اخبار

الأحد، 14 سبتمبر، 2008

رجعت لك يا مهند


كل سنة وحضراتكم جميعا بخير
عدنا أخيرا ..بعد العودة من الفراخ والطبيخ والصوانى ولسان العصفور اللذيذ اللى كانوا فى بيتنا فى المنصورة إلى الوجبات الجاهزة والأكل المكرر بتاع المطاعم اللى ربنا ابتلانى بيهم فى القاهرة.
أنا بصراحة باحاول اهرب من موضوع أكل المطاعم ده وبدأت لأول مرة اقبل بقى عزومات على الفطار.. بس طبعا بطريقة شيك عشان البرستيج.. يعنى مثلا واحد يقول لى: ماتيجى تفطر معايا بكرة ياعم.. أرد عليه بألاطة: لا ياراجل .. مش معنى انى عايش لوحدى ومش عارف هاكل إيه بكرة انك تكلف نفسك .. الموضوع بسيط..طبعا الزبون يتكسف فيرد ويقول: ياعم تعالى دا انت تنورنا.. أرد عليه : ياعم عادى ..هوه أنا أول واحد يبقى مش لاقى ياكل فى مصر..أكيد ربنا هيفرجها..وطبعا بعد مباحثات ومحايلات من ناحيته. .بآجى على نفسى واقبل العزومة بس المهم انى اروح بكرامتى وبرستيجى!!
المهم قبل ما نتكلم رمضان كريم علينا جميعا وإن شاء الله بعد كده هتبقى فيه موضوعات جديدة دايما فى المدونة بعد فترة الغياب والكتاب ومش هنغيب عن بعض تانى..وربنا يرحم أهالى الدويقة وكل متضررى الحكومة فى كل زمان وكل كارثة.
ـــــــــــــــــــــــــــــــــــــــــــــــــــ
بفضل الله الكتاب (مبسوطة يامصر؟) دلوقتى فى كل مكتبات وسط البلد زى مكتبة البلد وغيرها وفى كل منافذ دار الشروق..وقريبا إن شاء الله صدور الطبعة الثانية بفضل الله.. وإن شاء لله مراكز التوزيع فى المحافظات قريبا برضه.. وشكر واجب لدار مزيد (محمد كمال حسن ومصطفى الحسينى) على الجهد والمتابعة.
ـــــــــــــــــــــــــــــــــــــــــــــــ
فيه موضوع بقى عايز اتكلم فيه يعنى عشان بس أفش الغل اللى كابس على مراوحى.
دلوقتى فيه مسلسل تركى اسمه نور..أنا عارف ان الموضوع قديم بس أنا مرضيتش اتكلم عليه أول ما طلع عشان متبقاش هوجة.. أنا أولا مكنتش اعرف المسلسل ده ولا اعرف حاجة عنه.. كل اللى اعرفه ان وانا ماشى فى الشارع كانت البنات بتقعد تشاور عليا وتقول : مهند أهوه .. مهند أهوه..وهاتك بقى يا صويط على زغاريط .. وطبعا مش عايز اقول لكم لما بادخل المترو إيه اللى بيحصل..تقف البنات تهتف : مهند دخل المترو .. محروس مسك المقص !!
وانا باتفرج مرة صدفة على الدش شفت لقطة من المسلسل..هتسألونى عرفت منين ان هوه ده المسلسل؟؟ سؤال نبيه.. من البطل طبعا .. شفت واحد شبهى بالظبط.. فولة واتقسمت نصين..اللى شافونى قبل كده أكيد ملاحظين الشبه !!
شفت بقى الواد ده قاعد على منصة هوه ومزتين .. وهاتك ياكلام من المدبلج الرخم ده اللى مفيهوش جملة مفيدة أساسا من نوعية:
- إذن لماذا سوف يكون إذا لم يستطع هذا ولم يكن ومازالوا هناك؟
يرد عليها بغضب
- ربما كانت ستظل لعل بينما مازال مابرح ماانفك
وتهمس لهما الأخت الثالثة بهدوء:
- ينبغى أن يكون ذلك أو لا ينبغى فتلك من هذه أو هذان سيان !!
إيه الدبلجة الرخمة دى؟؟ مفيش أحسن من الكلام الشعبى بتاع المسلسلات بتاعتنا.. قصص زى الفل وكلام زى الورد.. البت حبت الواد واتجوزها عرفى من ورا أهلها ولما حصلت الفحشاء أبوها عرف راح لطشها قلمين والواد اعترف بغلطته واتجوزها رسمى.. بس خلاص.. خلص المسلسل..من غير لا دبلجة ولا شقلبة.
وبعدين أنا ممكن اقتنع ان واحدة تعجب بمسلسل وتتابعه.. إنما الواحدة دى تتطلق أو تشتم جوزها عشان هوه مش زى اسم النبى حارسه وصاينه مهند؟؟ ليه ان شاء الله؟؟ مهند ده إشعال ذاتى يعنى وجوزها بعين واحدة؟؟ إيه الشلل ده؟؟
وبعدين بيقول لك واحدة اتطلقت من جوزها عشان طلبت منه يجيب لها ورد كل يوم الصبح زى مهند..أيوة يعنى الراجل يروح يقف فى طابور العيش وللا ف طابور الورد؟؟ الست دى هتفطر فول وللا هتفطر ياسمين؟؟ هتتنيل على عين أهلها وتعمل لعيالها ساندويتشات للمدرسة وللا هتلف الساندويتشات فى لفتين تيوليب عطر فرنسى الإيحاء؟؟
محدش يقول ان ردود الأفعال دى مش بتاعة الناس الغلابة وانها من ناس أغنيا.. أنا باقول بقى إن ولا الأغنيا المفروض يعملوا كده.. يعنى مثلا نفترض ان نجيب ساويرس مراته زعلت منه عشان مجبش ليها ورد كل يوم الصبح.. أقطع دراعى إن ما قطع عنها خط المحمول..ده ممكن يلغى من السوق كروت الشحن ام عشرة جنيه باعتبار انها بتشحن كروت بعشرة يعنى !! هيه الناس دى فاضية؟؟
وللا مثلا طويل العمر يطول عمره ويزهزه عصره ويكتر حديده ويحفظه على مين بينافسه الامبراطور أحمد عز .. هل ممكن الست شاهيناز ربنا يكرمها تطلب منه بوكيه ورد كل يوم الصبح؟؟ مش ممكن طبعا..عشان هوه مش فاضى وبعدين هوه محتاج الورد عشان يوزعه على مقابرنا بعد ما الشعب كله يموت واحد واحد إن شا ءالله على إيده وإيد اصحابه.
طب مادام لا الأغنيا ولا الفقرا بيعملوا كده .. أمال مين بقى الستات الهبلة دى؟؟
والحاجة اللى تخنق بقى لما يجيب لك شوية لقطات من قصور وبيوت نضيفة وتبقى كل المشكلة ان البطل جرح إحساس ضافر الصباع الخنصر بتاع رجل البطلة اليمين.. طيب ما تجيبوا لنا العيشة الفخفخينا دى واحنا هنعمل أحلى شغل..يعنى هوه الراجل المصرى واخدها كيف إنه يطلع روح مراته مثلا؟؟ مزاجه بيتعدل لما يلطشها قلمين؟؟ لأ طبعا.. ماهو من خنقته طول النهار..ووقفته فى طابور العيش الصبح وطابور الجمعية الضهر وطابور المواصلات العصر عشان تشريفة سيادة الباشا بتقفل ميدان التحرير وكوبرى أكتوبر وطابور القهوة بالليل عشان القهوة بقت بالحجز دلوقتى.. وعايزينه بعد كده يجيب لها بوكيه ورد كل يوم؟؟
أنا موافق ان برضه الرحمة والود والمحبة لازم تكون موجودة بس مش لدرجة الكلام الفاضى ده..هاتولنا حاجة نعرف نطبقها يعنى.. عاملين زى إعلان (وقفة موزمبيقية) اللى مغرق مصر.. يجيبوا بيت معفن وعيال كتير شحاتين مش لاقيين ياكلوا ويقولوا: نفكر كلنا نشبع كلنا.. ويجيبوا صورة لقصر كبير وترابيزة مليانة أكل فراخ ولحمة وبرضه نفكر كلنا نشبع كلنا.. يعنى هيه المشكلة فى العيلين الزيادة يعنى..يعنى هوه الراجل الملياردير صاحب القصر هتفرق معاه لو مراته طلعت أرنبة وجابت له خمسة وستين عيل؟؟ والراجل الشحات اللى مش لاقى ياكل هتفرق معاه لو مراته ماتت أساسا؟؟ هيفضل ده ملياردير وده شحات..يعنى بطلوا تشتغلونا بقى..وبعدين المدارس اللى بيجيبوها فى الإعلانات دى مش بتاعتنا يعنى.. إعلان البت الصغيرة اللى بتيجى بترسم والأستاذة بتبتسم فى وشها وتشجعها.. مكنش مقرر علينا حضرتك..إحنا عمرنا مارسمنا أصلا غير أول كل سنة يقولولنا ارسموا حرب أكتوبر .. نفضل نرسم مسدسات وواحد شايل العلم..فضلت بحمد الله خمس سنين ارسم نفس الراجل وهو شايل العلم على الجبهة لما طلعت روحه وكان هيقلب يهودى .. وكمان كنت بارسم الجيشين اللى بيحاربوا بعض عليهم علم مصر.. يعنى مثلا عبد الناصر بيحارب السادات.. حاجة زى كده!!
نرجع للمسلسل.. وبعدين بجد المسلسل رخم يعنى بغض النظر عن البطل والمزز اللى معاه..مش هاتكلم عن السفالة اللى الناس بتقول ان المسلسل مليان بيها عشان أنا مشفتش بصراحة لانى مش متابع إلا الحتة اللى شفتها.. إنما فعلا رخم..عامل كده زى برنامج هذا المساء بتاع الشاب المتجدد سمير صبرى.. تحس انه بيلزق كده والواحد لازم يغسل إيده بعد ما يتفرج.
وبعدين هوه الحب ان الواحد يجيب لحبيبته ورد كل يوم وللا يقعد يبص فى عنيها طول النهار باعتبار انه بيسرح شعره فى عنيها يعنى؟؟ الحب أكبر من كده بكتير..
الحب ان حبيبتى تجيب لى قميص جديد فى عيد ميلادى وانى أحول لها خمسة جنيه رصيد فى عيد ميلادها
الحب انى دايما أمشى بفلوس مجمدة عشان هيه اللى تدفع تذكرة المترو
الحب انى دايما اروح الحمام فى نهاية قعدتنا فى الكافتريا عشان هيه اللى تحاسب
الحب انها تقول لى باحبك .. وساعتها اكون باخلص المستوى التاسع فى لعبة التعبان بتاع الموبايل
الحب حاجات كتير أعمق من مجرد ورد وكلام فاضى
افهموها بقى

هناك 80 تعليقًا:

TAFATEFO يقول...

طال غيابك يا أشرف بك

بس انت معرفتش ان عز وشاهيناز اتطلقوا من زمان؟؟ انت لسه فاكر يا عم الحاج؟

ده غير طبعاً ان ساويرس ساب مجلس إدارة موبينيل .. يعني ملوش دعوه لا بكروت العشره ولا الشحن على الهوا

:D

مبروك العوده .. ومبروك الكتاب وبالتوفيق دايماً

رمضان كريم يا فندم .. لو كانت في أحداث كتير سقطتها .. قوللي وأنا أحكيلك على اللي حصل كله :D

شيماء الجمال يقول...

صباح الفل ..الساعة دلوقتي سبعة الصبح ، بكتب لك التعليق قبل ما أروح الشغل ..انت فين يا عم ؟ أولاً يا سيدي تقبل تحياتي علىالكتاب ..الشنيع..المريع..الفظيع..لا بجد أنا إستمتعت بكل كلمة في الكتاب ده و قريته 3-4 مرات مثلاُ ، شكراً على اللحظات الممتعة االي عيشتهالي و انا بقرا كتابك :)
ثانياً : بالنسبة لمسلسل نور ..المسلسل خلص خلاص ،أعترف أنه كان طويل و ملل ،لكننا ما نقدرش ننكر إنه أضاف شوية حجات،أنا إستمتعت بالتجربة التركيسورية دي ، مهند أمور؟؟آه أمور مقدرش أنكر ده ;) بس مش لدرجة الطلاق طبعاً..بس الحب حلو ..و أنا بحب محمد يجيبلي ورد مش عيب يعني ، بص اللي عايز حاجة بيعملها ،محمد -جوزي- بيقطعلي كل يوم وردة من الجنينة اللي تحت البيت ..مش لازم يعني يقف في طابور الورد بدل طابور العيش:)عارفة ان كلامي مش راكب على بعضع ..ياللا معلش لازم أنزل الشغل ..بااي

شيماء الجمال يقول...
أزال المؤلف هذا التعليق.
Amr Ahmed يقول...

هههههههههههههههه

انت كلك مهند

يابني هما بيبحبوه علشان شبهك

مهند جنن البنات خلاص

زوج مخنوق يقول...

أشرف باشا
عودا أحمد ( مين أحمد ده ) ما علينا

مسلسل نور ده بجد قريت عنه ييجي عشروميت موضوع اشي مدونات على جروبات في الفيس بؤ على أخبار على كل حاجة

بس اول مرة اعرف انه عمل الازمة دي بسبب انه شبهك

عموما
الستات دي بتهرج
اه الورد حلو و كل حاجة
بس لما يبقى كل يوم يبقى ملوش طعم
يمسخ
اه في مناسبة حلوة مفيش مانع
انما كل يوم
ده تهريج يا معلم

و بصراحة الحتة بتاعة
فضلت بحمد الله خمس سنين ارسم نفس الراجل وهو شايل العلم على الجبهة لما طلعت روحه وكان هيقلب يهودى ..

موتتني من الضوحك

بوست تحفة كالمعتاد
و مبروك على العودة و على الكتاب

تحياتي

مهيج الجماهير يقول...

استاذ أشرف باشا
دى ستات فاضية و ربنا
و الفاضى يعمل قاضى
بس تصدق انا ملاحظتش الشبه بينك و بين مهند ؟؟
هو يمكن الفرق فى السوالف بس
عامة حمد الله على سلامتك ... و ياريت متغيبش علينا بقى
و الف مبروك على الكتاب .. معلش معرفت احضر حفلة التوقيع
و مستنى اماكن توزيع الكتاب فى باقى المحافظات

مهندس مصري يقول...

تصدق انا ما قدرتش استحمل حلقة على بعضها من المسلسل ده
خنيق بشكل رهيب
انا مش فاهم الناس كان عاجبها فيه ايه ؟
أحسن انه خلص
ده كان عمل هبل في دماغ نسوان الخليج هنا

Dexter! يقول...

ههههه سيبك انت من مهند
الله يحرقه و يسبب شعره كمان و كمان

المهم رمضان كريم

و بالنسبه للشبه بينك و بين مهند

ابصم بـ العشرين انك شبهه

و انا اقول شوفتك فين قبل كدا

ههههههههه

تحياتي

بيك رولز :P

:)

سمو الأميرة سارة يقول...

ههههههههههههههههههههههههههههههههههههههههههههههههههههه

بجد مش ممكن .. انا هموت وذنبي في رقبتك ..
احم هرجنا بقى نهزر شوية ..

ههههههههه لأ بجد انا كمان حسيت انه مسلسل بارد جداً جداَ وبعدين يعنى سي مهند دا مش ملاك يعنى ماهو مطلع عين طليقته وخارب عليها .. دا اللى فهمته من الحلقة ونص اللى شوفتها .. وبعدين كمان المسلسل باااااااااااااارد بارد اوى مش فكرة انه مدبلج بس لأ هم باردين .. وكلهم بيتخانقوا مع كلهم نفس فكرة حرب اكتوبر بتاعة الخمس سنين هههههههههه

انا عن نفسى ممكن اتخانق مع جوزى لو بقى زى مهند .. ابسط حاجة هشك انه عامل عملة .. يا سرق يا نهب يا اما اتجوز عليا وبيدارى عملته

saso يقول...

اولا : كل سنه وحضرتك طيب

ثانيا : مبروك الكتاب وانا بما انى بلدياتك بعت اجيبه من القاهره اى والله واحنا عندنا اغلى من حضرتك؟

ثالثا بقه وده المهم :

طبعا اختلاف الراى لا يفسد للود قضيه

انا ...



انا....




انا ........عجبنى المسلسل بصراحه عادى يعنى

ايه المشكله ف ان مهند وسيم شويتين ؟

هو يعنى عشان حلو كل البنات هتريل عليه

لا طبعا ...

كمان اللى بيتطلقوا دول مش بيتطلقوا بسبب المسلسل دول بيتطلقوا عشان دى بيوت كانت آيله للسقوط

وايه يعنى لما مهند يسبل لنور طول النهار ...مكل زوج يستثمر الشويه اللى قاعدهم مع المدام ويسبل لها ...مش لازم يعنى طول النهار ...

ايه يعنى الورد عامل مشكله ؟؟؟؟

والله العظيم عالم غريبه ...طب وايه يعنى لو انت حتى لو حالتك متوسطه كل كاااام يوم هات ورده اعتبرها زكاه ...

مش كل يوم صحيح عشان الملل

ايه يعنى لما تبقي الحياه رومانسيه الى هذه الدرجه ....الرسول كان بيعامل زوجاته احسن من كده ولا الراجل لازم يعكنن على اللى خلفوا مراته ف الشويه اللى هو متلقحهم ف البيت ...

هى ضيقه المعيشه بسببها ... ولا هى مسئوله عن صف الطوابير اللى بيقف فيه .. دانت المفروض تبوس ايدها انها مستحمله معاك

يعنى من حقها شويه رومانسيه

كمان يا سيدي متقلقش هى عمرها مهتشوف مهند احلى منك لو انت عاملتها احسن منه ( القرد ف عين امه ..)

المسلسل انا مش شايفه فيه اى مشكله ...اذا الناس شافته بمنظور صح ..مهو انت كده كده مش عايش حيات مهند ... ولا انتى عايشه حياه نور

يعنى احداث المسلسل مش هتغير في او فيكي شئ ...

الخلاف كان على شويه الرومانسيه الزياده

غيران وخايف على بيتك متعمل زيه واعملى زيها ولا يعنى الغريب حلو واهل بيتك كخه؟؟؟؟؟؟؟...

وخليك فاكر ان ربنا والرسول وصوا على النساء يعنى سي مهند يطبق وسيادتك تتفرج؟؟؟؟


معلش انا طولت عليك اوى يا استاذ اشرف ...بس الموضوع كتر اووووى ...

c u

ana ga3an يقول...

يجي اية مهند دة في جمال اللمبي ولا حلاوة اللمبي وطعامة اللمبي

يا عم قول يا باسط
وهو احنا كنا شوفنا نور لما هم عايزين مهند

FreeKiller يقول...

ياااااااااااااااه
يعني انا دلوقت برد على بوست كبه واحد شبه مهند

ياللحظ......ز

انا مش فاهمه فين الخروج عن الاداب و العامة اللي ف المسلسل
المسلسل بجد مفيهوش لقطة كده و لا كده
و انضف بكتير من افلام مش هقول اجنبي الناس بتتفرج عليه
لا من افلام مصري كمان


و بعدين ايه المشكله اما الاتنين المتجوزين يحسنوا علاقتهم ببعض شوية
و يخلوا الحكايه فيها رومانسية
مش ضروري ورد كل يوم
طب و الله مهند مكنش بيجيب لنور ورد كل يوم

بس فيها ايه اما الكلام يبقى بهدوء
و مليان رومانسية
دول حتى اما كانوا بيتخانقوا كانوا بيتخانقوا بهدوء
اللهم الا خناقة وحيده بس
هههههههههههههههه


ما علينا المهم

الف مبروك عالكتاب الجديد
طيب الكتاب نزل ف مكتبات نص البلد و ربع البلد و تمن البلد

طب و المحافظات و القرى و النجوع ملهمش نصيب يعني و للا ايه؟

يا ريت بقى ينزل ف معرض الكتاب الجاي
خلوا المساكين امثالنا يعرفوا يعثروا عليه

طولت جدا انا عارفة
متأسفة عالإطله دي

تحياتي

mr_english80 يقول...

السلام عليكم
ازيك يا باشا
صحيح انا اول مرة اكتبلك بس حاسس انى اعرفك من زمان
يمكن علشان بنشترك فى المنطق الساخر من اشياء كتير حوالينا بس الفرق اللى بينا انى خلاص صديت يعنى بقيت من الاخر بنفض لكل شئ
على فكرة كتابك همووووووووووووووووت واشترى نسخة منه
اللى قالى عليه صديق عزيز اسمه اسلام منسى وهوه بصراحة اللى عرفنى عليك
وكلامك عن المسلسل ده معلش مش عاجبنى شوية
يعنى انا عمرى ما شوفت مسلسل رمانسى مصرى ابدا واصلا ما عندناش ممثلين ينفعوا كلهم واقعين ونص لبه
وعايز افكرك بمسلسل كورى كان من كام سنة اسمه ونتر سوناتا كانت قصته جميلة جدا
يمكن هتستغرب انى بدافع عن الرومانسية فى زمن ما بقاش فيه وقت لكده بس
يمكن علشلن اتجوزت الحمد لله عن حب ومازلت اشترى لحبيبتى اللى هيا زوجتى دلوقتى ورد صحيح مش كل يوم زى ايام الكلية بس اللى ما اقدرش عليه انى فى يوم ما اقولهاش بحبك
وكمان سميت بنتنا على اسمها
وربنا يديم علينا السعادة
ويوفقك فى حياتك ويرزقك ببنت الحلال اللى تشقلب كيانك من فوق ل تحت
وارجو ان تزورنا على البلوج بتاعنا
http://abomahira.blogspot.com

Starbon يقول...

انا اول مره اعلق على البلوج بتاعك بس انا دايما متابعاه و بيعجبنى جدا

بالنسبه بقى لمسلسل نور
انا بالظبط اللى شوفته من المسلسل ده دقيقتين و كانت المقدمه من ضمنهم
حسيت انى جالى شلل اطفال و سعال ديكى
و مهند بقى بالذات حسيت انه خارج من تلاجه ويادوب يرجع تانى قبل ما يسيح

رغم انى معروف عنى انى باحب اجرب و اغامر واتفرج على الحاجات الجديده

يعنى انا كنت اول واحده فى مصر اتفرجت على مسلسلات مكسيكى قبل ما الشوطه ما تبتدى يعنى قلت اشوف الناس دول بيعملوا ايه

واتفرجت على مسلسل قعد كده بتاع 7 شهور و بعدين خلص على نهايه عجيبه كنت هاتنقط فيها بس قلت مش مشكله جايز المسلسلات التانيه كويسه و الظاهر انى مش هاتعلم ابدا

المهم برضه الكورى واليابانى واى حاجه جديده اقول اشوف دول هيعملوا ايه

بس جت لحد نور و ماقدرتش اخد الخطوه الجريئه دى

ماهو برضه الواحد عنده مراره واحده

بالنسبه للراجل اللى ماسك العلم اللى انت قعدت خمس سنين ترسمه ده لحد ماكان هيقلب يهودى

انا حسيت انه ممكن يقلب بعد تانى سنه فبقيت ارسمه ميت علشان مايكونش عنده فرصه

واحنا برضه بنشوف فى الافلام ان الواحد من دول يادوبك يمسك العلم يروح حد ناشه بالرصاصه اللى تيجى فى قلبه
انا برضه كنت باحرص انى اتبع الاسلوب ده وارسم الدم عند قلبه

و كراسه الرسم طبعا مفيهاش غير هى الورقه دى
رغم انى اول لما باشتريها بيكون فيها ورق كتير مش عارفه بيروح فين
المهم المدرسه كانت ايام عظيمه

ياه فين ايام اما كان الواحد يقول للمدرس معلومه جديده وهو مايعرفهاش

اكيد بتقول ان المدرس بقى بيمدحه ويديله درجات والكلام الفارغ ده

يعنى هى حاجه زى كده اللى كانت بتحصل يعنى الفرق انه كان بيدى درجات بالناقص و يمدحه باسماء الحيوانات ده غير بقى عصايتين و جلدتين والذى منه

بس من الاخر البوست تحفه
و مبروك على الكتاب
انا لسه ماجبتهوش بس ان شاء الله هاجيبه قريب

MaGn0liA... يقول...

هههههههههههههههههه

هو ده الحب

حرام عليك

ههههههههههه

غير معرف يقول...

هههههههههههههه
اولا حمد الله على السلامة
وثانيابقى
بصراحة انا مقهور زيك
ايه البرود ده و الدبلجة دي ومهند ده
انت عارف لولا ما هو شيهك انا كان ليا تصرف تاني
ده حتى البت بتعتي يقت بتكلمني في التلفون عليه ده حاجه تقرف بقى انا رايح اشحن علشان اكلمها في ايه ولا ايه

ثالثا انا حاليا بره مصر ومش عارف اجيب الكتاب بس انشاء الله هاجيبه

وبصراحة الموضوع ده خطير خصوص حتة الدبلحة وبوست الرسم
الف شكر ومستيلك جديد

مواطن مصرى نايم يقول...

ايه ده على كده انت فيك شبه كبير منى
و انا اقول الناس فالشارع تشاور عليا
دا مهند و واحده معاها تقول لها لا دا اشرف توفيق
و انا بركب المترو فاسكندرية الناس تشاور
لا مش عليا على الكمسرى
و بعدين دا مفيش مترو فاسكندرية
هههههههههههههههههه

تحياتى يا باشا
مبروك عالكتاب

اسلام

tota يقول...

howa dh f3ln el7ob wa dh 2li ento bt3mloh lma elbent ta2ol klma kawesa :)bas 3ref leh elbanat bet7b mohnd awy keda? mesh 3shan bygeg ward kol yom,3shan bysm3ha lma btkon m7taga ttklm,wa by3br 3n 7obo ba montha el7anan .7ta lw kan kolo tamsel wa klam fady,bas felnahya elbent mesh 3yza 2la keda shwet ehtmam wa shweten 7nan.efhamoha b2a:)

esraa يقول...

هههههههههههه

مهند مين بس اللي انت بتقارنه بيك سااشرف

انا ماسمحلكش بده أصلا

عيب يابني انت مستواك أعلي من كده

قلم رصاص يقول...

هههههههههههههه

أشرف افندي

كفيت ووفيت ياحبيبي

وبعدين بخصوص الورد احنا ممكن ننتظر يا أشرف لما ينزلوا الورد على بطايق التموين .. بكده مفيش مشكلة .. نجيبلها ورد ياسيدي ولا نزعلها
ههههههههههههه

بخصوص المسلسل بشكل عام .. انا شايف ان الاختلاف في البتنجان لايفسد لصينية البطاطس قضيه

عادي ياعم .. اللي عاوز رومانسية يشوفه
واللي موش عاوز ميشوفوش.. وبرضه هنفضل اصحاب وكفاءه يعني

عموما انت نورت النت .. والدش كمان

اه عاوزينك تبقى متواجد دايما كده معانا

يا أخي الكأبه نفسها تطول الواحدمن اللي بيحصل في البلد دي

خليك جمبنا يا أشرف بيه عشان متقلبش غم
هههههههههههههه

تقبل تحياتي بالكاتشب

فيونكات يقول...

مساء الخير
انا طبعا عارفه انك ماتعرفنيش ولا انا حتى اعرفك بس كان لازم اعلق ع البوست الجامد ده وبالذات الحته بتاعت رسم حرب اكتوبر ماكنتش برسم غيرها تقريبا المشكله انى لما سالت اختى اللى لسه فى ابتدائى قالتلى انا برسم حرب اكتوبر الظاهر انه بقى من الاساسيات زى طبق الفول كده. عايزه كمان اشكرك على الكتاب الجامد ده بجد حلو اوى بقراه كتير جدا وكل مافتكر فقره فيه اقوم اقراها تانى .تحياتى لاخف دم

العبـد لله يقول...

ازيك يا أشرف باشا وبما اني أعرفك وشفتك كتير فأنا كنت بحسبك الاخ التوأم بتاع مهند وقلت في نفسي هبقى غبي لو سألتك لان الموضوع واضح جدا واكيد انت توأمه لكن بجد انت فاجئتني دلوقتي لما قلت انك مش أخوه..؟
لكن البوست جامد والحمد لله اني ماتابعتش من المسلسل أكتر من 5 دقايق يخلوني قادر أعلق عالبوست بتاعك ويارب انت تكون فاضي تقرأ التعليق بتاعي.

عاقلة علي ارض الجنون يقول...

انا بجد بشمئز من الواد ده بجد

حاجه في قمة الرخامه فعلا زي سمير صبري ملزق كده

ده و الله حتي شكله بلاستيك كده :S

تحياتي لكتاباتك الساخره

ياسمين

د/مروة المعداوى .....قباحة سابقا يقول...

اول مرة اجى
بس مش اول مرة اسمع عنك سمعت عنك من لماضه و الصباغ كتيييييير

انا بقى لما قريت الموضوع ضحكت لدرجه انى دمعت و كنت لابسه و نازله المستشفى
و ماشيه فى الشارع و نعمه ربى بضحك و مدمعه و الناس بتتفرج عليا

و الله مهند دا ميخش دماغى و لا دماغ اى واحده عاقله ببصله

البت اختى هى المهبوله بالمسلسل و على ايه مش عارفه
كل يوم تشوفه على 3 محطات و تقعد على النت تتفرج على الحلقات اللى فاتت و الحلقات اللى جايه

و بعد ما المسلسل خلص قررت تتعلم تركى
و حاليا مش فاهماها طول النهار بطرطم بالتركى

و كراسه و قلم

و انا طول النهار منك لله يا مهند الزفت

لنا و لكم الله
و الله فيه ستات عاقله بس الاغلبيه بتحكم

لا انتو مهند و لا احنا نور و القرد فى عين امه غزال

تحياتى

تشاااااااااوووووووووو

دار العين يقول...

على مدونة دار العين للنشر
_ جمال الغيطاني : "امبارح راح فين ؟" هو السؤال الذي شغلني منذ الطفولة
_ حديث علاء الأسواني عن مشكلة انفصال المثقف عن الواقع
_ حدوتة من كتاب " المرأة والحدوتة "
http://ainpublish.blogspot.com
........
نرحب بتعليقاتكم واستفساراتكم
سواء عن الكتب الصادرة عنا أو عن سياسة النشر

أحسن تـستاهـل يقول...

عندي كلام كتير اوي بخصوص الكتاب الجميل مبسوطة يا مصر

بس نلتقي بعد رمضان بأه

لو لسه في العمر بقية

مها ميهوووو

3ala asm masr يقول...

فعلا أنت عندك حق أنا معاك فى كل اللى قولته
الحب أن حبيبتك تجبلك قميص وأنت تحولها خمسه جنيه
أهو فرصه تحس بقيمة القرش
تحياتى

بنت الماضي يقول...

حضرتك شبهو؟؟
هو انا مشفتكش غير في اليو تيوب بس يعني اليو تيوب مبيغيرش اوي كده هههههههه
بس هو فعلا مسلسل سخيييييييف مشفتش منه ولا حلقه اصلا غير نص حلقه مهند ساب مراته تسافر مع صاحبه وهو قعد معرفش يعمل ايه حاجه كده
بس ماتصورتش كم الاهتمام والمتابعه للمسلسل دي...طول عمرها المسلسلات المدبلجه بتيجي على ام بي سي ون الساعه 4 العصر من ساعه ماكنت في ابتدائي اشمعنى المسلسل ده؟
الناس بقت فاضيه وعايزه اي حاجه وخلاص
واللي تتخانق عشان الورد لازم تكون مستكفيه من كل حاجه بقى ومفضلهاش غير الورد ودي طبعا مش موجوده في مصر ابدا

بوست جميل اوي اول مره ارد في مدونة حضرتك مع اني متبعاها بس بجد جميله ورمضانك كريم وقلنا الكتاب فين في الاقاليم

انا ودماغي يقول...

ههههههههههههههههههههههههههه
انا بجد دمعت من كتر الضحك
معلش متضايقش أوى كدة
طب إيه رأيك بقى أنه أنا أتفرجت على نور ده من أوله لآخره
أنا بصراحة فى الأول أتفرجت عليه عشان مهند بس بعدين حسيت أنه عادى هو بس اللى كان معلى الموضوع معاه الرومانسية اللى مش موجودة اللى كان بيمثلها

بس هو بصراحة ممل أوى و طويل بشكل يجيب كساح بس كنت بتفرج عليه أيام الإمتحانات من باب الهروب من المذاكرة و بعد الإمتحانات لقيت الحلقات سخنت
بس و الله المسلسل جابلنا حالنا جميلة كدة مكنتش موجودة فى حياتنا أولا السفالة اللى بيقولوه عليها دى موجودة أكتر منها ألف مرة فى مسلسلاتنا و بشكل خطير و أساسا مكنتش سفالة هو تفكير خاطىء بالنسبة لتفكيرنا مش أكتر و التفكير ده مكترش كتير
بس المسلسل ككل فى إحترام عالى جدا فى التعامل بين الأفراد و فى رومانسية حلوة أوى أينعم مش موجودة و هما فى المسلسل أساسا قالوا كدة
بس رومانسية كانت بتسعدنا فعلا لمدة ساعة و نص

تحياتى و مدونتك زى العسل و اسم على ما يسمى:)

darsh يقول...

مساء الفل يا ريس
البوست مالوش حل

مبروك على الكتاب ومبروك على الطبعه التانية مقدماً ...

أنا بس قلت امسي عليك عشان بقالي كتير مادخلتش على النت أصلا وأول ما قررت أفتح مدونة قلت اروح اشوف الراجل اللي وحشني جداً ده ..

ماتقطعش الجوابات يا كبير

hesham يقول...

باشا

ايه الجمال ده

و حشتنا يا راجل

و عيب يا ريس لما تقول انك شبه مهند

مهند هو اللى شبهك

انا مثلا ما بشوفش المسلسل ده لكن بقرا المدونة بتاعتك و عرافك

فلو شفت اخونا مهند فى الشارع هقول اشرف توفيق اهو .اشرف توفيق اهو

هههههههههههه

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

meshmesh يقول...

مش ممكن الاسلوب الهايل ده
انا ضحكت لما دمعت
اسلوبك زي العسل
وبعدين مين قالك انك مش شبه مهند
ده انت شبهه الخالق الناطق واللى يقول عكس كده يبقى ضلالي
سلامي ليك

محمد الكومي يقول...

نسيت حاجة مهمة في تقاليد الحب التقليدي

تقولك نركب تاكسي تقولها ماشي يا حبيبتي و تفضل تحور لحد ما تقرب من المكان اللي انت رايحه تقوم تشاور لاجعص تاكس و تركب بجوز جنيهات

ـ-ـ- أحمد عبد العدل-ـ-ـ يقول...

السبلام عليكم
حمد الله على السلامة
على فكرة كتاب حضرتك وصل لى بالسلامة السعودية لسه ما أخدتوش بس أكيد هستمتع بيه جداً
بالتوفيق دايماً

amr يقول...

ههههههه

مش عارف والله أستاذ أشرف

ايه اللى حصل للناس مسلسل ولا يستاهل

اللى بيحصل علشانه ده

عمل أزمه بدون لازمه

ربنا يهدى

خالص تحياتى

Oss يقول...

بجد بجد بجد
انت جاااااااااامد
انا اول مره اعمل كومنت هنا
بس انت جامد
وبعد اذنك انا عملت لينك ليك عندى
---
نرجع لمهند
انت ارتكبت جرم فظيع من الدرجه الأولى يعاقب عليه القانون
أينعم
لأنك غلطت فى شئ مقدس بالنسبه للناس اليومين دول
لأ
ولع فى طوابير العيش
وهد المدارس
وشحت العيال
بس إلا مهند ونور
ده احنا ممكن نحل مشكلة المرور ساعة إذاعة المسلسل ده يا راجل
بس نوحد اذاعته على قناه واحده بس
وانت هتلاقى الشوارع زى الشوارع يوم نهائى كاس الأمم كده

للعلم
أنا بفضل الله ماسمعتش ولا حلقه من العبط ده
انا كنت فى الأول باحسبه شد الستات بس
ده طلع فى رجاله بشنبات كانه بيحبه يسمعوه
أينعم

ودمتم
تحياتى

الإتربي اللولبي يقول...

عمي و عم أطفالي أشرف باشا توفيق

إزيك يا عمهم

أولا ألف ألف ألف مبروك حفل توقيع كتاب معاليكم

ثانيا ألف ألف ألف آسف على عدم حضوري بس أكيد زي ما انت متأكد إني ما شفتش أي مواضيع من بعد عناوين الصحف القوميه و المعارضه و الصفرا على مبسوطه يا مصر .. يعني كنت عامل بيات صيفي من المدونات بصفه عامه و خاصة بعد الخطوبه .. يعني من الآخر ما تستناش تكتب جديد بعد ما تخطب إن شاء الله

ربنا معاك يا أشرف بس أبوس إيدك أنا بلغني إن قريب هافرح فيك من مصدر مشلول فيه .. إوعى تنسى تبلغني

بالنسبه للمسلسل اللي بتقول عليه ده أحب أؤكد إني ما سمعتش عنه إطلاقا .. بس اللي متأكد منه إنك أكيد شبه ستيف أوستن

تحياتي للجماعه

سلام عليكم

Sometimes يقول...

اولا كل سنة وانت طيب يا اشرف
ويارب تكون بخير
والف مليون مبروك على الكتاب

بالنسبة للاخ مهند
هما حوالى 3 حلقات اللى تابعتهم
وكان بسبب انى كل مااكلم صاحبتى الاقيها بتقولى باى علشان اشوف مهند
مهند ده ايه اللى تسيبنى علشانه
قلت اشوفه
واول حلقه شفتها بصراحه كانت جميله
قعد يصالح فيها ويغنى لها تحت البلكونه وهى ما عبرتوش.. ههههههههههههه انا مش عارفه ازاى بصراحه

المهم ما علينا
انا مكملتوش
ومحبتوش اوى
بس بجد وحشتنا مواضيعك جداااااااااااا

وخد الدعوة دى على الماشى " علشان عملت فيا معروف بس من غير ما تاخد بالك "
ربنا يبارك فيك ويصلح حالك يارب
ويرزقك ببنت الحلال اللى تحبها وتحبك
بس بلاش الحب اللى قلت عليه فى الاخر ده
هههههههههههههههههههههه

شبيه ايساف يقول...

وربنا انت برنس يامان

كلام جامد وموزون

البت صحبتي بتحب مهند اكتر مني

بنات واقعه ومريله

البنات دلوقتي لو شافوا ولد مسرح شعرو وملمع جزمته هتريل تحت رجليه علي طول

بنات واقعه صحيح

خديجة محسن "لؤلؤة الاسلام" يقول...

ما شاء الله المدونة رااااااااائعة

و البوست مميز ما شاء الله

و تحياااااااااااااتى
رمضان
كريم

Amr Fekry يقول...

انا كنت اقرا حتت من الموضوع ده وابتسم

لحد ما جيت عند الحتة دى وفطست على روحى م الضحك lol


((إحنا عمرنا مارسمنا أصلا غير أول كل سنة يقولولنا ارسموا حرب أكتوبر))


*********

لا ياراجل .. مش معنى انى عايش لوحدى ومش عارف هاكل إيه بكرة انك تكلف نفسك .. الموضوع بسيط

ياعم عادى ..هوه أنا أول واحد يبقى مش لاقى ياكل فى مصر..أكيد ربنا هيفرجها

أيوة يعنى الراجل يروح يقف فى طابور العيش وللا ف طابور الورد؟؟

وبعدين هوه محتاج الورد عشان يوزعه على مقابرنا بعد ما الشعب كله يموت واحد واحد إن شا ءالله على إيده وإيد اصحابه.

إحنا عمرنا مارسمنا أصلا غير أول كل سنة يقولولنا ارسموا حرب أكتوبر .. نفضل نرسم مسدسات وواحد شايل العلم..فضلت بحمد الله خمس سنين ارسم نفس الراجل وهو شايل العلم على الجبهة لما طلعت روحه وكان هيقلب يهودى .. وكمان كنت بارسم الجيشين اللى بيحاربوا بعض عليهم علم مصر.. يعنى مثلا عبد الناصر بيحارب السادات.. حاجة زى كده!!



جامدين جدا :D

واخر حتة انا اقتبستها فى توبك اسمه اقوال بكتب فيه اقوال عجبتنى واسم اللى قالها
لا تقلق .. قلت اشرف توفيق :D

Che_wildwing يقول...

كنت خايف لتكون لوثة مهند جت حداكوا هنا اول ماشفت الصورة
بس اتضحلى قد ايه انت بتحب المسلسل
ياعم الحاج الحريم في مارينا عملوا مظاهرات ضد امام جامع عشان خطب في الجمعة وقال ان مسلسل نور وقت مهدور ولابد من الاستفادة به
شفت بقى الحلاوة

No Fear يقول...

السلام عليكم
ألف مليون مبروك علي الكتاب و بالتوفيق و المجاح دايما
.
بصراحة أنا مشفتش المسلسل بس مش عارف بأكرهه ليه من غير ما أشوفه لذلك أقولها معك أشرف رجع لك يا مهند
.
و شكرا علي مجموعة النصايح الأخيرة دي
:))

أسيرة الأقدار يقول...

احم احم
دى اول مرة ادخل فيها البلوج هنا
بس اان سمعت عن الكتاب بتاعك اللى مكسر الدنيا فقولت اجى ابارك جايز الحق نسخة ولا حاجة .. انا قريت توبيك كتبه سوووو عن كتابك ومن ساعتها نفسى اقراه اوى .

ندخل بئا فى موضوع نور ومهند
(استعنا على الشقى بالله)
بص يا اشرف انا عن نفسى واحدة من الناس اللى كانت بتتابع المسلسل ده لاسباب كتير

-اولهم انه كان عاجبنى اوى روح الاسرة الواحدةاللى كل فرد فيها خايف على التانى وبيحبه وخصوصا دور الجد اللى شايل هم ولاده واحفاده ولاممهم حواليه

-تانى حاجة كانت قصة الحب الرومانسة (الخيالية) اللى جمعت نور بمهند وبقول خيالية لانى مقتنعة جدا ان مفيش حب بالشكل ده دلوقتى ده مجرد تمثيل بس مفيش حاجة تمنع اننا نعجب بالتمثيل ده

-ثالث حاجة بئا هى ان المسلسل كان فيه مناظر طبيبعة جميلة جدا واول مرة كنت اتفرج على الاماكن السياحيه فى تركيا وهما نجحوا فى انهم يظهروا جمال تركيا فى المسلسل ده

اما الستات اللى اطلقوا من اجوازهم دى ستات دماغها فاضية وبيوت خربانة اصلا والعيب مش على المسلسل ولا على بطله العيب على الأمخاخ (جمع مخ يعنى) اللى لغت التفكير من وظايفها

انا قريت فى منتديات كتير نقد للمسلسل ده بس عجبنى جدا فى اسلوبك انك منقدتهوش كعمل فنى وقولت انك مشوفتوش لان كان فى ناس غريبة بتنقد لمجرد النقد من غير مايتفرجوا ولا يعرفوا هو بيتكلم عن ايه اصلا

كفاية رغى بئا مش معقول اول مرة ادخل واعمل الصداع ده كله

مبرووووك على الكتاب للمرة التانية ويارب اعرف اوصله علشان نسفى اقراه

شوارع مصرية يقول...

جميل يا أخف دم

بجد و عجبتنى أوى حكاية أن مهند إشعال ذاتى و جوزها بعين واحده

برافو تعبير مولع

و ألف مبروك على الكتاب أنا لسه ماقريتهوش بس أكيد هجيبه

أدعوك لزيارة مدونتى - شوارع مصرية

مع خالص تحياتى - شحته

mo7amaad يقول...

أول زيارة لمدونتك ما شاء الله دمك خفيف جدًا
والتدوينة موفقة
والحمد لله ما بتفرجش على المسلسل
مش طالبة قرف يعني

صبرني يارب يقول...

لا حقيقى انت دمك خفيف يا اشرف والله

على فكره كل المنصوريه كده ياعمنا اجدع ناس

شوف موضوع مهند ده انا باتخنق منه

واخر مره قعدت مع البت اختي وبنت عمي كنت هاولع فيهم

شوفتي نور لما مش عارفه رجعت فى وش مهند عاااااااااا (دي صويته )

يخربيته مهند ده قمر

شوفتي زعبوله لما كانت واقفه هاتموت عليه
وما الى ذلك من الكلام المفقع بالاضافه الى الصور الى ماليه الكمبيوتر عند بابا وموبيلاتهم

ومسلسل تاني كمان تركي برررررضه
اسمه سنوات الضياع باين
واسامي تانيه خالص

وطول ما هما قاعدين ينقلوا صور على الموبيلات ونغمات وبتنجااااااان على الاخر

وبما انك شبه مهند يا اشرف ومن المنصوره انصحك ما تمشيش فى شارع الدراسات خالص عشان البت اختي ممكن تحدف نفسها من البلكونه عليك مش خايفه عليها انا خايفه عليك انت الى هاتفطس يا ابنى

ههههههههههههههههههه
خوااااااااء يا ابنى خواء
ناس دماغها وعقولها فااااااااضيه

اسعدني جدا جدا زيارتك

وعايزه الكتاب لما ينزل المنصوره ابقى قولي

Eman Eltaher يقول...

ههههههههههههههههههههه
ياااااااااا
كل ده و لسة عارف المسلسل ؟؟؟
ده بيقولوا انه أكتر من 150 حلقة
!!!!!!!!!!!
يا خبرررررررررر
كل ده و متعرفش ؟؟؟

لأ معلش اسمحلى
كده مينفعش
لازم تكون متابع كل المسلسلات و الأفلام و البرامج و الفوازير و ظاظا و جرجير
:)
ههههههههههههههه

أقولك حاجة هتتكتب ف موسوعة جينيس قريب ؟؟؟؟؟؟
أنا بقى مكنتش عارفة حاجة عنه نهائى
إلا بالصدفة لقيت اوختى مشدودة للتلفازيون جااااااامد و اوعى يا إيمان المسلسل هيفوتنى
عااااااااااااا
يييييييييييييييه
هييييييييييي المسلسل جه

مسلسل إيه يا بنتى اللى هاتتجنى عليه - سألت بكل سذاجة
ولقيتها راحت خبطانى ف وشى بجردل مية ساقعة - إيه انتى مش عايشة و لا إيه ؟؟!!! فيه حد ميعرفش المسلسل التركى مهند و نور

آآآآآآآآآآآآآه
مش تقولى يا شيخة !!! طب انا بقى معرفوووووووووش

لا تعليق

الظاهر المسلسل ده عمل للناس سحر

و عمالين يقولوا مهند مهند و هو مش نازلى من زور أصلا أساسا
هههههههههههههه

سيبك انت
خلينا ف المهم

انا كان بقالى كتير متابعتش المدونة يا خسارة
كان فاتنى حاجات كتير بس قريت منهم دلوقتى كتير برضه
و بجد انت رفعت راس الشعرا
لما لقيتك كاتب انا هسيبكم مع اللقاء بتاعى فى الإم تى فى
قلت بقى ده بيشتغلنا زى عناوين الصحف اللى كتبت عن مزقططة يا مصر
:)

اندهشت لما لقيتها حقيقة - لا ما شاء الله عليك
ده مش حسد والله
ده قر بس :)

لا لا لا ده انا بهزر
ويارب عقبال ماتنزل الطبعة التانية و نقرالك اكتر واكتر
ربا يبارك فيك و ف قلمك الموهوب
و يفضل نهره يروى الساحة دايما

مهندس مصري يقول...

قريت المدونة كلها بس في بوستات محذوفة ؟

wanna b a physician يقول...

بصراحة انا بقا ولا شوفت المسلسل ولا عايز اشوفه سمعت بس وخير الله ما اجعله خير شوفت صورة لاخ والاخت
وشايف برضوة ان دى تفاهه ستات
كما قال عنه الرسول الكريم ناقصات عقل ودين

بنت مصريه يقول...

هههههههههههههههههههههه
انا بصراحه مش قادره امسك نفسى م الضحك يا اشرف
وانا اللى كنت فاكره ان دمى خفيف
اتارى فيه ناس بعدى
تصدق والله مفهوم عبقرى للحب

بالنسبه للمسلسل يا اشرف
البنات بتتلم حواليه
عشان شكل مهند اللى هو انت يعنى ههههه
فهو بالنسبه للبنات وسيم
فالهدف الاول للبنات هو الوسامه وتأتى بعدها الرومانسيه

اما بقى السيدات
فبيتجمعو عالمسلسل
لانهم مفتقدين للرومانسيه
لان طبعا ازواجهم قايمين بالواجب
فتخيل حد محروم من حاجه ولاول مره بيشوفها
فلو لاحظت وشه هتلاقى فتح فى الفم
مع تبريق ف العينين مصحوبه بحاله هبل مؤقت طول فتره المسلسل
مع تأهب لظهور اى حد شبه مهند عشان ينقضوا عليه هههههههههههههههههه

المسلسل مفيهوش حاجه على فكره
المشاهد اللى مش تمام محذوفه عال ام بى سى

وبعدين انت متضايق ليه يا عم مانت كمان بتبص يعنى
وبتقول قاعد مع مزز وكده

بس بصراحه انا معاك ان المسلسل واخد اكتر من حقه

مبروك عالكتاب يا استاذ اشرف
انا لسه جايه من فطار جماعى للمدونين
زى احمد الصباغ احمد سكر بابا ابو خالد
رودى
قوس قزح داليا
كنت اتمنى تكون موجود اهه تفطر معانا بدل المرمطه دى
ومتخفش هتفطر بالبرستيج بتاعك برضه ههههههههههههههههههه
اتمنى تنورنى

dina يقول...

السلام عليكم
اولا هعدى موضوع انك شبه مهند ده وان البنات لما بتشوفك فى الشارع بيغمى عليهم بمزاجى يلا
ثانيا
مش عارفه ارد على الموضوع ده منين بالظبط بس هقولك انك مش شفت المسلسل كله انت شفت لقطه واحده
المسلسل مش كل يوم الصبح بيجبلها ورد ولا حاجه
فى خناقات وزعل وتكسير كمان وكل حاجه
بس احنا لاقينا اهتمام عالى اوى من مهند لمشارع نور مراته
وده ببساطه اللى الستات نفسها فيه
عارفين ان الرجاله طالع عينيهم فى الشغل والتعب
وكمان فى ستات بتشتغل ومتبهدله فى بيتها
بس بعد اذنك
دى دنيا فانيه ولا شغل ولا تعب ولا عيال هناخدهم معانا
بس الكلمه الحلوه والمعامله الصادقه مش كتير علينا اننا نتعامل بيهم
الراجل لو حس بمشاعر مراته وتعاطف معاها على الاقل بس
وده مش كتير مش هتطلب منه حاجه تانيه
موضوع الورد ده علامه بس تدل على الاهتمام بالمشاعر
وعلى فكره كان فى مشهد فاتك جبلها ورد ولبس زى القمر وجاب موسيقى ولم الناس واعتذرلها وهى مش قبلت اعتذاره
المسلسل فى نواحى كتير انت مش شفتها
وبالنسبه لموضوع باقى نواحى الحياه
ف عندك حق
انا تابعت المسلسل بعد الحلقه ال90 تقريبا
وكانت لما تاخدنى رومانسيه المسلسل اسال نفسى
امال فين شغل البيت وشياله هم العيال والكلام ده
هما عندهم خدم وحد يرعى اطفالهم
يعنى بردو نوع المشاكل مش تخص اوى الطبقه اللى بقت تحت المطحونه زينا

كل واحد من حقه يتمنى اللى عاوزه فى نصه التانى
بس الاعتدال حلو بردو
هنلاقى زى مهند فين؟ هههههههههههههههههههه
بس تعرف هنلاقى الاحسن منه باذن الله
لو كان شخص محترم ومؤدب واخلاقه عاليه وانسان زكى وطموح يبقى نرضى حلو اوى فى زمانا ده

تقبل مرورى اول مره وياريت كلامى مش يكون يزعل

اوشـــ اوش اوش ـــه يقول...

السلام عليكم
استاذ اشرف
انا سعيده جداا ان فى حد من ولاد بلدى بالمواهب دى
ربنا يحميك يارب
ماشاء الله لاقوه الابالله انا قريت مدوناتك كلهااا حاجه تشرف بجد
وعلى فكره انا من المنصوره وكمان خريجه نفس الكليه ومش مصدقه ان اداب طلعت ناس كويسين كده زيك
اما بالنسبه لمهند بيه
انا مش بحبووو خالص
واللى بيعملو الستات ده اسمو هيافه وقله عقل ودين كمان
منتظره جديدك ونزل الكتاب بقا فى المنصوره لانى قررت اقرى لحد تانى بعد جاهين اللى هوا حضرتك ابسط ياعم اوشه هاتقرالك بنفسها

MaherAlshial يقول...

أشرف باشا أخف دم بجد ضحكت كتير وأنا باقرأ البوست ده ، وخصوصا المقطع الأخير الحب الحقيقيي هو ..... أعتذر للمرور السريع .... وانتظر البوست الجديد ...بوست العيد ........تحياتي ماهر

FreeKiller يقول...

عارفه ان حضرتك مش فاضي
بس حضرتك ليك تاج عندي
يا ريت تستلمه

و كل سنة و حضرتك طيب

شروق الشواف يقول...

كل عام وأنتم بخير
تقبل الله طاعاتكم... وأدامها لكم..

اتفق معاك طبعًا في كل كلمها حضرتك قلتها بخصوص المسلسل... المشكلة أننا فاضيين من الداخل فعلا... وأصبحنا بنهتم بالقشور على حساب القلوب...

لو وصلنا لمحرة التوازن في كل أمور حياتنا... لنجحنا...

دمت بخير

FreeKiller يقول...

المدون الزميل المحترم
بعد التحية
ندعوكم لحضور ملتقى مدوني الشرقية الأول
يوم الأحد 5-10 الساعة الرابعة مساءً
بمقر النادي الإجتماعي بالزقازيق بشارع مدير الأمن أمام حزب الوفد
و الدعوة عامة لجميع المدونين من أي حتة ف مصر
وللمزيد من التفاصيل يرجي زيارة اللينك التاااااالي
http://goharyblog.blogspot.com/

و كل عام و انتم بخير

أميرة ويلز يقول...

طبعا انا جاية متأخر جدا انا بس حبيت اعيد عليك كل سنة وانت طيب
وبما انك اتكلمت عن المسلسل بقى انت اللى جبته لنفسك ياشاعر الرومانسية

بقى ياراجل مسلسل عدد حلقاته 170 حلقة ويمكن اكتر وتختذل حكمك عليه فى مشهد واحد
دة انت حتى مالحقتش تسمع الدبلجة على فكرة نجاح المسلسل بالشكل الجامد جدا رغم انى مش مع اللى اتطلقوا واللى شتموا اجوازهم ولونى اشك انها اشاعات اساسا عشان البنانيت العرب مش هبل كدة وبياخدوا فوق دماغهم ومستحملين وصابرين طول عمرهم
الموضوع وما فيه انها ثقافة جديدة تثير الفضول لأنها فى وقت من الاوقات كان ثقافة مشتركة
الشيء التاني ان المسلسل دة لعب على النقص او الاعمال الرومانسية اللي الدراما العربية مفتقداها او المصرية بالخصوص لأن للعلم السوريين اعمالهم تشبه كتير الاعمال التركية فى نفس الروح الرومانسية وعلى فكرة الافلام المصرية القديمة كانت مليانة ورد فل والقصص الرومانسية كانت بالهبل وتضرب مسلسل نور بالجذمة
بس احنا بقى اللى نسينا الرومانسية
وان الدراما اساسا تشخصيق لروايات يفترض انها تهذب الاحساس وتمتع المشاهد مش تقرفه فى عيشته

ست البيت يقول...

كل عام وانتم بخير
اشرف باشا واخف دمفي بر مصر كلاته
بجد جبتلن خبلان يا اشرف كلامك خفة دمما فيش بعدها ...بس يارب الفلوس ما تغيرناش والشهرة متسببش تقل دمنا استر يارب
زعلان من مهندليه جت عليه ما حن عندنا الممثلة الغندورةالحلوة السنيورة اللي عملت مسلسل من يجيعشرين سنة اسمه حياة الجوهري ومن يومها وهي فلقانة مسلسلات على نفسالمنوال كل رمضان
كل سنة هي المظلومة وعندها 30 سنة وبت وولد وجوزها بتحبه وظالمها وهيه بتدافع عن قضي وجوزها متورط فيها او مشارك اللي متورطين فيها
واحدمن ولادها معاها والباقي ضدها وفي الالخر يعرفوا ان ماما على حق
زعلان ليه يا شأروووف دا حال الدنيا وبعدين عيب الرجالة العرب الغيرة ايه المشلكة لما تدخل البيت تلاقي مرتك قرفانه تبص في وشك تقول يمكن عانة ولا حاجة ولما يجي سي مهند تلاقي اساريرها انفرجت مشذنبها انك مش شبه مهند
وايه يعني لما تنزل بوس فس صورة مهند ؟
دا حتى وادصغير عنده عشغيين سنة بس
مبروك يا باشا على الكتاب ححاول اجيبوه ب متنساش وعد الحر دين عليه التاج لازمن وحتمن ولا بدن ترد عليه
مروة السويفي
دمت بحفظ الرحمن

خمسة فضفضة يقول...

السلام عليكم ورحمة الله وبركاته

كل سنة وانت طيب يا فندم مبروك رجوعك لينا تاني
مش عارفه ايه مهند ونور دول يا اخي اللي جنوا الناس وكل ماقعد ماحد الاقيهم جايبين في سيرتهم مع ان والله لا شفت المسلسل ده ولا اعرف شكله وماسمعتش عنه الا من كلامكم عليه

يلا كل واحد عقله مريحه


سلام

ola_barakat يقول...

انا مش عارفه مهند عامل للرجاله ايه ؟
صحيح انا ماشفتش المسلسل بس شفت الكام اعلان اللي عملهم بسلامته عن السيراميك ومش عارفه ايه .. بس يعني مادام كل الستات واقعه ف دباديبه يبقي اكيد فيه حاجه مش موجوده في الرجاله العرب
بدل ما نجيب اللوم ع البنات والستات مانشوف ايه اللي ف المعلم مهند ده جذبهم لدرجه انهم بقوا مجاذيب مهند
صح ؟

ola_barakat يقول...

انا مش عارفه مهند عامل للرجاله ايه ؟
صحيح انا ماشفتش المسلسل بس شفت الكام اعلان اللي عملهم بسلامته عن السيراميك ومش عارفه ايه .. بس يعني مادام كل الستات واقعه ف دباديبه يبقي اكيد فيه حاجه مش موجوده في الرجاله العرب
بدل ما نجيب اللوم ع البنات والستات مانشوف ايه اللي ف المعلم مهند ده جذبهم لدرجه انهم بقوا مجاذيب مهند
صح ؟

ola_barakat يقول...

اشرف باشا
ممكن بقي تحطلنا صورتك ونشوف انت شبه مهند بجد ولا ايه ؟
لو طلعت شبهه صحيح يبقي ممكن تعملك كام اعلان علي انك هو ونبيع ونكسب

حمامة يقول...

هههههههههههههههههههههههه

يخرب عقلك
ايه ده يابنى والله من زمان ما ضحكت كده على حاجة قريتها

انا برضه مش اتفرجت غير على لقطات من المسلسل الخنيق ده لما سمعت عنه من العيال
بجد مهزلة انا كل ما الاقى حد من صحابي بيشوفه احتقره على طول :D

ونزلت ف منتديات موضوعات عنه والبنات فتحت الجاعوره عليه

قلة ادب وتصدير اخلاق زبالة

يلا ربنا يهدى جت عليه

مبروك على كتاب مع انها متأخره :)

أحلى حياة يقول...

ههههههههههههه

جامدة بجد D:

تخاريف خاصه! يقول...

هههههههههههههههه

مهند ده وامثاله هما اللى جايبنا ورا..

بوست مالوش حل فعلا...

أخف دم يقول...

السلام عليكم
والله تعليقاتكم بتبقى أحيانا أحلى من البوست نفسهوبابقى سعيد جدا واحنا بنختلف ونتفق فى الرأى .. باحس ان فعلا المدومة لها لزمة مش مجرد كلام بيتكتب ويتقرى.
شكرا طبعا على كل اللى اتكلم على الكتاب ويارب دايما اقدر اعمل حاجة كويسة تبسطكم زى الكتاب فى المرات الجاية.
بالنسبة للبوست
أنا مش معارض للرومانسية فى الحياة بتاتا ومش معارض ان الواحد يجيب لخطيبته أو حبيبته ورد كل ثانية مش كل يوم.. ومش معارض انها تبقى عنيه اللى بيشوف بيها ويحسها بقيمتها كل ثانية..
مش معترض أبدا على الحب والود وان حبيبتى تبقى الدنيا كلها بالنسبة لى ومهما عملت مش هاكفيها
ده كله جميل بس المشكلة ان ده يبقى فرض وان لو معملتش كده مراتى تطلقنى أو تخلعنى يعنى..
الحب لازم يكون متبادل ولازم احس بأثر عطفى عليها وحبى ليها مش بأنها تحسسنى انى لو مجبتش ورد فانا مأثر..
وبعدين مش معنى انى باعراض مهند والستات الهبلة اللى عملوا كده انى باعامل خطيبتى وحش مثلا أو انى ضد كل البنات اللى علقوا وقالوا ان مفيش رومانسية.. لا طبعا الرومانسية موجودة وكل حاجة بس لازم نقدر بعض ونحافظ على مشاعر بعض وتقدر ظروف بعض..
الحب هوه ان الاتنين يوصلوا لمرحلة انه لو مجبش ورد ليها تبقى عارفة ان ف نفسه يجيب لها ورد من غير ماتقول عشان هوه بيحبها ويخاف عليها.. وانها لو ماقالتش باحبك برضه يعرف انها بتحبه.. لازم يبقى فيه تفاهم وألفة وحب وان الاتنين يعرفوا ان الحب مش ماديات وان الواحد يبص فى عنين حبيبته بس.. مفيش شك ان ده ضرورى برضه بس لازم فيه أفعال بتبقى احسن وأفيد وانفع
عموما ربنا يلهمنا جميعا راحة البال وكل واحد يبقى سعيد مع خطيبته أو حبيبته.. دعواتى ليكم وانتوا كمان ادعولى.
أشرف

FreeKiller يقول...

ربنا يهنيك و يسعدك مع خطيبتك

:))

monnh يقول...

عارف انا كتبت لك كلام كتير قوي عن البوستات اللي انت بتكتبها وعن مسلسل نور وغيرها بس للاسف اتمسح كل ده لما النور قطع وانا بكتبلك
عموما احاول اجمع تاني اللي كتبتهولك قبل كده
اولا انا اسمي اماني
ثانيا انا بخاف ادخل علي الموقع بتاعك بجد بخاف . لانك في مرة كنت هتبقي السبب في موتي
والله العظيم انا مش بهزر انا بتكلم بجد
انا مرة قعدت اقراء البوستات بتعة ادهم صبري واميتاب ومحسن وغيرهم وكنت هموت من كتر الضحك والله ده حصل فعلا كنت بموت مش عارفه اتنفس ومش عارفه اتشاهد واخواتي مش عارفين يخلوني ابطل ضحك ازاي بموت قدامهم ومش عارفين يعملوا ليا حاجه لحد ما خدوني ودوني مكان بعيد عن الكمبيوتر بدأت اهدأشويه شويه
المهم الف مبروك علي الكتاب اللي انا لسه مش قراته علشان كده مش هقول حاجه عنه دلوقتي ثانيا ربنا يديم عليك نعمة حب الناس ليك دي والله فضل كبير من ربنا ومعناها انه بيحبك علشان كده الناس كمان بتحبك
ثالثا انا مش هتكلم عن مسلسل نور لانه راح وراحت ايامه مع ان مهند كان زي لهطة القشطة بس خلاص بقي الله يرحمه
وكل سنه وانت طيب انا مضطرة اقوم دلوقتي لان ابني صحي من النوم وهبقي ابعتلك تاني سلام

Oma يقول...

awl mra a3raf enk menazl ketab :D
bas asasy hagebo..ma3lsh ana msh matba3ak awy bas kol ma bagy hena bamshi mabsota walahy :)
el post kolo modhesh..bas sebk enta el goml el aa5ira de heya agmad 7aga :D
awl mra ashof wa7ed bey2adar el 7ob saaaa7 :D :D

Mabrok el ktaaaab

قلب أحب الأمل يقول...

ازيك يا اشرف عامل ايه
بص انا دايما بحب كتاباتك اوي وده كمان حبيت الاسلوب الههذلي اللي فيه اوي بس بجد مع احترامي لرايك إلا ان المسلسل بجد جميلجدا وماتحكمش عليه من مشهد هو فعلا جميل وهو مش مجسد الحب انه في وردتين ده بيقول لازم تكون في مشاعر حقيقيه بين المحبين مش لازم كل حب يكون ورد يعني وربنا يكرمك يارب ومبروك على الكتاب
انا مش عارفه انت فاكرني ولا لا بس انا كان بقالي فتره معتزله النت فمكنتش بشوف المدونه

نسر الشرق يقول...

انا نفسى اعرف يعنى لو عملوا مسلسل تركى فيه واحد بيضرب مرات كل يوم الصبح علقه او بقتلها مثلا
مش احسن
عشان الستات تعرف النعمه اللى معاها وتصونها
بس بلاش الموتة الرومانسيه احسن تقلب بغم يمكن الستات يفضلوها على العيشه مع الراجل ده
http://nisr-elsharq.blogspot.com/

غير معرف يقول...

اخس عليك يا ابو العيال بقه الحب فى نظرك كدا بس ... و انا اللى كنت فاكراك رومانسى ..ثم فيها ايه يعنى لما تجيب ورد للمدام ح تخسر ايه يعنى بطلو بخل بقه كل اللى بتفكرو فيه الفلوس و خلاص يا عم بلاش تقف فى طابور الورد هات ورده بلاستيك من عند عم عبدو البقال مش ح نقولك لاء ... بس يعنى حرام الضرب فى الميت حرام .. و ارمو من فى الارض يرحمكم من فى السماء ... وحسبى الله و نعم الوكيل .. و السلام ختام ..

اختك (( ام العيال ))

bobe يقول...

انا عاوزة افهم انتوا ليه متغظين قوى كده من مهند علشان هو ياعنى ذى القمر وعاملين تطلعوا القطط الفتسه فيه ياجماعه عيب بطلوا نفسنا بقى وعلى فكره المسلسل جامد موووووووووت

bobe يقول...

انا عااوزة افهم انتوا ليه متغظين قوى كده من مهند علشان هو ياعنى ذى القمر وعاملين تطلعوا فيه القطط الفتسانه ياجماعه عيب بطلوا نفسنا وعلى فكره المسلسل جامد موووووت

vamomito يقول...

ههههههه عبرت عن اللي جوايا
بجد ما استحملتش كام دقيقة على بعض

koukawy يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
مش قادره انا زمالي في الشغل بيتفرجوا علي من كتر الضحك
بس بصراحه الأخ مهند ده ملزق اوي و ماون كده و مش من الرجاله اللي يعجبوني بالمره

انا بقي ما شفتش و لا فسوه من المسلسل
مش مشهد

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه

文章 يقول...

餐飲設備 製冰機 洗碗機 咖啡機 冷凍冷藏冰箱 蒸烤箱 關島婚禮 巴里島機票 彈簧床 床墊 獨立筒床墊 乳膠床墊 床墊工廠 產後護理之家 月子中心 坐月子中心 坐月子 月子餐 銀行貸款 信用貸款 個人信貸 房屋貸款 房屋轉增貸 房貸二胎 房屋二胎 銀行二胎 土地貸款 農地貸款 情趣用品 情趣用品 腳臭 長灘島 長灘島旅遊 ssd固態硬碟 外接式硬碟 記憶體 SD記憶卡 隨身碟 SD記憶卡