اخبار

الأربعاء، ٢٦ سبتمبر ٢٠٠٧

يا عينى يا عينى .. عينى ع الولد


رمضان كريم عليكم جميعا وكل سنة وانتوا طيبين
أنا اعرف ان واحد يلطُش واحد قلمين.. يعمل له مَحضر..أو واحد يكتب على وشّ واحد للذكرى الخالدة بالمطوَة يروح برضُه يعمل مَحضر..أو ان انا معرفش ادفع إيجار الشقة كمان كام يوم فصاحب العمارة يعمل لى مَحضر.. ده كله ماشى.. انَّما فيه حدَ يعمل مَحضر فى رئيس الجمهورية؟؟؟ الراجل الكبير؟؟؟هيه الدنيا جرى فيها ايه؟؟ الفرخة كلت بيضها؟؟وعلى يد مُحضَر كمان؟؟؟ومش مَحضر واحد دول اتنين..هيد أندشولدرز يعنى..يعمل مَحضَر وعلى يدّ مُحضَر فى آنٍ واحد
الحكاية الأولى ان فيه محامى أقصد كان فيه محامى قدم بلاغ فى سيادة الريس عشان هوه اتعذب فى السجن من تسع ست سنين كده المحامى اللى اتعذب مش الريس طبعا والريس معملش حاجة ولا خاصم الظباط حتى والبلاغ ده يوصل للريس على يدّ مُحضَر
والحكاية التانية ان فيه شاب ييييييييه أقصد كان فيه شاب من سوهاج راح يعمل محضر فى الريس عشان هوه مش لاقى شغل الواد طبعا اللى مش لاقى شغل مش الريس والحالة صعبة ومش عارف يتجوز المُزَّة اللى بيحبها وبحمد الله وتوفيقه وبمجهود خرافى من جهات عديدة الواد مرجعش لأهله من حوالى سنة ونص
طب الناس دى مش اتعلمت فى مدارس برضه؟؟ يعنى أكيد مرّ عليهم فى الرياضيات المسألة اللى بتقول بما أن فيه بلاغ فى الريس إذن فيه سلخ إن شاء الله.. وأكيد درسوا فى الفيزيا قاعدة النفخ فى الجلود المستطرقة.ودرسوا فى الأحياء إن كل إنسان له عمر افتراضى.ودرسوا فى الكيميا معادلة ان ميّة النار بتعمل طششش وهيه نازلة على الجلد بس لازم عامل مساعد وأكيد البلاغ ده العامل المساعد،وأكيد درسوا فى التاريخ مذبحة المماليك والرُّوس اللى اتعلقت على باب زويلة،وعرفوا من الجغرافيا ان المحصول الرئيسى للتصدير فى مصر هيه العُصْيان..ومادام هما فعلوا الفعل ده فأكيد درسوا فى اللغة العربية ان دايما الفاعل مرفووووع، والقاعدة الأولى فى الإنجليزى ان كًسْر أبدين إز فيرى دِنْجِرَس وعهد الله
طب البلاغ ده آخرته إيه؟؟ يعنى مثلا البوكس ممكن يروح الساعة تلاتة الفجر قصر عابدين؟؟؟
أنا مش زعلان على الاتنين دول.. أنا زعلان على الراجل المُحضَر الغلبان اللى راح بالمَحضَر لقصر عابدين!! تصوروا بقى راجل غلبان مُحضَر لابس البتاعة اللى كانت مغطية دراع الموظفين أيام زمان دى ونازل من على العَجَلة بتاعته قدام قصر عابدين ده لو افترضنا انه هيعرف يقرب ورَكَن العَجَلة على اقرب كُشْك حراسة وقعد يخبَّط على البوابة يا ساااااااتر.. يا جماعة ياللى هناااا.. طبعا بعد الخبْط هيطلع واحد من الحرس فيه إيه ياجدع انت؟؟ يردّ عليه بألاطة الموظفين: فيه هنا مَحضر جاى للمدعو..... استنى أما اشوف لمين..يلبس النضارة كعب الكُبَّاية بس الحارس يزعق له امشى ياجدع انت ده قصر الريس مبارك.. يرد الموظف : مبارك مين ياجدع انت؟؟ ده مش الاسم اللى عندى.. اللى عندى أوّل اسمُه محمد.. الحارس بعد صبر طب هات أمضِيلك على المُحضر.. يرفض الموظف ويقول بألاطة ما ينفعش يا حَضْرة.. لازم الأستاذ محمد بنفسه ييجى يستلم المَحضَر ويمضى .. ده نظام حكومة يا أستاذ مش لعب عيال
طب اللى انا اعرفه ان اللى بيتعمل فيه مَحضر بيروح القِسم .. طب الريِّس هيروح القسم؟؟ بس أكيد هيدهنوا القسم قبلها ويحطوا شوية ورد على قفا كل مسجون ويصرفولهم مكافأة خمس سنين سجن
أيوة أنا عارف الكلام بتاع ان الريس مواطن مصرى زينا ومن حقنا نعمل فيه محضر عادى وده حق يكفله الدستور وتحيا الوحدة العربية والعنب العنب وكل الكلام الجميل ده
بس ده الريس يا حدعاااااااان
وعارف ان لجنة حقوق الإنسان ولجنة الحريات وحركة ماينفعش الكلام ده وحركة لا والله ينفع وحركة سيب اللى ف إيدك وحركة معا ضد العُصيان وحركة رجال ضد السلخ والنفخ وأغنية اضربنى بالقلم وابعد عنى العصاية .. كل دول أثبتوا ان فيه تعذيب فى السجون
بس ده الريس يا جدعاااااان
وعارف ان فيه ناس هتقول ان الجبن مش طبعنا ولازم نقاوم ولازم مانخافش وما نتكسفش وعلى رأى المثل اللى يتكسف من بنت عمه، مايحدفش الناس بالطوب وحان وقت الثورة على الظلم وحان الآن آذان المغرب حسب التوقيت المحلى لمدينة القاهرة، أنا عارف الكلام ده كله
بس ده الريس يا جدعاااااااااان
أبسلوتلى
طب المحامى والشاب دول مش عارفين نتيجة فعلتهم الشنيعة؟؟؟ إذا كانوا مش خايفين على نفسهم طب يخافوا على المُحضَر الغلبان اللى خد المَحضَر.. وللا رئيس المحكمة اللى مَضَى على الأمر.. وللا وزير العدل اللى تبعه المحكمة .. وللا الناس اللى عرفت الخبر .. وللا أنا ياللى نشرت الخبر.. وللا انتوا ياللى قريتوا الخبر
وكمان بتضحكوا على كلامى اللى فيه سيرة الريس؟؟؟
دانتوا هتتسلخوا وتتعلق صوركم فى بانَرات على كل المدونات زى بانَر مصر مش كده .. وهيبقى اسم البانر مصر كده واللى مش عاجبُه والخلفية صورة بحر كبير عشان نشرب منه وانا ياللى كنت هادى وطيب وغلبان وأقدس الحياة الزوجية وأشارك فى الأثاث احتمال بعد ما نشرت الخبر يغيّروا اسم المدونة ويشيلوا كلمة أخفَ من العنوان
طب احنا ذنبنا ايه؟؟
ولذلك أنا من هذا المزنق أحب اوجه نداء لكل الأخوة حماة الوطن اللى متابعين المدونات بأننى بالأصالة عن نفسى وبالنيابة عن كل البلوجرية الغلبانيين مالناش أى صلة بالبلاغات الكيدية المقدَّمة فى الريِّس.. ومفيش تعذيب.. والمية تمام وبتنزل من الحنفية بطعم المانجة والفراولة..واحنا من كتر الشغل شغالين أكتر من شغلانة فى اليوم الواحد رغم اننا مش محتاجين فلوس الشغل لأن الأسعار فى الأرض بس هتعملوا إيه معانا بقى؟؟ شعب بيحب يكنز فلوس على قلبه وخلاص
أما بالنسبة للأخوة .. لأ مش أخوة .. الناس اللى عملوا المحاضر.. فلو كنتوا عايشين يبقى وقوع البلا اهون من انتظاره
وان كنتوا ميتين يبقى مادايم إلا وجه الله وانتم السابقون نحن اللاحقون
وان كنتوا مفقودين يبقى لازم نلبس كلنا أديداس
وكل ما افتكر الخبرين دول افتكر اللمبى وهوه قاعد يشرح لبنت الظابط رياض باشا المنفلوطى ازاى عمه سرق شقته
قام الواد الصغير عمل بلاغ فى عمو الكبير.. تفتكرى الصغير ده يبقى إيه؟؟؟
:قالت له ببراءة
!!دا يبقى حمار حضرتك

هناك ٤٠ تعليقًا:

Alexandrian far away يقول...

هاهاهاهاهاهاهاها
حرام عليك
فرجت المكتب عليا وأنا بأضحك
رغم أنه ضحك يوجع
ألا صحيح هو الأخ ألى راح يعمل محضر ده مافيش حد سال عليه؟
ولا كل ما حد يسال عليه ما يرجعش برضه؟
سؤال مهم

تحياتي على المدونه العسل دي
أنا لاجىء عندك

حسام مراد يقول...

هههههههههههههههههههههه

ايه يا عم اللى انت كاتبه ده كفايه
وانت نهتها بكلمه لاباشا المنفلوطى الجامده

وزى ما قلت الفاعل مرفوع

تحياتى ليك
كل سنه وانت طيب
رمضان كريم
شغال

beroo يقول...

لا بجد والله ربنا معاهم ويصبرهم علي مابلاهم بس بصراحه هما الي غلطانين يعني مين الغلطان القطر ولا اللي يوقف قدامه بس بعيد عن الموضوع والالم النفسي اللي سببهولي وهيستريا من الضحك علي فكاهتك الساخره انت فعلا اسلوبك في الكتابه رائع ورغم انك بتتكلم عن موضوع جدي الا انك لازلت اخف دم
بيرو

فوكيره يقول...

ههههههههههههههههههه

بوست هلاك كـالعاده يا استاذنا

بس عارف فيه مشكله بجد كبيره اوى

اننا حتى مش قادرين نصدق

يعنى ولنفرض كده يعنى صحينا الصبح لقينا الاوضاع اتغيرت والحكومه تابت يعنى
مش حنصدق يا استاذ اشرف ... لا هما عارفين ينفذوا العدل ولا احنا حتى قادرين دلوقتى نعيش فيه ونستوعبه لو موجود

تحياتى

أنا حر يقول...

بوست جامد جدا بس انت عارف الغلطة غلطتهم فعلا حد يقدم بلاغ في الريس دول اتجننوا ولا ايه مش كفاية انه حميها هو صحيح حراميها بس مش مشكلة محدش برده يتجرأ ويقدم بلاغ في الريس يعني
معلش ياريس عندي انا الشاي اللي اتدلق ده ومتضايقش نفسك ولا تزعلها
نحن فداك يا حراميها
تحياتي

Unknown يقول...

هههههههههههه

صح بيستعبطوا دول ولا ايه؟

حد بردوا يعمل كده

صحيح شعب نمرود

ماهو ده بسبب الحريه اللي الريس مديهالهم ياأشرف
بس هيعمل ايه بس؟

انت عارفه قلبه طيب ومصمم اننا نعيش في حرية وديمقراطيه

علي الالفي يقول...

يا اخوااننا
انا عندى حفلة
اه و الله حفلة
لا و مش اي حفلة
انا هاغنى مع ايامنا الحلوة
المرة دى كعضو في الفرقة
عارفين هاغني ايه
انا هاغنى تلات سلامات
و هانغنى الليلة الكبيرة
و اغاني تانية
يا جماعة
انا مستنيكم كلكم تيجوا تنورونا في مسرح البالون بالعجوزة ان شاء الله يوم الجمعة الجاية الساعة 8و نص مساءا

Dr.Mohammed Gohary يقول...

يخربيت دماغك يا اخي يابني هلكتني من الضحك والله خلاص مش قاااااااادر بطني وجعتني بس علي فكرة انا بحذرك من الاستمرار عشان الفاعل مرفووع وانا من هنا من قلب ميت غمر أعلن اني انا محمد اسامه عبده الجوهري طالب في خامسه طب الزقازيق والنعمه ياريس اني ماليش دعوه بالموضوع ده واني دخلت علي مدونه اشرف أخف دم لقيت الموضوع ده بالصدفه واني ليس لي اي يد في هذا الموضوع واني معايا كارنيه حزب وطني والله علي ما أقول شهيد
تحياتي يا أشرف
ماشربش الشاي اشرب أزوزه انا
ايه يا أشرف متعرفش ان سلومه الاقرع مايعرفش ابووووووه

ابن بلد يقول...

وأنا من منبرى هذا
أضم صوتى لصوتك
وأطالب الريس بعدم الإلتفات لهؤلاء الخونة
واحب اهدى للريس أغنية

يا مدلعنا ..... يا مشخلعنا
هشتكنا وبشتكنا يا ريس
هشتكنا وبشتكنا يا ريس

Ma 3lina يقول...

ايه يا شوشو البوست الجامد ده

عجبتنى لابس اديداس دى موووت

ايه الناس الغريبة دى حد يعمل محضر لحسحس برده

http://kasperb4.blogspot.com/ يقول...

الله يرحمهم ويرحمنا

بس هو د حصل فعلا بجد يعني ؟؟

في حد يعمل كده ؟؟

MaMaDo يقول...

دا عبيط دا ولا ايه يروح يعمل محضر فى فخامه الزعيم

اظاهر انه بيتفرج على مسلسل يسرا لما بلغت على ابن الوزير و الكلمتين بتوع كل الناس مفيش حد فوق الكانون


ربنا يتولانا رحمته


المهم اخبارك ايه يا باشا كيفك

-_- يقول...

Hi there,

You are chosen to represent your country in the first international blog
WUB (World United Bloggers)

The aim of this blog is to prove to the world that differences in language, religion,race and nationality do not make us hate each other and we can make this world better if we express our opinions with respect to others.

If you agree to join us please send e-mail with your nick name , age , country and your blog address to sharm_lover@hotmail.com where you will be sent an activation mail which makes you entitled to contribute in WUB, your name as one of the contributor will automatically be updated.Please read the rules before you start any posting in WUB where you will also find the aims of this WUB.

Thanks
Chief WUB,


Sharm .

www.worldub.blogspot.com

chimera يقول...

ههههههههههههههههههههههههه
والله انت زى العسل يا أشرف
بس انا هموت و أعرف بجد..الأخ المحضر ده هان عليه يروح بيييييت الريسسسسس بحااااااااله بإيده فاضية كدة؟!! مفيهاش غير محضر؟?
مش كان ياخدله حلة محشى ولا حتى صوباعين موز ؟!!
ليه حق الريس يزعل طبعا يا أشرف
آسفيييييين يا ريسسسسس
بس انت الحق عليك برضك ... معرفتش تربى

عمرو فكرى يقول...

:D

عسل عسل

غير معرف يقول...

كل سنة وانت طيب
هههههههههههههههه
هوا بالنسبة للشغل كلامك صحيح
الكل شغال ومية المية يا باشا
والبلد زى الفل

بس عالم بتتبطر على النعمة وعايزة اكتر
نقولها اية يعنى



سلام يا باشا

س.حلم لا ينتهي يقول...

السلام عليكم
إنت عارف يا أشرف من حوالي جمعتين أجرت المحل اللى في الجيزة لواد مجدع ابن بلد قام ايه سرق كل اللى في المحل التليفزيون والكاسيت والراديو والميزان والكراسي باختصار ساب المحل نضيييييييييييييييف
انا بقى اتصلت بيه وربك والحق هددتوا اني هكتب فيه بلاغ رد وقالى اعلى ما في خيلك اركبو ووريني هتعمل ايه
انا قلت يا واد المسااااااااامح كريييييييييييييم
وحرمت اروح الشارع تاني
بس عندي امل انو يرجع البلي ستيشن اللى كان موجود زي ماوعدني واديني منتظر

freedom يقول...

طب اعملكوا ايه .. احنا بقينا 100 مليون .. انا لما اتوليت ما كانش في مدارس ولا جامعات ولا ميه ولاكهربا ولاتليفونات ولا مواصلات ولا شعب أساسا !! .. دلوقتى بقى عندنا .. المدارس الفرنساوى والمدارس الألماني واحدة فى الدقى وواحدة فى باب اللوق !! .. وعندنا جامعات خاصة فى اكتوبر ومودرن اكاديمى اللى بقت جامعة .. وعندنا قنوات فضائية وأرضية تسد عين الشمس وعندنا البيت بيتك بتاع "تامورة" .. وعندنا مترو أنفاق التذكرة فيه موحدة بـجنيه .. وده أقل سعر مواصلة فى الكرة الأرضية كلها .. وعندنا فواتير كهربا ومضاف عليها الزبالة كمان .. (صوت من خارج الكادر : بس دي اتلغت يا ريس ) .. –كمان !!! .. طب اعملكوا ايه تاني .. يا جماعة .. حكم البلد دى مسألة صعبة جدا .. وأنا ما بعرفش أعمل تمثيليات وأقول .. خلاص كفاية كدة .. علشان المظاهرات تخرج الشارع تانى يوم .. تطالب برجوعى ..
وبعدين تعالوا هنا .. قاعدين تعملوا ف مظاهرات .. وكفاية حرااااام .. كفاية ايه يلا انت وهوه .. ؟؟؟ .. انتوا فاكرين أن أى ريس تانى .. هايقدر يحكمكو ؟؟!! .. ولا هايقدر يستحمل قرفكم .. ده كفاية ريحتكم الوحشة .. يلا يا حبيبي أنت وهوه .. على الحمام .. وبالدور .. واحد واحد .. مش عايز هرجله .. علشان المية هاتقطع ف البلد كلها كمان ساعتين ولمدة أسبوع .. وده شئ عادي .. قطع الميه ده بيحصل ف الدنيا كلها . .وانا حذرت من الحكاية دي قبل كده وقلت لازم نعمل مؤتمر عالمى عشان المشكلة دي ونشوف لها حل. والسلام عليكم ورحمة الله ..
قطع .. وأغنية .. اخترناااااك .. اخترناااااك ..

مصطفى حسان يقول...

ازاي يا بني تسمح لنفسك انك تتطاول على الذات العليا ... وازاي تسخر من رئيس بلدك اللي ياحبة عيني ما بينامش الليل من التفكير في حال الشعب المسكين الغلبان المهاود المطاوع

وبعدين الاتنين اللي عملوا المحضر دول غلطانين الغلط راكبهم من ساسهم لراسهم .. ويستاهلوا ضرب الجزمة

ده الريس يا عم الأمور

قصدي اللي كان أمور ( إهيء إهيء إهيء)
كان راجل طيب والله

تحياتي

من سجن طرة بالمعادي

Young entrepreneur يقول...

السلام عليكم
زوروا العدد الثاني من مجلتاكم و قولولنا رأيكم
Trateesh kalam

فى القلب يقول...

هههههههههههههههههههههه
مش ممكن فعلاً و الله اخف دم
أدامك لنا الله و أبعد عنك العسكر


و أن شاء الله هتفرج و هتلاقى الايجار عشان تدفعه
ههههههههههههههههههههههه
أعذرنى مش قادره أمسك نفسى من الضحك

أه يانى هم يبكى و هم يضحك

ياسر خاطر يقول...

هه
طويل العمر يطول عمره ويزهزه عصره وينصره على مين يعاديه
هاي هئ

دلوقتي بقى انا عندي مشكلة
انا شغال 3 شغلانات في اليوم وقرفان من نفسي وعشان انا انسان طفس عاوز اشتغل الشغلانة الرابعة الواد احمد اللي تحتينا شغال 6 شغلانات ظابط ودكتور ومهندس ومحامي وعالم ظرة وحرامي
اشمعنى بقى
ماليش فيه
انا هابعت واحد محضر انا كمان

YHYيــوســف الـمصـرى يقول...

السلام عليكم
جامد اوى البوست يا اشرف باشا يا فاكهة التدوين
اول امبارح كنت فى القسم باعمل محضر انا وصديقى عاطف بس طبعا مش فى الريس وشفت هناك مهازل معرفش اضحك ولا ابكى عليها ..اول مرة ادخل قسم شرطة فى حياتى علشان احرر محضر ..مش متخيل الناس دى جابت جرئة منين علشان تعمل محضر فى الريس ...!!!
بوست جامد بجد يا استاذنا وعلى قد سخريته وخفة الظل الى فيه الا انه بفتح باب لتساؤلات كثيرة ؟
ماذا لو ؟ لماذا ؟ اين هو ؟ من السبب ؟
الكبت يولد الانفجار
شكرا لك على هذه البسمة التى رسمتها على وجههنا
وادعو الله لك ان يقدرك ويعطيك لتكتب لنا شعرا يلمس القلوب ويحرك المشاعر وقلم ساخر يرسم البسمة والفرحة وينسينا هموم هذه الحياة
تحياتى لك يا أستاذى

أبرار يقول...

السلام عليكم ورحمه الله وبركاتة
جزاك الله خيرا أخى فى الله على هذة التدوينة بقدر ماهى جميلة وتضحك بس مع الأسف تجعل الإنسان يبكى
حسرة
أعتقد أن أهل الأخ إللى راح يعمل محضر دة أحتسبوة من الشهداء
ربنا يكرمك أخى فى الله ويرزقك الفردوس الأعلى
أختك فى الله
أبرار

غير معرف يقول...

ناس من عالم تانى فكرونى بالراجل اللى رفع قضية على ابراهيم عيسى لانه خض بنته بنبا وفات الريس هو اه الحالة مختلفة تماما بس اظاهر انهم كانوا عاملين دماغ مع بعض والصنف كان جامد

غير معرف يقول...

لالالالالالالالالالالالا

قلبى على شعبى انفطر وقلب شعبى على حجرررررر

يا نهار اثود ايه دا يا كدع

الرئيس ادام الله بقائه حد يقول عنه كدا

هو الرئيس فاضى للعب العيال دا

احنا احنا ولاد ............ياشيخ

ولا يهمك يا ريس دول شوية سفهاء سولت لهم انفسهم ان يضعو نقطتان بيضاءتان على ثوب عدلك ونزاهتك الاسود

يووووووووو قصدى نقطتين سود على جلبيتك البيضه( روح ربنا يولع فى جلبيتك)احم احم احم

اسف ياريس والله زلت لسان ما حضرتك عارف الوقفه قدامك ليها هيبه بردو بتخلى الكلام يستخبى فى اللسان

هشتكنا وبشتكنا يا ريس

انت رئيس والنعمه كويس

يا مشخلعنا يا مدلعنا

قول لعدوك روح العب فى مناخيرك

هشتكنا وبشتكنا يا ريس

بجد بوست خطيييييييييييييييييير

ملوش حل

وطبعن دى اقل حاجه عندك

اناعلى فكره من اشد المعجبين بديوان مرسال لحبيبتى

بس الله يكرمك ابقى اقرا للاخين دول الفاتحه وادعيلهم واحنا فى الايام المفترجه دى لعل وعسى ربنا يغفر لهم الكريمه اللى هم عملينها دى

حصان بري يقول...

كًسْر أبدين إز فيرى دِنْجِرَس وعهد الله
هههههههههههههه يابني البوست من اوله لاخره مسخره
بجد تحفه يا عم اشرف
ماهو برضه العقل زينه
دا الكبير ياجدعان

لا ولو الموضوع قلب بقضيه بقي
والريس يجي
ونقوم له محامي
ويقف الشعب كله جنب وكيل النيابه
ويقوله ان هذا المتهم الماثل امامكم............
لا ياجدعان بلااااااااااااااش ضررررررررررب

تحياتي علي البوست الجميل يا صاحبي
فعلا هم يضحك

محمد مصطفى يقول...

هههههههههههههههههههه
لألألأ اوعى تفكر يا أشرف
بالتأكيد هم مختفيين مش أكتر
يا بني لا فيه تعذيب و لا عصيان و لا سياخ
هم بس ضميرهم بيعذبهم للغلط الشنيع المريع الفظيع اللي عملوه فمختفيين بس خوفا من نظرات الناس اللي بتتهمهم مش من شئ تاني
و أشوفك بعد الفاصل

شيمـــــاء يقول...

يخرب بيت عقلك
عسل عسل
هههههههههههه

Eman Eltaher يقول...

هههههههههههه
ايه يا عم أشرف
و بعدين ف خفة الدم دى ؟؟؟؟

انا فطست من الضحك
صحيح هو شئ لو فكرنا فيه اللى بيحصل ف البلد و حرية الرأى و الصحافة و حرية البتنجان هنلاقى اننا ظالمين جدااااااااااااااااا

ازاى نتجرأ و نقول حاجة ف الأعلى مننا .. زعيمنا ؟؟؟؟

ازاى أصلا نعتبر انه زعيمنا زى اى حد فينا نقدر نعمله محضر و نحاسبه ؟؟؟؟؟؟؟؟
هههههههههههه
ده ف موزمبيق بس

الا هو موزمبيق عندهم ريس ؟؟؟؟
هيا بلد ف الخريطة أصلا ؟؟؟؟
عموما ايا كان

الشعب مش عايز يتفاهم
و مش قادر يستوعب اننا أحسن حال بكتير
من شعبان عد الرحيم
على الأقل الأخير فاكر انه هيوصل لبوش نفسه و يقدر يكلمه و يقولـله بخخخخخخخخخ
مش يعمله محضر بس

هما تلاقيهم تقلوا ف العشا قبل ما يعملوا المحضر او كانوا فاطرين فول !!!!! أو يمكن سلك ضرب ف مخيخهم

بس بجد خفة دمك متناهية زى ما اتعودنا منك

عيد مبارك عن قريب ان شاء الله

غير معرف يقول...

هتفضل صاحب أحسن اسلوب واجمل قلب يا احلى اشرف فى الدنيا
برضه هافضل متابعاك وخايفة عليك حتى لو انت متعرفنيش او مارديتش عليا فى الكومنتات حتى
ينصرك ربنا

yara يقول...

طلعت جوزائى كمان
بصرة يا سيدنا
بص عاجبنى البلوج وعجبانى طريقة كتاباتك جداا
تحياتى واحترامى
باب مردود

Unknown يقول...

كل سنة وانت طيب يااشرف
ويارب يكون عيد سعيد عليك

زيطه يقول...

بجد دمك خفيف جدا
ليه مفكرتش حضرتك تكتب اسكتشات هتبقي هايل والله
ان شاء الله ليك مستقبل باهر

شقاوة شعب يقول...

لا بجد بوست جامد جداااااااا
واسلوب رائع فى الكتابة

ووكفاية كدة عليك عشان مش هنلاقى كلمة "أخف" فى اسم مدونتك

الأباصيرى يقول...

يخرب بيت دماغك ياعم

أنا فطست من الضحك

شوقتنى أرجع للتدوين تانى

أخف دم يقول...

أنا جيت
ههههههههههه
أنا كنت فاكر انى زى ما بيقولوا أخف دم اكتشفت ان تعليقاتكم أحسن من البوست نفسه وضحكت فعلا كتير منها..
وشحتونى جدا وربنا يبعد عنا ولاد الحـ..لال طبعا..
بس ما تقلقوش أول ما يحصل لى حاجة بعيد الشر أنا حافظ اسماء كل اللى علق على البوست وهنتقابل هناك بقى
هههههههههههههههه
منورنى دايما يا أحلى ناس

غير معرف يقول...

سلام عليكم
انا كتبتلك كومنت على القصيدة من شوية بعدين قريت البوست ده فعجبني موووت لانك جيت على الجرح بصراحة بس ناهيك على ان الكلام بتاعك جمببببببببببل مووت وان موضوع المحضر ده طبعا يودي ورا الشمس سوري ورا المجرة كلها بس بجد انا مؤمنةبان لازم الوضع اللي احنا في ده يتغير بقى ومؤمنة باننا سلبيين جدا متقليش منقدرش نعمل حاجة لأ نقدر بس لوكل واحد مقلش وانا مالي
انا بجد حالنا كل يوم بيالمني وبحس اننا كل يوم بنضرب على افانا وساكتين لا سوري بنرد ونقول كمان دي بجد حاجة تحزن
بس برده انا مازلت واثقة اننا هنعمل حاجة يمكن ملامحها مش واضحة دلوقت بس اكيد مع الوقت هتبان
وان شاء الله السلبيه اللي فينا هتروووح ادعي انت بس
بس بجد جميييل البوست مووووووووووووووووت
سلام عليكم

jehan يقول...

حرام عليك

بجدخوفتنى لما قلت ان ممكن الى كتب المضووع والى قرى المضووع يتاخدوا من قفاهم الصراحة ارعبت من الفكرة ههههههههههههههههه تخيلت نفسى مجرروة من قفايا علشان قريت بوست ضد الريس والادهى انى لابسة اسدال يعنى رايحة رايحة ههههههههههههههههههه

انا اول مرة اعدى على مدونتك وبجد دمك خفيف جدا واسلوبك حلو قوى فى عرض المشكلة

غير معرف يقول...

بجد بجد تحفة
انت اكيد هتروح فى دهيه