بكل براءة أصل الامتحانات قربت يا أستاذ وأنا متوتر حبتين اليومين دول
ثانيا:انضربت مرة علقة محترمة فى الثانوى .. كنت مع ناس أصحابى بندافع عن واحد صاحبنا بيتشاكل..وخير اللهم اجعله خير لقيت الواد اللى بيشاكل صاحبنا جاب ييجى أربعين واحد كل واحد منهم شايل اللى ربنا قدره عليه من عدد اللحام والعجلات والسنج والذى منه .أقل واحد الضعيف فيهم يعنى كان شايل مطوه على قده.. وكل حاجة مترتبه يعنى كل واحد عارف هيمَوِّت مين تحديدا..الجميل إن فيه أدوات بيضربوا بيها كان شكلها حلو .. أنا بصراحة قعدت أستمتع وهما بيطحنونى..وأتساءل يا ترى العدة دى بتاعة إيه؟والمشكلة ان الواد صاحب المشكلة جرى وسابنا المعفن
ثالثا: نفس الشكلة اللى فوق ..رجعت البيت وانا أتوعد وكل واحد مننا مجهز نفسه للمعركة الجاية يوم الامتحان الجاى.. ولأننا بنمتحن فى بلد الناس دى مش فى بلادنا.. فكان آخرة التوعد والتهديد بتاعى إننا رجعنا من الامتحان بعربية الشرطة عشان ماننطحنش تانى
رابعا:واحدة طلبت منى فى لقاء أقول لها قصيدة ناقص دبدوب اللى فى البوست اللى فات..وبدأت فى القصيدة وفى نص القصيدة لقيت البت اتشحتفت فجأة وبتدمع وبعدين بتعيط وفى حاجات غريبة بقت بطرطش عليا .. المهم خير يا شابة؟ دا انا بقول قصيدة خفيفة يعنى.. مش يا أيها الراقدون تحت التراب يا ضناى. قالتلى أصل أنا لسة مارة بالتجربة دى دلوقتى ولسة مرجعة الدبدوب..طب وأنا دخل أهلى إيه ؟ ومن يومها وأنا كل ما أقول قصيدة بالمح البت الأول .. أول ما تنهنه بامشى وأسيبها تتحرق بقى
خامسا: مش فاكر حاجة والله .. ابقوا حطوا حاجة كويسة تليق بيا وأنا هامضى
السؤال الأخير بقى
أمرر التاج لمين؟
التاج ده على ما يوصل لباقى المدونين هيبقى ممرر حتى الثمالة.. حلوة الثمالة دى
أمرره لكل واحد يدخل عندى .. ولكل اللى مامة سيادته داعيه عليه وقايلاله إلهى إيديك توجعك من الكتابة على الكيبورد
بجد والله بجد.. أنا بحبكم جمييعا .. وبحب كل واحد قاللى أى كلمة من أول ما دخلت العالم ده بتاع البلوجرز وكل اللى انا اتعرفت عليهم رجال وآنسات
ويا رب يقدرنى واتعرف على الباقيين فى المرحلة اللى جاية.. ودى دعوة مفتوحة لأى حد يضيفنى عنده أنا أتشرف بيه طبعا. . الإيميل فى البروفايل
شفتوا .. قمة التواضع والله

ناقص دبدوب

..ناقص دبدوبْ
فتـّشت كتير هداياىَ الرّاجعه ومالقيتهوش
..دوّرت فْ كل هديه كتير بالطول والعَرض
..وقلبت الشنطـَه كمان عَ الأرض
ولقيتْ دِبله وجوابات وكروت
..وجنيه مقسوم وصُور وقلوبْ
..لكن برضُه
!! ناقص دبدوبْ

ـــــــــــــــــــــــــــــــــــــــ
..كل اللىّ فْ قلب الشنطه معاىَ بيستنظـَر
وبجدّ الشنطه بدون دبدوب
..مالهاش منظرْ
كل الجوابات ممكن يكتبها حبيب غيرى
والدِبله خلاص موضوعها اتشال من تفكيرى
والباقى حاجات بتكون دايماً بين أىّ اتنين
..وبتتكرّرْ
..وفْ شنطة كلّ حبيب وحبيبه هتِلـْقِى حاجات منهُم واكترْ
وهتـِلقِى شموع ودموع وفرَح وأمَل ساكِنْ
مُمكِن
..لكِنْ
!! مش كل حبيب بيجيب دبدوبْ

ــــــــــــــــــــــــــــــــــــ

وازّاى انساه؟
وانا كلّ ايامى الحلوه معاكِى .. معَاه؟
..أيام ماعشقتـِك قبل ما اقول
..وايام ماحلمتـِك قبل ما اطول
وايام وايام بتفوت على طول
وانا وانتى فْ كل دقيقه بنبـْنى جنينة حب وشوق وأمَلْ
وانا قلبى الدِيبْ
..على إيدِك والله لقيتـُه حَمَـلْ
..كنت امّا ازعلْ
ألاقيكى بتِجرى على الدبدوبْ
..لجـْلْ يصالحِك
وفْ أحزانِك بيمدّ إيديه
..علشان يمسح دمعة جرحِكْ
وفْ فرحِك
..كان من فرْحُه يطيرْ
..دا انا كُنت بغِيــرْ
لمّا اعرف انّه امبارح كان بين دراعِينـكْ
وباحسّ ساعات وكأنه حَرَس بينى وبينِكْ
..واتخيّل إنّه ساعتها خلاص قرّب منـّك
..وإديكى عليه
..وعنيكى عـَليه
:أجرى واطلـّع صورتِك واندَهْ
!! والله يا روحى أنا اللى شارِيه
وسنين بتفوت وقلوب بتدوب
وفْ لحظه خلاص يخدعنا كلام
..وتموت أحلام
..ويضيع دبدوبْ
ــــــــــــــــــــــــــــــــــــ

فاكراه واللىّ انتى خلاصْ ناسياه مع كلّ زمانى اللىّ عشقتـُه؟
طَب فاكرَه انا إمتى زمان جِبـْتُه؟
كات أول مرة انطقها (بحبـّـك) قدّامِك
وابصّ فْ عِينك قدّامـِـك
كات أول مرة أدخل فى عنيكى بدون ما اخْجـَـل
سلـّمت كتير على كل رموشِك عَ المدخـَل
وفْ لحظة لقيتنى فْ قلب عنيكى بدون صاحب
وجناين مَاليـَه ربوع عِينك مالهاشْ صاحِب
وساعات بامشيها وحاسِس إنىّ خلاص مجنون
من كُتر المشْى نسيت ان انا أصلاً فى عيون
ولقيتنى فْ ننّ عنيكى خلاص بعد المشوار
..ولقيت لى فْ ننّ عنيك جناين فـُلّ ودار
..ومشاعر حب وشوق وحنين وحنان جَارْفـَه
..عارفـَه؟
مع إنّ عنيكى مَهـِيش خـَضْرَه
!! الدنيا تملـّى فْ ننّ عنيكى تبان خـَضْره
..مليانه أمل بتحاوْطـُه الأحلام والخـُضْره
وانا كلّ ما انام
..قلبى الحيران بيلوم رِمشى
..وامّا اتحرّك واعمِل ماشى
بيقول لى : حرام .. لسّه هتمشِى؟
وسنين بتمرّ عليّ فْ نِنّ عنيكى السُودْ
وفْ لحظه لقِيتنى خلاص مَطْرودْ
..على ناصية أوّل رِمش بعيدْ
..من غير دبدوبْ
ـــــــــــــــــــــــــــــــــــــــ

قلبى الطيـّب
..مش قادر ينسى سنين فاتِتْ
..مش قادر يرمى حكايةْ حُبـُّه عشان غلطـَه ويقول :ماتِتْ
جايلِك من تانى بحلم جديد
جايلك وفْ إيده أمل وحنان ولـُقى ومواعيد
ومعاه دِبله

وجوابات

وكروت
وجنيه مقسومْ
وصور
..وقلوب
:جاىّ يقول لِكْ

...عَلشاااان خَطـْرِى
!!...خللـّى الدبدوبْ

ـــــــــــــــــــــــــــــــــــــــ

(ديوان (مرسال لحبيبتى

أشرف توفيق