اخبار

الأربعاء، 6 يونيو، 2007

حقى وحقك



..كان زمان
..الحِلم كان واحد في قلبي
..إني احبِّكْ
..وامّا حبِّيتِك
..بقى الحِلم اللّي عندي ازّاي احبِّكْ
..داب خلاص الحبّ فينا
..وابتدِينا.. يبقى لِينا
..فوق بحور الشوق سفينه
..بس لازم لجْل ما نكمِّل طريقنا تبقِي عارفـَه
..إن نار الحبّ دايماً عايشَه خايفـَه
واللّي هيخلّيها تطّمّن وتكبرْ
..لو ترقِّي
..وْتعرفي حقِّك... وحقِّي
تعرفي إيه يبقى حقِّك؟
..حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ
وانّي احسّ القلب فاضي
..مهما شال من شوق وجابْ لِكْ
واجري والأشواق بتسبقني
..عشان اوصَل بسرعه.. بسرعه قبلِكْ
..حقِّك انِّ الدمع يفرَحْ
..ينتشِي
..يسكَر
..يدوخْ
..ينزِل بسُرعَه لمّا اقابلِك
..حقّك اني انطق: "باحبّك" كلّ ثانيه
..وارسمِك في القلب دُنيا... دنيا تانيه
..أبقى انا بالحبّ سُورْها
..وانتي تبقِي هناك قَمَرْها
وانتي نورها
..وانتي نارها
..والنجوم سابحه فْ مَدَارها
..وانتي أحلامها وجَمالها
..وانتي وِدْيانها وجبالها
..والكُبار فيها وْعِيالها
دنيا فيها تكوني وحدِك... يبقَى مَالهْا؟
..حقّك اني اكتب في رمش العين قصايدْ
..وفْ سواد العين قصايدْ
..وفْ جمال الروح قصايدْ
حقّك اني اقرا فْ ملامحِك كلّ يوم
..زيّ الجرايدْ
حقّك اني استنىَّ قلبِك
يوم
يومين
شهرين
سنه
للعمر كلـُّه
واني اشِيل مِن شوقنا شوكنا
..وْتاخْدي بسّ الشوق وفُلـُّه
حقّك انّ القلب ينطق
!أحلى شيء في الحبّ ذُلُّه
..حقّك اني ابقَى لِك البحر الحنَيِّنْ
وابقَى لو شدّيتي هادي
..وابقَى لو هدّيتي ليّنْ
..حتى لو مرَّه اتعاتبِنْا
..في العتاب تلِْقيني هيّنْ
..وادفِن الجرح فْ كياني
..مهما كان في عْينَيَّه بيِّنْ
حقّك اني اعمِل لِك انتي كُرسي فوق الشمس
..واعمل بينكو طاقَه
لمّا نور الشمس يضعف
..نورك انتي يْجيب لُه طاقَه
حقّك اني اقفل بيبانِك عن قلوب الخلق
..وادخُل لك بقلبي يكون بِطَاقَه
..حقّك انّي اسمع واسامِحْ
..حقّك انّي ازعَل واصالِحْ
وان قلبي يكون ديوان مُلْكِكْ
ما يدخلهوش في مرّه... وبْأوامرِكْ
..إلاّ أصحاب المصالحْ
..حقّك انيّ اهزمْ ظروفِكْ
..حقّك انىّ امنع خسوفِكْ
..
وانيّ اشيل بالحب خوفِكْ

..أمَّا حقِّي يا حبيبتي
...حَقِّي إنـِّي
!!!إنـِّي اشوفـِكْ

هناك 43 تعليقًا:

darsh يقول...

هيييييييييييييييه أول واحد
مش مصدق
بعمل كومنت عند أشرف توفيق بنفسه أول واحد


أنت مش محتاج تعرف رأيي ... لان انا حافظ القصيدة من زمان ...


حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ

بيسوو يقول...

انت عارف طبعا ان الديوان كله عجبني بدون استثناءات...هييييييييييييييه بس فين بقى نلاقي الاحاسيس الحلوة الي انت بتحكي عنها دي دلوقتي..المرحومة ماتت وشبعت موت..الله يرحمها كانت طيبة

ابقى تعالى

رينـــــــــــا يقول...

لا مش مصدقانى
دا انت طلعت شااااااااااااااااعر بجد جامد جدا جدا

بجد الاحاسيس جامدة جدا
الكلام بسيط
ومعبر
دى بردوا عجبتنى اوى

حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ

تحياتى لاعظم شاعر

ساعه الغروب يقول...

بجد مش لاقيه كلام

كلامك فاق التعبير والاحساس وكل حاجه ممكن تتقال

انت عن حق موهوب فعلا

عارفه انك مش مستنى انه حد يقولك كدا
بس مش عارفه اقولك ايه

؟؟

صادق اوى

معبر اوى

حاسس اوى بالى انت بتكتبه

ربنا يوفقك

بجد روعه

وزى كل مره طبعا قريتها اكتر من 3 او 4 مرات

شكرا ليك

حافظ على صدقك دا ارجوك



:)

ضـوء الـقـمر يقول...

يااااه بجد الاحساس اللي في القصيدة
جميل اوي

حقّك انيِّ ابقى لعيونِك ألف حارسْ
وابقى وقت الحب عاشق
..وابقى وقت الشدَّه فارسْ
..واعملِك جدول مُذاكرَه زيّ أطفال المدارسْ

مش هقول حاجه غير .. تحفة يا اشرف

Shiko يقول...

منتهى العداله يا اشرف
التضحيه بكل شئ من اجل الحبيبة
وتكفى نظرة واحده لعيونها حتى تنسى ما كان وما سيكون
حاله من العشق خلقتها فى مدونتك
اعدت بها شحن القلوب والعقول
لتعلن ان الحب مازال موجود رغم ندرته

صور وخواطر يقول...

يقال أنه لا حد في الحب وطالما أنه لا حد إذن ليس هناك حقي وجقك

ممكن تقصر شنبك يا بذخ

YHYيــوســف الـمصـرى يقول...

اشرف باشا اخويا وحبيبى
وحشنى والله يا باشا
مش هعلق على القصيدة لأن طبعا طالما بتاعت اشرف توفيق تبقى اكيد الاحلى والاجمل
فعلا سمعتها وامتعتنى جدا والله يا ريت يا اشرف لو تعرف على طول تحط فديوهات للقصايد دى على طول يبقى كويس علشان الواحد لما بيسمعها منك بيبقى ليها جمال تانى
تحياتى يا شاعر يا كبير ويا رب اطمن عليك ديما
يا باشا ابقى رن عليا انت زعلان منى ولا ايه انا مش برن علشان مش معايا رصيد هههه
تحياتى يا باشا

الكلام نوعان :كلام فارغ وكلام مليان كلام فارغ يقول...

يلا يا عم عندي ليك تاج جميييييييييييييل
اوعى تطنشنى زي عوايدك
يلا
سلام

ammola يقول...

يااااااااااا بختها

أنا حر يقول...

كلام بجد اكتر من رائع
تحياتي

الاسطى يقول...

الله ... الله .. الله يا اشرف
إبداع ما بعده إبداع ..
كلامك حلو أوى أوى أوى
و الفكرة نفسها عاجبانى جدا و انت اتكلمت عنها بطريقة جميلة أوى
ماقريتلكشى لحد دلوقتى حاجة واقعة .. خالص
كلها روائع .. ماشاء الله
عجبتنى أوى ..
واعملِك جدول مُذاكرَه زيّ أطفال المدارسْ

دمها خفيف جدا ..
و معبرة أوى
بيتهيألى دا أول كومنت ليا فى مدونتك الجميلة
و أكيد بأمر الله مش هايكون آخر كومنت
و يارب دايمنا مشرفنى فى بلوجى المتواضع - أوى - بتعليقاتك و كلامك الجميل
و ألف شكر ليك على السؤال ياعم أشرف
و لانى مرة .. كلامك جميل أوى .. و أشعارك كلها ممتازة
تحياتى
أحمد حمزة

Ana keda يقول...

برحة علينا يا اشرف بجد تحفة
فعلا المرحومة ماتت وشبعت موووووووووووت بس ميمنعش اننا نحلم برضه ولا ايييييييييه
عجبتنى كزا حتة من القصيدة بجد جامد
حقّك اني ابقَى لِك البحر الحنَيِّنْ
وابقَى لو شدّيتي هادي
..وابقَى لو هدّيتي ليّنْ
..حتى لو مرَّه اتعاتبِنْا
..في العتاب تلِْقيني هيّنْ
..وادفِن الجرح فْ كياني
..مهما كان في عْينَيَّه بيِّنْ
جبااااااااارة بجد تصقيفة يا ولدى ربنا يخلينا ليك هههههههه

MOODY يقول...

اشرف
جميلة اوى اوى اوى
يخرب بيت كده
---
نفسى اشوفك تانى و لو صدفة
:--3)

zordeak يقول...

يا بنى اقولك ايه اكتر من انك فنان


كل ما اقرى لك قصيدة الاقينى فتحت بقى ومش عارف اقفله

واقول

wooooooooooooooooooow

يا بنى بشويش علينا شوية

احنا مش قدك


يا عمنا

يا كبيييييير

يا اللى واحشنى

:)

esraa يقول...

حلوه أوي ياأشرف بجد
بس مانت أكيد عارف ده

ربنا يوفقك حقيقي

وطبعا لازم لما انت اللي تزعل تصالحها ((:

بس انت طماع أوي يعني هتشوفها قصاد ده بس؟

لازم تزرد الحاجات اللي هتعملها شويه(:
تحياتي

farfasha يقول...

انا مها
بجد القصيده تحففففففففففففه
وبجد حسيت انك بجد بتحب ومشتاق لحبيبتك
المهم انا عامله فكره جديده وعايزاك تشاركنى فيها وتقولى رايك فيها
مستنياك

Ma-3lina يقول...

وحشتنا قصايدك يا اشروف

رائعة كالعادة و احاسيسك باينة

المهم شفتها و لا لسه ؟؟

الديليكون يقول...

جميلة أوي يا أشرف

هما بتوع المنصورة كده مبدعين نفسي اشوفك قريب بجد انتظر مني تليفون قريبًا
أخوك
محمد

عين ضيقة يقول...

بص بقى ومن غير زعل

الكلام حلو ؟ ماشى بس مش
مش ممتع
يعنى... دا مش الشعر
ده الاستسهال فى الشعر

آسفة بس انا شفتلك شغل اعلى كتيير من كده

تحياتى ومستنية الافضل

Eman Eltaher يقول...

يااااااااااااااااااه

جميلة أوى اوى يا أشرف

نسيتنى كل ازعاج امتحاناتى و وديتنى عالم تانى خالص

مش معقول كده كل قصايدك جمييييييييييييلة ماشاء الله عليك

ربنا يحفظك
انت حقيقى انسان موهوب
و فوق كل شئ فانت انسان بمعنى الكلمة

كل دى حقوقها و حقك بس انك تشوفها ؟؟؟؟؟؟؟؟؟؟؟؟

مش عارفة أقول غير فعلا يابختها

هوا فيه كده ف الدنيا ياربى ؟؟؟؟
سبحان الله

ياريت كان الناس كلها زيك رومانسية مخلصة كده كانت الدنيا هتبقى جميلة

بجد دى مش مجاملة
أصله بيعجبنى شعرك جدا

و اللى بيخرج م القلب لازم يوصل للقلب

ربنا يحميك

18goosebumps يقول...

من الان

انت استاذ اشرف

لانك استاذ

مدونة كسبان يقول...

جميل جدا والله ياأشرف
مش عارف أقول غير كده
بس انت لازم تاخد خطوه
يعنى تعمل ديوان
وتنشره
يعنى كده
خالص تحياتى

hend يقول...

ايه ده اول مره اقرا لك كلام مفيهوش تريقه لالا انت عيان ولا ايه
على العموم بوست تحفه اوى

islam يقول...

السلام عليكم

كلام جميل..، وشعر أجمل..،
وإلقاء أجمل وأجمل

تحياتى..حقى وحقك

السلام عليكم

شيماء الجيزى يقول...

اقولك ايه

انت فعلا شعرك حلو اوى !!!!

وبتقولى اخف دم؟
انت اخف دم؟
وارق قلم

بجد شعرك متميز
انت فعلا شاعر جميل

تحياتى

غير معرف يقول...

ازيك يا أشرف
أكيد انت ماتعرفنيش بس أنا متابعاك من زمان وشفتك وسمعتك وقريتلك كتييير و مش عارفة اقول لك ايه يمكن لو قلتلك باحبك يبقى قليل عليك وصفاتك اللى مالهاش مثيل منأدب واخلاق ودين وهزار واحترام ..انا فعلا باحبك

أنا قلتهالك عشان انت متعرفنيش لانى عارفة انى مش هاقدر اقولهالك لو شفتك قدام عنيا
ربنا يوفقك

momken يقول...

ايه ياعم المشاعر الى تكفى خمس قصايد دى
انت اخف دم واغزر مشاعر واحرف قلم
وواضح ان بحر القوافى بيعدى من تحت بيتكوا
والتفعيلات موج بيعلى ويرسى لقرارك

من احلى القايد الى قريتها قاطبتا
ممكن

احمد عبدالحي يقول...

bdelhay22



اختيار مصطفي الجزار من بين افضل35 شاعر في مسابقه امير الشعراء هو فخر لكل مصري




تابع البرنامج وصوت عبر




SMS


لمدة اسبوع بعد الحلقه لشاعرك المفضل


ميعاد البرنامج
قناة ابو ظبي

كل جمعه الساعه 21:45


برنامج / أمير الشعراء
كلنا معك يا جزار رابح ان شاء الله
لاجل مصر صوت لمصطفي الجزار

انتظار مؤقت يقول...

ياريت يسمعو منك و يدونا حقنا و ياخدو حقهم ..احساسك رائع
تحياتي

Halawa يقول...

أستاذ كبير

يمكن دي أكتر قصيدة بحبها في الديوان

تحياتي

rona يقول...

الله الله الله الله عليك يا استاذ اشرف الشعر جميل بيبين لنا مشاعر حلوه

shahy يقول...

اية الكلام الجامد دة
كلام يخلي القلب يرقص من الفرحة ومن الحب

تحياااااتي

تخاريف دكتور يقول...

اسف ان كنت علقت بتاء التانيث
بس انت برضه رجعى ودقة قديمة
هه؟؟

أميرة ويلز يقول...

اما حقى ياحبيبتى

حقى انى

انى اشوفك

يااااااااه روعة روعة بجد بكل معانيها

أخف دم يقول...

ربنا يكرمكم جميعا على الكلام الجميل اللى اتقال على القصيدة وبما إن معظم الكلام عن سؤال واحد .. إيه المشاعر دى .. فأنا حبيت أجمع التعليقات وارد مرة واحدة توفيرا لتعب غيدى على الكيبورد م الآخر وانا عارف انكم هتقدروا غصبن عنكم طبعا
يا جماعة المشاعر دى من قلبى اللى هوه قلبكم برضه .. كل واحد فيكم عنده نفس المشاعر دى وربما أكتر .. كل ولد مستنى البنت اللى فعلا تديله الحنان والحب اللى هوه بيتمناه وهوه هيقيدلها صوابعه العشره لحمة .. وكل بنت مستنيه الواحد اللى يصونها واللى يحبها بجد ويحتويها بكل ما تحتويه الكلمه من معانى وهيه هتديله قد الحب ده واكتر .
الحب موجود وأكتر من اللى فى القصيدة ..
ولو دورنا صدقونى هنلقى ..
ربنا يجعل أيامنا وليالينا كلها حب وسعادة يارب..
ولأى حد القصيدة معجبتوش إن شاء الله اللى جاى يعجبكم .. وياريت اللى ليه رأى أتشرف بيه كمان ..
ربنا يكرمكم

رانيا منصور يقول...

مش هازود عن جمال الاحساس اكتر من اللي اتقال

رائع فعلا..

بس حسيت فيه كلام كتير رغم ان مفهوش شيء يقال يستاهل يتشال لأنه سيء مثلاً

النهاية
بهرتني


جميل جدا..

سارورة يقول...

رووووووووووووووووووووووووووووووووووووووووووووووعة بجد انا دمعت (( ماتخافش ماعملتش زى بتاعة ناقص دبدبوب )) هههههههه

لأ بجد روعة روعة

هو فى كده فى الدنييا ؟؟

العيسوى الصغير يقول...

طيب شوفتها ولالا

The Manager يقول...

مملكش غير اني اقولك انت استاذ في الشعر بجد
ما شاء الله عليك

وبجد بدون مبالغة معادش فاضل حاجة الواحد يكتب عنها

كل المشاعر إللى في الدنيا جت في كلامك

ربنا يزيدك ياااارب

تقبل مروري واحترامي وتقديري

غير معرف يقول...

القصيده دى بجد مش قادره اوصفلك من كتر اعجابى بيها بجد بجد فوق الرائعه ومش لاقيه كلام ااقوله عليها غير انى بجد ببكى لما بقرائها وبحسها اوى

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡