اخبار

الخميس، 23 أبريل، 2009

كبـَّر.. تعيش!!


كَـبَّر.. تعيشْ

قُول للِّى محتاجْ لَكْ: مفيشْ

اللى اختَشوا ماتوا

خلاصْ

اتعلَّم انت ماتخْتِشـيشْ!!

الليل هَجَمْ

وانتَ اللِّى شّيِّدت الهرَمْ

بتمدّ إيدكْ للعَجَمْ..

شَاغِل دمَاغَكْ مين هيحْكُمْ فى البلدْ؟

تِفْرِقْ مع الأرنبْ فى إِيه..

لو راح أسدْ

وغزَالْ حَكَمْ؟!

**********

كـبَّر بَقََى

هوَّه انتَ فَرْحان بالشَّقا؟

هوَّه اللِّى كـبَّر كان تِعِبْ

وللاَّ اللِّى دَوَّر كان لقَى؟

مِن كام سنَة..

شايل حضارة كام سنَة

بِتلِفّ بيهُم عَ الجيرانْ..

تفرِشْ ستارة قُوّتكْ

وتخَبىِّ فى الضَّعف اللِّى بانْ..

تفرحْ عشان نقْل الملِكْ

ترقصْ عشان المقبَرة

إزَّاى هتمشى المركبة ولسَّاكْ بتتشَعْلقْ وَرَا؟!

زَحَف التَتَار على باب مدينتَكْ

وانتَ تايِهْ فى السؤالْ

هل ياتَرى

خوفو اللى بانى الأهرامات لُهْ كام وَلَدْ؟

مين مَلـِّكُه وإمتىَ اتولَدْ؟

قبل امَّا تمسِكْ فى "التـَّاريخ"

امسِك فى "جغرافيا" البَلَدْ!!

*********

طُول عُمرنا

طُول عُمرنا بْنِكْتِم جراحنا فْ قلبنا فْ آخْر السنة

ونكتب على وِشّ النتيجة:

"عامْ سعيدْ"!!

طُول عُمرنا

نِروِى أمَلنا بصَبرِنا

يطرَحْ أمَلنَا صَبرِنا

والصَّبر يطرَح مِن جديدْ..

طُول عُمرِنا

الحِيطْ بيمشى جنبِنا

ونغَنىِّ بُكرَة الخير يزيدْ..

طُول عُمرِنا

بنْبيعْ فى راسْ سِيدنا "الحُسين"

علشان "يَزيدْ" !!

**********

هَتعيشْ تهادِنْ..

مرْحبَا

هَتعيشْ تنَاضِلْ..

مَرْحَبينْ!!

كلّ اللِّى بيناضِل مهادِنْ

وانتَ بسّ تروحْ لمين؟

أحسن لك اهرب مِ الحَالِين..

عِيشْ بِينْ وبِينْ..

إيَّاك تقومْ

إيَّاك تنامْ

إيَّاك تثُورْ

إيَّاك تحبّ..

البِسْ قميص الدَرْوَشَة

والدمّ كِدْبْ!!

امْسِكْ بسيفْ المعرَكَة

وارقُصْ على ضَهْر الفَرَسْ..

اشْتِم فى كلّ السجَّانين

واشتِم فى كلّ اللِّى اتحبَس!!

تهرَب لفِين؟

اسمَكْ مُجرَّد أمْر فى جيوب العَسَسْ!!

**********

إحْنا اللِّى بنفكَّر غَلَطْ..

واحنا اللى عايشين بالعَبَطْ

إحْنا اللى بنموت فى المعاركْ

والمدابحْ

وفْ سَواد البحرْ

وفْ قَطْر الغلابة

وفى السلام!!

إحنا اللى عايشين

والسلام!!

إحنا اللى مش فارق معانا الأغلبية والمعارضة

إحنا اللى لمـَّا نشوط أمَلْ

لازم أكيد يضرَب فى عَارضَة!!

إحنا اللى سامعين الكلامْ..

إحنا اللى سامعين الأوامر

مِن "صباح الخير يامصر"

لْحـَدّ "قرآن الختام"!!

إحنا اللى راضيين باللى فَاضِل مِنُّهُمْ

بالشّمس

وهلال الشّهور

علشان نصُوم!!

أغلب من الغُلْب الغَبى

وهمومْنا بتبَكِّى الهمومْ..

بنعيش خفيفْ

وننام خفيفْ

ونموت خفيفْ..

طبْ ليه بقَى بعد اللى فاتْ

مات اللى مات

فى طابور طويل

علشان رغيفْ؟!!

**********

هُوَّه احنا ليه مش محسُوبين؟

هُوَّه احنا ليه مش محسُوبين

رغم انّنا بنـزيد كتير.. الله أكبرْ؟؟

نِتْعَدّ بسّ ايام صناديق الانتخاب

وساعتها بسّ بحكْمِتُه بْنتعَدّ أكتَر!!

*********

كَبـَّرْ

وفكَّرْ

فى انتخابات النوادى

وفى أمور المنتخب

والكاس

وفى لِبْس البنات

تابِعْ مسابقات الجَمال والموضة

دَافِعْ عن رِيادتَك فى الدّراما

إحنا أجدعْ مُنتجِين لمسلسلاتْ!!

عِيشْ زَيّنا

إيَّاك تفكَّرْ فى اللى جَاىْ

خَلِّيكْ.... مَفيشْ!!

حَظَّكْ كِدَه

فَكـَّرْ .. تموتْ

كَبـَّرْ.. تعيشْ!!

أشرف توفيق
نشرت فى الدستور الأسبوعى 15/4/2009

هناك 55 تعليقًا:

مصطفى شادى يقول...

يشرفنى جدا يا استاذ اشرف انى اكون اول واحد يرد على القصيدة الرائعة دى

واللى وصفت فيها حالنا بالظبط

انت حركت جوايا مشاعر ثورية على فكرة
ولو اتقبض عليا هاقولهم عليك

لا بصراحة

قصيدة اكتر من رائعة زى ما عودتنا دايما

-=مصطفى شادى=-

العيسوى الصغير يقول...

قلم كتب فابدع
هذا الفلم انت صاحبه

د/ماهر محمود يقول...

حالة شعرية منفردة

Ahmed Talk يقول...

أحنا بالضبط من أول القصيدة لاخرها انت وصفت حالنا بالضبط

Bondoka يقول...

فعلا كلام مظبوط تمام

عاشقه وغلبانه يقول...

فَكـَّرْ .. تموتْ

________________________

انا دي

كَبـَّرْ.. تعيشْ!!
____________________
مش عارفه ابقي دي خالص



اسلوبك جميييييييييييييل بس انا حسيت الدنيا بتضلم عندي اكتر ماهي

عمرو فكرى يقول...

تِفْرِقْ مع الأرنبْ فى إِيه..

لو راح أسدْ

وغزَالْ حَكَمْ؟!

شق القمر يقول...

ما شاء الله
حضرتك وصفت الحال بشكل رائع
وأسلوب سهل وسلس

وفعلا جمعت كتير من مشاكلنا

لكن يمكن حضرتك لسه موضعتش خطة الحل
سأنتظر من حضرتك قصيدة جديدة نتحدث فيها عن احتمالات الحياة بدون تكبير ولا تفكير ان الموت احسن والسلام

احتمالات تعيّشنا ولو على حافة الانبساط
بس عالاقل هتساعدنا اننا نعيش فى أمان

واحتمالات يمكن تحركنا
يمكن نوصل لأهدافنا من الحياة ونعيش :)

مجداوية يقول...

السلام عليكم

أهو كده

ولا أروع


فعلا حضرتك أثبت أن القدرة الكبيرة على الإضحاك بيبقى وراها ألم كبير

وشر البلية ما يضحك

كلام بيمس كل جرح فينا ومخبيينه بضحكة
قلنا نضحك من همومنا وألامنا يمكن تخف لكن مبتخفش وبقينا بنضحك على نفسنا وبنصدق إننا بضحك سعادة واحنا بنضحك بُكى

لكن لو افتكرنا دايما إننا لازم في النهاية كلنا حنموت يبقى لازم نفكر

ونبطل نكبر

ودعوتك كبر تعيش
زي ضحكنا بيقول عكس الحال

يعني يا ناس
يا هوووو

كلنا حنموت

فكر تموت
على حق مش فطيس

دعوتك وصلت
وألف شكر

يوسفيات..محمد يوسف يقول...

جامدة ياأشرف


شعرك متماسك للغاية

إنـســـانـة يقول...

قريتها وهى منشورة فى الدستور العدد الإسبوعى يوم الأربعاء الصفحة الأخيرة .. قريتها بصوت عالى وفرحة عارمة وزوجى صححلى الأخطاء اللغوية نتيجة لسرعتى فى القراءة


بجد يا أشرف انا فخورة بيك والله .. استمر وربنا يوفقك يارب .. عقبال ما نباركلك على رئاسة تحرير جريدة محترمة إن شاء الله

فـريـد إدوار يقول...

كبر .. تعيش
جامدة جدا بجد
ربنا يوفقك يا استاذ اشرف

فــريــد

تأثير الفراشة يقول...

"ياااااااااااه"
هى دى ردت فعلى لما قريتها،بالذات جزئية العيش على رفات الماضى و جزئية الانفاق الشدييييد على المسلسلات، فعلا يريتنا نصرف كده على برامج تنمويه أو مشاريع قومية،... بالتوفيق، و برضه أكيد فى أمل.

الشاعر محمد عبدالرحمن يقول...

استاذ اشرف القصيده جميله جداً جداً
وانا سمعتها من حضرتك بندوه كلية التجاره
ربنا يوفقك انت كاتب متميز
وعلى فكره انا من بلقاس زيك كده
تقبل مروري

darsh يقول...

أخيراً نزلت شعر على البلوج،

مش عاوز اغوص في رأيي في القصيده خصوصاً اني سمعتها أكتر من مره وشايف انها من أهم القصايد اللي انت كتبتها على شمولية الرؤية إلى حد ما بس ده ما يمنعش ان فيها صور متميزة جداً وقوافي جديدة كمان، طبعا كالعادة، والأجمل انها مختلفة وفيها تطور ملحوظ جدا، وطبعا انت فاهم اني اقصد تطور يعني اختلاف عن كتاباتك قبل كده،

غروب يقول...

تحفه بجد يا اشرف من زمان مش شوفنا اشعر جديده ليك

عجبتنى اوى

تسلم ايدك

مخبر قمل دولة يقول...

حكيم وفيلسوف بجد في القصيدة دي
روعة حقيقي
من اولها لأخرها
يستحسن لو سجلتها بصوتك ورفعتهالنا ع النت :D
بس بجد اروع حاجه قريتهالك

عَبْدو المَاسِك يقول...

الله عليك يا معلم

ينصر دينك

غير معرف يقول...

mish la2y kalam a2oulou,......... begad to7fa

قلب ارهقته الاحلام يقول...

جمييله اوي فعلاً

مفيش حل الا اننا نكبر بجد

بس ياتري لو كبرنا هنبقي عايشين ؟؟


تحياتي ليك,,,,

kochia يقول...

جميلة جداا
مش قادرة اقولك عجبتني قد ايه وقراتها عدة مرات

تحياتي

مندور يقول...

الا صحيح يا اشرف خوفو له كام ولد؟

دهاء سياسي يقول...

صدقت

أدميت قلبى يا سيدي ..

أرجو ان نصنع الأفضل القادم

يا رب تكون بخير :)

shemoo يقول...
أزال المؤلف هذا التعليق.
shemoo يقول...

جاااااااااااااامد يا عم اشرف كالعاده ابداع
وكلام اقوى واقوى واحساس عالى وصل للسما وشكله هيوصلنا لحته تانيه
ربنا ما يحكم علينا بيها

شكرا يقول...

المهم

انك مكبر واللي زيك اشطر


في زمن الهو فيه معكر

ريحانة يقول...

اعتقد من غير ما تقول
احنا مكبرين ع الأخر
وعشان كده عايشين تمام :)


النص رائع
تسلم

نهر الحب يقول...

كلام فى الجون بجد
تحياتى

Soooo يقول...

على فكره
البتاعه دي انا سمعتها من واحد صاحبي قبل ماتنزل هناك في المدونة

ولو مش مصدقني .. راجع التواريخ ياحضرة

مش ناوي تعزمني على فيسكافيه بقى ؟؟؟
وهشوفلك شقة فول ايجار جديد .. وايه .. على شريط القطر .. مش جمبه




سلاموووووووووووز

عبد الحميد محمود يقول...

إحْنا اللى بنموت فى المعاركْ

والمدابحْ

وفْ سَواد البحرْ

وفْ قَطْر الغلابة

وفى السلام!!

.........

عملاق عامية

كل قصيدة ديما أجمل من اللي قبلها

بسم الله ما شاء الله عليك

ربنا يرفع ذكرك كمان وكمان

رغم إني أفضل أفكر وأموت

فكرتني ببيت شعر فارسي بيقول

لا تكن عاقلا فتحمل هم المجانينِ

كن مجنونًا ليحمل همك العقلاءُ

خالص حبي

روح طفلة يقول...

السلام عليكم ورحمه الله
حقيقة لا اجد تعليق يناسب هذه الكلمات الرائعه التى تعبر بصدق عن احوالنا (ماشاء الله ولاقوة الا بالله)
واعجبتنى كثيرا هذه الكلمات

إيَّاك تفكَّرْ فى اللى جَاىْ

خَلِّيكْ.... مَفيشْ!!

حَظَّكْ كِدَه

فَكـَّرْ .. تموتْ

كَبـَّرْ.. تعيشْ!!

كراكيب يقول...

بعيداً عن الشعر الجامد جمودية ده
قولي
اعمل فيك ايه
لأ قولي بجد
يعني حقيقي حقيقي اللي هتقولي عليه انا اعمله علطول
انت حتة بني ادم تحفة رهيب مالكش حل
شوفلي فيك صرفة
كتابك قريته خمستاشر, تلاتة وستين مرة كدة سبعة وسبعين
ومقالاتك في الدستور مجنناني
وكنت هموت وافهم امتى هتنزل شعرك في حتة والحمد لله اوي يعني لقيت قصيدتك في الدستور
ده انا كنت هعمل عيد ميلاد يوميها
ايوة كدة كل اسبوع من ده بقى لو سمحت
وديوان شعرك بقى يتزل قريب ارجوك
يعني لو سمحت من فضلك بعد اذنك لو مش حايدايقك ولا حايعطلك ديوان شعرك ينزل بقى يا استاذ ريشو مش بحب الكسل انا..هه.. ماشي؟؟؟؟؟

بس بقى كفاية رغي بقى يا مرام ما تصدعيش معاكي الراجل

طيب خلاص انا ماشية اهو.. بس ياريت نعرف قريب اخبار ديوانك واللا انت مش ناويها دلوقتي اصلا واللا ايه.. اشطة

ريشو باشا
peeeeeeeace

miro el niro kwaniro

mosooz يقول...

استائ اشرف بجد انا كنت مستنى القصيدة دى بفارغ الصبر من ساعة ما سمعتها منك فى جامعة المنصورة.
والحمد لله حققتلى حلمى
تسلم ياغالى

تحياتى

ساعه الغروب يقول...

انا بجد لقيتنى بعتلك كل تحياتى بعد ما قرات الجمله الرائعه
"اسمك مجرد اسم فى جيوب العسس"


ربنا معانا بقى وادينا عايشين زى ما انت قلت

!!!!!

تحياتى بجد


رائع كعادتك

أحسن تـستاهـل يقول...

طب اقول ايه
اروح فين وآجي منين

بجد يا أشرف انا اصلا لما قريتها في الدستور عجبني كام بيت يختييييييييي
أكنهم بيتقالولي

أشرف.. ديوانك الشعري امتى بأه؟؟ الله بأه؟؟

مها ميهوووو

غير معرف يقول...

عِيشْ زَيّنا

إيَّاك تفكَّرْ فى اللى جَاىْ

خَلِّيكْ.... مَفيشْ!!

حَظَّكْ كِدَه

فَكـَّرْ .. تموتْ
كَبـَّرْ.. تعيشْ!!


اولا .... انا مش عارف اقولكـ غير بجد انتة فنااان للابعد الحدوود ... يعنى يمكن بتشيل كلام كتير من ع طرف لسانا عشان تقولوا ....

غير معرف يقول...

ايه يا عم اشرف مالك كده
شكلك اتكبرت علينا يا عم ومعتش بترد علينا
ماشى يا عم الامور
عمك احمد السعودى بالكويت

hamada يقول...

يفتح باب بيت المدونين ذراعيه لكل الموهبين في :
1/ القصة القصيرة
2/ الشعر بشتى أنواعه
3/ الرواية "رواية سنوية سنقوم بنشرها في الجريدة"
4/ المقال الصحفي
إذا وجدت في نفسك القدرة على المشاركة أرجوا التواصل معي على الميل التالي
arabicsabah@yahoo.com
شروط المسابقة
1/ ..............................
2/ .............................
3/ ..............................
لا يوجد شروط الشرط الوحيد هو العمل الجيد , والعمل المحترم البعيد عن الإسفاف
المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
أرجوا التفاعل معنا في الجروب على العنوان التالي
http://www.facebook.com/group.php?gid=45202724108#/group.php?gid=78080770039

علي يقول...

طيب يا اشرف مش كنت كملت جميلك و قلت لنا نكبر ايه بالظبط !

رحله البحث يقول...

رائعه كمت تعودنا منك عاى الروائع

إحنا اللى لمـَّا نشوط أمَلْ
لازم أكيد يضرَب فى عَارضَة!!

غير معرف يقول...

من جمال القصيدة مش عارف أقول لك إيه

بس عشان الرقابة هاقول لك

" أسكت تعيش

الشعر ما يأكلش عيش

لو قلت كلمة حق يوم راح تلقى جيش

بيهز بيتك زي حصن جداره هيش

فيه ناس بترضى بالقليل

و كتير بيرضوا ... بالمافيش

و اسكت .. تعيش "

طبعا رد الرقابة مش هاييجي جنب قصيدتك حاجه

أشوفك بخير

سلام عليكم

يوميات شاب منوفى يقول...

كبر تعيش وتاكل دشيش

دكتور مستكنيص يقول...

ممتعة أوي ياأشرف

كراكيب يقول...

ايييييييييييييييييه انت فين
ايوة انا لسة قريالك في الدستور
بس انت فيين برده
انت فين هنا يعني
الله الله
ايه بقى.. تعالى انت مابتجيش ليه
طب انا مستنية اهو (واحد حاطط ايده على خده) ماتتأخرش

hend...hanady يقول...

بجد هايلة وترفع لك القبعة وللاسف معبرة عن واقع مرير ومأساوى

رانيا منصور يقول...

جميل أوي يا أشرف!

حقيقي بساطتك مرعبة في بث الحزن المكتوم فيك وف الكل

عموما زي ما قلت وقالت ريحانة..
احنا بالوراثة مكبّرين!

رجّعتني اقرا تاني! :)


شكرا..

ومازلتُ أتعلم يقول...

راائعة وجميلة جداً

إسلوب جميل
تحياتى

أخف دم يقول...

السلام عليكم
مش عارف بجد ارد على كلامكم الجميل ويارب القصيدة تكون فعلا زى ما انتوا قلتم وكفاية انى حاسس انكم حسيتوا بيها وأثرت فيكم بصورة أو بأخرى
بالنسبة للديوان الجاى إن شاء الله ينزل مع معرض الكتاب الجاى لأن الشعر بياخد منى وقت عشان باحاول اكتب حاجة مختلفة ومؤثرة إلى حد ما مش أى كلام وخلاص فده بياخد منى وقت أكتر من المقالات بكتير.
شكرا لكم مرة تانية ويارب دايما اكتب حاجات تعجبكم
وبالمرة آسف على التأخير فى البوست الجديد بس شوية ظروف معلش
منورين
صباحكم فل
أشرف

ثورة يقول...

هـكتـبها على ورقة
و هـ حـطها ضمن أوراقي القيمة


ألهمتني بفكرة
و جزاك الله خيرا

lionking يقول...

ههههههههههههههه

والله كل كلمة اتقالت بتعبر عن حالنا تماااااااااااام

وفعلا :: احنا ليه مش محسوبين؟؟

الله ينور عليك يا اشرف

على فكرة انا اول مرة ادخل المدونة العسل دى

وبجد مدونة تحفة فعلا ( اسم على مسمى)

محمد عقل يقول...

قصيدة اكثر من رائعة يا استاذ اشرف
ولا استطيع ان أصف لك مدى سعادتى عندما قلتها للمرة الاولى بندوة اسرة رسالة بجامعة المنصورة
تقبل تحياتى
محمد عقل

amreltokhy يقول...

الله عليك يا استاذ فعلا قصيدة جميلة جداً ومعبرة عن الفيلم اللى بنعيشه كل يوم وهو مذكرات متعوس شوف يااستاذالعنوان ودقق فيه مذكرات متعوس كان فى واحد مصرى غلبان زى كل الغلابة والمساكين اسمه متعوس موكوس الغلبان بيخرج كل يوم الصبح يجرى عالشغل علشان يجيب اخر النهار 3 ملطوش يسد بيهم جوع عيالة اللى اول مايشوفوا المش ابو دود يهيصوا ويقفوا فى الطابور اصلهم 8 من العيال بس رغم الفقر الا انهم مؤدبين زى القرود .فصلة تعريف القرد فى نظر الحكومة القرد هو كل انسان غلبان عريان حافى يوم ما يبقى عندةشعرة من الطموع يكون يدوبك بيحلم بالرغيف من غير غموس والنوم على جرف الترعة عريان يعنى بلبوص ويوم ما ينام يكون جواغيدلازم اكيد علشان ولاجل ما هرى بنده تقريص الناموس تنزل الحكومة بامراعتقال تجرة من وسط القماحى فى الغيطان ويحدفوة فى البوكس(البوكس هووسيلة المواصلاتالمجانية التى توفرها وزارة الداخلية بالتعاون مع وزارة النقل والمواصلات لتوصيل القرود للقفص او الزنزانة الى فى جنينة حيوانات وزارة الداخلية ) ما هوا صلة غلبان فاكرهم واخدينة القناطر علشان هو مصحصح وشاطر لكن الحقيقة تيهة بين اوراق المحاضر فى اقسام البوليس لما المخبر والعسكرى وحتى الشاويش يضحكوا ويهروا القرود ضرب وتسبيخ ولما الفجر يطلع يدولوه الطريحة كاملة تنزله اللوز والى تشوفه تقول ياحرام ويصعب عليك تقول فى سرك ليه كدا يرد الباشاعسكرى الدورية ويقولك اسكت احسن تبقى زية بعد ما نعملك عملية جراحية وساعتها تعرف بجد ايه هو معنى الديموقراطية ويجيلك المخبر يضربك لما يبان لك صاحب يسال عليك ساعتها بس هيلاقيك مرمى مع باقى القرود المتشرحة والمقتولين فى المشرحة يمكن يقول الظابط كمان انك ارهابى ياعم فوت ماانت ميت .تصرخ بعلو صوتك من جوا كيس الجثث ياناس حرام دا انا مواطن شريف برىء ياعالم والنبى داانا حتى بشرب مية من المواسير والميه هى اللى جابتلى البواسير (البواسير مرض يصاب به القرد عند دخولة زنزانة القسم نتيجة تحرش المخبرين بيه وبيقول المثل اللى يخاف من البواسير تنزله )ساعتها ماتلقيش كلمة تقولها غير اعتراف وتغنى زى محمد منير ماقال اقر انا المتعوس اعلاة ساكن فى المجرور اياه انى عشت العمر هدر ويضربك امين الشرطة على قفاك فترجع تغنى لما النعال عليك تدوس وهنا تدخل واحدة من الملفوفين فى الملايات ترمى على الكل الفلوس وتلبسك قضية دعارة يقولك الظابط دا انت فى اعارة غنى وافرح وانبسط تغنى وتقول احلف بنساها وظباطها احلف بالطوبة وبالرملة لاهين الدولة واخربها وازل شعوبها واحلبها وفلوسها فى سويسرا انا راح اهربها طول ماانا عايش فوق الدنيا وفى النهاية تنزل كلمة يتبع لان الفيلم له جزء تانى هيتعرض تانى يوم ملحوظة الفيلم على نايل سينما ودا تقديرا من حكومة الحرمية لظروف الأزمة المالية الجزء التانى بعنوان القطر والعبارة هههههههههه شوفت بقى الفيلم نيجى دلوقتى للمسابقة وسؤال الفيلم بيقول اذكر اسم الظابط واسم المتعوس واسم المخبر اللى اتحرش بيه لوعرفت الأجابة ما تتصلش لان تليفونات مصر متراقبة

احمد سعد يقول...

المعني حلو

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡