اخبار

الخميس، ٩ أكتوبر ٢٠٠٨

إعلان للفقراء فقط


كل سنة وانتم طيبين ومش محروقين من الماس الكهربى اللعين
أولا: الناس اللى شرفونى وبيسألوا دايما عن أماكن توزيع كتابى "مبسوطة يامصر؟".. الكتاب موجود فى: جميع فروع مكتبات الشروق..مكتبة البلد بجوار الجامعة الأمريكية.. مكتبة عمر بوك ستورز..مكتبة مدبولى..فرشة جرايد التحرير عند المترو.. فرشة جرايد أول طلعت حرب.. وكام يوم هاكتب بقية أماكن التوزيع..وقريبا إن شاء الله حفلة التوقيع فى المنصورة لأحبابنا اللى من المحافظات والطبعة التانية إن شاء الله.
ـــــــــــــــــــــــــــــــــــــــــــــــــــــــــــــ
ثانيا: شكرا لكل الصحف والمدونات والمواقع اللى تابعت الكتاب واتكلمت عنه.. وشكرا للأستاذ إبراهيم عيسى والدستور عشان عملت صفحتين كاملتين تانى وتالت أيام العيد تنشر فيهم فصول من الكتاب..

ـــــــــــــــــــــــــــــــــــــــــــــــــــــــــــــ
ثالثا: البوست
الموضوع كبر يا جدعان.. كل يومين يطلع إعلان مستفز ونقول ماشى.. مش مشكلة.. هوجة الإعلانات اللى بتتحدى الملل جابت لنا شلل رعاش وصبرنا وقلنا ماشى..أهو كله بثوابه عند ربنا باعتبار اننا بنصبر على المكروه.. هوجة إعلانات الزبادى اللى خلت الطفل يسرق ويكذب ويتشقلب ع الحيطة عشان يحلق لابوه وياخد علبة زبادى.. وقلنا ماشى..الحكومة عايزة تعلمنا القواعد الجديدة لكى تعيش فى هذه البلد وهى "ماتقولش إيه ادتنا مصر .. قول هننهب إيه من مصر"..وللا إعلان شيبسى فوكس اللى من يوم ماشفته بقيت باروح أشترى شيبسى أجيب كل نوع ماعدا فوكس ده أسيبه زى الكلب على الرف .. أظن اللى عامل الإعلان ده شركة منافسة لفوكس يعنى..وللا إعلان سيراميكا رويال اللى جايبين سعادة الباشا مهند عشان يضحك للكاميرا ويرطن بالأجنبى ويقول مملكة من الجمال.. طب حد فاهم هوه بيقول إيه؟؟ مش ممكن يكون بيقول سيراميكا رويال.. ليه انتوا مابتستحموش؟؟.. كان الأحسن يعلموه يقول الجملة بالعربى عشان نفهم زى البت الصينية لما بتيجى تبيع حاجات للشقق وتقول " أندى هاجات هلوة"!!
وللا إعلانات السياحة الجديدة اللى محسسينا اننا عالة على السياح أساسا والمزة الأجنبية تقول لك: إننى لا استطيع أن أعيش بحرية فى هذه البلد..طب ما إن شالله ماعشتى انت وأهلك هنا يعنى.. ماتغورى وتريحى نفسك من الناس الزبالة اللى زينا.. هوه احنا بنستفيد منكم حاجة.. كل شوية يقول لك إيراد مصر من السياحة يضرب رقما قياسيا واحنا مش عارفين نشترى ساندويتش فول عشان بقى بجنيه وربع..وبعدين معروف أصلا ان مصر سياحة درجة تالتة.. يعنى السياح النضاف بيروحوا أسبانيا وفرنسا ولبنان كمان.. إنما السياح بتوعنا دول يبقوا عم مايكل بتاع المكواة اللى ف نيويورك..والست إليزابيث اللى بتبيع فى العتبة والشواربى بتوع هولندا..وعم فرناندو بتاع وصلة الدش المركزى اللى ف لندن.. ناس مننا وعلينا يعنى.. يبقى بلاش فزلكة بقى !!
المهم كل الحاجات دى لذيذة وبنعديها إنما الإعلان الأخير ده ياجماعة اللى مش هيعدى بالساهل أبدا.
عيل صغير "بس نضيف قوى بصراحة" ييجى ويقول لك: أنا باحب الصيف عشان بانزل البيسين.. وواحدة تانية: أنا باحب الصيف عشان باتفسح فى ملعب الجولف.. والتالتة: أنا باحب الصيف عشان باروح اشترى من أكبر مول..وكل واحد جايب أسباب حضرته فى إنه "اسم النبى حارسه وصاينه" بيحب الصيف.
ده كله عشان مكان جديد للمعيشة طبعا مش لينا احنا .. ليهم يعنى.. هوه انت عمرك شفت بيسين عشان تنزل فيه ياعم؟؟
طبعا احنا مش بنقر على العالم دى اللى بتنزل البيسين _هوه يعنى إيه بيسين أصلا؟؟.. أكيد حاجة بتتنزل يعنى_ ولا على الأمورة اللى بتتفسح ولا على الست هانم اللى بتروح تشترى وناسية ان ازازة الزيت بحداشر جنيه !!
وهما دول بيفرق معاهم زيت؟؟ دول لو طبخوا بزيت البترول برضه مش هيأثر معاهم !!
أنا بس غرضى اقول ان الإعلانات دى مش لينا فبلاش منها.. يعنى قاعدين نتكلم عن الفتنة الطائفية.. وفيه فتنة أكبر منها على شفا حفرة .. وهيه الفتنة البيسينية.. يعنى اشمعنى الواد ده ينزل البيسين وانا لأ؟؟ مما سيؤدى إلى إن أنا هاروح افجّر البيسين ده اللى انا مش عارف هوه ايه.. وتكبر المسألة.. وتنقسم البلد فريقين .. فريق اللى عنده بيسين وفريق اللى مش بيستحمى أساسا.. وتكبر الفتنة .. ويظهر فى الخارج فريق "بيسينات المهجر" وفريق "اتحاد البيسينات" والموضوع يكبر !!

ولهذا ومنعا لكل ما سيحدث فأنا عملت إعلان موازى لهذا الإعلان .. وزى ما إعلانهم خاص بالأغنيا بس.. أنا إعلانى خاص بالفقرا بس _يعنى أنا وانت حضرتك_ وهيكون على هذا المنوال:
يبدأ الإعلان بصورة من أعلى على شارع فيصل والعربيات واقفة والطريق مقفول والناس مش طايقة بعض..والجو رهيب والناس بتقع من الحر..
ثم تبدأ لقطات الإعلان:
- عيل هدومه مقطعة وقاعد يشحت على باب جامع وبيقول للكاميرا وهو بيبتسم: أنا باكره الصيف عشان السبوبة بتقل
- بنت ناكشة شعرها وواقفة قدام الحمام وقرفانة وبتقول: أنا باكره الصيف عشان المية بتبقى مقطوعة
- موظف فى المترو فى إيده الجرنال ونص كيلو موز وبيضحك وبيقول: أنا باكره الصيف عشان الدنيا زحمة
- سيدة عجوزة واقفة فى موقف الأتوبيسات فى عز الضهر وبتزغرط وبتقول : أنا باكره الصيف عشان مفيش مواصلات .. لولولولولولوى
- بنت ستايل فى الجامعة اصحابها مش راضيين يقربوا منها .. بتقول : انا باكره الصيف عشان العرق !!
وفى الآخر ييجى صوت المذيع : انت كمان انضم لينا عشان تكره الصيف.. انضم لأكتر من سبعين مليون مصرى بيكرهوا الصيف.. وبأقل الأسعار

هناك ٦٠ تعليقًا:

Unknown يقول...

أنا هاروح افجّر البيسين ده


ههههههههه موتني من الضحك في الجمله دي
مش قلتلك يا اشرف من ساعه ما شفتك قلتلك بلاش الحقد الطبقي ده
دول اسيادنا بلاش تجيب سيرتهم
يجعل كلامنا خفيف عليهم

ملحوظه
سالت على كتابك في اسكندريه لما حفيت
مش عارفه اوصله
اتصرف بقى ونزله اسكندريه
ميبقاش ميه قاطعه وكمان مصر مش مبسوطه عندنا

فاروق عادل يقول...

هههههههههههههة بوست جميل جدا

Unknown يقول...

ههههههههههههههههه

أنا كمان مش بحب اعلان شيبسي فوكس خاااااااالص

لكن اعلان سيراميكا رويال
حرام عليك كنت عايزه يتكلم عربي
ماكفايه سيراميكا رويال اللي بيقولها
هو العيب الوحيد في الاعلان كان توقيته
ده ماينفعش اعلان لرمضان أبدا
كل مااشوفه أقول اللهم اني صايمه
(:

البيسين دي ضحكتني بجد ياشرف
بس أنا والله مش بحبه
بحب البحر أكتر, ومش بنزله غير مره او مرتين لما مالاقيش حد يروح معايا البحر
:d

بس الاعلان اللي استفزني بجد بتاع من حقك تعيش في بيت واسع والخضره تكون من حواليك , عارفه؟
لأنهم بينسوا يقولو في أخر الاعلان مين اللي هيدفعلي ثمن حقي ده

طبعا اعلانك هيكون تحفه وغير قابل للمنافسه
(:

صبرني يارب يقول...

بس يا ابنى كل الى انت قلته كوم وبتاع فوكس ده كوم تاني

انا كنت كل ما اشوف الاعلان بالواد اللوح الاقرع ده اقول اسفوكس عليك وعلى شكلك ياعم

وبص انا بقى مش قلت شركه منافسه
انا قلت لوجوزي اكيد اكيد الشركه دي حكومه
والواد اللوح ده بن المدير ولا حاجه
ههههههههههههههههههه

والبت بتاعة البسين دي برضه على فكره انا باحقد عليها
ومعلش يا ابنى هى اصلا ما بقاتش بلدنا

بالمناسبه لو نفسك فى البسين يا حبة عين اختك ابقى تعالى اوديك التمرين مع رحمه ومريم
بس احنا فى بسين الغلابه بتاع الاستاد

تحياتي لك

TAFATEFO يقول...

الأول .. كل عام وسيادتك بخير .. والسنه الجايه زي دلوقتي متبقاش تقلان علينا كده وبوستاتك بالقطاره

ثانياً: تيجي نعمله الإعلان ده؟؟

أنا مستعد والله .. ننزل بكاميرا فيديو ونتفق مع الناس .. ونعمل إعلان حلو

لو موافق .. قوللي وأتصل بيك ونتفق

FreeKiller يقول...

هيييييييييييييييييييييييييييييه
اخيرا المنصوووووووورة
اخيرا اخيرا

*****************

الحمد لله
اقينا واحد كمان ف رابطة كارهي اعلانات التلفزيون
انا بتنقط
انا نزلت بوستين عن اعلانات التلفزيون
و كنت ناوية اعمل التالت بعدين قلت حرام
ارحم البشر بقى
هيبقى انا و التلفزيون عليهم
الرحمه حلوة برضه

*****************

انا بكره الصيف
عشان هو مش الشتا

تسلم

غير معرف يقول...

not bad.

Unknown يقول...

يا اخى والله انت احسن حاجة حصلت ف الكام سنة اللى مش عايزين يعدوا ، انا من المنصورة و عايز اعرف ميعاد زيارتك للكتاب ، الله يروق بالك زى ما بتروق بالنا ببوستاتك دى

Mahmoud Hafez يقول...

عم اشرف
اولا : مبروك على الكتاب - اللي انا لسة مقرتهوش - وعقبال الاعمال الكاملة :))

بالنسبة للبوست بقى
فعلا الاعلانات بقت مستفزة لدرجة كبيرة ، خصوصا لو ركزنا شوية على ان الاعلانات دي بتخاطب مين بالظبط ، هنلاقي نسبة كبيرة من الاعلانات بتخاطكب شريحة تمثل اقل من 10% من شعب مصر
في حين ان بقا الاعلان يتذاع في كل بيت في مصر تقريبا .. التليفزيون بقا في كل عشة .. ووصلة الدش كمان
في حين ان اغلب الاعلانات بتدي رسائل سلبية فظيعة جدا ... بتتأصل في اي حد متلقي للاعلان ده
بالمناسبة .. انا كنت كاتب بوست كامل عن الاعلانات اللي انتشرت في رمضان وعلقت على اغلب الاعلانات .. بس بنظرة اعلاتية بحتة ...
بس اكيد اي اعلان لازم يكون له بعد اجتماعي .. وده اللي ممكن اوضحه في بوست لوحده

سيبك انت ... البوست ده زي العسل

Miss. Sosa يقول...

اولا انا مش مع مهند ولا مجند ده ولا ليه في الناس الملزقة ديه
بس ملاحظة انك قارش ملحتة واي حاجة بيعملها بتقف في زورك بالعرض :D
بيض قلبك كدا علشان ربنا يحبك وبلاش الحقد الدفين ده :p
وبعدين يا سيدي انا بحب الصيف علشان ما بنزلش الشغل والشتا كله بهدلة وطين ومرمطة في المواصلات


بس بوست دمه وخفيف ورائع كعادتك

تحيــاتى

مهندس مصري بيحب مصر يقول...

هههههههههههههههههههههههههههههه
بوست ممتاز

amr يقول...

ههههههههه

طرح رائع أستاذ أشرف

دايما مستنى الجديد ومتأكد انه أحلى من اللى فات

فى انتظارك جديدك دائما

خالص تحياتى

yas يقول...

انت نسيت اهم حاجة البت المفعوصة اللى بتقول انا بحب الصيف علشان بلاقي حد ارقص معاه ويقوله اكبر نافورة فى الشرق الاوسط
انا لحد دلوقتى مخى الصغير مش مستوعب الموضوع ده ازاى نافورة وازاى بترقص اتنين فى واحد
وعلى البيسين ادينا بنشوفه اه معندناش واحد فى الصالون بس عارفينه انما النافورة اللى بترقص دى عايزة اشوفها قبل مااموت
انا بردو قلت نفس تعليقك اما شفت اعلانات فوكس تخليك عمرك ماتشتريه

مصري بالغربة يقول...

والله انت ميه ميه يا عم اشرف

انا كمان بانضم معاك للاعلان دون
ههههههههههههههههههههههههه

انا كمان باكره الصيف عشان حاااااااااااااجاااااات كتيرة

Ahmed Othman يقول...

و أنا بأكره الصيف
عشان لما بأخرج من بيتنا
ما بعرفش ارجع تاني

اصلي من ضحايا فيصل

سارة درويش يقول...

هههههههههههههههههه ضيف المشهد دا للاعلان صورة بنت حاطة ايدها على خدها وزهقانة - دى اللى هي انا - وبتقول انا بكره الصيف علشان بتخنق من كتر ما انا قاعدة في البيت

بوست جاااااااااااااااااامد بجد

خمسة فضفضة يقول...

السلام عليكم ورحمة الله وبركاته

هههههههههه

بلاش الحئد الطبقي ده ،كمان هاتبصوا للناس المحترمين في نزلت البيسين اللي مالسنه للسنه
:)))))))
ياناس حرام عليكو اتقوا الله

ههههههههههه

لا للنميمة يقول...

ههههههههههههههههه
هم يضحك و هم يبكى و الله
مدونة أكثر من رائعة بجد
..............
شاركونا حملتنا
حملتنا كلنا لحماية أختى و أختك و أمى و أمك و بنتى و بنتك من السنة الجهلاء
ساعدونا نحمى أعراض نسائنا
شاركونا حلمنا فى الوصول لمجتمع لا يشيع الفاحشة بين الناس بالباطل

jehan يقول...

تصدق انى اول ما شفت اعلان فوكس قلت اكيد الشيبسى دة محدش هيشترية علشان اعلانة بايخ مووووووووت

اما بقى مهند مش عارفة لية حاسة كأنة واكل حتة لحمتك
اى نعم هو حلو واى نعم شكلة رائع بس هو فعلا فى اعلان السيراميك حسيت ان الاعلان عن مهند مش نوع السيراميك

بس بقى اعلانات السياحة حرام عليك بجد فعلا السياح متبهدلين فى بلدنا رخامة وقلة ادب من البيعين وشئ مقرف انا عن نفسى مبسوطة جداااااااااااا من اعلانات السياحة

واعلان البيسين عمرى ما شفتة الحمد لله
بس نصيحة لوجة الله شيل النفسنة دى من جواك علشان ربنا يسترها معاك ههههههههه

غير معرف يقول...

وعم فرناندو بتاع وصلة الدش المركزى اللى ف لندن
جامده اوي الجمله دي

No Fear يقول...

السلام عليكم
جامد كالعادة
بالتوفيق يا توفيق دايما

موناليزا يقول...

انت بتتأخر فى تنزيل مواضيعك ليه؟؟
كنت عايزاك تمسك اعلان اعلان وتعلق عليه بجد الفكرة عجبتنى
وفى انتظار اماكن توزيع الكتاب فى المنصورة
ويارب دايما فى نجاح دائم

nona يقول...

ههههههههههههههههههههههه
حلوة قوى هتفجر البسين
ساعات بقول لاما الناس دية مش من نفس البلد الاى احنا عايشين فيها لاما البلد دية مش بلدنا و لا نعرفها
طب بذمتكم هنجيب حق البسين منين والا نجيب فلوس عشان نتفسح فى اكبر مول منين
اعلانات تفقع المرارة و تجيب الضغط و السكر و كل امراض العصر هى ناقصهم كمان
انا معك فى اننا نعمل اعلان للفقراء فقط

غير معرف يقول...

الأبنودى العظيم فى رائعته " الأحزان العادية " بيقول :


"إحنا شعبين شعبين شعبين

شوف الاول فين والتاني فين

وأدي الخط مابين الاتنين

بيفوت "

لا أسكت الله لك صوتا يا عم أشرف

فعلا تلك فتنة أخطر من الفتنة الطائفية بكثير والانفجار الاجتماعى على الأبواب

أنا فعلا أتحرق شوقا لقراءة كتابك

شكرا لك

محمد فاروق الشاذلى يقول...

أعتقد إنت مش محتاج إعلان لكارهى الصيف علشان الأسباب اللى انت قولتها دى عند أغلب المصريين أساسا وبالتالى فهم أعضاء فى نادى كارهى الصيف من غير إعلانات

غير معرف يقول...

خدت بالك فى رمضان كانوا يعرضوا اعلان بنك الطعام و اتبرع و 3 مليون جعان و بعد منه يقولك بورتو سخنه و بورتو مارينا .. بس على فكره نص الشعب غلبان و النص التانى بيستهبل ده اذا لم يكن الاغلبية بتستهبل ..

خالد كامل يقول...

و الله العظيم واحشنى ... بس لو بصيت بصة على مدونتى هتعرف ايه سبب غيابى

و أنا أضم صوتى لصوت الاخت لماضة ( ازيك يا لماضة ؟ ) و أقول ان البحيرة كمان مش مبسوطة و عاوزين نخة من الكتاب .. حرام عليكوا بقى هنعمل مظاهرات

انت ممكن تعمل رقم اللى عاوز نسخة من الكتاب يتصل بيه .. علشان كدة مينفعش
و يبقى أسرع ديليفارى فى مصر


عامة و الله واحشنى و بأذن الله أشوفك قريب

تحياتى

zahra يقول...

انا كمان يا اشرف عاوزة الكتاب فى اسكندريه عشان مصر تبقى مبسوطه
بس ليه الحقد الطبقى اللى انت بتروج له يعنى
ايه يعنى هم عندهم بيسين و احنا عندنا الميه مقطوعه ايه المشكلة يعنى
خليها على الله
اهو الشتا جاى و المطرة هتنزل على الكل غنى و فقير D:

عاشــــــ النقاب ـقــــة"نونو" يقول...

ههههههههههههههههههههههه
مش ممكن
والله شر البلية مايضحك
شفت اعلان داماك؟؟؟
وبعدين بلاش الحقد الطبقي دة ههههههههه
كل عام وانتم الى الرحمن اقرب

غلبان ... وليا لسان .... DeXTeR! يقول...

هههههه

الراجل دا بيقول كلام زي الفل

ايه بأه البيسين دا ..؟؟

مطعم ؟؟



ومستني حفله المنصوره ..

غير معرف يقول...

انت نسيت أهم الإعلانات المصرية
احسبها صح تعيشها صح
شوف بقى لما تقارنها بإعلانات محترمة زى سلسلة الإعلانات اللى عنوانها البركة بالشباب وهذا دينى هذه حياتى
بيعرضوا نموذج محترم وانك تقدر تبقى كويس بحاجات قليلة وعادية جدا
مش اعلان قوم من على القهوة والحق القطر
طب بذمتك لو واحد من اللى غرقوا فى مراكب ايطاليا شاف اعلان قوم من على القهوة ده, هيعمل ايه ؟

Ma7moud

غير معرف يقول...

ههههههههههههههههه

تقريبا كل اللى حواليا قالوا عليا مجنونه و انا ببص للكومبيوتر و بضحك

هههههههههههههههههههههههه

Anollipian يقول...

looool
ما شاء الله طريقتك تحفة بجد .
بكره الصيف عشان الاعلانات اللي ملهاش اي لزمة اللي بيجيبوها عن الصيف !!

Unknown يقول...

اشرف بيه توفيق انت فظيع...شفت اعلان مهند يا خراااااااااابى البنات اتهبلوا عليه مع انه اصلا اعلان فاضح وزى ما يكون اعلان عن موديلات مهند اللى نازلة السوق ومتخلينيش افسر بقى....اعلانات بورتو مارينا وبورتو السخنة وبورتو الساقعة الله يكرمهم

Unknown يقول...

ايه ده يا أستاذ أشرف ؟ !!
معندكش بيسين فى شقتك ؟ امال بتنزل فين؟
بصراحة المفروض يعملوا عندنا نوعين تليفزيون واحد بيجيب صوت وصورة والتانى صوت بس علشان الناس اللى عندهم ضغط وسكر
وكمان أنا ملاحظ ان المسلسلات المصرية بقوا يركبوا فيها عربيات زى الخليج ويسكنوا فيلات وقصور مش ناقصهم غير الكبسة والسمبوسة ... حياكم
على فكرة كتابكم المبجل وصل بالسلامة عبر البحار وقريته وبجد حسيت انى رجعت لحظات لمصر .. شكراً وعقبال الكتاب رقم 1000 ان شاء الله ... تحياتى

غير معرف يقول...

اولا طبعا وكالعاده موتني من الضحك
ثانيا بقى بجد احنا تعبانين في البلد دي انا كنت فاكره ان احنا اقليهبس ماشاء الله طلعنا كتير اهوه ههههه
حاجه غريبه والله انا بشوف الاعلانات دي بتنقط وبجد ببقى عايزه اولع فيهم مش عشان اغنى ولا حاجه والله عشان بيقولوا حاجات تفرس ومش موجوده اصلا يعني الناس مش عايشاها من اساسه ولا الاعلان بتاع نفسك تعيش فوق السحاب والميه تحوط بيتك ده بتاع المرشدي جروب انت اكيد نسيته كلها اعلانات غريبه معرفش بيجبوها لمين مع اننا احنا اللي بنتفرج على التلفزيون مش حد تاني ياللا الحمد لله على كل حال والحمد لله على البلد اللي بتتسرق كل يوم واحنا مش طايلنا حاجه ويطلع احمد عز في مجلس الشعب يقولك احنا وصلنا ان المواطن المصري الحمد لله اتحسن مرتبه ل420 جنيه في الشهر طبعا هما هيعملوله زي ماملايين بتاعت الباشا عز بتعمله
في الاخر حسبي الله ونعم الوكيل وهو مفيش مكتبه بيتباع فيها الكتاب في الهرم وفيصل وانا مش عارفه انت فاكرني ولا لا انا كنت مدخلتش عالمدونه بقالي كتير بس لسه بموت من الضحك لما بدخلها ربنا معاك

مجداوية يقول...

السلام عليكم

أنا بقالى كتير جدا مدخلتش هنا للآسف وفاتنى كتير لكن قرأت معظم ما كتبت
وألف مبروك كتابك الجديد وده يعتبر زى التطور الطبيعى للحاجة الساقعة كده لأنك فعلا موهوب وكمان متأخر أوى حكاية الكتاب وان كانت موضوعاتك بتتناقل من زمان عن طريق الايميل ووصلنى أكتر من تدوينة يعنى لايق عليك الشهرة وأنت أهل لها وأكيد حنلاقى الكتاب هنا فى الأسكندرية ونشتريه وأكيد حيكون متميز كتدويناتك لكن لى تحفظ بسيط يا ريت تقبله من أختك الكبيرة انك لا تلجأ للسباب لأنك مش محتاج له فاسلوبك بدونه أكيد حيكون أرقى وحيكون له نفس الوقع المحبب ,,بالتوفيق دايما يا أشرف توفيق

miro يقول...

فظيع بجد تحفه اوى
سيراميكا رويال ليه انتوا مبتستحموش
اندى هاجات هلوه
انا بكره الصيف عشان مفيش مواصلات..لولولولوى
top3

اهالينا زهقوا يربونا يقول...

الحاج اشرف:

احنا بنحبك اووووى وعشان كده جينا نعطيك خبر بأننا وصلنا

سمعنا سلام بقه

NilE_QueeN يقول...

اللى معندوش بيسين ينزل البانيو

انا بكره الصيف عشان بيطلع ف وشي حبوب

غير معرف يقول...

ايه دا الجمال دا يا ابو العيال طبعا انا متاسفه انى اتاخرت عليك و على التعليق عندك بس اصلى كنت بصيف فى (( البسيين )) دى على فكرا شكلها كدا منطقه فى الساحل الشمالى الا هو فين اصلا الساحل الشمالى يا ابو العيال و الله عندك حق شويه اعلانات تجيب الضغط و كلو كووم و سى الاستاذ فوكس دا بقه كووم تانى خالص ولا اقولك دع الخلق للخالق و دايما فى تقدم يا ابو العيال
اختك و حبيبتك ... ام العيال

غير معرف يقول...

نسيت اقولك الف مبرووك على الكتاب يا جميل و دا المتوقع برضو يا اشرف معلش بجد فرحتى برجوعى لصفحتك خالتنى نسيت اهنيك .. الف مبروك و من تقدم لتقدم باذن الله و حاروح اجيب الكتاب طبعا و امشى اتفشخر فى الشارع عندنا انى اعرف الاستاذ العظيم صاحب الكتاب ... الف مبروك

ام العيال

غير معرف يقول...

بالنسبة للجزء الأولاني إللي قبل الدخول في الموضوع نفسه :)

عن الكتاب..


بالتوفيق لحضرتك بإذن الله..وتفرح وتشرف أهلك وبلدك بإذن الله :)

لأني سعيدة بحضرتك إن حضرتك من بلدي الدقهلية..وأتمنالك التوفيق بإذن الله :)


بالتوفيق ليك في كتاباتك وحياتك بإذن الله

وإن شاء الله تشرف أهلك وبلدك إن شاء الله :)



أختك..إيمان :)

أحلى حياة يقول...

ههههههههههههههههههههههههههه
بوست جااااااامد بجد
D:D:

soulmate يقول...

والله يا ابنى ليك حق تتاريا على اعلانات اليومين دول انا اول مره ادخل المدونه بس بجد البوست جميل جدا ودمك فيه خفيف مووووت تقبل مرورى

غير معرف يقول...

أشرف باشا
السلام عليكم ورحمة الله

أولا مبروك على الكتاب ولو إنها متأخرة
الطبعة التانية هاتنزل خلاص أهي

و بصراحة أنا إتعقدت من الكتاب الجميل بتاعك ده

كل ما أشتري نسخة واحد صاحبي يطمع فيها فأديهاله

3 نسخ بالمنظر ده

أنا زهقت
أشتري الكتاب و أكمره يعني ؟
(أكمره = أخبيه و أدفسه)

بس إن شاء الله هانجح في قرائته

و بالمناسبة كان نفسي يكون أكبر من كدة بكتير, أسلوبك جميل و ممتع بس كدة الكتاب هايخلص بسرعة :(

نيجي بقى لموضوع الإعلانات

أنا أقولك البيصين ده إيه يا سيدي

البيصين ده عامل زي قرية كدة بيركبوا فيها خيل و بياكلوا فطير من اللي قلبك يحبه , و العيال بتلعب في الطين و كدة

عرفت بقى يا جميل ؟
:)

الإعلانات تقريبا بقيت بتخاطب طبقة واحدة بس في مصر, الطبقة اللي بتستمتع بالفلوس اللي في أوقات كتيرة بس مش غالبا بتبقى مسروقة منن اللي زيي و زيك
مش حقد ولا نفسنة بس أنا عايز أنا كمان أشوف إعلان ليا, على قد مستوايا المتواضع , علشان الناس ما تحبطش و ما تتغلش

تحياتي يا باشا و كل سنة و حضرتك بألف مليون سلامة

admelmasry يقول...

اشرف باشا توفييييييييييق البوست تحفة وتسلم ايدك

dandana يقول...

بقولك إيه يا أشرف
سيبك من الإعلانات والشلل دا وقولى
حفل التوقيع ف المنصورة إمتى
كل أصحابى بيسألوا عليه
وأنا بقى بما إنى البت المثقفة إللى بتروح مكتبات وبتشترى كتب ويسألونى وأقولهم لسا شوية
شكلى بقى وحش بجد

دا أحنا هانقف ف الطابور وهانتهاتف عشان نتصور معاك

الموضوع هايبقى كأنه بجد والله
‏:)
تعالى وإنت تشوف

Unknown يقول...

هههههههههههههههههههههههههههههههههههههههههه
جميله جدا موتني من الضحك بجد بوست جامد :)

كراكيب يقول...

خلي بالك بقى علشان انا هرغي
يعني شمـّـر كدة واستعد
واستعنى ع الشقا بالله

اصل انا عايزة اعلق على كتابك
بص بقى انت فظيع لأ انت افظع افظع الفظيعين
بجد يعني بجد من غير هزار وتهريج وكلام فاضي
انا خلصته كله في قاعدة واحدة كدة
وطبعا ضحكي كان جايب للشارع اللي ورانا والناس اللي كانوا في البيت صحيوا وخدتلي كلمتين من ماما وبابا حجزلي عند دكتورة الامراض النفسيه ماهو شايف بنته قاعدة لوحدها وبتضحك بقى بشكل يخلي اي حد يشوفها يحلف انها مجنونة

بس اسيبه؟؟ اسيب بابا كدة يقول عليا الحاجات واسكتله؟
لالالاااا مش انا تاني يوم علطول مسكته الكتاب وفضل يقرا ويضضضضضضحك هاهاها هوهوهوهو هيهيهي كدة بقى والله وبقى معجب بيك اوي اوي اه والله

وحلفت كدة اني هدخل بقى اقولك حاجات كويسة واكتبلك قد كدة اشكر فيك بقى
بس الكمبيوتر كان بعافية شوية

واللا لما فتحت الجرنان بقى ولقيتك موجود في صفحة محمد هشام وبتكتب بقى يختيييييييي عليا وع الفرحة اللي كانت مش سايعاني
اه والنبي يا خويا ما بكدب

حححححححح عارفة انك بتشتم في سرك من رغيي بس وربنا اخر مرة هدخل ارغي كدة

طب تحب اعلق على البوست ده دلوقتي واللا بعد يومين كدة علشان لو كل ده في رد واحد تقريبا عم الحاج بلوجر نفسه هيطردني ويمسح البلوج بتاعتي من عنده وممكن يدفعني غرامة رغي كمان

فإيه بقى ممكن نقول فاصل ونعود نعلق على بوستك الجديد

miro el niro kwaniro

غروب يقول...

هههههه مش ممكن

بس انت جيت على نقطه حساسه انا كمان نفسي انزل البيسين ده

ليه لا يعنى
وعلى فكره انا كمان بكره الصيف عشان المكياج بيسيح

ههههههههه

سلاموز بالموز

Mahmoud farag يقول...

بوست جاااااااااامد جدا يا مان ...

فعلا اخف دم :)

GP يقول...

ههههههههههههههه
بجد تستاهل اخف دم

غير معرف يقول...

وانا كمان بكره الصيف عشان عربية السيدات حسبي الله ونعم الوكيل في المترو والبياعين الجائلين

اسألوني انا

مها ميهوووو

أخف دم يقول...

السلام عليكم
صباح الفل أو مساء الفل عليكم
نبدأ فى الكلام علطول عشان انا عارف انتوا مش بتحبوا موضوع والله منورينى والكلام ده.. خلينا كده زى السكينة فى الحلاوة
بالنسبة للكتاب الحمد لله الطبعة الأأولى نفدت والتانية نزلت السوق.. وهيه موجودة فى منافذ الشورق وكل مكتبات وسط البلد ونزلت المنصورة كمان فى يوك اند بينز وقريبا جدا حفلة التوقيع ان شاء الله هناك.
يبدو ان اعلان فوكس محقق أعلى نسبة كراهية فى الوسط الإعلانى المصرى.. يللا هيه جت على دى؟؟أشوف فى أحمد التهامى ده يوم هوه والبيسين فى يوم واحد.
بالنسبة لمهند طبعا انا مش قارش ملحته ولا حاجة لأن يعنى هوه عنده ايه مش عندى؟؟ شعره حلو؟؟ وايه يعنى.. عنيه خضرا؟؟ وايه يعنى؟؟ يجى هوه ايه فى حلاوة اللمبى وللا طعامة اللمبى. وبعدين أهم حاجة الرووووووووح.. أظن الستات المصرية كلهم عايشين مع ارواح اساسا !!
ياسمين فعلا فيه نافورة بالصوت وانا شفتها قبل كده .. وهيه بتشتغل من خلال ذبذبات الصوت اللى بتأثر على اندفاع المية من مواسير بأحجام مختلفة .. فتعلى المية لما الصوت يعلى وهكذا.. وفعلا هيه جميلة جدا.
مهيج الجماهير يارب تكون بخير وترجع قريبا ويارب نتقابل قريبا برضه حتى لو صدفة .. عشان نستمتع بخفة دمك وذوقك.
مجداوية منورانى دايما وشكرا على كلامك ومدحك الجميل وشكرا اكتر كتير على تعقيبك على عدم السباب.. وانا والله أصلا فى حياتى مش باحب السباب أبدا ولا باستخدمه.. وحتى فى كتاباتى سواء فى المدونة او الجرايد.. بس هاحاول بقدر الغمكان ألاحظ أكتر .. ولو كان فيه فى البوست حاجة شاذة ربنا يسهل ومتتكررش تانى لأنها مش من طبعى..
شكرا على النصيحة الجميلة ومنورانى تانى.
دندنة.. والله كلامك بيفرحنى جدا يا دندنة.. وان شاء الله قريب جدا حفلة التوقيع وانا اللى هاشترف بيك انتى واصحابك كلهم.. بس للاسف الكتاب كان نفد من السوق واستنينا لحد الطبعة التانية ما تنزل والحمد لله نزلت.. انتظرونا قريبا.. وانا كمان هانتظركم.
ميرو كراكيب.. ايه النور ده وايه الكلام الحلو ده.. سلامى ليك ولبابا طبعا ويارب اكون قدرت اعمل لحظة حلوة ليك ولباباك يارب.. سعيد بوجودك وكلامك ورغيك الجميل.. كان ناقص تبعتيلى ردك ملف وورد !!
فى النهاية ربنا يكرمكم على كلامك الجميل.. ويارب اقدر ارسم بسمة وضحكة على وشوشكم يارب دايما..
دمتم بخير.
اشرف

عمرو فكرى يقول...

lol

Mostafa يقول...

بوست روعه بجد مااقدرتش امسك نفسى من الضحك

koukawy يقول...

هههههههه
و الله ليك حق فعلا هما مستفزين
و المستفزين اوي كمان
بتوع اعلانات .....
نوفر صح .... نعيش صح

حماده وفر في البنزين و ركب مع صحابه العربيه و كانوا متسليين

نوال وفرت و اشترت شريط دوا واحد علي قدها و اشترت كتا بليها و كتاب لوائل ابنها

***************
بلاش فاقعه

و لا اعلانات 0900
يا ساتر ده لسه في بوستايه في الطريق عندي عن 0900

انا لسه كاتبه بوستايه عن اعلانات المقويات الجنسيه

حاجه افقع
اقولك ايه بس

zainab يقول...

هههههههههههههههه

كله كوم وشيبسى فوكس ده كوم تانى بكرهه

وحلوة حتة البيسين دى

تحياتى

pubg mobile يقول...

فحص فلل طرق ترميم و صيانة منازل بالرياض تنسيق حدائق بالرياض شركة تنسيق حدائق بالرياض خدمات منزلية بالدمام شركة فحص بالرياض