اخبار

الأربعاء، ٢٧ يناير ٢٠١٠

تحقيق مع جاموسة!


قررنا اليوم فتح باب التحقيق مع الجاموسة المتسببة فى حادث قطار العياط.. المتهمة أتت إلينا فى سيارة نصف نقل متأخرة نصف ساعة لأنها كانت مشغولة فى سوق البهائم صباحا


س: اسمك؟

ج: جاموسة


س: أين كنت قبل لحظة وقوع الحادث ياجاموسة؟

ج: بعد إذنك يابيه بلاش شتيمة وقلة قيمة.. إيه جاموسة دى؟


س: هذا اسمك المسجل لدينا.. أكرر.. أين كنت قبل لحظة وقوع حادث القطار؟

ج: أنا كنت فى الغيط بتاع صاحبى الحاج حمدان وقاعدة آكل ومزاجى عنب ومكنتش اعرف ان هيحصل ده كله


س: وما الذى حدث؟

ج: أنا قلت اروح اسلِّم على الجواميس اصحابى فى غيط الحاج طلبة اللى على الناحية التانية من القطر عشان سمعت من ناس ان فيه أمراض جديدة وصلت للبهايم.. قلت اروح اتطمن.. أينعم وزارة الزراعة نفت الموضوع.. بس هوه مين فينا اللى بيصدق الحكومة يابيه؟


س: وما الذى حدث بعدها؟

ج: كنت ماشية على مهلى عادى وانا على شريط القطر لقيت فيه حتة صفيحة جاية من بعيد


س: هل تقصدين القطار؟

ج: يابيه أنا بصراحة ماعرفتش انه قطر إلا من زمارته.. إنما هوه باين من بعيد انه صفيحة زى بتاعة السمنة كده.. وكان فيه ناس كتير متشعلقين فيه من كل جانب.


س: ولماذا لم تتحركى بعيدا عن القطار؟

ج: يابيه وأنا هاخاف ليه بس؟؟ أنا لا خدت فلوس من بنوك وهربت، ولا خدت رشوة فى مشروع "ابنى بيتك"


س: ولماذا لم تفعلى ذلك؟

ج: عشان أنا مش محتاجة بيت.. أنا ساكنة فى دوار الحاج حمدان


س: لا أقصد ذلك.. أقصد لماذا لم تتحركى من أمام القطار؟

ج: يابيه هوه فيه قطر يخاف من جاموسة؟ ليه هوه قطر لعبة؟؟ المفروض ان أنا اللى اخاف من القطر.. بس بصراحة لقيت شكله ميخوفش وباين عليه عايز إعادة هيكلة.. قلت يابنت امشى على مهلك


س: وماذا حدث بعد ذلك؟

ج: لقيت القطر وقف أول ما السواق شافنى


س: ولماذا توقف القطار؟

ج: الشهادة لله أنا قلقت وتخيلت اننا فى الهند والسواق هندوسى.. بس رجعت وقلت فوقى يابت.. انت ف مصر.. والدليل القطر الصفيح اللى قدامك ده!


س: وهل توقف القطار كثيرا؟

ج: بصراحة سواق القطر كان راجل ذوق واستنى لحد ما مشيت على مهلى.. حد يلاقى دلع وما يتدلعش يابيه؟


س: وهل رأيت القطار الآخر؟

ج: وأنا بابص كده لقيت صفيحة تانية جاية من بعيد ورا القطر الأولانى وقاعدة تزمر برضه.. حاولت انبِّه سواق القطر وقعدت أجعَّر بصوتى وكل ما اجعَّر يشاور لى ويقول لى: امشى براحتك على أقل من مهلك


س: وما الذى حدث بعدها؟

ج: القطر التانى لبس فى القطر الأولانى ومات شوية ناس كده


س: كم عدد المصابين والقتلى؟

ج: أنا مش عارفة العدد بالتحديد بس بيتهيألى انهم أقل من عدد الغرقانين فى عبارة السلام ومن عدد المحروقين فى قطر الصعيد اللى فات ومن عدد معتقلى الإخوان.. وأكتر من عدد المحروقين فى قصر ثقافة بنى سويف.. يعنى ممكن كده يبقوا قد اللى انتحروا السنة اللى فاتت من الفقر!


س: يبدو أنك مهتمة بأحوال البلد السياسية؟

ج: كله حصرى على التليفزيون المصرى.. والبركة فى النايل كوميدى والأستاذ عزب شو


س: هل كنت تتوقعين أنك ستكونين سببا فى إقالة وزير؟

ج: والله لو اعرف يابيه كنت جبت كل الجواميس اصحابى بعدد الوزرا!


س: هل أنت منضمة لإحدى الحركات المعارضة؟

ج: كفاية يابيه


س: إذن أنت تعترفين بانضمامك لحركة كفاية؟

ج: يابيه انا اقصد كفاية أسئلة.. هيه الواحدة ماتفكش معاك بكلمتين؟


س: فى رأيك من المسئول عن هذه المأساة؟

ج: أولا أنا باسجل اعتراضى.. فين المأساة دى؟ دول شوية مصريين ماتوا.. وبعدين احنا متعودين ان كل سنة الحكومة تعمل لنا مفاجأة كده زى موضوع القطر عشان نعتبر ونتعظ ونقرب من ربنا ونتذكر الموت.. أنا باطالب الإعلام بعدم تهويل القضية وياريت نلتفت لمشاكل البلد الكبرى والتحديات المقبلة زى مباراة مصر والجزائر.. بلاش تشويه لسمعة مصر بقى!


س: ما الشيء الذى ندمت عليه بعد هذه الحادثة؟

ج: إنى لحد دلوقتى ما اتطمنتش على البهايم اللى ف غيط الحاج طلبة!


س: هل لديك أقوال أخرى؟

ج: أنا بس عايزة أطمن زملائى: الأخ "ماس كهربائى" والأخ "مختل عقليا".. إن الحمد لله الضغط خف عليهم وبقينا فى الهوا سوا.. واننا هنحاول الفترة الجاية نقسم المصايب علينا عشان الشعب يصدق.. مرة ماس ومرة مختل ومرة جاموسة.. وهوه ده الفكر الجديد!


س: لقد تسببت فى مقتل العديد من شعب مصر والسخط فى كل أرجاء المحروسة.. فلماذا فعلت كل ذلك؟

ج: "من أجلك أنت" يابيه!

هناك ٢٩ تعليقًا:

Unknown يقول...

قريتها في الدستور عجبني جدا المقاله دي يا اشرف باشا
انت جبااااااااااار والله
حتى الجاموسه عاملها مصريه مصريه يعني

سواحة يقول...

:-))))
هو ده الفرق مابينا و بين الهند
الهنود عمرهم ما كانوا يحققوا مع جاموسة غلبانة

ا لـعـبـد لـلــه يقول...

كالعاده تدوينه جامده جدا يا أشرف وأنا سعيد جدا بإهتمامك بالمدونه الأيام دي.؟ربنا يقويك .ومستنيين كتب جديده ليك في القريب العاجل وأتمنى إنها تكون جديده في كل موضوعاتها كمان ومايكونش في منها مواضيع نزلت عالمدونه أو الدستور.وأشعار ..أشعار؟

خواطر شابة يقول...

يادي الزهايمر اللي حيجنني انا قريت هذه الكلام ده فين قبل كده

أحمد عبد الحميد يقول...

رائع يا أخف دم
بس أكتر حتة عجبتنى هى :
أنا باطالب الإعلام بعدم تهويل القضية وياريت نلتفت لمشاكل البلد الكبرى والتحديات المقبلة زى مباراة مصر والجزائر

Mahmoud Ahmed يقول...

ههههههههههه
حلوه قوي قوي قوي
تحقيق جميل قوي وا لله
هههههههههههههههههههه
ههههههههههههههههههههه
اتاري الجاموسه مضايقه هي برضه و مش عاجبها حالها
ههههههههه

Michel Hanna يقول...

عسل عسل عسل!

محـتــــاس أفـنــــــدي يقول...

واللهي يا أخ أشرف كل اللي قلقني في الموضوع ده حاجه وحده بس سيبك انته من اللي يموتوا واللي يتقالوا من الوزرا انا بس نفسي تطمنا علي جواميس الحج طلبه

خالد كامل يقول...

لأ و حتى الصورة

صورة جاموسة بلدى مأصلة
هههههههههههههههههه

انا قريت البوست دا قبل كدة

و طبعاً رائع كالعادة

يا رب دايكاً تواصل تألقك

تحياتى

الشعب لابد له من حكومه تشكمه يقول...

انت فوق الفظييييييييع:)
عجبتنى اوىىىىىىىىىىىى بجد.
افررررحى يامنصوره حدااااانا اشرف توفق باشا :))

اكتر حاجه عجبتنى انها هتجيب جواميس بعدد الوزرا:))
جامده:))

بس ايه الجاموسه دى صورتها يععععععع اوى بجد:)

Haytham Kilany يقول...

ashraf. enta betkteb feldestor 3ala toool
ya3ney ashteryha?

مصطفى عبدربــه يقول...

ههههههههههههههههههههههههه

المختل عقليا والماس والجاموسة
اسباب كل الحوادث في مصر

ولسه هنشوف ايه تاني

بوست رائع كالعادة يا أشرف

promise is promise يقول...

أيه ياعم النصب والافترى ده على خلق الله اولا الجاموسه دى نصابه وبنت جاموسه صحيح لانه التانيه اللى كانت سبب الحادث ماتت

اكيد دى واحده عايزه تشتهر وعملت نفسها هى

ماشى تشتهر ماشى بس بلاس الافتراء على خلق الله

ربنا على الظالم والمفترى والجاموس ولاد الحرام

غير معرف يقول...

هههههههههههههه

و الله العظيم عسل .. ضحكتيني قبل ما أنام

متشكر اوي على البوست الرائع

اتمنى اتشرف بحضرتك في مدونتي .. و هتضحكك برده ان شاء الله و اتمنى نبقا اخوات و نتبادل التعليقات و الأفكار

زورني و نورني هنا

http://ra7alaat.blogspot.com/

قلم رصاص يقول...

جمييييييييييل جدا يا استاذ اشرف

هي وظروفها يقول...

يا اشرف يا جاااااااااااااامد

ايه الأسقاطات الساسيه دي يا معلم

انت شكلك عايز تغير من نظام مولاني

لورثني شكرا

ايه يا عم الجمال ده

بس دي جاموسه يا اشرف انت عايز الاجانب يشوفوها ويقولو جاموسهم ضعيف مش كفايه اقتصادنا ودمنا وشعبنا وحلمنا وعمرنا في البلد دي في الضعيف

اخص علي كده اخص

No Fear يقول...

السلام عليكم
عبقري أنت يامان

سمع هوص (Abo 3li) يقول...

انا بس عاوز اعرف حاجة؟
يتري الجاموسة طلعلها امر اعتقال ولا لسه؟؟

د. محمد رضا يقول...

الحكومة المصرية

... أم الشعب



انا عاوز اقولك اني نازل في المعرض بكتاب

ابقى اشتريه

ولا اقولك

لو شوفتك هشتريهولك انا وخلاص


تحياتي

هناء محمود يقول...

هو دا إللى ناقص والله

وممكن مصر تعملها بجد مفيش حاجة بعيدة خالص


بس بوست مميز بجد وجميل أوى


http://awraktanbod.blogspot.com/

أخف دم يقول...

السلام عليكم
كل سنة وانتوا طيبين وبخير دايما
لماضة هانم تسلمى يافندم.. بنحاول بس نجيب شوية موضوعات من السدتور عشان الحال نايم.. صباح الفل وابقى طمنينا عليك
العبد لله.. عنيا ياصالح ان شا ءالله فيه أشعار قريبة بس فى ديوان بقى.. وابقى طمنا عليك
خواطر شابة.. قريتيه فى الدستور طبعا عشان انا نشرته هناك فى مكان مقالى الأأسبوعى.ز بس أحيانا باجيب موضوعات قديمة من الدستور هنا عشان وقف الحال بس وعاشن زوار هنا مايزعلوش
هيثم: أنا باكتب فى الدستور العدد الأسبوعى.. بس للاسف الصفحة بتتأجل دلوقتى.. ربنا يسهل واول ما مقالاتى تنزل تانى هاقول هنا على مكانها الجديد.. تسلم ياهيثوم
يا أحمد ياللى مش فاكر اسمك.. عنيا الاتنين زيارتك واجية واتشرف بصداقتك
كل سنة وانتوا جميعا بخير
أشرف توفيق

Ahmed Kasem يقول...

فعلا والله أخف دم دومتم وفى انتظار المزيد

نكادلة بكادلة يقول...

جااااااامد جداً بيجسد واقع حقيقى و ساخر جداً .. ما شاء الله

ساسو يقول...

والله انت دمك زي العسل

تقبل مروري

Zawag alnaddy زواج النادى يقول...

السلام عليكم ورحمة الله وبركاته
جزاكم الله خيرا على هذا الموضوع الجميل وانتهز الفرصه واحب ان اوضح ان الزوجه هيا كل الحنان والعطف والأشواق لزوجها والزوج هوا كل الدنيا التى تفرح بها الزوجه للقأ زوجها يجب التعارف بينهم والله موضوع جميل ومشوق بارك الله فيكم ياشباب

اوجعني غيابك يقول...
أزال المؤلف هذا التعليق.
ابوعدي للتسوق يقول...


شركة تنظيف شقق بالقطيف
شركة مكافحة حشرات بالقطيف
شركة المثالية للتنظيف
شركة المثالية لمكافحة الحشرات
شركة تنظيف منازل بالخبر
شركة تنظيف فلل بالخبر
شركة تنظيف شقق بالخبر
شركة عزل اسطح بالخبر


Unknown يقول...





شركة تنظيف بالرياض
شركة تنظيف منازل بالرياض
شركة تنظيف خزانات المياة بالرياض
شركة نقل اثاث بالرياض

شركة تخزين اثاث بالرياض
شركة كشف تسربات المياة بالرياض
شركة مكافحة حشرات بالرياض
شركة مكافحة النمل الابيض بالرياض
شركة رش مبيدات بالرياض
شركة جلي بلاط بالرياض

شركة تنظيف ومكافحة الحشرات يقول...



شركة مكافحة النمل الابيض بسيهات وبعنك

شركة مكافحة حشرات بسيهات وبعنك

شركة تسليك مجارى بسيهات وبعنك

شركة تنظيف موكيت ومجالس بسيهات وبعنك