اخبار

الأحد، ٢٤ أغسطس ٢٠٠٨

موعد حفلة التوقيع.. مستنيكم


أولا الدعوة الرسمية

إن شاء الله مستنيكم جميعا فى حفلة توقيع كتابى الساخر "مبسوطة يامصر؟" يوم الثلاثاء 26 الساعة سبعة ونص فى مكتبة البلد خلف الجامعة الأمريكية وأعلى كافيه سيلنترو..يعنى تدخل من عند هارديز كده وتمشى شوية صغيرين هتلاقى كافيه سيلنترو.. اطلع فوق بقى هتلاقى مكتبة البلد..مستنيكم تشاركونى الفرحة إن شاء الله.. أى خدمة.

ثانيا الدعوة بتاعتنا احنا

واحد بيسألنى يعنى إيه حفلة التوقيع؟
حفلة التوقيع ياسيدى يعنى أنا عامل كتاب جديد اسمه "مبسوطة يامصر؟" كتاب ساخر سياسى.. انت بقى هتيجى تشترى الكتاب بالصلا ع النبى وتقف قدامى ساعة لحد ما افضى عشان أوقع لك على الكتاب .. يعنى أحط إمضائى الغالى على الكتاب بتاعك..ويمكن مابقاش فاضى ساعتها.. عموما اوعى تتشاءم وممكن لو ربنا كرمك وخليت والدتك تدعى لك قبل الحفلة وانت جاى ممكن اسلم عليك بالإيد كمان.. أيوة متستغربش من المفاجأة.. ياعم اللى يخللى مجلس الشورى يتحرق ممكن يخلينى اسلم عليك بالإيد عادى.. لا تتعجب ياولدى إنها قدرة الله !!

واحد تانى بيسألنى هل حفلة التوقيع مناسبة سعيدة؟؟ يعنى بيكون فيها هدايا وكده؟؟
أرد عليه واقول أيوة طبعا.. لازم تشترى الكتاب وكمان تجيب هدية وانت جاى لصاحب الكتاب اللى هوه انا حضرتك.. وبما إنى طول عمرى متفاهم وبسيط فأنا ممكن اقترح عليكم نوعية الهدايا اللى ممكن تجيبوهالى:
- لاب توبات .. يستحسن توشيبا وديل وإتش بى.. وكل ما كان الحجم أصغر كل ماكان توقيعى على كتابك أكبر
- موبايلات بكاميرا وياريت بكاميرتين عشان موبينيل هتدخل الجيل التالت بعد كام شهر.. ويستثنى جهاز نوكيا إن 70 عشان صوته واطى
- كاميرات ديجيتال.
- مراوح وخلاطات وغسالات
ياجماعة باختصار أنا مش بادقق والله .. واللى ييجى منكم كويس.. وكمان انا عامل تجديد فى حفلات التوقيع وهو إنى أقبل الهدايا كفلوس.. يعنى بدال ما تتعب نفسك وتروح تدور على جهاز موبايل وتجربه عشان تجيبهولى.. هاتلى الألفين جنيه وخلاص وانا هاوفر عليك التعب..وبدال ما تأجر عربية عشان تجيب لى التلاجة _اللى أكيد هتبقى كريازى عشان أغلى_ أنا ممكن آجى على نفسى وآخد منك تمنها وخلاص..واطمن سرك فى بير ومش هافضحك ولا هاقول لحد ..إن الله حليم ستار

واحد تالت هيسألنى : طيب الكتاب هوَّه المدونة وللا لأ؟
هاقول له: لأ طبعا .. الكتاب مختلف عن المدونة تماما..ومعظمه ماتنشرش قبل كده أصلا فى أى مكان باكتب فيه.. يعنى مثلا هتلاقوا فيه كل امتحانات الثانوية العامة بقى مش العربى بس.. وأفلام تانية كتير.. ومقالات عن أحوال مصر.. ويوميات ليا.. يعنى خليط ساخر ربنا يسهل ويعجبكم

واحد رابع هيسألنى: طب أنا اروح مكتبة البلد دى ازاى؟
شوف ياسيدى ..انت تركب أى مترو لو انت فى أى حتة فى القاهرة المحروسة ولو من الأقاليم برضه اركب المترو.. وتوصل للتحرير (السادات) هتلاقى الجامعة الأمريكية وجنبها مطعم هارديز.. ادخل فى الشارع بتاع مطعم هارديز بقى وامشى شوية .. هتلاقى ولد صغير بيشحت .. أكيد ده مش انا يعنى..سيبك منه.. بعد شوية هتلاقى كافيه سيلنترو _حد الله بينا وبين أسعاره_ اطلع الدور التانى هتلاقى مكتبة البلد.. بس خلاص

على فكرة


بجد هابقى سعيد جدا بوجودكم.. ياريت تنورونى..ودعواتكم


أشرف توفيق



هناك ٤٣ تعليقًا:

AHMED SAMIR يقول...

تقريبا كدة والله اعلم انا اول تعليق
الف الف مبروك يا باشا وعقبال الكتاب ال 102
تحيااتي
ملحوظة:
اوعى تسألني ليه ال 102 يعني؟
لاني مش عااارف

خالد كامل يقول...

باشاااااا
و الله هحاول أحضر .. قول يا رب بس .. و لو محضرتش (( عشان أزوغ من الهدية طبعاً )) ... ابقى عرفنا هينزل فين بالظبط ... علشان أبقى أستعيره أقراه و أرجعه تانى ... هى ناقصة مصاريف ؟؟؟
هههههههههههههههههههههههههههههه
ابقى قولنا بس هينزل فين
تحياتى

Mahmoud البطراوى يقول...

انا حاجز من يوم السبت

فطبعا هتسيب الناس كلها
وتشترى لى الكتاب وتوقع عليه

كفايه انى انا بنفسى هاجى
مفيش اكتر من كده ابسط ياعم

ومبرووووووووووووووووك

كوارث يقول...

ههههه نظرًا لان عندي بوست مشابه فهوعدك لو كنت في القاهرة هحضر يومها
الف مبروك يا ريس

غير معرف يقول...

الف مبروك يا أشرف
هو الكتاب هايتوزع فين بعد الحفله لانى يمكن ماقدرش أحضر

وبعدين يعنى ولا مؤاخذه هو تمنه كام ؟ لو كان غالى هابقى أشحته منك سنه وأرجعه على طول

غير معرف يقول...

معلش عندى سؤال مش موضوعنا النهارده بس عاوز اجابه
النهارده شفت حسين رياض فى فيلم بيقول قال تعالى فى كتابه العزيز
(الجنة تحت أقدام الامهات) أه والله ياعم قال كده وسمعته بنفسى بس ماعرفتش اسم الفيلم وحتى من غير مايعطش الجيم ينفع كده
لو سمحتم جميعا يازوار المدونه
أنا عاوز أعرف اسم الفيلم أو حتى اسم السورة اللى فيها الايه دى

موناليزا يقول...

الف مبروك وان شاء الله بالتوفيق
ملحوظة:الهدايا بالنص

محمد فاروق الشاذلى يقول...

أنا بسألك ع الميعاد والمكان من يوم السبت اللى فات وإن شاء الله آجى واحصل على التوقيع وبعد ما اشترى الكتاب هلاقى هيئة مترو الأنفاق بتطالب بحقها فى ثمن تذكرة المترو اللى على الغلاف وبتوع الضرايب مستنين بره علشان ياخدو منى قيمة ضريبة المبيعات.
بس مش مهم كله يهون علشان خاطرك

مـحـمـد مـفـيـد يقول...

مبروك يا برنس
اول امبارح كان نفسك تتصور معايا
النهارده بقي انت اللي مش ختفتكرنا
:))))))
مبروك يا اشرف

عمرو فكرى يقول...

فزيع والله فزيع

عاشــــــ النقاب ـقــــة"نونو" يقول...

السلام عليكم
الف مليون مبروك
باذن الله الكتاب حتما هدور عليه واشتريه
ياريت بقى تغطية باماكن التوزيع
وربنا يوفقك يارب
ممكن اساهم معاك في حمل الهدايا عنك؟!!:))

فوكيره يقول...

مــاشاء الله لا قوه ألا بالله ...

بكــره يعنى ...

الف الف الف مبرووووووووك يا استاذ اشرف ...

ربنا يوفقك يا رب ويجمع احبابك كلهم حوليك يشاركوك الفرحه يا رب

دمت متميز

Mohamed Kamal Hassan يقول...

إلا صحيح يا أشرف
مين دار النشر اللى عملتلك كتابك
((:

رامز عباس يقول...

مبسوطه يا مصر
مبسوطة با مصر المستقبل
مخنقوقه يا مصر
داوريثك جيل المستقبل
جمعيه كلها باشوات
ومعاهم حزمة حراميه
مبسوطه يا مصر
بعيون الساخر اشرف توفيق
بمبسوطه يا مصر
هنشوف ياما دا حريق وغريق

مبسوطه يا مصر
وهنيجي نبارك ونهني
ودى لحظه نصر

تهنئه من اخوك الرائع اللي مش هيدفع
تمن الكتاب

رامز عباس

من شله الساخرين
للانبساط والاحباط

رامز عباس يقول...

بقول

لنا س انك اشهر كاتب بجمهوريه الضحك


الصافي مش مصدقني


هو رئيس الجمهوريه اسمه ايه يا معلم




رغم سخريتك اللاذعه

الا ان الواد اللي بيشحت

اثر فيا

هتعشيه علي حسابك يا معلم

رامز عباس يقول...

وقد اعلنت الجامعه

الامريكيه بالقاهرة انها مش مبسوطه

يا بوش لانك اجبرتها تعلم الواد ابن ابوه

اللي كل مره بينتخبوه


انتم عارفينه



وبكدة هتحس بالتناقض لوجود مبسوطه يا مصر

رامز عباس يقول...

مش عارف ليه يجيلي حماس التعليق المتكرار



متشوفلي بطانيه واجي ابات عندك بالمدونة



مبروك يا اشرف

TAFATEFO يقول...

هآجي طبعاً .. بس على الله انت متجيش :@ :D

وإذا كان على كانز الشويبس من عينيا .. مع انه واجب عليك .. داحنا هنبقى ضيوفك .. بس انت بتحبها ايه؟

واليوتيوب .. اتقفل :D .. بس أنا عملت قناه جديده http://tafatefo.blogspot.com

أراك عصي الدمع

محمود محمد حسن يقول...

بقولك ايه ، انا مفلس اليومين دول وما معييش اجيبلك موبايل ولا مروحة ، ينفع اخلي امي تعملك حلة محشي وإجيبها معايا ؟

غير معرف يقول...

الف مبروك على الكتاب وطب واللى مش هيعرف ييجى يجيب الكتاب منين

غير معرف يقول...

اه كل سنة وانت طيب والامة الاسلامية بخير

Ihab Omar يقول...

الف الف مبروك يا اشرف
و عقبال الاصدار رقم 100 يا رب

خمسة فضفضة يقول...

السلام عليكم ورحمة الله وبركاته

اولا كل سنة وانت طيب

ثانيا الف الف مبروك وعقبال الكتاب رقم مليون

نيجي للمهم ألا وهي الهديه ينفع الكردت ولازم كاش :))))))

Dr.Mohammed Gohary يقول...

كان نفسي آجي
معلش بقا الامتحانات

عزيزي أشرف انت مبدع وتستاهل كل خير

تمنياتي بالتوفيق

aya يقول...

يارب اقدر اجى يا اشرف
الف الف الف مبروك

الف مبروك يا اشرف ويارب يبقى بكرة يوم يكسر الدنيا

الف مبروك

غير معرف يقول...

مبرووووك

انا فى اوائل ايامى فى عالم التدوين

و سعيده جدا للخبر ده

و اتمنى كل النجاح للكتاب و لمؤلفه

تحياتى ...

Unknown يقول...

ألف مبروك يا استاذنا وعقبال الكتاب المية ان شاء الله
أنا فى السعودية ... عندكو ديليفرى؟
بالتوفيق دايماً يارب

غروب يقول...

هههههههههه : انت مش ممكن

فعلا اخف دم

دى اول زياره ليه : بس اكيد ان شاء الله مش الاخيره

شفت البوستس اللى فاتت اللى يا عينى فضفضت فيها عن السرقات اللى اتعرضت ليها

مكنتش متوقعه انها توصل لكده بس اللى خلانى اتاكد انى لقيتك ذكرت ان من ضمن قصايدك واحده اسمها (ناقص دبدوب) وانا شفتها من فتره على احد المنتديات وعجبتنى جدااااا وفضلت امدح في صاحبها

وكتبتها عندى واحتفظت بيها

لكن اليوم فقط وصلت لصاحبها الحقيقي اللى يستاهل المدح .........عموما الله معاك

ومبرووووووووووك الف مبروووووووووك على الكتاب واكيد ان شاء الله هجيبه بس مش هوعدك بحضور حفل التوقيع لانى مش قاهريه (بلد المترو اللى بكيت من احراجى وانا بركبه) انا بلدياتك من ام الدنيا (المنصوره) ولا اقولك بما انك عملت شبرا محافظه يبقي دلوقتى اكيد المنصوره بقه اسمها (قاره المنصوره) بس شكلى انا معنديش خلفيه ..

الف مبروك تانى ..........وباى بقه

دهاء سياسي يقول...

سيدي الفاضل الف مبروك على خروج الكتاب للنور :)

انا لسه شايفه الخبر ده حالا للاسف :( " يوم التلات برضه بس نص الليل " :(

كان نفسى اوى اجى احضر .. قدر الله و ما شاء فعل .. لعله خير :)

مبروك مرة تانيه .. بس من فضلك اماكن التوزيع فيييييييييين ؟؟

دمت بخير :)

aya يقول...

اشرف الكتاب روعة يا اشرف
تسلم دماغك انت ملكش حل

ماشاء الله ولا قوة الا بالله
انا كنت موجودة اثناء المؤتمر او اللقاء يعنى بس اشتريت الكتاب ومشيت على طول

ومستحملتش استنى اقراه لما اروح قريته فى العربية على نور عواميد النور
واستنيت لما خلصته ودلوقتى ممكن انام

اللذيذ بقى ان اخويا مش ليه فى القرآة فا بيقلى ايه ده وفتح اول صفحتين بدا يضحك وقال ده شكله كتاب جامد انا هقراه
وبدا فيه وقالى لا ده عايز تركيز
وقالى انا خاده اقراه
وحتى اصحابى بداء يسالونى على مكان وجوده وحجزوا دورهم انهم ياخدوه يقروه


بجد بجد انا فرحنالك جدا

الف الف مبروك يا اشرف
ربنا يباركلك ويجعله فتحة خير عليك

ربنا يحفظك

خالد كامل يقول...

أماكن التوزيع يا أشرف باشا
و يا حبذا لو كانت فى اسكندرية
و تبقى عملت معايا الواجب لو كنت منزله فى أى حتة فى البحيرة

شيماء الجمال يقول...

أشرف انا جيت امبارح الحفل و كنت مبسوظة اوي..شكرا على الكتاب الجميل ده :)

محمد فكري يقول...

ألف ألف مبروك يا أشرف..
الحمد لله قدرت اجي..رغم الظروف اللي حكيتلك عليها..
كنت سعيد جداً بحفلة التوقيع...ومشاعر الناس الجميلة تجاهك..وتجاه عمل محترم انت بتقدمه..
ألف مبرك يا حبيبي وكل كتاب وانت طيب :)

HARD TIMES يقول...

اخف دم وهو فعلاً اخف دم
مبروك يا أستاذ اشرف علي الكتاب والله كان نفسي اكون موجود بس للاسف كان في مشلكة عندي في النت بقالي يومين ولسا بايظ وأعد في سيبر
علي العموم أكيد طبعاً الحفل هيكون رائع
أتمني تكون فكرني
انا مصطفي حمدان صاحب ايمن بدر اللي قبلت حضرتك في توقيع العدد الثاني للمدونات
أتمني لحضرتك التوفيق
تحيتا

t3ban يقول...

مبرووك يابرنس
عقبال بالشفا يا مصر
اقشطة يا مصر
و السطة يا مصر
و كله زي الفل يا ست الكل
مبرووك 2 مرة

غير معرف يقول...

السلام عليكم استاذ اشرف

زعيم الساخرين فى القرن الاتنين والعشرين ........معلش الواحد والعشرين بلا منازع

الكتاب جامد جدا أجمد حاجة فيه- بعد توقيعك طبعا لأن توقيعك ده محدش يقدر يقدره أبدا-المهم بعد فاصل النفاق ده هههههههههه-المهم بجد بقى أجمد حاجة شوية المعلومات المفيدة جدا عنك فى أخر الكتاب

تقبل تحياتى وفعلا شرفت بمعرفتك

صحيح قصة رجل المستحيل اللى موجودة عندك فى الكتاب جامدةى جدا خاصة المعلومة اللى كانت فايته عليا انه اتعلم لغتين وهو نايم من وسط ال500 لغة اللى بيتقنهم بكل اللهجات ههههههههههه
أنت عارف أنا اتبسطت بالمعلومة دي ليه لأنى الحمد لله بأقدر استغل كل وقتى وانا صاحى المشكلة بقى ما باعرفش اعمل اى حاجة مفيدة وانا نايم

فبعد ما عرفت المعلومة دى قلت لازم اتعلم حاجة وانا نايم -اشمعنى أ.ص يعنى-المهم أنا دلوقتى بدأت تمارين بسيطة كده وانا نايم اللى هى تمارن اللعب فى المناخير وانت نايم.....ادعيلى جامد لأنى حاسس فى نفسى انى خليفةأ.ص

دمت لنا بكل خير

وربنا يحفظك لينا يا رب

ويلا سلام

dina seliman يقول...

مبرووووووووووك
من هنا لحد بعد بكره العصر
وعقبال الكتاب الجاى تحط تذكره موزامبيق

وتسميه مبسوطه ياموزمبيق
تفتكر مبسوطه

كلام حسام يقول...

بص بقي يا عم اشرف هدايا ايه بس وفلوس ايه انت يا سيدي اكبر من ده كله ده انا حت لو غزلت لك من نجوم السما ورق من عشرين جنيه مضروبة مش هتكون كفاية عليك ولا حتي لو حاولت اقنع الجنية اللي كانت بتطلع لنا واحنا عيال صغيرة انها توافق وتتعشي معاك يبقي برضه قليل عليك
حتي لو كلمت الست مرجانة انها تديك ارقام الخزنة السرية بتاعة علي بابا وترقص لك رقصة كمان من ايام رقص الجواري وما ادارك ما رقص الجواري يبقي مش كفاية عليك
شوف يا عم
انا عازمك علي عربية فول انما ايه حكاية علشان تشوف بنفسك فلسفة عربية الفول وفحل البصل ورغيفين العيش وهنقعد علي قفص محترم لسه وراد من سوق الفكهانية بخيره وجنبنا بستلة مية فيها شوية تلج يستاهلو بؤك
هااااه

مبسوووووط يا أشرف

mostafa rayan يقول...

الف مبروكم يا اشرف
فرحان اني شوفتك يوم الحفل وشوفت الصباغ وسووو وغادة عبد العال وكل الناس الحلوة دي ان شاء الله الكتاب ينجح ويكسر الدنيا

Asmaa mahaba يقول...

تستحقها بجداره وفقك الله
تحياتى لحضرتك سومه_87

غير معرف يقول...

صلي ع النبي

بأه يا سيدي انا بقالي حبة كتير متابعة المدونة دي وعماله اقول الراجل ده بأه مش ينزل حاجته ف كتاب ولا ايه مش كده
قوووووووم ايييييييه لقيتك في مرة رحت قايل ان كتابك قرب ينزل
بالك انت،، رقعت بالزغاريط هنا وهناك

قوم اييييييه قلت لازمن ولابد الحفلة بتاعة التوقيعات ولا افوتها
ربك بأه كان رايدلي حاجة تانية خااااالص
الشر بره وبعيد جاتلي اجازة مصيف قمت انت عامل الحفلة قمت راقعة ميت صريخ م القهرة بعدين عنك
اللهم لا حول ولا قوة الا بالله،، لأ وكمان حفلة توقيعات كتاب المدونين التاني

تفتكر ده اسمه ايه؟؟

أشرف بيه،، ربنا يباركلك يا رب ويوفقك بجد والله انبسطلك وههنيك تاني ان شاء الله لما اشتريه واقراه

كل سنة وانت طيب ورمضان كريم اوي على فكرة :)

مها ميهوووو

أخف دم يقول...

السلام عليكم
ربنا يكرمكم ياحماعةعلى تشجيهكم الجميل.. ويارب يكرم كل اللى قال رايه فى الكتاب بعد ما نزل.. بجد مبسوط جدا بيكم قبل الكتاب.. وربنا يقدرنى انى اعمل حاجة تسعدكم دايما.. مستنى منكم إيميلات برايكم فى الكتاب وكمان صور الحفل للى حضر ياريت يبعتها والفيدوهات بطلوا بخل بقى .. وهنتحاسب يعنى..
وكل سنة وانتوا طيبين
أشرف

Unknown يقول...

مبروك