اخبار

الخميس، 4 يناير، 2007

باخاف م الحكومة




باخافْ مِ الحكومه
وعارف بإنّ اللىّ يشغـل دماغهُم
مفيش منـّـه قُومَه
فقاعِدْ فى حالى
مواطن مثالى
وهانصحْ عِيالى.. اللى لسّة فْ خيالى
يكونوا فْ بلادهم تمام كالضيوفْ
ولا حدّ يسمعْ
ولا حد يمنعْ
ولا حد يفتح عِنيه
أو يشوفْ
باخافْ مِ النّجوم والنّسور والسّيوف اللىّ فوق الكِتافْ
وقلبى بيتشدّ لو مرّة شافْ
حدّ شايل لاسلكى
وبانسَى انّ هذا الوطن مش بتاعُه
ده ملكُه .. ومِلكِى
ما بسألشى ليه علّمونى انى اجاهدْ
واعاندْ واذاكرْ
إذا كنت هاطْلَع جبان لمّا هاكبر
واخافْ مِ العساكِرْ؟
برغم انىّ أول مواطن فى جيبُه البطاقة البلاستيكْ
وبايع ضميرى اللى مش لاقى غيرى
بكام ذمّة أستيكْ
وخادِم فى جيشى
ولا عمرى قلت ان جيشى السعيد.. كان بعيد
وياما مَسَحت وكنَست الزّبالة فى أوضة العقيدْ
وكلّه عشان أمْن هذا الوطنْ
ولو حتّى أجوع.. أو أضيع.. أو أصيع
أو فى يوم اتشنـَق
ولا دماغى حاضرة
ولا دقنى خـَضرة
مادام مصر خـَضرة
وليه القلقْ؟!!
باخاف مِ اللىّ قاعدين بيقضوا المصالِح
وباسمع كلامهمْ
وبابنى اللىّ فاسد
واهدّ اللى صالحْ
باخاف مِن زَعَلهم
واخاف من رِضَاهم
واخاف لو مشاكلى هتقلق فََضَاهم
بادبّر أمورى بكام وَعْد منهم
وباتمنىّ لو مرّة يصدُق يَمِينهُم
ولو حتى ما وْفوش
ما بزعلش مِنهُم
برغم انّ دِينهُم يدِينهُم
لكن برضُه راضِى
ما انا برضُه فاضِى
وممكن أشيل همّ حالى وعيالى
ما دام همَّه قاعدين فى زحمة مشاغِل
قِراية الجرايدْ
وحلّ التسالى!!
باخافْ مِ المرور
وباسمع زِعيق العساكر فى وشِّى
واقول برضُه: ماشى
وباخُد يمينى .. برغم انّى مَاشى!!!
وكلّ امّا اسرَّع أقول : لأ.. كفاية
واعلَّق حزام بنطلونى فْ قفايا!!
باخاف برضُة يمكن انا آخُدْ مخالفة
ما كل البلد خايفة.. من بدرى خَايفة
ولو خَدتْ .. هادفعْ وإيه المشاكِل
ما دام مصرْ عارفة
باخاف لمَّا باصحَى.. لغاية ما انام
باخافْ حتىّ مِنىِّ
باخافْ والسّلامْ !!
لكِنْ فيه سؤالْ
أنا ليه باخَافْ؟
إذا كنت أصلاً
أساساً
طَبيعى
باخافْ مِ الحُكومَة ؟!!!!

(أشرف توفيـق(أخف دم

هناك 57 تعليقًا:

dr \ ahmed zaki يقول...

بسم الله الرحمن الرحيم

لعلي ابدأ تعليقي على قصيدة حبيبي و الشاعر الفذ اشرف توفيق بمقولة لصاحب نظرية التطور المعروف ( دارون ) : "الحياة موكب الاقوياء ولا مكان فيه للضعفاء".
وكما ذكرت في تعليقي الاخر على مدونته ( جبت كومبيوتر .. والف بركة يا سيدي ) ان هناك نقط اختلاف واتفاق مع الشاعر وببدايتي بتلك المقولة فانني اوافقه كل الوفاق في هذا الوضع السئ والذي وان يدل فانما يدل على ان الحال قد فاض و زاد تاثيره في ذلك الشعب المغلوب على امره كما اصفه دائما .... كان هذا نقطة الاتفاق معه في تلك القضية اما الاختلاف - مع ان الاختلاف في الراي لا يفسد للود قضية - في هذا الموضوع وهو ان النفوذ العسكري ليس موجودا في مصر وحدها وانما في معظم دول العالم ولو تعلم فان ميزانية اي دولة تُقتص منها جزء كبير لصالح الشؤون العسكرية ووزارة الدفاع ووزارة الداخلية ... وذلك لاننا عشنا ونعيش وسوف نعيش في خوف مستمر من اي شئ ليس النفوذ العسكري والذي ينطوي تحت مسمى قاهر الارهاب المزمع وانما اسرد مثالا قويا لذلك فعندما تزور اي سفارة من السفارات الاجنبية بالقاهرة او الاسكندرية فانك سوف تجد كتيبة من المدرعات و عدد لا بأس به من الجنود و الامن المركزي وذلك خوفا من حدوث ما تخاف منه القوى العسكرية ... ولعل ذلك النفوذ العسكري في مصر - على وجه الخصوص - قد جاء بعد ثورة 23 يوليو - ثورة الشعب الكاذبة - حين تولى العسكريين جميع المناصب العليا حتى المدنية منها ومنذ حينها و العسكريين هم المتحكمين والمسيطرين دون اي اعتبار للمواطنين بسيطين الحال .. الخص ما اعنيه في جمل مختصرة و هي اننا نعيش تحت مظلة الحماية المزمعة ضد الارهاب بكثرة افراد النفوذ العسكري .. حماية المواطنين ( الغلابة ) من اي طارئ يحدث..ولهذا ربما يظن البعض اني اوافق الحكومة فيما تفعله تجاه الشعب او مايفعله النفوذ العسكري في مصر ولكن دعونا ننظر بنظرة عادلة ما الذي يحدث لو ان ليس هناك اي نظام حازم على كل الافراد وان كل فرد من افراد الشعب فعل ما يريد وقتها انظر الى نفسك والى هذه البلد وتمعن هل الحل في فك طموس هذا النفوذ العسكري و الحكومي ام الحل فينا نحن ام الحل في استعمار جديد يعصف بك وبي وبالحكومة و بهذا النفوذ العسكري الموجود كما حدث في العراق .. فتصور نفسك تكره من يحكمك ومن يتحكم فيك ثم فجأة يأتي - كما يصوره البعض - المخلص ويدخل البلاد ويقضي على كل ذلك النفوذ ثم يأتي هو فيتحكم ويحكم بمبدأه هو دون اي اعتبار لاي شخص او دين او اي شريعة ... ساعتها ماذا تقول نار النفوذ القديم مع انه من لحمي ودمي ام نفوذ مستعمر اجنبي يقتلك دون اي تحفظ او اعتبار .. ولعلي اضرب مثالا اخيرا على الرئيس السابق صدام حسين - رحمه الله - وحين اعدم لمقتله ما يزيد عن مائة شيعي في العراق فمن اذن يحاكم الاستعمار عن قتله مايزيد عن نصف مليون من العراقيين المدنين العزل ؟؟؟؟!!!!! فتمعنوا ولا حظوا كيف تسري الامور واقول دائما لابد من امل التحسن والتطور ... وكما قال علامة الادب العربي ( نجيب محفوظ ) في رواية ( الحرافيش ) : " اذا كان هناك حال يدوم .. فلم تتعاقب الفصول ؟!! "

و بمقولة عميد الادب العربي انهي تعليقي وشكرا على وقتكم .. وشكرا للشاعر اشرف توفيق على اتاحة الفرصة لي ولغيري للتنفيس عن افكارهم و ارائهم..

والسلام عليكم ورحمة الله بركاته

د\ احمد زكي

أخف دم يقول...

إيه الكلام الكبير ده يا دكتور أحمد ..يا عم هتقول لى آله عسكرية هتقول لى عقدة عند المصريين .. هتجيلى يمين ..هتجيلى شمال .. برضه احنا كلنا بنخاف من الحكومة .. مش لازم الداخلية بس يعنى.. الداخلية والخارجية واللى فى النص كمان .. كل سنة وانت طيب..

غير معرف يقول...

السلام عليكم ورحمة الله وبركاته
الاخ العزيز اشرف
بعد التحية اللى فاتت قبل اسمك
انت عامل ايه
هو ده اللى انا كنت منتظره منك يعنى اشوف ليه صاحب جميل رقيق بدم خفيف زيك يكون فى يوم من الايام شاعر كبير بس ياترى انت شاعر بايه شاعر ان كلامك فى القصيدة دى حقيقى ولا انت بتفترى على الحكومة بتاعتنا ولا انت اكيد بتتكلم على حكومة تانية طبعا لاننا عايشين فى ظل قانون جميل ولذيذ اسمه الوطن والشعب فى خدمة الشرطة عايز اجمل من كدة شعار وقانون طبعا لازم نخدمهم امال مش هما اللى بيحموا الوطن كل يوم من اعداء الديموقراطيه والاصلاح
وكل يوم يوم يروح واحد منهم فداء للبلد من اثار التعذيب اللى بيلاقيه على ايد الشهب المتوحش فى السجون وكل يوم يقفوا فى عز البرد فى الطرقات والاكمنة علشان يامنوا البلد من الحراميه والنصابين وبيخلوا المرور سهل وسلس جدا ولو فكرت فى يوم تكون انسان غير حضاري وتدفع جنيه علشان الباشا يسيبك تعدى يمسكوك ويفضحوا الدنيا ويعملولك قضيه اغتصاب للحريات والنزاهة
طبعا لان اللى يعمل كدة يكون انسان غبي جنيه ايه ياعم انت ماتعرفش ان الجنيه غرق بعد ماعوموه واصبح مالوش اى لازمة يعنى انت بتهين الباشا لما تفكر تديله الجنيه ده الباشا مايخدش اقل من عشرة جنيه وساعتها هتكون انت اللى باشا شوف ازاى الناس دى بتتعب وبعدينبرده انت اكيد بتتكلم عن حكومة تانيه غير ادمية اللى تتعامل مع ناسها يالشكل ده وطبعا مش حكومتنا لان انت لو فكرت تروح اى مصلحة حكومية علشان تخلص ورق مش محتاج ان انت تقف ولا دقيقة تخليص الورق عندنا دليفري ( توصيل للمنازل ) وعلى فكرة مافيش اى نوع من السرقات فى بلدنا ايوة ولا فى المدارى ولا فى الظاهر يعنى مافيش ملايين بره البلد ولا حاجة دى كلها اشاعات وحتى جوة البلد مافيش سرقة برده بس انا كنت عايز اسال على حاجة يا استاذ اشرف بما انك راجل سياسي اوى انا جالى فاتورة الكهربا بتاعة الشقة ولقيت فيها خانات كتيرة اوى وكل خانة مكتوب فيها فلوس طبعا الفلوس دى عليا من الخانات دى تاجير العداد مع انى شاريه اصلا مش مشكله وخانه تانية فيها صيانة العداد مع انه والله ماتصلحش ولا مرة يمكن مايعرفوش مكانه وخانه تالته فيها نظافة مع ان البلد بتاعتنا مافيهاش زباله خالص كل ده مش مشكله المهم بعد مارصوا كتير من الخانات مالقوش كتبوا خانة اخيرة فيها فلوس برده عليا الخانة دى اسمهم ( اخرى ) ماتعرفش بالله عليك الست اخرى دى تطلع ايه ممكن تعرف من اصحابك بتوع الحكومة النزيهة جدا وترد عليا اصل انا مش عايز ادفع الفاتورة دى خايف اعطى الحكومة فلوس مش بتاعتها وبعدين الحكومة تشيل ذنب وده مايرضيناش عموما انا كمان بحب الحكومة
احياناً بسسسسسسسسسسسس

أخف دم يقول...

محمد باشا شاكر
يا عم امضى يا عم وانت كنت خايف م الحكومة فاللى بيكلمك واحد مرعوب اساسا بس احنا أقل من ان حد يفكر فينا من الآخر..والله مقالك بيتهيألى دمه خفيف عن القصيدة _ده تواضع طبعا_ ..وفعلا يا محمد أنا اقصد حكومة تانية خالص ومش عارف ايه اللى وصللك الإحساس ده فى القصيدة.. هل لأنها مكتوبة بالعربى ..دا انا اترجمها يا أخى والله ..أما بالنسبة لحكاية الفاتورة فنصيحة يا محمد الحق ادفعها لأنها لسة مفرد..(أخرى).. أصلى سمعت إن فيه خانة جديدة اسمها (أخريات) عشان تلم بقى..مش كل شوية يكتبوا خانة .. هيجيبوا مكان فى الورقة منين؟ الخانة الجديدة بقى هيتحط فيها كل حاجة .. ويجعله عامر.. ادفع يا محمد ..الفاتورة فيها سم قاتل..

tota يقول...

العزيز اشرف
نعم نخاف ومن اشياء كثيرة لكن ان نخاف الى مرحلة لا يمكن الرجوع منها فهذا يعنى ان الخوف تحول الى مرض

اخاف عندما يوقفنى ظابط المرور عندما اكون مخطئة ولا احمل رخصة او غير متبعة للقواعد لكن لا اخاف اذا كنت لم اخطئ
لا يجب ان اخاف وانا غير مخطئة لان قبل عدالة الارض هناك عدالة السماء لمن يتق الله فى افعاله يجعل الله له دائما مخرجا
لا انت ولا اولادك فى المستقبل يجب ان يتجرعوا الخوف
لعنة الله عليهم وعلى ما بثوه فينا وجعلونا خائفين حتى ان ندافع عن حقوقنا
اجزم ان كلماتك حنق غاضب ولا اصدق انك خائف لانك لو خائف ما كنت كتبت هذا البوست متمردا على الحالة التى نحن عليها

تحياتى

أنـــا حـــــــــرة يقول...

اشرف

ايه ده
ايه ده بجد
مش معقول
القصيدة وجعتلى بطنى و خليتنى عايزة اعيط
الحال بجد يحزن
كلامك بيجرح اوى رغم سخريته اللاذعة
من اشد التعبيرات اللى صدمتنى

واخاف لو مشاكلى هتقلق فََضَاهم


ياه

اسمحلى ابعت لينك القصيدة لاصحابى لانك بجد لازم يتقريلك
جميلة اوى يا اشرف

اد ايه يؤلم انك تقول على حاجه بتقطعك حلوة
استمر
علشان نفوق و ننور الأمل

أنـــا حـــــــــرة يقول...

نسيت اقولك الصورة حلوة جدا

Utopian يقول...

يابن اللذينا :)
هي بتحرق اوي.. بس قنبله
أنا حره لسه بعتالي اللينك بتاعك...شكرا يا ياسمين بجد

ابقي نورني

dalia يقول...

غالبا ما اتابع المدونات عن طريق مدونات صديقه ومن مدونه لمدونه لاقتنى هنا
وبالتاكيد مش ينفع امرمن هنا دون ابداء اعجابى الشديد بالموضوع والكلمات والاسلوب

اكثر من رائع

Amr Ahmed يقول...

ايه القلق ده

جميلة جد ا جدا

انا سعيد بالتعرف الي مدونتك

تحياتي

medhat elmorcy يقول...

ايه ياعم اناركبي بتخبط علي الجران
بس امايرجعواهقوللهم اني لقيت لهم رفيق كفاح.علي فكره الحكومةبتعتنا كول اوى ونيس والحياة حلوةوجميلةوزى الفل
بيس يامان

whyme يقول...

اشرف انت فعلاً حقيقى ازهلتنى و ضحكتنى جداً جداَ
الشعر تحفه و روحه جميله جداً و توصف فعلاً حياتنا الى عايشينها حياة الخوف
و مش هقدر اطلعلك حته فى الشعر عجبتنى لانه الحقيقه كله عجبنى جداً
تحياتى يا اخف دم

whyme يقول...

اشرف انت فعلاً حقيقى ازهلتنى و ضحكتنى جداً جداَ
الشعر تحفه و روحه جميله جداً و توصف فعلاً حياتنا الى عايشينها حياة الخوف
و مش هقدر اطلعلك حته فى الشعر عجبتنى لانه الحقيقه كله عجبنى جداً
تحياتى يا اخف دم

Malk Almasria يقول...

بادىء ذى بدىء
اشكرك على زيارتك مدونتى وعندى رأى على قدى اظن ان الخوف احنا اللى بنزرعه جوانا يعنى هو مجرد نبتة موجودة جوا كل انسان لارواها وكبرت لا سابها وماتت دا رأيى
وعلى العموم مرسى للمرة الثانية


ملك المصرية

ادم المصري يقول...

اشرف توفيق

اقولك شعر


بخاف م الحكومة

شاعر جامعة المنصورة

ياسلام تاتاتاتا


معرفش انت تعرفني ولا لا

بس انا قابلتك في لقاءات كتير في الجامعة
واخر لقاء بيني وبينك كان في حفلة هيثم لما كان معاك البدري


انا طبعا مش هقول حاجة علي قصيدتك اللي اكتر من رائعة لاني سمعتها واتوهمت بيها في لقاء الادباء التاني بالمنصورة طبعا




انا سعيد جدا ان المدونين زادوا واحد محترم زيك

karakib يقول...

أيه الجامد أوي ده !!!
حلوه بزياده
ده أسمه صوت جارح صارخ عميق
استاذ أنت

smraa alnil يقول...

بص اقسم بالله العظيم ملاقية كلام اقوله علي القصيدة دي
بس اسمحلي اقولك
يابن اللذينا
هجيلك تاني
اوعي تشيلها ها

esraa يقول...

أشرف القصيده بجد أكتر من رائعه والصوره كمان تحفه.
انت فنان بجد وكنت اتمني لو كنت شوفت مدونتك قبل كده بس مش مشكله ادينا فيها.
ربنا معاك ويوفقك وتكمل.
سلام

nour يقول...

حلوة اوى يا عم..
الحقيقة انا كنت داخلة و بقول اديك كلمتين تريقه زى ما انت عملت عندى..بس القصيدة انقذتك منى :))
انا مستنيالك على غلطة علشان اتريق انا كمان..اشمعنى انت يا عم

أخف دم يقول...

والله يا جماعة مش عارف اقول إيه على كلامكم ده؟ ممكن تستنوا خمس دقايق أروح أعيط من كلامكم وارجع أرد عليكم؟

أخف دم يقول...

توتة
فيه فرق كبير بين اللى المفروض يكون واللى موجود فينا أساسا فى الواقع.أنا عارف ان المفروض الواحد ما يخافش والكلام الكبير ده بس شوفى كل واحد ماشى فى الشارع دلوقتى لما يلقى ظابط مرور حتى ..انتى ماشفتيش بيعملوا إيه فى الناس فى أقسام الشرطة؟بيقلعوهم الساعة ورا الجبل..على رأى اللمبى.

أخف دم يقول...

أنا حرة
متشكر يا جميل على الزيارة ويا ريت ما تبقاش الأخيرة..بس قوليلى :هيه القصيدة وجعت بطنك ليه؟ مع إنى مقلل الصلصة!!

أخف دم يقول...

utopian
إيه حكايتكم بالظبط؟ انا حرة قالتلى القصيدة وجعت لها بطنها وانت بتقول القصيدة بتحرق قوى..هيه الاكلة مش عاجبة حد وللا إيه يا عم؟
متشكر على الزيارة واوعى تقطعها.

أخف دم يقول...

dalia
يا ستى عقبال كل مرة وانتى تايهة بين المدونات ..مدونة تجيبك ومدونة تحطك ..تيجى على هنا..اوعى تقطعى الزيارة.

أخف دم يقول...

amr ahmed
ربنا ما يحرمنى من دخلتك عليا يا سى عمرو.

أخف دم يقول...

whyme
مشرفنى وهتشرفنى ان شاء الله علطول يا رافع معنوياتى.

أخف دم يقول...

ملك المصرية .. يا ما نفسى تروحى قسم شرطة وانتى بتتضربى يعنى تقفى وتقوليلهم(الخوف بذرة جوانا لازم ما نكبرهاش)..قولى الكلام ده وعلى فكرة ربنا هيكرمك قوى ساعتها هناك.

أخف دم يقول...

آدم المصرى
طبعا فاكرك يا جميل وربنا يقدرنى وابقى عند حسن ظنك يا ريس.
وقوللى القصايد اللى انت عايزها وانا اكتبهالك فى البلوج من عنيه ودايما عايزك معاى برأيك يا آدم باشا.

أخف دم يقول...

كراكيب
كركبت بطنى وعقلى وروحى بتعليقك ومدحك الجميل..كفاية كركبة بقى.

أخف دم يقول...

سمراء النيل
بدل ماتحلفى بالطلاق انك مش لاقيه كلام تقوليه.. قوليلى القصيده حلوة وخلاص يا ستى .. وعلى فكره أنا اسمحلك تقوليلى يا بن اللذينا ماشى..
نورتينى

أخف دم يقول...

إسراء
انتى عرفتى مكان المدونة أهوه .ملكيش حجة .. هادخل كل يوم أدور على اسمك فى التعليقات .. هاعمللك حضور وانصراف.
واطمنى القصيدة هتفضل ان شاء الله فى البلوج ما لم يكن لأمن الدولة رأى آخر!!
مش بقوللك باخاف م الحكومة.!!!

أخف دم يقول...

نور
لو كنت كل ما هاتريق عليكى هتزورينى .. يبقى حسبى على نفسك منى .. كل سنة وانتى طيبة واوعى تقطعى الزيارة .

Shiko يقول...

الكلام الصادق بيوصل للقلب من غير ما يدق البيبان
وانت كلامك حقيقى بيدل على انك شجاع مش جبان
قصيدتك شدتنى اقراها للنهايه ولو سمحت لى احفظها عندى كمان

تحياتى

lost in the web يقول...

لا لا لا يا عم أشرف انت جاى تثير الشغب بين الشعب و تقومه على الحكومة
بس لعلمك بقى شعبنا شاطر و بيسمع الكلام و عارف كلمةماما "الحكومة" مابتتكررش عشان كدا بيقصر الشر و هايفضل حبيب ماما زى ماهو شاطر و مطيييع

غير معرف يقول...

مش عيب تخاف ياأشرف؟ده انت راجل واصل وكلنا عارفين انك من اللي بيتخاف منهم مش اللي يخافوا..بس عموما مين اللي مابيخافش من الحكومه..ده الواحد بيحلق دقنه دوجلاس علشان يبقى زنديق احسن ما يلبس تهمة انه شيخ..مافيش بعد كده بيتهيألي..عموما تمام ياريس وربنا ييسر ونشوف ديوان الفصحى بقى

أخف دم يقول...

شيكو
يا عم اتفضل احفظ القصيدة واللى كاتبها كمان.
سعيد انى إحساسى وصلك.
ـــــــــــــــــ
lost in the web
هوه حد قال غير كده؟ بالعكس أنا سعيد ان فيه رفقاء فى الكفاح بيخافوا زيى .. دى نعمة يا جميل..
ـــــــــــــــــ
أحمد عبد القادر
هوه اللى بيحلق دقنه دوجلاس مبيتقبضش عليه؟
مش تقول الكلام ده من زمان يا واطى.
ربنا يسهل فى ديوان الفصحى.

zordeak يقول...

يا بنى انت رهييب


ايه ده


انت كنت مستخبى فيين


بص انا هبيت عندك فى المدونة خلاص



احجزلى اوضة بمنافعها بقى


فظييييييييييييع

غير معرف يقول...

سين حلم لا ينتهي
على فكرة يا اشرف انا حاسس انك بتسأل مين انا لكن معلش مضطر اتكلم بالرمز اللى محدش في امركا الجنوبية عارفة بس بقيت العالم عارفينه
المهم الحكومة قابلتها امارح وقليتلى إدرب على الورد في البلوج بتاع أشرف وحاول تصالح ما بينا

أخف دم يقول...

أحمد باشا فؤاد
أنا موجود هنا علطول يا جميل
يا رب تنورنى علطول والبلوج كله تحت امرك مش أوضه بس
ـــــــــ
محمد البدرى
لو الحكومة أمرت يا عم انك تتدرب هنا مفيش مشاكل .. بس قوللى يا محمد الحكومة مجبتش سيرة حاجة تانية؟

احمد يقول...

ايه يابنى الحلاوه دى ده ابداع
عمك احمد السعودى

manal يقول...

هاي يا اشرف القصيده جامده موووووووووووووت بس بجد حرام عليك انا اترعبت موت علي ولادي الي لسه في خيالي لدرجة اني بفكر اسيبهم هناك ولو ما اتعدلش احال ابقي اسافر هم انا باي يا اجمل اشرف في الدنيا كها

غير معرف يقول...

فعلا القصيده حلوه اوي بس ياريت مش يكون ده رد فعلنا ياريت نبقي ايجابين اكتر ربنايوفقك sara

شموسة يقول...

تصفيق حااااااااااااد ومصحوب بإعجاب كبيرر جدااااااااا .......
وياريت بقي يا أشرف تذورنى عشان كل مرة بسوي فيها كيك مش بلاقي سكر

mostafarayan يقول...

القصيدة حلوة قوي

انسانةعادية فى عالم مش عادى يقول...

كلام حضرتك متفاؤل جدا ليه كده
ههههههههههههه
بس بجد كلام حقيقى وواقعى القصيدة
كل الناس بتخاف من الحكومة
ممتازة جدا ومن الواضح ان حضرتك فعلا دمك خفيف جدااااااااااا

zizo4633 يقول...

شاعر عامى جميل
ولذيذ
تقبل مشاركتى
بس عايز اقولك مش انت لوحدك
اخف دم

البية نظفظف شي كيوة ومفيش فى مصر واحد زيه
قال البيان يا ماش الله عليه سابق يا ناس عصره وخية
البية نظفظف يا مطافى قال البيان حلو وشافي
شغل شباب مصر بحالها ومفيش عوا طلى إلا الفافى
والبيه نظفظف يا عزيزي جايب فرص اكتر إيزى
هنجيب منين ناس تشغلها غير هندي أحمر وماليزي
والبية نظفظف نضفهاا والكفة بالخير لحروفها
لابسة طاقية للإخفى وعنينا مش قادرة تشوفها
والبية نظفظف للقفية خلى الجنية المصرى بعافية
عمال بياخد على وشة يعنى اقتصادنا بلا قافية
شعر:زكى خلفة

mohamed foad يقول...

ازيك يا أشرف
اخبارك اية يا مان
جايز انت متفتكرنيش اوي بس احنا كنا معرفة جامدة ايام الجامعةفي المنصورة
انا محمد فؤاد (كلية حاسبات ومعلومات)
بصراحة انا كنت متابع المدونة من فترة وطبعا كنت معجب اوي بشعرك بس مكنتش عارف انت مين لغاية ما شفت حفل توقيع مدونات مصرية للجيب وافتكرتك عالطول
ربنا يوفقك يا جميل ومن نجاح لنجاح ان شاء الله
وياريت اقابلك قريب ولا انت خلاص بقيت مش فاضي
اسيبك بقي لمعجبينك

العيسوى الصغير يقول...

انا شايف ان الثورة لحد دلوقت لم تثمر ولن تثمر الا بعد هذه الفترة او بمعنى تانى لو يحكمها سياسى او مدنى لان الاربع رؤساء امتداد واحد من اول محمد نجيب الى مبارك خطة واحدة او خط واحد يتم السير عليه



طبعا تقصد حكومة تانية انا عارف انك تقصد حكومة الهنتان الدولة اللى هى تانى يمين البحر البغر


كافية كده

طبعا قصيدة جميلة

shemoo يقول...

انت بجد يا عم اشرف كلامك على اد ماهو بيسعدنا
وبيضحكنا على اد ماهو بيبكينا وبيوجعنا وبيفكرنا بحالنا اللى احنا اصلا مش قادرين ننساه
بس جااااااااااااااااامد جداااااااااااا

نـــافــــش و مـنـفــــــــوش يقول...

استاذ اشرف
بجد بحيك علي الكلام الجميل ده
ويا رب ديماللأمام و بالتوفق
وربنا يجعل كلامنا خفيف عليهم
أخوك ( محتاس أفندي )
مدون مبتديء
(نـــافــــش و مـنـفــــــــوش )
ويشرفني اني اتواصل معاكم
ولو إني خيخه حبتين في تكنولوجيا المدونات

محـتــــاس أفـنــــــدي يقول...

مش عارف إذا كان ده يصح واللي لاء
بس الظاهر دي حمي التدوين
أو ممكن تقول إني جاتلي فوبيا وانا قاعد في المدونه لوحدي فقلت أتجراء وأنشر حاجه ليا عندك عملا بالمثل اللي بيقول
الرزق يحب الخفيه وانت واضح كده انها ماشيه معاك
ده مش(قر)ولا(حسد)طبعا ,ده(نـق) بس!
فبعد إذنك و لو مسحتها بجد مش هتضايق لانه حقك

إنــت
( نـــافــــش و اللي مـنـفــــــــوش )؟
إوعي تكون محتاس زيـي !؟


تبيع القضيه اللي كانت محوريه
عشان الوليه وعشان العيال
يا عالم قولوله إن ده مش تمام
***
يا عم إنته مالك
وخليك في حالك
وشوف حته ناشفه وناضل هناك
***
هناضل واقاتل لحد النهايه
ولا يوم هبطل وابيع الحكايه
مش احسن ما اطنش واكبر وابيع
***
يا عم انته ساذج ؟؟؟
ما بيبيعوا فيها
وخلم عاليها
كما كان واطيها
عملت إنته ايه ؟
***
أنا قلت لاء وصرخت وناديت
فـقلب الشوارع ندهت وجريت
فـقلب القهاوي شرحت وحكيت
وحتي النواصي ومخلتش بيت
***
بجد انته ساذج
هتنده وتصرخ وتزعق لمين
دي عالم غلابه وناس محتاسين
ده بيبيعوا كليه وبيبيعوا عين
بتزعق في عالم ماتوا من سنين
***
ولو
راح انده وازعق لاخر نفس
واشاور لو الصوت جوه مني احتبس
ولو كبلوني وخدوني العسس
ولو لفقولي التهم والقصص
***
كلامك كلام السواذج

اخوك وابن خالك وعمك امام
واحد راح في حادثه وده غرق في السلام
وعمك قالولوا هتكشف اوام
خدوا منه كليه و رموه والسلام
***
ده أدعي اني اصرخ واقول الحقونا
يا عالم يا هوووه يا ريت تنجدونا
ما جايز بصوت جنب صوت ينفعونا
***
بجد انته واهم
***
لاء
ده إنته اللي نايم

!!!؟؟؟
الخاتمه
لقد إتفقنا علي أن لا نتفق
!!!؟؟؟
يا رب
أنا قلت رائـي وعليك إتكالي
يا شايف وسامع وعالم بحالي
بخاف لما انام أصحي ما اشوف عيالي
هفوتكم بعافيه وعليه العوض

سبهللة يقول...

وانا كمان بخاف
تسلم ايدك

toti mosh momken يقول...

جميلة جدا ياعم الخواف

اصلك مش لوحدك بتخاف مانا بخاف وابويا بيخاف حتى الاشكيف بيخاف
هو مين ما بيخاف

محمد عبد القوى يقول...

فكرتنى بقصيدة ممنوعات لعمنا الفاجومي احمد فؤاد نجم

غير معرف يقول...

كلمات رائعة ومؤثرة وجهد رائع مبذول يعبر عن وجهة نظر صاحبة
استمر و بالتوفيق
http://www.almanarheg.com

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡