اخبار

الخميس، 25 أكتوبر، 2007

من أطلق الرصاص على محسن بتاع الفول؟؟






أنا عايز أعرف بقى فيه كام واحد غَنِى فى مصر؟؟
لا حضرتك.. مش الغِنَى العادى بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات 4*4=16 وحمامات السباحة والبودى جاردز اللى الواحد فيهم عضلة دِراعُه أتخَن من بطنى لما آكل مَحشى
كام واحد غَنِى فى مصر بقى؟؟
حضرتك السؤال ده منطقى جدا بعد الوجبة الدسمة من شلل الاطفال اللى شفناها فى مسلسلات رمضان.. والحمد لله كلنا ختمناها وشدِّينا حيلنا كمان فى العشر الأواخر
أنا ماشفتش ولا مسلسل بصراحة إلا أول يوم رمضان عشان كنت فى بيتنا.. المهم خير اللهم اجعله خير المسلسلات كلها عبارة عن عربيات شيروكى وبودى جاردز وحمامات سباحة ومجوهرات ودهب وياقوت واحمدك يارب
والخلافات كلها ازاى الملياردير ده زعَّل الملياردير التانى.. فالملياردير التانى خسَّر الأولانى كام مليار.. وبعدين اتصالحوا فى الآخر وكل ملياردير باس الملياردير التانى من بُقُّه والمسلسل خلص زى الفل
والأخت نادية الجندى.. أخت إيه؟؟؟ نينة نادية الجندى صحفية شريفة أى وعهد الله وبتدافع عن الأخلاق وبتجرى ورا الخبر والمستندات والصحف كلها واقفة على رِجْل
أيوة حضرتك فين الكلام ده بقى؟؟ صحفية إيه اللى بتلفّ وتتعب وتتنكَّر وتتقتَل وتتخطَف عشان خبر وللا قضية فساد؟؟؟
كنتوا اكتبوا فى تِتْر المسلسل بقى هذه الأحداث لا تمت للواقع بصلة وأى تشابه فى أرض الواقع يبقى انتوا اللى هُبْل
كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض..وعدوّ النهاردة حبيب بُكرة..مادام مرتب رئيس التحرير المعارض بيعَدِّى 35 ألف جنيه شهرياً ده غير نِسْبته من الإعلانات تبقى الحياة زى الفل ومفيش مشاكل ولا فساد
فكَّرونى برضُه بأفلام خالد يوسف الأخيرة.. الأبطال كلهم أغنيا بالصلا ع النبى.. حتى البواب عنده هيونداى على قَدُّه.. ورايحين يتفسحوا فى شاليه أى واحد فيهم ما كلهم عندهم شاليهات صلوا ع النبى وبعدين مالقوش حاجة يعملوها ولا يفكروا فيها قالوا يللا نلعب ويجا..طب بالله عليكم حدّ كِدَه يقعد جنب موظف راجع من شغله فى المترو .. ويقول له:لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك
وللا العلاقات بين الجنسين.. دى بقى عايزة بلوج كامل..أى حد مذكر بيروح بيت أى حد مؤنث..والحد المؤنث عايش فى بيت أى حد مذكر..وطلع بالشيفروليه واحنا قاعدين.. وحَمِّل ع الشيفروليه واحنا قاعدين
فى فيلم وسط البلد محمد نجاتى بيقول لهند صبرى تعالى معايا الشقة.. هند صبرى بكل براءة وطُهْر قالت له:مفيش مشكلة..أنا اعرف ان الواحدة تروح شقة الواحد تشرب شاى ..تقعد تتكلم شوية..بس المشكلة ان الناس ممكن يفهموها غلط
طبْ حدّ يجيب كوباية عصير قصب بقى للراجل اللى اتجنَّن ده يااخوانا اللى هوَّه أنا
يعنى الواحدة تروح شقَّة الواحد تشرب شاى..اتمَنَع الشاى من البلد ما عدا فى شقة المحروس؟؟ وانا اللى عامل فيها مابحبِّش الشاى وعُمرى ما شربتُه.. دا انا من بكرة هاشترى مخزون شهر من الشاى من جميع الأنواع
أيوة الغرض من ده كله حاجة واحدة..فين المسلسلات بتاعتنا احنا؟؟
احنا مش بنشوف الحاجات اللى بتحصل دى ياجدعان..حد منكم شاف قصور وبودى جاردز وعربيات زى اللى بيحصل مع ابطال المسلسلات دى؟؟
وحدّ منكم شاف التحرُّر الرهيب ده بين أى بنت وولد فى الحياة..وان البنت تروح له البيت عادى؟؟ وبلاش نتكلم اكتر من كده عشان أنا حاطط وشِّى فى الأرض دلوقتى
ولو موجود يبقى كام فى المِيَّة من سكان مصر المحروسة؟؟
يعنى مش عيب تبقى كل مسلسلات وأفلام مصر عن ناس احنا منعرفهمش..أو حتى عن نسبة لا تتجاوز واحد فى المية من سكان بلدنا الحبيبة بتاعة مشربتش من نيلها؟؟
حد هيقول ده حسد؟؟ اقول له أيون حضرتك .. حسد وحقد وغلّ وكُرْه ومقت ونفسَنَة وما خَفِىَ كان أعظم
فين عربية الفول وساندوتش الكبدة اللى برُبْع جنيه وتذكرة المترو والأتوبيسات الخنقة والموظفين الغلابة اللى فيه فتاوى قالت ان يجوز عليهم الزكاة..والشباب اللى ع القهاوى
فين النت اللى عايزين يحدِّدوه زى النسل وفين مشاكل التأمينات والمعاشات
فين مشاكل الميَّة والزِّبالة اللى بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه
فين مشكلة السَكَن والشباب اللى اتجوَّز على روحُه والبنات اللى بتشَمْشِم على عريس
مش هيَّه دى مصر؟؟؟

وللا مصر شوية صفقات وقصور وعربيات وبنات ستايل فى الجامعة بأحدث موبايلات؟؟
وللا يعنى ده عشان نفضل نقول ياريتنا زيهم.. ونفضفض عن نفسنا شوية
زى إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش فى جَوْدة السَّمنة حضرتك.. المشكلة مين اللى هيجيب لك الأصناف دى؟؟ دى الفرخة عندنا بتتقسم على أربع ليالى.. والشوربة بنشرب فيها أسبوع
وتلاقى الست الوالدة جايبة نفس نوع السَّمنة بس الفرخة مش زى اللى فى التليفزيون
الفرخة بتاعتنا م الآخر هيه فرخة لينا بتاعة مسرحية المتزوجون
دى مش حياتنا
يا جماعة يعنى واحد زى اللى قتل أمه من كام شهر عشان مش راضية تعطيه تلاتة جنيه ..لو شاف مسلسل زى بتاع نينة نادية الجندى والعيلة كلها عندها عربيات.. يعمل إيه؟؟؟
طب صحافة إيه وللا طبّ إيه وللا شغلانة إيه عموما اللى تجيب الفلوس دى كلها؟؟؟ طب حضرتك هما خرِّيجين آداب إنجليزى مش تبع الشغلانات دى يعنى؟؟؟
حتى فى الروايات البوليسية تلاقى كلمة السرّ دايما حاجة مش بتاعتنا..يقول لك مثلا
!!الثلوج تذوب دائما فى الصيف
يردّ عليه
!!ماعدا فى القطب الشمالى
وانا مال اهلى بالقطب الشمالى وللا الجنوبى؟؟
ليه مَتِبْقاش كلمة السر مثلا
موبينيل رخَّصِت كل كروت الشحن
يردّ عليه بفرحة: قُول وعَهد الله
فيغمِز له بعينه ويقول:بيقولوا الكارت بعَشْرة بس بيبيعُوه بِحْدَاشَر


هناك 50 تعليقًا:

أميرة ويلز يقول...

ههههههههههههههه
يخرب شيطانك العبقرى دة

تعرف انا كمان ماشفتش مسلسلات غير اول يومين بس مش لحاجة غير ان كان فى تخمة مسلسلات فى التليفزيون فعندت عليهم وقلت طب مش هتابع بقى
المسلسلات كانت كتيرة برخامة وفيها مط غتت دة غير المواضيع اللى شبه بعضها وبعيدة عن الواقع زى مابتقول
طب هما بيعملوا مسلسلات ليه اصلا
هى مش المسلسلات دى هدفها تسلينا وترفه عننا والا تحرق دمنا؟
واللى هيموتنى ناقصة عمر
حكاية رمضان اللى بيحشروه مسلسلات من كل صنف ولون
وعلى فكرة كان فى مسلسلات كانت بتكلم عن الواقع الى حد ما
زى عيال بوسى فى مسلسل عفريت القرش
واكيدفى غيره كان كويس
بس الكويس يبان فين وسط الهوجة دى
دة كل ممثل فى مصر عمل مسلسل
تحياتى ليك يااشرف ولعبقرياتك

simple girl.. ..simple dream يقول...

would u plz visit my blog and participate in my poll
i really need ur opinion


with my best regards

fnan_geology يقول...

ههههههههههههههههههههههههههههههههههههههههههههههههههههههههههههه


بجد مسخرة
والله عندك حق

الدراما والمسلسلات فى وادى واحنا فى وادى تانى

ويقلك دراما قال
صلى على النبى
وسلاااااااااام

manar يقول...

مرحبا استاذ
انا منار من فلسطين /نابلس
انا قرات البوست صدفة واعجبني كتير كتير وصراحة صار ادمان اقرأه كل يوم قبل دروسي /على فكرة انا كمان ادب انجليزي بس اصعب من المواد الي كنتو تاخدوها علشان هيك بتلاقيك اشطر مني يعني مو بكتير... بس كم من عشر انا اكيدة ههههه . المهم استاذ بال نسبة لموضوع البريستيج انا بتمنى ما تتغير اصلا محبة الناس كنز واصحابك همة الغلطانين وكتير كمان .على العموم انا حسيت انك كتبت هيك لتفضفض مو انه انت تايه ومو عارف الصح . و مو بيحكو" استفتي قلبك ولو افتوك الناس جميعا" والمهم ضميرك يكون مرتاح.
وكل كتاباتك اكتر من رائعة
خصوصا قصائدك على يوتيوب
صراحة قليلة عليك كلمة عبقري
طبعا ا للهم لا حسد
الله يحفظك وتضل بخير يا رب
سلامات

آلام وآمال يقول...

ما شاء الله عليك بجد
فعلا انت عملت نقد للدراما الرمضانية من وجهة نظر جديدة تماما
ههههههههههه

إنـســـانـة يقول...

ههههههههههههههههههههه

مصيبة من يومك .. وانا مال أهلى بالقطب الشمالى هههههههههههههههههههههههههههههه


لا بوست جامد كالعادة يااستاذى .. وبعدين فين حضرتك؟؟ وفين الجرنان اللى قلتلى عليه مجانى؟؟؟ .. ولا اللى عرفوا المعادى بقا مش قادرين يعبروا الغلابة اللى زى حلاتنا؟؟؟

اشطةةةةةة

انا علقت اهوه

وافتكروا الجمايل دى

:D

Marvel يقول...

هههههه...بوست جامد جدا...التليفيزيون مبقاش واقعي خالص...مفيش غير اعلان فيبيكس هو اللي بينقل الواقع للتليفزيون...الواقع المحسوس والمشموم

:D

خمسة فضفضة يقول...

السلام عليكم ورحمة الله وبركاته


بصراحه يعني ومن غير زعل

مسخررررررررره ...ههههههه

تصدق كنت لسه باقول لزوجي كلام شبه ده ، عن الحاجه ناديه والحاجه الهام والاخت يسرا كرم الله وجههم
مش عارفه هما فاكرين نفسهم بيعرضوا المسلسلات دي علي ناس هبله ولا هما اللي هبل
خصوصا بقي ابله ناديه اللي علي طول كده فاتحه مدرسة الشرف والنزاهه سواء في السينيما ولا في التليفزيون

المصيبه ان الحاجات دي بتلاقي القنوات الي تشتريها و المصيبه الاكبر انها بتلاقي اللي بيتابعها بشغف
يلا رزق الهبل علي المجانين
ودمتم بخير

hui mu han يقول...
أزال المؤلف هذا التعليق.
hui mu han يقول...

ههههههه ايه الغل ده
يعني انت مش عايز تتشل من المسلسلات المصرية طب ازاي امال
يعني مثلا مينفعش في الافلام الهندي ان الفلم يبقى واقعي زيه زي الدراما المصرية والا هيبقا عندنا فن عدل ودي حاجة متسرش عدو ولا حبيب
ترضى برضه لامثال نادية الجندي والهام شاهين يقعدوا في البيت ولا شغلة ولا مشغلة وتبقى مسلسلات ناضجة
استخفر ربنا واتغطى كويس ولو جتلك الاوهام دي تاني اعرف انها وسوسة مش اكتر

BaTresYa يقول...

على فكره ... بيدرسونا إن الإعلام مش لازم يوضح صعوبات الحياه دايما ... علشان كدا يا بيجيب الناس الاغنياء اوي يا بيجيبوا الناس الفقراء اوي نادر لما بيجيبوا الناس الوسط ... لأن الأعلام نوع من انواع الترفيه مينفعش يجيب لك الحقيقه على طبق من فضه يا إما كدا بيكون بينشر اكتئاب بدل ما بينشر ترفيه

hend...hanady يقول...

ايه ده هو الكارت بقى بحداشر ده انا جايباه بتناشر شوف النصب ...................ههه
يعنى هى جت على مسلسل نادية الجندى عندك غيره كتير والنهاية دايما بتبقى الحياة وردية يعنى مسلسل زى ابن عزو حد يقولى ممكن ان واحد استشيخ وربى دقنه يدخل السلك السياسى والله لو عملوا ايه
ولا رباطية الصحفيين اللى بيقولولك على مسلسل الملك فاروق انها مقصودة وفى ايدى خفية وغيره ده انت لو فكرت وانت فى بتكم فى سرك او اتمنيت ان الريس ربنا يطول لنا فى عمره يحصل له حاجه ولا يعيا هتلاقى المخبر جاى يقبض عليك

esraa يقول...

لألألأ ياأشرف

ده انت علي أخرك منهم

ليه كده بس؟

مش هي دي مصر؟

مش انت عندك العربيه بتاعتك والفيلا والشاليه

وكمان البادي جاردز ولا انت هتنصب بقي

عيب عليك كده

دعاء يقول...

مرحبا ازيك يا اشرف
انا بصراحة من مدة كده ملاحظة ان المسلسلات المصرية بقت بعيدة عن الواقع العربي حبتين خصوصا بعد دخول ممثلين وممثلات السينما على المسلسلات
يمكن عشان كده انا اتجهت للمسلسلات السورية اللي بحسها اقرب للواقع بتاعنا
بس ده ما يمنعش انك ناقد فني من الطراز الرفيع ونظريتك صحيحة مية بالمية
ربنا معاك
تحياتي

ساعه الغروب يقول...

بجد ما شاء الله عليك

بجد

روعه فعلا لميت تقريبا كل السخافات اللى كانت بتحصل لنا فى رمضان ى سطورك الوجيزه بالنسبه للمسلسلات اللى احنا شفناها

وبعدين قوللى كل دا من حلقه واحده

امال لو كنت شفت باقى المسلسل
بعيد عنك يا رب ربنا بجد رحمك انك ما كنتش موجود بقيت رمضان فى البيت

يعنى لا دورت على القيرشينات معانا ولا شفت طنط بوسى وهى بتدور على عريس او حب قديم وحبة حاجات تانيه كدا كتير مش عايزه ازود اللى انت فيه واحكيهالك بما انه ربنا اراد لك الرحمه منها

يلا ربنا يستر علينا بجد

والحمد لله على كل شئ

وشكرا ليك بجد من كل قلبى

محمود سعيد يقول...

أساساً أنا مش عارف اللى أطلق على الرصاص على هند علام ده مقتلهاش وريحنا ليه


مع إنى متفرجتش على أى مسلسل (علشان مش فاضى ، مش حاجة تانية)

صباح الخير يقول...

اشرف
انا بحب اقرألك ربنا مايحرمنا من كتابتك ويذيد من عبقرياتك انت رائع ربنا معاك وماتتجننش

حواديت وحكاوي يقول...

يا عم الحج
ديه عالم فاضيه وعايشه في ميه البطيخ
عربيات وفلل
الي ما في ممسل واحد صحي الصبح والعماص في عنيه
ولا واحده لسه متجوزه وجوزها صحي الصبح لقي شكلها مايعلم بيه الا ربنا
كل الحريم بتصحي من النوم والمكيااااج في ووشها
ديه عاااااااالم رايقه

غير معرف يقول...

مالك يا عم اشرف انت مكنتش كدا
الحقد الطبقي الي ظهر متاخر عيك ده..انت ناسي ايام جامعة المنصورة احنا كنا مسمينك ايه ..اوناسيس
الطالب الوحيد في جامعة المنصورة الي كان عنده يخت...وفيلا بتطير..
وبعدين مالك انت بالحاجة نادية الجندي ..دي مواليد 1938..يعني سبعين سنة بالتمام و الكمال....ولسه موزة ...وده لان الاصلي يعمر و التقليد يدمر ..
وبعدين انت تجاهلت موضوع مهم ...الحكمة من ورا الموضوع ...
مثلا..
هند علام ...
محدش يقدر يضرب نار علي نادية الجندي ...
قضية راي عام بتوجه رسالة مباشرة للناس الي زيك الي فاهمين الحكاية فوضي..
ان مفيش حد يفكر في يوم من الايام حتي وهو نايم ومتغطي انه يغتصب يسرا..
كله بالخناق الا الجواز بالاتفاق..
اي حد يفكر يغتصب يسرا حتي ولو كان ابن وزير ...هيروح ورا الشمس ويسرا مش هتسامحهه
..فاكر موضوع ظابط الامن المركزي الي حاول يغتصبها من عشر سنين ..
فين دلوقتي ..بينظم مرور علي كوبري مطار امبابة..
وغيره وغيره....
الملك فاروق مثلا
لازم نحترم القيمة الفنية للعمل
وهو بيوضح ان الملك مكانش بتاع نسوان
ولا قمار
...مماته هي الي كان مشيها بطال
ياعالم حد يجيب وفاء عامر الي ليها ملف في الاداب تمثل دور ملكة مصر حتي لو كانت شبهها في السلوك..
...
بتتكلم عن التفاوت الطبقي وانت عندك فيلا في المعادي...
ويخت في نيل المنصورة ..
وعمارتين في المعصرة وجي تقوي فول ..
سيب الكلام ده للناس الغلابة الي زينا...

bota يقول...

طبعا الموضوع يضحك كالمعتاد
وفعلا المسلسلات المصريه البعد عنها غنيمه
بس الموضوع جامد كالمعتاد
ربنا يوفقك

Amr Ahmed يقول...

ايه ده

اه يا بتاع المعادي

طب حد غيرك يتكلم

ياعم انت راجل عندك فيلا في المعادي

هههههههههههه

وبعدين لعلمك بقي

الفراخ الصغيرة احسن من الكبيرة
علشان الصغيرة بلدي يا معلم

لكن البيضا بتبقي كبيرة
افهموها بقي

ههههههههههههه
بوست جامد يا بوب

YHYيــوســف الـمصـرى يقول...

ايه ده يا اشرف باشا
كل ناس عرفت ان عندك فيلا فى المعادى ههههههه
الخبر انتشر اوى يا اشرف باشا ..ها اسُك على الفيلا بتاعت الزمالك ولا اشترى ؟
ههههههه
صباحو أر يا سيدى
ههههههه
بوست جامد يا باشا
تحياتى يا فاكهة المدونين

شقاوة شعب يقول...

بوست فى الجووووون

كان نفسى من زمان اتكلم عن عدم واقعية اللى بنشوفه فى التلفزيون وان هما بيقصدوا يعيشونا فى الاحلام عشان نفضل مغيبين عن واقعنا السياسى المؤلم
وده ان شاء الله يكون فى بوست قريب

اه بالمناسبة فى على الاقل 3 افلام خلوا البنت تسافر مع الولة عادى كدة فى الصراحة ويقضولهم كام يحبوا فى بعض فى الصحرا وكان شيئا لم يكن

shirry يقول...

اول مرة ازور المدونة دي ببس البوست
جامد جامد جامد

فعلا والله انا لما بقعد اتفرج علي المسلسلات والافلام دي بيجيلي حسرة رهيبة مصحوبة بفقعة المرارة
لان بلاقي ناس عايشيين حياة بمبي وفوشية ومعندهومش مشاكل زي اللي عندنا والفلوس دي لا تمثل لهم اي قيمة بالمرةوكأن المكنة عندهم في البيت
اما عن التحرر ف انت قولت بما فيه الكفاية
مسلسل نادية الجندي ف انا متفرجتش عليه لانها بتستفزني خلقة
بس بجد

جامد جامد

مستنياك بقي في مدونتي

ody911 يقول...

ههههههههههههههههههههههه

واحشنى كلامك والله يا أشرف

بجد يعنى واحشنى

بس بجد مشغول جدا

لما نشوف بعض إن شاء الله عن قريب

نبقى نرغى بقة


عادى بقة
أودى بيمسى

فيونكه يقول...

أول مرة أزور مدونتك
قريت قصيدة "استحملى" ف "بص وطل" وعجبتنى جداً
وكمان قريت "أخلاق ولاد البلد" ولما جيت هنا قريت البوست ده
دمك خفيف أوى
وفعلاً معاك حق
أنا برضه ناديه الجندى بتتعبلى أعصابى وأما عن العربيات الفور باى فور والفيلات فحاجه تفقع
وأيوه الواحد حاسس إنه بقى شبه نسناس موبينيل وهو بيحقد على ياسمين اللى إعلاناتها ماليه الشوارع فى حين إنه بقاله سنتين قاعد ف بيتهم

محمد العدوي يقول...

واحشني قوي يا واد ..



:D

عـلا - من غـزة يقول...


خلص الكلام كله

كل الي كنت عايزة اقوله اتقال خلاص :p

لكن محدش لسه عرف المجرم الي اطلق الرصاص على محسن بتاع الفول ؟؟

تحياتي :))

WhItE HeArT يقول...

هههههههههههههه
انا اول مرة ادخل على البوجاية دي لما شفت عند الناس مكتوب اخف دم لا بس بجد يخربيت شيطانك ياعم انا مش قادر ابطل ضحك وبعدين متجيش على الناس بتوع التليفزيون اوي كده مهم على رأيهم بيتعبوا اوي في التمثيل وعلى قد تعبهم بأه

بالتوفيق وبوست رائع

ريحانة يقول...

وماله ياسيدى الناس قلبهم فيه الخير
نفسهم يدوا فكرة للعرب والبلاد اللى غير مصر طبعا ان احنا ناس اغنياء وحلوين ومرتاحين
ومتحررين ومثقفين
ومش مهم احنا نموت من الفرسة بقى
على الاقل نريح
بلا وجع قلب

jomana يقول...

استاذ في سؤالين ازا جاوبتهم بعون الله يظهر مطلق الرصاص
اولا مين محسن الي بتقول عليه؟
تانيا عم محسن كان الفول الي بيعمله طيب ولا لا بس لازم لما تجاوب تكون نيتك صافيةو عقل متفتح نظرا لصعوبة السؤالين وعمقهم وزي ما انت ملاحظ السؤالين بصلب الموضوع مباشرة خد وقتك وماتتسرع
تحياتي لاخف دم
ملاحظة عظم الله اجركم بالدور الي خسرته ويتربى بعزك يا استاذ يوسف
سلام

Shower-Mirror يقول...

اشرف باشا ... واحشنى وربنا

طبعا انا متفق معاك تماما و مش عايز ازود فى موضوع المسلسلات ده لان مش هايكفينى اثلع لهم ملط و اعد اردح شهر


المصيبه الاكبر بقى ...انهم حتى مسلسلات الاغنيا مش عارفين يعملوها

اللى عايز اقولهولك ان المسلسلات اللى بنشوفها دى مالهاش علاقه حتى بحياة الاغنيا و رجال الاعمال

دى مسلسلات من الخيال العلمى

بحكم شغلى فأنا كل تعاملى مع فئة رجال الاعمال من اكبرهم لاصغرهم

و عمرى فى حياتى ما شفت واحد فيهم معاه بودى جاردات و لا ليل ونهار عمال يسكر و لا مقضيها قعدع على البسين و المزز حواليه اشكال و الوان


بالعكس بأه الناس دى بيطلع عينيها عشان تمشى شغلها و تتابع اعمالها فى كل حته و تقريبا مابيناموش و مش بيشوفوا عيالهم

طبعا انت عارف الموظف و العامل المصرى مشهور بالضمير الحى :):) فالراجل يا عينى صاحب الشغل لازم يكون واقفلهم ديدبان بالكرباج علشان الشغل يمشى


و عايز اقول حاجه للناس بجد .... الناس اللى احنا بنشوفهم فى المصايف و النوادى بتوع الفشخره الكدابه و الحركات القرعه ... دول ولاد الموظفين الكبار و المسئولين اياهم ...


اما رجال الاعمال اللى بجد من اول اصحب السوبر ماركت الصغير لغاية اصحاب المصانع الكبرى ... و الله العظيم اغلب من الغلب ...


تحياتى يا باشا و ابقى اسأل

رفقة عمر يقول...

انا اول مرة ادخل مدونتك
بس بجد ضحكتنى وكنت نفسى اضحك
طبعا كلامك كله صح مش عارف هى مصر بقت كلها رجال اعمال ولا ايه
انا كمان النقطه دى مستفزيانى جدا فى المسلسلات المصريه

aya يقول...

هههههههه
على فكرة حضرتك دماغ
اه والله
سيبك من الحقائق المذكورة كلها تؤدى بالاخ محظوظ الى الانتحار
لكن برضه خفة دمك رائعة
وانا مؤيداك فى كل كلمة
وبعدين مش مفروض يا جماعة نحسد الناس ديه
هما مسؤليتهم ينمو تفكيرنا للمستقبل
جايز مصر فى المستقبل هتبقى كده
كل اللى فيها هيبقى فوق خط الفقر بكام متر كده
وكلهم هيقتلوا فى بع بقى
واللى معندوش تليفزيون بلاززمة والهوبر اللى فى اعلان السمنة والفيلا اللى مبنية على مسافة تساوى المسافة المبنى عليها البنتاجون وحمام السباحة اللى ولا بحيرة ناصر
والعربيات اللى بتمشى لوحدها يبقى هو ده الفقير

كلام يوجع واسلوب يداوى

تسلم دماغك

kitty يقول...

بجد بوست دمه خفيف

بس الكلام اللى المسلسلات بتعرضه ده موجود بس مش عارفه الحقيقه نسبته اد ايه علشان مااكذبش عليك اتمنى يكون بنسبه قليله

يمكن احنا مش لامسينه علشان مش قريبين من الناس دى والحمد لله

نيجى بقى للمسلسلات اللى قولت ان هو ده حياتنا

عندك حق مليون فى الميه ..هو ده الواقع

بس مش هى دى المسلسلات اللى نفسى اشوفها وبتمناها

المسلسلات اللى نفسى اشوفها واللى تمثلنا هى اللى بتتكلم على اخلاق المصريين اللى ابتدت تتلاشى اخلاء الناس الجدعه الشهمه واللى بيتحملوا والامهات اللى بتتحمل وبتصبر وبتراعى البيت كله ..اخلاقنا كمسلمين فى كل حاجه انا شايفه ى دى المسلسلات اللى تمثلنا


تحياتى لهذا البوست الجميل

واتمنى زيارة مدونتنا ومشاركتنا بمناقشتك ونشرها

www.nor-el-islam.blogspot.com

حسن أمين يقول...

بص يا سيدي ..
أنا زيك كده منبعج من الاندهاش ..هي البلد دي مقسومة اتنين ؟ولا احنا من بُعد تاني موازي ..عمرنا ما هانلمس التانيين ولا هانروحلهم .
بيتهيألي اللي عندك أكتر من حسد وغيرة ونفسنه ..ده ذهول وعدم تصديق يا معلم .
مش باتكلم عن المسلسلات لأنها سبوبة وأكل عيش .. والفن هو آخر المدعوين للشاشة الرمضانية .
وزيي زيك أو أقل حبتين ..أنا ما اتفرجتش ولا على أي مسلسل ..ظروف شغل وهئ ومئ وبتاع .
ربنا يوعدك بالجيب والبودي جاردز ..ولو اني ساعتها أكيد هافتقد خفة دمك .

أخف دم يقول...

السلام عليكم
صلاة النبى
دا انتوا جواكم غل وحقد وحسد أكتر من اللى ف قلبى .. أمال ساكتين ليه أمال؟؟
دا انتوا ماصدقتم حد يبعبع بإحساساته ومشاعرينه وانتفضتم انتفاضة رجل واحد طالع روحه
طب يعنى مش عيب بجد واحدة عندها أكتر من سبعين سنة تجرى وتتنطط زى بنت خالى اللى فى تانية جامعة.. وهيه أصلا قد ستى الله يرحمها؟؟
ومش هيه بس .. دا الصنف كله كده..
عموما قدر أخف من قدر وأنا الحمد لله اتفرجت على حلقة واحدة حصل كده .. أمال انتوا ياللى اتفرجتوا على ده كله وللآخر
كان الله فى عونكم ومانجيلكوش فى حاجة وحشة وربنا يجعلها آخر الأحزان..
تحياتى يامنورنى جميعا

غير معرف يقول...

اكيد الواد طارق بتاع عربية الكبده هو اللى طخه العيارين دول فى فشته انا شفته يا بيه بس تقول ايه بقى فى الغل اللى ملى نفوس الناس

************
الحمد لله استاذ اشرف ربنا تاب عليا من المسلسلات السنة دى لاسباب مرضية وعقبال عند الحبايب بس بجد بغض النظر عن نقدك الجيد جدا لمواضيع معظم المسلسلات واللى كان بعضها مفتقد فعلا الحبكه الدرامية اصلا بالنسبه لموضوع الغنى فهو موجود فعلا وبنسبه بترتفع انا كنت زيك كده فى الاول مش مصدقه كنا بنقول دا فى الافلام بس لكن رأيت الواقع منها اغرب من الافلام
وربنا يستر

تحية اعجاب لمدونتك المبهجه المبكيه على حالنا

غير معرف يقول...

اكيد الواد طارق بتاع عربية الكبده هو اللى طخه العيارين دول فى فشته انا شفته يا بيه بس تقول ايه بقى فى الغل اللى ملى نفوس الناس

************
الحمد لله استاذ اشرف ربنا تاب عليا من المسلسلات السنة دى لاسباب مرضية وعقبال عند الحبايب بس بجد بغض النظر عن نقدك الجيد جدا لمواضيع معظم المسلسلات واللى كان بعضها مفتقد فعلا الحبكه الدرامية اصلا بالنسبه لموضوع الغنى فهو موجود فعلا وبنسبه بترتفع انا كنت زيك كده فى الاول مش مصدقه كنا بنقول دا فى الافلام بس لكن رأيت الواقع منها اغرب من الافلام
وربنا يستر

تحية اعجاب لمدونتك المبهجه المبكيه على حالنا

*wesam*

AbdElRaHmaN Ayyash يقول...

هههههههههههههههههههههههههههههههه
مش ممكننننننننننننننن
ايه ده يا اشرف
بجد فظيييييييييييييييييييييع
أخف دم فعلا
عجبتني للجنان يعني

Amr يقول...

الزحمة والمية والمواصلات والحاجات دى حاجات بنشوفها كل يووم. مش ناقصة نشوفها فى المسلسلات كمان. مش معقول تبقى لسة جى من المترو الزحمة موووت وبعدين تفتح التليفزيون تلاقى نادية الجندى واقفة فى المترو.

وبعدين ليه ما تقولش انهم بيجيبولك المسلسلات دى علشان يبقى عندك طموح وتبقى زى الناس الحرامية اللى انت بتشوفهم دول.

بطلوا بقى حقد على الناس. علشان كدة هتفضلوا طول عمركوا فقرااا. جتكوا البلاوى مليتو البلد. :D

UNIQUE يقول...

هو معقول يعني ناس زينا مفتقدين للحس الفني يمثلوا واقع البلد زي الفنان العظيم اللي مش عاجبك

اكيد فيه حاجة غلط ولا انتم شايفين ايه ؟

السؤال موجه لجميع عموم المصريين ماعدا محسن بتاع الفول اللي عامل فيها ميت

forex-online يقول...

طرح رائع للموضوع

وجمع لكل الآلام اللي بيحسها جسدي الموجوع

والقسمة هي اللي خلتني اطلع كده ... اكره أغاني الوقت ده ... ومسلسل الهبوط والرجوع ...

والقسمه برده هي اللي خلتني اجي هنا واقرأ الموضوع ... وأحيي فيك شجاعتك وادعي ربي صوتك يبقى مسموع ...

وبضرب أخماس وأسداس على السذاجة اللي خلت دول فنانين ع الراس وانا بنداس وبنضرب وخايف اعاني الجوع ...

ست الحسن يقول...

طيب انت عندك حق 100%
إححنا مش موجودين لا في المسلسلات ولا في في الأفلام ولا حتى في الأغاني

تقدر تقول كده إن إحنا غي مرئيين وقليلين أوي علشان كدة محدش جاب سيرتنا قبل كده
عموماً أول ما انزل الكليب بتاعي مححدش هيعرف يكلمني هاهاااااااا

غير معرف يقول...

يخرب عقلك والله كلامك كلة حكم
مسلسلات اية وبتاع اية دة رزق الهبل عالمجانين كلها اسامى والسلام ولا حد فاهم حاجة خااااااااالص والناس بتتفرج بس من غلبها بس لما تسأل حد يقولك يا عم احنا منعرفش المسلسلات من بعض كل الممثلين فى كل المسلسلات
يلا لازم نستحمل هنعمل اية يعنى عايزين نسلى صيامنا .....قصدى نضيعة
ربنا يحميك واشوفك راكب عرابية 4*4 =16
تحيااااااااتى لك

أحــــــلـا مـــــي... يقول...

ههههههههههههه
بصراحة جاامد جداا
هو ده الواقع فعلا وهي دي المسلسلات للاسف
المسلسلات المأمركنه
ع امل انه تتصلح الامور
هانقول للحديث بقيه
وللمعاناة بقية..
عبرت عن لسان كثيرين
تحياتي الواقعيه هههههههه

سعد زهران يقول...

صحيح وصدق الي قال القوالب نامت والانصاص قامت ويارتها انصاص بشرف ولكنها انصاص عديمة الشرف ولكن الحق على الملاين الهايفة الي تعطيهم هذه الفرصة لابتزاز الاموال بالملايين من دماء الناس وحسبيي الله ونعم الوكيل

farawla يقول...

هههههههههههه لا مسخرة الموضوع ده,, الحمد لله انى مابقتش اتفرج على التليفيزيون عشان ماتعقدش بس اسلوبك تحفة ماشاء الله

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡