اخبار

السبت، 21 فبراير، 2009

فيلم العار 2009


شكرى الضابط وعادل الدكتور يذهبان إلى كمال للمطالبة بحقهم فى الميراث

كمال: مش هينفع أجيب لكم حقكم دلوقتى
شكرى: ليه بقى ان شاء الله؟؟ مشغول بتلعب بلاى ستيشن؟؟
كمال ينظر إلى صورة أبيه: سامحنى يابا.. مضطر أقول لكم على السر اللى أبوكم مستأمنى عليه.. أبوكم كان رئيس تحرير جرنال..
يصرخ شكرى: مستحيل انت كداب..بقى الراجل التقى الطيب يطلع فى الآخر رئيس تحرير؟؟ اخص!!
يصاب عادل بالذهول: مش ممكن.. لأااااااااااااااااا.. نقول للناس إيه؟؟ نقول للناس ابونا كان إيه؟؟ رئيس تحرير؟؟
كمال: ده السر الشنيع اللى أبوكم فضَّل أنه يموت على إنه يقوله..وكنت عايز أخبيه عليكم واجيب لكل واحد منكم نصيبه لحد عنده سنتين سجن ع السريع.. بس انتوا استعجلتوا..وعموما كويس عشان الحق يرجع لاصحابه.. ومن دلوقتى لازم تبقوا شركائى فى الجرنال لحد ما نكسب وتاخدوا حقوقكم.
شكرى: انت بتستهبل.. انا ظابط ياعم الحاج.. يعنى مستحيل أحط إيدى فى إيد واحد جرنالجى..وبعدين أخوك الدكتور يعمل إيه؟؟ الدكتور اللى شغلته انه يعالج الناس من أى إدمان للصحف والأخبار والكلام اللى يودى ف داهية ده.. يعمل إيه؟
كمال: عموما أنا قلت اللى عندى..ومن بكرة تستقيلوا وتيجوا عشان نرجع لكار ابونا الله يرحمه.. الصحافة !!
ـــــــــــــــــــــــــــــــــــــــــــــــــــــــــــــــ
الإخوة الثلاثة يعترفون لأمهم أن أباهم كان رئيسا للتحرير

الأم تضرب (كمال) قلما محترما على وجهه وتقول:
اخرس يا كلب.. اوعى تقول على ابوك انه كان رئيس تحرير.. أبوك الراجل الطيب عاش نضيف ومات برضه نضيف ومحدش قال عليه كلمة وحشة.. تيجى انت وتقول بعد ما مات إنه رئيس تحرير؟؟
كمال: أنا هاجيب لكم الورق اللى هيثبت

وبعد رؤية ورق الإثبات

الأم منهارة وغير مصدقة
الأم: خلاص يااولاد .. لازم نعيش بالحلال وننسى اللى أبوكم عمله.. ومش عايزين حد يعرف انه غلط غلطة شنيعة كده..وربنا يجازيه بقى على اللى عمله فينا .. وخللى راسنا فى التراب.. وانت يابنتى لازم تتطلقى من الظابط جوزك.. ده ظابط يعنى لو عرف ممكن يطلقنا كلنا انا وانت واخواتك الرجالة كمان..مكنش العشم يا ابو العيال.. رئيس تحرير؟؟ ياريتك كنت تاجر مخدرات !!
ـــــــــــــــــــــــــــــــــــــــــــــــــــــــــــــــــــــــ

كمال يشرح الخطة لشكرى وعادل

كمال: من دلوقتى الكلمة كلمتى وكله يسمع كلامى..احنا هنكتب عن مشاكل الناس ونقول اللى ف نفسنا من غير خوف ومحدش واخد منها حاجة..والنهاردة هنعمل العدد الزيرو بتاع الجرنال
شكرى الظابط يصرخ فى حالة هستيرية: لا مش عايز أموت.. انا عايز اعيش .. انا عايز اعيش
تتدخل (روأة) بتاعة سويتش الجرنال: أنا فداك ياسى (كمال).. ممكن أكتب أنا مكانه.
كمال: خلاص .. اعطى القلم بتاعك لـ (روأة)..واقعد انت راقب الجرنال يمكن حد من إياهم يكشفنا واحنا بنكتب فى الجرنال.
بعد لحظات تدخل الشرطة وتقبض على (روأة) متلبسة بالكتابة وتترحل إلى سجن طرة ويتم الحكم بإعدامها رجما بالسم !!
كمال يصرخ فى شكرى: انت اللى قتلتها.. انت اللى قتلتها.. وعشان كده هتاخد حقك ناشف!!
شكرى: ناشف يعنى إيه؟؟
كمال: ناشف يعنى هتاخد حقك جرايد وانت بقى تنزل فى رمسيس والتحرير و26 يوليو وتبيع حقك لوحدك وتقول: أخبار أهرام جمهورية .. وكده
ــــــــــــــــــــــــــــــــــــــــــــــــــــــــــــــــــــــــــــــــ
مبعوث دار التوزيع يأتى للإخوة الثلاثة لكى يأخذ منهم البضاعة " الجرنال" .. وعندما يذهبون لإحضارها من المخزن نكتشف أن الفئران قد أكلت الورق

كمال: فلوسى ..شقا عمرى
عادل: دور كمان يا (كمال) جايز تلقى مانشيتين سُلام ياعم الحاج.
كمال: مانشيتات إيه؟؟ انت مش شايف الفيران كلت كل حاجة.
الموزع: انت خزنت الجرنال ازاى؟؟
كمال: يعنى كتبنا الجرنال وبعتناه علطول عشان يترسم صفحاته
الموزع: مش عيب المعلم (كمال) ابن أحسنها رئيس تحرير فى مصر يبقى مش عارف ان الجرنال لازم يروح للديسك المركزى الأول
محرر صغير: الديسك المركزى كان اختصاص الدفاس وابو دهشوم !!
الموزع: يللا عوضك على الله
عادل يغنى بهستيرية وجنون: الجرنال .. الجرنال.. والأمن قفل الجرنال !
(شكرى) الظابط يخرج مسدسه وينتحر بينما ظباط الأمن يأخذون (كمال) بتهمة الجهل بتخزين الجرنال ليتعلم فى السجن أصول التخزين من الدفاس وابو دهشوم !!

هناك 34 تعليقًا:

Eng. Ahmed Abo El-Ella يقول...

ههههههه
حلو قوي مشهد الأم وكلامها

سيناريو رااااااااااااائع
هههه

moro_wbs يقول...

رائع ...

هو دا الكلام ... بلاي استيشن وبتاع ...

اهم حاجه " الجرنال .. الجرنال.. والأمن قفل الجرنال "

لا معالجه جميله .. بجد انا استمتعت بالقراءة ..

تحياتي ..

Tamer Diab يقول...

يا عمي كفاية حرام عليك انتي مشكلة بجد هههههههههههههه
انا اكتر حاجة ضحكتني
حاجتين
روئة لما قالت انا فداك ياسي كمال

ولما قاله هتاخد حقك جرايد
هههههههههههههههههههه
جامد جداً

صباح الصباح يقول...

جامدة يا خال

بس نسيت تقوللنا

(حقها واللا مش حقها)!!!

الفراغ يقول...

وكأنى قاعده وبتفرج على الفيلم من جديد
خيالك واسع وقلبك كبير
كان يجرى ايه لو كان طلع رئيس جمهوريه
اهو ده اللى يالهوى بجد

زوجه يقول...

جميله فعلا
تحياتي علي السيناريو الجميل ده

No Fear يقول...

السلام عليكم
مش ممكن و الله
أنت مغطي الفيلم كله الحقيقة
.
ما تشغل دماغك و تعمل العار 2030 مثلا
.
مش هنتقابل قريب بقة

عاشقه وغلبانه يقول...

اقولك علي سر بس ماتزعلش
انا مابحبش فيلم العار ده خالص
هههههههههههههههههههههههه


بس اكيد السيناريو بتاعك جميل وسلوبك في التعبير جامد اوي

غير معرف يقول...

روءه دخلت طره برضو !!

روءه دخلت القناطر مع أم محسن بائعه البليلة اللي اتقبض عليها في قضية القمح المسرطن

عمرو فكرى يقول...

عادل يغنى بهستيرية وجنون: الجرنال .. الجرنال.. والأمن قفل الجرنال !
(شكرى) الظابط يخرج مسدسه وينتحر بينما ظباط الأمن يأخذون (كمال) بتهمة الجهل بتخزين الجرنال ليتعلم فى السجن أصول التخزين من الدفاس وابو دهشوم !!



lol

يوميات نائمة في الأرياف يقول...

هههههههههههههه
تحفة كالعادة يا اشرف
بس انا متوقعتش ابدا انه يطلع رئيس تحرير
يالهوي
ياريته كان طلع تاجر مخدرات
هههههه
رنا

hend...hanady يقول...

فكرتنى بدوله حبيبى لما خزن البلح ورمزى ضرب نفسه بمسدس الميه المهم فى المستقبل القريب معتقدش انهم هينعوا هم الجرايد والفيران ينزلوا على النت ويريحوا

Kareem Brakat يقول...

بصراحة رائع جدا

سمو الأميرة سارة يقول...

ههههههههههههههههههههههه
ههههههههههههههههههههههههههههههههه

مكنش العشم يا ابو العيال.. رئيس تحرير؟؟ ياريتك كنت تاجر مخدرات !!

انا من الاول بلا صحافة بلا وجع دماغ اتجز تاجر مخدرات احسن ههههههههههههه

غير معرف يقول...

يقةلك ايه يا اشرف ايه رايك تبعت المقالات بتاعتك دي لبرنامج من برامج قناة موجه كوميدي او نايل كوميدي ولا اقولك بلاش نايل دي عشان بتاعت الحكومة
ابعت لموجة ممكن مثلا برنامج نشرة اخبار الختمسة والعشرون بس بشرط انهم يكتبوا اسمك

All02y يقول...

الموضوع تحفه بجد أن من أول ماعرفت المدونه دي بقيت ألاقي حاجه تضحكني لدرجة أني لما بقد أقرأ ساعات بضحك بصوت عالي ..
أنا من كتر ماعجبتني مقالاتك حكيت لصحباتي عنك وقلت لهم أني هطلب منك إنك تساعدنا في مشروعنا بتاع التخرج
أنا طالبه في قسم الإعلام فعيزه اعرف ممكن أتواصل معاك إزاي ياريت تفيدنا وأكون شاكره جدا ليك
وإيميلي هوا دا allo2y@yahoo.com

فتافيت يقول...

تحفة تحفة تحفة بجد

حلوة اووووووووووووي العار كده بقى اجمد بكتيييييييييييير

esraa يقول...

ههههههههه
جميله كالمعتاد ياأشرف

rona يقول...

السيناريو رائهحقا
جميله اوى

محمد سلامة يقول...

مش قد كده
شغلك في الناصر صلاح الدين كان أحسن من كده بكتير
أنت بقالك فترة ما بتكتبش زي تدويناتك الأولى , بس انت موهوب بجد , أنا عارف إنك هترجع تاني زي الأول و احسن
مش عارف يمكن تكون مش مركز
يمكن يكون نجاحك التدويني حاسسك إنك لو قلت ريان يا فجل هتعجب الناس برضه
الثقة الزائدة في النفس بالتأكيد بيكون ليها أثر سلبي على العمل
بطلب منك حباً فيك , إعادة قراءة تدويناتك الأخيرة في ضوء تدويناتك الأولى
ملحوظة أخيرة
شكري كان وكيل نيابة مش ظابط شرطة

مــحــمـود نــشــــأت يقول...

جاااااااااااااااااامد اخر حاجه

غروب يقول...

هههه

انا اول مره اشوف الفيلم ده

شيركو شاهين يقول...

ه
هه
ههه
هههه
ههههه
هههههه
ههههههه
هههههههه
ههههههههه
هههههههههه
ههههههههههه

الله عليك يا ملك
والله انا بعمري مفت مدونة حلوة مثل مدونتك

انا عراقي لكني من اشد المعجبين بكتابتك اخير الكريم

لك مني كل حب وتقدير

بس كيف اجت بخاطرك موضوع رئيس الجرنال
انا راح اخذ الموضوع الرئيس تحريري ياما حيفصلني ويطرديني..
ياما حيفصلني ويطردني ,,,

بسمـــة مســـــلّم يقول...

اولا السلام عليكم بجد ضحكتنى جدا بس ليه سيرة الجرنال انت فى رأيك تاجر المخدرات زى الصحافة عالعموم منتظرة تعليقك ولك منى الف سلام

سكوت هنصوت يقول...

من فضلك زر هذا الرابط...لن تندم

http://www.tahyyes.org/2009/02/blog-post_27.html

koukawy يقول...

هههههههههههههههههههههه
محطتوش في الكتاب ليه حلو اوي
مبروك الكتاب جميل قريته في يومو نص
عقبال اللي بعده

في برنامج علي نايل كوميدي اسمه افيش و تشبيهبيعملوا الأفلام شبه اللي انت كتبه متقدملهم افلامك حلوه اوي

كانوا لسه امبارح عاملين معبودة الجماهير

شجره الدر يقول...

سيناريو جديد نوفى
ماشى ممكن نقول ان الدفاس وابو دهشوم ماتوا فى حادثه توزيع اطبعه التانيه فى وسط ميدان التحرير
رااااااااااااااااااااااائع

بسنت يقول...

ههههههه
جميل اوى التعديلات دى
وحلو اوى لما الام قالت يا ريته طلع تاجر مخدرات
كويس انها ما قلتش يا ريته مغنى فيديو كليب ولا لاعب كره قدم محترف
بس عندك حق الصراحه معظم ارؤساء التحرير للجرايد المعارضه
دلوقتى سوابق

دمت بكل الخير

أخف دم يقول...

السلام عليكم
ربنا يكرمك يا احلى ناس على كلامك الجميل ويارب يكون الموضوع حلو بالنسبة للناس اللى شكروا فيه ومش وحش بالنسبة للناس الى علقوا بالسلب عليه.. وان شاءالله ربنا يقدرنى واكتب حاجات احسن لكل الناس اللى اتضايقوا من البوست ده او كان أقل بالنسبة لهم.
بالنسبة للاخت allo2y فأنا طبعا تحت امرك فى مشروع التخرج بتاعكم لو انا اقدر اساعد فيه.. وايميلى موجود فى المدونة طبعا لأى استفسار تحت امرك..
الأخ محمد سلامة شكرا على تعليقك وان شاء الله تقرى حاجات حلوة قريب.. دعواتك
أخى العزيز شيركو شاهين من العراق منورنا ومنور مصر ومنورنى هنا.. وشكرا على كلامك الجميل.. وتحياتى ليك ولاهلك وبلدك.
بسمة مسلم.. أنا مش رايى كده فى الصحافة لأن أنا صحفى اصلا.. انما ده راي الحكومة والبلد فيهم.. ده مقال ساخر ومنورانى دايما.
شكرا على تعليقاتكم يا احلى ناس
أشرف توفيق

will يقول...
أزال أحد مشرفي المدونة هذا التعليق.
غير معرف يقول...

التمام تمام

المعلم محمد صاحب المطعم - طعمية سخنة يقول...

هههههههههههههههههههههههههه
جامدة اوي الدسك المركزي دي ههههههههههههههههههههههههههههههه

كـومـانـدوز البـنّـا يقول...

جـامدة جـدا يـا عسـل

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه