اخبار

الأربعاء، ٧ فبراير ٢٠٠٧

كله قابض









اللى مات فى البحر قابض
واللى فاز فى الماتش قابض
واللى بيسمُّوه معارض
برضُه قابض
واللى عَمََّال بسّ يدفع
إحنا مِ القلب اللى نابض
اللى مات فى البحر
مش من حَقـُّه ياخد لو جِنيه
هُوَّه مين كان ذنبـُه إيه؟
السفينه؟؟.. حلوه خالص
والعَدَد والحِمْل؟؟ .. ناقص
واللى قاعدين للطوارئ؟؟
كلهم وفْ صفّ واحد قاموا
بسّ البرْد قارِصْ
ثم إنّ الذنب مش ذنب المِلاحَه
اللى غلطان اللى مَيـِّت
المدارس كلها مكتوب عليها
(عَلّمُوا ولادكو السباحه)
واحنا بنقولها بصراحه
اللى ميـّت ذنبه عقلـُه
والغلََط مش عَ اللى ناقلـُه
الجريح جَابُه الشَبكْ
واللى مَات رِزق السَمَكْ
ثم إنّه مات شهيد
قبَّضوا الميت فى إيده الدايبه كام ألف اعتذار
(ميـِّت شَهيد)
واللى جايب جُون بيقبَض ألف ألف وفى احتفال
أصلـُه شاط الكوره جامِد مِن بعيدْ
واحنا ياللى رضِينا ناكل عِيشنا حَافْ
حَطـُّوا جُوَّه العيش حَديدْ
اللى بيمُوت فى البلد دى
لـُه مكافئة موت كبيره
واللى عايش بَرضُه مَيـِّت
بس مِتسَاق فى المَسيرَه
ياحبيبتى حبىِّ غيرى مش هجيلـِك
اللى عَمَّال بس يدفع
مش هينفع يشتريلـِك
مش هيركب يوم سفينه
أصْلـُه راكباه الهمومْ
وان رِكِبت فْ مرَّه صُدفه
برضُه مش هاغرق واقبض
علـّمونى ازاى اعوم
علـّمونا كتير
عشان نطلع نوابغْ
وامَّا فتـَّحنا اكتشفنا الدنيا .. ماشيه لدنيا تانيه
للى دَاهِن واللى صَابِغْ
كلّ يوم الصّبح ادوَّر عَ الوظيفَه
رِجلى دابِتْ
مش هينفع ابقَى لَعِّيب حتَّى واقبض
اللى ممكن بسّ يقبض
اللى يغرَق
واللى يلعبْ
اللى يلعب فى الملاعب
واللى يلعب فى الأرانب
واللى يهرب بالأرانب
واحنا أجبَن من أرانب
بس لينا شُغـْله حلـْوه
كلـّنا بندفع ضرايب
يا حبيبتى اللى حاصِل شيء يخللى التلج دايبْ
يبقَى بسّ ازّاى هنفضَل يوم حَبايبْ؟
اللى يخلـِصْ
مُش هيخلـَصْ
ابعدى عن حضن قلبى
بس قبل البـُعد
حَاسْبى
اوعِى مَرَّه تحِبّى واحِد
مِ اللى عَمَّال بسّ يدفَع أو يناهِضْ
:اسمَعِى كِلمِة حبيبِك
حِبّى واحِد
مِ اللى قابِضْ
ـــــــــــــــــــــــــــــــــــــ
أشرف توفيق

هناك ٤٤ تعليقًا:

zordeak يقول...

أى

أى

وجعت قلبى الله يسامحك

يا بنى انت شاعر بالتلاتة

بالاحساس

بالاسلوب

وبقلبك


الفكرة حلوة اوى

ومعالجتك ليها تحفة

بجد يعنى ..معدى

بس منك لله

وجعت قلبى وكأبتنى

يللا بقى

وبتقولى اخف دم

بس نقول ايه

البلد دى تخلى العيل الصغير يشيل الهم ويتغم

وتخلى الكبير يموت من الحسرة

سلااام يا عم الامور

Unknown يقول...

يانهااااااار

حرام عليك بقا

وجعتنى أوى

واللى وجعنى اكتر إن كل اللى قلته حقيقة

اللى بيمُوت فى البلد دى
لـُه مكافئة موت كبيره
واللى عايش بَرضُه مَيـِّت
بس مِتسَاق فى المَسيرَه

تسلم إيدك
وربنا يكرمك ويحميك

وحسبنا الله ونعم الوكيل فى ـــــــــ
أكمل الفراغ
:D

admelmasry يقول...

اشرف توفيق
رائع جدا
جدا جدا

تعرف انا طول عمري بحكم الصدف ياعني .. مش عارف انا بكتب زي مين

تعرف ممكن عشان قلة او قول اضمحلال ثقافة

لكن انت حد خلاني احس اني ممكن ييجي مني لاني باحب طريقتك دي في الكتابة

واني اتكلم بنفس اسلوبك دا

انتي حد استاذ

اسمحلي من انهاردة حقولك يا استاذ

تحياتي

غير معرف يقول...

begad u r a real poet

el sh3r yehbel begad masha allah

ana awel mara ashouf el blog bet3taak bas haga wahmeya el she3r masha allah

غير معرف يقول...

ماشاء الله

اكتر من رائعة بجد

انا مبهورة اوي

و فعلا
قلبني وجعني
لانك عندك حق

عجبني اجزاء كتير منها

خاصة جزء الارانب

There is also internal rhyme running through,,I liked it! wtgg begad!! masha Allah

غير معرف يقول...

ايه يابنى انت بترمى قذائف عندك فى المدونة ولا ايه كل الناس اللى اتوجع و اللى قلبه وجعه
بالراحة على الشعب شوية سيبه نايم فى الغيبوبة لحد ما تفرج و يموت شهيد و يقبض أو يلعب و يقبض برده
و فيه اللى هايصبر و يقبض فى الآخر بس قبض ايه من نوع تانى حاجة كدا من عند العلى العظيم

و فى بقى يا حظه اللى مش هايقف ساكت، اللى هايشتغل و يغير و يهاجم الفساد و يقبض الناس كلها و يقبض فى الآخر برده من عند ربه

ربنا يباركلك

غير معرف يقول...

هنقول ايه بس
موهوب بحق :)

جميلة فعلا يا أشرف
ننتظر جديدك دائما

Amr Ahmed يقول...

بجد بجد روعة يا اشرف

بصراحة مش لاقي كلام


موهبة اصيلة

تحياتي

Unknown يقول...

أشرف
انت شاعر جميا أوي

كلام لوجيك يقول...

فى زيارتى الاولى احب احييك على المدونة الهايلة دي
ماشاء الله عليك
بصراحة مجموعة كلمات فى الصميم
جمعتهم مع بعض وعملت منهم مدفع رشاش متعدد الطلقات موجه الى كل المغيبين والنائمين والمطنشين
تحكمك رائع فى تغيير معنى الكلمات والاسقاط اللى بترميه على مواضيع كلنا بنعانى منها وحاسيين بيها
خالص تحياتى
ليك ولموهبتك الفذه
ودمتم جميعا بالف خير

Unknown يقول...

كلامك جميل جداً يا اشرف اكتر من واحد بيفضفض فى مدونه


انت بجد محترف شعر و محترف سخريه و محترف احساس و انا بجد عجبتنى جداً الكلمات خصوصاً
للى عَمَّال بس يدفع
مش هينفع يشتريلـِك
مش هيركب يوم سفينه
أصْلـُه راكباه الهمومْ

و كمان جزء الارانب و الضرايب

تحياتى يا صديقى الموهوب

basma saghir يقول...

هو حلو بس بيوجع وبيألم بيوجع ليه؟
علشان حقيقي...متسألش حقيقي ليه..علشان محدش يعرف ومتحاولش تعرف

raspoutine يقول...

اولا حمدلله على السلامه
انا سمعت انك وصلت من المنصوره النهارده
عمرو قالى
ثانيا انتى من الاحرار يا اشرف
موضوعك جميل
وفيه روح الشاب المناضل اللى مبيحبش الغلط
بس هنعمل ايه احنا فى زمن الغلط دلوقتى
تصدق انا برضو كانمت بتلفت نظرى حكايه علمو اولادكم وكوب الخيل والسباحه ونط الحبل وكنت بقول هيا فين الخيل ولا فين حمام السباحه طيب حبل ده ولا تعبان
مبقتش عارف
سلام يا صاحبى

hanin يقول...

رائع يا اشرف بجد كلماتك رائعه واسلوبك اروع..والموضوع برغم انه مؤلم الا انه حقيقه زى ما اتقال فوق
ويمكن لانها حقيقه اوى وحاسينها اوى بتوجعنا اوى
اكتر من رائع ..ومش غريب ان تخرج هذه الروائع من قلم رائع

فى انتظار جديدك

غير معرف يقول...

الله يفتح عليك يا اشرف

ياحبيبتى حبىِّ غيرى مش هجيلـِك
اللى عَمَّال بس يدفع
مش هينفع يشتريلـِك

حوارك مع الحبيبه رائع كله عتاب وخوف وحنين

تحياتى يا اجمل شاعر

غير معرف يقول...

sh3rk gmeeel gedan!

smraa alnil يقول...

قلبي اتوجع وعنيا دمعت يا اشرف
حسرة جوة عيني وظلم تقل جفوني ومن غير ما احلف

طب انا بنت لا بقبض ولا بلعب اقولك انا اصلا مش هخلف

متقولش خدت ايه من مصر قول هتدفع كام
مش بالذمة دة تخلف

اه واه واه يا بلد
معلش اعذريني مقدرتش اجيب حمار يمشيني
ومنين الاقي حد يجبهولي دة مات حتي الولد

بصرخ وماشية زي الحمار في الساقية
الله تصدقي لقيت حمارة وضاعت مني التايهه

نفسي اقول كلمة من تلات حروف
انا تعبت وركبت السفينة زي الجبان ةالخروف
حمارتك العارجة تغنيك عن سؤال الحلوف
هو مش طلعتي يا بلدنا انتي العرجة برضه والله انا مكسوف

Mony The Angel يقول...

gamda bgad :)
alnaas kollaha tele3et abda kda :)
danta shakekteny fe nafsy lakoon abda w ana msh a7'da baaly lol
teslam 2eedak bgad

tota يقول...

اشرف
اهة الم صحيح من بلد كل اللى فيها دافع الا شويه منهم قابض
اللى دافع عمرة تارة واللى دافع من كرامته مرارة واللى داس عليه الظلم لما خلى همه هم
ويبقى بس اللى قابض من دم كل واحد فينا قابض
يجى عزرائيل يشيل الدافعين ويبقى برده اللى قابض
مش غريبة الدنيا دى حتى فى الموت يفضل برده اللى قابض

تحياتى يا واجع قلبى

توهة يقول...

بجد جميله قوى وسلسه جدا



بس بتقلب المواجع

وعندك حق

ياريت تحب واحد من اللى قابض


واول مره الاقى حد يوافقنى على اعتراضى على الكره واللى بيتعمل فيها




تحياااااتى

Memo يقول...

اخص عليك يا واد يا اشرف بلوج طويا عريض و متحطليش صوره و لا حته بوز ليا وانا في المرجيحه و بعدين هتجيب اخرت النكد ده و لا انت حر

سؤال بقا شخصي انت حاطط نقرك من نقري ليه
اكلت اكلك ؟؟؟؟؟سرقت هدومك ؟؟؟
كتبت في بلوجك ؟
امال شايلني على راسك و زاعق ليه
يا حقود يا شرير




و ايه يا واد الشعر الجامد ده انا كل اما اجي هنا الاقي شعر


انت قاصد بقا

و اشمعنا هما يقبضو وانا لا

سم كدا

تحياتشي

الأباصيرى يقول...

أنا متأكد مليون فى المية أنى علقت هنا قبل كدة
معلش الزهايمر بقى

القصيدة جامدة جداا
دة للأسف حالنا

أنت موهوب بجد

برافو

vision يقول...

ايوه يا اباصيرى يا خوايا خودنى فى ايدك ونبى نفسى اتقطع من السلم والروكب مبقتش مستحمله.... الناس كلها وجعت قلبها ياللى تنشك فى معاميعك

تحفه ومستنيينواحده كمان مهو اصلو بونبونى وحسه انى هدمنو اجمل حاجه انك ديما مشارك حبيبتك ومتخيلها معاك وقاعد كل شويه تطرئها وتقولها شوفى واحد غيرى بس اكيد بتحبها وزى ما هى بتحبك جايز تكون وهميه لكن بردو بتحبها

Malk Almasria يقول...

مساء الخير

اخى اخف دم
والله مش عارفة اقولك اية غير لنك صحيت الجرح اللى افتكرنا انه نام


تحياتى


ملك المصرية

الوردة السوداء يقول...

فى الجون

جامدة جدااا

ومؤلمة اوى

Utopian يقول...

تصفيق حاد

انت برنس يابني

بس ياخساره
مش قابض

big big girl...in a big big world يقول...

الله عليك
بجد روعه
روووعععهه

-_- يقول...

اقول ايه .. الناس قالت اللى عايز اقوله

LAMIA MAHMOUD يقول...

طبعا مش محتاجة اني اقول ان القصيدة تحفة



انا جاية بقى عشان حاجة تانية خالص .. استعمت بالشعر اللي كنت بتقوله في اازهر بارك امبارح جدا يمكن الحاجة الوحيدة اصلا اللي عجبتني في اليلة كلها .. واحب كمان اقولك ان اول مرة اسمع شعلا يضحكني ويبكيني في نفس اللحظة يلمسني من جوايا اوي والاقيني بضحك .. كان نفسي فعلا اقعد معاك لكن الفرصة مسمحتش .. اسعدني اني اسمعم وكانت صدفة سعيدة

aboud يقول...

أنا كنت بقول لاصحابي كلهم يشوفوا "ناقص دبدوب"..بس الحقيقة أشرف طلع مخبي جواهر تانية
بجد تحفة وشعر جميل ضحك ممزوج بالبكا..ولغة راقية ممزوجة بوعي سياسي واجتماعي.وكل مرة أتأكد أنك موهوب جدااااااااااااااااااااا
بالتوفيق يا أشرف توفيق
كان نفسي أكون أول واحد بس أحبابك كتير ياعم سهرانين على باب المدونة هعمل ايه طيب
عقبال تدوينات أجمل وأجمل

Yasmine Adel Fouad يقول...

أشرف ايه العبقرية دى
بجد لو ما نشرتش كتاباتك
تبقى بتستهبل
انت مش محتاج بكرة علشان تبقى حاجه كبيرة
انت بكلامك مقامك فوق و عالى
بس اياك تبيع حبيبتك
علشان فى يوم هتقبض
ما تخافش
بس اللى عايزة اقولهولك ان اللى هتقبضة مش هيكفيك غير اسبوع فى الشهر

ههههه

كراكيب عادل يقول...

الكلام ده

مش كلام دة احساس والاحساس الصادق بيلمس القلوب

احييك من كل قلبي تابعت السطور وانا عايز اروح للسطر الي بعده


احييك

غير معرف يقول...

أدعوك لزيارة هذا المقال
...
...
..
.

http://mads.jeeran.com/archive/2007/1/148138.html

بصفتك بلقاسي يعنى
:)
www.mads.jeeran.com

الراقـــص مع الذئـــــاب يقول...

بجد كلمات جميلة
بس يا خسارة
شفتها متاخر
والا يمكن تتكرر الف مرة
كل يوم الف مليون دمعة مرة

تحياتي لك

أخف دم يقول...

اتأخرت فى الرد على التعليقات أنا عارف بس أعمل ايه .. التعب بعيد عنكم .... دعواتكم بقى

أخف دم يقول...

أحمد باشا فؤاد
هوه أنا معايا دبوس يا عم ؟ قاعد تقول آى آى .. ينفع كده؟
عموما ربنا يكرمك .. وربنا يبعد عننا الكآبة اللى فى القصيدة
ـــــــــ
ياسمين إنسانة
حاسس كده من كلامك انك بتشتمى الريس وأنا لا أوافق على هذا السلوك ..
وبعدين إيه يعنى ألف واحد ماتوا ؟ مصر لسة فيها سبعين مليون .. بخيرها يعنى..
ـــــــــــ
الأستاذ آدم المصرى
يا عم ربنا يكرمك .. وسعيد إنى اسلوبى عجبك .. وأهم حاجة ان رسالة القصيدة تكون وصلت سواء بأسلوبك أو بأسلوبى .
ــــــــــــ
سهير
ربنا يكرمك .. بعد كده اكتبى التعليق بالعربى عشان خطرى يا سهير .. الكتابة الفرانكو دى بتشلنى .. بتحسسنى انى من بوركينا فاسو
ــــــــــــ
إبيتاف
يا ست الكل ربنا يكرمك ومنورانى .. رغم ان اسمك يدل على التفاؤل طبعا بس يا ريت تنورينا كتير
ـــــــــــ
lost in the web
أنا نفسى مش عارف فيه ايه؟ كل واحد قاعد يقول آى آى وأوببا وياخرابى ... فيه ايه يا جدعان؟ عموما آخر مرة أكتب حاجة بالشطة.
ـــــــــــ
ماراويتا
الجديد اتنشر من زمان ومحدش شافك.ز
يارب المانع يكون خير وربنا يكرمك
ــــــــــ
عمرو أحمد
واحشنى وربنا .. وياريت أشوفك قريب تانى ..ربنا يكرمك ويوفقك قادر يا كريم.. أعيط ياخواتى؟
ـــــــــ
إسراء
وانت بلوجك لذيذ قوى.. الجواب على قد السؤال .. بطلى بخل فى التعليق بقى
ـــــــــ
سكاماكانيوز
شكرا على النقد والتعليق الجميل وياريت تنورنى كتير عشان أستفيد من كلامك .. وعشان تزود عدد اللى بيعلقوا شوية عشان التعليقات قلت الفترة الأخيرة
ــــــــــ
whyme
انت فين يا جميل من زمان؟ ربنا يكرمك على التعليق الجميل ده وأنا عارف انى مقصر معاك بس التعب نعمل ايه بقى؟ ربنا يشفينا .. ويكرمك على كلامك وربنا يقدرنى واكتب اللى الناس تحسه كمان وكمان.
ــــــــــــ
بيسو
إيه يا بيسو الكلام الكبير اللى انتى كاتباه ده ؟ أكيد الفزورة دى حلها البطيخة ... يعنى الكلام بيوجع وللا لأ أساسا وده حلو وللا وحش ؟؟؟ أرجو الرد على سؤالى سريعا عشان أنا مبنمش.
ـــــــــ
راسبوتين
ترجعلنا بالسلامة البلوج بتاعك مغلق أكيد انت قافله عشان راجع بمفاجأة .. ربنا معاك ويخللى المانع خير.
ــــــــــ
داليا
لو كان قلمى رائع يبقى عشان انتى والناس الحلوة دول هما اللى بيقروا ليه .. ربنا يكرمك على كلامك الجميل ... لا يا جماعة شكلى هعيط من الكلام ده بجد..
ـــــــــ
شيكو
فينك من زمان
أجمل شاعر مرة واحدة ؟ وانتى أجمل واحدة تقرى شعرى يا ستى .. واحدة قصاد واحدة .. نفاق يعنى..
ـــــــــ
آيه الموسى
ربنا يكرمك
ـــــــ
سمراء النيل
كاتبة مقال أكتر من القصيدة اساسا؟ ما تيجى تاخدى البلوج اساسا.. وبعدين أنا بس اللى فاهم قصدك من كلامك يعنى .. ربنا يسامحك ..
ــــــــــ
الملاك مونى
مين عارف مش يمكن تكونى قابضة وانا مش عارف .. مش برضه انتى بتقبضى من بابا الصبح .. كله قبض يا ست الكل..
ــــــــــ
توتا
يسلملى قلبك يا ست الكل .. وبعد الشر على قلبك من الوجع يعنى ..
دا انا أفجر البلوج لو قلبك هيوجعك يعنى
ربنا يكرمك يا رب ويخلصنا من كل الفساد اللى احنا فيه.
ـــــــــــ
توهة
أنا باحب الكورة بس مش لدرجة انهم ياخدوا ملاين واحنا مش لاقيين الرغيف يعنى .. حاجة تشل .. وبعدين أنا باقول لحبيبتى كده وكده يعنى .. هيه تقدر تحب واحد تانى حتى لو قابض؟ دا انا أفجرها
ــــــــــ
ميمو عدوتى اللدودة
على فكرة انتى أول واحدة قابضة بقى .. ولو اتقبض عليا عشان القصيدة دى هاقول لهم ميمو هيه اللى قايلالى وكمان سمعتها قبل كده بتشتم الريس.. خلينا نرتاح بقى..
ــــــــــ
الأباصيرى
لو علقت ميت مرة يا ريس انت منورنى فى كل مرة ربنا يكرمك
ـــــــــــ
كاميرا جيرل
أمال البلوج لو فى الدور الخامس بقى كنتى عملتى ايه؟ دا انا عامله فى البدروم عشان الناس اللى زيك.. عموما علشان الشوك اللى فى البلوج باحب البلوج تيرارارارارارا
ــــــــــــ
ملك المصرية
ربنا ما يجيب جروح يا ست الكل وربنا يكرمك على التعليق الجميل
ــــــــــ
الوردة السودة
أهم حاجة مايكونش الألم أثر عليك عشان احنا محتاجينك .. انت ثروة قومية..
ــــــــ
يوتوبيان
ماأنا عايز اوصل لمرحلة انى اقبض حتى لو مش برنس يا عم الحاج ..
نفسى أبيييع يا عم يوتوبيان
ــــــــ
مى
ربنا يكرمك ..ومنورانى
ــــــــ
شارم
وانا اعلق عليك ازاى .. انا علقت للناس بنفس اللى عايز اقولهولك
ــــــــــ
لميا
يا ست الكل أنا اللى كنت عايز أقعد معاكى بس انتى عارفة المعجبات كانوا كتير بقى .. وبعدين البت إنجى كانت هتموت وتقعد معايا انتى عارفة.. عموما تتعوض يا باشا..قشطة.
ــــــــ
عبود
ياعم ربنا يكرمك وزى ما قلتلك قبل كده مدونتك أول مدونة بادخلها ..عشان الفكر اللى انت بتقول عليه..
ــــــــ
ياسمين الحرة
ربنا يكرمك .. افضلى انفخى فيا كده ومش عارف آخرتها ايه..
عموما لما اتشهر هاجيب سيرتك ما تقلقيش.
ـــــــــ
كراكيب عادل
يا عم بس جايز كل سطر كان فرحان عشان انت اللى بتقراه.
ــــــــــ
mads
ماشى ياعم البلقاسى .. تمت القراية بحمد الله.
ــــــــ
الراقص مع الذئاب
منورنى ويا رب ما تكون آخر مرة .. وربنا يبعد عنك الدموع.

غير معرف يقول...

عجبني الشعر مؤثر على الجرح اللي بنحاول ننساه
عجبتني كمان لوجوهات
مصر مش كدة
ومدونو ضد الشتائم والبذاءات

من كتر ما لقيت البذاءات على المدونات فقدت الأمل يكون فيه حد لسة عنده حياء
حتى يمكن أنا كمان
فقدت الحياء!

beroo يقول...

انت اساسك رائع جدا يا اشرف باشا ممكن تكرمني وتبص علي البلوج بتاعي

beroo يقول...

معلش قصدي احساسك

reem يقول...

انا عرضت عليك قبل كدة -شرف- صداقتى والمفروض انك تكون قبلتها المهم انا مش هستنى ردك وهقولك انة نادر بجد اننا نلاقى شخصية بالكوميديا والرومانسية دى فى وقت واحد

reem يقول...

انا عرضت عليك قبل كدة-شرف صداقتي- والمفروض انك تكون قبلتها المهم انا مش هستنى ردك وهقولك ان بجد نادر اوى اننا نلاقى حد بالكوميديا والرومانسية دى فى وقت واحد

reem يقول...

انا عرضت عليك قبل كدة-شرف صداقتي- والمفروض انك تكون قبلتها المهم انا مش هستنى ردك وهقولك ان بجد نادر اوى اننا نلاقى حد بالكوميديا والرومانسية دى فى وقت واحد

غير معرف يقول...
أزال أحد مشرفي المدونة هذا التعليق.
Unknown يقول...

مش هيركب يوم سفينه
أصْلـُه راكباه الهمومْ
وان رِكِبت فْ مرَّه صُدفه
برضُه مش هاغرق واقبض
علـّمونى ازاى اعوم


المنحوس منحوس حتى فى الموت