اخبار

الاثنين، ٢٥ فبراير ٢٠٠٨

خليك إيجابى لو مرة واحدة


طبعا من حق الدنمارك وغيرها أنها تعمل اكتر من كده..لما يتسب الرسول صلى الله عليه وسلم فى صحيفة واحدة قبل كده ويبقى رد فعلنا اننا قعدنا هاديين ونقول بكل بساطة ومودة تعالوا نعمل حوار حضارات.. ولازم نبعت ثقافتنا وديننا للآخر عشان حضرته يعطف علينا ومايشتمش النبى تانى.. يبقى عندهم حق ان كل الصحف الدنماركية تنشر الرسومات تانى..لأننا كالعادة هنقاطع البضايع الدنماركية يومين..ونشتم شتمتين..ونستنى اعتذار منهم وطبعا الاعتذار مش بييجى..ويعدى الأمر وكأن شيئا لم يكن
وطبعا احنا المصريين الشعب الوحيد اللى هيرمى كل حاجة ع الحكومة ونزعق ونقول نلغى اتفاقيات التجارة واستيراد البضايع دى..الناس كلها فى كل الدنيا هيه اللى بتقاطع وهيه اللى بتعمل الدور الإيجابى واحنا هنا كل حاجة نرميها كعادتنا على الحكومة
لو كل واحد فينا قاطع البضايع دى واترمت فى السوق .. الشركات مش هتستوردها تانى من غير ما تقول لى اتفاقيات وكلام فاضى.. محدش هييجى يضربك على إيدك ويقول تعالى اشترى دنماركى..ومحدش هيشدك من شعرك اللى انتى صابغاه ومظبطاه بمنتج دنماركى ويقول لك تعالى اشترى
يعنى الواحد من دول يطلع يعمل أجدع مظاهرة عشان نصرة النبى ويشتم فى الدنمارك وهوه الصبح فاطر قبل ما يروح المظاهرة جبنة دنماركى!!
ياجماعة تعالوا نعمل مرة واحدة ف حياتنا حاجة إيجابية من غير ما نقول حكومة ولا حوار حضارات.. نخسرهم الأول و نخرب اقتصادهم وبعدين تعالى قول لى بعدها حوار حضارات بقى براحتك..انت يعنى لما تقف قدام ربنا وقدام شفيعك النبى صلى الله عليه وسلم هتقول مقدرتش اعمل حاجة والذنب على الحكومة؟؟
وطبعا عايزين ياجماعة المقاطعة ان شاء الله تبقى بلا رجعة.. مش مجرد يومين وخلاص..عشان مش كل واحد عايز يولعها يشتم فى النبى وييجى يعتذر واحنا نبوسه من بقه وخلاص..ونقول له معدتش تعمل كده تانى!!
عايزين كل دولة تعمل حاجة زى دى تعرف ان اقتصادها هيتخرب وصادراتها للشرق الاوسط كله هتبوظ..الناس دى مالهاش دين أصلا.. وهمهم الفلوس والمصلحة.. تعالوا نحاربهم بسلاحهم وبلاش نحارب كل الدنيا بسلاحنا احنا: الحضارة والثقافة والحوار!!
بقى بيتبص لنا على اننا شوية كلمنجية وفنجرية بق..والله منظر المولات السعودية والإماراتية وهيه شايلة البضايع الدنماركية وعاملة يافطة مقاطعة حاجة تسر القلب.. وخللوا بالكم اللى عامل المقاطعة برضه مش الحكومات.. دول أصحاب المولات والزباين هما اللى عملوها ودول كلهم أفراد وماستنوش رد الفعل الحكومى
شاطرين بس كل واحد مننا واثق فى ربنا وعارف ان النصر لينا فى الآخر وكلنا حافظين حديث آخر الزمان لما نقاتل اليهود ويبقى الإسلام هو الأعلى.. وناسيين ان ربنا اشترط ان احنا الاول نبقى عبيد لربنا وننصره بجد
شايف نفسك عملت حاجة لربنا؟؟دعيت مرة وانت بتصلى ان ربنا ينصرنا ويذل الدنمارك وغيرها؟؟ رحت مرة تشترى جبنة لقيت دنماركى مجبتهاش مش عشان غالية .. لأ.. عشان نيتك انك بتنصر دين ربنا؟؟
مش عايز اطول المرة دى ولا اكتب بوست جديد.. حبيت اشارك ولو بكلمة.. ياريت كلنا نشارك ياجماعة واللى بيعرف يعمل بانرات يعملها قاطعوا الدنمارك.. وتبقى لينا احنا كمدونين..وكلنا نكتب وندعى ونقاطع وبجد أنا واثق ان أى حد مهما كان مذنب ومهما كان عاصى.. فكلنا بنغلط ونعصى ربنا وبيغفر لنا بعد التوبة.. عارف ان رغم كل ده الا اننا كلنا بنفور من جوانا عشان نصرة النبى
ودى ياجماعة قايمة بالمنتجات الدنماركية


مارضيتش أجيبها هنا عشان عايز كل واحد يعرف اسم المنتج وشكله كمان فى الجدول..عشان احنا أساسا بناكل من غير ما نقرا الحاجة دى منين.. ان شالله من كوالالمبور
أنا عارف أساسا ان معظم المنتجات الدنماركية معداش علينا..عشان الجبنة الدنماركة غالية أصلا.. واحنا آخرنا جبنة من المثلثات.. وبنقول للبقال يقسم كل مثلث لمثلثات كمان.. وبنلحس السكينة قبل ما نمشى.. بس برضه يمكن حد منكم وللا من القراء اللى الحمد لله متابعين البلوج فى الدول العربية أو برة الوطن العربى يكونوا متعودين عليها حاشا لله
ربنا ينصرنا جميعا

هناك ٢٩ تعليقًا:

الطائر الحزين يقول...

ياريت يكون هذا توجه عام
وياسلام لو دعمته الدوله وقالت احنا مش هناكل الا الشهر ده رز بس

بحلم صح


تحياتى

غير معرف يقول...

تصفيق حااااااااااااااااد لطرحك الرائع ياااشرف ، وبجد عندك حق ، وربنا ينصرنا دايما يارب

maha zein يقول...

تصدق يا جدع اعدت ادور علي منتج واحد تعبان كده في نفسه اكون بشتريه ولا بنجيبه ...ملقتش...عندك حق النداء مش لينا وكده طلعنا صاخ سليم بنجيب الحاجة من عم عبدو البقال وكله في السليم كده كده الراجل مقاطع من نفسه وملوش في الدنمارك خالص اخره يستورد يا من اطفيح يا من صفط اللبن(علي فكرة اكتشفت انك تعرف صفط اللبن دي...قريتها في بوست ليك..اصل قليل الي يعرفها...اسمها جامد كده وبحب استخدمه في حجات كتير وبيتهيقلي اجدع حتة نستورد منها لبن وجبنه مصفوطة)
بشكرك علي التنبيه الهام ده وخلتني فعلا اشوف المنتجات منتج منتج بنية المقاطعة...جزاك الله خير...ومتنساش ليا عندك علبة جبنة مثلثات كاوشت وزيارة للمدونة

شريف طلال يقول...

أما ألاقى منتج واحد اشتريته قبل كده
على العموم أنا كنت ناوى واللهى
يا ريت الناس ألى من بلاد بره تقاطع بقى يا جماعه
اصل احنا مش بناكل الا جبنه سويسرى و مش بنتعامل فى الحاجات الدنماركى الكخه دى
موضوع هايل يا اشرف كالعاده
تحيااااتى

بطوط حبوب يقول...

ربنا يكرمك يا شاعر يااااااااااارب

خمسة فضفضة يقول...

السلام عليكمورحمة الله وبركاته

ايوه كده هي دي الايجابيه ، وزي ما انت قلت البدايه مننا احنا كشعب ومش كل حاجه نرميها علي الحكومه ، الحكومه مش هاتيجي تشوفني بافطر جبنة نوعها ايه الصبح ولا باطبخ بزبده ماركتها ايه علي الغدا

ربنا يكرم يا اشرف يارب

الإتربي اللولبي يقول...

و الله من وجهة نظري اللولبيه مضطر اقول لك ..... خش نااااااااااااام .
الأزمه يا أشرف ان عدم قدرتنا على شراء المنتج الدانمركي ده ف حد ذاته قضيه عايزه حل ... يبقى لك حق ف كلامك لو ف جيوبنا حق المنتج و جبناه .
يبقى الحل ان يبقى ف جيوبنا فلوس عشان نعرف نقاطع بمزاجنا ... مش غصب عن اللي جابونا ...
عموما ياريت تتواضع شويه و تزور مدونتي و ياريت تعلق

موناليزا يقول...

انا شايفة ان المقاطعة مش كفاية لازم يكون فى حاجة تانية توجعهم وخصوصا ان حاجتهم مش مغرقة الدنيا يعنى ولا احنا بنستخدمها طول الوقت انا بقترح اننا نبعت للسفير بتاعهم ونصدرله الوش الخشب كمان او نكلم حد يكون له كلمة عندهم يعنى مش مقاطعة وبس

basma saghir يقول...

انا ولله الحمد مستمرة في المقاطعة من اول مرة الصور دي نزلت فيها وهزت الرأي العام...قررت ساعتها اني اعمل اي حاجة علشان ضميري يستريح.....مع اني مفتكرش قبل كدة اني كنت اصلا بشتري منتجات دنماركية...بس ان جيت للحق المنتجات الي في القايمة دي معظمها موجودة في دول الخليج العربي..وكمان اعتقد ان اكبر دولة مستوردة للمنتجات الدنماركية هي السعودية لان المنتجات دي موجودة بكثرة في سوبر ماركت ولو صغير

هو فعلا المقاطعة يمكن متأثرش معاهم لو هي من ناحيتنا بس هتأثر جدا لو من ناحية دول الخليج بالذات....لاني افتكر ساعة الرسومات الاولانية لما السعودية عملت مقاطعة ان الخساير وصلت في الاقتصاد الدنماركي اعتقد لأكتر من مليار دولار في اقل من شهر...ودي مش حاجة سهلة عليهم

المهم ربنا يكرمك ياأشرف ويجعهلها في ميزان حسناتك

غير معرف يقول...

أول مرة ازور المدونة ولن تكون الأخيرة فهى ممتعة وبجد فى منتهى خفة الدم أنا اتكلمت فى الموضوع ده فى مدونتى يا ريت تشرفنى بالزيارة وخصوصا انها لسه فاتحة لانج يعنى مدونة بشوكها ابقى خد بالك من الشوك وهناك عرضت صور عملتها بالفوتو شوب للرسام الدنماركى ,, الكلام يطول فى موضوع المقاطعة لأن الناس مقاطعة خلقة حتى المنتجات الوطنية بس مقاطعة غصب عنها قصر ديل يعنى واللى له ديل منهم مقاطع ومنهم ممانع يعنى ميقدرش يستغنى عن الزبدة والجبنة ,,المهم ,,الموضوع فيه كلام كتير لكن الخلاصة ان الله ينصر من ينصره,,تحياتى وتقديرى لأخف دم
مجداوية

مجداوية يقول...

أول مرة ازور المدونة ولن تكون الأخيرة فهى ممتعة وبجد فى منتهى خفة الدم أنا اتكلمت فى الموضوع ده فى مدونتى يا ريت تشرفنى بالزيارة وخصوصا انها لسه فاتحة لانج يعنى مدونة بشوكها ابقى خد بالك من الشوك وهناك عرضت صور عملتها بالفوتو شوب للرسام الدنماركى ,, الكلام يطول فى موضوع المقاطعة لأن الناس مقاطعة خلقة حتى المنتجات الوطنية بس مقاطعة غصب عنها قصر ديل يعنى واللى له ديل منهم مقاطع ومنهم ممانع يعنى ميقدرش يستغنى عن الزبدة والجبنة ,,المهم ,,الموضوع فيه كلام كتير لكن الخلاصة ان الله ينصر من ينصره,,تحياتى وتقديرى لأخف دم
مجداوية

Unknown يقول...

مبارك يساعد في مقاطعه الدنمارك عقابا لهم

مبارك خلى الشعب ماعندوش فلوس يشتري المنتج الدنماركي

.......
من وحي مقالتك الرائعه
:)

كريم عاطف يقول...

كلام جميل بس ياريت مانقفش عند المقاطعة لأنها أقل شيء ممكن نعمله أنا مش بقول نروح نفجر وندمر بس القصد أن الناس دي ما بتفهمش غير لغة القوة وطبعا مادام الحكومات نايمة في العسل والرؤساء همهم على عروشهم فمافيش غير الضغط الشعبي

غير معرف يقول...

بسم الله ما شاء الله انت انسان عبقرى انا كل ما ادخل اقرا باسلوبك الجميل اشياء واقعية كنا نفسنا نشارك فيها برئينا وانت بتتكلم بالنيابة عننا انت بجد انسان ممتاز انا قرات بوست الماتش وعلقت ووجد ان كل شىء بيحصل فى البلد من الهيافة يعملولها فرح اما لو حصل موت لبنئدمين كله بيكش انا هرغى شوية و استحملنى كل اللى احنا فيه دلوقتى من غلى الاسعار وغيره دى كلها ذنوبنا واخيرا وليس اخرا حسبيا الله ونعم الوكيل..........انا بشكرك للمرة التانية على كلامك للواقع و ربنا يوفقك عندما اعلق هكتب انا رمز الوردة

غير معرف يقول...

السلام عليكم ورحمة الله وبركاته
جزاك الله كل خير على اللي كتبته يا أشرف
بس انا هطلب مني ومنكم حاجة كمان
احنا نقاطع وكل شوية برده نفكر اللي حوالينا بالموضوع لان احنا لو كنا قرينا عن المقاطعة ففي غيرنا كتير ماقراش فنحاول نفكر اخواتنا وكل الي نعرفهم
وكمان لو اي حد يعرف يعلق بوست وملصقات ياريت نقدر نعمل كده
واحسن حاجة بقى ان الواحد يحاول يستغل اللي حصل بانه يذكر نفسه وغيره بسنة حبيبنا ورسولنا محمد صلى الله عليه وسلم باننا نصلي 12 ركعة غير الفريضة في اليوم ونقول الذكار اللي كان بيقولها الرسول صلى الله عليه وسلم ونتوضى قبل ماننام ونعمل كل حاجة الرسول صلى الله عليه وسلم
وجزاكم الله كل الخير

المـــفـــــــقــــــــوعـــــة مــرارتـهــا يقول...

انا مش عارفة هما حطينا في دماغهم ليه
طب احنا عملنالهم ايه ؟

ayar يقول...

ياعم اشرف هو يعنى احنا لما نقاطعم ولا حتى نخسرهم هايغيروا كلامهم وسخريتهم من نبينا ماتعقلوها بقى ؟؟؟؟؟!اقروا فى نفس الموضوع على مدونتى ,..
http://3enadeya.blogspot.com/

غير معرف يقول...

الدنمارك كدولة ملهاش علاقه بالرسوم او غيره مش زي مصر الي مش ممكن حد يكتب حاجه من غير اوامر اسيادة.
ولكن هناك الحريه حقيقه مش اشتغالات,وبضة هما هناك بقاهم سنين بيسبوا ربنا نفسة وماحدش قالهم حاجه,ولاهو بس الرسول بتاعنا وربنا مش بتاعنا,ولاهوا الرسول اهم من ربنا,ولا ...
اسامة

la3lahakhier يقول...

السلام عليكم
بص انا انا شايفة ان القصة مش قصة منتجات حنقاطعها اولا 95% من الشعب المصرى مابيشتريش المنتجات دى
ثانيا هما اتجرأوا علينا ليه(ومش حقول عن النبى)حاشا لله لان احنا خيخة لمواخذة
خلاص اذا كنا احنا كدا نربى ونعلم اللى جايين مايبقوش زينا
علم ابنك يبقى قوى بعلمه خليهم يجوا يبوس تراب جزم المسلمين . يكون من اقتصاديين شطار ويحكموا الاقتصاد ويذلوا انفاسهم
دكاترة بارعين فى تخصصات جديدة تمرمغ مناخيرهم فى التراب عشان واحد مسلم يعالجوهم
بص ..انا حقولك حكاية صغيرة
كنت باشتغل مع ناس اجانب وكانت فيهم ست معروفة بكرهها للمسلمين والمحجبات بشكل خاص ..طلعت عينى وكانت بتتعمد تضايقنى ..ومع ذلك اتحملت عشان اكل العيش المسرطن ...وفى مرة من المرات لاقيتها بتتكلم عن المسلمين بشكل وحش جدا وجيت ادافع راحت مظرفهمولى ..يومها كنت حاسة بالعجز والقهر وانى ولا اسوى لو سكت وقررت اشتمها واسيب الشغل او افتح نافوخها بحديدة اهو اى حاجة تشفى غلى ..وجات واحدة زميلتى مع بنتها لزيارتى وحكت لى ان البنت مدرستها احرجتها ادام الفصل فقررت تيجى لى عشان اعلمها اللى ماتعرفوش عشان تبقى هى اللى تحرج المدرسة مش العكس (تفكير طفولى بس عجبنى )
وقررت اعمل زيها اصبحت اعمل شغلى بشكل ماحصلش بهرى نفسك ليل ونهار ماكنتش باديها اى فرصة لاى شىء ولكن ماكنتش بتعامل معاها خالص وبعد مدة صيتى سمع وحست هى باهميتى وقبل موعد مهم بالنسبة لها جدا وقفت وامتنعت عن الشغل وطالبتها يا تعتذر ادام الناس كلها على اللى قالته فى حق المسلمين يحروح حالا ومفيش شغل
الحقيقة ان الموقف ماعجبهاش لكنها قالت ادام كل الناس عجيبة انا ماكنتش متخيلة ان المسلمين دول اقوياء كدا ..هو لازم حد يضايقكم اولا عشان تعملوا شغلكم صح ؟واعتذرت الحقيقة ..هى اتعلمت الدرس وانا كمان اتعلمته
يا ريت كلنا نتعلمه
اسفة على الاطالة

Ahmed Othman يقول...

ا/ اشرف
انها الزيارة لمدونتك
و أعتقد أنه قد فاتني الكثير و الكثير

تعليقا على مقالك
الصراحة أجد اننا في مصر من أكتر الدول اللي عندها حمية على الدين
كنت في مصر أجد غضب حقيقي بصدور الناس
أجد محلات تضع دواسات الأحذية بعلم الدنمارك
و محلات تقاطع
و لافتات هنا و هناك
الآن اثناء عملي بالخليج
لا يعير أحد اهتماما بالامر بتاتا
و المنتجات الدنماركية تصطف العرض و الطول و الارتفاع
و معدلات الشراء للمنتجات الدنماركية
( بالهبل)
و كأن هذا النبي لم يخرج من هذه الأرض
سبحان الله تعصب له أبو طالب و هو على غير دينه
و لم يطرف حملة اللواء وأصحاب شعارات النصرة و دين الحق
الحقيقة تملكني الذهول لم أفق بعد منه


شكرا لك

ساعه الغروب يقول...

بجد جزاك الله كل خير يا اشرف

ميرسى ليك بجد



خالص تحياتى بجد

استراحة محمد يقول...

الخلفية التاريخية عننا اننا للأسف حنهيص شوية وبعد كده الليلة تنفض وولا كأن حصل حاجة ، هما عارفين كده فخدوا علينا للأسف
اتمنى تزور مدونتى ونبقى اصحاب
mobkhat.blogspot.com

ROMIL يقول...

طيب يتريت تعملوا حملة " معا ندفن أنفسنا"


ROMIL

zordeak يقول...

والله يا اشرف يا عزيزى انا لو شفت حاجة من الحاجات دى هقاطعها على طول

هقاطعها واضربها بالجزمة كمان

انما انا رحت عالقايمة يا خويا اللى انت حاططها لقيتنى عمرى مشفت حاجة من الحاجات اللى محطوطة فيها

حاجة تكسف مش كده

:D

انا من بتوع المثلثات يا عم

مليش انا فى الحاجات دى


المهم يا حبى انت فين بقالك كتير مشفتكش ولا سمعت صوتك وامبارح موبايلك كان مقفول

هكلمك النهاردة واطمن عليك

أخف دم يقول...

السلام عليكم
ازيكم يا أحلى ناس
سعيد جدا بمدى التجاوب اللى نابع من جواكم مش من البوست طبعا عشان كلنا بنحب رسولنا وديننا .. ربنا يثبتنا على دين الإسلام يارب
أنا بس كمان باتمنى اننا نقاطع البضائع الأمريكية بالمرة وعلى ما قد مانقدر ياجماعة.. عايزين بس نحسس كل حد سواء بيستهزأ بينا أو بيقتل فى الشعوب العربية انه هيجنى ثمرة فعلته
ربنا يقدرنا جميعا.. وطبعا ده ميلغيش اللى الأخوات قالوه من اننا لازم نتبع سنة الحبيب محمد اكتر من كده ونعمل اللى نقدر عليه عشان نقرب من ديننا اكتر وننبعد عنهم هما اكتر
ربنا يقدرنا جميعا ويهدينا
شكرا لكم جميعا يااحلى ناس
اشرف توفيق

MR.TITO يقول...

على فكرة المقاطعة جابت نتيجة كبيرة وآخر تقرير كان بيقول ان خسايرهم وصلت لـ 2 مليون يورو ، الكلام ده مش من مصر بس طبعا بس فى ناس كتير فى المجتمع الاسلامى كله بيقاطعوا ، حتى الهنود هنا فى الكويت مدركين بالموضوع واهميته وبيقاطعوا ...
ياريت يا جماعة نساعد على انتشار المقاطعة دى .. وربنا يزيد من خسايرهم .

أحمد بلال يقول...

مع تحياتي

khawater-mawakef.blogspot.com

Asmaa mahaba يقول...

معلش تعييش وتاخد غيرها
كلنا اتسرق منا فعلا حاجات امال بقى مثلا لو رسمت لوحه واسمك مكتوب عليها وتتاخد اللوحه يتشال اسمك وتتقدم باسم تانى ....بس من سوق حظ الحرامى انه اتقفش وبقى شكله وحششششششششششش
بتفكرنى بمزيع النشره اللى عندى فى تخاريف مجانين
تحياتى ليك سومه_87

أم حبيبة يقول...

الحمد لله لما بصيت على القايمة لقتنى مقاطعة من غير مااعرف ايه ياخويا الحاجات دى تعدمنى لو كنت حتى سمعت عنها يلا الحمد لله