اخبار

الخميس، ١٨ يناير ٢٠٠٧

الواد مدحت دخل الجيش


مدحت صاحبى دخل الجيش يا رجالة..ومدحت للى مايعرفوش هو آخر فيرجان لأبو الهول نزل السوق..حاجة كده تفكرك بحضارة الأهرامات والنيل رواه _ولو ان النيل مايقدرش يروى مدحت أساسا_ والخير جواه..كده يعنى
قبل ما يروح أساسا عشان الكشف أنا كنت متنبئ له خير بإنه إن شاء الله من غير مقاطعة كده يعنى يا صاعقة يا حرس جمهورى يا بلدوزرات_هيه فيه حاجة كده فى الجيش؟_ يا آكلى تعابين.. يا منتحرين .. أى كتيبة هباب تناسب حبيبى مدحت.. وطبعا أكيد هيبقى ظابط أو احتمال يتعين لوا ع السريع ..هوه فيه عسكرى طوله اتنين متر وانت طالع؟.ده آخر طول وصلت له عينى فيه.. بعد كده هوه ممتد لفوق مش هطول يعنى أجيب آخره
المهم الواد راح واكتشف خير اللهم اجعله خير انه بقى عسكرى مش ظابط..طبعا المفاجأة كانت ليه أنا ..لأن لو مدحت عسكرى أمال ظباط مصر شكلهم إيه؟ديناصورات بقى؟ صعب الواحد يتخيل ظابط صغنن كده بيبص لمدحت فووووووق ويقول له:روح الطابور ياله.أنا بيتهيألى ان مدحت هيهرسه لو بص له أساسا
المهم الكتايب اتوزعت ومدحت طلع فى كتيبة إيه ؟ تخيلوا؟ مُشاه.. ويعنى إيه مُشاه يا مدحت ؟ قال لى عارف الناس اللى بيبقوا فى أول طليعة الجيش دول؟ قلتله :آه ..اللى بيمُوتوا أول ناس دول أيوة عارفهم .. قاللى احنا يا عم.. طيب ووظيفتهم إيه يعنى .؟؟.لو وظيفتهم انهم يتمشوا يعنى سهلة يا بنى..كل واحد يقعد يتمشى كل يوم فى بلدهم وكل شهر يبعت للجيش هوه اتمشى قد إيه يعنى وخلاص..مابلاش العقد دى
هوه فيه حل واحد لموضوع المشاه دول .. يمكن يكونوا مش لاقيين للعيال دول حاجة يركبوها أساسا..الدبابات خلصت والطيارات خلصت ..مفيش طقم عربيات (فيات) كده يلم العيال الغلبانين دول؟ أو حتى يجيبولهم طقم خيول جامد من بتاع (فلنذهب وراءه إلى يثرب) ده
مدحت راح المنطقة بتاع التجنيد.. الرجالة واقفين فى الجيش بياخدوا أول التعليمات.. القائد بيقول :انتباااااااااااه.. شعار الجيش :قوة إيمان تضحية
الواد مدحت عشان مشاه بقه بيقول وراه:شعار الجيش:غمض عنيك وامشى بخفة ودلع .. الدنيا هيه الشابه وانت الجدع..تشوف رشاقة خطوتك..تعبدك..لكن انت لو بصيت لرجليك تقع.. وبصوت عالى : عجبى يا فندم

هناك ٢٧ تعليقًا:

Unknown يقول...

ههههههههههههههه
غمض عنيك وامشى بخفة .. دلوقتى تيجى الدبابة وتاخد لافة

ربنا يكون فى عون مدحت والله

radwa osama يقول...

والله دمك خفيف

Omar Mostafa يقول...

:-D

شيمـــــاء يقول...
أزال المؤلف هذا التعليق.
شيمـــــاء يقول...

غمض عنيك و امشى بخفة و دلع
وبكره على قفاك تترقع
يشوف رشاقة خطوتك يعبطك
لكن انت لو بصيت لرجليك هتقع

و عجبى يا فندم

دمك خفيف و شردت لصاحبك خالص

Unknown يقول...

حلوه خالص (:
والحمدلله ان صاحبك أخد عسكري, كنت عايزه يبقي ظابط حرام عليك.

smraa alnil يقول...

ههههههههههه
يا قصير

اومال كنت منتظر من مدحت انه يكون ايه

بس هو موضوع المشاه دة صحيح بجد
انا مش اعرف ان دي وظيفتهم
ههههههههههههههههه

بس اخر بيتن في الجون
طبعا انا عارفة ان انت مش مستني راي
لان كلك تواضع

غير معرف يقول...

على فكرة احنا بنحبك وبنحترمك من زمان ورغم انك قصيرشوية بس كنا شايفينك عملاق فملوش لزمة تتكلم على طول أخونا مدحت لأن دا موضع معقدني أنا شخصياعشان كدة كنت دايما بسبكو واهرب ع الكلدير ما علينا المهم عاوزينك المرة الجاية تتكلم ف قضايا تخدم المجتمع وتشيلة على كفوف الراحة معلش طولت عليك بس انت عارف بحب ادرب ع الوردومش هلاقي احسن م الفرصة دى يلا سلام

Yasmine Adel Fouad يقول...

ههههههههه
ياريت صاحبك مدحت بقى يكتبلنا يومياته و هو بيتمشى

غير معرف يقول...

على فكرة .. أنا من كتر الضحك اللي ضحكته افتكرت ان انا لسعت واللا مخي اتلحس واللا حاجه
طبعا يا أشرف طول عمرك متواضع ومابتقولش على نفسك انك عبقري ولا دمك خفيف ولا أي حاجة من دي خالص.
أما بقى بالنسبه لمدحت فأنا والله مش عارف موضوع المشاة دول إيه بس متهيألي ان المشاة دول على ما أعتقد بيقعدوهم في الصحرا عشان يستنوا أي دبابة تيجي وياكلوها واللا أي طيارة يبلعوها واللا حاجة
بس عموما سواء كان ده صح أو مش صح
فأنا متهيألي ان مدحت ممكن ياكل الظابط نفسه لو فكر يزعق له .. أساسا الظابط هايخاف يكلمه .. لا يبلعه وهو بيتتاوب واللا حاجه

الكلام نوعان :كلام فارغ وكلام مليان كلام فارغ يقول...

حلو الشعار ده بس لما بيخرجوا من الجيش بعيد عنك الشعار بيختلف من كتر المشي وهده الحيل بيبقى"ماشيه السنيوره كده كده هو عايزالها صوره"

غير معرف يقول...

صلي على رسول الله..لا سحر ولا شعوذه..عندنا راجل الحرب تخاف تقوم مايرضاش يقعدها..عندنا جيش مايتهزمش غير إذا ربك كان عاوز يخلي الناس تعتبر وتعرف ان الله وحده هو القادر..مدحت بقى صاحبيمن اربع سنين..مدحت عامل ازاي بقى؟..شفت كفار قريش؟..بالله عليك يجيلك قلب تحارب حد فيهم؟..أنا مابغلطش في مدحت..ده مدح والله..كفار قريش كانوا جامدين..هههههه..عموما أنا زعلان على مصر اللي مش عارفه تجند ولادها صح..مدحت يستحق يدخل سلاح مضاد للطيارات..حرب يدويه ..دي غير الاليكترونيه..زي ما اشرف قال انه طويل..انا عارف انتم معذورين..معظمكم مايعرفش مدحت..يالهوي..ده مدحت كان بيصطاد الطيارات بتاعة الجيش المصري وهوا صغير في الحرب البارده..هههههه..هيا الحرب البارده مش كانت بين مصر وكوت دي فوار تقريبا؟..هههههههه..عموما هوا الوقتي كبر واكيد بقى بيعرف يفرق بين طيارات جيشنا والطيارات التانيه..علشان كده هيصطاد برده طياراتنا..هوايه ياجماعه..وسبحان الله ماحدش هيقدر يقوله انت عملت كده ليه يامدحت..ههههههه..الله يخرب بيت الايام اللي كان مدحت بيصحيني يلعبني فيها كريزي إيت واللا استيميشن بالعافيه..
أحمد عبدالقادر.

Utopian يقول...

ربنا يصبرك علي ما بلاك يا مدحت
جيش و صحاب مشرداتيه
loool

فترة التجنيد دي فعلا مأساه انسانيه

الشباب بيتخرج قرفان من البلد
بعد نا يخرج من الجيش، بيبقي مستعد يضحي بحياته..لأي بلد غير مصر
looooooool

Memo يقول...

يعيش وياخد غرها بس ايه الصداقه القويه دي
دانت بتحبو قوي

tota يقول...

اخف دم
هو مدحت من الفصائل اللى قربت
تنقرض لان الجيل الجديد الموجود فى السوق من الرأس قدميات
لذلك كان لازم يكون من المشاه علشان الناس تعرف ان كان فى انسان زمان قبل الانقراض طويل كده
مش قصدهم يقطعوا نفسه بالمرة
يا سلام على سوء النية

هو فهم الموقف واختار الشعار المناسب للمكان المناسب

تحياتى

غير معرف يقول...

ايه الحقد ده يا جماعة كلكم كدا متغاظين من مدحت
يا سيدى انت و هو عاوزين توصلوا لمدحت العبوا عقلة
هو فى زى مدحت و لا فى طول مدحت "على كلامكم"
مصر بين اديك يا مدحت امشى و احنا كلنا وراااااك
إلى الأماااااااااام سر

raspoutine يقول...

ربنا معاه ويفك اسره قادر يا كريم

Memo يقول...

انت ايه الي جابك عندي هههههه
دمك خفيف بس رخم
نورتنا و جميل البوست بتاعك
تحياتشي

غير معرف يقول...

أنا بس يا جماعة عاوز أوضح لكوا نقطة عن مدحت .. تاريخ البشرية كله كوم وتاريخ مدحت ده كوم تاني خالص
تقريبا لما ربنا كان بيخلق الإنسان .. كان الطين مش مكفى لإن مدحت كان واخد تلات اربع الطينة لحسابه .. والبواقي اتخلق بيها باقي البشرية كلهم ..
مصطفى حسان

أخف دم يقول...

الظاهر ان البلوج بقى بتاع مدحت..كله متعاطف معاه ومفيش واحد قال عليا عبقرى ولا حاجة..عموما انا سايبكم لضميركم..مسيركم ترجعوا وتكتشفوا ان البلوج ده بتاعى مش بتاع مدحت .. ما دام هوه فى الجيش يبقى مفيش خوف..
ــــــــــــــــــــــ
ياسمين .. انتى بتدعى لمدحت؟ لو شفتيه هتدعى ليا أنا .
ــــــــــــــــــــــ
رضوى
ربنا يكرمك .. بس انا عارف ان دمى خفيف من غير ما تحلفى.(تواضع بقى).
ــــــــــــــــــــــ
تجربة
الشكل اللى انتو باعته ماوصلنيش ..شكله مات من الضحك.
ــــــــــــــــــــــ
شيماء
لولا ان اللى كتب الرباعية اللى فوق صلاح جاهين بنفسه كنت قلت رباعيتك أحسن..بس والله زى العسل .. بس مش أحسن منى طبعا..
ـــــــــــــــــــــ
إسراء
مدحت ما ينفعش عسكرى يا ماما..مدحت يتعين نائب رئيس لفترة رئاسية سابعة وبنجاح ساحق
ـــــــــــــــــــــ
إنجى
أحلى حاجة فيكى انك عارفه شخصيتى المتواضعة واللى مبظهرهاش للناس كتير وما بتكلمش عن نفسى خالص..عبقرى بقى..
ثم انا مش قصير .. مدحت هوه اللى طويل..دى مشكلته مش مشكلتى انا.
ـــــــــــــــــــــ
محمد البدرى سين حلم لا ينتهى
ماعدش ورانا الا سين يا عم..فيه حروف تانية يا ضنايا نزلت السوق..فيه حرف جديد اسمه ميم جميل جدا..جربه كده..
المرة الجاية ان شاء الله هحاول أشيل المجتمع على كفوف الراحة والمجتمع هيشيلنى على عصايا.
ـــــــــــــــــــــ
ياسمين أنا حرة
هوه اللى بيدخل الجيش بيكتب يومياته برضه يا ياسمين..
اليوميات هيه اللى بتنكتب على قفاه يا حبيبتى.
ابقى حاولى تقرى قفا أى واحد دخل الجيش..
ـــــــــــــــــــــ
مصطفى ابن الدكتور
اوعى تشتم مدحت طالع أجازة قريب.
ــــــــــــــــــــ
الكلام نوعان
حلو قوى اسم البلوج بتاعك ده أولا.. ثانيا حلو قوى الشعار الجديد بتاعك بتاع المشاه..بس مدحت مش سنيورة يا جميل.انتى ماقريتيش الكلام اللى فوق وللا ايه؟
ــــــــــــــــــــ
أحمد عبد القادر
كفار قريش مين يابا؟ طب كفار قريش كانوا بيموتوا فى الحروب..فيه سؤال لولبى بسيط ..السؤال بيقول علل.. يعنى افطن..هل تتصور ان مدحت ممكن يموت بالسيف؟
بعد الشر يا مدحت.
ــــــــــــــــــــ
utopian
انت بتشتم مصر يا راجل؟مصر اللى أكلتك خضار مسرطن من خيرها ولحمة ميتة وفراخ مسمومة..يخصى عليك .. جاحد..
وثانيا اللى بيروح الجيش مش بيخدم الجيش ده بيخدم قائد الكتيبة ..
يعنى المفروض يبقى اسمه(جيش قائد الكتيبة).
ــــــــــــــــــــ
ميمو
والله انتى اللى زى العسل والبلوج بتاعك دمه خفيف جدا بس برضه مش زيى..
أنا فعلا بعز مدحت جدا بس مش حب يعنى انما ممكن تسميه إرهاب فكرى..
ربنا يعينه.
ــــــــــــــــــــ
توتا
هوه مدحت ممكن ينقرض؟
ـــــــــــــــــــ
lost in the web
أنا مش عارف أوصل لك ازاى على النت عشان أزورك..بس عموما عقلة ايه اللى الواحد بيلعبها يطول يعنى؟ما انا بقالى كام سنة بالعب عقلة يعنى ولسة .....طويل زى ما انا.
ـــــــــــــــــــ
راسبوتين
ربنا يفك أسرنا جميعا
ــــــــــــــــــ
مصطفى ابن الدكتور تانى
بلاش اللعب فى مسائل ربنا دى يا عم..ربنا يغفر لينا جميعا..
وثانيا ضحكت علينا الناس يا أخى..الناس فاكرين اننا أقزام أساسا من كتر كلامك عن مدحت .. يا جماعة ماتصدقوهوش..مدحت بشر عادى زينا.

big big girl...in a big big world يقول...

الموضوع ده بيعبر بوضوح على الحقد الطبقى اللى بين طبقة قصيرى القامه و الطبقه اللى بعديهم باربع تدوار " طوال القامه"

قول اكتر و اكتررررر يستحقووووا ده ذنب القصيرين اللى هما عقدوهم فى حياتهم

:)))

غير معرف يقول...

أنا أحسدك
أنا أحسدك
أنا
أ
ح
س
د
ك

الأباصيرى يقول...

هو مدحت دة زينا كدة من كوكب الأرض

ولا دة بقايا هرقل بتاع الأغريق

وبعدين أفهم النظرية بتاعة الجيش
هو لما يكون اول واحد فى الجيش اكيد جيش العدو هيخاف ويقول
مادام القصيرين قدام والطوال ورا
يبقى أكيد الجيش دة عبارة عن ديناصورات.. فيستسلم لصالح مصر


دم خفيف يامضروب

أخف دم يقول...

big girl
من كلامك عرفت طولك .. ربنا يصبرك
ــــــــــــ
الزرافة الحسودة
يا عم ما تغير الكلمة دى بقى .. انت هتحسد كل الناس وللا ايه؟
ــــــــــــــ
الأباصيرى باشا
حلوة نظريتك .. كويس انى مدخلتش الجيش عشان مش هنفع لا قدام ولا ورا

Unknown يقول...

2 متر وعسكرى سبحان الله
مش مهم المهم انت عاملت ايه

medhat adel يقول...

قالولي الجيش للرجاله قالت اجرب بنفسي اول مدخلت البوابه صعبت عليا نفسي يادخل الجيش برجليك اهي 0000000وتحسبت عليك

abo-bder يقول...



شركة شحن اثاث من الرياض الى الامارات
شركة شحن اثاث من السعودية الى الامارات
شركة شحن اثاث من السعودية الى الامارات
شركة شحن ونقل الاثاث من الرياض الى الامارات