اخبار

الثلاثاء، 10 يوليو، 2007

وحشتونى .. وهتوحشونى


السلام عليكم
كل سنة وانتوا جميعا طيبين وكل لحظة وانتوا جميعا سعدا يارب العالمين
وحشتونى جدا والله .. وعارف إنى مقصر مع الجميع فى الردود والبوستات والإيميل وكل حاجة بس اللى مصبرنى إنى باتعامل مع أخواتى اللى أكيد مقدرين الظروف
والظروف إنى استقريت فى القاهرة حاليا وطبعا ده سبب لكل اللى أنا فيه من بهدلة وتخبط فى كل حاجة وممكن كمان تضيفوا على ده إنى إلى الآن معنديش وصلة نت بسبب ظروف السيبر اللى هنا وربما تمتد الظروف دى كمان أسبوع أو اتنين وأنا باتكلم دلوقتى من سيبر بينه وبين النت تار بايت .. والنت مش هييجى إلا لما صاحب السيبر يشيل كفنه ويروح للنت الشركة..المهم حاجات كتيرة مخليانى فعلا مشتت ومخنوق من عدم التواصل معاكم على المدونة أو الإيميل ..بس ربنا يسهل
عموما أعتذر مرة تانية عن التعليقات والردود والتواصل على الماسنجر
بس عشان مش هاعرف أسيبكم كده من غير ما نتكلم شوية أنا بس عايز أسأل سؤال محيرنى من فترة وهاسيبكم وهامشى واتصرفوا انتوا بقى فى المدونة
السؤال بيقول ..علل.. يعنى افطن ..ههههههه
لا بجد السؤال بيقول
هوه ازاى الواحد يحافظ على وضعه وبرستيجه ؟؟؟ بأى طريقة؟؟ إنه يقرب من الناس ويتعامل بحب وود مع الجميع سواء صغير أو كبير .. ؟؟ وللا يبعد عشان يبقى عزيز بالنسبة لهم فيبصوا ليه بنظرة إجلال وإكبار؟؟؟ أى طريقة أصح؟؟
طبعا بتسألوا ليه باسأل السؤال ده؟
بصراحة بقالى فترة وأنا باواجه نصايح كتير من اصحابى وعارف انهم بيتمنوا ليا الخير بس احنا مختلفين فى التعامل مع الناس .. وأرجوكم ياريت تفهمونى صح وبلاش حد يظن فيا ظن سوء أو يتخيل إنى باتكلم كده لسبب وحش لا سمح الله
اصحابى بيقولولى ان التعامل بتاعى مع الناس بيقلل قدرى وبيخللى الناس تتجاوز معايا بالألفاظ وخصوصا ان انت شاعر وده كلامهم واتعملت لك ندوات كتير وكسبت فى حاجات كتير وبقى ليك اسم ما فى اللقاءات الأدبية وكمان عشان انت أكبر من معظم اللى انت بتتعامل معاهم .. وده مسبب لهم أزمة إحساسهم بالهزار اللى بينى وبين غيرى حتى لو كانوا اصغر
أنا بالنسبة لى رغم حبى لأصحابى ومعرفتى انهم عايزين مصلحتى وان صورتى تبقى حلوة قدام الناس إلا انى معترض على ده كله .. تعالوا بس نتكلم ببساطة وارجوكم خدوا الموضوع على انه موضوع عام لكل الناس مش منطبق عليا بس عشان اتكلم براحتى ومحسش بحرج
إيه المشكلة فى إنى أضحك مع كل الناس ؟؟ إيه المشكلة فى انى أتعامل ببساطة وأعيش حياتى بهزارها بجدها مع الصغير مع الكبير ؟؟؟ أنا عادة باعمل نفسى أوفلاين على الماسنجر وده مش عشان حاجة لا سمح الله بس عشان أقدر أكلم كل واحد واطمن على كل واحد لوحده مش مجرد كلمتين واكلم غيره .. واللى عارفينى وبيكلمونى عارفين إنى مش باغيب على أى واحد فيهم أكتر من أسبوع وأنا اللى باكلمه.. إيه العيب فى إنى أنا اللى دايما اللى بابدأ الكلام وانا اللى دايما باطمن مش اللى قصادى ؟؟
هوه ده يأثر على برستيج الواحد يعنى ؟؟؟
كان فيه صديقة عزيزة -هيه عارفة نفسها وأكيد بتقرا دلوقتى- فى اللقاءات الأولى بينا على الماسنجر من كتر محاولتى فى انى أطمأن عليها وعلى بعض ظروف عندها زهقت بهزار وقالتلى :انت وكيل نيابة؟؟
إيه العيب فى إنى اتصل بحد عشان اطمن عمل ايه فى الامتحانات مثلا أو فى مشكلة واجهته ؟؟
لازم يعنى استنى ان هوه اللى يتصل عشان أنا أكبر أو عشان أنا على حد قولهم شاعر ولازم يبقى ليا برستيج يعنى ؟؟
والله يا جماعة أنا مش باتكلم عن نفسى تحديدا .. أنا باتكلم عموما عن أى حد .. ليه بقى البرستيج بيتقاس بالبعد عن الناس والوقار المفتعل وإنى أحط رجل على رجل بكل غطرسة واسلم على حد بأربع صوابع ومخبى الخامس
أنا مش هاتكلم كتير يا جماعة تانى .. عشان الكمبيوتر بدأ يطلع لسانه .. أنا هاسيب الموضوع والنقاش مفتوح وأنا والله مش عايز مدح ولا كلام من ده .. لأن احنا متفقين اننا أخوات وانتوا عارفين معزتكم عندى وانا عارف معزتى عندكم .. لكن كل اللى انا عايزه اننا نتكلم ونتناقش .. يا جماعة حب الناس هوه الكنز الحقيقى .. وأى حد بيغلط ويتجاوز باللفظ معايا أو مع غيرى مسيره هيعرف ويرجع فى رأيه لما يحس قد إيه الطرف اللى اتجاوز معاه بيحبه وبيعامله أحسن من معاملته ليه
عموما تانى كل لحظة كل ثانية وانتوا طيبين وبخير
سلام جميل وكبير جدا لكل أهل بورسعيد وكل مدونين بورسعيد اللى اتشرفت انى شفتهم وكلهم أصغر منى بس شرف ليا انى عرفتهم .. كنت سعيد جدا معاكم .. وسعيد بمدونين مصر كمان اللى كانوا موجودين..وسعيد بأحمد فؤاد أخويا الصغير وكل مدونين الشرقية .. وسعيد بصوت على الجميييييييل جدا فى الحفلة وكل حفلة وانت سعيد ومتألق يا على .. وزادنى شرف انى كنت ضيف على صديقى العزيز أحمد عيسى البورسعيدى فى شقتى .. وأنا مش باذلك يا أحمد بس فعلا كنت سعيد بيك جدا ويارب تتكرر.. وبالمناسبة ألف ألف مبارك لمها عيسى يا جماعة على الخطوبة السعيدة .. وكمان ألف مبارك ولو انها متاخرة لإنجى .. بس انتوا عارفين الظروف ومعلش على عدم تظبيط البوست كويس ان الكمبيوتر بيكتب اساسا
مش عارف ليه حاسس ان البوست قلب على برنامج ما يطلبه المستمعون
عمومااااااااااا
هتوحشونى جدا
وربنا ما يحرمنى منكم
دعواتكم

‏هناك 51 تعليقًا:

رينـــــــــــا يقول...

هيييييييييييييييييييييييييييه
انا اول واحدة
واكيد راى هيكون اكثر تأثيرا
نياه نياه نياه
لا طبعا انت صح جدا جدا
مع احترامى الشديد لكل الاراء
بس اللى انت بتعمله صح
من تواضع لله رفعه
انت مبتغلطش خالص
وعمر احترام الناس وحبهم بيكون بالتعالى والمعامله من فوق
انت مش بتغلط يا استاذ اشرف
ودا مش بيهز خالص من برستيجك على حد قولهم
بالعكس بيقربك من الناس انا واثقه من كدا

الله يعينك ويقويك على ظروفك وان شاء الله تنتهى على الف خير
فى امان الله

loo2loo2 يقول...

انت اكيد صح لان التواضع مطلوب وبعدين انت شايف ان الناس الى بتتعامل معاهم دول بيقدروك ولا لا فانت الى تقدر تحكم على الوحش والحلو ومثلا ما انت ممكن تكون بتهزر مع واحد صحبك اصغر منك بكتير مثلا بس بيكون الهزار بينك وبينه وتلاقيه ادام الناس بيحترمك جدا لانك اكبر منه فعادى مش معنى انك بتتعامل معاه بحب وتواضع وبتهزر معاه انه هياخد عنك فكرة وحشه او يعاملك معاملة مش كويسة وانت الى تقدر تحكم على الناس الى حواليك مين الى يستاهل ومين لا

س حلم لا ينتهي يقول...

ازيك يا كفاءة
عامل إيه
اتصدق الندالة ليها ناسها
تفتكر كل دول وتنسى ص قلب لا ينحني
وانا اللى قايدلك صوابعى التسعة حركات والعاشر مخبيه ؟يخربيت دمك يا اشرف حتى وانت هتعيط بضحكنا غور قرفتني
ش ..شارع فريدة حسان)
بجوار دار مناسبات الحاج محمد الزعلوك

علاء يقول...

و لو اني مبحبش البوستات الطويلة بس قريته كله
هتوحشنا انتا كمان :)

ضـوء الـقـمر يقول...

نورت القاهرة يا اشرف
بمشي فيها بلاقي لمبات بتتحدف من كل حته :P
هههههههههههه

هتكلم طبعا من غير زعل لان احنا اخوات :)))
مش معنى انك شاعر وليك مكانتك وسط الناس انك تتكلم بحساب اوي او متهزرش مع ده عشان مينفعش تهزر معاه... لا طبعا
مهما كبرت وعليت فانت طبعا انسان زيك زي كل الناس
انا مش بتكلم الكلام ده ليك بس انما لكل الناس
انت كده صح :)

تحياتي ليك يا اشرف

SAKAyAR يقول...

ربنا يوفقك يا أشرف انت م الناس اللي بحبهم بجد
ربنا معاااك في العالم الجديد
ههههه

Desert cat يقول...

والله انا شايفه انك مش بتعمل حاجه غلط
وفيها ايه لما اطمن على صاحبى
واكون انا اللى ببدأ
على الاقل لو غبت حلاقى اللى يسال عنى
البرسيتج مش فى انهى اتعامل بكبر وغرور
البرسيتج هو انى ازاى اقدر اتعامل مع اللى قدامى بطريقة كويسة ويكون فيها احترام وهو كمان اما لو عدى نقطة الاحترام دى فلازم يكون له حدود يقف عندها
احترماتى ياباشا

بحاول اكون يقول...

ازيك يا اشرف اخبارك ايه وحشتني والله ومبسوطة اوي اني شوفتك واتعرفت عليك
بص انا مش هقول حاجة لان كل الناس اللى سبقت تعليقي قالوا كل الكلام اللى كنت هقوله ، بص يا اشرف انت كل اللى بتعمله صح وانت متأكد انو صح مالكش دعوة بئه بالناس اللى بتقول غلط وخلي عندك فكرة ان الناس قربت ليك وحبتك عشان تواضعك وخفة دمك وكلامك اللى زي العسل لو انت عكستك عشان البررستيج يبئه محدش هيعرفك ولا هيحبك خليك زي ما انت يا اشرف انت كده احسن بكتير
ومتنساش تسلملي على الشكولاتة
هتوحشنا اوي لحد ما الحال يتظبط وانشالله ربنا يسهل كل امورك
سلام
منى

فوكيره يقول...

يـــــــــــاه يا استاذ اشرف

بقالى كتيير بزور المدونه علشان اقرأ جديد

اخييييييرا

-
اولا حمد لله على السلامه بعد الغيبه الطويله

ثانيا .. ياا رب تكونوا استمتعتم بالحفله
وان شاء الله المره الجايه اكون معاكم
عااااا

وثالثا ندخل في الموضوع :

هو غلط وصح
طب ازااى
يعنى حاخد مثال بنفسي اولا
بتعامل مع الناس كلهم وبحترمهم كلهم
لكن
في ترمومتر عند الواحد في ناس مينفعش تعاملها كده على طول الخط
لي صديقه زيك كده يا استاذى
وكان لى انتقاد عليها
بسبب كده
الانسان يعامل الناس كده
ويحبهم ... لان الحب ده بيزيده ويرقيه هو قبل اى حد
لكن الناس الى متستاهلش
الي بتتعمل مع الطيبه على انها هبل
احبهم بردو كل حاجه لكن
يكون في حزم في علاقتنا بيهم

انما التعالى والغطرسه
فملهاش لازمه لا مع دول ولا مع دول

انت سيد العارفين وعارف ان لكل مقام مقال

وهى دي اخلاق المسلم بسييط ومتواضع و بيحب الناس
واخلاقه عاليه (و)له هييبه
واحترام وسط الناس
انا ستخدمت (و) ومستخدمتش
(لكن)
لان مفيش تعارض بين الاتنين

واثقه ان وجه نظري وصلت

ماتبطلش تحب الناس

وربنا يعينك ويقويك

esraa يقول...

ربنا معاك يأشرف ويوفقك يارب(:

بالنسبه لمعاملتك مع الناس, أكيد مش الحواجز هي اللي بتعمل البرستيج

بالعكس الطيبه والمعامله ببساطه هي أسهل حاجه عشان الناس تحبك وتحترمك

ده رأيي

اها سمعت ان حفلة علي كانت حلوه

عمرو أحمد قالي كده

وان كنت لسه ماعرفتش التفاصيل عشان ماشفتكش ولا شفت أحمد فؤاد نت من فترة ويومها مالحقتش أكمل كلام مع عمرو, بس يالا الحمدلله انكم اتبسطم

إنـســانـة يقول...

ياااااااااه
اخيرا عدت

عودا حميييييداااااا

واتارينى اقول القاهرة مش على بعضها ليه؟؟؟

كنت حاجى الحفلة على فكرة عشان على طلع صاحب اخويا بس معرفتش بقا الظروف

وبالنوسبة للتعامل فالموضوع ده بيحصل معايا بس مش بيبقى واضح اوى لأنى مش شاعرة مشهورة زى ناس
الفكرة انى بتعامل بردو مع الكل بهزار وحب للكبير والصغير حتى لعم جابر البواب وبنته فاطمة وعيالها
لدرجة ان ناس كتير فعلا افتكرونى اقتصاد منزلى
وبعضهم افتكرنى خدمة اجتماعية
مع احترامى لجميع التخصصات

صحابى ساعات بيشوفونى غلطانة زى صحابك بردو
بس انا رأيي سواء عليك او عليا او على اى حد زيينا كدة انه يخليه على طبيعته ومايمثلش
يعنى هو بيحب يهزر وبيحب الناس وبيحب يعاملهم عادى زى اخواته ودى طبيعته .. خلاص يخليه كدة

اهم حاجة انك تبقى انت .. عشان لو معملتش كدة حيجى عليك وقت وتحس انك ممثل كبيييييييير ونفسيتك حتتعب

وبعدين البرستيج مش بطراطيف الصوابع والعجرفة
البرستيج بإنجازك فى مجالك وبالأشعار والكلمات المبهرة اللى بتطلع منك .. وبتخلى فعلا الناس اللى بتعاملهم زى اخواتك وواخدين عليك ينبهروا ويبقوا مش مصدقين ان اللى بيعاملهم بلطف ده هو هو الشاعر اللى بيكتب الكلام الكبير ده

وساعتها حتزيد وتكبر فى نظرهم اكتر واكتر

وده رأيي الكاميكازى المتواضع

وحمد الله على سلامة حضرتك القاهرة نوررت

وابقوا افتكروا الجمايل دى

:D
سلام

Amr Ahmed يقول...

مش اشرف توفيق اللي يسمع كلام حد

هههههههههههههه

ولا ايه

وبعدين ايه ياعم التعقيد ده

خدها ببساطة كده
واللي انت شايفه صح اعمله

وبعدين

ايه يعني
مانا اصغر منك
تقدر متكلمنيش
لااااااااااااااااااااااااا

حاسب

هتعملي فيها شاعر بقي والكلام ده مياكلش معانا

ههههههه

عادي يا اشرف

من امتي التكبر والبعد عن الناس هو اللي بيدي احترام

اطمئن كله تمام

الشــاطر ميــــدو يقول...

والله إنت إنسان جميل يا أشرف
من أول يوم شوفتك فيه وأنا حبيت بساطتك وتواضعك مع إن أنت شاعر كبير وإن شاء الله هتكبر أكتر وأكتر ومش ناسي يوم ما كنت بوريك أول حاجة كتبتها رغم إنها كانت لسه في البداية خالص ورغم إن كان في ناس عايزاك ورغم إن واضح إنك كنت مشغول برضه شوفتها وسمعتني وكلمتني لغاية ما شبعت
ده تقدير أنا مش ناسيه رغم إنك ممكن تكون نسيته

الموضوع هو إنك تعرف توازن بين الإتنين يعني متكونش لزقة لدرجة إن الناس تزهق منك وفي نفس الوقت متبعدش قوي لدرجة إن الناس تنساك
وكلنا عندنا المشكلة دي وأدينا بنتعلم
بس بصراحة بأه أنت وحشني مووووووووووت
ربنا يوفقك ديما يا رب
وللأمام دائما

فى القلب يقول...

أنا أعتقد أن سر شهرتك
وأنتشارك هو التواضع
ده طبعا مينفيش الموهبه الفطريه
لأن الانسان لما بيكون واثق فى نفسه
بيتصرف بطبيعته وبيبأ أريب من الناس
أعتقد أنك أكثر ثقه فى نفسك من أصحابك
على فكره همه ملاحظين ده أنا شمه ريحه غيره

emos يقول...

shoof ya 2ebny

el nas mabye3gebhash 7ad
w mafeesh sha7'seyya makroha men kol el nas wala sha7'seyya ma7boba men kol el nas

we fe el donia deh zay ma fe nas bet7ebak fe nas mesh hate2ak 3ady sha7'seyetak mesh mashya 3ala hawahom

mesh hate2dar terdy kol el nas

kol elly matloob mennak bs ennak te7awel te3raf elly 2odamak el mo3amla beta3tak temhsy ma3ah walla la2 yemken mo3amletak belnesbalo 7aga to7'no2 w fe 3'ero ye7eb geddan mo3amletak w ye7eb yeb2a sa7bak

el mohem en kol el mo3amlat teb2a bema yordy ellah

w rabena yehdeek w yehdena ya raaaaaaaaaaaaab

smraa alnil يقول...

اشرف

بجد مش عارفة اقولك ايه
بداية كدة

انا احيانا بواجه نفس مشكلتك
يعني اني معيدة وليا شخصيتي وبرستيجي
واني كمان نوعا ما ممعروفة عند مدونين كتير فلازم احاف علي هيبتي وهزاري وكلام كتير كنت بسمعه

بس انا برضه زيك كدة مدياها طناش وبتعامل بطبيعتي

بالنسبة للصديقة العزيزة فاحيانا هي ينمكن مش كانت تقصد اي شئ
يمكن تكون زيي بتفضل انها تسكت ومش تتكلم عن مشاكلها او ظروفها مش عشان حاجة علي الاقل عشان مش تزعل حد معاها
فمش تزعل منها

بالنسبة بقي كون انك شاعر ومشهور والكلام اللي مش بياكل رغيف فينو

فدة عامة شرف لينا كلنا اننا نكون نعرفك

ولو كنت مضايق من هزاري الزيادة عن اللزوم بصفة عامة
فدة لاني بعتبرك اخويا اوي

وبجد انت مش متخيل انا دايما بفتخر بيك وباني اعرفك

اوعي تسمع غير صوتك انت وبس
وكفاية ان كل الناس بتحبك
وسيرتك لما بتيجي الناس كلها بتشكر فيك
حاكم انت عارفني انا ام المدونين

ههههههههههه

المهم خليك زي مانا عرفتك اشرف وفيق اللي مش بتهزه شعراية

وبما انك في القاهرة بقي يبقي هقرفك علي طول
بس اوعي تبقي تقول لطارق هههههههههه

هتوحشنا يا عمنا

ساعه الغروب يقول...

بص يا سيدى

انا اولا بجد اتشرفت جدا جدا جدا انى اتعرفت عليك يوم الحفله

دا بجد كان شرف كبير ليا

ثانيا باه بساطتك واحترامك للجميع فرضوا علينا جميعا نبادلك بنفس المشاعر

انا عن نفسى كنت خايفه اوى اول ما انت جيت كنت حاسه انى مش هعرف اتكلم معاك ولا كلمه برضو نظرا لانك شاعر كبير و حد ممكن يكون عامل حواليه هاله محدش هيعرف يخترقها ويتكلم معاه

بس لقيتنى فى ثوانى بتكلم وبهزر وبنتناقش

استغربت اه شويه
بس مش من انك كدا مش صح
لا اللى خلانى استغرب
انك لسه محافظ على بساطتك وما اتكبرتش على حد

و بتعامل الكل كاخوات مش اكتر

ودا بجد كبرك فى نظرى اكتر وخلانى احترمك اكتر واكتر


دا مش مجرد مجامله او شكر فيك على الفاضى

دا بجد احساسى

وعايزه اقولك احسن حاجه انه الواحد
يكون على طبيعته اوى اوى مهما كانت الناس المحيطه بيه


صغيرين باه كبار
مهمين اولا

المهم انه يكون طبيعى اوى ومش متكلف

وانت كنت طبيعى اوى ودا اللى حسسنى بجد انى اكتسبت اخ كبير ليا دا بعد
اذنك يعنى

بجد شكرا ليك

و خليك كدا على طبيعتك عشان ناس كتير اوى حاولت تغير من نفسها عن غير اقتناع
ضاعت لا بقت احسن ولا عرفت ترجع زى ما كانت

شكرا ليك واسفه اوى على التطويل

شكرا ليك

:)

بيسوو يقول...

ليه بتقول كدة بقى..هو انا جيت جنبك ولا دوستلك على طرف..اخص عليك

لا بجد يا اشرف صدقني انت صح وانت عارف طبعا اني دايما بحسدك وبحقد عليك بسبب قدرتك على التعامل والكلام والهزار مع جميع فئات الشعب...مش معنى انك بتحاول تتواصل مع الناس انك كدة غلط..يمكن في قلة قليلة فاهماك غلط ودول صدقني معندهمش وعي كفاية
ومش علشان انت شاعر لازم تكون منفوخ ومتعالي وحاجات من دي..ان شايفة ان بساطتك هي سبب حب الناس ليك..
فعلا التعامل معك سهل..والكلام معاك سهل..انت كدة ومش لازم تتغير علشان لو اتغيرت مش هتكون اخف دم...معرفش هتبقى ايه بقى..اختارلك اسم تاني

كل ده كاتمه في قلبك ومش بتقول ليه..حد قالك انت معنديش ودان اسمعك بيها
ربنا يكرمك وتقتدر تستمر في قاهرة المعز...داعيالك من قلبي

zordeak يقول...

والله العظيم يا أشرف انك وحشتنى جدا جدا

متتخيلش انا فرحت قد ايه لما شفتك يوم الحفلة

كانت من اجمل المفاجآت ليا لانى مكنتش متوقع انك تيجى

ومتتخيلش كنت مبسوط قد ايه لما شفتك

انت عارف انا بعتز بيك كأخ ليا قد ايه

وانت عارف أشرف يعنى ايه لأحمد فؤاد

بالنسبة لكلامك
عمر ما كان التواضع فى التعامل غلط

عمر ما كان حب الناس مشكلة

عمر ما كان السؤال عليهم وانك تطمن عليهم عييب

بالعكس يا أشرف

انت بكده بتقرب لكل واحد فينا

انا شفتك بتهزر ازاى وبتتعامل ازاى يوم الحفلة

وبقولك انك كبرت فى نظرى اوى

انك متحسسش الناس اللى انت معاهم انك غريب دى ميزة

انك تحسسهم انك واحد منهم وحاسس بيهم ده ميزة

انا بكررلك يا اشرف انى بتشرف انى أعرفك

برستيج ايه وكلام ايه اللى بيقولوه ده

عمر ما كان هزارك معانا بيقلل منك

أنت شاعر

عارف يعنى ايه شاعر

يعنى انسان بيحس

بيحس بكل اللى حواليه

بيقدرهم كويس

شاعر يعنى واحد مننا

مش واحد بعيد عنا

وبيبص لمشاكل الناس من بعيد

انت عارف ان مفيش مصالح بينا

يعنى كل اللى بقولهولك ده حب فى الله

خليك زى ما انت يا أشرف

لان اشرف اللى انا اعرفه بجد بجد مش هلاقى حد زيه

خليك كده يا اشرف

يا أخويا

وان شاء الله اشوفك قريب واقضى معاك يوم لانك واحشنى فعلا

سلام يا جميل

:)

esraa يقول...

أشرف لما تفضي
ابقي حل التاجين اللي عندي (:

darsh يقول...

صباح البتنجان يا ريس .
مش عارف إيه علاقة البتنجان بالكلام والموضوع بس هي الكلمة اللي اتكتبت خلاص ما تحاولش تفسرها وتدور لها على معنى . هي طلعت وخلاص
قبل ما ادخل في الموضوع أحب أوصل سلامي لكل الأهل والأحباب والأقارب وأبوشادي صاحب العمارة .. وكل الناس اللي في الشقة الشنيعة الفظيعة اللي مالهاش حل واللي لسه محتاجة نت ..

أما بقى بالنسبة للموضوع :

مش عارف ليه حسيت فجأة إن انا ساكن مع توليستوي مش مع أشرف توفيق .. وحاسس فجأة ان الكون كله بقى مهم والناس كلها بقت مهمة جدا وكل حد في الدنيا محتار يا عيني وشاغل دماغة بمواضيع مهمة جدا وهي إزاي هايتعامل مع الناس على قدر الأهمية اللي هو فيه

أشرف .. أنا عارف ان احنا اصحاب وانت مش هاتزعل مني

من إمتى انت بتحسبها كده .. الميزة اللي عندك انك عمرك ما حسبتها وزي ما تيجي تيجي

خليها كده وهي هاتتظبط لوحدها من غير ما تفكر ازاي تتعامل هاتلاقي الأمور سهلة وبسيطة ..

يعني عندك أنا مثلا .. ما بقولش ان انا مهم .. ولا بقول اني شاعر كبير وواخد أول جامعات على ست جامعات خمسة منهم ماجوش هههههههههه
ده غير اني صحفي كبير قد الدنيا مش لازم اقول في جريدة إيه عشان ما تبقاش دعايا للجرنال وتيجي بعد كده تقاضيني .. ولو اني لسه ماخدتش ولاشلن من الجرنال ابن الـ .. يللا خلينا محترمين عشان ده بلوج أشرف توفيق مش عشان الجرنال
وأهم حاجه بقى اني عمري ما قلت اني ساكن مع أشرف توفيق في الشقة .. تخيل

على فكره يا أشرف انا عاوز اقول لك على حاجه مهمه جدا

الظاهر انك عديتني بأم التواضع بتاعك ده

على فكره يا أشرف عاوز اقول لك حاجه كمان .. أنا ما خدتش بالي ان انا ابويا دكتور غير لما انت قلت لي يا ابن الدكتور .. ساعتها حسيت ان ابويا ده رئيس وزرا واللا حاجه ..

أهو دلوقتي هايشلني عشان اخد منه خمسمية جنيه .. حاجه تنقط محسسني ان الخمسمية جنيه دول حاجه .. وانت بس تقعد تقول لي ابن دكتور وابن ماعرفش ايه

يللا هانقول ايه بس .. انا مش عارف ايه علاقة الكلام اللي انا كاتبه ده بالموضوع بتاعك بس مش مهم هو الكلام اتكتب وخلاص يعني هامسحه تاني


سلااااااااااموز

وينكى يقول...

اجابتك جواك ياخفيف الدم
انت اعمل اللى انت حاسس انك عاوز تعمله
حتى لو كان غلط فانت هاتكتسب خبرته
لكن انا شايفه ان المشاعر الطيبه اللى مابتؤذيش حد مافيش احلى منها حتى لو غيرك انتقدها
ومش هافكرك بيوم الحفله
:)
على فكره انا عامله تجمع بلوجرى جامد جدا بمناسبة نجاحى وتخرجى على خير
التفاصيل على مدونتى الصغنونه..اللى من غير فذلكه

chimera يقول...

ايه الغيبة الطويلة دى يا حضرة وكيل النيابة؟؟يلا معلش سماح علشان الظروف دى بس والله وحشنى الكلام معاك اوى و كمان الهرم و الترمس مستنينك...ندخل فى الموضوع بقى علشان مطولش عليك
اولا احب اقولك انك انسان ذكى جدا ما شاء الله و احد الأدلة على ذلك هو البلوج ده (هقولك ليه بينى وبينك)
ثانيا هسألك سؤال... تفتكر انهى شخص هيدخل قلبك اسرع؟واحد اول متعرفت عليه ضحكلك وقالك ارغيييييي قول اللى فى نفسك زى مهيطلع منك هيوصلى؟
ولا واحد برضه انسان محترم جدا وكل حاجة بس بترسم الكلام وتزوقه و تشكله قبل متقولهوله علشان هو بيتعامل كدة؟
وانهى فى الشخصين دول هتتكلم معاه اكتر وتسمعله اكتر ويبقى فى بينكم ألفة ولغة حوار اكتر؟
بيتهيقلى الرسالة وصلت وحب الناس مبيجيش من فراغ
ثالثا اصحابك برضه عندهم شئ من الحق لان فعلا فى ناس بتفهم غلط بس دول اصلا ناس دماغهم فاضية او ظروفهم كدة بقى متعرفش بس مش دول اللى هتغير بسببهم اشرف اخف دم اللى كل الناس بتحبه زى مهو كدة
خليك اشرف اللى اول متبص فى المراية هتضحكله مش علشان شفت نفسك و ايه الحلاوة دى وكدة هههههه بس علشان اشرف اخف دم بيضحك فى وش كل الناس من قبل ميدقق فى ( ملامحهم ) فضحك من قبل مياخد باله انه بيضحك لنفسه.... فاهمنى ؟
رابعا بقى انا نسيت اقولك انا مين بس مش هقولك وهسيبك تعرف لوحدك
اه اشرف على فكرة نسيت اقولك انى مش زعلاااااااااانة خاااااالص والهرم منور يا وكيل النيابة :):)
بجد وحشنى الكلام معاك

Ana keda يقول...

أول حاجة بس مبروك انك جيت قاهرة المعز اه وارابيسك بقى بجدمنور وبالنسبة للموضوع الى انت فتحته عارف المشكلة فى الى حوالينا بجد يعنى انت المفروض تعرف بتتعامل ازاى من الى لو زودت هيتجاوز وفى ناس بالعكس بيبقوا اصحاب جدا بالهزار زى ما بيقولوا لكل مقام مقال

انت بقى بنصاحتك المفروض تعرف انهى مقام وتقوله ايه وبعد كده السؤال بينم عن شخصيتك الى انت مبسوط وانت بتعملها وربنا يقدرك على السؤال يا اشرف

Halawa يقول...

ربنا يحميك ياجدع
روح وانت منصور
في اي حاجة
.واي اتجاااااااه
ربنا يوفقك في طريقك
بإذن الله

مش عرف بتكلم كده ليه
بس فعلا انت ساعات
بنحس انك أخونا الكبير
وبعدين اخونا الصغير
ومرة صاحبنا الانتيم
علشان انت حقيقي و جدع

رغم لقاءتنا القصيرة
بس ده وصل بجد ياريس

بالتوفيق

علاء يقول...

ده موضوع التجمع ياريت أعرف رأيك

المدوّن خانة

مادو يقول...

اممممممممممبص يا اشرف
هو انت صح جدا جدا
البريستيج مش بالبعد عن الناس او بالتناكة في التعامل يعني
بالعكس اللي بيعمل كده بيبقى عنده مركب نقص أصلا
و الناس مش بتحترمه و إن أظهرت ده ظاهريا
لكن
التعامل مع الناس مع التعلم من الاخطاء بيكون مفيد
اللي هو اعرف صاحبك و علم عليه
فيه بعض الناس بتفكر ان الشخص اللي بيعاملهم كويس اقل منهم او محتاجلهم فبيكزن تعاملهم مش مناسب
دول بقى اللي لازم يوكن تعاملك معاهم على نفس مستوى تعاملهم
امممممممم
فهمت انا قصدي ايه ؟

واحـــد مـــــن الـنـــاس يقول...

بص
من الاول كده يا اشرف باشا
انا والله من وراك بقول عليك شخصية محترمة
يمكن كلمتك قليل اوي اوي عالماسنجر
ومع انك بلدياتي ومفيش بيني وبينك 200 متر
بس مقابلتكش لحد دلوقتي
مع اني نفسي اقابلك والله

وكل بوست بقرالهولك بيزيد احترامي ليك
بص انا اول ما دخلت الكلية كنت بتعامل بنفس طريقتك دي بالظبط

وعادي خالص
بتكلم مع الجميع
وبهزر مع الجميع
وكنت بستغرب ان كتير من زمايلي بيتعاملو بطريقة رفع المناخير والتكبير عشان يعملو لنفسهم شخصية بين الناس
انا كونت صداقات كتير الحمد لله
ومعملتش عداوة مع اي حد
الا حالة او حالتين
وانا مكنش ليا دخل فيهم
بالعكس كنت بتدخل عشان ناس اصحابي

بص من الاخر
الناس دول بيبق مكروهين اوي اوي
وكل ما طريقتهم دي بتزيد
كره بقية زمايلهم ليهم بيزيد
ومفيش احسن من انك تبقى اجتماعي بتحب الكل ونيتك صافيةمع الكل
وتهزر مع الكل
بحدود طبعا
صحيح انا بنسى نفسي احيانا
وبهزر في حاجات غلط
وبقول كلام مينفعش يتقال بس برضه
ده ميخلنيش الغي الهزار خالص

صدقني انتا شخصية محترمة اوي يا استاذ اشرف
بجد بجد بجد
وانا زعلان اوي اني مقابلتكش لحد دلوقتي
بس قريب اوي اوي ان شاء الله هيحصل
بعون الله وقوته ونصره ومدده
والله اكبر فوق كيد المعتدي
والسلام عليكم ورحمة الله وبركاته

Bahz Baih يقول...

أستاذ أشرف
بص يا سيدى البرستيج ده حيله تقال الدم علشان يقولوا على نفسهم مهمين

نصيحتى خليك على طبيعتك و على الوضع اللى يخليك مبسوط من غير تكليف أهم حاجه تكون مبسوط أصلك فى الاخر مش هتفتكر غير الايام الحلوه

فى مثل بيقولك ان الحياه زى البوم الصور فى الاخر مبيبقاش فيها غير اللحظات الحلوه .. علشان كده اقولك عيش يابانى اصلهم يموتوا فى التصوير
انا فى مره كنت هتجنن من اليابانيين أروح الهرم مع المزه الاقيهم ورايا اهرب على اسكندريه الاقيهم ورايا اطلع سيوه القيهم هناك... اخر ما زهقت اخد المزه فى سفارى و نطلع الجبل بليل الاقى اتنين يابانيين معديين

هو فين بقى البرستيج فى الموضوع مش عارف ممكن تعرف و تقوللى

BaTresYa يقول...

كلامك صح وانا معاكـ ...بس احياناً ممكن نسيب وجهة نظرنا علشان اللي عايشين معانا....يمكن اللي بيهزر دايماً بناخد عنه فكره انه طيب ومش هيزعل من كلامنا ...وعلى فكره دا مش بيضيع البرستيج...وبعدين احنا محتاجين البرستيج في ايه ؟؟!!يمكن اللي بيهزر دايما محتاج يعرف وقت الهزار..لأنه زي ما بيقولوا احيانا الهزار بيضيع الشخصيه واعتقد في حديث مش فكراه بيقول كدا...فالواحد مش يهزر دايما ومش يكشر دايما خير الامور الوسط..وعموما الانسان لما بيمشي من الدنيا محدش بيفتكر غير اخلاقه لا برستيجه ولا فلوسه ولا غيره ..لأخلاق هي اللي بتفضل...
واخر الكلام ربنا معاكـ وتصلح النت علشان انا عارفه المعاناه دي:s

tota يقول...

بما انك عارف انى اختك الكبيرة يبقى هقول رأيى

لا عيب ابدا فى ان الانسان يكون متواضع ويتباسط ويسأل عن الجميع و يبدأ بالسلام
فلا الاختيال والغرور يؤدى لحب الناس وكذلك لا تصعر خدك للناس
يبقى الحل ان خير الامور اوسطها

لا الهزار الكتير اللى يخلى الانسان يفقد احترامه ولا الجمود اللى يخلى الناس تنفر ولكل مقام مقال

اذا سألت عن احدهم فلا تكثر السؤال فاهتمامك وصل بسؤالك
ولا تمتنع نهائيا فيشعر البعض بعدم اهتمامك وتعاليك عليهم

فرجعت تانى فى كل مثال بقوله لكلمة خير الامور الوسط وانت هتلاقى نفسك تملك ميزان افعالك فلا يميل منك عن وضع الاتزان فى كل حاجة

هى دى المعادلة فى الحياه
واهم حاجة ان الانسان لا يملك عن نفسه خلق قبول وحب له هى اولا هبه من عند ربنا وبعدها سلوك

لان ممكن انسان من قبل ما تعرف سلوكه تشعر بنفور منه والعكس صحيح واللى يزود الشعور ده هو السلوك يا اما يزود الحب والقبول يا اما يبعدك عنه

فربنا يا سيدى يحبب فيك خلقه

تحياتى

حصان بري يقول...

مدونتك لذيذه يا اشرف
وبتتكلم ببساطه فبتوصل ببساطه
نصيحه يا عمنا
فيه واحد لما تهزر معاه يبقي فعلا بتنزل بمستواك
يعني لما تهزر مع واحد عبيط هيحدف عليك طوب
بس مجرد انك تلاقي ان اللي قصادك يستاهل يبقي اكيد مفيش داعي لغرور مالوش لازمه
ياريت تكون الفكره وصلت

الكلام نوعان :كلام فارغ وكلام مليان كلام فارغ يقول...

ازيك يا اشرف
عامل ايه
بجد ربنا يخليك على التهنئه الجميله دي
وبجد كان نفسي تكون موجود يوميها
وبالنسبه للبوست
اتعامل مع الناس على ادهم
"خاطبوا الناس على قدر عقولهم"
اتعامل مع كل واحد على اد شخصيته على اد ما اشرف توفيق بيحترم الناس
يلا
تحياتى

Eman Eltaher يقول...

عودة سعييييييييييدة يارب
انت فعلا غبت كتير
و انا كمان غبت كتير عن المدونات كلها حتى مدونتى !!!! بس و الله لظروف غصب عنى و الحمد لله رجعتلها من حوالى 6 أيام

ربنا ما يحرمكم منى !!!!! ههههههههه
انت شاعر عظيم يا أشرف و كون انك تكون بسيط و متواضع مع الناس ده مش يقلل قدرك بالعكس ده يرفعه أكتر و يزيد من حب الناس ليك
كون انك انت دايما اللى بتطمن على الناس فده يدل على نبل أخلاقك و مالوش علاقة بالبرستيج

كون انه تلاقى صديقة بترد بطريقة مستفزةفده ميخليكش تفقد ثقتك ف اسلوبك و اللى الناس كلها بتتمنى تلاقيه
لوكل الناس تعمل زيكماكانش هيبقى فيه حاجة اسمها فساد و لا قسوة
و ماكنتش هتكتب عن الشباب بالطريقة المستفزة اللى كاتبة عنهم بيها

بس أكيد دول فئة تانية خالص بعيد عنك تماما .. ياريت كانت كل الناس محترمة زيك
دى مش مجاملة دى حقيقة

اللا ما تتأخرش علينا و ربن يحميكدايما
و يارب بقى السيبر يتصرف بسرعة عشان ميبقالكش حجة :)

عندى سيبر ف المعادى تاخده ؟؟؟؟؟
ههههههه
طب كفاية عليك كده عشان ممكن بالشكل ده تتشل منى
و لسه ربنا يستر لما تقرا البوست
بعتذر مسبقا ... بس الكلام مستحيل أكون بوجهه لشباب ف احترامك

تحياتى ليك

حــكــيــم روحــانــى يقول...

حلو أوى التواضع ال انت فيه ده
بجد حلو الإنسان ميتكلمش عن نفسه و جماله و حلاوته كتير .. و انه بأه مشهور و له اسم و من كتر تواضعه بيتعامل مع الناس
عادى كده
كأنهم اصحابه
و مش بس كده
ده كمان بيسأل على صحابه بنفسه
لأ لأ لأ
يا راجل
ايه التواضع ده
أمال لما تتشهر بجد هتعمل فينا ايه
لامؤاخزه مين حضرتك

أميرة ويلز يقول...

على فكرة انت اسلوبك كويس جدا فى التعامل
والاسلوب دة بالعكس فى راى بيخلى الناس تحترمك أكثر لأنها بتقدر شخصيتك الودودة اللى بتسأل عنهم وانت اكبر زى مابتقول يعنى مش محتاج منهم حاجة فى شعرة بين التواضع والود وبين التباسط وانك تأخد حد عليك الشعرة دى بتقدر تحسمها انت فى طريقة تعاملك انك تجبر اى حد يحترمك من احترامك انت له
اللى يقولك غير كدة يبقى متعجرف
على فكرة انا بشوف اسمك كتير واول مرة ادخل مدونتك بس ندمت انى مادخلتهاش قبل كدة
تشرفت بمعرفتك ويارب تكون بخير وترجع لمدونتك وتستقر احوالك فى اسرع وقت

LAMIA MAHMOUD يقول...

اشرف باشا والله دايما سباق بالخير وبتطلعني شكلي وحش اويييييييييييييييييييي


ومن قلبنا جاين نقولك كلنا .. نورت مصر:)))))))))))))

MaMaDo يقول...

ازيك الاول يا اشرف باشا
اولا انا يمكن بقالى كتييير اوى بسبب الامتحانات بس
و الله قبل ما اقرأ البوست
قولت يااااا
اشرف باشا وحشنى اوى بجد و الله بدون تكليف

و لما قرأت البوست قولت مش هجاوب على الكلام ده
لان يمكن الرد وصل بالكومنت بتاعى و الناس الى بتسال عليك و بتحبك دى

مع انى لسه واخد على خترى من لان يوم ما كنت بتلعب معانا كوره جبت فيا كوبرى و انا بضايق من كده
ماليش دعوه بقى
هههههههههههههههههه

بجد انت انسان جميل و متحولش تبقى بعيد عن الناس
و فى كلمه ممكن اقوله
لاى كده مشهور زى
ان الناس الى انت بتحاول تبعد عنهم
هم دول الى عملوك نجم
هما دول الى خلوك مشهور
ليه بقى تبعد عنهم
مش هطول عليك بقى
انت كنت بجد وحشنى و قولت اسلم

ساعه الغروب يقول...

اشرف انت فين؟؟
ابقى طمنا عليك
ما اتعودناش على الغيبه دى

ابقى طمنا عليك

سلام ويا رب تكون بخير

:)

hend يقول...

تصدق ان ده بالضبط اللى بيحصل معايا فعلا لما بتتعامل مع الناس بالفة وصراحة وعلى طبيعتك تلاقى الكل بيديك فوق دماغك وبيلطش فيك وبيعاملوك كانك ملكية خاصة ليهم وتبقى ساعات مش عايز تجرح شعورهم بحاجة او تحسسهم انهم اقل منك فى حاجة مهما كانت تافهة ودول يفتكروها هبل ويتمنظروا ويبهدلوك يعنى مش عارفة هو لازم الواحد يدى اللى ادامه على دماغه علشان يعمله بريستيجه

Memo يقول...

ينصر دينك يا وةاد يا اشرف
لولولولويييييييييييييييييييي

أخف دم يقول...

السلام عليكم
كل ثانية وانتوا جميعا بخير
الحمد لله الأيام اللى فاتت عدت وهاتشرف بيكم من جديد
وربنا ما يفرقنا ابدا
البوست ده تحديدا يا جماعة مش هاقدر ارد على كل واحد لوحده لأن فعلا كمية الحب والود اللى ف كلامكم مش هاقدر ارد على كل واحد لأنى والله حاسس ان مدين ليكم جميعا بالود والحب ده ..
أنا بس عايز أوضح حاجة
والله العظيم أنا ما كان قصدى فى البوست إنى أحسس حد إنى باتكلم عن نفسى أو إنى مشهور والكلام الفاضى ده .. إحنا كلنا أخوات وزى ما قال بعض الناس أنا فعلا هاتكبر وهتغر على إيه
أنا بس والله كان قصدى عموما .. إزاى الواحد يتعامل مع الناس .. بحب وود وهزار زى طبيعته وللا يتكلف معاهم عشان يكبر فى نظرهم .. وكنت سعيد جدا إن فيه ناس كتير منكم قالوا إنهم بيواجهوا نفس الحالة . معنى كده ان فعلا فيه ناس بتمر بنفس الأزمة وبيتم تفسير قربهم من الناس وتعاملهم الخفيف على إنه أى حد ومابيزود ده هوه الوحيد اللى كله بيزعله عشان هوه ما بيزعلش من حد .. فهل ده الصح ولللا انه يوقف الجميع عند حده
ده كان سؤالى وأنا قلت فى البوست ياريت اعتبار البوست أمر عام مش شخصى عشان اتكلم براحتى
ياريت يكون قصدى وصل وآسف لأى حد تخيل غلط إنى أقصد البعد عن الناس .. عمرى ما هابعد عن حد مهما حصل .. البوست ده كان نتيجة أيام متعبة إلى حد ما هنا فى القاهرة فى أول انتقالى فحبيت أشراككم فى مشاعرى واللى باحس بيه .. وأظن انى مش غلطان عشان أنا حاسس بمدى قربى منكم وقربكم منى
ربنا يبارك لى فيكم
وبالأحضااااااااااااان بالأحضاااااااااااااااان

mesh2dra يقول...

السلام عليكم

اولا حمدا لله على سلامتك
ويارب الامور عندك تستقر

ثانيا بقى بالنسبة
لازاى تتعامل

بص يا سيدى

من الشاذ جدا والغريب
انى بتعامل مع الناس
باسلوب
وبعد كده اغير من اسلوب تعاملي معاهم
لانى بقيت شاعر كبير او بقيت ايا كان
انسان معروف وخلاص
الناس في الوضع ده حيبعدوا عنك
وده لانهم حيحسوا انك كبرت
عليهم او اتغريت او شايف نفسك
او او ...حاجات كتير اوى
بس حيكون رد فعلهم الطبيعي
انهم ياخدوا جنب منك
ودى نتيجة ما اعتقدش انك عاوزها
او اى انسان في الدنيا يتمنى
ان حد ياخد منه جنب
او يبص له بصورة غير صورته

ده بالنسبة للناس اللي كنت بتعامل معاهم
قبل ما اتشهر

بالنسبة بقى للناس الجديدة
فيه حاجة بتقولك
" من تواضع لله رفعه"
مفيهاش حاجة ابدا لما اتعامل بطبيعتي مع البشر
وده لعدة اسباب
اولا عشان ما احسش انى حد غريب عن نفسي
وان دى مش طبيعتى اصلا
ثانيا عشان ما اعملش حاجز نفسي
بينى وبين البنى ادم الالي بتعامل معاه
ثالثا بقى عشان ما بقاش متعالي ومتكبر
بس
فيه حاجة
ده مش معناه انى ابقي
ايزى يا عزيزى
في كل الاحوال والظروف ومع كل الناس
ومش كل حد حضحك معاه
حقوله كفك يا راجل
لا ابدا
بردو زى ما حتعامل بطبيعتي مع البشر
ما ابقاش اوفر اوى
او بمعنى اصح في كل حاجة في الدنيا
حاجة اسمها الريد لاين
او الخط الفاصل اللي ما ينفعش اتخطاه
لان البشر انواع
وبالتالي
ما ينفعش اسيب الامر على اطلاقة
ودى بقى مهمتك انت
يعنى تقدر تحدد مين تتعامل معاه بحدود
عشان ما ياخدش عليك- لان فيه ناس رخمة بمجرد انها تاخد عليك تبقى مستفزة
وتحدد مين الشخص العادى المحترم
اللي انت متأكد انك مهما اتباسطت معاه
حيعمل هو حساب لده
وحيكون فيه احترام بينكم
وماتبقاش االلهو الخفي الغامض
اللي الناس ممكن تترهب انها تكلمه

كفاية عشان رغيت كتير
بس متنساش
من تواضع لله رفعه
وفي نفس الوقت
علاقتى بغيري لابد وان يصيبها صفة الاحترام
حتى لو كانت علاقة صداقة متينة جدا

سلاماتي:)

meroooo يقول...

احيك علي تواضعك وعلي روحك الطيبه
انا عارفه ان كلامي ده مش هيتشاف
بس هي الحكايه اتنين ان اللي قدامك ممكن يفهمك غلط مش هياخدها انها مجرد حب وطيبه قلبك انك انت اللي بتسال ممكن تكون بتسال علي حد ديما يقلبها علي مزاجه ويشكلها زي ماهو عايز وفي مثلا تملي ولدتي تقولهولي البعيد حبيب مع اني مش مقتنعه بالمثل وتقريبا انا بتعامل زيك كده او كنت بس اضربت كتير اوي علي دماغي بطيبتي واني بسال علي اللي مااعرفهوش قبل عن اللي بعرفوه بس بجد تعبت من الردود الفعل ولقولت لنفسي اللي بسال عني هسال عنه بدون اي اعتراض وبس اللي مايسالش عني خلاص انتهت وبعدين البرستيج ده تعيشه في اعقده مع ناس مش يعرفوك لكن اللي يعرفوك ماينفعش تعيش عليهم البرستيج والبرستيج مش هو انك تكون مصتنع قدام الناس البرستيج انك تعرف امته تتكلم وامته تكون جد وامته تهزر مش مجرد كلام بتقوله هو اللي هيحدد برستيجك مع اللي بتحبهم ويحبوك
دا رائي

K h @ L e D يقول...

ازيك يا أستاذ أشرف ويارب تكون بخير

أنا تقريبا أول مرة ادخل على مدونتك وبصراحة شدتنى أوى وانا دلوقتى بقرأ كل البوستات اللى فاتتنى من المدونة بتاعتك ووصلت للبوست دا .. انا عارف انه قديم وانك احتمال كبير جدا متقراش الرد بتاعى بس انا حبيت أقولك حاجة بمناسبة أزمة تعاملك مع الناس والمستخدمة رينا قالتلك كلمة كنت هاقولهاك وهى من تواضع لله رفعه وأحب ازود عليها واقولك انتا مش محتاج تتغير فى معاملتك علشان الناس تحترمك كفاية انك تبقى زى مانتا بتلقائيتك ومعاملتك البسيطة السهلة على كل الناس وصدقنى اللى يفهم تصرفك بشكل تانى تبقى المشكلة من عنده هو مش من عندك .. حقيقى انتا شخصية كويسة اوى وانا اتعلمت منك كتير فى الشوية اللى قعدت اقرالك فيهم خليك كدة وماتتغيرش علشان حد ولا علشان حياتك بتفرض عليك حاجة .. مقامك جواك وزى مانتا شايف نفسك الناس هاتشوفك .

انا أول مرة اكتب رد لحد على مدونة وطبعا دا لأنى أول مرة ادخل مدونة اساساً برغم ان معظم حياتى على النت بس انا بجد اتشرفت ان اول مدونة ادخلها تبقى مدونتك .. ويارب بالتقدم الدائم .. على فكرة انا بلدياتك من المنصورة ودلوقتى بتشرف ان المنصورة خرجت وبتخرج ناس زيك :)

K h @ L e D يقول...

ازيك يا أستاذ أشرف ويارب تكون بخير

أنا تقريبا أول مرة ادخل على مدونتك وبصراحة شدتنى أوى وانا دلوقتى بقرأ كل البوستات اللى فاتتنى من المدونة بتاعتك ووصلت للبوست دا .. انا عارف انه قديم وانك احتمال كبير جدا متقراش الرد بتاعى بس انا حبيت أقولك حاجة بمناسبة أزمة تعاملك مع الناس والمستخدمة رينا قالتلك كلمة كنت هاقولهاك وهى من تواضع لله رفعه وأحب ازود عليها واقولك انتا مش محتاج تتغير فى معاملتك علشان الناس تحترمك كفاية انك تبقى زى مانتا بتلقائيتك ومعاملتك البسيطة السهلة على كل الناس وصدقنى اللى يفهم تصرفك بشكل تانى تبقى المشكلة من عنده هو مش من عندك .. حقيقى انتا شخصية كويسة اوى وانا اتعلمت منك كتير فى الشوية اللى قعدت اقرالك فيهم خليك كدة وماتتغيرش علشان حد ولا علشان حياتك بتفرض عليك حاجة .. مقامك جواك وزى مانتا شايف نفسك الناس هاتشوفك .

انا أول مرة اكتب رد لحد على مدونة وطبعا دا لأنى أول مرة ادخل مدونة اساساً برغم ان معظم حياتى على النت بس انا بجد اتشرفت ان اول مدونة ادخلها تبقى مدونتك .. ويارب بالتقدم الدائم .. على فكرة انا بلدياتك من المنصورة ودلوقتى بتشرف ان المنصورة خرجت وبتخرج ناس زيك :)

غير معرف يقول...
أزال أحد مشرفي المدونة هذا التعليق.
العيسوى الصغير يقول...

انا شايف انه يعمل زى سطور الكراسة قريبة بس مش لاقصة فى بعض و ثابته

farawla يقول...

على فكرة انا كدة اوى برده والموضوع ده شاغلنى بقالى فترة سبحان الله ولقيتك بتتكلم فيه
انا باتعامل مع الناس كدة وكل شوية افكر اغير من نفسى وبعدين ارجع تانى اقول لا انا هاخلينى على طبيعتى ده احسن حاجة

farawla يقول...

أصل فيه ناس بتفهم كده غلط وفيه ناس مش بتقدر وبتعتبر ده ضعف شخصية

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه