اخبار

الأربعاء، 20 يونيو، 2007

الحقونااااااا بقى


جميل قوى اللى بيحصل ده والله .. جايز أكون هاتكلم عن حاجة قديمة بس انا سمعت عن الموضوع ده من فترة إنما انا لسة شايفه بعينى امبارح .. عارفين طبعا مسابقة ملكة جمال مصر بالصلا ع النبى .. ومادام عارفين مسابقة ملكة جمال مصر يبقوا طبعا عارفين مسابقة ملك جمال مصر بالصلا ع النبى برضه .. ومادام العريس هيتجوز يبقى العروسة هتتجوز ..فيه بعض ناس حااااااااقدين عايزين يبوَّظوا سُمعة المسابقة العظيمة دى اللى هتختار لنا البنت القدوة والولد القدوة .. الاتنين اللى هيشيلوا عَلـَم مصر ويتحزِّموا بيه فى أعرق المسابقات العالمية
الأب والأم شافوا صورة بنتهم ع المجلة فى المسابقة وهيه لا مؤاخذة استغفر الله العظيم يعنى كاشفة شعرها .. العِرْق المصرى الحِمِش اتنفض فى الراجل وقال ازاى بنتى تكشف شعرها والموضوع كِبِر وراحوا عند الحاج وائل الإبراشى فى دريم
الصراحة وائل ما اتأخرش .. جاب الناس كلهم اللى لا مؤاخذة استغفر الله العظيم بناتهم كشفوا شعرهم غصبن عنهم فى المسابقة..والناس التانيين اللى أشرف مِ الشرف وعُمْر شعرهم ما اتكشف على حد .. وكمان جاب واحد اسم الله على جمال أمه كان مرشح ضمن ملوك جمال مصر.. لو وصفتلكوا ثقافته وللا أخلاقه وللا دينه وللا احترامه للقاعدين مش هتصدقوا .. مصر دى عظيمة يا ناس
بدأ الراجل المصدوم يحكى ازاى بنته ربة الصون والعفاف صرف عليها حوالى 50 ألف عشان الإعداد ومامتها سابت ولادها اللى فى الثانوية وقعدت مع بنتها فى شقة مفروشة مخصوص ليها عشان الإعداد..طبعا ما هو ده اسمه إعداد البنية التحتية .. وازاى مامتها علمتها وقالت لها اوعى يا بنتى حد يقول لك اكشفى شعرك .. مايوهات ماشى .. بيكينى عادى .. أحضان ولا يهمك .. إنما أستغفر الله العظيم تكشفى شعرك ؟؟ ده حتى يبقى عيب
الجميل بقى ان الراجل مش متضايق من إن بنته كانت كما ولدتها أمها فى المسابقة .. هوه متضايق بس عشان صورتها جت فى المجلة وشاف الصبيان المراهقين يباخدوا المجلة كل واحد يوم فى بيته زى فيلم ثقافى
وجايبين بقى ناس تدافع عن المسابقة منهم واحدة كانت فى المسابقة والله العظيم ما انا عارف دى كانت بتتسابق ليه .. دى ممكن تمسك لهم الفُوَط عند حمام السباحة .. ده آخرها يعنى .. ومامتها اسم الله صاينها وحارسها
والبنت قاعدة تصرخ انتوا بتظلمونا .. احنا اتعلمنا حاجات كتير..احنا اتعلمنا ازاى نعمل خير.. أفهمها دى بقى !!! يعنى عمل الخير عايز مسابقة وتعليم؟؟ يعنى عشان اروح دار ايتام وللا مكفوفين لازم افتح كتاب كيف تعمل خير؟؟
احنا اتعلمنا ازاى نحب بعض.. أيوة أيوة فعلا .. هما خدوا كل ملكة جمال وقعَّدوها مع ملك جمال وعلموهم ازاى يحبوا بعض ويجيبوا لنا ملوك جمال صغيَّرين نتنطَّط بيهم بقى قدام الشعوب الجهلة التانية
وكله ولا الأستاذ ملك الجمال .. يا عييييييينى .. قمر يا أخواتى قمر .. جايبين صورته وهوه ماشاء الله عريان زى الفل وواقف بيتمنى انه يفوز عشان يمثل مصر ويضحى بعمره فداها زى أجدادنا ما ضحوا عشان احنا نعيش بكرامتنا فى حرب 73 مثلا أو غيرها وتخيلت ان منظم المسابقة بيناوله البشكير عشان يستر نفسه فيقول له شكرا يا فندم .. يرد عليه المنظم ويقول له مصر هيه اللى جايبالك البشكير يا رأفت قصدى يا ميمى
الجميل بقى ان كل أولياء الأمور ماضيين عقد قبل الكلام الفارغ ده على كل اللى هيحصل .. يعنى يا جماعة باختصار كل أب وأم عارفين ان بنتهم على رأى سعيد صالح ماشاء الله ماشاء الله .. بنتك هتشتغل رقاصة ماشاء الله ماشاء الله .. هترقص وتفتح ماشاء الله ماشاء الله
اللى عجبنى ان وائل الإبراشى كان بيعمل اللى عليه بصراحة .. يروح للراجل المنفعل ويقول له والله هما ما شتموش حضرتك هما بس بيقولوا انك بتتاجر ببنتك وزعلان عشان مكسِبِتْش وان هنادى أخدها الوبا زى دعاء الكروان
الراجل يتنرفز ويشتم يروح وائل يقول للتانيين هوه بصراحة مش بيشتمكم بس هوه بيقول ان بنتكم مكنتش بتبات فى الفندق ومشيها بطال وعايزة تتشهر .. بس هوه مشتمش الصراحة
الاب بيقول انه راح لبنته وشافها وسلم على اصحابها الملكات والملوك طبعا وقال لهم شدوا حيلكم ياولاد واطمن جدا طبعا لما لقى ملوك فى القعدة .. عشان لو اى ملكة اتضايقت تلاقى ملك بيهون عليها .. وسبحان الملك
يا جماعة والله العظيم اللى بيحصل ده حراااااااااام .. مصر مش كده يا جماعة ..مش شوية بنات وولاد أقل لفظ يتقال عنهم انهم ما اتربـَُوش حتى .. ده الولد بيقول للمحامى اللى كان قاعد ومتغاظ زيى انت بتسوأ سمعة الشعب المصرى !! ياسلام !! هوه مين اللى بهدل البلد غيركم ؟؟.. جدودنا ضحوا بكتير عشاننا واحنا عاملين مسابقات عشان ملكات وملوك الجمال .. خايف اسأل سؤال الناس تفتكر انى بس واخد المسألة بمنظور دينى .. هيه البنت اللى كانت عريانة طول اليوم .. كانت بتصلى امتى ؟؟ والولد اللى كان فى حمام السباحة طول اليوم مع الملكات وحاطط على شعره نص كيلو جيل مسك المصحف كام مرة .. طب الولد وللا البنت دى يعرفوا ايه عن اى حاجة؟؟؟ طبعا كان باين مستوى ثقافتهم من كلامهم فى الحلقة عشان محدش يظن انى بافترى
أنا مش باتكلم دينيا بس يا جدعان ..أنا باتكلم دينيا ودنيويا وأخلاقيا وعرفيا وكل حاجة ..دا انا معرفتش أحط صورة للمسابقة فوق البوست عشان اتكسفت والله
كل اللى اتمناه ان ينزل قرار من النهاردة بتحريم المسابقات دى من هنا .. بنات مصر مش محتاجين مسابقة عشان يبقوا ملكات جمال .. بنات مصر ملكات اصلا عشان بيحترموا دينهم وأخلاقهم وعاداتهم .. شباب مصر مش محتاج مسابقة عشان يبقوا ملوك جمال .. الشاب المصرى راجل من يومه مش بالجيل ولا البنطلون الواقع ولا الصور العريانة ليه بالملابس الداخلية .. شباب مصر رجالة عشان هما اللى بيصنعوا تاريخ البلد دى..دين .. ادب .. فن .. ثقافة .. معرفة .. فكر .. سلام .. حرب .. شباب مصر فيهم كل حاجة حلوة
بسم الله الرحمن الرحيم
إن الله لا يغير ما بقوم حتى يغيروا ما بأنفسهم

هناك 71 تعليقًا:

darsh يقول...

أول واحد أول واحد هييييه .. المفروض ان انا اعمل حفلة وفرح وليلة .. ما انا أول واحد بقى

الموضوع زي العسل يا أشرف ...

"مصر هي اللي جايبالك البشكير "

أنا قريت الجملة دي مش قادر امسك نفسي من الضحك

بس بجد موضوع مسابقات ملوك وملكات الجمال دي حاجه مستفزة جدا ...ربنا يهديهم ويهدينا

Amr Ahmed يقول...

ههههههههههههههه

ويجيبولنا ملوك جمال صغيرين

صباحو عنب
ماهو ده جيل تامر حسني اعم الحاج

وكنا رجالة ووقفنا وقفة رجالة

خيبتي علي الرجالة
ههههههههههههههه

بس هو ابو البنت عنده الحق
اصل شعر المرأة عورة

Shower-Mirror يقول...

مالاقوش عيش ياكلوه ...جابوا ملك جمال وقلعوه


و النبى احنا شعب عايز الحرق ...

شعب من كتر ماهو بيكدب على نفسه متخيل ان كل الناس هاتصدقه ....


اقولك على حاجه ... مالهاش علاقه بالموضوع بس انا عارف انك هاتفهمنى :


الاهرام 19/6/2007 :

الكويت تقدر موقف مصر اثناء الغزو العراقى - اللى كان من 17 سنه واخد بالك - و تقدم قرض بمبلغ 320 مليون جنيه لتنمية قطاع الدواجن .



دواجن ؟؟

دواجن ياولاد الحلاليف ؟؟

لا تعليق

او بصراحه ماينفعش اقول التعليق الصح عشان البنات اللى بتيجى هنا


و ابقى تعالى ياعم بقى انت كمان مش كل مره هاجى اخدك كده

Ma-3lina يقول...

هههههههههههههههههههه

يخرب عقلك يا واد يا مدرس يا اشرووف

ايه يعنى علشان محدش خدك فى مسابقة ملك جمال مصر تتبلى على الناس و المسابقات الهادفة دى

بلاش السواد اللى مالى قلوبكم ده

SAKAyAR يقول...

أيوة كده يا لورد ارجع لعلع من تاني زي ما كنت .... فعلا الموضوع عرضه أكتر من طوله ...يووووه أكتر من رائع
والفكرة كلها هوه الأب والأم دول أساسا اتربوا ازاي؟؟؟ ده لو كانوا اتربوا يعني
فذرهم يخوضوا ويلعبوا حتى يلاقوا يومهم الذي يوعدون
وفيه كمان آية بتقول ... إن هؤلاء متبر ما هم فيه وباطل ما كانوا يعملون
ويا سيدي يمكن ربنا يهديهم ويهدينا احنا كمان محدش عارف
سلالم وواحشني كتييييير

سجدة يقول...

بس مين قالك ان مفيش فتوى بتحريم المسابقة دى
فى فتوى صريحة من المفتى اللى هوالمفتى
ان هذه المسابقات حرااااااام
وفى فتوى صريحة ان الخمرة حرام
وتلاقى لها محلات فى كل حتة وإعلانات كمان
يا عم الأمور دا إنهيار إخلاقى للمجتمع نفسه لا تحكمه فتاوى واى حاجة
يعنى اللى رايحة دى مش عارفة ان كده حرام مسلمة كانت او مسيحية ابوها مش عارف يعنى مسخرة من الأخر

انتظار مؤقت يقول...

شوف يا سيدي كلامك لا يعلى عليه و انا متفق معاك تماما في كل حرف و بعيد عن المنظور الديني اصلا مصر بلد و لاد البلد الجدعان مسلم او مسيحي بلد شرقي لا فيه مسيحيه من الصعيد و لا مسلمه طرفها بيبان و ده اهانه للمجتمع الشرقي بتاع و لاد البلد غير الاهانه للديانات
و الله دمي بيتحرق من المناظر دي
تحياتي

farfasha يقول...

هههههههههههههههههههههههههههههه
زي العسل يا اشرف
يخرب عقلك
عادى مصر بلد الامن والامان والراقصات كمان
وعلى راى عادل امام _لو كل واحد عزل عشان تحته واحده رقاصه البلد كلها هاتبات في الشارع_
ياعم قول يا باسط
يلا عشان نلاقي مكان لينا في الجنه
عشان كمان ما تبقاش زحمه
وعلى فكره البوست اللى انت بعته زي العسل وضحكت كتيرر
بس هوه انت كل اللى بيحصلك كده

نفسنا يقول...

ندعوكم لمشاهدة العدد الثانى من مجلة نفسنا

زحل الفلكي يقول...

من غير كلام كتير
ولا لف ولا دوران
مش حعرف اقولك غير عندك حق
لأن من كتر الواحد مهو متغاظ
اللي حيقوله يخاف ربنا يحاسبة عليه

وحسبي الله ونعم الوكيل في اللي كبر الفكرة الزبالة دي في دماغ الشباب والبنات

حسبي الله ونعم الوكيل

Ana keda يقول...

هههههههههههه
بوست حلواوى اانا الموضوعدهمستفزنى والله طب سيبك من البنات وقول علطول همقالعين لكن الى ينرفز شحط طويل عريض واقف يستعرض نفسه ويعمل مش عارف ايه
لا وكانوا جايبين اعلام فى الحفلة
مااااااااريا

لا ووصيف اول وتانى انا عرفت ان فى زمن عبد الناصر او السادات تقريبا
كانوا عاوزين يعملوا ملكجمال مصر

راح الله يستره خدهم عالجيش علطول وحلقلهم على الزيرو واتربوا صح

لكن الباشا بتاعنا سايب الدنيا تخرب عقول ناس بتبوظ وتفكيربينحل وقيم بتروح ودين بيتنسى

ودى حاجة مش جديدة عليه
حسبى الله ونعم الوكيل

رينـــــــــــا يقول...

بجد بجد بجد احيك على البوقين الاخرنين دول
ايه العقل دا
بجد مصر مش كدا
انا اتفرجت على الحلقه وكنت مزبهله من البنت الفظيعه اللى فعلا اخرها تمسك فوط الحمام ههههههههههههههههههههههههه
لا بجد كنت مصدومه
ان هى دى الصورة اللى بتتنقل عننا
شويه شباب وشابات تافهين يدخلوا مسابقات تافهه زيهم
مصر فيها ناس محترمه
عقل وثقافه ودين
دا اللى لازم يتنقل عننا

لا بس سيبك انت... انت كارثه
موتنى من الضحك بجد
هههههههههههههههههههههههههههههههههههه

ahmedmyangel يقول...

انته مالك جبت سيرة الصلاة والقران وانته خايف ليه وفيها ايه لما تكلم من منظور دينى هو احنا اصلا مخلوقين ليه مش عشان نعبد ربنا يبقى ليه تخاف؟!!!!!!!

kasperb4 يقول...

لقد اسمعت لو ناديت حيا
ولكن لا حياة لمن تنادي

ونارا لو نفخت بها اضاءت
ولكن انت تنفخ في رمادِ

:: :: :: :: :: :: :: :: :: ::
احييك على هذا الطرح المتميز

مادو يقول...

يا اشرف يا حبيبي هي دي مصر
ثم اللذيذ بقى ان حتى في العري مش بنكسب

LAMIA MAHMOUD يقول...

لسة قايلة البق ده عند عمرو

يا اشرف يا ابني في ناس تقول الهزل يطلع جد وناس تقول الجد يطلع عبث


اللي بيحصل ده عبث

عببببببببببببببببببث

فوكيره يقول...

استاذ اشرف :

انا لما شوفت الحلقه خوفت ضغط الدم عندى يرتفع
انا خوفت على صحتى بصراحه
فقمت حولت التلفزيون

طبعا انا وانا بقرأ محولتش المدونه
وبناء عليه

ضغط الدم ارتفع
يعنى البوست قام بالواجب الحمد لله

حسبي الله ونعم الوكيل في اى حد جاهل بيشوه سمعه مصر

chimera يقول...

معلش يا جماعة ثانية واحدة...مين قال ان بنات مصر مش كدة؟؟!!مع احترامى للبنات وانا بنت على فكرة..بنات مصر كدة ونص و تلات تربع..انتوا مبتمشوش فى الشوارع ولا ايه!!لا خشا ولا حياء ولا اى بتنجان...البنات مش محناجين مسابقة ملكات جمال علشان اخلاقهم تبوظ لما يلاقوا قدوتهم اللى بتمثلهم كدة, ولا بقى فى بنت عبيطة من اللى بنشوفهم فى المسلسلات ونقعد نعيط...بمزاجهم والله وبإرادتهم و بكامل قواهم العقلية والعيب مش عليهم بس ولا على اهلهم بس ومش عارفة اقول العيب على مين ولا مين!!!!
والمفروض الحجاج ابن يوسف الثقفى يجيلنا احنا كمان ويقولنا انى ارى رؤوسا قد اينعت وحان قطافها وانى لقاطفها..ولكن للأسف مش هيلاقى رؤوس بس ولكن هيلاقى رؤوس وأجساد عارية و مبدأ بلا انسان وانسان بلا روح
اسفة طولت عليك....بالتوفيق ان شاء الله

بحاول اكون يقول...

ازيك يا اخف دم
انا بمر على مدونتك كتييير لدرجة اني قريت كل كتباتك بس اول مره اعلق بجد مش عارفة اقولك ايه الموضوع تحفة وانت زي العسل ودمك خفيف مووووووت
انا شوفت مسابقة ملكات الجمال لكن ملك الجمال ده مش شوفتها بس اقولك بصراحه وكلي تواضع زي حضرتك كده ان معظم اللى بيطلعوا في مسابقة مافهومش ريحة الجمال دا انا احلى منهم ياراجل
تحياتي ليك وبالتوفيق الدائم انشالله

Eman Eltaher يقول...

ههههههههه

انت بجد كل بوست ليك بيكون أحلى من التانى و الأحلى فيه انه ليه هدف مش مكتوب و خلاص

زى شعرك ما شاء الله كل قصيدة بتكون أحلى من التانية - ده باستثناء قصيدة مرسال أحلاهم

مش عارفة و الله ابتدى موضوع البوست منين

عجبتنى اوى اوى - كالعادة - معالجتك و تحليلك الشخصى و النفسى للموضوع كقضية تمس بنات و شباب مصر الهايفين

مين البنت دى ؟؟؟؟
عادى عادى عديها

و مصر ربنا يخليها لينا مش جايبلنا البشكير بس لكن الصابون و كله مظبطانا يعنى

ف كل حاجة داخل بلادنا بناخد فيها صابونة

عادى يا أشرف

اديها بيبسى اديها

و بعدين المسابقات دى ياريتها حتى عن الجمال و اللى أساسه بينبع م القلب قبل الوجه

لكن دى مسابقات للعرى
مين هتكشف شعرها و تبقى اسم الله حارسها و صاينهاالملكة الجميلةالمكشوفة على بنآدمين العالم كله و خلق ربنا أجمعين

هو لو فيه دم أصلا مكانتش البنت تشترك ف مسابقة زى دى حتى لو ربنا منحها الجمال فده مش معناه انها تتاجر بيه لكن تحمد ربنا عليه و تستعفف و تصون نفسها
أقل حاجة يعنى لا تقول أخلاق و لا دين - دول مبيفهموش ف الحاجات دى - بس أقل حاجة يكون عندهم دم

لكن تقول ايه

البلد باللى فيها عايزة الحرق
يا مين يناولنى ولاعة
كنت ولعت فيها و شيلت م الكوكب كل الناس اللى زيك

ياللا ربنا يحفظنا

ف سلامة الله
و يارب تكون دايما بخير

عقد الياسمين يقول...

السلام عليكم

البوست رااااااائع جدا

انا متفقة مع حضرتك في الكلام

بس برضوو الواحد ملاحظ فيه اتجاة ديني

أو خيري تنموي ماشي

فدا بيفرح

ربنا يهدي الجميع

تحياتي و تقديري

احمد سالم يقول...

طب محدش فى اخر المسابقة قاله انت من الاحرار يا ميمى

Esmeralda يقول...

بوست مسخرة كالعاده و مسابقه مالهاش عازة و نشربها ان شاء الله ساده على روح فؤاده

الله يخرب بيت العولمه و الغزو الدماغى ملكه جمالو و ملك جمال ايه و نيله ايه بس؟؟؟؟
اخويا شاف الحلقه و حكى لي عليها بيقول الواد حاجه كده مش على بعضها
بقي هو ده رمز الشباب المصرى ؟؟؟؟؟
الله يرحم ايام زمان
بس وائل بيحب يهدى النفوس الصراحه
مش فاهمه ليه مفيش مسابقه لاحسن اختراع , فكرة, لأ الخيبه حطه و مستريحه
الله يخرب بيوتهم , و ايه الخير اللى اتعلموه بقي ان شاء الله؟؟؟
و الله العظيم الواحد بيسمع الكلام بتاعهم تحس كده عالم مش عايشين معانا و لا جايين متعرفش من انهى بلوة
ما هو لو كل واحده ليها اب و لا اخ يلمها مكناش شفنا المسخرة ديه
العيب على اهاليهم
جتهم الهم
لامؤاخذه يا خويا طولت

emos يقول...

walahi gamed geddan
beravo 3aleek
ya reet masr kolaha zayak ya she7'

3ala fekra el 3eeb mesh 3ala el nas deh bs
el 3eeb 3ala elly beyshaga3ohom aslan

fe sana men el seneen elly kesebt mosb2et malaket el gamal kesbet 3ashan heyya el wa7eda elly redyet telbes el mayoh el bekini wel ba2y 2etkasafo

rabena yehdehom ya rab

emos يقول...

momken ab3at el post beta3ak l my friends 3ala el mail?

Searcher يقول...

بصراحه البوست بتاعك هايل
أنا اللى عجبنى طريقة عرضك للموضوع و إسلوبك الساخر بالرغم من إنى شايف إنك مكبرها حبتين و إنى مش معاك فى الرأى و إنى من المدافعين عن المسابقه و مش هى دى اللى هتبوظ سمعة مصر و بالرغم من إنى إتفرجت على كل حلقات وائل الإبراشى اللى بتتكلم عن الموضوع ده إلا إنى إخذت صف المسابقه مش الأهالى الهابيل اللى طالعين يفضحوا بناتهم على الهوا
أنا عارف إن أنا الوحيد من المعارضه هنا بس على العموم الإختلاف فى الرأى لا يفسد للود قضيه ولا إيه؟
تحياتى

إنـســانـة يقول...

والله انا شوفت الحلقات دى ونفسيتى باظت جدا يا اخف
حسيت ان القيامة هتقوم خلاص ومافيش أمل على الإطلاق
حسبى الله ونعم الوكيل بجد
حاجة تحرق الدم
:@

esraa يقول...

مش عارفه أضحك ولا أعيط

يعني أكيد لازم أضحك من تعليقاتك علي الموضوع

بس أكيد بردو لازم أعيط من اللي بيحصل ده

انا شفت حلقه تانيه بردو عن ملكات الجمال, بس مش دي, ياخساره ملك جمال مصر فاتنيp:

والصراحه وائل علي طول يحب يهدي النفوس, هو فعلا راجل رائع

والله يأشرف انا مش عارفه فعلا أقول ايه؟

ضـوء الـقـمر يقول...

ههههههههههههههههههههههههههه
والله يا اشرف انا شفت الحلقه دي كنت قاعده مسبهله كده من حبة كلام بيتقال :D
بدون ذكر ايه هو الكلام ده بس ايقنت تماما ان ملك جمال مصر على حق وان عامة الشعب هم اللي متخلفين مش عارفه ازاي مش مقدرين ان هو تقريبا الوحيد العدل في البلد اللي بيمثل مصر ولا زويل بقه ولا عبد الناصر ولا نجيب محفوظ لا لا لا ايه الكلام الفارغ ده دي ناس ملهاش اي قيمه ولا هو حارب قد ايه عشان يبقه واجهه مشرفه مصر لا لا لا لا الناس دي متخلفه ومش مقدرة يعني ايه حضاره

حاجه تحرق الدم عالم متخلفه لا تقدر قيمة ملك جمال مصر

غير معرف يقول...

اظرف نكته فى الموضوع بتاعك حتة بنات مصر ملكات اصلا وشباب مصر رجالة من يومهم، حاجة كده زى توقيعك اللى انت حاطه بان مصر هيه الماما بتاع أنا ميفرقش حاجة عنه

ومعلش بس عندى سؤال غلس شوية هو انت مالك اذا كان فلان ولا فلانة بيصلى ولا بيمسك مصحف ولا لأ؟

الأباصيرى يقول...

ياعم الكتكووت أفهم

بدل مالولد المراهق يدخل بيتهم وهو معاة صورة لشاكيرا وهى لابسة مايوة
هيدخل البيت وهو معاة صورة واحدة مصرية 100% ومش لابسة حاجة

يعنى هنشجع الصناعة الوطنية
وهنبطل نستورد صور اباحية


طبعا الرجعيين أمثالك هما اللى بيبوظوا سمعة البلد بالافتراءات الحقد الدفين اللى جواهم دة

أهمدوا شوية بقى خلوا البلد تنتعش وتركب الحنطور أقصد تركب ركب التطور

مش عارف لية أفتكرت نكتة الرقاصة اللى مبتغنيش عشان صوت المرأة عورة

يالا ماعلينا

أخيك المفروس
الأباصيرى

الأباصيرى يقول...

شهقة كبيرة
+

أنت اخدت صورة ممنوع التدخين بتاعتى



طيب عقابا ليك
هتجيب قاروصة سجاير وتوزعها على البلوجرز مجانا
:)

خمسة فضفضة يقول...

السلام عليكم ورحمة الله وبركاته

ههههههههههه

الجديد في المسابقه دي انهم اتعلموا مش بس يعملوا الخير

لا كمان ويرموه البحر ،مهو كل حاجه وليها اصول مش كده ولا ايه



تحياتي

تامر حسين يقول...

هههههههههه
بجد موضوع يموت من الضحك وفي نفس الوقت يحزن
تحياتي

محمد ياسر يقول...

يا اشرف انت معاك حق وانا كنت زيك كده و اكتر كنت متغاظ جدا وقت المسابقة و اعلانتها و بعدين المشاكل اللى طلعت للبرنامج و كله هبل فى هبل

انت ولا تغيظ نفسك بس هى دى واجهة مصر هنعمل ايه بقى ؟

و كعادتك دمك خفيف

تحياتى لك

ساعه الغروب يقول...

لما كتبت المجلات او الجرائد اى نبذات عن الموضوع ما قريتش عنه ولا كلمه والحمد لله لما شفت حلقه البرنامج ولقيت انه دا الحوار حولت لانه ما عجبنيش

و لذلك بجد مع كل سطر قريته هنا عندك كان معدل الاندهاش عندى بيرتفع ومعاه منتهى الغيظ والاحساس بالمهانه

ازاى يعنى يحصل كدا وازاى يصححوا الغلط بفضيحه اكبر منه وهى ردودهم دى

انا مش عارفه بجد اقول ايه ؟؟

يعنى من الاخر مش عارفه اقولك شكرا لانك على الاقل عرفتنى اللى كان بيحصل ولا اقولك انى بجد مضايقه انى عرفت كلام زى دا

ما انا اصلى ما اقدرش الاقى بوست هنا ومش اقراه

فعموما شكرا ليك وربنا يهدى الجميع

ويرحمنا جميعا من مثل هذه التفاهات

شكرا ليك

:)

westtewest يقول...

اولا احييك انك كتبت فى الموضوع دا لانه كان فاقعنى لدرجه انى كنت باتكلم مع واحد صاحبى طلع يعرف احد ملوك الجمال المزعومين فغصب عنى شتمته المهم
عندك حق فى كل اللى قلته ومش عارف ليه كلامك عن من حارب فى 73 فكرنى بجواب كان بعتخ والدى لوالدتى اثناء خدمته بالجيش اثناء الحرب والدى لما اتخرج من الجامعه دخل الجيش سنه 69 ضابط احتياط وفضل خاطب والدتى وخرج من الجيش سنه 75 برتيه نقيب يعنى ست سنين ضاعو من عمره عشان البلد المهم فى الجواب اللى كان مبعوت قبل الحرب بكام شهر بيقول كل الناس هنا "على الجبهه" خلاص نفسها تحارب النهارده قبل بكره كلنا مستعدين ومحدش خابف من الموت عاوزين نحارب حتى لو هنموت مش مهم
الى هنا انتهى كلامى وسلامى لكا من طلع يعرض علينا عضلاته ويقول انا بطل
سلامى الى كل من تسابق مش عارف ليه بس الهدف مش مصر الهدف سعيا وراء الشهره والفلوس
وياحسره على اللى باع رجولته ودينه وبلده من اجل الفلوس

westtewest يقول...

بالمناسبه بقيه الجمله بتاعت سعيد صالح اللى مناسبه اوى على الموقف دا
بكره بنتك تسكر وانت تمز يا ابو سوسو

shahy يقول...

بجد فعلا حقيقي
اسم على مسمى
اخف دم

استاذ اشرف
انا شفت الحلقة دي ودمي اتحرق
لأ ولما الراجل قال انة باع اللي قدامة واللي وراة علشان يدخل بنتة في المسابقة الشريفة دي

وزمانة اخد حسنات قد كدة مني لاني بصراحة لما سمعتة قال كدة بدأت اشتمة بكل شتيمة اعرفها بس شتايم مؤدبة علشان بابا كان بيتفرج معايا
لكن في سري ماحرمتوش من حاجة هو ومراتة وبنتة
وربنا يسامحني بقى

تحياتي يا اخف دم

عين ضيقة يقول...

انت بتقول لمين يلحقوك؟؟

بلاش تتعب صوتك ع الفاضى

على فكرة الموضوع مش مثير للضحك ولا حاجة
هو مثير للإحساس بالخيبة

سلام بقى

nour يقول...

طب انت عارف بقى حاجة كمان
لبنان اللى احنا بنقول عليها انها بلد الصياعه و كلها مزز مسابقة الجمال فيها كانت عاملة ازاى
كان الاعداد رائع و المسرع فظيييع و الاستعراضات و الفساتين اللى مصممينها احسن مصممى الازياء العرب مس الاجانب و كانت اساس اختياراتهم المسروع اللى كل مرشحه بتعملة فى جهه خيريه الصليب الاحمر او دار المسنسن او التبرع يالدم كانت حاجة نضيفة و معمولة بذوق مش زى عندنا
يللا مصر دى عظيييمه فعلا
:)))
واحشنى يا مسيو اشرف

علاء يقول...

محتاج رأيك بخصوص الموضوع ده

تجمع مدوني مصر .. حقيقة قابلة للتنفيذ أم حلم بعيد عن الواقع

YHYيــوســف الـمصـرى يقول...

انت فين يا سيدى
ما تعبرنا حتى بمسدكول
وحشنى يا اشرف باشا
مستنى اسمع صوتك قريب وابقى اقعد فى مكان فيه شبكة علشان تليفونك غير متاح على طول
طمنا عليك يا حج
سلام

مجلة المُدوّن يقول...

عزيزي المدون: ها نحن نفتتح بين أيديكم مجلة إسمها المُدوّن

سعيا منا في المساهمة في إقلاع ثقافي يهدف إلى تحقيق تنمية شاملة، وعلى جميع الأصعدة

المُدوّن
رؤية ثقافية تنقلك إلى آفاق لذة القراءة والمتعة والفائدة

فندعوك لتصفحها.. ونرحب بك صديقا وفيا ومراسلا مثابرا

فأهلا ومرحبا بك

--
مجلة المُدوّن
http://al-modawinmag.blogspot.com

الكلام نوعان :كلام فارغ وكلام مليان كلام فارغ يقول...

انت فين يا سي اشرف
ولا تعليق ولا رساله ولا رنه
ايه البخل ده
طب انا عازماك عندي في البلوج عندي ليك خبر حلو
يلا
اشوفك عندي
باى

camera_girl يقول...

اشررررررررف يا توفيقققققق
------------------------------

انا اتقلبت يا رجااااااااااااااااااله

كان فى حته بصوره كت كده انا قاعده فالشات ولا فى محطة مصر..............................موضوع محدش كتب عنو..لأن الواحد اتشل تقريبا كويس انك عمرت وعرفت تكتب حقيقى احنا عاوزين نكون زيهم(....)

بس ديما نقع فى عيب خطير ....اننا م شعارفين اننا حاله خاصه وديما هنلااقى عوارض كتير...مينفعش نكون زيهم فالثقافه....اكتر شىء يشللك اننا مبنحاولش نكون زيهم فللى يفيدنا.....حسبى الله ونعم الوكيل

تخاريف دكتور يقول...

على فكرة دى اول مرة ارغى عندك
ومن اول مقال شكلك كده رجعية
دقة قديمة يعنى والكلام ده ماياكلش معانا هه؟؟
الناس دى هى اللى عامل اسم للمحروسة ى اوروبا وامريكا وخلى الشعب يعيش
هه؟؟

نـــ..!..ــور يقول...

والحديث عن الذوات وأهمية تشييدها وبنائها هو كلام جميل، وهو بالمناسبة يردد منذ قرون، وقد يردد أيضا لقرون قادمة !

هذه المسابقات فقط استبقت هذه المرحلة من التنظير إلى التطبيق العملي فهي لو فقط تم تأملها في جوهرها سيتضح أنها هدم للنفوس من خلال تشيد صروح الذل والخوف في أنفسنا

اخوك

شجره الدر يقول...

اشرف
فاكر فيلم الحرافيش اللى هو كاتبه نجيب محفوظ الجزء التانى من الفيلم لما الفتوات بتضرب بعضها فى الاول
واهل الحاره اللى يغلب فيهم يقولوا له
اسمالله عليه اسمالله عليه
انا بقى بقول
اسمالله عليه اسمالله عليه
وحسبى الله ونعم الوكيل
قال ملوك وملكات قال

Desert cat يقول...

فكرتنى يا اشرف من شوية كنت باتكلم فى منتدى عن قضية الشباب اللى تم اعتقالهم وهما بيصيفوا لاقيت واحد طالع يرد عليا ويقولى ايوا يسجنوا اصل احنا احفاد الفراعنة والرفاعنه بنوا مصر وتعبوا فاحنا المفروض نكون متدلعين
ويا صلاة النبى احسن على راى سمعه ابو ياسين
وسلم لى على احفاد الفراعنه المتدلعين

shreef يقول...

مقدرش اقوول حاجة بعد كلامك لانه في الجون الموضوع فعلا نرفزني جدا بدرجة لا تتخيلها و خصوصا لما شوفت الحلقات و اسف مش هقدر افضفض علشان لو اتكلمت ببئى عايز انزل بشتايم من قلبك يحبها فبلاش احسن..سلام

امرأة تقول الذي لا يقال يقول...

فعلا هم يضحك وهم يبكي
ضحكتني وفي نفس الوقت قهرتني
ربنا يهدي
ويسمع منك ربنا ويلغوا المهازل دي

hend يقول...

انا شفت الحلقات بتاعت المسابقة الزفت دى وكانت تحرق الدم خاصة الاخ ملك الجمال اللى جايبينه واخته الست الملكة والوالدة معاهم بصراحة انعم واكرم يتزين ماربت بت كل شوية تشد البدى اللى نصه مكشوف لتحت كان ناقص تيجى بالبكينى وبتشوح للى ادامها مش مراعية فرق السن بجد مثال يحتذى به اما الواد يا سلام عليه ده تقريبا كان عامل حواجبه قبل ما ييجى وراشش وشين بويا على وشه وكل ما يتكلم يقول احنا سفرة ومثال حضارى للبلد والست الوالدة ياسلام طنط ام الملك والملكة عايز تاخد نشال على اكتافهل بصراحة معندهاش غير كلمة واحدة انتم هترجعوا البلد ميت سنة ورا بالجهل والتخلف بجد بجد روعة
وكان فى واحدة من اولياء الامور جايه برده بنتها ماشاء الله راقصة بس راقية شوية وياعينى بتتضامن مع دور الايتام ومن المحسنين متقولش خضرا الشريفة وازاى بنتى تلبسوها كده وتصوروها قال يعنى البنت ما تلبس استغفر الله العظيم اشكال من دى
والبيه والد البنت اللى مامتها قعدت معاها وائل بيساله طب انت ليه ودتها قاله بنت زى بقيت البنات وعايزة تفرح شوية لا حاجة بسيطة سيبوها تفرح شوية يا جماعة ونعم التربية

الحاجة اللى حرقت دمى اكتر بعدها بيومين كانوا جايبيبن ملكة جمال السويد على mbc
حاجة راقية بغض النظر عن اختلاف الديانة والمحرمات وهى طبعا اساسى بس البنت كانت قاعدة لابسة زى كامل زى المضيفات بتوع الطيارة وقاعدة ولا ملكة السويد واخدت تعدد الشهادات اللى وخداها والدكتوراه اللى محضراها والماجستيرات وغيره وده كله وعنده 21 سنة قارنوا باه بين دى والاخت الفاضلة فى برنامج وائل الابراشى واحكموا
بجد بجد بلد معتش فيها دين وحسبى الله ونعم الوكيل

عـلا - من غـزة يقول...



dear ashraf

I know you are addicted to blogging,

the question is HOW MUCH!!

I've tagged you to find out !

تحياتي

ادم المصري يقول...

استغفر الله العظيم
استغفر الله العظيم
.
.
والنبي يا اشرف يا اخويا
لو وقعت صورة من دول تحت ايدك
ابقي شيلهالي في الخباثة كدا
ماشي؟
.
.
.
حيييي
استغر الله العظيم
استغفر الله العظيم

خليك فى البيت يقول...

ندعوكم لزيارة مدونة خليك فى البيت والمشاركة فى الحملة

فى القلب يقول...

شوف يا سيدى أنا كان نفسى أعلق ليك من زمان أنت فعلا أخف دم وشاعر جامد
بس كنت مستنبه أعمل مدونه الأول وعملتها أرجو تشريفك

واحـــد مـــــن الـنـــاس يقول...

والله انا متابعتش الموضوع ده خالص
ومسمتعش غير تخاطيف كلام عنه بس
بس المؤكد
اني متفق تماما مع الاخت
chimera
عنها حق في كل اللي قالته والله
انتو مش بتنزلو الشارع ومش بتشوفو ايه اللي فيه ؟؟؟

حــكــيــم روحــانــى يقول...

آل فكر و ثقافه و دين آل
أهو ده اللى ناقص

انتو اللى بتبوظو الشباب

HoNdA يقول...

لا نملك غير ان نقول لا حول ولا قوة الا بالله وقشطه عليكى يامصر
الله يكون فى عونك بجد

انا حاسه ان الناس بقت بتتفنن فى الهيافة ربنا يستر

rona يقول...

ض زى ما هما بيعملو كده ويشوهوا كمان صورتنا احنا محتاجين حد يرجع يربى الاهالى مش الاولاد ويعرفهم فى ان قيمه البنت فى انها تكون غاليه مش رخيصه وان قيمه الولد فى انه يكون راجل محترم بس كل ده بسبب البعد عن الدين كل الى نقدر نقوله ربنا يستر من الى

Sarah Daw يقول...

ههههههههههههههههه

موضوع جامد موووووووووووووت

و الحاج وائل شكله كان بيهدى النفوس جامد


المفروض إن بلدنا فيها حاجات أهم من كده عشان نهتم بيها .. بس تقول أيه تقليد أعمى

kafrawy يقول...

اية ياعم ....
انت عايز ولاد الناس اياهم يقولوا احنا مش بنفهم ف الاتيكيت

اية يعنى الملك نشف ضهر الملكة بالفوطة وهى خارجة من البسين؟؟


اية يعنى لما الملك يحلق شعر صدرة
؟
ظروفة كدة

اية يعنى لما يقعدوا بالبكينى والسليب ع البسين ويدعكلها بالزيت ع ضهرها
طيب ما مادلين مطر عملت كدة ؟

انت بتهرج

الاولاد ممكن يجيلهم صدمة من اللى انت بتقولة دة يا استاذ

مصر جنب الشهادات محتاجة كمان كفاءات

تحياتى

أخف دم يقول...

شكرا يا جماعة على الكلام الجميل ده وربنا يعافينا من اللى بيحصل فى مصر .. وأنا طبعا أقصد بتحريم المسابقات دى انها تتحرم قانونا مش دينيا لأننا عارفين طبعا انها حرام جدا .. بس ياريت تتحرم قانونا كمان فى مصر .. وبعدين يا ريت الناس اللى ممكن تفكر انها تؤيد المسابقات دى تتخيل ان أختها هيه اللى بتتسابق وهتبقى عريانة ومكشوفة كده قدام خلق ربنا
ربنا يعافينا جميعا
وربنا يخلى لمصر شبابها وبناتها
شكرا ليكم تانى ومنورنى دايما

Dr.Mohammed Gohary يقول...

عليا الطلاج بال 3 انت بتتكلم صح يا معلم سلطان البيت -مصر- هيتهد علي دماغك ودماغ اللي خلفوك يا معلم سلطان ماعلينا لاتعليق يا أشرف
أصل هحرق دمي ليه ؟؟ تعرف اللي عاجبني في الموضوع -كلو طبعا- اخر سطرين والله انتا باشا تسلملنا دماغك
تحياتي يا اشرف بيه

AbdElRaHmaN Ayyash يقول...

اللي عاوز اقوله كلمة واحده بس
ما أروعك يا أشرف
ربنا يخلليك بجد على كل ده
عندما يكون الضحك .. هادفا
بس

مهندس مصري يقول...

انا عمال اقرأ المدونة من اولها من تحت لحد ما وصلت لهنا
حاجة مستفزة فعلاً
بجد الناس دي هي اللي بتسئ لسمعة مصر

العيسوى الصغير يقول...

إن الله لا يغير ما بقوم حتى يغيروا ما بأنفسهم

عصفور طل من الشباك يقول...

لا حول ولا قوة إلا بالله

أنا فاكرة إني لما كنا زمان في السعودية صديقة سعودية قالت لأمي إني لولا عارفكم وعارفة أخلاقكم كنت قلت كل المصريين زي اللي بنشوفهم في التليفزيون

في وقت كانت كل اللي بيطلع في التليفزيون من نوعية البنات والولاد إياهم

افتكر إن في فترات ما كنتش تشوف واحدة محجبة ماشية في الشارع في إي تمثيلية كأن مصر كلها بلاش محجبات ده حتى إخواتنا لامسيحيات ما أغلبهم محترمين ومحتشمين في لبسهم اشمعنا بنطلع اللي لابسين ميكرو وبيتجوزوا عرفي في الجامعة


فاكرة أيام مسلسل أوان الورد يسرا قالت لسميحة أيوب كلمة ما اقدرش أنساها لغاية دلوقتي

كانت الأم بتقولها قد إيه ضحت عشانها

فالبنت ردت بإنها احترمت التضحية دي وعمرها ما عملت حاجة تهز ثقتها

"ده أنا عندي ثلاثين سنةوعمر ما حد باسني لغاية دلوقتي"

على أساس إنه عادي كل البنات تتباس قبل الجواز وإن يسار هانم مضحية عشان أمها

لا تعليق

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡