اخبار

الخميس، ٥ مارس ٢٠٠٩

أنا والفيس بوك!!


أول ما بدأت اعرف يعنى إيه انترنت وشات وياهو والكلام ده.. وبعد ما عملت إيميل..بقيت محتار اعمل ايه لما اقعد على النت يعنى؟؟ يعنى كنت باروح سيبر واقعد على النت وابص للشاشة.. طبعا مش عارف ولا فاهم أى حاجة.. أفتح الإيميل اللى أساسا مفيهوش ولا اسم يوحد ربنا..واضغط على الأيقونة الزرقا اللى على سطح المكتب اللى قالولى انها صفحة النت..وخلاص!!
وف مرة أتانى الفرج متمثلا فى واحدة شابة جميلة دخلت عليا فجأة فى الشات وقالتلى ممكن نتعرف؟؟ وبعد ساعتين تلاتة من الكلام المتواصل والفرحة الغامرة ان فيه حد عبرنى معرفش جاى منين بس عبرنى وخلاص.. اكتشفت فى الآخر ان الشابة الجميلة دى هيه صاحبى اللى كان قاعد على الكرسى جنبى وبيضحك بقاله ساعتين على واحد هوه قاعد يشتغله من ساعتها!!
نصحنى واحد صاحبى قاللى يابنى فيه اختراع اسمه شات الياهو.. فيه بقى آلاف من البشر ادخل وكلم الناس.. وبما إنى باستفيد من النصيحة دخلت هذا الشات الملعون الله يحرقه وبدأت فى الاندماج.. يوم واتنين ولقيتنى بقيت بادخل عليه كتير وقاعد اتكلم بالساعات.. ده كله عشان واحدة تكلمنى وتقوللى أنا باحب السهر والفسح والسرمحة مع الشباب وأنا اقول لها وأنا باحب السباحة والرماية وركوب الخيل فتقوللى طب تصبح على خير فأقول لها وانت من اهله.. وأكتشف بعد هذا الحوار الفاشل دائما انى قضيت تسعة ساعات من النت المتواصل.. وياريتهم بفايدة..
وماكان منى إلا أن قاطعت هذا الاختراع ووقفت مع نفسى وقفة من اللى هيه كده لغاية ما بطلت.. أينعم ظهرت عليا أعراض الانسحاب من الإدمان ده وكنت باروح للواد صاحب السيبر أقول له ابوس إيدك صفحة نت واحدة.. وهوه ميرضاش زى فيلم الباطنية.. بس المهم انى بطلت..
وبالمثل.. من فترة ظهرت هوجة الفيس بوك.. وكام واحد قاللى لازم تشترك فيه عشان مواكبة التطور التكنولوجى وكيفية تأثيره على الأيدلوجية الفكرية للفرد المستهدف.. وبما إنى بقى عندى مشكلة فى الأيدلوجية الفكرية ولسة مصلحها قريب ودافع خمسين جنيه غير أجرة الراجل..وكمان عندى عقدة قلت اصبر شوية وبلاش اشتراكات لغاية ما اعرف الفيس بوك ده فيه ناس بيحبوا السهر والفسح والسرمحة مع الشباب برضه وللا لأ.. باعتبار ان هواياتى لسة ماتغيرتش برضه السباحة والرماية وركوب الخيل..وخاصة ان الفيس بوك فى نظرى وباعتبارى خريج آداب إنجليزى يعنى صباح الفل على الترجمة الحرفية تبقى معناها (كتاب الوش)!!.. يبقى إيه فايدة انى أحط صورتى مع ناس وخلاص فى موقع مفيش فيه كلام.. مجرد شوية صور لوشوش ناس!!
وبعد فترة بدأت الرؤية تتضح..وعرفت من مصادر موثوق فيها ان الفيس بوك ده كويس وابن حلال ومش رجس من عمل الشيطان.. عملت فيها جدع واشتركت على الفيس بوك. وده هوه سبب الكلام اللى فات ده كله.
ياجماعة أنا مش فاهم أى حاجة بجد فى الموقع الملعون ده.. أنا مشترك بقالى شهور وكل علاقتى بيه ان بيجيلى على الإيميل رسايل ان فيه فلان عايز يضيفك اقوم ادخل على الموقع وادوس على أكسبت وخلاص..يعنى لو كلمة أكسبت اتغيرت مش عارف اتصرف ازاى ساعتها أساسا؟؟
وبعدين أول ما دخلت على الفيس بوك لقيت كلام طلع لى فجأة بيقول: ازيك يا أستاذ أشرف.. طيب أنا أوفلاين على الياهو وعلى الهوتميل.. ده جالى منين بقى؟؟ طبعا قعدت ادور تحت الكرسى وتحت السرير وفتحت الباب يمكن بتاع المكواة.. وكمان قلت يمكن يكون واحد من الأمن.. أنا اعرف ان النت متراقب.. مش يمكن واحد منهم بيقوللى ازيك يا أستاذ اشرف احنا مراقبينك والدليل اننا شايفينك من قلب الكنيست ذاته .. اقصد من النت ذاته.. ولما تاه دليلى ومالقيتش حد قفلت ف وش المذكور اللى بيكلمنى بأدب بكل ألاطة وجهل منى.. وطبعا ده لأنى معرفش ان فيه شات فى الفيس بوك أساسا..
وبعد ما اضغط على كل الزراير اللى فى الصفحة بتاعتى على الفيس بوك أكتشف بعد كام يوم ان جايلى إيميلات ان فلان وافق انه يقبلك صديق وفلانة بتقول لك شكرا على اللى انت بعتهولها.. طب وعهد الله ما بعت حاجة لحد..طيب مين اللى طلب الصداقة دى يعنى أصلا وخصوصا انى معرفش فلان ده ولا فلانة دى؟؟ طبعا الإجابة معروفة ..إنه أنا أيها الأخوة!!
يجيلى واحد صاحبى يزورنى ويشوف صفحتى على الفيس بوك ويلاقى ما يزيد على ألف جروب ودعوة.. يقول لى انت سايب دول كلهم ليه؟؟ وطبعا أجاوب بألاطة: هما دول يعنى باعتين لى عشان عايزين إجابة وكده وللا للعلم بالشيء؟؟
أدخل على البروفايل بتاعى والاقى ناس مشكورة بتكتب كلام حلو للعبد لله.. وطبعا اقعد من فرحتى أعبر عن إعجابى بطريقتى المعهودة وهيه تكتكة الزراير.. اضغط على الزراير كعادتى وانا مش فاهم أى حاجة.. أكتشف بعد كده انى شطبت كلام ناس كتير جدا..
عاااااااااااااااا
كل ده كوم والجروب بتاع العبد لله أصلا كوم تانى..بادخل واعيش بقى.. أشطب فى ده والغى ده وارمى ده وامنع ده.. الجروب بتاعى بقى ونازل فيه تلطيش..حتى لما صديقة عزيزة طلبت منى إنى اضيفها للجروب عشان هيه مش عارفة تدخل.. رديت عليها بأنى أعرف فى الفيس بوك زى ما محمد ابو سويلم بتاع فيلم الأرض يعرف فى الفمتو ثانية بتاع زويل.. فما كان منها مشكورة إلا أنها عاملتنى بنوعية : كل بإيدك اليمين ياحبيبى وماتوسخش نفسك وانت بتاكل.. وقعدت مشكورة توصف لى اضغط هنا الأول وبعدين اروح على هنا ..حاجة كده زى برنامج: كيف تصبح جاهلا على الفيس بوك بدون معلم!!
وبعد كل هذا لم أجد إلا حلا واحدا:
كشفت راسى واتجهت يا فيس بوك
أما بالنسبة للأخوة أصدقائى على الفيس بوك.. فمعلش ياجماعة اعذرونى.. اللى يبعتلى أى حاجة وتوصله الإجابة بعد ست سنين .. مايقلقش.. ده بس عشان النت بطيء.ولو حد كتب حاجة ولقاها مشطوبة بعد فترة .. مايقلقش .. بكل أدب واحترام يكتبها تانى وهوه ساكت .. ومش عايز كلام كتير..الناس بتقف جنب بعضيها يعنى.

هناك ٧١ تعليقًا:

عاشقه وغلبانه يقول...

هههههههههههههههههههههههههه
ههههههههههههههههههههههه
ههههههههههههههههههههههههههه
هههههههههههههههههههههه

استني هاتكلم اهو

عاشقه وغلبانه يقول...

فكرتني بنفسي بالظبط
فضلوا يقولوا فيس بوك وانا الفضول هايموتني
قولت اعمل اكونت
وبعد محاولات مضنيه عملت واحد
الكلام ده من كام شهر
ولحد دلوقتي مش فاهمه مين رايح فين
المشكله انه حتي مش بتختار ناس عاجبك اسلوبها ولا حاجه
انا مش فاهمه هم عايزين ايه

اللي فاهم يفهمني

انا عندي اكونت زمانه حمض والله
ومن كتر الايميلات اللي بتيجي روحت غيرت الايمي علي ايمي تاني مش بستخدمه
كان صدعني
ههههههههههههههههههههه


لما تفهم قولي

عاشقه وغلبانه يقول...

علي فكره الايمي ده اللي هوالايميل بس نسيت اللام
هههههههههههههههههههه
من فرحتي بنفسي

simply me يقول...

ههههههههههههههههه
الظاهر كده ان الفيس بوك ده تقيل على معده المصريين

انت كاتب اللى بيحصل معايا بالظبط
انا اشتركت فيه لما قالوا ان دفعتناالمصونه عامله جروب عليه وقال ايه بينزل فيها اخبار الامتحانات
اشتركت ودخلت انى الاقى اى اثر لجامعه عين شمس حتى مافيش

عملت بحث فى الموقع على كل كلمات اللى اعرفها تدل علينا ماافيش
كان ناقص يطردنى من الموقع
ههههههههههههههه


بس ياسيدى وبعدين عملت زيك كده ورحت للعيال ودلونى على مكانهم
بس برضه دمه تقيل على قلبى موووووووووت

بايخ اوى وشكله رخم ودوشه واى حاجه بعملها بتتنشر عند كل الناس
وكله كوم وحكايه ال word verification اللى لازم اكتبها كل ماعمل حاجه دى كوم
لو بعت رساله ولا كلمت حد ولا ضيفا صديق ولا ضيفت صوره ولا ولا
خنقونى الصراحه

قلت عنى ماعرفت اخبار الكليه واللى فيها هو من حلواتها يعنى

سيبك بقى من الفيس بوك وركز فى المدونه شويه مش كل شهر على ماتكتب بوست
:)
سلام
وتذكر: انت مش لوحدك يا اشرف فى 50 مليون تايه زيك
ههههههههههههههههههههه

Remas يقول...

ههههههههههههههه
بجد انا اول مره في مدونتك وان شاء الله هاتبعك باستمرار
بجد اسم المدونة اسم على مسمى لانك بجد دمك خفيف جدا
على فكره انت كأنك بتتكلم عنى في الفيس بوك والله مش فاهمة فيه اى حاجة ولا عارفه اصلا ايه اللذيذ فيه وايه اللى بيشد الناس ليه
انااعرف ناس بيقعدو عليه بالساعاااااات ونفسي افهم ليه
انا عملت الاكونت قلت يمكن لما اعمل اكونت اقدر افهم فيه حاجة لكم هيهات لافهمت ولا عجبنى اصلا
بجد قلت اللى جوايا من ناحية الفيس بوك بس طبعا بطريقة لذيذة ودم خفيف
تحياتى
ريم

غير معرف يقول...

ههههههههههههههههههههه
الحمدلله .... انا كنت فاكرة نفسى الوحيدة اللى مش عارفة تتعامل مع هذا المدعو الفيس بوك ...طمنتنى على نفسى ....

حسام غانم يقول...

ههههههههه

لا ربنا يعينك يا عم

мαησηα يقول...

هههههههههه هاقول ايه ما ات اخف دم فى مصر

ربنا يسعدك زى ما بتخلى الواحد يضحك من قلبه كده قول اميييييين

بص ياسيدى الموضوع سهل والله

بس انت شوف حد بيفهم فيه كويس واقعد معاه ع الايميل واستفسر منه عن كل حاجة

اقولك من فايدته ان بيبقى فى موجز ملخص لاى حاجة بتكتبها فى مدونتك

ممكن كمان تعمل مشاركة لبعض اعمالك و حاجات كتير مفيدة

هو اينعم كل ماتفتح ايميلك هتلاقى سبعتلاف طلب اضافة وبيهنجوا الجهاز

بس مفيد والله واذا حبيت تفهمه اكتر انا تحت امرك

او اسأل سارة بنوتة لاسعة هى اروبة فى الفيس بوك

واتمنى يارب انك تنتشر فى الفيس بوك وكتاباتك الحلوة توصل لكل الناس

ان شاء الله

بس انت ماتعقدش نفسك وتاخد الموضوع على صدرك ماحدش واخد منها حاجة يابنى والله

حواء يقول...

معلش تقريبا كلنا كده ولا ايه
ايه العوباره
هههههههههههههههههههههههههههه

خمسة فضفضة يقول...

السلام عليكم ورحمة الله وبركاته

مش عارفه برضو الفيس بوك ده تقيل علي قلبي ليه ، عندي فيه اكونت من زمان اوي
بس كل ميت سنه مره علي ما افكر ابص هناك ولا اعرف ايه اخبار الدنيا فيه

لا وفيه حاجه كده من ساعة ما اشتركت نفسي اعرف لازمتها ايه ، كل شويه يجيلي ان فلان عملك بوك هل تحب انك تعمله بوك اقوم انا بكل سذاجه اعمله بوك
ايه بوك دي الله اعلم ؟؟ماتعرفش ينوبك فيا ثواب


بوك كده علي فكره :poke


مره من ذات المرات لقيت الاكونت بتاعك فسكتي فابعتلك ركويست اضافه بس ماعرفش ايه اللي حصل بعدها اما اروح اشوفك وافقت ولا لا

علي الله بقي تكون ماوفقتش افجرلك المدونه والفيس بوك ..ههههههههههههههه


سلام

مخبر قمل دولة يقول...

هو انا اي نعم مبحبوش برضه
بس بفهم
( ايموشن واحد بيخبط ببضة ايده على راحة ايده التانية ويلفها ويطلع لسانه ويقول اممممم )
ياللا بقا العبوا بعيد انتو

koukawy يقول...

معلش معلش هي كل حاجه كده في الأول بتبقي صعبه
ههههههههههههههه
هو الحقيقه مش مهم اوي
هو لتضييع الفراغ الكتير الي عندنا
فما تقلقش انت بخير

koukawy يقول...

انا زيك كده برضو مكنت افهم ايه الفيس بووك ده اصلا
و بعدين مع الوقت اتعلمت

Lady E يقول...

لولولولولي وكمان طلعت زميل في انك خريج نفس ذات الكلية اللي انا فيها وانجليش
وفي انك مش عارف كتير في الفيس بوك

بس ايه الترجمة الحرفية والحيرفية دي لا بجد مترجم كويس :)

moro_wbs يقول...

كلنا هذا الرجل ...

الفيس بوء دا في الاول كان زي ما انت بتقول ..

كل شوية تتخض ومنتش فاهم حاجه ...

وكل الناس تقول جامد وانت مش فاهم ليه يعني ..

لحد ما انت بقيت زي الناس اللي بتقول جامد وناس تانية بتقول ليه يعني .. وانت مش عارف ليه .. بس هو فعلا جامد !

بوست جميل جدا .. :)

Tamer Diab يقول...

الساخر كالعادة
مفيش فايدة فيك هتفضل تموتني م الضحك لحد ما تتحبس بشروع في قتل
انا اول مره دخلت الفيس بوك زماااان
وكان زمايلي بيقولولي انت بتدخل تعمل ايه!؟
كنت برد بنفس الاطك بالظبط واقلهم يا جهلة بكرة تتفرجوا عليا -طبعا بتعطيش الجيم زي الصعايدة- وأني اقصد وانا عامل موقع زيه
وطبعا من ساعتها وانا مستني اعرف بكرة ده متي ,لحد ما عرفت ان الواد صاحب الموقع ده اغني شاب في العالم قلت طيب يبقي محدش هيتفرج ان شاء الله عليا

YHYيــوســف الـمصـرى يقول...

ههههههه
وحشنى يا كبيييييير :)

Eslam Eldosoky يقول...

طب خد دي بقي

facebook.com
(1)
قبل الفيس بوك
قاعدين علي النت
في المنتديات أو نعمل شات
أو حتي نعك
بصينا لقينا
الناس حوالينا
بتقول يااخونا
تعالو معانا علي الفيس بوك
ده مفيش أشراف
ولا ناس بتخاف
قول اللي في نفسك
هتلاقي قيودك
بالزوق تنفك... بالعافيه تفك
(2)
بعد الفيس بوك
أصوات بتلالي
دايما في العالي
بتقول أضراب
وتقول تغيير
ولا يوم راح نسكت
وعلي القفا نتسك
(3)
إسراء يا جميله
ياعروسه الليله
كلنا لم ننسي
الدمعه الغاليه
علي الخد تزك
لكن وغلاوتك
هنكمل بعدك
ان كنتي نسيتي
أو حتي رضيتي
تقعدي في البيت وشك في الحيط
والكلمه تموت في لحظه شك

عالم ماريونت يقول...

ههههههههههههههههه
تحفة يا اشرف
انت لسة ليك في السباحة والرماية وركوب الخيل؟؟؟؟؟
ملكش في الصيد؟؟؟؟
على فكرة اللي عايزة اقولهولك ان محدش فينا اتولد وفي في حياته هوتميل ولا ياهو ولا حتى اي سي كيو
الواحد فينا بيتولد ابيض وبعدين المستجدات دي بتجد في حياتة
على فكرة انا استاذة في الفيس بوك وقربت خلاص اشتريه من ملاكة الاصليين ادعي لي انت بس وانا اعملك اوبشنز تخليك تشتغل زي ما انت عايز
هههههه
احنا في الخدمة
رنا

رحلتنا في الحياة يقول...

انا بكره الفيس بوك على الرغم انه مش صعب اوى فى التعامل زى الناس ما فاكرة كده بس هو ممل جدااااااااا وانا بكره الملل احسن حاجة دلوقتى المدونات على الاقل الواحد بيقرا كلام يفيده

Unknown يقول...

وبدأت فى الاندماج



اوعى تخليه ياخدك

عامل زى الندائه

واعراض انسحابه مقحله

اه مقحله

سارة درويش يقول...

هههههههههههههههههههههههههههههههههههههههههههههههههه انا كل دقيقتين ارقع بالضحك بجد لما في البيت شكوا فيا هههههههههههههههههههه

انا اخويا كان بيدخل نت من قبلي فقعد يفرجنى ع اللى بيحصل ف الشات علشان كنت عايزة اعرف واشتغلنا انا وهو واختى واحد يجي ربع ساعة كده هههههههههههههههههههههههههههههههههههه

فما حبيتش ادخل اشيت اول حاجة دخلتها موقع ومنتدى روايتي وكنت قارفاهم في عيشتهم كل ما امشي خطوة وما اعرفش حاجة اقول اسمي واقول انى تايهة ومش عارفة أي حاجة وماحدش يعبرررررررررني

بالنسبة للفيس بوك فانا زيك نت بحسبه رجس من عمل الشيطان بس كنت مسجلة فيه وراكناه لحد ما بنت عمتي فرجتني ع اكونتها وانها بتتواصل مع صاحبتها اصريت استشكفه وبعيد عنك ادمنته بقيت اصحى عليه وانام عليه

المهم بجد لو محتاج تفهم أي حاجة ممكن اعمل شرح بالصور وابعته


ان ماكناش هنخدم اخف دم هنخدم مين يعني ؟؟؟؟؟؟؟

jehan يقول...

وزى ما قالت بندقه واضح ان الفيس بوك تقيل على معده المصريين
لانى انا كمان مش بحبه خااااااالص
اىنعم انا ليا حساب فيه وبدخل عليه كل كام يوم اتفرج على صور الناس وتعليقاتهم انما بصراحه انا شايفه انه مش مفيد ليا انا شخصيا بس والحق يقال
هو فية جروبات حلوه قووووى

غير معرف يقول...

احنا كده الكلام على 3 محاور المحور الاول الشات والنت اول ما طلع وكلنا هبلنا فيه الا ان فجأة اكتشفت ان العالم الفاضية بتهبل ولما ابقى اتكلم مع الناس اللى اعرفهم وماليين الشارع ابقى اتكلم مع اللى مش عرفاهم وبيشتغلونى بس هى مجرد فكرة انك حابب ترسم من خيالك صورة وتتعامل معاها
المحور التانى الفيس بوك اللى انتشر فجأة زى البرد والناس عملة منه موضوع وهما برضه بيهبلوا عليه بس على فكرة الناس اللى بره مش بتهبل زينا يعنى الفيس بوك نفسه اتعمل عنه ابحاث وكتب سواء لتعليمه او للتوصل لاسباب تواجده منها مقولات شبه مؤكده انه كان متصمم لاستخبارات سى اى اه ولتناقل معلومات وغيره ولو كنت بتسمع زيارة لمكتبة فلان اللى بييجى على البرنامج العام فى الرديو كنت هتعرف المعلومة دى
المحور التالت والمهم ان النت عامل زى اى تكنولوجيا حديثة من جهة مضرة ومن جهة مفيدة مجرد اداة فى يد المتلقى هو اللى بيحدد منها ان كان يستخدمها تضييع وقت ولا فى الاستفادة سواء دراسيا او تنمية مهارات زى البلوجر ممكن نتكلم فى مواضيع تافههة وممكن نقلبها طبية او سياسية او دينية للاستفادة والحوار



واخيرا نصيحة قالهالى اخويا من كام سنة لما بدأت اتعامل مع الكمبيوتر والنت قالى كل ما عليكى انك لما يظهر امامك شئ سواء لما يتحرك الماوس او متواجدة باستمرار من كلمات ترجميها وانت تفهمى انت رايحة فين وعايزة ايه وده هو اللى فدنى والحمد لله من ساعة معملت كده وانا بكتشف اللى بيحصل وبتعلم ونقلت معلومات اكتسبتها لغيرى

غير معرف يقول...

اه وعلى فكرة لما تقف معاك حاجة ممكن تستخدم جوجل فى البحث عن معلومات هتكتشف ان فيه كتير كان عندهم نفس المشكلة وطرحوها وكتبوا تجربتهم ومعلوماتهم فيها وهتلاقى ناس عاملين دروس تعليم لحاجات على النت وشروح

Asmaa mahaba يقول...

هههههههههههههههههههه
بتهرج انا حصلى نفس المغامرات دى بل واسوا...
ايه اللى دخلك شات ياهو اللى قالك عليه كان لازم يقولك انك داخل مكان لا مؤاخذه...!!
كل انواع الفساد تجمعت هناك...
انا دخلت اول ما اتعلمت النت لاقيت اشتغالات من هنا لحد السودان
حرامى ويقولك دكتور وتبقى بنت وتطلع راجل بشنبات وسفاح ويقولك ظابط:))
بالنسبه للفيس بوك شوف هو الحمد لله انا بدخل الاقيه بيبعت رسايل ويرد لنفسه
مجنون زى صحبته وبيقبل ناس مضيفتهمش
ولا قبلت اضافتهم متسالش ازاى
يعنى مره غبت شهر مدخلش دخلت لاقيته بيقولى بالانجليزى فيما معناه على اد فهمى عندك حاجات كتيره عاوزه تنقبل اقبلها قلتله على بركه الله هههههههه
فبقى يقبل من ساعتها لوحده ويضيف ناس لوحده
بخصوص اللى طلعلك عشان يكلمك انا حصلتلى مره بس على الايميل بتاع جميل ومره فعلا على الفيس بوك وكنت مستغربه جدا طلع منين الكلام دا...
نهايته النت دا زى المستنقع اللى فيه شويه ورد حلو...عشان تاخد الورد لازم تتطرتش فى الوحل وخصوصا لو انت دخلت المستنقع وانت فاكره بحر اسكندريه
طبعا ولا فاهمنى مش مشكله انا اصلا كلامى ديما ملخبط
تحياتى ليك سومه_87

Yusuf Eltelpany يقول...

يا ريس الحل للفيس بوك ده سهل جدا

اعمل زيي ... قعدت أتدرب عليه ليل نهار, في الشغل, في البيت, في الحمام ...

لحد ما فهمته تماما, واقتنعت بفايدته ,,, خصوصا وأنا بستلم قرار فصلي من الشغل بحجة إهدار وقت العمل, عالم جهلة صحيح !!!

Yusuf Eltelpany يقول...

على فكرة ... أنا عمال أقرا في المدونة بتاعتك من الصبح ... شكلك إنت والفيس بوك ناويين تخلونا ناكل عيش حاف ما بقي من العمر ...

تسلم إيدك ودماغك وقلمك الرصاص أبو خمسين قرش
^^

واحد ضارب يقول...

سبحان الله
و الحمد لله
و انا اللى ملوخية فى التدوين لكن انا خبير فى الفيس توك
و شوف انت خبير فى التدوين و مش خبير فى الفيس
حكم و عجاااااااايب الدنيا
^__^

كراكيب يقول...

هههههههههههههههههههههههههههه
ههههههههههههه هيهيهي هوهوهوهو هااااهاهاهاهااا
لأه لأه
مش كل ما اقرالك بوست بابا يندهلي ويقولي بتضحكي كدة ليه يا هبولي

ده الفيس بوك ده مهم جدااااااا
كل الكتـّـاب اللي بحبهم بمواعيد حفلات توقيع كتبهم بكل كتبهم الجديدة اللي نزلت السوق
اخبارهم عندك اول بأول

ممكن تعرف اخبار كل واي حاجة وانت قاعد عليه

ممكن صحابك القدام بتوع المدرسة والجامعه اللي انت نفسك توصلهم تعمل على اسمهم سيرش ولو هما مشتركين على الفيس بوك تلاقيهم

ده الفيس بوك ده جامد جداااا
تؤ.. اللــه
لازم تواكب العصر وتخلي واحد عمو يعرفك فيه كل حاجة

ياعمو اشرف انت راجل سكرة على فكرة

miro el niro kwaniro

عمرو فكرى يقول...

ولو حد كتب حاجة ولقاها مشطوبة بعد فترة .. مايقلقش .. بكل أدب واحترام يكتبها تانى وهوه ساكت


lol

حاضر :D

انا من الناس دول lol

غير معرف يقول...

كلنا هذا الرجل مرينا باللحظة دي:D

متقلقش انت كدا طبيعي جدا:D

تخاريف خاصه! يقول...

هههههههههههههههههه


انا لسه ضايفه حضرتك...!!

ههههههه

ساعه الغروب يقول...

الا ومن هذا الموقع اوجعه طلبا خاصا جدا وهذا طبعا ليس لقفرى الى المعلومات بل الى تاكيدها


ارجووووووووووووووووووك شوفلنا حد يدينا درس خصوصى فى الفيس بوك فقط


يا اشرف كلنا هذا الاشرف اقصد الرجل فى مثل هذا الموقف


انا اصلا بقيت بدخل على الاكاونت مره كل 4 شهور ابص واخد فكره واقول واو الله هى فلانه لسه عايشه هو فلان لسه موجود
طيب والله خير واقوم اتصل بيهم وبس

ماله الموبايل "كتاب الاسامى"مش "كتاب الوشوش"

زى الفل حتى مصحوب بصوت لو حبينا يعنى

وبعدين هو احنا كل ما نفهم حاجه يجيبولنا اللى بعدها
هو لازم يثنتولنا اننا مش عارفين نفهم

احنا اذكى الشعوب بغض النظر عن التكنولوجيا

عموما مسيرنا نفهمه على ما ما يخترعولنا اى حاجه تانيه

شكرا ليك لانك اثبتنا ان العيب من مننا

ربنا معاك ومعانا ويتولانا على صفحات الفيس توك على راى الست عزيزه صديقه كورومبو

هحاول اتعلم ادخل شات من هناك اهو على الاقل اغلس عليك

تحياتى

شكرا ليك

حاجــ عيال ــات يقول...

السلام عليكم

ازيك ياأشرف

اتمنى أنك تكون بخير

وسلامتك من الفيس بووك

شيركو شاهين يقول...

والله يا حبيبي يا اشرف نفس الفلم بتاعكحصل معايا من زمان اسمع عن جمال الفيس بوك وعيونه الكحيلة بس ماكان عند وهس اشارك فيه اصلا لانه ما احب العلاقات من هذا النوع الى ان صديقة عزيزة علية جدا شرحت لي مسال عنه وشجعتني اعمل حساب فيه ولكنه كل الي عرفت بعدها انه اضيف صورة وخلاص ،، ومن يوما لا دخلت ولاشاركت ولا تنيلت فيه عملت حاجة،،
شكرا على الموضوع الحلو واتمنى من الجميع اني يبحثوا عن صداقات حقيقية بعيدا عن صفحات النيلة الفيس بوك ،، اخوك المحب من العراق (( شيركو شاهين ))

Mehmet يقول...

اشطاط عليك يا معلم

بييييييس

رانيا محسن فتح يقول...

ههههههه .. نفس حالي .. وإللي حصللي في الشات أولا ثم الفيس بوك ..

ودلوقتي .. أنا جديده في حكاية المدونه ..

وعماله أشخبط وألخبط ..

بالصدفه .. شوفت مدونتك .. وجذبني عنوانها ..

وأكتشفت إن مدونتك إسم على مسمى ..

تقبلني كزائره وقارئه لمدونتك ..

ESPRESSO يقول...

طبيعى فى الاول يا مان
كلنا كنا كده
وياما قعدنا نلخبط وندوس على اى زراير ... يمكن مستنيين جنى فيس الدين بوك يطلع ويقول شبيك لبيك
بس حلوه حتة الشات دى ...
انا كمان اخدت فتره لحد ما اكتشفتها

lost * steps يقول...

اومال حضرتك هتعمل ايه مع الفيس بشكله الجديد هههههههههههههه
بس انا بدأته عك فزيع فزيع يعني واهو دلوقتي خدت فيه شهادة الايزو D:

الإتربي اللولبي يقول...

عم أشرف

الحال من بعضه

صمت المشاعر يقول...

هههههههههه يا خبر وانا بقول دا انا بس

دا طلع الناس كلها كدا

انا نهايتي ابحث عن جروبات بس مش فاهمه فيه حاجه

المـــفـــــــقــــــــوعـــــة مــرارتـهــا يقول...

وعهد الله انت عسل
سلملي علي خطيبتك ومامتها واخواتها
وقول لهم الشيكولاتة حلوة ولا لأة
انا كمان قعدت شهور مش فاهمة في الفيس بوك وعاملة ذي البلاص في القعدة لولا الله يكرمه احمد الصباغ والله يبارك لها بسمة عبد الباسط عملولي جروب علي الفيس بوك عشان الكتاب
يالا بستك عليهم وهما يساعدوك وباستغل الفرصة الحلوة النضيفة ودي وابلغ اي حد يكلمني شات علي الفيس بوك انه بيقطع لواحده يعني تلاقيني لسة باقول اذيك تلاقي الفيس بوك قطع الخط وقاللي سلامو عليكوووووووووووووووو

غير معرف يقول...

الحمد لله لاقيت كتير زيى مش فاهمين فيه حاجه العجيب يا اخى ان كلنا عملنا اكونت عليه ومش عارفين نتعامل معاه

Unknown يقول...

دا التطور الطبيعى الجميل
انك دلوقتى عملت ما يشبه بالتحديث وبقيت مدون ، ودى خطوة احييك عليها
اما بالنسبة للفيس بوك ، فالحمدلله بقى عربى ، وتقدر تتعامل عليه كويس
وعايز اقولك معلومة تالتة
ان دماغك عبقرية اكتر من الكومبيوتر
لأن الانسان هو اللى اخترعه
تحياتى لك وعلى امل ان نتواصل بإذن الله
اسلام ديو

شيماء الجمال يقول...

ههههههههههههه
ههههههههههههه
هههههههههههههه
يخرب بيت كدة !!

و النبي يا شيخ ما تحرمنا من بوستاتك ..انت عارف دنا لسة كنت بفكر فيك من يومين ..كنت قربت اكرهك لحد ما شفتك معلق عندي على البلوج!!
دنا كنت بفتكرتك تنك ..لأي ببعتلك كتير جداً على الفيس بوك و بقلك اني بحب مقالاتك و متبعاك و كدة ..
لا خلاص خلاص سماح بقى :)

غير معرف يقول...

مع احترامى لكل كلامك بس انت اتكلمت عنه وقولت عنه عيوب وقعدت تذم وانت اصلا متعرفش عنه حاجات كتير انا معاك انه عليه حاجات كتير هايفة بس برضه عليه حاجات كتير كويسة مثلا انا عرفت ان نزلك بوست جديد من الفيس بوك وفى جروبس كتيييييييييرة جدا كويسة وفى شباب بتنظم حاجات بجد رائعة بتفيد الناس على الفيس بوك

غير معرف يقول...

انا كنت اعتقد اني مش فاهم الفيس بوك بس طلع هو اللي مش فاهمني

أحلى حياة يقول...

ههههههههههههههههههههههههههههههههههههههههههههههههههههههههههههههههههههههههههههههههههههههه

مش ممكن بجد
يهلك يهلك للصبح يعني
ولا دي لوحدها "وبما إنى بقى عندى مشكلة فى الأيدلوجية الفكرية ولسة مصلحها قريب ودافع خمسين جنيه غير أجرة الراجل.." مموتتني بجد ههههههههههههههههههههههههههه
ولا خضتك من الشات بتاعه هههههههههههههه مش ممكن بجد
:D:D:D

تحياتي ع الاسلوب الساخر الراقي الاكثر من رائع :)))))))

غير معرف يقول...
أزال أحد مشرفي المدونة هذا التعليق.
حروف يقول...

هههههههههههههههههه
بوست تحفه ومش غريب عليك انا كنت بتابعك قبل مدخل التدوين وسبحان الله لينك تاه مني ولقيته وماصدقت ههههههههههه
بجد بوست رائع وبيحصل في احسن البوكات
دة الوضع الطبيعي واللي حصل لينا كلنا

شاب كــ طخين ـــــا يقول...

هههههههههههههههه
الفيس بوك ده بدعة هههههههههههه
دة موقع خنيق بجد
انا عملت علية أكونت علشان بردو الحق قطر التقدم ههههههههه والحمد لله ركبت فى السبنسه
لقيت الدنيا كلها فى بعضها وكل يوم عشروميت اضافة على الميل

قلت لالالالالالالالالالا عباس الضو قال الفيس بوك لالالالالالالالالالالالا

مدونتك جميلة اوى تقبل تحياتى

mido يقول...

مكتبتش فى الدستور ليه يا عم ؟

Ehsan Sultan يقول...

ايه ياعم الضياع دا
عادى ما حدش اتولد يعرف
مسيرك تبقى محترف
وبعدين ال...
ولا اقولك
طنش
هههههههههههههههههههههههههههه

عمرو فكرى يقول...

امسح الرد الكورى اليابانى الصينى الطوييييل ده
كله مواقع اباحية يا عمونا

غير معرف يقول...

فكرتنى عاوز ادخل اشوف الفيس بوك دا ايه اصلا

أخف دم يقول...

السلام عليكم
يا صباح أو مساء الفل
منورينى دايما كده ويارب ما تغيبوا عننا أبدا..
حقودى قصيدتك جميلة بجد وخفيفة.. ربنا يوفقك ويزيدك
سمو الأميرة سارة هانم صاحبة الصون والعفاف
تسلمى يارة يارب.. وبجد لو احتجت اعرف حاجة أكيد هاقوللك بس المشكلة ازاى أقوللك على اسم الحاجاة اللى انا عايز اعرفها؟؟ أنا مييييييييييييييييح
يوسف التلبانى يارب المدونة ماتعطلكش بس ف نفس الوقت ما تقومش من عليها.. اتصرف بقى.. اهم حاجة تكون مبسوط
كراكيب ميرو النيرو كوانيرو منورانى بتعليقك العسل دايما.. وهاشوف واحد عمو ياستى يعرفهولى عشان خطرك بس
عمرو فكرى منور دايما بتعليقك الخفيف الظريف.. عايز اتدرب كاراتيه بقى.. تاخد كام؟
أخى العراقى شيركو شاهين
منورنى دايما وربنا يحفظنا من الفيس بوك ولعناته
الكاتبة الكبيرة سحر غريب المفقوعة مرارتها.. حماتى وخطيبيتى بيسلموا عليك وبيقولولك هاتى كمان حتتين شوكولاتة بطلى بخل.. هههههه منورة يا سحر.. وبجد لو جابولى ألف صباغ أنا مش هافهم.. انا أساسا مش عايز افهم
شيماء الجمال: مكنش العشم يا شيماء تكرهينى مرة واحدة.. والله متابع البلوج عندك وراضى وساكت.. وفى الآخر تقولى بتكرهينى.. طب حيث كده مش هاضيفك على الفيس بوك عقابا ليك.. بس مش عشان باكرهك انما عشان انا مش هاعرف اضيفك اساسا.. اوعى تغيبى تانى واوعى تكرهينى
ميدو الجميل معلش كنت تعيان شوية ودلوقتى الدستور رجع معايا تانى.. ياريت تقول رايك ومتابعاتك
يللا كفاية عليكوا كده
منورنى دايما
أشرف توفيق

قلب ارهقته الاحلام يقول...

ههههههههههههههههه

الحمد لله أنا أطمنت علي نفسي يارجاااله

كنت فكراني جاهلة ولا مش طبيعية

وكل لما واحدة تقولي مشتركة ف فيس بوك

أقولها اها عملت أكونت بس مفمتش حاجه

ونسيت الباس وورد أساساً ههههههههه

قال يعني وتلاقيهم مش فاهمين هما كمان اصلا

مرسييييي كتير طمنتني اروح اعمل اكونت

جديد بأة :-p

غيداء التواتي يقول...

اي ده اي ده

اي الجمال ده

والله مدونة مش عادية بالليبي وصدقني حنكون متابعة جيدة

غير معرف يقول...

ممكن اعرف ليه كلكون هون متصعبين من استخدامو؟؟؟ بالعكس ممتع وفيه افكار حلوة وكل شي اولها بيكون صعب وبعدين بتتعودا عليه وازا مدايقين منو فيكون ما تدخلو عااااااااااادي

عمرو فكرى يقول...
أزال المؤلف هذا التعليق.
عمرو فكرى يقول...

لسة واخد بالى حالا من الجملة دى :
((عمرو فكرى منور دايما بتعليقك الخفيف الظريف.. عايز اتدرب كاراتيه بقى.. تاخد كام؟))
كنت بعمل سيرش فى ياهو على (كاراتيه عمرو فكرى) وطلعتلى ضمن نتايج البحث huh
من 6 شهور :D
----

كل سنة وانت طيب ^_^ .. عشان خاطر اشرف باشا توفيق .. لازم نستغل الفرصة طبعا بما انه راجل مشهور وكسيب وزمانه عملهم اد كدة
وانا رجل استغلالى والحياة الفرص
انا عملية زى دى ماخدش فيها اقل من 20 جنيه ^_^

غير معرف يقول...

والله مين سمعك ياخويا انا مدخلة النت ونفسي اعمل ايميل واضيف عليه صحاب اساسا مش عارفة او عارفة بص هو فيه حاجة غلط بيني وبينه مافيش عمار اساسا احم ربنا احمد وما تقهرنيش هاه انا ريما الشريف

غير معرف يقول...

اناعايزة امسح صديق من علي الفيس ومش عارفة

غير معرف يقول...

بجد مش عارفه اقول ايه كنت بعيط من قلبى فجأه ضحكت من قلبى قوووووووووووى ونبى ونبى ضفنى عندك ولو عملت ليه ازاله هعرف ان الجهل اشتغل وهعمل نفسى مش شيفه وهضيفك تانى
JaNaعيون مصريه

غير معرف يقول...

هههههههههههه دا مش انا بس اللى تلعت حمار هههههههههههههههههههههههههههههههههههههههههههههههههههههههههههههههههههههههههههه

لحن الغروب يقول...

الكلام منسق وجميل جداا وربنا يوفقك في الاداب انجليزي يارب وتبقى حاجة كبيرة باذن الله هههههههههههههههههههههههههههههههههههههههههههههههههههههه بس والله الكلام جميل و مضحك جداا
سلاام
ايمان

مينا الجنتل يقول...

هههههههههههههههههههههههههههههه
هههههههههههههههههههههههههههههههههههههههههههههههههههه

مينا الجنتل يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

غير معرف يقول...

السلام عليكم

غير معرف يقول...

انا زيك بالظبط اني عملت الايميل عشان صحابيوهم ادوني الميل تبعهم و الحمد لله معرفتش اضفهم