اخبار

السبت، 8 مارس، 2008

خد بالك عليا


من زمان أول أيامى فى الجامعة.. بدأ شعرى ينتشر نسبيا فى الجامعات ..حصلت أول سرقة لقصيدة ليا من جامعة تانية..وقالولى ان واحد من جامعة كذا قال قصيدة ليك.. بصراحة بقدر مازعلت بس فرحت كتير برضه.. كنت حاسس ان شعرى كويس وعشان كده اتسرق..يوم ورا يوم بدأت المسألة تزيد معايا..وبدأت كل يوم اكتشف ان حد سرق قصيدة ليا أو ان واحد يقول لى انه سمع حد بيقول قصيدة ليا باسمه ..وبدأت المسألة تدخل فى زعل ثم غضب ثم خنقة..لدرجة ان قصيدة مرسال لحبيبتى بتاعتى اللى انا فايز بيها بفضل الله أكتر من مرة أول جمهورية.. أخدها واحد تانى وتنافس بيها لدرجة انه فاز على مستوى محافظة الجيزة _ مع العلم ان انا من المنصورة أصلا_ وكان رايح يترشح على مستوى الجمهورية بيها لولا ان ولاد الحلال عملوا الواجب وخرج من المسابقة!!
ومرة تانية.. واحدة كانت بتشكى لواحد صاحبى ازاى حبيبها زعلها ومن كام يوم حاول يصالحها فكتب فيها قصيدة سريعة من تأليفه_ماشاء الله ماشاء الله_ اسمها استحملى.. فطبعا صاحبى قال لها: شوفى.. عايزة ترجعى له ارجعى له.. بس المهم فى الموضوع ان القصيدة دى بتاعة أشرف توفيق مش بتاعة المحروس!!
وطبعا ممكن الجميع يتخيل مدى الصدمة لما تحط فى موقع جوجل بين قوسين كلمة مرسال لحبيبتى أو ناقص دبدوب أو استحملى أو أقولك شعر أو بس يحط أى جملة كاملة من داخل القصيدة بين قوسين ويبحث..هيلاقى حاجة لذيذة جدا بالصلا ع النبى..
حتى البوستات اللى فى البلوج.. أول ما انزل البوست من هنا.. والله أحيانا تانى يوم ابحث عنه ألقاه فى اكتر من موقع باسم ناس تانية.. كأن الناس دى واقفين على باب البلوج وبيخبطوا : ياساااتر.. ممكن نسرق البوست؟؟
وكمان فيه بوستات تجاوزت مرحلة المواقع وبقت على الإيميلات والفيس بوك زى فيلم هندى و رجل المستحيل و درس نحو و أخبار العام الجديد و من أطلق الرصاص على محسن بتاع الفول و ياعينى ع الولد وغيرها كتير..ومع العلم ان انا مش مشترك فى الفيس بوك ومش مقتنع بيه أصلا.. تكتشف ان اكيد اللى ناشر الحاجات دى حد غيرى يعنى.. كله تاه فى وسط زحمة الإيميلات وهوجة الفيس بوك وكله بيبعت وبيضيع حق الراجل الغلبان اللى كل غرضه ان الناس تنبسط وتفكر بس برضه محتاج ان الناس تعرف ان هوه اللى كتب يعنى..أظن ده حق مشروع عادى..
طبعا مش هاقدر انسى الناس المحترمة اللى بتاخد القصايد أو البوستات وبتكتب اسمى عليها بكل أمانة وصدق.. بجد شكرا ليهم جيدا.. وبابقى مبسوط جدا وكل الناس بيشكروهم على حسن النقل والاختيار.. بابقى سعيد ان هما كمان خدوا حقهم من إعجاب الناس من غير ما ييجوا على حق حد تانى
إيه المشكلة فى إنى لما يعجبنى حاجة انقلها واحطها فى المكان اللى انا عايزه بس بإسم صاحبها؟؟ والله برضه هيبقى جهد رائع والناس هتبقى مبسوطة وكمان هتحترمنى انى بانقل بالمصدر كمان..إيه المشكلة فى إنى استإذن قبل ما آخد الحاجة سواء قصيدة أو بوست زى ما ناس محترمة كتيرة عملت وبعتت إيميلات مخصوصة ومن أكتر من دولة عربية كمان بحمد الله عشان تاخد بوستات موجودة قدامهم ممكن ياخدوها من غير استئذان؟؟ ده طبعا عشان دى ناس محترمة عارفة قيمة الكلمة وبتقدّر تعب اللى بيكتب..
والغريب ان حتى شغلى اللى برّة برضه بيتسرق.. موضوعاتى بالكامل فى بص وطل بتتنقل وبالصور كمان.. يعنى اللى بياخدها مش بيكلف خاطره يجيب صورة جديدة!!
فى الآخر معلش ياجماعة انى ضيعت بوست منكم فى حاجات شخصية زى دى.. أنا بابقى سعيد جدا والله لما حد يدخل يضحك أو يقول لى انى قدرت اعبر عنه وده من فضل ربنا..بس من حقى انى ازعل لما حد يكلمنى ويقول لى أنا قريت بوست حلو قوى تريقة عن رجل المستحيل ومقدرش اقول له ان ده بتاعى عشان مش هيصدق ان الدايرة هتلف وترجع لينا يعنى.. انا اللى فكرت فيه وكتبته وتعبت فيه.. لما ادخل منتدى وانا أساسا مش مشترك فى أى منتدى ولا باحب المنتديات اكتشف ان بعض البوستات منسوبة لكتاب ساخرين كبار تانيين.. أو قصايد منسوبة لشعراء كبار تانيين مش اقصد انى كبير طبعا.. يعنى الحق ضايع ضايع..
عشان كده آسف يا جماعة.. آسف يا كل حد محترم كان بحسن نية بياخد شغلى بإسمى بكل احترام.. آسف لكل حد محترم حفظ قصايدى وقالها بإسمى ونيته سليمة.. غصب عنى مضطر اتعامل مع الجميع بمبدأ السيء..مش هاقدر ابعد عن إنى اكتب هنا .. بس من البوست الجاى هابقى مضطر انى الغى الكوبى والبيست وأغير المدونة فى كل حاجة عشان هيه كمان باظ فيها كتير أظن من كتر النقل..واللى عايز يكتب بوست طويل عريض ربنا يعينه بقى
مش هاقدر امشى من غير ما اسيب لكم حاجة خفيفة .. دى بعض المقتطفات الساخرة اللى بانشرها فى جريدة الدبور كل ثلاثاء فى أعلى الصفحات وباكتب كمان صفحة أولاد بلدنا جوة الجرنال.. هاكتبها هنا تلطف الجو على ما ييجى البوست الجديد قريب اللى ان شاء الله هيبقى بوست جامد سياسى درامى عن قصة معروفة ومشهورة
ــــــــــــــــــــــــــــــــــــــــــــــــــــــــــــــــــ

ــــــــــــــــــــــــــــــــــــــــــــــــــــــــــــــــــ
قررت الدولة بعد معرفتها بمعاناة سكان العشوائيات وانفصالهم عن سكان مصر..مساواتهم بباقى سكان المحروسة بتوزيع 2كيلو دم ملوث..و3 كيلو بطاطس مسرطنة..وفرختين انفلونزا طيور من الأصلى لكل منهم..وقطع المياه عنهم 7 أيام في الأسبوع!!
ـــــــــــــــــــــــــــــــــــــــــــــــ
بعد أن تقدم البرلمان الأوروبى باحتجاجه لمصر لعدم مراعاتها لحقوق الإنسان.. قررت وزارة الداخلية إرسال طرد عاجل للبرلمان الأوروبى عبارة عن أحد الذين قتلوا من قبل في السجون من التعذيب ليشهد لهم بنفسه أن الأكل في السجن مية مية!!
ــــــــــــــــــــــــــــــــــــــــــــــــ
في إحدى جلسات النميمة السياسية قال أحد السياسين لزميله: مارأيك في ما حدث بين الدكتور يوسف بطرس غالى والدكتور جودت الملط في مجلس الشعب؟؟ فرد عليه ببساطة: مهما حدث سيظل بطرس غالى.. (غالى).. وجودت الملط ..(ملط)!!
ــــــــــــــــــــــــــــــــــــــــــــــــــ
بعد احتجاج السفير الاسرائيلى منذ فترة على أن بعض الطالبات قد تعدوا عليه باللفظ وهو في مسكنه المطل على مدرستهم..قررت وزارة التربية والتعليم نسف أى مدرسة تقع في قطر تسعين كيلومتر من فيللا السفير الإسرائيلى..مع طلب خريطة بأماكن الفيللا المستقبلية لعدم بناء مدارس فيها!!
ــــــــــــــــــــــــــــــــــــــــــــــــ
أكد صديقى أنه كان يسير في الشارع وفى حافظته رقمه القومى.. وشهادة التجنيد..وكارنيه العمل..وكارنيه إحدى الهيئات الثقافية الحكومية للدليل على أنه ماشى جنب الحيط ومع ذلك تم القبض عليه وتم حبسه في السجن للتحرى.. فقلت له: وماذا فعلت بعد ذلك؟؟ فقال بفخر: عملت كارنيه الحزب الوطنى!!!
ـــــــــــــــــــــــــــــــــــــــــــــ
أكدت هيئة الآثار أنها تعتزم تأسيس متحف مصرى جديد ضخم وسيكون على مساحة أكبر من المتحف المصرى نفسه.. وسيكون تحت اسم" متحف المسروقات من المتحف المصرى"!!
ـــــــــــــــــــــــــــــــــــــــــــــــ
يقال أن أحد المواطنين أراد الاحتفال بعيد الشرطة مع رجالها على طريقته..فدخل قسم الشرطة حاملا معه عصى طويلة وسلك كهرباء وزيت مغلى ومساميروقال للظابط: أنا جاى اتعذب وجايب العدة معايا ياباشا!!!
ــــــــــــــــــــــــــــــــــــــــــــــ
بعد أن تحيرت أجهزة المحاسبات في محاسبة المسئولين والسؤال عن ثرواتهم بقانون" من أين لك هذا؟" وهذا بسبب اختلاف الإجابات وعدم منطقيتها.. قررت الأجهزة تغيير السؤال ليصبح " إلى أين سيذهب كل هذا؟" حيث أن كل المسؤولين أجابوا بإجابة واحدة "سويسرا"!!!!
ــــــــــــــــــــــــــــــــــــــــــــ
الصداقة :مصطلح جميل ..يستخدمه أحدهم عندما يريد أن يقترض منك خمسين جنيه ليعزم صاحبته عند كنتاكى التحرير..
الندالة:مصطلح أجمل..تستخدمه أنت عندما تعطيه خمسين جنيه مزورة وتبلغ الشرطة ..وتذهب أنت لتقابل صاحبته!!!
ـــــــــــــــــــــــــــــــــــــــــــــ
بعد ارتفاع أسعار اللاعبين الخيالية في مصر وتزامنها مع ضيق المعيشة على المواطن العادى..قتل مواطن أبناءه الأربعة.. واحد بالشنق.. والثانى بالحرق.. والثالث بالسم.. والرابع بالكهرباء.. بعد أن ثبت له أنه ولا واحد فيهم بيعرف يلعب كورة!!
ـــــــــــــــــــــــــــــــــــــــــــــ
بعد أن اعتاد اللاعبون في مصر عموما تقبيل دبلة الخطوبة أو الزواج بعد إحراز أى هدف..أبدى بعض النقاد الرياضيين شكهم في العلاقة غير البريئة بين محمد زيدان وحذائه بعد تسجيل هدفه في الكاميرون!!
ـــــــــــــــــــــــــــــــــــــــــــــ
أعلنت الحكومة الإيرانية بداية تعاونها مع أمريكا بعد تأكد أمريكا من عدم وجود أسلحة نووية في إيران وعودة الصداقة بينهما.. وبمناسبة هذا الاحتفال فجرت إيران قنبلتين نوويتين على سبيل التحية!!!
ــــــــــــــــــــــــــــــــــــــــــــــ
بعد أن أفتى الشيخ مبروك عطية لأحد الشباب بحلق لحيته اتقاء من شر أمن الدولة..ظن أحد الشباب أن هناك عداء بين أمن الدولة والشَعر.. فحلق لحيته وشاربه وحاجبيه.. فتمّ القبض عليه بتهمة إطلاق شعر صدره!!!
ــــــــــــــــــــــــــــــــــــــــــــــــ
بعد أن بدأ الأستاذ هيكل نشر مقالات جديدة عبارة عن خطابات كتبها للرئيس في صحيفة المصرى اليوم.. أعلن عم عبده البواب نشر خطابات له أرسلها لزوجته أم حسن أثناء سفره للعراق..يمكن البـِلـْية تلعب!!!
ـــــــــــــــــــــــــــــــــــــــــــــــ
قال لى صديقى الصحفى: "تصور بيقولوا ان معظم التحقيقات الصحفية متفبركة وان الصحفيين بيجيبوا أسماء وحروف من عندهم".. فقلت له بفزع: "ومين قال الكلام ده؟؟" فرد بسرعة: "الزميل (م. ع. س)!!!"
ـــــــــــــــــــــــــــــــــــــــــــــــ

هناك 64 تعليقًا:

خمسة فضفضة يقول...

السلام عليكم ورحمة الله وبركاته

ماتزعلش نفسك يا اشرف الناس دي ليها يوم معلوم اسود علي كل ظالم وابيض علي كل مظلوم

بطوط حبوب يقول...

ولا تزعل نفسك يا عم اشرف بجد
وعلى فكره من كتر السرقه انا واحد من الناس لما بشوف كلامى يعجبنى بقيت اروح اعمل سرش واشوف من صاحبه
واحيانا مش بوصل وبيضيع دمه بين القبائل بس بفهم طبعا انه اكيد مسروق

تعرف اجمل حاجه بقى انك تلاقى البوست ده اتسرق هههههههههههه
والله تبقى حركه جامده

Mosto يقول...

انا بعتزر فعلا لانى نقلت موضوع من موضوعاتك كانت عجبانى قوى بس مقولتش انها بتاعتى وبرده مقولتش انك انت اللى كاتبها انا بعتذر وده مش عيب انى لما اغلط اعتزر

بس المره الجايه لما اخد موضوع انت كتبتته ان شاء الله وفكرت انشره ف حته لازم اديك حققك

ayman badr يقول...

صديقى أشرف أكيد كل واحد بيتعب فى حاجة بيزعل قوى لما تتسرق منه ولو رحت الشهر العقارى حتى عشان تضمن حقك هيدفعوك "الجلد والسقط" العمل الواحد ب 15 جنيه فيا ريت تاخد بالك وعجبنى قوى المدونة كلها وأتمنى دوام الإبداع والنجاح

صديقك أيمن بدر

ست البيت يقول...

معلش تعيش وتاخد غيرها يا باشا
عموما انا اعرفت مدونتك من موضوع منقول على مدونة مواطن مطحون
وقال انها منقولة من مدونة أخف دم
ولما بحكي لحد بقوله انها منقولة من مدونة أخف دم
مدونة جميلة
ممكن تجمعها في كتاب
أديني علقت عندك اهوه
عقبال لما حد يعبر مدوناتي
ويجيب حاجة ساقعة ويجي
اقولك ابجي تعالى صيف عندنيه
ست البيت

حمادة يوسف يقول...

و لا يهمك يا ريس ..

ربنا عمره مايضيع تعب حد ابدا ..

انا ساعات بنقل مقالات من عندك ..بس بقول انها بتاعتك و بحط لينك لمدونتك لاني بقرف من الوصولية دي ..

إنـســـانـة يقول...

ههههههههههههههههههههههه

معلش يا اشرف ربنا يحميلك كتاباتك من السرقة يارب

بس تصدق جوجل ده مصيبة فعلا .. مرة كتبت اسم مدونتى وعنوانها لاقيتها مكتوبة فى رد فى منتدى واحد حاطط لينك مدونتى واسمها وبيقول انا غير مسؤل عن المحتوى المقدم فى المدونة دى ههههههههههههههههههههههههههههههههههههه


حسسنى انى المعلمة سماحة ولا فضة المعداوى وقاعدة على باب المدونة بوزع مخدرات

ولا يا كوكووووو ... التمساحة يلاااااااا

هههههههههههههههههههههههه

على فكرة انا مش لاقية الدبور اللى قولتلى عليها دى .. ومع ذلك حبقى ابعت الواد كوكو تانى يمكن يلاقيها فى المنحل اللى جمبنا

وابقوا افتكروا الجمايل دى

:D

شريف طلال يقول...

أزيك يا اشرف وحشتنا
سجل اشعارك فى الشهر العقارى يا اشرف
و ارفع على اى حد قضيه يخش بيها مسابقه
و بعد خمس ست سنين هتفوز بالقضيه دى و الحكم هيبقى أعتذار مع عدم تكرار الخطأ
و القانون فى خدمه الشعب
هههههههههه
او اعمل خير و ارميه فى البحر
معلش بقى و حسبنا الله و نعم الوكيل فى أى حد معندوش ضمير
بالنسبه للحته الفرفشه الى فى الاخر
جميله جداً جداً
و مستنيين بوستك الجديد بقى متتأخرش علينا زى عوايدك
و سلام يا باشا

fnan_geology يقول...

ولا يهمك

هيا لاصرحه حاجه بتفرس وتخنق
ان حاجتك تتاخد منك وتنتشر
ولا كان ليها صاحب


انت ممكن تعمل فواصل فى وسط الكلام باسمك علشان اللى بينقل يزهق ان يمسحه كله

ولا يهمك




ومسيرها فى يوم تحلى

وسلام

monaliza يقول...

علىفكرة يا اشرف انا كنت هبعتلك مخصوص عشان الموضوع ده مفكراك مش عارف وكنت خايفة عليك من الصدمة انا اتبعتلى فعلا بوست رجل المستحيل من مجموعو بريدية انا مشتركة فيها اسمها
yallagad
بس انا طبعا قمت بالواجب وبعتلهم رسالة بأن البوست ده بتاعك ومنقول من مدونتك وكتبتلهم طبعا اسمك واسم المدونة(متخافش وراك رجالة)وطبعا رسالتى وصلت لغالبية المشتركين بدليل انها وصلتنى انا شخصيا ولو هيفيدك اسم صاحب الايميل انا ممكن ابعتهولك لان دى حقوق ناس وعيب اوى انها تروح ده غير ان السرقة دى حرام ومتخافش يا اشرف ربنا هياخدلك حقك ومش هيضيع تعبك ولو ده محصلش فى الدنيا فممكن اوى تكون سرقتهم دى سبب فى عذابهم فى الاخرة هما مستسهلين الموضوع لكن السرقة سرقة وبحييك انك اتكلمت فى الموضوع ده لان ممكن حد فعلا يكون بيعمل كده ومش فى دماغه ان الحركة دى ممكن تحرق الدم

الإتربي اللولبي يقول...

العزيز الغالي أشرف

المشكله في إن الغلابه ف عقلهم اللي بيعملوا كده مش واخدين بالهم ان سعادتك عامل ديوان مرسال لحبيبتي .. و ده ديوان له رقم إيداع .. يعني مشهر بتاريخ .. و أي ابن كلب هايفكر يسرقك هايتحرق .. و يلعن أبو اللي يزعلك ....

دي كانت نقطه ..

حاجه تانيه بقى .. بالنسبه لزيارتك المصونه و التاريخيه لمدونتي ..

يا ريت معاليك تنزل من برجك العالي و تزورني و تعلق لي على كل بوست عشان ربنا يسلم طريقك لما ادعيلك و انا دعوتي مستجابة ...

سلام عليكم ...........

العبـد لله يقول...

أنا معاك في انك لازم تاخد بالك من كتاباتك لانك لو ماعملتش كده فحاول تستحمل النصب اللي علي ودنه..ومكانش مفروض انك تقول آسف عشان بتدخلنا في مشاكلك الشخصيه لأنه بما اننا بنقرأها وبنحبها وعاوزينها تستمر فلازم نكون غيورين عليها وأكتر منك كمان.ومستنيين الموضوع الجديد؟؟

rona يقول...

انا كمان شفتلك كام حاجه مسروقه بس عشان متبعه عرفه انها حجتك بس معلش انت فعلا الغى الكوبى اعمل اى حاجهعشان تحافظ على كتبتك وربنا يوفقك وشكرا بردوا انكمنستش تكتبلنا حجات حلوه

gogo we bas يقول...

انا اول مرة ادخل مدونتك
وده طبعا من سوء حظى انى ماجتش هنا من زماااااااااااان


ومش هقولك ماتزعلش نفسك
لان حقك تزعل

لما اقرا دلوقتى عندك (مبسوطة يامصر) واكون لسه قرياها من كام يوم على جروب خاص بمجموعة شباب محترمين واحدة منهم نسباه لنفسها والناس ومن ضمنهم انا ابدينا اعجابنا الشديد بخفة دمها وكلامها اللذيذ
يبقى عيب ولازم تزعل


بس هقولك ايه
انت قولت اللى فيه المفيد

اذا كانت حقوق دول مابتتحفظش
واذا كان حق نبينا علينا مش عارفين نحافظ عليه

يبقى هنقدَر وهنحافظ على حق واحد غلبان فى عصارة افكاره؟؟؟!!!

عموما انك تلغى الكوبى ده حقك ومايزعلش حد وانت بجد استاذ يتمنى كتير انهم يكتبوا ربع اللى انت بتكتبه

تحياتى

Somaia يقول...

ده المصريين تخصص فهلوة وضحك على الناس ده كفاية انهم بيضحكوا على نفسهم أصلا
بس لأننا في بلد ديمقراطي "جداااا" يكفل للجميع حرياتهم "جداااا جداااا" ويدايفع عنها "جدااااا جدااااا جداااااا ...... جدااااا" فمن حقك انك تختار وبكامل ارادتك انك تلغي النسخ من المدونة بس ولأن البلد الديمقراطي ده هو مصر اللي أهلها المصريين أحب أبشرك ان وارد "جدا" تلاقي حد قعد يكتب البوست كلها مرة تانية ونزلها باسمه حتى لو مجهود كبير هيبقي أقل من المجهود بتاع التأليف بس إن الله لا يضيع أجر من أحسن عملا فماتخافشي
بالمناسبة بقي أنا أول مرة أعرف انك بتكتب في الدبور أنا شوفتها كتييير أوي أوي بس عمري ما فكرت أشتريها (وماحدش يسألني عن الأسباب) لكن بعد اللي انت كتبته ده ولو هو ده اللي بينزل فيها تأكد ان توزيع الجرنان هيزيد واحد ان شاء ال،له يعني هزود من دخله يللا يا عم أي خدمة هنصرف عليكو كمان

غير معرف يقول...

السلام عليكم و رحمة الله و بركاته
اخويا و صاحبى و حبيبى ... ابو العيال
ماتعملش فى نفسك كدا يا جميل انت ح تفضل اشرف مهما حصل و يا عم ماحدش ح يلومك لو لغيت البيست و الكوبى ...بس المهم ماتحرمناش من قصايدك و اشعارك و بلوجاتك ... و اللى يزعلك بكلمه بس ابعتو لينا و احنا ح نصفيه و نمنخلو و نروقو و نعمل معاه الانسانيه بتاعة ريا و سكينه دى .... المهم ولا تزعل ولا تحتار قصيدك اقوى من النااااااااااار صدقنى صدقنى صدقنى
اختك (( ام العيال )))

Amr Fekry يقول...

اه فعلا محسن بتاع الفول وادهم صبرى بالذاااات انا قريتهم فى حتت كتير جدا :D
وكلهم منزوعين المصدر :D

بس كنت على طول باقول ان دى بتاعة اشرف توفيق

anwer يقول...

يا عوض عليك ربنا
و هتيالك يا فاعل الخير و الثواب

وجـــه جـــديد يقول...

العزيز/ اشرف توفيق
ما أتى بي الى هنا
مقالاتك التي قرأتها من خلال منتدى ثقافي
يمكنك ان تعتبرني احد قرائك القدامى
برغم انها الزيارة الثانية هنا

و الحق اقول
كل البوستات التي نقلتها احدى الاخوات للمنتدى
نقلت بأمانة شديدة
ممهورة بتوقيعك و اسم مدونتك
و هو ما دلني على مدونتك

(و لا تزعل يا عم الدنيا فيها و فيها
شكرا لحروفك الجميلة و للأخت العزيزة التي ادت الامانة بنقلها

ان شاء الله تلاقيني هنا على طول

ياسمين حميد يقول...

لك كل الحق أن تستاء ممن ينقل أعمالك بدون ذكر إسمك، وتستاء أكثر وأكثر وأكثر ممن ينسبونها لأنفسهم.

تحياتي لك، استمر في الكتابة
هذه المدونة من الأشياء القليلة التي تجعلني أضحك من قلبي
استمر في كتابة مواضيعك الطريفة هذه وأشعارك الجميلة
ولك الحق طبعاً في وضع أي حماية من النقل تراها مناسبة

تحياتي

غير معرف يقول...

كل واحد عايز يبقى زيك وان الناس تحبه زى ما بيحبوك.. بس الناس كلها عارفة اشرف باخلاقه بحب الناس ليه وحبى ليه
ربنا ينصرك ويبعد عنك الحاسدين

جنـه يقول...

وهذا هو مصير كل موهوب
بس بصراحه انا سعيده جدا بالبوست ده
لاني اول مره ادخل المدونه
ولقيت لينكات الاشعار
بجد جميييييييييييييييله جداااااااااا
وربنا يحميك من السارقين والسارقات المنتشرين والمنتشرات علي النت والكافيهات :)
وزي ما انت قلت في اول البوست لو ماكنتش موهوب ماكانوش سرقوه ونسبوه لنفسهم المهم ان القافله تسير

MR.TITO يقول...

فى الاول كده بهنيك على كتاباتك الجمييلة وبتمنالك الخير والتوفيق على طووول ،
أما الجماعة اياهم فياعم فكك منهم لان من الاخر احنا ولا عندنا حقوق ملكية ولا فكرية فى مصر ، تحس ان البلد كلها زى طبق المهلبية بالمكسرات ، وحلنى على ميجبولك حقك .
فانت ربنا يكرمك ويعوض عليك خير ان شاء الله طالما ان قلمك ... لا يتوقف ...
تحيـــــاتى

مجداوية يقول...

يا سيدى تعيش وتتسرق كويس انك عندك حاجة تتسرق فيه ناس نفسها تتسرق بس معندهاش حاجة لا مال ولا فكر ولا امل ولا حاجة ابدا انت فى نعمة يحدسها عليك ذوى الأصفار اللى على اشمال طبعا ,,احمد ربنا ,,قول الحمد لله قول ,وربنا يزيدك من الحرامية ونابشى المدونات ,,ده معناه ان ما لديك له قيمة ,,المفروض تفرح ,,وحرص ولا تخونش

shirry يقول...

اولا مش تزعل علشان حاجاتك
هي دي حياة المشاهير
المهم بجد بوسك المرادي زي كل مرة جامد بالذات مصطلح الصداقة والندالة
ههههههههه
ربنا يوفقك

راديو اسكندرية اليوم يقول...

ندعوكم للاستماع الى اذاعة اسكندرية اليوم

اذاعة اسكندرية اليوم - اوعى تفرط فى حقك
على هذا الرابط
www.alextoday.net

هبة المنصورى يقول...

فعلاً حاجه تتضايق
أنا فاكرة أول مرة أبعت موضوع للدستور لقيته نازل ف منتدى والمشرف ع المنتدى باعتلى الصفحة ع الميل.. ماشى بإسمى بس مش عارفه ليه استغلست الحكايه.. حد لا أعرفه ولا يعرفنى ينقل كلام عنى ليه؟

أنا شايفه إنك تنزل كتاب لكل الحواديت وديوان لكل القصايد.. متهيألى كده حقك مايضيعش

Masry يقول...

مع تحياتي
khawater-mawakef.blogspot.com

إبـراهيم ... معـايــا يقول...

إزيك يا أشرف يا جميل، و نـ ـ ـ ...مش مشكلة بقية الصفات، المهم إن الهاجــس الوحيد المسيطر عليا وأنا بقرى، يا ترى اللي هيسرق التدوينة دي، هيسرقها ليه ؟؟؟

مااااا علينـــا ... بقى يا راجل بتشتغل ف الدبور، طب مش كنت تقووول


ولا إحنا يعني مش زًمًـل
عمومًا لذيذ كالعادة ، وتحياتي يا أبو أشرف

Moony يقول...

السلام عليكم
انا بصراحه بعت بوست رجل المستحيل لكن فعلا كتبت اسمك في الاخر ولينك المدونة
عموما اسفه لو دي حاجه زعلت حضرتك

دهاء سياسي يقول...

السلام عليكم و رحمة الله و بركاته

انا كنت معديه فقلت أسلم .. بس لقيت عند حضرتك بوست كان شاغل بالى بقاله فترة بصراحة ..

هو حضرتك ليك حق فى كل كلمة قلتها هنا .. مش حقدر أقول لحضرتك ما تزعلش .. لان انا لو مكانك حكون متضايقة جدا .. يمكن الضيق يبقى ثانيه عابرة ولكنى حتضايق جدا ..

الموضوع ده شاغل بالى بقاله فترة فعلا .. هو ايه الى ممكن يحمى المدون من سرقة تدويناته ؟؟
قعدت أفكر لحاد ما تعبت بصراحة ..
بس واضح ان حضرتك عندك حل شبه كويس للموضوع ده .. لو نفع تنفيذه مع حضرتك يا ريت تبلغنى بيه

أتمنى أن تكون بخير :)

المفقوعة مرارتها يقول...

اولاً
عندك حق تضايق من النقل والسرقة كدة علي المكشوف بجد ربنا يعينك
بس ايه حكايةعيييب ياراجل دي
انا لما جيت افتح الكومنت قاللي برده عييييب يارااااجل

بص وطل بتدفع فلوس كاش للي بينشر فيها يبقي بأي حق تاخد من عندك حاجة من غير الدفع المقدم والا انت فاتحها سبيل ولا مؤاخذة

غير معرف يقول...

اوعى تضايق نفسك يا استاذ اشرف
ربنا مابيضيعش حق حد
ربنا يعوضك خير ان شالله ويبعد عنك الناس الوحشين دول

الشاعر خميس نصر يقول...

عاجل للمدونين .... شعر: خميس نصر


حكوماتنا موش ناقصة أذية



يا مدونين خفّوا شوية

حكوماتنا موش ناقصة أذية

تحبس و تكبت كل الناس

وصوتكو صرخة مدوّية

بتقولو إن الشعب جعان

عايش حياة كلها حرمان

مخنوق من الزور والبهتان

موش لاقي ريحة الحرية

كشفتو أشكال التزوير

ورفعتو راس كل المغاوير

وقلتو مين همة الطنابير

خلوا الخزانة مهوية

خليتو كل الدنيا تشوف

مين الشريف ومين المتلوف

ومين بيأمر بالمعروف

مين قاطع النور والمية

يا مدونين فتحتو عقول

ريق الوطن بيكم مبلول

وصاحبنا لسة أكيد مسطول

شغال في دعم الحرامية

يا مدونين الصوت مبحوح

من كتر ما في القلب جروح

والظلم بإيديكم مدبوح

يا مقدمين التضحية

يا مدونين صولوا وجولوا

الحق مين غيركو يقوله

وغنوا سوبرانو وصولو

يا مدونين إعلام بكرة

تدوله ميت مليون فكرة

انتو الأمل وانتو الذكرى

لشعب غرقان أمية

أنا قلبي في هواكم دايب

بتوضحوا الرأي الصايب

مبروك عليكم يا حبايب

وانا اشيل جميلكم في عينيا

doda يقول...

يا قلبى يا كتاكت يا اما انت شايل وساكت
كل دة شايلة فى قلبك
بس حقك برضة
ومن الزوق اللى ياخد حاجة يكتب مصدرها
معلش ربنا يعوض عليك ونلاقيك فى يوم من الايام شاعر قد الدنيا

esraa يقول...

ماتزعلش يااشرف لو مكنش الكلام يستاهل مكنش اتسرق

لكن ده طبعا مش مبرر للي يسرق

لكن أعتقد ان لو كل واحد فينا شاف كلامك في مكان تاني تحت اسم حد تاني ودخل وقال ان ده كلامك انت نبقي كده بنرجعلك جزء من حقك اللي ضاع

وانت طبعا عندك الحق الكامل في انك تاخد أي اجراء تحمي بيه أفكارك وابداعك

روق كده بقي

وليك وحشه والله

zordeak يقول...

عشان كده آسف يا جماعة.. آسف يا كل حد محترم كان بحسن نية بياخد شغلى بإسمى بكل احترام.. آسف لكل حد محترم حفظ قصايدى وقالها بإسمى ونيته سليمة.. غصب عنى مضطر اتعامل مع الجميع بمبدأ السيء..مش هاقدر ابعد عن إنى اكتب هنا .. بس من البوست الجاى هابقى مضطر انى الغى الكوبى والبيست وأغير المدونة فى كل حاجة عشان هيه كمان باظ فيها كتير أظن من كتر النقل..واللى عايز يكتب بوست طويل عريض ربنا يعينه بقى
مش هاقدر امشى من غير ما اسيب لكم حاجة خفيفة .. دى بعض المقتطفات الساخرة اللى بانشرها فى جريدة الدبور كل ثلاثاء فى أعلى الصفحات وباكتب كمان صفحة أولاد بلدنا جوة الجرنال.. هاكتبها هنا تلطف الجو على ما ييجى البوست الجديد قريب اللى ان شاء الله هيبقى بوست جامد سياسى درامى عن قصة معروفة ومشهورة
ــــــــــــــــــــــــــــــــــــــــــــــــــــــــــــــــــ
ــــــــــــــــــــــــــــــــــــــــــــــــــــــــــــــــــ
قررت الدولة بعد معرفتها بمعاناة سكان العشوائيات وانفصالهم عن سكان مصر..مساواتهم بباقى سكان المحروسة بتوزيع 2كيلو دم ملوث..و3 كيلو بطاطس مسرطنة..وفرختين انفلونزا طيور من الأصلى لكل منهم..وقطع المياه عنهم 7 أيام في الأسبوع!!
ـــــــــــــــــــــــــــــــــــــــــــــــ
بعد أن تقدم البرلمان الأوروبى باحتجاجه لمصر لعدم مراعاتها لحقوق الإنسان.. قررت وزارة الداخلية إرسال طرد عاجل للبرلمان الأوروبى عبارة عن أحد الذين قتلوا من قبل في السجون من التعذيب ليشهد لهم بنفسه أن الأكل في السجن مية مية!!
ــــــــــــــــــــــــــــــــــــــــــــــــ
في إحدى جلسات النميمة السياسية قال أحد السياسين لزميله: مارأيك في ما حدث بين الدكتور يوسف بطرس غالى والدكتور جودت الملط في مجلس الشعب؟؟ فرد عليه ببساطة: مهما حدث سيظل بطرس غالى.. (غالى).. وجودت الملط ..(ملط)!!
ــــــــــــــــــــــــــــــــــــــــــــــــــ
بعد احتجاج السفير الاسرائيلى منذ فترة على أن بعض الطالبات قد تعدوا عليه باللفظ وهو في مسكنه المطل على مدرستهم..قررت وزارة التربية والتعليم نسف أى مدرسة تقع في قطر تسعين كيلومتر من فيللا السفير الإسرائيلى..مع طلب خريطة بأماكن الفيللا المستقبلية لعدم بناء مدارس فيها!!
ــــــــــــــــــــــــــــــــــــــــــــــــ
أكد صديقى أنه كان يسير في الشارع وفى حافظته رقمه القومى.. وشهادة التجنيد..وكارنيه العمل..وكارنيه إحدى الهيئات الثقافية الحكومية للدليل على أنه ماشى جنب الحيط ومع ذلك تم القبض عليه وتم حبسه في السجن للتحرى.. فقلت له: وماذا فعلت بعد ذلك؟؟ فقال بفخر: عملت كارنيه الحزب الوطنى!!!
ـــــــــــــــــــــــــــــــــــــــــــــ
أكدت هيئة الآثار أنها تعتزم تأسيس متحف مصرى جديد ضخم وسيكون على مساحة أكبر من المتحف المصرى نفسه.. وسيكون تحت اسم" متحف المسروقات من المتحف المصرى"!!
ـــــــــــــــــــــــــــــــــــــــــــــــ
يقال أن أحد المواطنين أراد الاحتفال بعيد الشرطة مع رجالها على طريقته..فدخل قسم الشرطة حاملا معه عصى طويلة وسلك كهرباء وزيت مغلى ومساميروقال للظابط: أنا جاى اتعذب وجايب العدة معايا ياباشا!!!
ــــــــــــــــــــــــــــــــــــــــــــــ
بعد أن تحيرت أجهزة المحاسبات في محاسبة المسئولين والسؤال عن ثرواتهم بقانون" من أين لك هذا؟" وهذا بسبب اختلاف الإجابات وعدم منطقيتها.. قررت الأجهزة تغيير السؤال ليصبح " إلى أين سيذهب كل هذا؟" حيث أن كل المسؤولين أجابوا بإجابة واحدة "سويسرا"!!!!
ــــــــــــــــــــــــــــــــــــــــــــ
الصداقة :مصطلح جميل ..يستخدمه أحدهم عندما يريد أن يقترض منك خمسين جنيه ليعزم صاحبته عند كنتاكى التحرير..
الندالة:مصطلح أجمل..تستخدمه أنت عندما تعطيه خمسين جنيه مزورة وتبلغ الشرطة ..وتذهب أنت لتقابل صاحبته!!!
ـــــــــــــــــــــــــــــــــــــــــــــ
بعد ارتفاع أسعار اللاعبين الخيالية في مصر وتزامنها مع ضيق المعيشة على المواطن العادى..قتل مواطن أبناءه الأربعة.. واحد بالشنق.. والثانى بالحرق.. والثالث بالسم.. والرابع بالكهرباء.. بعد أن ثبت له أنه ولا واحد فيهم بيعرف يلعب كورة!!
ـــــــــــــــــــــــــــــــــــــــــــــ
بعد أن اعتاد اللاعبون في مصر عموما تقبيل دبلة الخطوبة أو الزواج بعد إحراز أى هدف..أبدى بعض النقاد الرياضيين شكهم في العلاقة غير البريئة بين محمد زيدان وحذائه بعد تسجيل هدفه في الكاميرون!!
ـــــــــــــــــــــــــــــــــــــــــــــ
أعلنت الحكومة الإيرانية بداية تعاونها مع أمريكا بعد تأكد أمريكا من عدم وجود أسلحة نووية في إيران وعودة الصداقة بينهما.. وبمناسبة هذا الاحتفال فجرت إيران قنبلتين نوويتين على سبيل التحية!!!
ــــــــــــــــــــــــــــــــــــــــــــــ
بعد أن أفتى الشيخ مبروك عطية لأحد الشباب بحلق لحيته اتقاء من شر أمن الدولة..ظن أحد الشباب أن هناك عداء بين أمن الدولة والشَعر.. فحلق لحيته وشاربه وحاجبيه.. فتمّ القبض عليه بتهمة إطلاق شعر صدره!!!
ــــــــــــــــــــــــــــــــــــــــــــــــ
بعد أن بدأ الأستاذ هيكل نشر مقالات جديدة عبارة عن خطابات كتبها للرئيس في صحيفة المصرى اليوم.. أعلن عم عبده البواب نشر خطابات له أرسلها لزوجته أم حسن أثناء سفره للعراق..يمكن البـِلـْية تلعب!!!
ـــــــــــــــــــــــــــــــــــــــــــــــ
قال لى صديقى الصحفى: "تصور بيقولوا ان معظم التحقيقات الصحفية متفبركة وان الصحفيين بيجيبوا أسماء وحروف من عندهم".. فقلت له بفزع: "ومين قال الكلام ده؟؟" فرد بسرعة: "الزميل (م. ع. س)!!!"
ـــــــــــــــــــــــــــــــــــــــــــــــ


هههههههههههههه

حبيت أخنق بس

:d



يا حبيبى اللى عايز يسرق هيسرق مش هيفرق معاه كوبى وبيست وفيه خمسين طريقة يتعمل بيها كوبى وبيست زى منا عملت كده

هبقى اقولك عليهم بينى وبينك علشان بس مكونش بقول للى ميعرفش يعرف

يا اشرف يا اخويا ولا تحط فى دماغك ولا تزعل نفسك

ده انت المفروض تفرح يا ابنى ان كلامك مؤثر جدا كده

وحقك عند ربنا مش هيضيع

واللى بيسرق بيبقى عارف انه حرامى وعمره مهيعلى علشان هو واطى

يا اشرف يا حبيبى ربنا هيديك على قد نيتك ويكرمك يا رب

والى ربنا بيحبه بيحبب فيه خلقه

وانت الناس كلها بتحبك

يبقى اكيد ربنا بيحبك يا اشرف

ودى احسن حاجة فى الدنيا الخربانة بتاعتنا دى

مش هتطلع باحسن من كده

حب ربنا

وحب الناس


سلام يا عزيزى

:)

حصان بري يقول...

بص يا عم اشرف
من الاخر كده
وسيبك من انت كاتب البوست ليه اصلا
انا لقبت ناقص دبدوب فدخلت عليها
عجبتني جدا
وبعدين استحملي
وبعدين اخدت البلوج بتاعك من اول بوست وانت طالع:)
ساعه يا عم اشرف بشوف البلوج وشكلي مش صاحي بكره علي كده
واللهي يابني تحفه بجد

نرجع لموضوع البوست
بمناسبه انك بتتكلم عن سرقه افكارك
وبمناسبه اني مليش في الرومانسيه والحب
:) وبمناسبه البق الحلو اللي انا لسه قايله

:)معندكش قصيده سلف؟

Mohamed Meshref يقول...

Instead of copy and paste write them into images and put some water marks on the background with your name, and let people copy it :)

jousian يقول...

انا كنت باجي المدونة هنا قبل كده كتير جدا بس دي اول مرة ارد فيها

اللي خلاني ارد اني من الناس اللي نقلوا من المدونة لاماكن تانية منها مدونتي الشخصية

بس انا والله لما نقلت قلت اني ناقلة وقلت كمان انا ناقلة منين..

بعتذر جدا لو كان تصرفي دا ضايق حضرتك..

وربنا يوفقك يا رب ويحفظلك حقوقك..

ody911 يقول...

أشرف

إزيك يا باشا

أسكت مش على الفيس بوك لقيت رسالة مبعوتالى وآخرها من عبقريات أخف دم

يعنى فى ناس أهوة بتشهد بإن الكلام دةكلامك برضوا

ودة بيفكرنى بأغنية

فى ناس كدة وفى ناس كدة

إنته مين فى دوول ؟؟؟؟


واحشنى بجد بس مشغووووووووووووووووول

عادى بقة
بكرة تفرج

أودى

lonlysmily يقول...

:D:D:D
بجد انت مسخرة مش بقدر امسك نفسى من كتر الضحك وكفايه يا باشا انك من المنصورة يعنى بلدياتنا
وبالنسبه لحجاتك اللى بتتسرق بحس ان دا بقى العادى بتاع الناس محدش عايز يتعب روحه ويفكر ويكتب حتى حاجه جديده الناس بقت
reactive more than to be active
اتعودت على الانتخه والنقل مفيش اى ابتكار او ابداع هو لسه هيوجع دماغه اهو هينقل كلام لذوذ منك وخلاص

هعقم على نقطه كمان الفايس مش وحش اوى كدا بس بردة الناس هى اللى بتسئ استخدامه انها بتنزل صور عليه وخلاص وتعمل بوستات عليه وبخ
ولا بتشارك فى الجروبات ولا بتعرف اى احداث مهمه منه وانا عن نفسى كفايه عليا انى عرفت مدونتك من على الفايس بصراحه:)

ضـوء الـقـمر يقول...

سوري على التقصير بس والله لظروف خارجه عن ارادتي انت عارف اني مببطلش ادخل هنا الا للشديد القوي

متزعلش نفسك انت بس دي ضريبة الشهرة
والنجاح انت صح في قرارك عشان ده تعبك وكل واحد بيتعب في حاجه بيحاول يحافظ عليها بكل الطرق اللي يقدر
تحياتي

صالح سعيد يقول...

يا عم متكبرش الموضوع
دى حاجات بسيطه
ومش لوحدك اللى بتتسرق
انا بكتب فى مسلسل راجل وست ستات وافكارى بتتسرق وقتى يعنى وانا واقف
بس اخوك مكار شويه لانى بفضفض بالافكار الهلكانه انما الحلو بيبقى معايا طبعا
المهم
دى اول زيارة لمدونتك
وعجبتنى بصراحه
وادعوك لزيارة مدونتى
يمكن تعجبك وتقول انك مش لوحدك صاحب لقب اخف دم وان هناك منافسه شريفه طبعا بينا كمدونين
من الاخر
مستنى زيارتك ورايك
وربنا يزيدك ويوفقك
تقبل تحياتى

ayar يقول...

والله يااشرف انا مش عارفة مبدا الناس اللى بتسرق دى ايه الدنيا مبقاش فيها امان والناس بقوا عاملين الدنيا زى تورتة كل واحد عاوز يخطف منها ويجرى قبل ماتخلص .. حسبى الله ونعم الوكيل فيهم بجد ... الحاجات اللى انت ناشرها موتتنى من الضحك ... دمت زخرا للوطن ياباشا ......

Abo 7anf يقول...

بصراحه البوست جميل
والتعليقات رهيبه
ربنا يوفقك
انا اول زياره ليا عندك
بس بجد كلماتك رهيبه
ومتزعلش نفسك من موضوع السرقه
لان دا حال مصر
وتقبل مرورى

إبـراهيم ... معـايــا يقول...

أدعوكم، وتدعوكم ورقة وقلم .... إلى الاحتفالية المقامة بمناسبة فوز بوكر العربية ببهاء طـاهر ، وذلك يوم الثلاثاء القادم .... الأول من إبريل ... في نقابة الصحفيين الدور الرابع ... السادســـة مساءً

hend...hanady يقول...

تعددت الاشكال والسرقة واحدة
ودى ملهاش حل بس مسير الحرامى بيتكشف وساعتها بيتفضح والكل بيعرف

مواطن مصرى نايم يقول...

يا عماشرف و لا تحرق دمك
عادى دا حاجة تفرحك ان كلامك بيعجب ناس كتييير
و الا انت كاتبة عشان تحتكرة
انت كاتبة عشان الناس تشوفه
و حكايه الغاء الكوبى والباست
ليها الف حل
يبقى متحرقش فى دمك بسبب
ان كلامك بيتنشر
ويشتهر

أخف دم يقول...

السلام عليكم
والله ياجماعة معدتش عارف اعمل ايه
مكنتش متصور كمية الايمبلات والتواصل مع الناس بالشكل ده عشان الموضوع ده
ناس كتير زعلت وقالت انها بتاخد الموضوعات باسمى والله وحلفت ميت يمين وانا مصدقها .. وزعلت انى هالغى الكوبى والبيست عشان ده هيمنعهم انهم ياخدوا حاجة حابينها..
وناس تانية برضه قالت أحسن انك تلغيه لانهم زعلوا زيى لما لقوا حاجتى اتسرقت باسم ناس تانية
ناس جت اعتذرت وقالت مش هتتكرر عشان حست بغلطها
وناس تانية ربنا يكرمهم بقى سرقوا البوست نفسه برضه!!!!!!!!!!
يعنى أنا قاعد اهاتى وبرضه الناس خدت البوست زى ما بطوط توقع.. كان متوقعها كشيء خيالى يعنى انما فعلا اتحقق وموجود البوست فى كام منتدى!!!!!
إحساس رائع لما تحس ان الناس فرحانة ومبسوطة وبتستنى شغلك وده بفضل ربنا وحده.
وإحساس وحش جدا لما تحس ان ناس تانية بتاخد حاجة مش من حقها سواء كلمات إعجاب أو غيره.
المهم فى الآخر انا عامل الكود وعلى قد ما اقدر باحاول امنع بس لو اتاخد يبقى الواحد عمل اللى عليه وخلاص.. وياريت ياجماعة تنسبه الحاجة لاصحابها مش انا بس.. فيه ناس تانية كتير شغلها بيتسرق.. ربنا يجازيكم خير.. اعطوا الحقوق لاصحابها والحقوق مش فلوس بس!!
ولكل الناس اللى اعتذرت شكراليكم على كلامكم واعتذاركم وانا سعيد بيكم بجد وربنا يقدرنى واعمل حاجة تسعدكم برضه ورجاء بس متنسوش الاسم
والناس الكتير اللى لقت شغلى برة ياريت بس اللى يلقى حاجة لاى حد يقول ان دى بتاعة فلان عشان بس الحق يرجع لصاحبه وخاصة ان المنتديات بتاخد من بعضها يعنى لو موضوع متكتبش عليه اسم صاحبه هيضيع فى النت كله.
والناس اللى اقترحت حلول تكنولوجية للموضوع زى الفواصل والعلامة وهكذا .. المسألة موصلتش لكدع انا بس كنت عايز الناس تفهم انى باتضايق من ده فتبطل يعنى.. ياريت يبقى من نفسنا وخلاص.
وبالنسبة للناس اللى قالت دى حاجة كويسة والمفروض تبسكط.. ايوة ياجماعة بس صدقونى دى بيبقى لفترة بعد كده بتبقى خنقة والواحد بيشوف جهده هنا وهناك وبعدين مين قال للناس ان دى ده شغلك وفنك ؟؟
والمفقوعة مرارتها انا كنت على بص وطل ان موضوعاتى اللى بانشرها هناك بتتسرق برضه مش ان بص وطل بتاخد شغلى .. بص وطل موقع محترم جدا وانا باشتغل فيه.
عموما فى الآخر كل سنة وانتوا طيبين ويارب الموضوع ميكونش ضايقكم.. روقوا كده وان شاء الله كل شيء هيتصلح واسيبكم مع البوست الجديد
ربنا يسعدكم يا أحلى ناس
أشرف توفيق

ٍSOU يقول...

من اطلق الرصاصة على عم محسن ...انا كنت هاتجنن و اعرف مين الكاتب الاصلى ليها...بس بجد تسلم ايدك

غير معرف يقول...

ازيك يا اشرف اول ما قريت اول كلمتين من المدونة النهارده اتخضيت لاني فعلا اخدت مرة مدونة من بتاعاتك وكانت (اخبار العام الجديد) وبعتها لاصحابي بس ربنا يعلم للامانه كتبت ((منقولة من مدونة اخف دم)) ويا ريت ما تكونش زعلت وربنا يوفقك.

Tota يقول...

ههههههههههههههههههههههههههههههه والله العظيم انت زي العسل - انا اول مرة ادخل المدونة بالصدفة يعني جدا ... قبل ما اقرا البوست دا بعمل كليك يمين علشان افتح رابط ف ويندو تانيةلقيت التعليق اللي انت حاطة علشان تمنع الكوبي ... طبعا مفهمتش وبعدين وصلت للبوست دا وصدقني اول ما عرفت السبب انفجرت من الضحك ... مع موقفين مضحكين حصلولي مع اتنين من قصايدك بقالي ساعة ونص بضحك ،،، :d

أسما عواد يقول...

أبو دم خفيف
طيب انت حكمت على نفسك وصدرت اسمك أخف دم لكل الناس بدون ما تستنى رأيهم
موش ممكن يكون رأينا فيك مختلف؟
طبعا هتقول اني واحدة دمها تقيل وغيرانة منك وهتقول ادخل اشوف مدونتها ... دمها ايه دي اللي موش عاجبها دمي
وأحب أقولك انك ساعتها هيكون عندك حق انا دمي تقيل قوي
بالنسبة لدمك اللي نازل خفة لحد ما هيخلص خالص
انا أول مرة أشوف مدونتك بسبب محمد كمال والكتاب اللي منور باسم مدونتك
مبروك للكتاب والبوست الجميل بتاعك
وعلى فكرة موضوع امتحان العربي ده
لسه جايلي اميل بيه من أختي من السعودية
ومكنتش اعرف ان انت مؤلفه
أنا موش عارفة أختي جابته منين هيا كمان .. حتما جايلها من حد لأنها موش غاوية مدونات ونت
أدعوك للإجابة في مدونتي التانية على مكتوب وتخففلي دمها التقيل زودلو شوية ميه يمكن يبقى خفيييييييييييييييييييف قوي

http://baabalshams.maktoobblog.com
تحياتي يا أخف دم

سارورة يقول...

انا كذا مرة اخدت قصائد ليك وحطيتها على منتديات بس كتبت اسمك والله .. وكمان فى ناس ماكنتش بتاخد بالها انها بتاعتك فكررت التوضيح تانى عليهم فى الرد

لأنى رغم ان حاجاتى مش روعة يعنى ولا يحزنون بس اتسرقت اكتر من مرة ومقدرة انه لو حرف واحد يخصنى اتسرق بيبقى الاحساس عامل ازاى

حسبى الله ونعم الوكيل بجد فى اى حد يعتدى على حق حد لن الموضوع دا بجد بيوجع

غير معرف يقول...

على فكره اشعارك كلها روعه وانا قريتها كلها قبل كده من جروب محترم جدا
وكان بيكتب اسمك كمان
وانا نقلتهم فى كل مكان وكنت بنقل كل الاشعار اللى بتتبعتلى من الجروب دا فى منتديات مشتركه فيها


لانى برده كنت بعانى من الحركه دى بس خلاص اتعودت اشوف اشعارى منشوره باسامى ناس تانيه

Dr/ walaa salah يقول...
أزال المؤلف هذا التعليق.
Dr/ walaa salah يقول...

السلام عليكم ورحمه الله وبركاته

اولاً اهنيك على مدونتك الجميله ا/ اشرف


ثانياً انا من اشد المعجبين بكل كلمه تكتبها


اول قصيده قرأتها كانت ناقص دبدوب وما زلت اذكر كل كلمه فيها ومن يومها وانا اتابع كل ما تكتبه

ولا تخف فأنا عندما انقل اي شئ منك فإني اذكر إسمك ويمكنك التأكد من ذلك ولله الحمد

فلقد عانيت مثلك من موضوع سرقه القصائد ولا ارضى لشخص ما لا ارضاه لنفسي

اعذرني على الإطاله ولكني احببت ان اهنيك على مواضيعك الجميله وانا انتظر كل جديد لك

dconans يقول...

قصدك عن الحوار مع رجل المستحيل الى منشور باسم شريف عرفة؟

نانسى محمود يقول...

بسم الله الرحمن الرحيم
صحيفة الأسبوع المصرية
• يسرنا تلقى كتاباتكم الساخرة لنشرها فى صحيفة الدبور المصرية www.eldabour.com
والتى يرأس مجلس إدارتها الأستاذ محمود بكرى
لإرسال كتاباتكم الساخرة يرجى الذهاب إلى هذا الرابط
http://www.eldabour.com/eldabour/admin/guestbook.asp
وللإشتراك فى قائمة المراسلات البريدية لمعرفة الجديد من أخبار الجريدة يرجى الذهاب إلى هذا الرابط
http://groups.google.com/group/alaosboa/boxsubscribe
..يرجى متابعة اعمالكم عن طريق العدد الورقى او الإلكترونى من صحيفة الدبور المصرية والتى تصدر كل ثلاثاء.
• نرحب بجميع الكتابات الساخرة التي تتوافق مع مبادئنا وأهدافنا و تستند إلى مفردات جيدة تجذب معنى ساخرا متهكما يمتزج بروح النكتة والقفشة ليأسف على الواقع المرير المضحك المبكى وليسخر من أوضاع متردية ومسئولين وحكومات سخرت من شعوبها فسخرت شعوبها منها..و التي تحمل في طياتها نقدا بناء وهدفا توعويا نبيلا غير مبتذل أو مستهزئ بالآخرين..حيث إن النقد في منهجنا هو النصيحة بأسلوب مهذب رائدها التناصح.
نرحب بجميع الكتابات الساخرة والمقالات الانتقادية "المعدة للنشر لأول مرة" التي تتناول الحقيقة كما هي دون رتوش أو تزويق..وبأسلوب ساخر تلقائي لا يكون كاتبه مدركا لخفة ظله بل "مهموما".. فالهموم تصنع الاهتمامات والاهتمامات تصوغ الوعي.
فيصل حسين
مدير مواقع جريدة الأسبوع على شبكة الانترنت
www.elaosboa.com
www.eldabour.com
www.mostafabakry.net
www.mahmoudbakry.net
البريد الإلكترونى
Fesal_hussien@yahoo.com
رقم الهاتف: 0108720621 - 25775593

سهير عناني يقول...

أحب أن أدعوكم جميعا لزيارة مدونتي
حيث أنني بعد أن زرت مدونة أخف دم
تحركت بداخلي انامل الكتابة وقررت أن انشىء مدونة خاصة بي وبشعري سميتها
عندما أطلق عناني
اليكم الرابط
http://sananii.blogspot.com/
مع تحيات سهير عناني

غير معرف يقول...

كلمات رائعة ومؤثرة وجهد رائع مبذول يعبر عن وجهة نظر صاحبة
استمر و بالتوفيق
http://www.almanarheg.com

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡