اخبار

الجمعة، ٢ نوفمبر ٢٠٠٧

مرسال لحبيبتى

..حَبِيبْتِي
..شَرْطَه مَايْلَه
..فَرَاغْ
وهَاكْتُبْ لِيهْ حُرُوفْ إِسْمِكْ؟
مَا هُو انْتِي فْ قَلْبِي سَاكْنَه الْقَلْب
عَارْفَه بْقِصِّتِي وْحَالِي
ومِينْ غِيرِكْ فِي قَلْبِي اكْتُبْ لُه مِرْسَالِي؟
..و...... أَمَّا بَعْد
مَانِيشْ عَارِفْ جَوَابِي دَا جَوَابِي الكَّامْ
مَا عُدتِشْ بَاحْسِب الصّفْحَاتْ
مَا عُدتِشْ بَاحْسِب الاّقْلاَمْ
مَا عُدتِشْ بَاحْسِب اللّي ضَاعْ مِن الأَحْلاَمْ
..كِفَايَه انِّي بَاحِبِّكْ بس
..وقَلْبِكْ لَوْ بِقَلْبِي حسّ
أَوْ شَافْ حَالُه فِي بْعَادِكْ
!لَصَلَّى لْرَبُّه واسْتَغْفَرْ لِذَنْبُه...وْصَامْ
قُولِي لِي ازّايْ أَحِبِّكْ حُبّ يِرْضِيكِي؟
أَنَا تَايِهْ... وِنِفْسِي اوْصَلْ أَرَاضِيكِي
دَا لَوْ كَان الْهَوَا بِالسُّهْد
..انَا سِيدُهْ
ولَوْ قُلْتِي انّ حُبِّكْ صُوم
..أَنَا عِيدُهْ
ولَوْ حُبِّك فِدَاهْ قَلْبِي
أَقَطَّعْ قَلْبِي مِيتْ مَرَّهْ
..وَاقَدِّمْ لِكْ عَنَاقِيدُهْ
!وِبِتْقُولِي بَاحِبِّكْ لِيهْ؟
وهُوَّ الْقَلْب مِتْعَذِّبْ كِدَه بْإِيدُهْ؟
بَاحِبِّكْ... حَتَّى لَوْ بِاب الْقُبُول اتْسَدّ
وهَاتْخَيِّلْ صَدَى صُوتِي بِيَاخُدْ كِلْمِتِي وْيِرْجَعْ مَعَاه الرَّدّ
:ولَوْ قُلْتِي لِي مِيتْ مَرَّهْ
.."أَنَا عُمْرِي مَا حَبِّيتْ حَدّ"
هَازيد الْكِلْمَه مِيتْ مَرَّهْ
دِي نُقْطِةْ مَيَّه مِ الْمَطَرَهْ إِذَا فَاضِتْ
..تِهِدّ السَّدّ
وحَتَّى لَوْ فَارِقْتِينِي
..هَاحِبِّكْ فِي الْفُرَاقْ بَرْضُهْ
هَوَاكِي فْ قَلْبِي لَوْ شُفْتِيهْ
..نَوَافْلُه وْسُنِّتُه وْفَرْضُهْ
وحُبِّكْ أَرْضُه
لَوْ تِنْسِيهْ... هَيِنْسَى ازّايْ حَنِينْ أَرْضُهْ؟
ويَامَا فْ نِفْسِي
يَامَا فْ نِفْسِي
تِيجِي لْقَلْبِي وِتْحِنِّي
..ولاَزِمْ تِعْرَفِي إِنِّي
..لاَ انَا عَفْرِيتْ وَلاَ جِنِّي
..بَاحِبِّكْ... بَسّ إِيدِي اقْصَرْ كِتِيرْ مِنِّي
فَمِشْ هَاْقدَرْ
أَجِيبْ لِكْ مِ الدَّهَبْ كَفَّهْ
وَاجِيبْ لِكْ مِ اليَاقُوتْ كَفَّهْ
ومِشْ هَاْقدَرْ
أِجِيب الْوَالِي فِي الزَّفَّهْ
ومِشْ هَاْقدَرْ
أَجِيبْ لِكْ بِيتْ
يِمُوت الْقَطْر لَوْ لَفّ فْ حِمَاه لَفَّهْ
كِفَايَه انِّي بَاحِبِّكْ مُوتْ
وحُبّ النَّاسْ نَدَامَه وْعَارْ
وحُبِّي عَكْسهُمْ عِفَّهْ
ولَوْ تِرْضِي فَعَنْدِي شْرُوطْ
أَنَا طَبْعاً بَاحِبِّكْ مُوتْ
ولَكِنْ بَرْضُه لِيَّه شْرُوطْ
أَنَا عَايْزِكْ تِكُونِي فِي الْوَرِيدْ دَمُّهْ
وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشي
وعَايِزْ رِمْشِك الْجَارِحْ
صِرَاطْ يِجْرَحْ فُؤَادْ غِيرِي مَايِرْحَمْشِي
وَانَااجِيلِك
أَعَدِّي فُوقْ صِرَاطْ رِمْشِكْ... وَلاَ اخَافْشِي
وحَتَّى لَوْ وِقِعْت فْ يُومْ مِن الْخَضَّهْ
أَقَعْ فِي عْينِيكِي وَاتْوَضَّا
وَاصَلِّي رَكْعِتِينْ لله
وَابُوسْ نِنّ الْعِينِينْ
..وَامْشِي
لاَ انَا طَمَّاعْ
وَلاَ فْ طَبْعِي الأَنَانِيَّهْ
بَاحِبِّكْ
وانْتِي انَا طَبْعاً
ومَا اسْمَحْشِي لِحَدّ يْكُونْ شِرِيكْ فِيَّهْ
وقَبْل مَا يِخْلَص الْمِرْسَالْ
:بَاعِتْ لِكْ مِنْ عِينَيَّه سُؤَالْ
وهُوَّ الْحُبّ كَانْ عِيبَهْ؟
ولَوْ مَرَّهْ حِلِمْت بْضِحْكِتِكْ فِي النُّومْ
عَلَيَّهْ تِتْحَسَبْ غِيبَهْ؟
وفِي الآَخِرْ
بَاعِتْ لِكْ وَيَّا مِرْسَالِي الْجِدِيدْ أَحْلاَمْ
بَلاَشْ تِرْمِيهَا كَالْعَادَه مِنَ اعْلَى الْبُرْجْ
وِخَايِفْ يِبْقَى مِرْسَالِي نِهَايْتُهْ زَيّ أَجْدَادُهْ
!فِي قَلْب الدُّرْجْ
جَنَايِنْ قَلْبِي رَاحْ تِفْضَلْ ولَوْ طَال الْبِعَادْ فَاتْحَهْ
بَاحِبـِّــكْ
قُلْتهَا بِالْكَسْرَهْ
!!!نِفْسِي اسْمَعْهَا بِالْفَتْحَهْ
من ديوان مرسال لحبيبتى للشاعر أشرف توفيق

هناك ٥٦ تعليقًا:

Unknown يقول...

ياسلام ع الفتحة والضمة والكسرة والحركات دى ههههههههههه

ممتاز كالعادة يا استاذنا

وابقوا افتكروا الجمايل دى
:D

aya يقول...

الله يا عمنا
بجد الله ينور عليك كده
حلوة اوى لدرجة مؤلمة
واحساسها عالى لدجة الحسرة
حسرة علينا حسرة علينا
وعلى راى ممثل ما مش فاكراه:
جتنا نيلة فى حظنا الهباب

بجد حلوة اوىىىىى

تسلم يا رب

لو بطلنا نحلم نموت يقول...

ايه ده يا عم الشااااعر
بركاااااااااااتك بقه
وشد حيلك
عايزين نسخسخ

ياريت تزور البلوج بتاعي
اوك
http://hakawyna.blogspot.com/

mano يقول...

الله على كلامك بجد احساسك فوق الوصف بس عشان طالع من القلب دايما بيوصل احساسه لكل قلب يقدر يميز ايه هو معنى الحب صح قُولِي لِي ازّايْ أَحِبِّكْ حُبّ يِرْضِيكِي؟
أَنَا تَايِهْ... وِنِفْسِي اوْصَلْ أَرَاضِيكِي
دَا لَوْ كَان الْهَوَا بِالسُّهْد
..انَا سِيدُهْ
ولَوْ قُلْتِي انّ حُبِّكْ صُوم
..أَنَا عِيدُهْ
ولَوْ حُبِّك فِدَاهْ قَلْبِي
أَقَطَّعْ قَلْبِي مِيتْ مَرَّهْ
..وَاقَدِّمْ لِكْ عَنَاقِيدُهْ بجد هايل يا اشرف

WhItE HeArT يقول...

الواحد مش عارف يقول ايه بجد انا بعد


أَعَدِّي فُوقْ صِرَاطْ رِمْشِكْ... وَلاَ اخَافْشِي
وحَتَّى لَوْ وِقِعْت فْ يُومْ مِن الْخَضَّهْ
أَقَعْ فِي عْينِيكِي وَاتْوَضَّا
وَاصَلِّي رَكْعِتِينْ لله
وَابُوسْ نِنّ الْعِينِينْ
..وَامْشِي

مقدرش اقول غير انك استاااذ بجد وربنا يوفقك

رينـــــــــــا يقول...

السلام عليكم
يبختها :D:D:D

غير معرف يقول...

أَنَا طَبْعاً بَاحِبِّكْ مُوتْ
ولَكِنْ بَرْضُه لِيَّه شْرُوطْ
أَنَا عَايْزِكْ تِكُونِي فِي الْوَرِيدْ دَمُّهْ
وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشي

بحبك قلتها بالكسرة نفسي اسمعها بالفتحة
الله عليك يا اشرف كالعادة مبدع
واقل وصف ممكن اقوله عنك انك شاااااااااااااعر كبيييييييييييير قووووي

jomana يقول...

استاذ اشرف هو انت لما بتكتب بتستعمل نفس حروف الابجدية الي بنعرفها انا رايي انه اكيد لا
رائع متل العادة يا كبير
بالتوفيق دايما
سلااام

vision يقول...

جميله اوى اوى ...ايوه كده وحشنى الشعر بتاعك

غير معرف يقول...

من زمان وأنا باتمنى القصيدة دى تبقى ليا..تقولهالى لوحدى.. وأنا هاحطك بين رموشى كمان من غير ما تقول.. وجايز ربنا يكتب لى انك تكتب احسن منها ليا برضه
الله أعلم
ربنا يحميك

غير معرف يقول...

السلام عليكم ورحمه الله وبركاتة
أخى فى الله أشرف أنا من متابعين مدونة حضرتك من فترة طويلة وبتعجبنى قوى كل حاجة حضرتك بتكتبها لكن مع الأسف القصيدة دى معجبتنيش مع أن فيها معانى حلوة لكن مش عارفة حاسة أنها مش واقعية
الحب إللى حضرتك بتتكلم عنة فى القصيدة أشبة بالحب إللى فى الرويات الرومانسية لكن معتقدش أبدا أنة موجود زية فى الواقع

وخاصة أن واقعنا دلوقتى أصبح مر قوى


دلوقتى لو شاب حب واحدة وهى لم
تبادلة نفس المشاعر أكيد هيدور على واحدة تانية ومش هيفضل يبعت جوابات وأكيد هينسى الحب دة
معلش ممكن يكون كلامى دايق حضرتك لكنى معذرة بعبر عن أن إللى أنا حاسة بية
جزاك الله خيرا ورزقك الله الفردوس الأعلى من الجنة
أختك فى الله
أبرار

تخاريف خاصه! يقول...

كلماتك اكثر من رائعه..وحوارك فى المرسال..معبر جدا عن احاسيس رقيقه..




بحبك قلتها بالكسرة نفسي اسمعها بالفتحة


احلى ختام
...سلمت يداك..
سعدت باكتشاف مدونه حضرتك..

أميرة يقول...

اشرف باشا

انا مش هقولك يافنان ولا روعة ولا هايل ولا كل دة عشان انت عارف قدر نفسك كويس

انا هقولك حاجة واحدة بس ربنا يوفقك عشان انت تستاهل

اللى بيكتب الكلامد دة يستاهل اكبر نجاح

عجبنى اوى الروح الدينية فى القصيدة فى تشبيهات ومعانى مختلفة وجديدة

باختصار انا ادمنت شعرك

ريحانة يقول...

أول مرة أعلق لحضرتك على قصيدة برغم انى قريتهم كلهم
ومتابعة كمان
بجد تسلم ايدك
ولو ان شروطك فى الحب ليها مش عليها
تسبم ياستاذنا

غير معرف يقول...

وفِي الآَخِرْ
بَاعِتْ لِكْ وَيَّا مِرْسَالِي الْجِدِيدْ أَحْلاَمْ
بَلاَشْ تِرْمِيهَا كَالْعَادَه مِنَ اعْلَى الْبُرْجْ
وِخَايِفْ يِبْقَى مِرْسَالِي نِهَايْتُهْ زَيّ أَجْدَادُهْ
!فِي قَلْب الدُّرْجْ

جامدة اوى الحتة دى يا اشرف بس باين كدة انها فعلا بتبقى ذكريات فى قلب الدرج وحدش بيفتكرها حتى الا لو الدرج اتفتح بظروفها

WhatEver?!!! يقول...

مش هقدر اقولك شكرا ولا تحفة
لانة بجد فوق الوصف

مش عارفة لية عنيا بالدمع اتملت
وحسيت اوى بالضعف

تحياتى

rosealia29 يقول...

رااائع بجد .. ماشاء الله عليك .. الكلام مناسب و سهل في ايديك .. و إحساسك بين الحروف أسرع من الحروف نفسها .. بجد جميلة جدا جدا .. و معرفتش أختار أجمل مقطع عجبني لأن كلها على بعضها عجبتني جدا ..

تسجيل إعجاب بمدونتك ياأشرف .. و بالبوست .. ولو عايزة الديوان بتاعك أعمل ايه ؟؟


دمت ..،،

فوكيره يقول...

مش جديد على سكان المعادى العبقريه
دي

وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشي
وعَايِزْ رِمْشِك الْجَارِحْ
صِرَاطْ يِجْرَحْ فُؤَادْ غِيرِي مَايِرْحَمْشِي
وَانَااجِيلِك
أَعَدِّي فُوقْ صِرَاطْ رِمْشِكْ... وَلاَ اخَافْشِي
وحَتَّى لَوْ وِقِعْت فْ يُومْ مِن الْخَضَّهْ

كان لازم ادخل اقولك يا استاذى

انا عايزه الديوان ده ...

Unknown يقول...

طبعا انت مش محتاج اني اقولك انها بجد تحفه

ماشاء الله عليك حقيقي يااشرف

ومسيرك تسمعها بالفتحه ياسيدي(:

رائعه بجد

ساعه الغروب يقول...

انت عارف انا قريت البوست دا كام مره؟

مش عارفه بجد احصرهم

بس فى ولا مره دلخت على التعليقات
ما هو اصلى هدخل اقول ايه؟؟

هقول حلو ومش ممكن ومش لاقيه كلام اقوله كالعاده

!!!!!!!!!!!!!!1

طيب نعمل ايه بس ما هو بجد القصيده حلوه اوى وصادقه اوى وعميقه اوى اوى اوى

قلت هقتبس كام جمله اقولك دول بجد عجبونى وكنت فاكراهم ولماوصلت لاخر القصيده لقيتنى مش عارفه اتكل ولا اقول ولا كلمه وكل مره اقول هقراها مش للاخر عشان اعرف ارد وما اقدرش برضو
انت عارف انا بعلق النهارده ليه لانى دخلت على الكومنت من غير ما اقراها وهقراها وانا خارجه
ههههههههههههه

ربنا يديم النعمه دى عليك فعلا ويا رب كدا تبقى مسكت كل كلامنا بكلماتك الى الابد

:)

شكرا ليك جدا بجد على اثراء عقولنا بالكلمات دى

ساعه الغروب يقول...

عارف فيه ملحوظه غريبه اوى لقيتها بتتكرر كل مره لما اقرا الكلمات

انه الكلمات الى انت كاتبها وانت بتقراها بتقلى يعنى مش بتتقال كدا لا
دى بتتقال بالقاء

انت متخيل دا؟
يمكن ما تحسوش زى ما اان حساه
اصلى كتير كنت بحاول انى اتدرب على الالقاء وكل مره كنت مش بنجح فيه

بس بجد هنا مش عارفه ليه حسانى بعرف القى مووووووووووت
انت حد فنان اووووووووى فى تصييغ الكلمه

ما شاء الله يعنى
وبلا حسد

هههههههههههه
سورى انى جيت تانى اعلق بس بجد ما قدرتش اصلى قرتها 3 مرات وانا خارجه زى ما قلت لك

هههههههههه

أخف دم يقول...

السلام عليكم
ربنا ما يحرمنى منكم على كلامك الجميل ده .. ويارب كل القصايد اللى فاتت واللى جاية تعجبكم
بالنسبة للأخت أبرار
والله الحب موجود يا أبرار.. احنا بس أحيانا فى زحمة الدنيا بننسى .. ومن خلال تجارب شخصية بسيطة ممكن نحكم على الحب ككيان كامل وده غلط .. زى ما فيه علاقات فاشلة وحب مبيكملش .. فيه حب بيكمل ومشاعر صادقة واحسن من دى كتير..
أنا مش باقول من فراغ أنا اعرف تجارب شخصية كتير فى نفس الحالة ويمكن يكون حبهم أكتر وأعمق من كل كلامى والحمد لله تطور الحب لعلاقة كاملة وجواز واطفال عايشين فى حب..
ممكن تقولى ده قليل .. بس ده قليل من وجهة نظرك ومن خلال تجاربك .. انما من وجهة نظر تانية ده موجود وكتير .. كل اللى علينا اننا نحاول نختار صح وان الحب يملا حياتنا بمفهومه الواسع مش شرط حب الحبيب لحبيبة .. انما حب الدنيا والناس وكل اللى فيها .. ساعتها صدقينى هتلاقى الحب اللى لا اشرف ولا غيره يعرف يوصفه
الأخت العزيزة غير المعرفة
لو هيسعدك ان القصيدة ليكى .. فاعتبرى ان القصيدة ليكى بجد .. وربنا يسعدك كمان وكمان
وإلى الجميع
لازم نعرف ان الحب لازم يكون متبادل.. يعنى الحبيب عمره ما هيقول كلام زى ده إلا إذا كانت حبيبته تستاهل زى ده وأكتر وانها مقدرة تضحياته وحبه ليها..
وانها بتعامله بنفس المنطق من الإيثار والعطف والحب والاحتواء
ربنا يملا قلوبكم جميعا بالحب والمودة
ومرسال لحبيبتى إهداء ليكم جميعا
يا أحلى ناس

غير معرف يقول...

دي أول مرة أدخل البلوج بتاعك يا أستاذ أشرف.. بصراحة جميل أوي وأشعارك أجمل
الكلام الخارج من قلب بيوصل للقلوب على طول.. ع العموم انا بستأذنك لما اعدل في البلوج بتاعي اني احط لينك مدونتك.. ليا الشرف ولك الخيار
في الآخر سلمت اليد التي كتبت والقلب الذي عبر والشخص اللي بيقرا برضه

عمر أفندى و أبووه يقول...

تسلم ايديك و مستنيك تشرفنى فى مدونتى و تتابع معايا قصة حب عمر افندى ذو الخمسة عشر شهرا

www.omarafandy.com

Lobna Ahmed Nour يقول...

كلمات رائعة

تحياتي

غير معرف يقول...

bgad gameeeeeeeeeeeeeeeeeeeel moooooooooot eshe3r da
s3 awlan wa sanyan ana awl marra ad7'ol 3ala elblog bta3k bas 3agabny moot
lo kan elmersal da lwa7da bt7bha fe3lan fama2drasha a2ol 3'er ya ba7'taha beek (allahom la 7asad
) we enkan mn wa7y 7'ayalk farabnna yorzo2ak bwa7da t7bha kda we hya tbadlak nafs elmasha3r 3alashan el7ob hayb2a a7la bkteer lamma ykon motabadl maykonsh mn taraf wa7ed
ana asfaa 3ala eletala bas bgad 3agabny awy elpost we la2eet nafsy bkteb comment
s3 for the second time

اميرة الرومانسيه يقول...

بجد بلوج فى منتهى الجمال والله مش هزار
بجد اكتر من رائع وكلام فى احساس عالى
دليل على حب كبير
ربنا يوفقك
عاوزين اكتر من الكلام الجامد دا
تقبل تحياتى
اميره الرومانسيه

شقاوة شعب يقول...

رااااااااااااااااااائعة

انت نزلت ديوان على شكل كاتبا ولا لسا

طب لو لسا ماتتأخرش اكتر من كدة


تحياتى
شيماء

غير معرف يقول...

فعلا احسنت

غير معرف يقول...

فعلا احسنت

Diyaa' يقول...

جميلة أوي طبعاً
وعلي فكرة ..من الممكن يتعمل كوبي
لما بيتفتح خانة التعليق..وإظهار الرسالة الأصلية..تقدر تاخد كوبي
جرب بنفسك

رشا عبد الرازق يقول...

قلي يا احمد ديوانك نازل عن دار ايه ؟
وليك دواوين تاني ؟
وقولي كمان
أنا إزاي وبأي منطق مقريتلكش قبل كده ؟؟؟؟؟!!! :(


عارف ............
عايزه أسقفلك سقفة عيل صغير فرحان بـ ( حتة حاجه حلوه أد البندقه ...! )وقعتله زي تلجايه باره في عز الحر ... حلت أجوائه .... وفرحته !!
والسقفه هنا لازم كلام
والكلام مش هيعرفش يكون كده ثلج
والدنيا حر
بس الزهق منحاش !


جمييييييييييييل إن الأرق ياخدني لكلام فنان .... يبعتر نفسه جوا الواحد فيكتشف انه كلام انسان .....بس بيعرف يحكي الجمال ....زي ما هو ببساطة !

الله ينور عليك :)

غير معرف يقول...

ما شا ء الله بجد
حلو اوي اوي اوي
بجد انا مش قدرة اوصفلك انا عجبتني قد ايه:)
تسلم ايديك

Abdullah Hafez يقول...

جميله جدا بسم الله مشاءلله والله فعلا
جميله جاد جدا جدا
و احساسها عالي جدا و يارب نسمع منك واحدة زيها قريب
و مبورك على الكتاب و الديوان
التنين عندى طبعا
يلا سلاميما

غير معرف يقول...

روعة جدا" تسلم ايدك بجد تحفة روعة

غير معرف يقول...

انا سندريلا بجد حلوة اوى وطبعا قصيده اقولك شعر اللى حافظها صم يارب تكون لسه فاكرنى

غير معرف يقول...

بجد جميلة جدا جدا جدااااااااا

الله عليك ^_^

سكندري يقول...

ايه ده كله ايه ده كله
بجد رائعة
كلام جميل

someone يقول...

فوق الوصف !

مش ببالغ لو قلت أفضل ما سمعت ,
بعد ما غناها مسار إجبارى أقصد
:)

إلى الأمام

رومانسيــــــة يقول...

الللللللله عليك ياشاعر كلمات واحساس ومشاعر بجد مفتقدينهم ماشاء الله عليك مش عارفه اقول ايه بصراحه
ربنا يوفقك ويزيدك

آية فاروق يقول...

بجد جميله اووووووى ونهايه ولا اروع
حبيت كتابتك جدا وان شاء الله دايما اتباعك
:)

آية فاروق يقول...

بجد بجد جميـــــــــله وكمان القفله جامده
:)

غير معرف يقول...

أنا من عشاق الشعر بس طول عمري محصوره مابين نزارقباني وجويده والأبنودي وبعض أشعار الجاهليه _بس بجد بعترف أنك فنان ومش أقل منهم بالعكس أنت لامس إحساسنا أوي،أحيك أنت والفنان علي الهلباوي

عبد الرحمن سالم يقول...

عبقرية !

ككلمات، وكغناء مسار اجباري .. رائع ! .. !

Hazem Fekry يقول...

روووووووعههههههه
احلى كلام سمعته فى الحب
بجد لازم حضرتك تكتب شعر كتير

غير معرف يقول...

بتلمس قلبي كل مرة أقراها أو أسمعها بصوت مسار إجباري

Unknown يقول...

جميله قوي ياشرف ورغم طولها اللي مخليها ملحمه الا انها متناسقه ومتميزه

غير معرف يقول...

لا والله فيه لسه ، أسأل الله أن يجمعني مع من أحب على ما يحب الله ويرضى

غير معرف يقول...

بجد رووووووووووووووووووووعه مفيش كلام يقدر يوصف اعجابى بيك نفسى اقرا الديوان كامل من فضلك ....
أَنَا عَايْزِكْ تِكُونِي فِي الْوَرِيدْ دَمُّهْ
وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشى******
*****
جننى الجزء دا بجد

Unknown يقول...

بجد رووووووووووووووووووووعه مفيش كلام يقدر يوصف اعجابى بيك نفسى اقرا الديوان كامل من فضلك ....
أَنَا عَايْزِكْ تِكُونِي فِي الْوَرِيدْ دَمُّهْ
وِتِبْقِي فْ عَقْلِي انَا هَمُّهْ
وِتِبْقِي وَرْد جُوَّا الْقَلْب
غِيرِي يْشُوفُه يِتْحَسَّرْ... وَلاَ يْشِمُّهْ
وعايزك تفهميني لو كلامي طلّ من رمشى******
*****
جننى الجزء دا بجد

rana يقول...

ان النظافة كنزلا يفنى ولكن البعض منا لا يدرك معنى تلك الكلمة ويستهون بالنظافة لكنة لا يعلم ماذا يمكنها ان تفعل وكيف تجلب لنا الامراض ان اانسان عادتا لا يطيق العيش فى مكان متسخ غير نظيف ذلك بالاضافة الى ان الاماكن التى يكثر بها الاوساخ والقازورات تكون اكثر الاماكن التى تنتشر بها الجراثيم والفطريات والفيروسات وبالتالى تجلب العديد من الامراض التى لا حصر لها ولتفادى تلك الامراض بجب المحافظة على النظافةباستمرار وذلك للمحافظة على صحتكم وصحة اسرتكم بل وصحة مجتمعكم اجمع ولذلك تقدم لكم شركة تنظيف بالدمام الحل الامثل الذى يخلصكم من عناء التنظيف فنحن نقوم بتنظيف كافة انواع المنازل والقصور والشركات والمساجد والفلل والمستشفيات ولدينا معدات خاصة بكافة انواع التنظيف بالاضافة الا ان منظفات الشركة منظفات عالمية وغير ضاره بالصحة للكبار والصغار وذلك لانها حاصله على شهادة الصحة ولاننا نعمل دائما على راحتكم قامت الشركة بفتح افرع للنظافة فى كافة انحاء المملكة واليكم بعض افرع الشركة شركة تنظيف بالجبيلوشركة تنظيف بالخبروان شركتنا ليست مختصة فى مجالات النظافة فقط بل اننا لنا فروع اخرى لمكافحة الحشرات وابادتها والقضاء عليها نهائيا دون راجعه مره اخرى الى المنزل فمع شركتنا شركة مكافحة حشرات بالاحساءوفرعها شركة رش مبيدات بالاحساء قولوا وداعا لرؤية الحشرات مره اخرى فنحن لدينا اقوى المبيدات الامنه والفعاله للقضاء على كافة انواع الحشرات وطردها نهائيا من المنزل
للاتصال وطلب الخدمة
جوال رقم 0536010460

rana يقول...

اذا كنتم تعانون من تسربات المياه ولم تجدوا الحل حتى الان قوموا بالتواصل مع شركتنا شركة كشف تسربات المياه بالدمامفنحن شركة تمتاز بالعديد من المزايا فالشركة تمتاز بوجود احدث الاجهزة التى تستخدم فى الشكف على تسربات المياه دون تكسير بالاضافة الى احدث اجهزة اجهزة معالجة تسربات المياه وكما يوجد لدنيا خبراء مختصون فى كشف تسربات ومعالجتها فى الحال بالاضافة الا ان الشركة لديها فروع متعددة فى جميع انحاء المملكة العربية السعودية مثل شركة كشف تسربات المياه بالاحساء وشركة كشف تسربات المياه بالخبر
ان للنظافة قواعد واساسيات اثناء التنظيف فعمليات النظافةتحتاج الى عمال مختصون فى كافة اعمال التنظيف ولذلك فنحن لدينا فروع تنظيف شركة تنظيف بالاحساء وشركة تنظيف منازل بالخبر ولدينا عمال مختصون ومدربون واحدث الاجهزة والادوات والماكينات وهذة ليست اختصاصات الشركة فقط بل نحن لدينا روع اخرى فى كافة انواع تسليك المجارى والصرف الصحى شركة تسليك مجارى بالدمام شركة تسليك مجارى بالخبر
للاستفسار وطلب الخدمة
جوال رقم 0558973863

شوقي عوض يقول...

شركة تنظيف بالقطيف
شركة تنظيف بالجبيل

شركة تسويق الكترونى يقول...

• شركة نقل عفش بجدة:
إذا كنت ترغب في الانتقال من مكان لآخر ولديك تخوفات بشأن الحفاظ على محتويات العفش والأثاث الخاص بك لا تقلق لأن شركة نقل عفش بجدةسوف تتولى هذا الأمر وهنا يكون عليك أن تقوم بعمل اتصال هاتفي تطلب فيه الخدمات التي ترغب في الحصول عليها من الشركة كما يمكنك أن تسأل عن تفاصيل الخدمة وعروض الأسعار التي تقدمها الشركة وبعدها سوف تجد فريق من العمال والفنيين في المكان المطلوب والوقت الذي تم الاتفاق عليها وهنا تبدأ أعمال الفك والتركيب والتغليف والنقل حتى يتم نقل كل القطع المطلوبة بشكل سريع وآمن ويتم التأكد من إعادة كافة القطع كما كانت بعد عملية الفك والتخلص من مواد التغليف ويمكنك أيضا الحصول على أسعار مناسبة جدا للخدمات التي تقدمها الشركة للعملاء وبذلك تكون قد حصلت على خدمات مضمونة ومتميزة وسرعة في العمل وكل ذلك بأسعار مميزة لأن حصول العميل على الخدمات الرائعة هو الهدف الأساسي.
شركة نقل عفش بجدة
أرخص شركة نقل عفش بجدة
شركة نقل عفش بجدة رخيصة
شركة تخزين عفش بجدة
شركة نقل أثاث بجدة
أفضل شركة نقل عفش بجدة

خدمات منزليه يقول...

شركة الصفرات لمكافحة الحشرات بالرياض
شركة الصفرات لرش المبيدات بالرياض

Unknown يقول...

رائعة، منتهى الإحساس، يا جمال الصوت والمهن