اخبار

الأحد، 31 ديسمبر، 2006

ع البركة

بسم الله الرحمن الرحيم
ازيكو وكل سنة وانتو طيبين. مش هطول عليكم واقعد أقول لكم ازاى عملت المدونة دى،وعرفت منين اعملها أساسا مع العلم بإن العبد لله أحسن واحد مايعرفش حاجة فى الحاجات دى. هنكبردماغنا من الحاجات دى كلها والمهم ان المدونة الحمد لله اتعملت.
المهم..فيه ناس اصحابى سألونى وانا باعمل البلوج ده ..هوه انت ناوى تكتب فيه إيه؟ أو يعنى الخط اللى هتمشى عليه إيه؟ يعنى بتوضيح أكتر-وافهموا بقى- هنتكلم عن إيه؟
واحد صاحبى قال لى اقلبها سياسة يا ريس..واشتم بقى فى الحكومة والحاجات الكبيرة دى.وبما إن العبد لله ديمقراطى وباسمع كلام اصحابى طبعا هابعد عن الموضوع ده تماما!! دى الحكومة زى الفل .. بناكل ونشرب وننام وبنعمل كل حاجة زينا زى البنى آدمين بالظبط ولا أى حاجة !! ده حتى الحكومة عملت دش مركزى مخصوص عشان نسرقه..فيه حكومة فى الدنيا عسل كده .. فيه حكومة فى الدنيا كده(تتحدى الملل)؟!
واحد تانى قال لى خلاص يا عم خليك بقى مع الحكومة وخلاص .. وبنفس مبدأ الديمقراطية السابق طبعا هابعد عن الموضوع ده تماما..ليه بقى؟ أقول لك يا سيدى .. يعنى الواحد قدامه فريقين .. فريق حوالى كام ألف لعيب وفريق حوالى سبعين مليون إلا كام ألف لعيب ..نختار مين فيهم نلعب معاه؟ أكيد السبعين مليون ..على الاقل لو مالعبناش نقعد مع الجمهور ..وَنَس برضه..وكمان ممكن نأثر على الحَكَم..ده طبعا باعتبار إن الحكم فارق معاه أساسا مين اللى بيلعب !!
واحد تانى اقترح :خلاص نكتب عن مشاكل الناس ومواقف من الحياة وكام إعلان لبرسيل والجائزة الكبرى وربنا يكرمنا..برضه مش نافع لأنى لو بدأت أكتب عن المشاكل مشاكلى لوحدها محتاجة موقع 100 جيجا ومضغوط كمان .. خلاص يللا نكتب نكت..برضه مش نافع لأن الواحد مننا أساسا بقى عايش طول اليوم فى نكت.. حياته أساسا نكتة جميلة بس المشكلة إن هوه الوحيد اللى بيضحك عليها لأن كل واحد مشغول فى الضحك على النكته بتاعته!
واحد لئيم صاحبى قال ياعم خليها شعر.. ده طبعا لأن العبد لله شاعر على قدى -على فكرة أنا قدى كبير قوى- .. برضه مش هينفع يبقى البلوج كله شعر..طب إيه الحل؟
أنا هقول لكم بقى الفكرة العبقرية بتاعتى اللى ماتطلعش إلا من واحد عبقرى زيى -على فكرة زى ما هتلاحظوا أحلى حاجة فيا التواضع- .. تعالوا كلنا نكتب فى كل المواضيع..كل اللى ف نفسه حاجة يكتبها فى أى مجال..فى أى موضوع هنكتبه سوا حاول فى تعليقاتك تكتب كل اللى انت عايزه مش مجرد تعليق على كلامى .. عايزين نكون كلنا كده يعنى زى السكينة فى الحلاوة..هتكلم فى كل حاجة .. سياسة ..أدب..فن..رحلات..دين..قضايا..مواقف بتحصل فى حياتنا..مواقف محرجة..وخُشّى..ووراكك..ماشى ؟!
تعالوا نبدأ مع بعض بكل ديمقراطية ..وأول خطوات الديمقراطية إنكم هتعلقوا على الكلام بتاعى ده غصبن عنكم طبعا وبسرعة ومش عايز حد يخالفنى أبدا فى أى رأى هقوله ... وهذه قمة الديمقراطية!!

هناك 24 تعليقًا:

غير معرف يقول...

احلى حاجه انك ما قلتش أي حاجه .. مع إنك بتتكلم في كل حاجه ..
فاهمني طبعا ...
والروح اللذيذة اللي شبه لون الليل والشوارع المعفره بتراب البلد البعيدة قوي علينا .. وزحمة الغربة اللي ما دوقتهاش غير وانا هنا ..
مصطفي حسان

غير معرف يقول...

انت عاوز تقول ايه , وبعدين انت ايه اللى جابك هنا , يابنى ارجع عن اللى فى دماغك واعقل

ابراهيم شاكر

mahmoud يقول...

بص يا كابتن
أحب اعرّفك إنك غلطت
غلطت جامد يعني...
أولاً: ..........
ثانياً: ...........
ثالثاً: ...........
ها، أكمّل ولاّ هتعترف بغلطك؟
ما علينا...
مبروك عليك البلوج، وعقبال الجواز...
أما بالنسبة للموضوعات المطروحة في البلوج فأجمل شيء فيها إنها متخصصة في شيء واحد، اللي هو التنوع... والتخصص في التنوع سمة من سمات البلوجات العظيمة العريقة، زي بلوج الشاعر الكبير حسام حسن لاعب المقاولين مثلاً...
لكن أخطر حاجة...
..................
...................
وهنا، أدرك شهر ديسمبر الصباح، فسكت عن الكلام المستباح...
يلا، أشوف وشك على خيرة الله...
مع السلامُ عليكم...
الرخم

غير معرف يقول...

السلام عليكم يا استاذ اشرف ازيك وعامل ايه طبعا مش قصدى عامل ايه فى حياتك انا اقصد عامل ايه للغدا
شكلك كده عملت حاجة فيها بصل وتقلية بسسسسسسس وعلشان كدة طلعت على عنيك
ياحبيبي ماعدش كلام ينفع فى البلد دى لا فى السياسة ولا الاقتصاد ولا الاجتماع والذ حاجة فى الموضوع ان انت مش عارف تقول ايه ويكفى ان انا وافقت اكتبلك لانى بحبك شخصيا
عموما بعد كل اللى حصل لينا وبعد ما اتقتل صدام حسين يكفينا نقول ان العالم العربي والاسلامى كله اصبح ملوش عين ينام بيها والوحيد اللى نايم مرتاح البال هو صدام حسين نفسه وسلامى لكل اللى يسال عنى وانا ماليش دعوة علشان انا بحب الحكومة احياااااانا بسسسسس

رئيس المهيسين يقول...

بص يا عم الكتكوت انا صاحب الدكتور احمد وبعدين لئيتة بيكتب كلام كبير جدا بشكل يقلق فسئلتة فى اية قالى على انك شاعر كبير اوى بس انا شاعر بحجات غريبة بتحصل هو لانك ناوى تقلب علينا المواجع وانحن نقول اننا شعبا.,...... ومنهو وعلية وفية اينما نكون علية فى انى لابد من اتخاز قرار بشن عملايات والمداهمة فى الخطة الخمسينية حيث اننا نرضى بما نحن علية من هزا الارتباط الوثقي الجامد طحن كووووووول انت فاهمنى يا انكل اوش ولهزا نختصر الوقت ونقول كلمة صغيرة ايها الراقدون تحت التراب نحن شعبكم الناضل فى حياة الديمقراطية البيلوجية العرقية حيثما كنا تكون معنا وارقشندى دبح كبشة هبشة نكشة فركش تعرف يا مدبس يا مستدبس تدبسلينا سبع دبابيس زى ما استدبسناهم من عند المستدبسين وادركنا حيث هم ادركو اننا ادركنا فيا لهزا العالم الكبير مازل لو زهبنا الى المولد ...... ممدد على طول المدد ...... اول ماكتب القلم كتب القلم الله وسيد يا بدوى وااا تقدمنا بما هم تقدمو وبخالص تحيات جميع المهيسن ونشكرك جدا جدا على هزة المناقشة الكبيرة لاننا لانعرف انى ثنج فى البيولوجى السفاقصى المدحلس وصلى على رسول الله

.......... اخوك ابو دودا وهزة الكلمة نيابة عن جميع المهيسن المدعفلين فى الدكوكونك المشع وختاما للك الف سلاما من دماغ لاتهدى ولاتنام ابو دودا


رئيس المهيسين
ابو دودا
fanta_oush@yahoo.com

زورونا على هزا الميل تجدو ما يسركم والى ان نلتقى فى حديث اخر وعمت مساء

غير معرف يقول...

هاي اشرف ممكن تقولنا انت سميت البلوج بتاعك ليه كده مرسي باي

غير معرف يقول...

اه نسيت هل صحيح ان دمك خفيف جدا
بجد نفسي اشوفك وانت بتضحك اكيد هتجنن بدمك الخفيف ده
مرسي باي

dr\ahmed zaki يقول...

بسم الله الرحمن الرحيم
بما ان الاخ اشرف قد دعا الى الديموقراطية الحتمية فلابد ان نشجعه ونشد من ازره لان البلد دي محتاجة كثيرا من اهل الديموقراطية والفول والطعمية

والسلام ختام
د\ احمد زكي

احمد عبدالحي يقول...

والله يا شرشر بجد انا
احي فيك الديموقراطيه
وفي تفسيري الخاص للديموقراطيه
فهي تنقسم الي قسمين 1 - وهي كلمه ديمو
وتعني بالاتينيه اي من غير تين
تجريبي
قراطيه وهي نتاج مشترك بين قيراط والكلمه صفه وهي انها من القيراط والقيراط في المعجم العبوس
هو شي خيالي خرافي غير موجود علي الارض
وقال سامر المهيس في زكر الديموقراكراتيه بينطقها كدة اصله ابن ناس قال ان من يتبع الديموقراطيه فهو والعياز بالله ديموقراطي ولله العلم ان في بلاد سامر ديموقراطيه تعني حاجه عيب
عموما الف بركه يا ريس
وانت اللي جبته لنفسك حد يعمل بلوج يا مؤمن

أخف دم يقول...

مصطفى حسان .. ابن الدكتور.. اللى أبوه استكبر يجينى الفرح ويكتب فى البلوج..
أنا كنت فاهم انا عايز إيه بس بعد التعليق بتاعك معدتش فاهم أى حاجة ..ومش فاهم أساسا انت عايز إيه ولا ده حلو وللا وحش أساسا.. ولأنى بحمد الله اكتشفت هذا الكلام اللذيذ الديليشياس..فأحسن تعليق على تعليقك
(بسم الله الرحمن الرحيم الإجابة تونس)

أخف دم يقول...

إبراهيم شاكر اللى رحبت بيه فى المقال اللى فوق ومش كل مرة أرحب ..أنا مش عامل البلوج للترحيب من الآخر..
وأنا فى البيت عندك بتقول لى إيه اللى جابك هنا؟وباقبلها يعنى .. إنما هنا ..اللى يهوب ناحية أرضى هاقطعه..

أخف دم يقول...

محمود الرخم ..ودى مش شتيمة يا جماعة ده لقب هوه بيعتز بيه
لو كان البلوج فاتحة خير وبعده الجواز كنت عملت أربع بلوجات من زمان وخلصت..
ألف مبروك على البلوج الرخم بتاعك .. وأول مرة أعرف حكاية أشوف وشك على خيرة الله .. اللى اعرفه (رب صدفة خير من ألف ليلة وليلة)

أخف دم يقول...

الأستاذ محمد شاكر..الفيوم ورجالها وجامعتها..صاحب نفس بيت إبراهيم شاكر اللى عمرى ما أكلت فيه.. إن شاء الله يعجبك الكلام الجاى فى البلوج .. وكفاية اننا بنتكلم يا عم محمد ..على الأقل نكلم بعض بدل ما الواحد بيعمل شات على النت مع نفسه..
كل سنة وانت طيب.. وما تنساش تبص على الجديد..

أخف دم يقول...

رئيس المهيسين
حاولت أفهم اى حاجة فى تعليقك أعلق عليها مانفعش..الحاجة الوحيدة اللى فهمتها هارد عليها
رئيس المهيسين
كل سنة وانت طيب

أخف دم يقول...

صاحب أو صاحبة التعليق اللى بيسأل أو بتسأل عن سبب التسمية.. الحكاية ان هما اللى سمونى كده ..هما مين بقى؟ ده سؤال لولبى منطقى..أكيد اصحابى..طيب وليه الاسم ده؟ ده سؤال لولبى آخر..بس كده يبقى انت دخلت فى العيلة جامد جدا.. وكفاية لحد كده ..
على فكرة انا شاكك انت مين؟

أخف دم يقول...

الدكتور أحمد
اول مرة تنصفنى وتعلق تعليق صغير .. رررررررررررررررر.. زغروتة ع الماشى.

أخف دم يقول...

الباشا أحمد عبد الحى
شاعر العامية الرهيب ..يقتل ويدمر وينتشر ..
وحشتنى والله يا أحمد ونورت البلوج ويا رب يعجبك ..محسسنى ان اللى يعمل بلوج يبقى ألحد ليه يا أحمد ؟؟هههههه..
ومتشكرين على تفسيرك الوافى لكلمة الديمقراطية .. وشكرا لكتاب عبد الحى الصحاح.

lost in the web يقول...

مش عارفة ليه حاسة ان فعلا فى فرح فى البلوج و كل واحد داخل ينقط العريس و العريس بيرد التحية....
على العموم على بركة الله
آه بالمناسبة ممكن أبعت تهنئة لبابا و ماما و الجيراااان ههههههههههههههه
سلام

غير معرف يقول...

عارف لو تخليه موقع ساخن تبقى زي الفل واهو نأكل الناس عيش..ههههه..ونعمل خدمة توصيل الحراره للمنازل ونولع في البلد ياريس بدل الياجرا اللي العالم عايش فيها..

أخف دم يقول...

lost in the web
التهانى لبابا وماما بفلوس يا ختى.زأمال أنا عامل البلوج ده ليكو وللاايه؟
ـــــــــــ
أحمد عبد القادر
عايز تعمله موقع ساخن؟ حاضر أحوش واجيب سخان كويس.ز واوعدك هتبقى انت أول المستحميين..

shetos يقول...

السلام بدايه للكلام كما علمنا خير الانام المصطفى عليه افضل الصلاه والسلام اما عن تعليقى فانا بهنيك على اختيارك للموضوعات وخاصة تشجيع الحكومه على السرقه واحتراف حسام حسن فى الدورى الانجليزى وخاصة فى نادى كبير ذى المقاولين الافارقه وكمان عجبنى المبيرياليه فى الاداء وكمان الترانزيت اللى عمله كل من الكاتب والشاعر فى حياة كل من المحامى الجامعى واولاد الدكتور فى النهايه اهنيك على الاثاره والتشويق اللى عملتها فى الماتش لو سمحت عندى سؤال هى النتيجه انتهت كام بين الفريقين وياترى فى مباراة عوده ولا هى ذهاب وبس اما عن الاخراج الرائع للفيلم فانا عندى استفسار هو البلاى استاشين كان بلاى استيشن ون ولا تو وعندى كمان تعليق كان المفروض بدل البانجو كان يبقى حشيش علشان يضغى جو من المرح على المسرحيه وياريت الاعلان يوضح المنتج المعلن عنه كمان لان ده مفيد جدا للمنتج لانه بيخلى المستهلك يفكر ويتخيل ويتامل اد ايه البنت اللى بتعمل الاعلان جميله وكمان بطه كاك وكتكوته صيو وديك كوكو وكلب هو وقطه نيو ودى كانت مجموعه من اصوات الحيونات الاليفه.................................................................................................على العموم الفكره جامده والمفكر جامد بس محتاجه متابع مستمره وتطوير بس ياريت تفضل فتره متنزلشى حاجه على الموقع لانه بصراحه مزحوم جدا

صمت المشاعر يقول...

ههههههههههه ياخبر ابيض ايه المواضيع الخطيره والمهمه اللي اتكلمتوا فيها دي دا انتم اتكلمتوا في حجات كتير اووي لدرجه اني اتلغبطت ومش عارفه اناقش او علق علي اي موضوع المهم ما علينا


ندخل بقي في الموضوع اللي انا عاوزه اضيفه لمواضيعكم القيمه وهو ان اللي كانهناك جه هنا ومحدش عارف يرجعه مش عارفه ليه بس خير خير متقلقوش

العيسوى الصغير يقول...

ماشى نتكلم هو حد منع الكلام

غير معرف يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه