اخبار

الأربعاء، 31 يناير، 2007

التاج التاج التاج .. أوصفلك يا حبيبى التاج


بقالى كام يوم كل ما أدخل عند حد البلوج بتاعه ألاقيه بيجاوب على شوية أسئلة خير اللهم اجعله خير اسمهم (تاج)..وانا أساسا مش فاهم يعنى ايه تاج .. بس ماشى .. المشكلة ان كل واحد يقولوله تحب تمرر التاج لمين؟ يقول لهم ناس من ضمنهم أنا ..أنا أساسا مستغرب ليه هوه عايز يمرر التاج رغم ان سكره مش كتير يعنى..المهم .. ناس كتير قالت كده زى عمرو وأحمد وزكريا _ إيه الفشر ده ..هوه فيه بلوجر اسمه زكريا أساسا_ المهم استنى يوم .. يومين ..إنى ألاقى حد بيخبط عليا يسلمنى التاج زى الديلفرى مفيش..اكتشفت خير اللهم اجعله خير ان الواحد اللى بيتمرر له التاج بيجاوب عليه من غير ما يروحله .. يعنى م الآخر صاحب محل الديلفرى هوه اللى بيطلب الزبون..وانا اللى قاعد اقول العيال دول كلمنجية ومفيش حد جابلى ولو حتى سؤال صغير ولو بالجبنة حتى
المهم على ما اكتشفت الحقيقة المرة دى ..لقيت ياسمين أحلى إنسانة _مش زينا يعنى_ بتبعتلى تاج تانى بسؤال تانى ..أصل هيه ناقصة..أنا قلت يا واد ادخل اعمل التاجين مع بعض جايز تدخل الخصم ..وللا تبقى أخف دم اتنين فى واحد هيد أند شولدرز يعنى ..وانتوا غلبانين وقلت أعمل التاجين واحد بإيدى اليمين والتانى بالشمال وكأنه صدقة يعنى ..وتبدأ المواجهة ..موسيقى تصويرية أن أن آآآآآآآآآآآآن
إيه اللى هيحصل لإيميلى بعد ما أموت بعد الشر عن حضرتى؟
ما يتحرق بجاز الإيميل .. يعنى انا أطنش العالم التانى اللى انا داخل عليه ده والبلاوى اللى الواحد عملها فى العالم الأولانى المعفن ده واقعد افكر فى أم الإيميل هيحصل فيه إيه؟ هوه إيميل دور كايم ياخى؟
اديت الباسوورد لحد قبل كده؟
لا طبعا.. لسبب منطقى جدا.. إن مفيش حد طلبه يعنى.. أى نعم لو حد طلبه مش هديهوله بس برضه.. مش عشان هوه حاجة رهيبة يعنى .. لأ عشان نوع من الخصوصية وخلاص..مع إن كل اللى عندى على الإيميل رجالة حتى البنات اللى عندى بميت راجل يعنى مفيش خوف .. وكمان الإيميلات معظمها شعر وقصايد لناس عشان اقول رأيى فيها يعنى من الآخر اللى هياخد الباسوورد احتمال يزود عليه رقمين ويجيبهولى تانى
لو آه طبيعة علاقتك بالشخص ده ايه؟
علاقة حلال طبعا.. مش عرفى يعنى
اسمك؟
أشرف توفيق
وبحس أحيانا إن أبويا سمانى كده عشان يشكر فى نفسه .. أشرف توفيق يعنى أحسن توفيق.. كل اما حد ينادينى يعنى بيشكر فيه هوه
اسم الدلع المشهور بيه؟
هوه مش دلع بالمعنى المفهوم .. أهو تغيير وخلاص .. ممكن أشرف باشا..أشرف بيه..شرف.. أشرووف..كده يعنى..إنما أخف دم ده اسم طلعه عليا صاحبى الشاعر الجميل عادل سلامة من زمان وبقت الكلمة معاى بين اصحابنا
عمرك؟
بقالى أربعة وعشرين يوم ابقى كده ستة وعشرين سنة .. لأن عيد ميلادى يوم 6/1/81 .. لا لا لا لا بلاش هدايا ولا فلوس.. خلاص يا ياسمين بقى وانتى يا إنجى ..يا بسمة خلاص انتى ودينا وإسراء وشيكو..والله عيد الميلاد فات يا علياء انتى وشيماء..رجعى فلوسك يا ميمو..وانتى خدى الدبدوب يا نور.. الله .. هوه عيد الميلاد مفيهوش رجالة وللا ايه؟.. مالكش دعوة ياد انت وهوه واطلع من بلوجى
برجك؟
الجدى طبعا..شوفوا انتوا صفاته لأنى متوااااااااااضع مش هاتكلم عن نفسى خاااااالص
مجال دراستك؟
خريج آداب إنجليزى المنصورة .. هما قالولى الإنجليزى حلو وله مستقبل .. والحمد لله مستقبله باين زى الفل بقاله تلت سنين.. يمكن مستقبله قدام شوية؟
شخصيتك نوعها إيه؟
بالكاتشب..بجد من غير هزار.. بسييييييييييط جدا .. آه وربنا .. والحياة بالنسبة لى رغم كل اللى فيها لذيذة يعنى والحمد لله بحاول أحول كل مشاكلى لنقط قوة وبعديها بسهولة.. غير إنى باخد كل الأمور الصعبة بابتسامة ومتساهل جدا فى حقى .. عارف انه عيب فظيع بس أنا كده م الآخر ومش هتغير..إن شاء الله
السفر بالنسبة لك؟
حاجة ممتعة جدا وجميييلة جدا .. أنا يعتبر رحت مصر كلها حتة حتة .. وسافرت بره مصر فى مؤتمر الشعر ممثلا لدولتنا المحروسة كشاعر كبير_حطوا تحت الكلام ده كام خط وغيروا اللون بتاع كلمة كبير_.. وطبعا كانت ذكريات السفر بالطيارة عايزة بوست كامل .. ربنا يسهل وأشرفكم بكتابته
م الآخر أنا بموت فى السفر والحمد لله باعرف أكون صداقات وذكريات جميلة فى كل مكان باروحه
المود بتاعك؟
هاااااااااااااااادى .. بابتسم علطووووووول .. حتى لو مليان مشاكل..زى ما انا كاتب فى البلوج مفيش حد واخد منها حاجة
وقت فراغك بتعمل فيه إيه؟
شوفوا بقى .. وقت فراغى جميل قوى .. أولا الشعر ده مهم جدا .. وخاصة إن المسألة عندى احتراف مش هواية الحمد لله..ثانيا أنا خطاط .. بحاول أطور كتاباتى وخطى.. ثانيا أنا قارئ نهم الحمد لله باحاول أقرأ كتير جدا فى كل المجالات مش الشعر بس..ثانيا النت مهم جدا برضه للتواصل بينى وبين الناس..ثانيا الخروج بره مهم ..لازم كل يوم يبقى فيه جديد .. مكان جديد اروحه..حد جديد قديم أشوفه ..هوه فيه كام ثانيا لغاية دلوقتى؟ المهم ..فيه حاجات تانية بس دى أجرها عند ربنا مالكوش دعوة بيها .. انتوا فاهمين؟
الأكلة المفضلة؟
المحشى.. البسلة ..الكفتة ..الفراخ طبعا..م الآخر اللى تجيبوه هاكله وأنا راضى
الصفات اللى خدتها من بابا؟
أبويا مكبر دماغه ودى أحلى حاجة فيه ودى عندى بقى.. ممكن البيت يبقى مولع من أى حاجة وهوه بيدور فى التليفزيون على فيلم لعادل إمام.. وربنا أبويا ده زى العسل
الصفات اللى خدتها من ماما؟
صاحبة واجب جدا.. ممكن تحرم نفسها من أى حاجة بس تعمل أى واجب تقدر عليه.. ممكن تجوعنى م الآخر عشان خاطر تأكل ابن خالة عمة أم أحمد حماة ابن محسن جارنا
أكتر 6 حاجات باحبها؟
ربنا والرسول صلى الله عليه وسلم والصحابة ومواقفهم اللى بتحسس الواحد قد إيه هوه صغير
الناس
الرحمة
لما حد يحبنى من قلبه
الدم الخفيف
التعرف على الناس وتكوين صداقات حقيقية..وطبعا بشرفهم بمعرفتى
أكتر 6 حاجات باكرهها؟
يادى الفكاكة ياجدعان!!! عكسهم طبعا..وللا طيب نقول
ولاد الخنازير الكفرة فى كل مكان اللى بيسيئوا للإسلام وللرسول
الغل والحقد
الظلم
ان حد يبقى عارف انى صح وبرضه يعمل اللى فى دماغه... ده يبقى غبييييييييييييييييييييييييييي
حد يعاملنى بأقل من قيمتى .. ساعتها التواضع اللى بجد بيظهر
إن حد يمرر لى تاج معفن زى ده ويدبسنى فيه
الشغل بالنسبة لك؟
هوه فين الشغل يا جدعان؟ إحنا هنفشر؟ أنا ممكن أجاوبكم على اعتبار إنه حيوان خرافى بشنب مثلا
الشغل بالنسبة لى كائن خيالى كان موجود فى العصور البالية وقد انقرض منذ سنين .. وقد أكدت تصريحات الحكومة انه انقرض لأن الشعب مش وش نعمة .. وقال آخرون بأنه بعد ظهور مقولة (إن فاتك الميرى اتمسح فى ترابه) أن الحكومة خايفة على هدوم الشعب من التراب
الشغل ؟ ياااااه .. الكلمة دى أنا قريتها فى القاموس يا جدعان..باب الشين فصل الغين وما يثلثهما..فاكرها والله
ع العموم الشغل خير قوم نتصالح .. الشغل خير
أنا طول عمرى الحمد لله حر والشغل مخلينى حر كمان .. يعنى من الآخر أنا داير على حل شغلى
الكمبيوتر والانترنت بالنسبة لى إيه؟
وسيلة جديدة بتخللى الناس تتشرف بمعرفتى
نخلـّى السؤال الأخير لآخر البوست
نيجى للتاج التانى .. عايزين خمس حاجات محدش يعرفهم عنى..طيب
أولا: كنت مش شاطر فى الكيميا بس شاطر فى المواد التانية فى الثانوى فالأستاذ بتاع الدرس كان فاكر من السمعة إنى عبقرى كيميا يعنى..كان بيعمل امتحانات كل خميس وجمعة كل أسبوع..أروح أنا آخد الامتحان من العيال بتوع الخميس وامتحن الجمعة بعد ما أذاكر طبعا وأجيب الدرجة النهائية أو أسيب نقطة عشان أسبك الطبخة..فى يوم بقى الأستاذ خللى الامتحان لكل الناس يوم الجمعة بس..طبعا رحت أنا وبحمد الله جبت 13 من 30..طبعا الأستاذ اتشل فيها وقال لى مالك يا عم أشرف ؟ قلتله بكل براءة أصل الامتحانات قربت يا أستاذ وأنا متوتر حبتين اليومين دول
ثانيا:انضربت مرة علقة محترمة فى الثانوى .. كنت مع ناس أصحابى بندافع عن واحد صاحبنا بيتشاكل..وخير اللهم اجعله خير لقيت الواد اللى بيشاكل صاحبنا جاب ييجى أربعين واحد كل واحد منهم شايل اللى ربنا قدره عليه من عدد اللحام والعجلات والسنج والذى منه .أقل واحد الضعيف فيهم يعنى كان شايل مطوه على قده.. وكل حاجة مترتبه يعنى كل واحد عارف هيمَوِّت مين تحديدا..الجميل إن فيه أدوات بيضربوا بيها كان شكلها حلو .. أنا بصراحة قعدت أستمتع وهما بيطحنونى..وأتساءل يا ترى العدة دى بتاعة إيه؟والمشكلة ان الواد صاحب المشكلة جرى وسابنا المعفن
ثالثا: نفس الشكلة اللى فوق ..رجعت البيت وانا أتوعد وكل واحد مننا مجهز نفسه للمعركة الجاية يوم الامتحان الجاى.. ولأننا بنمتحن فى بلد الناس دى مش فى بلادنا.. فكان آخرة التوعد والتهديد بتاعى إننا رجعنا من الامتحان بعربية الشرطة عشان ماننطحنش تانى
رابعا:واحدة طلبت منى فى لقاء أقول لها قصيدة ناقص دبدوب اللى فى البوست اللى فات..وبدأت فى القصيدة وفى نص القصيدة لقيت البت اتشحتفت فجأة وبتدمع وبعدين بتعيط وفى حاجات غريبة بقت بطرطش عليا .. المهم خير يا شابة؟ دا انا بقول قصيدة خفيفة يعنى.. مش يا أيها الراقدون تحت التراب يا ضناى. قالتلى أصل أنا لسة مارة بالتجربة دى دلوقتى ولسة مرجعة الدبدوب..طب وأنا دخل أهلى إيه ؟ ومن يومها وأنا كل ما أقول قصيدة بالمح البت الأول .. أول ما تنهنه بامشى وأسيبها تتحرق بقى
خامسا: مش فاكر حاجة والله .. ابقوا حطوا حاجة كويسة تليق بيا وأنا هامضى
السؤال الأخير بقى
أمرر التاج لمين؟
التاج ده على ما يوصل لباقى المدونين هيبقى ممرر حتى الثمالة.. حلوة الثمالة دى
أمرره لكل واحد يدخل عندى .. ولكل اللى مامة سيادته داعيه عليه وقايلاله إلهى إيديك توجعك من الكتابة على الكيبورد
بجد والله بجد.. أنا بحبكم جمييعا .. وبحب كل واحد قاللى أى كلمة من أول ما دخلت العالم ده بتاع البلوجرز وكل اللى انا اتعرفت عليهم رجال وآنسات
ويا رب يقدرنى واتعرف على الباقيين فى المرحلة اللى جاية.. ودى دعوة مفتوحة لأى حد يضيفنى عنده أنا أتشرف بيه طبعا. . الإيميل فى البروفايل
شفتوا .. قمة التواضع والله


هناك 36 تعليقًا:

إنـســانة يقول...

هههههههههههههههههههههههههههه

وبعدين انا مجبتلكش هدية ولا حاجة
عشان تفتكروا الجمايل دى

بيسوو يقول...

الصراحة زي ماقلت لحضرتك انا كنت فاكرة موضوع اخف دم ده اوشاعات اوشاعات انما ولدهشتي الشديدة طلع صحيح

مش عارفة اقلك ايه ولا ايه علشان البوست طويييييييل وعيني اتمققت عقبال ماقريته وكدة عيب على فكرة

المهم انا كنت محتاجة بوست حلو زي ده علشان اضحك وانت بجد متعرفش انت عملت خير قد ايه فيا وفي الي زيي...قصدي يعني المكتئبين
فا بالنيابة عن نفسي وبالاصالة عن زملائي..ولا هي العكس؟؟.والله مش فاكرة المهم
احب اشكرك

moorgen يقول...

هااااااى
ازيك اشرف
:)
الحمد لله ان ربنا اعانك وجاوبت
:)
وبجد ربنا يديم عليك تفاؤلك
اقولك ادينى حبـــــــه
واه انت طلعت جدى اهلا
تصدق انا بيقولو عليا جدى بس انت كدا خلتنى اشك
:)))

3ola يقول...



ايه حكايا التيجان اللي ماشية في البلد اليومين دول

ناويين نقلبها ملكية :)

وكل سنة وانت طيب يا اشرف

مدونتك شربات والبوست ده بالذات يموت من الضحك ,, ايه يا عم بالراحة علينا :p


علا - من غزة

rasha يقول...

كويس قوي انك ما دبستش حد في التيجان دي كلها بس انا نفسي اعرف هو مين اللي بيعملهم اصلا!؟

darsh يقول...

على فكره موضوع التاج ده كل ما اشوفه بفتكر لعبة الصراحة اللي كنا بنلعبها زمان دي .. اكيد كلكوا عارفينها
المهم اللي انا كنت اعرفه عن اللعبه دي ان المفروض ان كل واحد ( الزجاجه ) حلوه الزجاجة دي ؟؟ تكون ناحيته هو اللي بيتسأل وكان لازم يجاوب بصراحة وكانت الأسئلة محرجة بجد
وكنت انا فعلا بجاوب بجد وكنت بقول حاجات ماينفعش تتقال خالص ( عبيط قوي) المهم بعد كده اكتشفت ان كل حد لعبت معاه اللعبة دي كان بيكدب
هههههههههههه على فكره انا فعلا غبي

esraa يقول...

كل سنه وانت طيب يا أشرف رغم انها متأخره
بس ليه الحلفان بس ده انا كنت خلاص جايه بالهديه؟
وحلو اوي حكاية البنت بتاعة قصيدة الدبدوب دي (:
أنا مش هاخد التاج اوك

smraa alnil يقول...

ههههههههههههه

طب بتجيب في سيرتي ليه بقي
هو حد قالك اصلا اني كنت هعبرك بهدية اصلا
ههههههههههه
طب كنت قولي وانا كنت مررت التاج عليك
بدل مانت عملتوا من نفسك كدة
هههههههههه
عامة كل سنة وانت طيب يا اخف دم

وربنا يخليك ونعم الصديق
ويرزقك من اوسع ابوابه يارب
حضرتك انا مش بشحت ها

LAMIA MAHMOUD يقول...

وماله ياابني مش عيب .. ردك على الشغل عبقري

وردك على اسمك الصراحة

nour يقول...

على فكرة يا اشرف انا متدبسه فى 2 تاج من دول ربنا يستر
انا هكتبلك الايميل بتاعى علنا يا بنى هو احنا بنخاف
banoota_3abita@hotmail.com
اشطه؟؟؟

aya almusa يقول...

hahahhahahahhahhahahahahahhahah d7ketne mn kol 2lbe !!!!

Shiko يقول...

يا سيدى كل سنة وانت طيب
بس متقلقش انا مش هاجيب هديه عشان لسه مقبضتش الجمعيه
وبالنسبه لحكايه التاج بينى وبينك مكنتش اتشرفت بمعرفته قبل كده والحمد لله انى مدبستش زيك فيه
وطبعا شرفتك بمرورى وتعليقى ومعرفتنا ببعض

shaimaa يقول...

ده انت بلوة مسيحة
ضحكتنى والله

ربنا يسعدك

shaimaa يقول...

ده انت بلوة مسيحة
ضحكتنى والله

ربنا يسعدك

Amr Ahmed يقول...

ههههههههههههههه

والله زي العسل

دمك خفيف بجد

حلوة حكاية الكيميا دي

وحكاية تراب الميري

تحياتي يا باشا

الوردة السودة يقول...

هههههههههههه
تصدق ضحكتنى
بقالى ولله مقرتش حاجة تضحك كدة

Sharm يقول...

ردود جميلة

aboud يقول...

أقولك ايه دمك زي العسل، وكتابتك جميلة وممتعة وتحولت لإدمان..كل ما اكون متضايق أدخل اقرا بوست عندك وأغرق في الضحك..واصل على كده مستقبلك مش في الانجليزي ياعم أشرف مستقبلك في الكتابة.

zordeak يقول...

هههههههههههههههه


يخرب عقلك يا بنى


هههههههههههه


حتى فى التاج دمك خفيف


ايه يا بنى الخفة دى كلها

بتجيبها منين

:p


ههههههههههههه

والله زى العسل


اه يا غشاااش

حد يغش الكيميا برضو

ههههههههه


وعلى فكرة انا انطحنت زيك كده .., هبقى احكى الحكاية دى فى مرة ان شاء الله


عد الجمايل بقى

:p

shabfa2re يقول...

لسه ما وصلتش لمرحلة اعرف ازاى بيتعمل التاج
بس برافو برافو
شيء عظيم شيء جميل

إنـســانة يقول...

ما شاء الله
قائمة المتواضعوووووون منورة

عشان تفتكروا الجمايل دى

camera_girl يقول...

ياااااااااااا عساااالوووووون

يا غزاااالون انت تهبلون

جامده البنت المحروقه بتاعت الدباديب دى بجد سكر مش انت الدبدوب

قاسم أفندي يقول...

من الاخر كده
الناس اللي كتبوا فوق دول معاهم حق
انت واد زي العسل

ادم المصري يقول...

بص يا سيدي اولا احب اهنيك انك لبست السلطانية
هههههههههههه
قصدي التاج معلشي معلشي العتب ع الجزر

ثم انت بتلمح لعيد ميلادك عشان ناخد النا ياعني انك عريس بتدور علي عروسه

هههههههه
لا وايه كل اللي جابولك هدايا بنات هههههههههههه

ماشي ياعم براحتك

بس يوم الفرح اعزمنا

أخف دم يقول...

ياسمين الإنسانة
يعنى أنا بصيتك واقول انك جبتى هدية وانتى اللى تكشفى نفسك؟ عموما أنا اللى غلطان ..
وافتكروا الجمايل دى
ـــــــــــــــــــ
بيسوووووو
أولا ترجعيلنا بألف سلامة
ثانيا ربنا يبعد عنك الاكتئاب مع انك واخده التوكيل بتاعه
ثالثا:مين قاللك ان أخف دم دى إشاعات؟ البلد كلها بتتكلم يابنتى.
ـــــــــــــــــــــ
شيرين السياحة وناسها والعملة الصعبة
مش كل جدى يبقى زى الجدى بتاعى يا ست الكل..
وربنا يملاكى بالتفاؤل.
ـــــــــــــــــــــ
علا ..يعنى فلسطين .. يعنى الأرض المحتلة ..اللى ربنا يكتبلها انها تتحرر قبل ما حتى أكمل ردى على التعليقات يا رب
وانتى طيبة.. ويا رب نحتفل بأعياد ميلادنا كلها عندك قريب.
ــــــــــــــــــــــ
رشا
أول ما تعرفى مين اللى بيعمل التيجان دى قوليلى واوعدك ان شاء الله معدش هيبقى فيه تيجان.
ــــــــــــــــــــــ
مصطفى ابن الدكتور
يا عم ف كل تعليق قاعد تقول على نفسك غبى ؟؟ يا بنى انت ابن دكتور يعنى ظبط برستيجك شوية.
بطلوا التواضع ده.
ـــــــــــــــــــــــ
إسراء
انتى ما صدقتى .. لا خلاص تعالى ياختشى وهاتى الهدية ..
انتى هتلفى بيها وللا ايه؟
ــــــــــــــــــــــــ
إنجى
انتى نسيتى كل اللى بيننا يا إنجى عشان هدية؟
نسيتى قصة الحب الخالدة بين أشرف والأميرة إنجى.
على فكرة انتى مش من الأحرار يا إنجى..
ــــــــــــــــــــــــ
لميا محمود
من غير همزة
العبقرية مش غريبة عليا
نورتييينى
ـــــــــــــــــــ
نور
متشكرين على الإيميل يا جميل
بس انتى مديانى الإيميل اللى مبتدخليش عليه وللا ايه؟
ـــــــــــــــــــــ
آية الموسى
يعنى الأردن واللى منها ..
نورتى مصر وبلوجاتها ونورتى البلوج بتاعى ونورتى المنصورة ..
قلل الإضاءة اللى هناك دى شوية يا بنى.
ــــــــــــــــــ
شيكو
قوليلى هتقبضى الجمعية امتى عشان أظبط عيد ميلادى عليها.
ـــــــــــــــــــ
شيماء
هيه بلوة مسيحة دى مدح وللا ذم؟
كفاية الدعوة اللى طالعة من القلب
نورتينى والله
ـــــــــــــــــــ
عموووور باشا
يعنى زميل الرصيف القادم ..
لو عجبك ردى على موضوع الشغل ماتقلقش انت هتجربه قريب..
شد حيلك
ــــــــــــــــــ
الوردة السودة
بصراحة انا مصدق انى ضحكتك يعنى.
وليه تحرمى نفسك من الضحك .. أنا مستنيكى كل بوست هنا.
ــــــــــــــــــ
شارم
إيه يا عم هيه الردود بفلوس
بحبح إيدك فى التعليق شوية
ده البلوج نفسه ببلاش
ــــــــــــــــــــ
عبوووووووود
لو فايدة اللى انا باكتبه انك تدخل تضحك وتنسى همومك .. يبقى انا كده عملت أحسن حاجة ف دنيتى
منورنى يا كبير
ـــــــــــــــــــــ
أحمد باشا فؤاد
الزقازيق وأحمد عرابى والطب ورجالته
يا عم أحمد الغش فى الامتحانات زى الماء والهواء بالنسبة للطالب المصرى ..بيوزعوه مع ورقة الأسئلة.
وبالنسبة لخفة الدم .. باشتريه كل خميس من السوق.
ــــــــــــــــــــــ
شاب فقرى
ربنا يغنيك يا عم
انت بتدخل البلوجات تشحت بقى؟ هههههههه
منورنى واوعى تقطع رجلك من هنا.
ــــــــــــــــ
ياسمين إنسانة تانى
يا جمااااااعة .. ياسمين هيه اللى عرفتنى ازاى أعمل لينكاااااات..
وعرفتنى ازاى اعمل صور كمااااااااان..
خلاص ياختشى ارتحتى .. عايزة فضيحة اكتر من كده ..
عشان انتى بقى اللى تفتكرى الجمايل دى.
ـــــــــــــــــ
camera girl
والله انتى اللى منورانى وعلى فكرة والله ضحكت من تعليقك
اوعى تقطعى رجلك من هنا .. أنا باعمل حضور وانصراف.
ـــــــــــــــــ
قاسم بيه افندى
لو اعرف انك هتقول لى الكلام الجميل ده .. كنت جبتك من بيتكم تكتبلى يا راجل.
منور يا جميل.
ـــــــــــــــــ
آدم باشا
طب يا راجل مادام فاهم اللعبة كده ماتدور معايا على عروسة وتكون مريشة كمان .. أصل البنات بتوع البلوجات دول بينى وبينك يعنى كلهم جايبين الكمبيوتر قسط..ومش هينفعوا معاى.

الأباصيرى يقول...

أية يابنى موتنى من الضحك
على اساس ان انا بقيت عم المرحوم

بصى مش هرغى معاك كتير

انا هعملك كرسى فى قائمة البلوجرية المميزين عندى فى المدونة

أول لما تدخل هتلاقيك على اليمين

باى

احمد عبدالحي يقول...

والله العظيم انت واد دمه اخف من الخفيه ماشي معايا
وبجد خفة الدم دي ظهرت عليك اليومين دول اوي من يوم ما بدات تكتب في البلوج بتاعك
ربنا يكملك بخير وبجد انسجمت جدا من القصيدة الجديدة بتاعت كله قابض
دعاء اخير ربنا يذود خفة دمك

sophy يقول...

احييك يا أخف دم على خفة دمك ويا ريت تقبلونى بينكم فى عالم المدونات لانى مدونة من يومين بس

ehahe يقول...

بجد تسلم ايدك
فعلا ليك حق تسميه اخف دم
ومن النهارده اعتبرنى زبونه ديمه
مش حخرج من هنا تانى

أخف دم يقول...

الأباصيرى
مين يموت مين من الضحك يا عم
دانت البلوج بتاعك يهلك من الضحك اساسا وجرعة يومية عندى
اسمك برضه منور فى اللينكات عندى
ــــــــ
أحمد عبد الحى حبيب قلبى
لو قصدك على خفة الدم اللى احنا فاهمينه يبقى بلاش احسن
ـــــــــــ
صوفى
دا انتى نورتينى وهتنورى المدونات كلها
ـــــــــــ
ehahe
خلاص يا ستى الكرسى بتاعك موجود فى البلوج فى اى وقت .. نورتينى .. وربنا يكرمك على ذوقك .. وعلى فكرة مش أنا اللى مسمى نفسى اخف دم يعنى ..

غير معرف يقول...

انت شكلك كنت بتاخد عند رضا السماحى كميا صح

Dr.Mohammed Gohary يقول...

والله ما أعرف وصلت لبلوجك ازاي بس اهي الظروف صراحه هلكتني من الضحك وبحب الجو ده اتمني تضيفني ونبقي اصحاب ومعلش ضيفني انتا وابقي فكرني بيك كلمه السر كتكووووت قصدي اشرف ابو دم خفــــــــــــــيف

سارورة يقول...

هههههههههههههههههههههههههههههههههههههههههههههههههههههههههههههههه

مش ممكن بجد بالذات حوار الكمييا دا صعب اوى وناقص دبدوب

هههههههههههههههههههه

بجد صدق اللى قال اخف دم

العيسوى الصغير يقول...

يــــــــــــا اخيرا كل علقة وانت طيب

بس كويس انك بتحب المحشى والا كانت مصر كلها هتزعل منك

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡