اخبار

الثلاثاء، 2 يناير، 2007

أنا جبت كمبيوتر


السلام عليكم
(أنا جبت كمبيوتر)!!
طبعا جملة غير متوقعة فى بداية الكلام وكتير هيقول ألف مبروك وكتير هيقول واحنا مالنا وكتير هيقول يا عم قول الحمد لله وكتير هيقول يا عم احنا مستنيين قصيدة جديدة على قدك مش تقول لنا على إنجازاتك الرهيبة دى وكتير قوى هيطنش الرسالة دى ويقرا اللى بعدها أو يطنش الرسالة ويتخنق فمايقراش اللى بعدها..
طب ممكن تستنوا لغاية ما اقول ايه قصدى من الجملة دى.وليه حطيتها متصدرة الكلام اللى باكتبه؟
فى البداية يا جماعة أحب اسأل سؤال لولبى .. علل .. يعنى افطن.. ايه الهدف من الحياة؟ وأخصص السؤال كمان: إيه هدفك انت فى الحياة؟
قبل ما حد يجاوب تعالوا نشوف إيه أهداف الحياة والإنجازات اللى كان بيعملها الناس اللى قبلنا.

زمان أيام الصحابة كان الراجل بيرجع لبيته أول سؤال زوجته تسأله عنه كان السؤال عن إنجازاته النهاردة. تخيلوا إيه طبيعة الإنجازات أيامها؟ كانت بتقول له : كم حفظت من كتاب الله وكم سمعت من رسول الله؟ ..يعنى مفيش سؤال عن مصاريف العيد ولا هدوم المدارس ولا اتنين كيلو البصل اللى بقى ثروة قومية ولا اشتراك الوصلة المسروقة!! طبعا كتير هيقول بس دى أيام الصحابة .. دلوقتى الراجل بيرجع لبيته هلكان مش طايق حد ومش طايق حتى يشوف مراته.. تقوم كمان تسأله؟

أجاوب عليه وأقول له: يعنى أيام الصحابة كانت الرجالة بتروح تلعب(ريد ألارت) وتيجى؟ !!! ما هى برضة بتشتغل وكمان الشغل كان أصعب ميت مرة
برضه فيه ناس هتسأل إيه دخل ده فى الكمبيوتر الجديد بتاعك؟ ثوانى بس.
شوفنا عهد الصحابة كانت الإنجازات بتتقاس إزاى. تعالوا النهاردة ونشوف الواحد بيحسبها ازاى.الكبار فى البلد ربنا يجعل كلامنا خفيف عليهم بيحسبوها بالثانية.. كسبوا كام صفقة؟نهبوا كام مليار من قوت الغلابة اللى هما احنا؟ غرقوا كام عبارة وولعوا ف كام قطر.. وقفوا كام مدرسة ؟ هيه دى الإنجازات وللا بلاش...وبما إن الحاجات دى بتحصل كل يوم ..يعنى ما هو كل يوم قطر بيولع وكل يوم عبارة بتغرق وكل يوم مدارس بتتقفل وكل يوم فيه حاجات كتيرة لذيذة زى دى بتحصل..يبقى إذن الرجالة دول بينجزوا بطريقة جامدة جدا..وبسرعة رهيبة.. يعنى احنا لازم نموت بقى على السريع لأن الناس دول وراهم ناس تانية هتموت مش فاضيين يعنى..
طيب الشباب ولادهم بقى إنجازاتهم ايه؟ يعنى الشباب بتاع حادثة المطار اللى فرموا الناس عشان بيتسابقوا على كيس شيبسى والشباب اللى بقوا رؤساء مجلس إدارات وهما دبلوم تجارة معدل والحاجات دى .. طبعا دول بينجزوا جامد جدا.. بينجزوا خالص خالص!!
وطبعا مش هنتكلم عنهم عشان محدش يفتكر إنى باحسد وللا باحقد وللا كارههم وللا مش طايقهم ولا حاجة خالص
وصلنا بقه للمحطة اللى أنا عاوزها . احنا بقه فئة الشباب الغلبان بتاع الشعب. بتاع الفول والطعمية وقطر الصعيد وقطر القليوبية وقطر المنصورة وسلام لكل القطارات والعبارة سالم والعبارة السلام وسلام لكل العبارات والأكل المسرطن ابن الحلال المغذى وكل النعم اللى احنا فيها دى . احنا بقه إنجازاتنا ايه؟ يعنى من الآخر لو حد قابلنى بعد فترة غياب وسألنى عن الأحوال والتغيرات فى حياتى وعن إنجازاتى فى الفترة اللى فاتت أقول له ايه؟
عرفتوا ليه أنا بدأت المقال بجملة أنا جبت كمبيوتر؟
صدقونى يا جماعة أنا مش هاتكلم فى الموضوع ده من باب الشحاتة -أعوذ بالله- وإن كان هذا هو سلوك الشعب باكمله!! بس أنا قصدى الموضوع عموما لكل الشباب.

المشكلة عندنا يا جماعة إننا مش قادرين نفرق بين الغاية والوسيلة أو بمعنى آخر بقت الوسيلة عندنا هيه الغاية _إيه الكلام الكبير ده؟!_ .. بمعنى كان زمان الواحد بيتجوز عشان يستقر ويبدأ يكون حياته بعيد عن الغرائز ويفوق بقه لحياته وكده يعنى .. طب إيه الحال دلوقتى ؟ دلوقتى بقه أقصى أمانى الشاب إنه يتجوز.. يعنى تيجى تسأله انت عملت إيه فى حياتك يا عم؟ يقولك: ياااااااه الحمد لله يا عم دا انا اتجوزت .. حد كان مصدق؟!!
ولو ماتجوزش وسألته يقولك: ربنا يسهل ويقدرنى وأحوش واخطب عشان الواحد حتى يتلمّ يا عم بلاش السرمحة دى.. زى ما يكون الواد يعنى قاعد يرمى الفلوس يمين وشمال وهوه أساسا عامل كارت توصية لبياع الفول اللى جنب بيتهم ومعاه كارت اشتراك شهرى لعبده تلوث بتاع الكبدة رغم ان هوه أساسا اللى بيمسك الكلب عليه وهوه بيدبحه بس هيعمل إيه؟!!!!! هوه عارف ياكل عشان يبعتر فلوسه؟! يعنى الجواز اللى كان وسيلة للراحة والتقدم فى الحياة بقى هوه ده آخر الخط يا رجالة وبعدين هنلف.
وبقى الشاب عمال طالع عينه عشان يحوش بعد التخرج وخريج طب يشتغل مندوب مبيعات وخريج زراعة يقف فى صيدلية وخريج تربية علمية (فيه كلية اسمها كده؟!) بيدى دروس جغرافيا فى البيوت لابتدائى.. وده كله عشان يحقق أمل حياته أو بالأصح يحقق أخر أمل هيعمله فى حياته وهوه انه يتجوز.
وهكذا برضة يا جماعة بالنسبة لى مشكلة الكمبيوتر.. بقت بالنسبة لى غاية جامدة جدا باحارب واجاهد واحوش كام سنة عشان أجيب هذا الجهاز الرهيب الغالى جدا جدا بالنسبة لى اللى أساسا بقى أغلى جهاز منه حوالى 2000 جنيه يعنى تمن جزمة جلد طبيعى ومن غير رباط !!!!!! ما هو طبعا إذا كان أساسا كل ما يملكه_وده كويس قوى بالنسبة للشباب دلوقتى يعنى مفيش حد لاقيه_300 جنيه -قول 400- شهريا شاملين السكن والأكل والشرب والهدوم والدوا و تذاكر المواصلات بس طبعا بيحجز المواصلات رايح بس عشان مش ضامن يرجع ما هى الطيارات بتتحرق والعبارات بتغرق والقطارات بتولع والأتوبيسات بتتقلب والعربيات البنزين غلا فالأجرة غلت كمان.. !! والمفروض انه يحوش منهم عشان يتجوز ويكوّن أسرة .. هوه عارف يكوّن نفسه أساسا؟
يا جماعة أنا باتكلم عن مشكلة عامة مش عنّى يعنى .. عشان بس ما تفتكروش إنى عامل البلوج ده عشان أشحت وأقول أنا إسمى أشرف .. هتساعدنى؟ وكلام الإعلانات الجامد ده.
يعنى لما يبقى الشاب متخرج من كااااام سنة من أى كلية ويوم ما يلقى شغل يبقى بتمن مواصلاته للشغل والاسم بيشتغل .. يبقى فعلا المفروض ما ننتظرش منه إن طموحاته تبقى أكبر من الواقع ده.. وعشان كده أنا بدأت المقال بجملة أنا جبت كمبيوتر يعنى من الآخر ولو طبقنا هذا المبدأ يبقى أنا كده من الآخر عملت اللى عليـّه فى الدنيا دى وجاهدت وحوشت الحمد لله لغاية ما قدرت انتصر على كل أعدائى واحقق أمل عمرى اللى العالم مستنيه وهوه جهاز الكمبيوتر الرهيب المستعمل الحجارى المخروط عند الأسطى عبده السمكرى !!!!
لدرجة إنى من فرحتى كنت عايز أكسر الجهاز ميت حتة وأغنى لكل حته لواحدها!!
عموما جايز يكون المقال دمه تقيل _أكيد لأ_ وميعجبش كلامى حد _أكيد لأ برضه_ بس من الآخر ده كلام كنت عايز أفضفض بيه والحمد لله إن انتم بكل حب غصبن عنكم هتقروه.. ويا ريت برضه كل واحد يقول لى ويفضفض أمله إيه فى الحياة وحققه وللا لأ ..
وعموما كل سنة وانتوا طيبين .. طبعا هتسألونى: بمناسبة ايه؟
هقول لكم ببساطة : عشان أنا جبت كمبيوتر!!!!!!!

هناك 24 تعليقًا:

عصام يقول...

طبعا خفة الدم اسم على مسمى..
لديك مقدرة طبيعية على انتزاع البسمة من الشفاه، كما أن موهبتك الرهيبة في الاستطراد وتداعي المعاني واللفاظ تخدمك بشكل غير مسبوق!
أعشق الكتابات الساخرة البعيدة عن التهريج والإسفاف، وبرأيي العالم العربي يفتقر إلى هذه العينة من الأدب!

أعلم ان كلا يكتب بالطريقة التي تريحه، لكنني اتمنى لو اجد لك مقالات ساخرة فصيحة مائة بالمائة.. هذا هو التحدي الحق.. فاللهجات العربية ساخرة أصلا بطبعها.. والشعب المصري أصلا عرف بأنه ابن نكتة!

وفي النهاية، مبارك الكمبيوتر، وعسى أن ترجىء مسألة تهشيمه إلى أطراف حتى تتمكن من جمع مبلغ مماثل لشراء آخر، وهو الشيء الذي قد يحصل قبل ان تتساقط أسنانك العجوز مع بعض التفاؤل..
400 جنيه!?

سمعت عن ضعف الجور في مصر، لكنني لم أتصور هذا الحد!

تحياتي لك يا عزيزي

غير معرف يقول...

الف الف مبروك على الكمبيوتر
وانا بالنسبه ليه جبت كمبيوتر واتجوزت والحمد لله
يبقى على كلامك معدش عندى طموحات خالص ولا انجازات لسه هعملها

والحمد لله
ابراهيم شاكر

راندا رأفت يقول...

كلامك قلب عليا المواجع ياأشرف وفكرني بتدوينة قديمة كتبتها
http://randaraafat.blogspot.com/2006/10/blog-post_17.html
طبعا دمها مش خفيف زي مقالتك
دي دمها ثقيل قوي


...........
شفت نستني
مبروك على المدونة

غير معرف يقول...

بسم الله الرحمن الرحيم
احب اولا ان اشكر واهني الاخ و الشاعر اشرف توفيق على هذه المقاله والمدونة وعلى ذلك الموقع العبقري الذي و ان يدل على ثقافة واعية وعقل متحضر وواعي لكل مجريات الامور......
اما عن محتوى تلك المقاله فاني اوافقه في الراي واختلف معه في اخرى
اولا اوافقه الراي عن الحاله المزرية التي نحن عليها وعن استبداد طبقة بعينها في مجريات الامور والتي تخصنا ولا تخص اي شخص اخر فعلى سبيل المثال انا من مواليد مدينة المنصورة وعندما ذهبت الى القاهرة انبهرت وذلك لكافة انواع التحضر و النظافة والنظام و الامكانيات الرهيبة والتي تتاح للعاصمة او المدن السياحية او غيرها .... فاني على علم بان هذا الوجود لهذه الطبقة لا ياتي من فراغ وهذا ما اعترض مع الاخ اشرف وهو انه نحن الطبقة الكادحة من تركنا حقنا في هذه البلد ويقول الله عزوجل : ( ان الله لا يغير ما بقوم حتى يغيروا ما بانفسهم ) فعندما تقول انا النظام خاطئ او فيه طبقة يتحكموا فينا اذا كان بالمال او بالنفوذ فاننا نحن من تركنا ذلك وعلى العلم فان هناك حقيقة مؤلمة استفاد منها الطامعون وهو ان الشعب المصري شعب مغلوب على امره وذلك يتضح في معلومة تاريخية صريحة وهو ان من بعد كليوباترا البطلمية المصرية حتى زمن محمد نجيب اول رئيس جمهورية مصرية لم يتولى احد فيها الحكم وهو مصري مرورا بالرومان و المسلمين و الدول الاسلامية المتعاقبة ومرورا بالعصر العثماني حتى محمد علي واولاده حتى نهاية فاروق ... فاني ادعو لمزيد من الطموح لا لمزيد من الكراهية تجاه تلك الطبقة المستبدة و بدلا من الحقد يوجد الامل للوصول الى منصب عالي يجعلك قادرا على تحسين الوضع ومسح جميع السلبيات والتي توجد في منصبك حتى وان وصلت الى كرسي الحكم .... اما عن موضوع راس الموضوع فقد اسعدني كثيرا واتذكر كلمة محمود عبد العزيز في نهاية مسلسل محمود المصري وانما هي حقيقة حين قال من اراد شيئا فانه سوف يصل اليه فان اردت ان تسافر سوف تسافر وان مرت بك السنون وان اردت ان تشتري بدلة او قميص جديد فسوف تشترية ولعل السر في ذلك الطموح والامل لا تقول حظا او صدفة ... ولعلي تذكرت شيئا جميلا وهو ان كل الحاصلين على جائزة نوبل في المنطقة العربية كلهم من مصر ارض الكنانة وةايضا حقيقة اخرى وهو ما وصل احد الى امين الامم المتحدة من الدول العربية غير الدكتور بطرس غالي ... وانما اذكر تلك الامثلة حيث اوضح ان الشخصية المصرية منفرده في كونها لديها الطموح و الاصرار فهي رساله اوجهها لكل من ينظر الى الحقيقة السوداء كما يصورها لنا الشاعر اشرف توفيق وهنا اختلف معه ...... والاختلاف في الراي لا يفسد للود قضية

والسلام عليكم ورحمة الله وبركاته


د\ احمد زكي

ahmed_zaki20042002@yahoo.com

أخف دم يقول...

صديقى الجديد العزيز عصام نورت المدونة واتمنى إن شاء الله ما تكونش آخر زيارة ليك عندنا ..بحاول أكتب اللى بيعبر عننا وصعب ان اللى جوانا يكون بالفصحى .. ولو جت حاجة بالفصحى مش هعزها عليك يعنى..
زعلان قوى عشان الأجر فى مصر وصل 400 جنيه؟ يا راجل!! حد لاقيهم ؟ دا انا بهزر يعنى .. بافرض أى رقم خرافى والسلام ..

أخف دم يقول...

إبراهيم شاكر مش صاحبى بس.. صاحب العمر كله اللى عمرى ما أكلت ف بيتهم أبدا..لأنه بيتى أساسا..
طبعا انت لسة ما حققتش حاجات يا هيما .. أولها : روح صلح شاشة جهاز الكمبيوتر اللى اتحرقت..

أخف دم يقول...

راندا رأفت .. أشطر صحفية فى مصر كلها..واللى قريب صورتها هتنزل على الجنيه..واللى كنت فاكر انى هفاجئها بالمدونة اكتشفت ان لها مدونات (جمع يعنى) وكمان من سنين..أنا اللى مقصر يا راندا ..نورتى مدونتى المتواضعة اللى أكيد هستفيد منك فيها..وكويس ان انا قلت حاجة تفكرك بحاجة عندك..
كل سنة وانتى طيبة.

أخف دم يقول...

الدكتور أحمد
كل تعليق ليك باكتشف انه أطول من المقال نفسه.. ما تيجى تاخد المدونة انت يا أخى!!!!
عليه العوض انا غلطان انى قلت اكتبوا اللى ف نفسكوا..
كل سنة وانت طيب يا حبيبى..

بنت الحياه يقول...

دي محاولة موفقة للاستظراف.. مين ممكن مايتفقش معاك، حاول بس تختصر بعد كدة شوية،

يعنى من الآخر لو حد قابلنى بعد فترة غياب وسألنى عن الأحوال والتغيرات فى حياتى وعن إنجازاتى فى الفترة اللى فاتت أقول له ايه؟

قوله انك بتقري للناس وبتكتب ليك وليهم، رغم أنف رؤساء تحرير الجرائد القومية، انت بتكتب، وليك قراء كمان عندهم استعداد يقرو كلامك كله، ويحسووه..
جميل يا أشرف

Human يقول...

مبرووووك على الإنجاز الغير طبيعى .. مع انه مش كل حاجة بس اهوه اسمه انجاز ، احسن من ناس ماجبوش قلم رصاص حتى
والله الواحد مش عارف هينجز ايه فى الدنيا دى بعد ما طلعت عينه فى الكلية ... ربنا يستر علينا بقا
خايفة بشكل غير طبيعى وسايباها على ربنا الحمد لله، بس هشتغل ايه وانا ماليش واسطة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بس ارجع واقول وهفضل اقول لحد آخر نفس فيا : انا ظنى فى ربنا خير
ما علينااااا
مدونتك جميلة ودى اول مرة ادخلها وإن
شاء الله مش اخر مرة.
سلام عليكم

الحصان الأسود يقول...

مبروك الكمبيوتر وعقبال اللاب توب

ولو انك فاتك ان تشتري كمبيوتر من المستعملين استعمال الخارج وماركات زي ديل و غيرة واسعارها يمكن ربع تمن اللي دفعته
انا اخويا اشترى جهاز ب 600 جنية وكويس جدا و من ناحية الاعطال والمشاكل هو جهاز رائع لانة ماركة مش تجميع

المهم فرحنا لك و عقبال مانفرح بجهازك
قصدي جهاز العروسة مش جهاز اللاب توب

والاهم انك انضميت لعالم المدونين واصبح في امكانك ان تكتب اي شيء وفي اي وقت
ونتمنى ان نرى المزيد من كتاباتك

lost in the web يقول...

ألف مبروك يا باشا و الله فرحنالك
ده أنا حتى بحسدك أنا كمان نفسى أجيب كمبيوتر جديد بدل القديم اللى خلل من سنة 2000 ده..بس أرجع و أقول و الله الجهاز أصيل و لسه فى النفس
المهم بقى ندخل فى المهم، الفقر بيعمل كتير بس هاتلاقى برده إن فى ناس عايشة حياتها و بتنجز فيها على الرغم من مصاعبها الكتير.....
فهمت ايه بقى من الكلام؟ أقولك أنا إن الناس تعبانة آه و ان الظروف صعبة جدا لكن برده لو كل واحد اشتغل على نفسه و همه بقى رضا ربنا و إصلاح العيشة دى هايلاقى حاجات يعملها و انجازات كتييييير لأن النظام بايظ قوى و عاوز عمررررررة

غير معرف يقول...

مبروك الكمبيوتر ياريس..أنا بقى أمل حياتي إني أقابل الزعيم المفدي وابوس ايد فخامته على الجمايل اللي مغرقنا بيها واللي ماتخفاش عليك..أنا بتكلم عن الزعيم الكبيرطويل العمر يطول عمره ويزهزه عصره وينصره على مين يعاديه..هاي هيئ..هههههه..كفايه كده ليفقس اني بقرع عليه

أخف دم يقول...

بنت الحياة
يعنى عايزانى لما حد يسألنى انت عملت إيه جديد فى حياتك ؟ أقول لهم الحمد لله بقيت بكلم ناس ويسمعونى يعنى.إيه ؟أهبل يعنى وللا ايه؟ مش ملاحظة ان الكلام ده مش منظقى شوية.
ــــــــــــــــــ
ياسمين
وكمان مالكيش واسطة؟ أمال بتعيشى حياتك ازاى يابنتى؟ دا الواحد عشان يركب أتوبيس دلوقتى لازم يكون عارف السواق!!!
ربنا معانا ويصبرنا..إن شاء الله خير
ــــــــــــــــــ
الحصان الأسود
منورنى وربنا
بس انت مجتليش من زمان ليه عشان تجيبلى جهاز من أبو أربعين جنيه ده؟
ـــــــــــــــــ
lost in the web
ما وصلتش لمرحلة الفقر يا جميل..الحمد لله..عايشيييييييين..راضييييييين..صابرييييين..وإن الله مع الصابرين.
ــــــــــــــــ
أحمد عبد القادر أبو العز كمان
بتشتم فى الريس؟
فاكر نفسك مش هتتعرف؟
دا انت مكشوف خالص..بيتك فى المنصورة..بلقاس..ومركب تليفون جديد..أقول كمان..أكتب رقم التليفون؟

يا قلبي يا غريب يقول...

كلامك يا اخي جميل و لاكن اعتب عليك انك تجوزت حدود الكلام في جمله.. يعنى أيام الصحابة كانت الرجالة بتروح تلعب(ريد ألارت) وتيجى؟ !!! ما ..يا اخي الصحابه هم خير خلق بعد الانبياء و الرسل و ليس هدا مقام دكرهم..

غير معرف يقول...

سين حلم لا ينتهي
بكلمك الوقتي يا أشرف وانا مش قادر اوصف مشاعرى وحاسس خير الله اما اجعلة خير زي ما يكون دخان ابيض وشارع بنور وصوت بينادي اخيرا حلمك اتحقق
انا اشتريت الكيسة يا أشرف

azmeralda يقول...

اولا سلاموا عليكوا بس بجد انا اول مرة ادخل المدونة بتكتك دي بس ده انت طلعت جامد بصحيح لا بجد دمك شربات وربنا يكرمك ويكرم كل البلوجارية الغلابة كمان قول آميييييييييين .... سلام بقي

أخف دم يقول...

يا قلبى يا غريب
مكنش قصدى ابدا الاستهزاء بالصحابة يا راجل رضوان الله عليهم حاشا لله .. أنا بس كنت باتقمص شخصية الى بيعارض انهم تعبوا فعلا أيامهم .
وعموما كلامك جميل وربنا يبارك فيك..
ـــــــــــــــــ
محمد البدرى
شراء الكيسة أول خطوة من خطوات النجاح .. عقبال الماوس.
ــــــــــــــــــ
azmeralda
ربنا ما يجعلها آخر مرة دخول عندى ..
البيت بيتك

غير معرف يقول...

تعرف انا كان حلمي زمان
أشتري شركة نوكيا وأجمعها مع ميكروسوفت واسميها ميكرونوكيا
لكن دلوقتي فقدت الأمل
بس انا جبت انا كمان كمبيوتر

غير معرف يقول...

البلوج بتاعتك حلوة قوي

انا عارفة ان البوست قديم

بس الف مبروك على الكمبيوتر D:

العيسوى الصغير يقول...
أزال المؤلف هذا التعليق.
العيسوى الصغير يقول...

شراء الكيسة أول خطوة من خطوات النجاح .. عقبال الماوس.

كده طيب ياترى اشتريت الشاشة ولالا

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

Shenouda Samir يقول...

جميل جداً تنفع اعمله راب بعد إذن حضرتك