اخبار

الأحد، 27 يناير، 2008

كفاية جراح

يا حبيبتي
!!قصدي يا اللي فهمت يوم إنك حبيبتي
عامله إيه؟
رغم إن الغدر ساكن حضن قلبك
لازم اطّمّن علِيهْ
قلبي صابُه البُعد لكن.. غصب عنّي
لسَّه داء الضعف فِيهْ
هوه ده القلب اللى سبتيه ويّا نارُه
هوّ دا القلب اللي كان بُعدك مرارُه
واللي تاه مشوارُه بَعدك.. وانطفى في الحلم ضَيُّه
واللى مش هتلاقى عمرك قلب زيُّه
قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟
******
قلب عارفاه من بدايتُه
فاتح الباب للّي فايتُه
قلب بانياه الجراح
بس مسكون بالبراح
يفتحُه لْكل الخلايق.. حتى لو منهم نهايتُه
حبي ليكي
كان طبيعه فْ قلبي مش إحساس جديد
حبي ليكي.. شيء لقيته ببصمتُه جوَّه الوريد
حب علّمتيني اصونُه
وعد صمّمناه بإيدنا..وْقلنا يبقى الصدق لونُه
عمري ما اتصوّرت قلبك يكسر الوعد اللي بينَّا
واللي صُنته فْ يوم يخونُه
كنت خايف -من بداية القصه- من آخر فصولها
هل هتبعدنا الظروف؟
هل هيفضل حبّنا مسجون بخوف؟
هل بعادنا يكون نصيبنا
ولاّ هيفضّل يسيبنا؟
....ولاّ... ولاّ
كل مشهد في النهايه.. ياما جرّبتُه ف خيالي
وْياما خُفتـُه
!إلاّ غدرك... عمري في الفهرس ما شفتـُه
خليتيني انْدَه على قلوب الخلايق
غصب عنّي.. وْمالتقيش
كله بيقول: "انسى نارها
"والسعاده الحلوه عِيشها.. وماتقاسيش

مش مهم القى السعاده
!!..الأهمَ ازاي اعيش
******
يا حبيبتي
!!قصدي يا اللي فهمت يوم إنك حبيبتي
كان زمان... كنت باتمنى اني اشوفك يوم في حِلمي
كنت افكّر فيكِ دايماً قبل نومي
كنت باخلع ويّا صورتك ليل همومي
كنت اشوفك كل يوم الصبح
لكن
جوّه ليل الوحده من غيرك.. بالاقي الكون مفيشْ
كنت باسأل صورتك الحلوهْ تِجيني.. مَابْتَجِيشْ
والنهارده.. بالتقي صورتك ليلاتي
جايّه مادّه الإيد بدمعك
!!عقلي يرفض.. بس يصرخ قلبي: هاتي
جايّه بالعذر المكرَّر
تشرحي.. واشتاق لك اكتر
وامسح الدمعه اللي نازله..وْضحكتي في الحلم تكبر
رغم إنك بعتي قلبي.. وْضاع خلاص مستقبله
!!بس عُذرك كنت دايماً باقبلُه
غصب عنّي..كنت بافرش رمشى تاني جوَّه حلمي
واحلم انّك يوم تعدِّي
واصْحى من نومي والاقي دمعتك
!!كات حارقه خدِّي
وامّا باصحَى.. كنت افكّر
لو هتيجي بجدّ.. إيه هيكون جوابي؟
هل هاثور وانصر كرامتي؟
ولاّ يبقى الردّ صمتي؟
ولاّ إيه؟
والحاجات الحلوه بينَّا.. بس هانساهُم بإيه؟
غنوتينك... اللي حبيتهم عشانك
شارع الشوق اللي ياما مشيته لاجل اوصل مكانك
اسمي ويَّا اسمِك على القلب اللي في النخله البعيدَه
فرحتك دايماً بِخَطـِّي.. وْساعة الإيد الجديده
والنهارده
عقلي مدّ الإيد في قلبي وطلّع النخله وقلَعها
حتى أحلامي اللي ضاعت.. بالخساره لغيري باعها
حتى ساعْة الإيد خلعها
!!وْبرضه باشتاق لك زياده
!ليه عملتي القلب راهب...وانتي مش قدّ العباده؟
خليتيني الصبح افكّر
خليتيني ف نومي افكّر
واوهم القلب اللي حبك إني هانسى
وْللأسف
!!!باشتاق لك اكتر
******
يا حبيبتي
!!قصدي يا اللي فْهمت يوم إنك حبيبتي
فاكره لمَّا كتير سألتي
ليه باقول كل الأسامي إلاّ إسمِك؟
كنت باسكت.. عارفه ليه؟
كنت حاسس إن إسمِك.. فوق ما يتحمِّل لساني
كنت حاسس إن إسمِك لو نطقته لوحدي
اكون إنسان أناني
وانتي عارفه.. إني مش إنسان أناني
كنت حاسس إن إسمِك مش حروف
كنت حاسس إنه درعي لو هتقتلني الظروف
اسمِك انتي بانطقه دلوقتي عادي
واحفظه دلوقتي عادي
زي أسماء اللي قبلك
واللي بعدك
!!واللي عاشقينِّي الساعادي
صدَّقيني
لو هتيجي فْ يوم لقلبي
مستحيل لو يتفتح
!!يبقى إيه شكل القصيده.. لو خيانتِك مُفتتَح؟
:كنتِ دايماً بتقولي لي
لو هتطلب منِّي حاجه.. قول
ماتطلبش السماح
والنهارده
جايّ باترجَّاكِ بسّ فْ كلمتين
يا حبيبتي
إنتي عارفه انِّك خدعتي
وانتي عارفه انِّك جرحتي
كفَّري عن ذنب قلبك
وابعدي عن قلبي حبِّك
..لو سمحتي

******

هناك 32 تعليقًا:

walaaz يقول...

قلب لمّا احتاج يفضفض بعض غدرك

متهيألى تقصد (بعد) مش بعض ؟

هو ينفع يوم ما آجى اكتب تعليق أكتب انى مضايقة من القصيدة دى لأن مستواها فى رأيى أقل من قصايدك اللى قريتها هنا قبل كدا وعجبتنى جدا وحفظت منها ؟
:) معلش بقى انت اللى عودتنا على شعر رائع وبنتأمر عليك

غير معرف يقول...

يـــــــــــــا يا أشرف .. قصيدة على الجرح ....... رائع كالعادة

حميد يقول...

يا حبيبتي
!!قصدي يا اللي فهمت يوم إنك حبيبتي
عامله إيه؟
رغم إن الغدر ساكن حضن قلبك
لازم اطّمّن علِيهْ

*****

حتى ساعْة الإيد خلعها
!!وْبرضه باشتاق لك زياده
!ليه عملتي القلب راهب...وانتي مش قدّ العباده؟
خليتيني الصبح افكّر
خليتيني ف نومي افكّر
واوهم القلب اللي حبك إني هانسى
وْللأسف
!!!باشتاق لك اكتر

*************

فاكره لمَّا كتير سألتي
ليه باقول كل الأسامي إلاّ إسمِك؟
كنت باسكت.. عارفه ليه؟
كنت حاسس إن إسمِك.. فوق ما يتحمِّل لساني
كنت حاسس إن إسمِك لو نطقته لوحدي
اكون إنسان أناني
وانتي عارفه.. إني مش إنسان أناني
كنت حاسس إن إسمِك مش حروف
كنت حاسس إنه درعي لو هتقتلني الظروف

*******************

أستاذي العزيز أشرف :

شوقتني لحضرتك ولسماع قصايدك الرقيقة
عجبتني أوي المقاطع دي خاصة الصورة بتاعت ليه عملتي القلب راهب وانتي مش قد العباده .
ربنا يوفقك ويعزك
ويا رب كده
نحضر فرحك ونشوفك سعيد ومبسوط علطول
لك خالص حبي وتحياتي ...

esraa يقول...

طبعا انت عارف ان الديوان كله عاجبني

ربنا يوفقك بجد يااشرف

وتبقي أحسن شاعر في الدنيا

بس ابقي افتكرني ساعتها

بحاول اكون يقول...

ازيك يا اشرف اخبارك ايه يا قمر
وحشتنا ووحشنا كلامك اللى زي العسل
القصيدة اتر من رائعة يا اشرف بجد تحفة ربنا يوفقك ودايما في تقدم انشالله
هستناك تيجي تنور البلوج الجديد
موني

shirry يقول...

لا تعليق بجد مش لاقية كلام يوصف قصيدة زي دي

hend...hanady يقول...

قصيدة رائعة بل اكثر من رائعة

غير معرف يقول...

الله عليك..
يخرب عقلك يا مجرم..
مع الاعتذار لعم مدحت شلبي (:

دهاء سياسي يقول...

السلام عليكم و رحمة الله و بركاته

سيدي الفاضل .. منذ فترة ليست بالقليلة و انا اتابع مدونتك الرائعة ..

موهبتك متميزة حقا .. جزيت خيرا كثيرا على كل لحظة ادخلت موضوعاتك فيها السرور علي قلبي .. و اسأل الله ان يرزقك خيرا كثيرا و رزقا حلالا طيبا مباركا فيه .. و زوجة صالحة تكون لك نعم متاع الدنيا .. اللهم آمين

بستأذن حضرتك انى أحفظ القصيدة فى جهازي

تقبل تحياتي :)

Rania يقول...

عجبتني القصيدة جدا وخاصة هذه الاجزاء:

كنت باخلع ويّا صورتك ليل همومي

!ليه عملتي القلب راهب...وانتي مش قدّ العباده؟

قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟

فعلا كما قلت في بوست سابق اجمل ما في الحب ذله

تحياتي

Ana keda يقول...

بقالى كتير مش باجى عارفة

بس ببجد كنت هزعل اوى منى لو مجيتش ومكنتش فى اخر الكومنت انا كده فى 11 بس معلش

كل مرة كنت بكتب كومنت مكنتش باخد بالى من كلمتك

من عبقريات اخف دم


بس دلوقتى تنحت اصلا بص بجد مش هقولك حلوة لانك عارف هى ايه وياما قالوالك

هقولك ربنا يخليك لينا وليا اوى

عدلت مزاجى بجد

غير معرف يقول...

برغم إنى بحب أقرا بلوجات لناس كتير من فترة و بتابعها بإهتمام بس عمرى ما اتحمست إنى أعلق على حاجة مهما عجبتنى ،بس المرة دى اللى إنت كاتبه لمس إحساس جوايا و خلى عينيا تدمع مع قرايتى للكلمات مع إن ده نادراً لما أحس بيه من حاجة أقراها .
يمكن من الناحية الفنية ليك حاجات أحلى ، بس قصيدتك المرة دى إحساسها متميز بجد و يوصل لأى حد بيحس .
أحييك بشدة و أتمنى لك مواصلة الإبداع و التميز

غير معرف يقول...

نسيت أمضى بأى نيم
هسمى نفسى قارئة عشان لو كتبت حاجة تانية خليتنى أتحمس و أعلق

mano يقول...

السلام عليكم
ازيك يا اشرف بجد انت اكثر من رائع القصيده تحفه لمست جواياكل اللى فات بكل ما مر بى من احداث فى اغنيه لطارق الشيخ انا سمعتها مره كان بيقول فيها
سلملى على قلبك قله افتكر حبايبك ياما سهروا ليلك يا ريته كان بايدى اعدى البحور يا سيدى علشان اجيلك
اد ايه لما بنحب بنغفر وبنسامح ورغم الجرح اللى دايما بيبقى صعب علينا عمرنا ما بننسى احلى اللحظات اللى جمعتنا بمن نحب
تحياتى
اختك مانو

aya يقول...

ياه يا اشرف
بجد حسيت ان الخيانة فى قصيدتك ليها معنى بينبض بالالم اكتر من اللى انا اعرفه

بجد جميلة الكلمات

تسلم عبقريتك

مدونة يلا نفضحهم يقول...

عاجل الانباء
تم اصدار قرار تجديد الاعتقال للدكتور الزعفراني بعد الافراج عنه مرتين وهو الان في سجن الغربانيات في برج العرب بعدما كان محتجز في الترحيلات

شاركنا في التوقيع علي وثيقه اطلاق سراح الدكتور ابراهيم الزعفراني

ma2tshren يقول...

كنت بافرش رمشى تاني جوَّه حلمى

على فكرة انا مبحبش الشعر العامى بس معرفش ايه الاحساس الانا حستو لما قريت القصيدة دى بجد عبقريه اووى الاحساس عالى اوى والكلما عبرت عنو باابداع بجد جميله اووى وبزات الكلمة الانا حطتها في الاول وبتمنالك التوفيق
تحياتى

beroo يقول...

انا مبسوطه اوي عشان كان ليا الشرف في قرائة العبقرية دي قبل ناس كتير يلا بقي عايزين الجديد دايما طبعا رائي لا يختلف عن اي رائ ليا في كل كلامك وشعرك

محــــمود يقول...

انت روعه يا عمونا ومش عارف اقول اكتر من كده
ال بالحق لو عايز اشترى ليك حاجه الاقيها فين فى معرض الكتاب؟

ســـــــــمــــــــســــمـــايــــة يقول...

قصدي ياللي فهمت يوم انك حبيبتي
واوهم القلب اللي حبك إني هانسى
وْللأسف !!!باشتاق لك اكتر

واللى مش هتلاقى عمرك قلب زيُّه
قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟
كان زمان... كنت باتمنى اني اشوفك يوم في حِلمي
كنت افكّر فيكِ دايماً قبل نومي
كنت باخلع ويّا صورتك ليل همومي
كنت اشوفك كل يوم الصبح لكن
جوّه ليل الوحده من غيرك.. بالاقي الكون مفيشْ
كنت باسأل صورتك الحلوهْ تِجيني.. مَابْتَجِيشْ
والنهارده.. بالتقي صورتك ليلاتي
جايّه مادّه الإيد بدمعك
!!عقلي يرفض.. بس يصرخ قلبي: هاتي
جايّه بالعذر المكرَّر
تشرحي.. واشتاق لك اكتر
وامسح الدمعه اللي نازله..وْضحكتي في الحلم تكبر
رغم إنك بعتي قلبي.. وْضاع خلاص مستقبله
!!بس عُذرك كنت دايماً باقبلُه
----------------------------

هو ده اللي جهعلني اعلق عليها
قصيده مست مشاعري لانها انا
بالرغم من انه يكتبها اليها و لكن
لا يمنع ان تعيش فتاة هذا النوع من الاخلاص الاجباري
لا تستطيع البعد عنه
لا تستطيع نسيانه
باختصار لانك في قرارة نفسك.. ترفض
ترفض ترفض
النســــــــــــيان
احييك علي هذا الجرح الذي فتحته
فلتتركني اداويه بعيدا
و لاعود الي ارض الاحزان من جديد
للاسف بعدما تركتها و قلت اصبحت اطلال
في ارض الجنون الي الابد
لكن قصيدتك فتحت جراحا كنت اذكرها لاضحك لانني ان لم اضحك بكيت و ان بكيت تصدعت
لا لا كفي كفي
كلماتك مزقت اشياءا كنت قد هيء لي انني لملمتها لكن للاسف اكتشفت انني لا استطيع ان الملمها فمهما لملمت الاحزان لا لا تنساها بل كلما لملمتها اصبحت اوضح صارخه في ليل هدوءك


كفي ملاما لا تلومني علي جرحك فلست انا التي جرحت و لكن كذا الايام فعلت

اللي فات ده كلامي انا .. متفتكروش بيت من قصيده نقلته .. لا .. ده كلمتين من حزن دفين عاش جوايا لسنين لكن تقول لمين؟؟؟ سلام بقي انا شكلي اخدت مكان لتعليقين


ياسمين
عاقلة علي ارض الجنون
ملكة ارض الاحزان
ان لم تجمعنا الايام فلربما نلتقي في قصيده

ســـــــــمــــــــســــمـــايــــة يقول...

قصدي ياللي فهمت يوم انك حبيبتي
واوهم القلب اللي حبك إني هانسى
وْللأسف !!!باشتاق لك اكتر

واللى مش هتلاقى عمرك قلب زيُّه
قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟
كان زمان... كنت باتمنى اني اشوفك يوم في حِلمي
كنت افكّر فيكِ دايماً قبل نومي
كنت باخلع ويّا صورتك ليل همومي
كنت اشوفك كل يوم الصبح لكن
جوّه ليل الوحده من غيرك.. بالاقي الكون مفيشْ
كنت باسأل صورتك الحلوهْ تِجيني.. مَابْتَجِيشْ
والنهارده.. بالتقي صورتك ليلاتي
جايّه مادّه الإيد بدمعك
!!عقلي يرفض.. بس يصرخ قلبي: هاتي
جايّه بالعذر المكرَّر
تشرحي.. واشتاق لك اكتر
وامسح الدمعه اللي نازله..وْضحكتي في الحلم تكبر
رغم إنك بعتي قلبي.. وْضاع خلاص مستقبله
!!بس عُذرك كنت دايماً باقبلُه
----------------------------

هو ده اللي جهعلني اعلق عليها
قصيده مست مشاعري لانها انا
بالرغم من انه يكتبها اليها و لكن
لا يمنع ان تعيش فتاة هذا النوع من الاخلاص الاجباري
لا تستطيع البعد عنه
لا تستطيع نسيانه
باختصار لانك في قرارة نفسك.. ترفض
ترفض ترفض
النســــــــــــيان
احييك علي هذا الجرح الذي فتحته
فلتتركني اداويه بعيدا
و لاعود الي ارض الاحزان من جديد
للاسف بعدما تركتها و قلت اصبحت اطلال
في ارض الجنون الي الابد
لكن قصيدتك فتحت جراحا كنت اذكرها لاضحك لانني ان لم اضحك بكيت و ان بكيت تصدعت
لا لا كفي كفي
كلماتك مزقت اشياءا كنت قد هيء لي انني لملمتها لكن للاسف اكتشفت انني لا استطيع ان الملمها فمهما لملمت الاحزان لا لا تنساها بل كلما لملمتها اصبحت اوضح صارخه في ليل هدوءك


كفي ملاما لا تلومني علي جرحك فلست انا التي جرحت و لكن كذا الايام فعلت

اللي فات ده كلامي انا .. متفتكروش بيت من قصيده نقلته .. لا .. ده كلمتين من حزن دفين عاش جوايا لسنين لكن تقول لمين؟؟؟ سلام بقي انا شكلي اخدت مكان لتعليقين


ياسمين
عاقلة علي ارض الجنون
ملكة ارض الاحزان
ان لم تجمعنا الايام فلربما نلتقي في قصيده

أنا حر يقول...

حلوة كفكرة بس كلماتها متناقضة لأنك طول القصيدة بترسم الحب اللي كان موجود وكل شوية بتفكرنا انها كانت فاكرة انها حاببتك مع ان ده حسب كلامك كان واقع فعلا
متزعلش مني بس انا شوفتها كده
تحياتي

rosealia29 يقول...

إحساسك العالي .. و مشاعرك الجارية بين الحروف .. تشغل أجدعها ناقد عن أي قصور فني في اللي قولته ..
ذكي و ذكائك مثار إعجاب الجميع ..
مؤثر .. و اثرك وا ضح في كل إللي علق من قبلي .. عرفت إزاي تثير دموع عيون كتير متحجرة بفعل الأيام و قسوتها على قلوبنا ..

بجد ربنا يكرمك ..

قلب أحب الأمل يقول...

حلوة مووووووووووت بجد اكتر من ان يتقال عليها كومنت خصوصا انك مبين فيها المشاعر صادقة اوي
وخصوصا اني اشتقت لكتباتك موووت بعد الفترة العصيبة اللي عشتها غي الامتحانات فقولت افتح اخف ادم اضحك شوية فلاقيت الصيدة اول حاجة فعجبتني

أخف دم يقول...

السلام عليكم
ربنا يكرمكم جميعا ياجماعة على كلامكم الجميل وآرائكم الرائعة وبادعى ربنا انى اكون دايما عند حسن ظنكم واقدر المس مشاعركم بجد من خلال أبياتى وقصائدى البسيطة
الأخت ولاء أول تعليق.. فعلا تصحيحك صح وانا صححت الكلمة بعد ما لقيتها ف تعليقك علطول وشكرا ليك.. وطبعا رايك فى مستوى القصيدة على العين والرأس.. وخصوصا ان اعتراضك عشان فيه الأحسن عندى فهو مدح اكتر منه اعتراض.. ربنا يكرمك
وإلى دهاء سياسى
طبعا القصيدة والمدونة كلها تحت أمرك فى أى وقت..وربنا يجعلنا دايما سبب لسعادة بعضنا البعض.
وإلى القارئة
منورة دايما وسعيد بكلامك وإحساسك العالى ويارب دايما استمتع بآرائك
وإلى الصديق أنا حر
انا بس التبس عليك الأمر ياابو حميد..أنا اقصد بجملة(قصدى يالى فهمت يوم انك حبيبتى) أقصد بيها نفسى يعنى أنا الى فهمت يوم انك حبيبتى خطأ .. انت فسرتها على اساس انها باقول لها ان هيه اللى فهمت غلط.. لو فسرتها كده هتلاقى المعنى استقام ان شاء الله.. ومنورنى دايما
وبالنسبة لكل اللى عايز الديوان وسال عليه ربنا يكرمه.. وان شاء الله الايام الجاية هاعلن عن مكان بيع الديوان وتوزيعه فى كل القاهرة..
منورين دايما يا أحلى ناس
أشرف

شريف طلال يقول...

قلب لمّا احتاج يفضفض بعد غدرك
"ما ابتداش بـ"ازّاي؟" و"ليه؟
!ابتدا الأول وقال لك: عامله إيه؟

ايه ده؟
أنت مين ؟ و ازاى ؟ و ليه ؟
انت ازاى بتجيب الكلام ده
انت فظييييييع و مش محتاج انى اقولهالك بجد
انا هقول الله اكبر ما شاء الله
و همسك الخشب
اكتر من رائع

Somaia يقول...

كنت خايف -من بداية القصه- من آخر فصولها
هل هتبعدنا الظروف؟
هل هيفضل حبّنا مسجون بخوف؟
هل بعادنا يكون نصيبنا
ولاّ هيفضّل يسيبنا؟
....ولاّ... ولاّ
كل مشهد في النهايه.. ياما جرّبتُه ف خيالي
وْياما خُفتـُه
!إلاّ غدرك... عمري في الفهرس ما شفتـُه

.................

!ليه عملتي القلب راهب...وانتي مش قدّ العباده؟

..............
رغم اني ما كنتش بحب القصايد لما تتطول
بس انت خليتني أغير رأيي تحياااااتي

غير معرف يقول...

استاذي القدير أشرف توفيق
كيف تعبر البنان بما يعجز عنه اللسان انا لم اعلم موهبتك الفذه من اين اتيت بها ،فكم بحثت في اقانيم فلم أجد موهبة معبرة باهرة في الرسم بالكلمات كالتي تتحلى بها.
كلماتك تحتوي الوجدان وتذيب العاطفة
والله يا استاذ اشرف لم تعد لدي الملكة البلاغية ولا اللغوية التي تعبر عن مدى اعجابي بشعرك كلمات تلامس الوجدان بل تحتويه سهولة وسلاسة اللغة انتقاء الألفاظ بعناية فائقه بلاغة التعبير ودقة التصوير
يا أخي انت ايه
كل ما استطيع ان اصفك به انت فعلا شاعر وهكذا دوما اتحدث عنك
اشرف توفيق اقل ما يمكن ان يقال عنه انه شاعر موهوب

فاكره لمَّا كتير سألتي
ليه باقول كل الأسامي إلاّ إسمِك؟
كنت باسكت.. عارفه ليه؟
كنت حاسس إن إسمِك.. فوق ما يتحمِّل لساني
كنت حاسس إن إسمِك لو نطقته لوحدي
اكون إنسان أناني
وانتي عارفه.. إني مش إنسان أناني
كنت حاسس إن إسمِك مش حروف
كنت حاسس إنه درعي لو هتقتلني الظروف
اسمِك انتي بانطقه دلوقتي عادي
واحفظه دلوقتي عادي
زي أسماء اللي قبلك
واللي بعدك
!!واللي عاشقينِّي الساعادي
صدَّقيني
لو هتيجي فْ يوم لقلبي
مستحيل لو يتفتح
!!يبقى إيه شكل القصيده.. لو خيانتِك مُفتتَح؟
:كنتِ دايماً بتقولي لي
لو هتطلب منِّي حاجه.. قول
ماتطلبش السماح
والنهارده
جايّ باترجَّاكِ بسّ فْ كلمتين
يا حبيبتي
إنتي عارفه انِّك خدعتي
وانتي عارفه انِّك جرحتي
كفَّري عن ذنب قلبك
وابعدي عن قلبي حبِّك
..لو سمحتي

اتمنى لك دوام التوفيق
أخيك إكرام مجاور

fagr يقول...

ماشاء الله إحساسك عالى جدا ..وتشبيهاتك واسقاطاتك عالية قوى


أكيد حضرتك شاعر من زمان وأكيد لك أعمال أخرى رائعة

أنا اللى لفت نظرى لشعرك القصيدة اللى سمعتها يوم حفلة توقيع" مدونات مصرية للجيب"

معلش إعذر جهلى أصلى عرفتك متأخر

عازف الناى الحزين يقول...

فاكره لمَّا كتير سألتي
ليه باقول كل الأسامي إلاّ إسمِك؟
كنت باسكت.. عارفه ليه؟
كنت حاسس إن إسمِك.. فوق ما يتحمِّل لساني
كنت حاسس إن إسمِك لو نطقته لوحدي
اكون إنسان أناني
وانتي عارفه.. إني مش إنسان أناني
كنت حاسس إن إسمِك مش حروف
كنت حاسس إنه درعي لو هتقتلني الظروف

راااااااائع
و تهانئى على اشتراكك فى كتاب مدونات مصرية للجيب
لو اكن اسمح لى بكلمة و أرجو ألا تعتبرها اساءة فى حقك
و لكن روح السخرية من نفسك و من كل شىء فى المدوانة يقلل كثيرا للوهلة الأولى من قيمتها التى لا تقدر بثمن بالفعل
أرجو ألا تعتبر ذلك اهانه و اعتبرها ملحوظة من أخ صغير لك
و يشرفنى وجودك فى مدونتى الجديدة المتواضعة
tagallyat.blogspot.com
تقبل مرورى

martin يقول...

بجد يا استاذ اشرف انت رائعه وانا بحب شعرك جدا ومتابع كل حاجه بتنزلها
مش مهم القى السعاده
!!..الأهمَ ازاي اعيش :D

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه