اخبار

الخميس، ٢٥ يناير ٢٠٠٧

ناقص دبدوب



..ناقص دبدوبْ
فتـّشت كتير هداياىَ الرّاجعه ومالقيتهوش
..دوّرت فْ كل هديه كتير بالطول والعَرض
..وقلبت الشنطـَه كمان عَ الأرض
ولقيتْ دِبله وجوابات وكروت
..وجنيه مقسوم وصُور وقلوبْ
..لكن برضُه
!! ناقص دبدوبْ

ـــــــــــــــــــــــــــــــــــــــ
..كل اللىّ فْ قلب الشنطه معاىَ بيستنظـَر
وبجدّ الشنطه بدون دبدوب
..مالهاش منظرْ
كل الجوابات ممكن يكتبها حبيب غيرى
والدِبله خلاص موضوعها اتشال من تفكيرى
والباقى حاجات بتكون دايماً بين أىّ اتنين
..وبتتكرّرْ
..وفْ شنطة كلّ حبيب وحبيبه هتِلـْقِى حاجات منهُم واكترْ
وهتـِلقِى شموع ودموع وفرَح وأمَل ساكِنْ
مُمكِن
..لكِنْ
!! مش كل حبيب بيجيب دبدوبْ


ــــــــــــــــــــــــــــــــــــ

وازّاى انساه؟
وانا كلّ ايامى الحلوه معاكِى .. معَاه؟
..أيام ماعشقتـِك قبل ما اقول
..وايام ماحلمتـِك قبل ما اطول
وايام وايام بتفوت على طول
وانا وانتى فْ كل دقيقه بنبـْنى جنينة حب وشوق وأمَلْ
وانا قلبى الدِيبْ
..على إيدِك والله لقيتـُه حَمَـلْ
..كنت امّا ازعلْ
ألاقيكى بتِجرى على الدبدوبْ
..لجـْلْ يصالحِك
وفْ أحزانِك بيمدّ إيديه
..علشان يمسح دمعة جرحِكْ
وفْ فرحِك
..كان من فرْحُه يطيرْ
..دا انا كُنت بغِيــرْ
لمّا اعرف انّه امبارح كان بين دراعِينـكْ
وباحسّ ساعات وكأنه حَرَس بينى وبينِكْ
..واتخيّل إنّه ساعتها خلاص قرّب منـّك
..وإديكى عليه
..وعنيكى عـَليه
:أجرى واطلـّع صورتِك واندَهْ
!! والله يا روحى أنا اللى شارِيه
وسنين بتفوت وقلوب بتدوب
وفْ لحظه خلاص يخدعنا كلام
..وتموت أحلام
..ويضيع
دبدوبْ
ــــــــــــــــــــــــــــــــــــ

فاكراه واللىّ انتى خلاصْ ناسياه مع كلّ زمانى اللىّ عشقتـُه؟
طَب فاكرَه انا إمتى زمان جِبـْتُه؟
كات أول مرة انطقها (بحبـّـك) قدّامِك
وابصّ فْ عِينك قدّامـِـك
كات أول مرة أدخل فى عنيكى بدون ما اخْجـَـل
سلـّمت كتير على كل رموشِك عَ المدخـَل
وفْ لحظة لقيتنى فْ قلب عنيكى بدون صاحب
وجناين مَاليـَه ربوع عِينك مالهاشْ صاحِب
وساعات بامشيها وحاسِس إنىّ خلاص مجنون
من كُتر المشْى نسيت ان انا أصلاً فى عيون
ولقيتنى فْ ننّ عنيكى خلاص بعد المشوار
..ولقيت لى فْ ننّ عنيك جناين فـُلّ ودار
..ومشاعر حب وشوق وحنين وحنان جَارْفـَه
..عارفـَه؟
مع إنّ عنيكى مَهـِيش خـَضْرَه
!! الدنيا تملـّى فْ ننّ عنيكى تبان خـَضْره
..مليانه أمل بتحاوْطـُه الأحلام والخـُضْره
وانا كلّ ما انام
..قلبى الحيران بيلوم رِمشى
..وامّا اتحرّك واعمِل ماشى
بيقول لى : حرام .. لسّه هتمشِى؟
وسنين بتمرّ عليّ فْ نِنّ عنيكى السُودْ
وفْ لحظه لقِيتنى خلاص مَطْرودْ
..على ناصية أوّل رِمش بعيدْ
..من غير دبدوبْ
ـــــــــــــــــــــــــــــــــــــــ

قلبى الطيـّب
..مش قادر ينسى سنين فاتِتْ
..مش قادر يرمى حكايةْ حُبـُّه عشان غلطـَه ويقول :ماتِتْ
جايلِك من تانى بحلم جديد
جايلك وفْ إيده أمل وحنان ولـُقى ومواعيد
ومعاه دِبله

وجوابات

وكروت
وجنيه مقسومْ
وصور
..وقلوب
:جاىّ يقول لِكْ


...عَلشاااان خَطـْرِى
!!...خللـّى الدبدوبْ

ـــــــــــــــــــــــــــــــــــــــ

(ديوان (مرسال لحبيبتى

أشرف توفيق

هناك ٤٢ تعليقًا:

الأباصيرى يقول...

ليك حق تسميها مواضيع عبقرية

القصيدة مليانة صور وأحاسيس جميلة

raspoutine يقول...

ان شاء الله هترجعلك ومعاها الدبدوب وتقول وحشتنى وبحبك بموت


ده لو لبكبلم على حبيبتك

ايمن فاروق

Haitham Abu Akrab يقول...

كل الجوابات ممكن يكتبها حبيب غيرى
والدِبله خلاص موضوعها اتشال من تفكيرى

----------

تدرج احساس عالي جدا جدا جدا
ف الجمه دي


الدبوب - قصدي القصيده- حلوه جدا
وهغلط لو قلت عايزه تختصر
لان الاحساس مبيختصرش

فرحان بيها جدا وانضمت لقايمه المفضله

وما اشوفك ليك دبدوب في وشك
علشان معرفتكش من زمان

دينا فهمي يقول...

..ناقص دبدوبْ
فتـّشت كتير هداياىَ الرّاجعه ومالقيتهوش
..دوّرت فْ كل هديه كتير بالطول والعَرض
..وقلبت الشنطـَه كمان عَ الأرض
ولقيتْ دِبله وجوابات وكروت
..وجنيه مقسوم وصُور وقلوبْ
..لكن برضُه
!! ناقص دبدوبْ
ـــــــــــــــــــــــــــــــــــــــ
..كل اللىّ فْ قلب الشنطه معاىَ بيستنظـَر
وبجدّ الشنطه بدون دبدوب
..مالهاش منظرْ
كل الجوابات ممكن يكتبها حبيب غيرى
والدِبله خلاص موضوعها اتشال من تفكيرى
والباقى حاجات بتكون دايماً بين أىّ اتنين
..وبتتكرّرْ
..وفْ شنطة كلّ حبيب وحبيبه هتِلـْقِى حاجات منهُم واكترْ
وهتـِلقِى شموع ودموع وفرَح وأمَل ساكِنْ
مُمكِن
..لكِنْ
!! مش كل حبيب بيجيب دبدوبْ



بجد مكتوبة باحتراف

Unknown يقول...

الله , جميله جداااااا ياأشرف
والدبدوب بالذات, انت عارف ان كل الكلام اللي قولته صح فعلا, الدبدوب ده حاجه مهمه جدا, وطالما مارجعتهوش يبقي الأمل موجود, وان شاء الله هترجع قريب (:

غير معرف يقول...

احساس جميل وصل للقلب
مفيش كلام يعبر عن اعجابى بالقصيده

Unknown يقول...

واتخيّل إنّه ساعتها خلاص قرّب منـّك
..وإديكى عليه
..وعنيكى عـَليه
:أجرى واطلـّع صورتِك واندَهْ
!! والله يا روحى أنا اللى شارِيه

ههههههههههه
ياعينى معلش

ايه الابداع ده
والله تحفة وحلوة جداااااااااااا
ممتااااااازة .. وليك حق تتواضع

الكلام نوعان :كلام فارغ وكلام مليان كلام فارغ يقول...

جميله جدا القصيده وبتعبر فعلا عن تجربه واقعيه .....بجد نحفه

Amr Ahmed يقول...

جميلة جدا

والفكرة حلوة اويي
تحياتي

الدمعه يقول...

لا بجد والله لذيذة وجميله وفيها مشاعر رقيقه جدا بجد حلوة اوي جزاك الله خيرا

مصطفى حسان يقول...

على فكرة يا أشرف
حلو الدبدوب جداً .. وانا مش قصدي على القصيدة .. انت عارف رأيي في القصيدة من زمان .. لكن انا بحكي على الدبدوب
فاكر الدبدوب ده يا أشرف
اللي انا اساسا معدتش عارف هو بتاع مين بالظبط
لدرجة اني حسيت انه بقى مشااااااااااااع

غير معرف يقول...

مش لازم يكون فى أمل عشان مش رجعت الدبدوب يا إسراء ممكن تكون ضيعته أو رميه أو حتى ادته هدية لحد تانى
بس القصيدة جميلة أوى يا أشرف بس أنا برده عاوزاك تحافظ على تواضعك ده باستمرااااار هههههههه

نصيحة بقى يا باشا ماتبقاش تجيب دباديب تانى خسارة فيهم، الدبدوب يجى بعد الجواز عشان مش كل شوية يضيع دبدوب
ولا اييييييييييه

tota يقول...

اشرف
عارف لو عرفت تنقلها كل الكلام الللى انت كتبته ده
بكل بساطة هى اللى هتطلب منك انها تفضل محتفظة بالدبدوب وتطلب الشنطة اللى فيها الذكريات
فى الحب سقطات اهمها ان العاشقين لا يوصل كل منهم ما فى نفسه للاخر
اغلبها على ورق بينه وبين نفسه
العشق مشاعر واحيانا تكون الكلمات هى مرسال الوصل

احسنت
تحياتى

Utopian يقول...

حلوه جدا يا أشرف

فكرتني بالذي مضي

loooooooooooooool

بجد في الجووون

يا قلبي يا غريب يقول...

جميله جدااااا..و معبره ..بس هو ايه الدبدوب ده علشان ما اجبهوش ؟

Memo يقول...

انا عايزه الدبدوب انا كمان ماليش دعوة
ناقص في البلوج ده دبدوب
هههههههههههههههههههههه
قال مش مهم الدبله و مهم الدبدوب قال يا بابا الدبله دهب و الدبدوب قطن
هعلم فيكو لامتا
تحياتشي

غير معرف يقول...

سين حلم لا ينتهي
صدقني يا أشرف لما بكدب عليك
مفيش حاجة اسمها دبدوب لكن فيه كلدير معاك كلدير تسوى كلديروالناس معادن اوعى تكون نحاس وتسيح سعتها مش هينفع دبدوب ولا بطارخ على فكرة احنا بنحبك ونحترمك من زمان امضاء القط الاسود

smraa alnil يقول...

dيخربيت ام تواضعك يا اشرف

ايه يا ابني الكلام دة
طب تصدق وتأمن بالله
والله انا فخورة اني عرفت واحد زيك
طبعا انا عارفة ان انت عارف اني فخورة بيك بما انك متواضع جدا يعني

..كنت امّا ازعلْ
ألاقيكى بتِجرى على الدبدوبْ
..لجـْلْ يصالحِك
وفْ أحزانِك بيمدّ إيديه
..علشان يمسح دمعة جرحِكْ
وفْ فرحِك
..كان من فرْحُه يطيرْ
..دا انا كُنت بغِيــرْ
لمّا اعرف انّه امبارح كان بين دراعِينـكْ
وباحسّ ساعات وكأنه حَرَس بينى وبينِكْ
..واتخيّل إنّه ساعتها خلاص قرّب منـّك
..وإديكى عليه
..وعنيكى عـَليه
:أجرى واطلـّع صورتِك واندَهْ
!! والله يا روحى أنا اللى شارِيه

والله يا ابني انت خسارتك في ام البلد دي
احساسك عالي موووووت
وانت طبعا بتواضعك الا متناهي عارف راي في كتاباتك

3ashe2elro7 يقول...

رائعه من روائع أشرف توفيق بس انا زعلان منك علشان منزلتيش " اللى مات فى البحر قابض " اعتقد كده انت عرفتنى بالتوفيق دايما يا شاعر

zordeak يقول...

يخرب عقلك



رهيييييييييييبة


فظييييييييييعة

ما حصلتش


يا بنى انت وهمى


ايه ده


بجد والله رهيييبة


أنت شاعر بجد



بجد احسن حاجة النهاردة حصلتلى انى جيت هنا وقريت الكلام التحفة ده


روح يا بنى وانت شاعر وهمى


تحياتى
:)

Rivendell** يقول...

هههههههههه

دا ايه التحفه دي

ناقصها لحن وصدقني هتبقى ضربة الموسم .. بجد على فكرة

حلوة جدااااااا .. البلوج كله دمه خفيف .. فعلا اخف دم

big big girl...in a big big world يقول...

بجد جميله اوىىىى

Yasmine Adel Fouad يقول...

اشرف
انت كتبت القصيدة دى او نصها الاولانى فى حته او ليك بلوج تانى او جرنال حتى او ديوان
انا متأكده انى قريتها قبل كده فى مكان
بس مش فاكراه
فانت نشرت فى مكان تانى او كان ليك بلوج قبل ده علشان مش حلو اتجنن و انا لسه صغيره
بس عموما احساسها طبعا سهل ممتنع
جميله جدا
3 محاول انت و حبيبتك و الدبدوب مديين روح بسيطه للنص بس فيها احساس جبار

عارفـَه؟
مع إنّ عنيكى مَهـِيش خـَضْرَه
!! الدنيا تملـّى فْ ننّ عنيكى تبان خـَضْره



ايه العشق ده

Unknown يقول...

ايه الجمال ده البوست اجمل من اى كلام يتقال او اى تعليق

البوست عالم من الحب والسحر والخيال و طريقه جديده فى وصف الحب

و انا عن نفسى معجب جداً بكل القصيده خصوصاً الجزء الى بتحكى فيه على رحلتك جوه العيون ووصولك للنينى

جميل بجد اكتر من اى شئ رائته تخيل الجزء ده حبيته اكتر من كلام جبران

و كمان فكرتنى بشنطة ذكرياتى و كمان قلبت علبا المواجع لانى انا برضه مش لاقى الدبدوب

تحياتى
واحد كان ساكن جوه النينى و طله برضه بس للاسف بأرادته و كمان ساب الدبدوب

nour يقول...

كل الجوابات ممكن يكتبها حبيب غيرى
و الدبلة خلاص موضوعها اتشال من تفكيرى
لا معلم
انت جامد يا اشرف
انا سلمت خلاص:)))))))

غير معرف يقول...

يا عم اشرف والله لو قلت ريان يا فجل انت باشا وابن باشا وقصايدك دى طحن الطحن الطحن وعلى راى السيد قصايدك خلتنى ماتت بفتح التاء.

vision يقول...

بجد انا شيلتها عنى جميله اوى بجد بجد بجد

أخف دم يقول...

الأباصيرى
عبقرية ايه يا عم؟ ربنا يبعد عننا الغرور يا رب..احنا بس بنهزر.. نورتنا يا كبير والله.
ـــــــــــ
أيمن باشا راسبوتين
يا عم أنا عايز الدبدوب مش عايزها هيه ..
أصل الدبدوب بأربعين جنيه يعنى.
ــــــــــــت
هيثم ابو عقرب
متشكرين على الزيارة والكلام الجميل
ولما أشوفك هاخد الدبدوب اللى ف وشى
ـــــــــــــ
دينا فهمى
بتكتبيلى القصيدة تانى يا دينا ؟
ما انا حافظ القصيدة يعنى .. ههههههههه
منورانى
ـــــــــــــ
إسراء
دى قصيدة مش لازم تبقى قصة واقعية يعنى..
وترجع ماترجعش مش فارقة أهم حاجة الدبدووووووووب
ـــــــــــــــ
شيكو
طالما وصل قلبك يبقى مش لازم كلام
زغرتى حتى
ــــــــــــــــ
ياسمين الإنسانة
زهقت اقول لك أنا شاعر عبقرى .. متصدقيش لازم نحرجكوا يعنى ونبين المواهب؟
ههههههههه
لو ليه حق إنى اتكبر يبقى عشان أنا عرفتكم بس. لأن ده فخر ليا.
ــــــــــــــــ
الكلام نوعان
برضه القصيدة مش واقعية قوى يعنى..هوه انتوا كلكم راح لكم دباديب وللا ايه؟
وبعدين انتى فين من زمان؟
ــــــــــــ
عمرو أحمد
يا مصيتنى ورافع معنوياتى ومعنويات اللى بيقعد جنبى كمان
ربنا يكرمك يا مستر .
ـــــــــــ
الدمعة
ربنا ما يكتب عليكى حاجة من اسمك
نورتينى بجد .. وكويس انها وصلتلك
ــــــــــــ
ابن الدكتور
هوه الدبدوب اللى عندى ده يا بنى انت شفته أساسا.. هيه البنت جابتهولك وانت خبيته عندى.. يبقى بتاع مين.. أنا بعته أساسا
ـــــــــــ
lost in the web
بعد الحركة دى لا فيه دباديب لا قبل الجواز ولا بعد الجواز .
صنف البنات هوه الجانى على روحه.
ـــــــــــ
توتا
أنا بجد مش صاحب التجربة دى .. دى قصيدة باعبر بيها عن معاناة أى حد مش لازم أنا يعنى
وبعدين اللى تاخد منى دبدوب وماترجعهوش .. دا أنا أشقها بالمطوة.
ـــــــــــ
الباشمهندس يوتوبيان
انت كمان اتاخد منك دبدوب .
دا البنات دى مفترية بقى يا عم ..
هما بيحبوا وللا بيتاجروا فى الدباديب؟
ـــــــــــ
آية الموسى
منورانىىىىىىىىىى
ــــــــــــ
يا قلبى يا غريب
الدبدوب قطعة من القطن يعطيها الولد للبنت لتضحك عليه وتاخده منه وماترجعهوش بعد كده
هوه ده تعريف الدبدوب يا عم
ـــــــــــــــ
ميمو
والله يا بنتى كل مرة بتكبرى ف نظرى أكتر باحس ان انتى فعلا مخلصة جايبة من الآخر يعنى..دباديب ايه وكلام فاضى ..
سلميلى على خالد..
ههههههههههه
ــــــــــــــ
سمراء النيل أنوووووووج
مش هقول لك غير حاجة واحدة .. كلمة واحدة هارد بيها على كل اللى انتى قلتيه ليا
افتكرى الجمايل دى
ــــــــــــــ
عاشق الروح
ربنا يكرمك يا رب
وان شاء الله هانزل اللى مات فى البحر قابض.. قريب
منورنى طبعا.
ـــــــــــــــ
أحمد فؤاد
إيه يا عم انت بتتفرج على فيلم ماتريكس؟
هوببا .. الله .. ايه ده؟..فيه ايه يا عم؟
ههههههه
ربنا يكرمك يا أحمد باشا.
ــــــــــــ
الحاجة غواصة بحر الأمل
منورانى ومن البلوج للبلوج رسول.
ـــــــــــ
big girl
الله يكرمك يا رب وعايزين نشوفك دايما.
ــــــــــــ
ياسمين الحرة
أيوة يا ياسمين هيه نزلت فى كام مكان منهم اضحك للدنيا مثلا..والديوان فعلا نزل برضه من فترة..
والعشق ده انا شايف انه ده هوه العشق الطبيعى بين اى اتنين بيحبوا بعض حب حقيقى.
ـــــــــــــــ
whyme
هيه جت ع الجرح يا معلم؟ معلش .
الدباديب دى بدل ما تبقى وش سعد بقت وش مشاكل وذكريات كئيبة .
يالله .. سيبها لله .. واشرب كبايتين عصير قصب وانت هتنساها وتنسى الدبدوب كمان.
ـــــــــــــــ
نور
وبما إن انك سلمتى خلاص يا ستى .. ما بين الخيرين حساب ..
وأنا مسامحك على إيه مش عارف بس مسامحك وخلاص ..
ــــــــــــــ
محمد الوحش
أسيبك فى الشقة تطلعلى من البلوج؟
هوه استنصاد يااخى؟
ههههه
منورنى والله يا محمد ..وسلملى على السيد.
ـــــــــــ
camera girl
يعنى القصيدة حلوة وكمان شلتيها عندك .. طيب بقى.. مفيش صورتين على الماشى كده وانا حاطط إيدى على دقنى زى المفكرين ..
وللا انتى مناظر طبيعية بس؟
نورتينى

الأباصيرى يقول...

أنا عارف أنى علقت قبل كدة على البوست دة

بس كل ما أخل المدونة بتاعتك لازم أقراة تانى


بجد تحفة

ehahe ..soso ..eso iam me :) يقول...

بجد روعه وصوصا المقطع الاخير
ولا تزعل اجبلك انا دبدوب بداله
ولا اقولك بلاش علشان تفضل تكتب كلام حلو علطول

LuaY SakR يقول...

ازاي انا اول مرة ادخل المدونة دي

احسنت يا عم اشرف
ولو انك -واضح يعني- مش مستني حد يقولك احسنت

بس معلش بقي

انت احسنت فعلا

أخف دم يقول...

الأباصيرى تانى
ربنا ما يحرمنى من دخلتك عليا يا كبير
ــــــــــ
ehahe
بطلى بخل هاتى الدبدوب وماتقلقيش هكتب تانى برضه ان شاء الله
ـــــــــــ
لؤى
يا عم ربنا يخليك .. احنا بس بنهزر انما يعنى مش للدرجة دى
منورنى والله

غير معرف يقول...

طبعا انت مش محتاج كلام انت يعني متربع علي عرش هذا الفن الساخر الجميل شعرا ومقالا ربنا يوفقك يا اشرف وتستمر تمتعنا بمثل هذه الاعمال الرائعة
انا طبعا واحد بيعتبرك مثله الاعلي في هذا الفن الشعري
اخوك الاصغر محمد متولي

غير معرف يقول...

ااااااااااااااااااااه ياخبر ابيض على احلى كلام سمعته فى حياتى واحن احساس حسيته انت بجد حلم خيال واحساسك عالى جدا

ســمـــر احمد يقول...

وردة ليك ... ودمعة ف عينى لقيتها نزلت لما قريت قصيدتك عن الدبدوب اللى ياما بيشوف حكاوى قلوب
اطيب دعواتى

أنا و نفسى يقول...

قريت "ناقص دبدوب " من فتره وعجبتنى عادى .. لكن امبارح فتحت شنط من زمان ولاقيت دبدوب كان جيبهولى الشخص اللى كنت بحبه اتأثرت وافتكرت القصيده ورجعت النهارده قريتها . بجد حسيت بكل كلمه فيها .. الحمد لله على كل حاجه . ماتزعلش هى الدنيا كده

vamomito يقول...

ايه الحلاوة دي بجد رهيبة مووووووت
بالذات الحته بتاع
كانت أول مرة أدخل فى عنيكى بدون ما اخْجـَـل
سلـّمت كتير على كل رموشِك عَ المدخـَل
والله بجد عسل ربنا يخليك لكل لينا

امانى عزالدين يقول...

بجد مش عارفة اقول حاجة
غير تسلم ايدك
تحفة بجد
على فكرة كان حد ف جروب قبل كدة نزل كام قصيدة من قصايدك من كام شهر وقال انها بتاعته انا انبهرت وخدت كوبي منها وبقيت ابعته للى اعرفهم خصوصا قصيدة استحملي
وبعدين لما دخلت المدونة عرفت انها بتعتك
هههههههههه
بجد ماشاء الله
احساس عالى واحتراف بجد
الله ينور

غير معرف يقول...
أزال أحد مشرفي المدونة هذا التعليق.
Unknown يقول...

لازم تقول فى الاخر خللى الدبوب دا انت صيحتها يا عم الناس كلها عرفت

abdo alordy يقول...

بجد بجد استاااااااااااذ
تسلم ايدك واحساسك ودبدوبك
مش عايز اقول اكتر من كده
عشان مفيش كلام

the black pearl يقول...

حلوة اوووووى
انا سمعتها من 050 الاول وبعدين دورت على الكلمات .. بجد تحفة