اخبار

الأحد، 21 يناير، 2007

أنا دخلت بيت دكتور جامعة يا جدعان


طبعا مش مصدقين..طب والله حصل..يعنى انت رحت زرت دكتور جامعة؟ آه وربنا حصل.. وف بيته كمان؟ طب عليا الطلاق حصل يا جدعان.. دكتور جامعة من اللى كانوا عندنا فى الكلية دول؟ من اللى هما بيقعدوا المحاضرة ربع ساعة ومفيش حاجة ملغية؟ آه..اللى هما بينزلوا (شيتات) عشان نشترى الكتاب وبيلبسوا بدل وجرافتات وحاجات من دى؟ يا جماعة والله حصل
هوه انا كمان مكنتش مصدق..وكانت الصدمة شديدة عليا بصراحة لما الواد صاحبى ابن الدكتور قال لى انه عازمنا عنده على الغدا..إيه ده وكمان أكلت ف بيت الدكتور؟ انت هتفشر بقى؟ يا جدعان والله حصل..استنوا بس..أنا بصراحة حاولت كام مرة اقنع صاحبى بلاش المغامرة دى..وقلتله نعملها عندى وخلاص بس على حسابه المهم نبعد عن منطقة مثلث برمودا دى اللى هيه بيتهم..الواد مارضيش .. طبعا ما هو ابن دكتور بقى.. متعود على ابوه م الآخر مش حاسس بالمعاناة اللى هنحس بيها احنا ولاد الـ ... شعب
وفى اليوم الموعود.. قمت م النوم..صليت الحمد لله وقريت قرآن ودعاء النجاه من المهالك وكلمت كام واحد صاحبى عزيز عليا واطمنت على البيت وسمعتهم صوتى كأنى مسافر الأردن ..ورحت العزومة
ودخلت بيت الدكتور...موسيقى تصويرية..( أن أن آآآن )..وسبحان الله خير اللهم اجعله خير لقيته بيت زى بيوتنا يعنى..انت هتستعبط يعنى بيت دكتور الجامعة هيبقى زى بيوتنا وللا ايه؟ آه وربنا عادى ..سفرة وأنتريه..وحمام ..وصورة الدكتور منورة البيت _يا جماعة بس برضه باين ان ده بيت دكتور_ زى الصور اللى ف بيتنا برضه
أقول لكم حاجة غريبة بقى..الواد صاحبى عرفنا على أخوه كمان..لااااااا.. دا انت بتفشر بقى.. انت عايز تتعرف وتكلم ابن دكتور عادى كده؟ يا جماعة ما هو لو بإيدى مكنتش هاقدر أتجرأ واعملها بس هوه اللى عرفنى على أخوه وانا خفت بصراحة أرفض التعارف أشيل مادتين وللا حاجة_مع إنى مخلص من كام سنة اساسا والدكتور ده مكنش عليا كمان_جبن م الآخر
وأقول لكم حاجة كمان .. احنا أكلنا سمك هناك.. أنا كنت فاكر زيكم ان هيبقى فيه اصناف أكل غير اللى احنا بناكلها يعنى كبشر ..بس اكتشفت ان انا كنت غلطان وان الدكاترة بتوع الجامعة وولادهم بياكلوا زينا عادى يعنى..وبصراحة كنت كل ما افتكر (شيت) من اللى انا اشتريته من دكاترة الجامعة أيام زمان كنت باكل سمكة زيادة .. لغاية ما خدت تمن كل الشيتات اللى دفعتها فى حياتى و حياة ولادى كمان ان شاء الله ...أكلنا الحلو ع السريع ..ومشينا م البيت جرى
طبعا هتسألونى ومشيت جرى ليه ما دام اليوم عدى على خير. أصلى بصراحة كنت خايف بعد ما خلصنا الأكل والشرب ..ييجى الدكتور يشوف اللى احنا عملناه يقول لنا: الأكل اللى انتوا كلتوه ياد انت وهوه مقرَّر عليكم من الجلدة للجلدة

هناك 32 تعليقًا:

Memo يقول...

انا اول واحده يا عينيييييييييييي
عسل يا اخواتي عسل

الكلام نوعان :كلام فارغ وكلام مليان كلام فارغ يقول...

ياخساره كان نفسي ابقى اول واحده بس معلش دايما ميمو سابقانى ولو حد غير ميمو كان هايعرف شغله
كويس انك مشيت بسرعه مش علشان كان هايمتحنك في السمك لا ده ممكن من الافترا كان يقولك السمك اللى انت اكلتوا كان فيه كام عضمه؟
ويجعله عامر

lost in the web يقول...

يااااااااااه ده انت مستجد بقى
ايه رأيك بقى أنا كمان دخلت بيت دكتورة والدة واحدة صاحبتنا
و ايه رأيك كمان انها كانت درستلنا مرة كمان
شفت بقى الموضوع قديم ازاى، كنت تسأل قبل ماتروح كنت طمنتك بدل تعب الاعصاب ده يا راجل

غير معرف يقول...

دايما كده الناس اللي من عامة الشعب يحاولوا يفتعلوا الأفاعيل .. ويتقولوا الأقاويل .. ويخترعوا أكاذيب ليس لها أساس من الصحة ( بالذمة مش شكلي ابن دكتور بجد ) إيه الكلام الجامد اللي انا بقوله ده
المهم انا بس حبيت اقول لكوا يا جماعة ان ابن الدكتور ده بني ادم عادي جدا (اه والله) تخيلوا انه بيمشي على الأرض زي باقي الناس كده وبياكل زي الناس بالظبط ... وبيتكلم كده عادي كلام شبه الكلام بتاع البني ادمين ده ونفس الحروف (بجد والله)

:التوقيع
ابن الدكتور
( صورة واحد مطلع لسانه )

Human يقول...

هههههههههههههه
انا كمان رحت مع
lost in the web
فاكرة يابنتى؟
وكلنا وشربنا وصلينا والحمد لله
وركبنا العربية كمان
بنى آدمين زيينا والله
سبحان الله

ادم المصري يقول...

اشرف بيه توفيق

انت روحت النار برجليك ولا ايه .. بس طلعت النار مش نار يا سيدي .. ولا بتلسع ولا حاجة


ههههههههههههههههه

وطلع الدكتور دا صيني
ههههههههههههه


اظاهر ان الواد خمك .. واخا ابوك كمان .. وطلع ابوه مش دكتور ولا حاجة ههههههههههههههه

انا حاسس والله اعلم كدا .. ان انت انضحك عليك وكنت في بيت ابراهيم نصر

بذمتك ما قفشتش الواد كدا وقلت له اطلع من دول يا ابراهيم يا نصر
ههههههههه


اظاهر انا هصدق ولا ايه
يلا .. هنيالك السمك يا باشا

تحياتي

shaimaa يقول...

الا كفلا الشر انت خريج كلية ايه اللى بيخوفكم من الدكاترة

؟؟

احنا كليتنا كنا بناكلهم
حرية الرأى حتى لو هتسقط

ايه يعنى
وادينا اتخرجنا وبقينا فل الفل

مصطفيتش ابن حفصوتشا يقول...

انا عايز دليل
يعنى مثلا رباط جذمة من جذم الدكتور
زرار قميص
وعلى فكرة
هيبان لو جبت رباط ولا زرار بتاع حد تانى
دول دكاترة يابنى
مش اى حد

أنـــا حـــــــــرة يقول...

على فكرة انا صاحبتى باباها دكتور جامعه و مستواهم المادى كويس بس بيتهم عادى يعنى مش شرط دكاترة الجامعه بيغرفوا فلوس

moorgen يقول...

:)
كل دا حلفان
ايه يعنى، بس بيقولوا السمك فى الحلم رزق

بس السمك كان مقلى ولا مشوى
:))انا مرة ادخل عندك

غير معرف يقول...

يوم الجمعة الساعة تنين بالليل كلكو هتأدموا امتحان فجائي في المقرر بتاع أشرف توفيق دا وإلا هديلكو بالبنبنايا على أفاكو يا ولاد الـ.... شعب

دكتور الجامعة

tota يقول...

اخف دم
والله اتخضيت قلت دخل بيت حد فظيع
امال لو دخلت بيت الريس ولا حد من الحاشية هتعمل ايه
دكتور الجامعة هالة كبيرة بحكم احساسنا اننا تحت سيطرته لكن فى الاول والاخر انسان عادى وبسيط وعنده نفس مشاكلنا ويمكن اكتر لانه مطالب بمستوى اجتماعى معين

امانة لما تدخل بيت الريس تبقى تبلغنا ده اذا خرجت
تحياتى

غير معرف يقول...

أكيد السمك كان مختلف يا أشرف.

أخف دم يقول...

ميمو
مش عارف مين اللى عسل؟ أنا واللا انتى عشان انتى أول واحدة تعلقى؟حددى ياستى..بس أكيد أنااللى عسل.ومن هذا المنطلق بقوللك:ما انا عارف.
ـــــــــــــــــ
الكلام نوعان
ماتستبعيش ان ده يحصل.. أنا كنت خايف من المعالق أساسا..كنت حاسس انها ملغية فمستعملتهاش.
ـــــــــــــــــــ
lost in the web
على العموم دى أول وآخر مرة أدخل هناك..مش علشان بيت دكتور ..لأ..بس علشان أكييد الواد صاحبى مش هيعزمنا تانى أساسا.
ــــــــــــــــــ
مصطفى ابن الدكتور
مصيتك أهوه يا عم..
افتكر الجمايل دى..وسلملى على باباك بس من بعيد
ـــــــــــــــــ
يا ياسمين
ممكن توصفلنا شعورك وانتى راكبة عربية مع دكتورة؟
ـــــــــــــــــ
آدم بيه المصرى
منورنى وربنا
إبراهيم نصر مين يا عم؟ هوه إبراهيم نصر ممكن يدخل بيت دكتور؟ ده كان ممكن يديله فصل سنتين.
ــــــــــــــــ
شيماء
سيبك من الكلام الكبير ده وحرية الرأى ولقد ولدتنا أمهاتنا والكلام ده كله..
يعنى كنتى تقدرى تقولى لدكتور انا مش فاهمة حاجة عيدها..وللا انا مش متفقة معاك فى الجزء ده.
خليها على الله .. الحمد لله اننا عدينا.
ــــــــــــــــ
يا مصطفى
والله ضحكت بجد لما قريت تعليقك..
بس يعنى الواحد اللى يخاف يدخل بيت الدكتور يبقى تخيل ممكن يجيبلك رباط جزمته ياناصح؟مستحيل طبعا.
ــــــــــــــ
ياسمين أنا حرة
المسألة مش فى المادة كلنا حلوين الحمد لله
المسألة فى إن ........مش عارف أقول إيه .. يا جماعة ده دكتور جامعة..
ـــــــــــــــ
مورجين
من كتر الخضة مكنتش عارف السمك مقلى وللا مشوى .. أهم حاجة ننجز ونمشى..
منورانى دايما
ـــــــــــــــ
توتا
وهوه اللى يدخل بيت الريس هيطلع عشان يقوللك أكل ايه وعمل إيه؟ يا ست الكل بيت الريس مجموعة معتبرة من العصيان .. واللى بيدخل بيقلعوه الساعة ورا الجبل..

إنـســانة يقول...

والله شعور غريب بس مش هى اللى وصلتنا طبعا ده كان السواق ومكنتش عربيتهم اساسا كانت عربية واحدة قريبتهم

بس كان المفروض بعد ما تخلصوا الاكل يقولكوا السمك اللى كلتوه ده مقرر عليكوا من الراس للديل
ودمتم

LAMIA MAHMOUD يقول...

يا عم دكاترة جامعة اية بس ده في واحد منهم فاتح مكتبة على اول الشارع عندنا وكل ما اخش اشتري من عنده قلم ولا حاجة يتحايل عليا عشان يديني درس

Utopian يقول...

اشرف

انت علي طول مهيس كده ياد انت ياد
:D

يلا يا عم...اكله تفوت ولا حد يموت

raspoutine يقول...

اخف دم
شكرا لزيارتك ليا
وكان عندى سوأل صغير
انت لما دخلت بيت الطتور اياه
دخلت برجلك اليمين ولا الشمال ؟؟؟؟؟؟

tamer يقول...

ههههههههههه


بالهنى والشفى


تحياتى

aboud يقول...

بجد أنت أخف دم قريت ليه..ضحك متواصل ربنا يوفقك

hend يقول...

حلو اوى الى انت كتبه خفت دم تحفه
وبعدين ليه الخوف ده ايه يعنى الى هيحصل لو الدكتور ظبطك فى بيتهم كبيرة يبصلك من فوق لتحت ويمشى

واحـــد مـــــن الـنـــاس يقول...

يابني مكنت تقولي
وانا اعزمك عندنا في البيت
منا ابويا دكتور جامعة
وكل العيال بيتصاحبو عليا عشان يحاولو يلمسوه

تصدق
انا حاسس ان ابويا بقى وزير ولا حاجة

غير معرف يقول...

سين حلم لا ينتهي
على فكرة انا عارف الدكتور دة وعارف ابنه مصطفي كمان اهم حاجةالسفن بكسر السين متكنشى ساقعةوانت معاك حق ف خوفك انا كنت آداب عربي لقيت دكتور ف حقوق مشيلني القانون المدني
برغم ان سكشن المحاسبة لسة خارج منه ف معمل الكيميافكان لازم اشيل تشريح عشان مذاكرتشوربنا يستر ونتخرج من خدمة اجتماعية

zordeak يقول...

بقى كل ده حصلك


هههههههههه

انت من الاحرار يا أشرف


يخرب بيت خفة دمك


هههههههههههه

koukawy يقول...

هو الظاهر الولد صحبك بيشتغلك و ده مش ابوه و لا حاجه و تلاقيه ابن دكتور السنان مش دكتور الجامعه عندوكوا
lol
el mohem en el akl 3agabak belhana we el shefa..

الأباصيرى يقول...

بقى كلت السمك كلة وكمان أخدت الحلو عند الدكتور ومخفتش ليشيلك السنة

أية الجرأة دى

على رأى عادل أمام -أنا خفت ليشيلوا العدة بصراحة

ehahe يقول...

حلوه موووووووووووت
انا كمان ساعات بشوف الدكاتره من على بعد متر واحد
امال يا ابنى ما انا وصله

أخف دم يقول...

لميا
الدكتور الى عندك ده أكيد مش دكتور جامعة .. ده زمانه بواب متنكر.. احنا عندنا اللى بيكلم الدكتور بيطلع الأول ع الدفعة.
ــــــــــ
يوتوبيان
يا عم هوه التهييس عيب .. حد لاقى ؟
ـــــــــــ
أيمن باشا فاروق
يا عم هوه وانا داخل كنت واعى أنا داخل بأى رجل؟ كويس انى دخلت أساسا
ـــــــــــ
تامر
الله يكرمك يا عم .. عقبالك
ـــــــــــ
عبود باشا
وانت مناجمل البلوجات اللى بادخلها يا عبود
ربنا يوفقك ويخليلك فكرك وثقافتك
ــــــــــــ
هند
لو الدكتور شافنى احتمال أموت م الخضة قبل ما يبصلى اساسا
ــــــــــــــ
على
شوف يا عم احنا نقطع علاقتنا من دلوقتى
عشان هنتصاحب هتعزمنى وانا مش مستعد أكرر التجربة تانى.
ـــــــــــ
محمد البدرى
جمع الأول يا بنى انت توهتنى بين الكليات اساسا .. أنا نسيت انت خريج ايه .. شكلك جامعة أمريكية يا خبيث؟
ـــــــــــ
أحمد باشا فؤاد
من أسعد التعليقات تعليقك عشان بتبقى بتضحك ودى أهم حاجة عندى
ــــــــــــ
كوكاوى
سواء دكتور مش دكتور توبة يا ريس
ــــــــــــ
الأباصيرى
انت فاكر لولا انى اتخرجت أساسا كنت ممكن اعملها .. ابدا طبعا ..
ــــــــــــــــ
ehahe
مجرد انك تشوفى الدكاترة دى أول خطوة فى خطوات النجاح

العيسوى الصغير يقول...

سمك العافيةولا سمك الدكتور خروف احسن

غير معرف يقول...

الصراحه دمك مش خفيف

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡