اخبار

الجمعة، ١٢ ديسمبر ٢٠٠٨

كل عام وأنتم كده!!


كل عام وأنتم تلهطون القمح الفاسد والخضروات الملوثة والفاكهة المهرمنة والطعام الملوث!
كل عام وكل منكم ملتزم بدينه وعارف حق ربنا للدرجة التى يقتل فيها جاره بسبب اختلاف خانة الديانة فى بطاقة الرقم القومى مع أن كل منا لا يعرف الله إلا أيام المصائب أو الامتحانات أو الزواج عشان ربنا "يفتح" عليه!
كل عام والمسافة تتسع أكثر وأكثر بين الشرطة والمواطنين إلى حد أن يقتل ضابط الشرطة مواطنا مصريا مثله فى عز الضهر وفى صدره أمام الجميع أو يسحل سيدة حامل حتى الموت أو يهتك عرض شاب مثله غلبان.. وفى النهاية هى حالات فردية!
كل عام وأنتم تتابعون فضائح رجال كانت صورهم تتصدر مانشيتات صفحات الاقتصاد فصارت تتصدر مانشيتات صفحات الحوادث..وتعدون على أصابعكم كمية الملايين التى تمت بعثرتها فى كل واد..تعدون الملايين على يدكم اليسرى أما اليمنى فتلحسون بها _كما أمر الرسول الكريم_ آخر لقمة عيش بآخر ما فى طبق الفول!!
كل عام وأنتم فى انشغال تام بما حققه المنتخب وانتصارات النادى الأهلى وانتخابات نادى الزمالك والجهاز الفنى للمصرى وتلعنون لاعبا احترف فى سويسرا مع أن كل أموال مصر محترفة هناك ولم يتحرك أحد!!
كل عام وأنتم تعانون من الثانوية العامة وصعوبتها التى فاقت كل حد وامتحاناتها التى فاقت كل مصيبة وتسريبها الذى فاق كل خيال.. ويجنى كل منكم ثمار تعبه وخوفه بأن يعمل بعد الضهر سواق تاكسى فى سبيل الإنفاق على أولاده الذين تخرجوا من عشر سنوات وما زالوا يحتاجون إلى المصروف!!
كل عام وأنتم على موعد مع مرض جديد بعد انفلونزا الطيور والتهاب الكبد الوبائى فيروس سى وزيادة حالات الإيدز والسرطان وتدهور حالات مرضى السكر والضغط من تلك الظروف التى يعايشها الجميع.. وكل عام وحكومتنا تعلن أنها داخل غرفة العمليات لمجابهة المرض بعد مقتل الآلاف من الشعب حتى ينصرف المرض من مصر لوحده.. بعد أن ضاق ذرعا بهذا البلد الذى لا يحاول حتى أن يجابهه ولو بالدعاء أو بكنس باب السيدة!!
كل عام ونحن نقطع صلة الرحم ونتلكك فى التعامل ونتحرش ببناتنا وأخواتنا ونسارع فى نفس الوقت بالصياح "نحن فداؤك يارسول الله.. إلا رسول الله" وكأننا نازلين من فيلم (فجر الإسلام) على هنا عِدِل!!
كل عام واحنا الغلابة "نتشطر"على بعضنا حتى يصل الأمر لأن يقطع دكتور إنسانا بالمنشار ويملأ ابن عاق جسد أمه بالطعنات وتكون أخبار القتل فى مصر متصدرة يوميا شريط أخبار الجزيرة والعربية بينما تتصدر أنباء انتعاش الاقتصاد القومى وزيارات الرئيس شريط أخبار الفضائية المصرية!!
كل عام وحالات الانتحار فى ازدياد والدولة تؤكد أنها حالات فردية وليس وباءا.. وتعدد الحالات بين واحد لم يستطع أن يواصل الإنفاق على أولاده الغلابة وزوجته.. وآخر خسر أمواله فى البورصة.. وآخر زادت عليه الديون الرهيبة التى لم يستطع منها فكاكا فقرر أن ينتحر..وتعالوا نبكى ونضحك جميعا حين نعلم أن ديون هذا الرجل _التى لولاها لكان حيا بيننا بأمر الله_ كانت حوالى ألفين جنيه فقط.. أى ما يوازى سعر جزمة جلد طبيعى!!
كل عام والتلميذ يقتل فى المدرسة، وأبوه يقتل تحت أنابيب الأكسجين فى المستشفى، وجده يموت مسحولا فى قسم الشرطة، وأمه تموت كمدا وبسكتة قلبية حين يهددها أحد الضباط بخلع ملابسها علانية أمام الناس للاعتراف بمكان سلاح وهمى، وخالته تموت تحت صخرة الدويقة، وعمته تموت فى أى حريق تسبب فيه صديقنا العزيز الغالى الماس الكهربائى!!
كل عام ونحن نستمع بإنصات إلى تصريحات الحكومة حول الخير الذى عم علينا هذا العام و"نتمرمغ" فى عائدات قناة السويس والضرائب والسياحة والغاز الطبيعى ورغم ذلك "نتمرمغ" فى تراب الوطن لنأكل و"نتمرمغ" فى مياه الوطن لنغرق!!
كل عام ونحن نتابع باهتمام طلاق هذه الفنانة وزواج هذا الفنان وأجر هذه المطربة وشعر صدر هذا المطرب.. وندافع بكل حماسة عن الدراما المصرية وكيف أنها هى أم الدراما العربية وأن "العين ماتعلاش ع الحاجب".. وتيجى فين ياسوريا جنب مصر؟؟ ونتحسر على البطل الذى لم يعد إلى البطلة فى نهاية المسلسل رغم أن هذا البطل المظلوم قد لهف من أموالنا أربعة ملايين جنيه نظير تمثيل عشر ساعات دراما خلال المسلسل بما يوازى حل مشاكل أكثر من أربعمائة شاب أقصى أمانى كل منهم أن يحصل على عشرة آلاف جنيه لتحل كل مشاكله!!
كل عام ونحن بين مطرقة الحكومة.. وسندان المعارضة.. ولا حد حاسس بينا!!
كل عام ونحن أطيب شعوب العالم رغم كل ما نواجهه..
ياشعب مصر..
كل عام.. وأنتم كده!!

هناك ٤٣ تعليقًا:

غير معرف يقول...

وكل عام وانت وطيب

t3ban يقول...

و انت طيب ويعود عليك بالزيادة
:D:D:D:D:

شيماء الجمال يقول...

و انت طيب يا اشرف
جميل مقالك الإسبوعي في الدستور ، اتابعه دائماً

Yasmine يقول...

مدونتك مميزة جدا انا تقريبا ادمنتها..
بالنسبة للموضوع فلا تعليق..حالنا بقى يحزن بجد
كل سنة و احنا بنصلى صلاة العيد الصبح و نتحرش فى شوارع وسط البلد قبل ما الضهر يأذن
كل سنة و انت طيب..

كراكيب يقول...

كل سنة وانت دمك خفيف وبتضحكني
كل سنة وانت مقالتك وصورتك منورين في الدستور
كل سنة وبلوجك أخف دم
كل سنة وانت طيب وكويس ومبسوط وصحتك تمام التمام وزي الفل يا استاذ اشرف
;)

miro el niro kwaniro

Kiara يقول...

كل عام ونحن أطيب شعوب العالم رغم كل ما نواجهه..

*******

دي تكفي

ويارب يحصل تغير في كل شئ

كل سنه وانت طيب

Ahmed يقول...

وانت طيب
اعتقد كده بعد اللي قلته عندنا حق اننا نحتفل بالعيد

عالم ماريونت يقول...

كل سنة وانت طيب يا اشرف
انا عجبتني جزئية الدين
زي ما كنت قريت لعمر طاهر قبل كدة
مش المشكلة انك تفتكر ربنا في الامتحانات بس
المشكلة انك مش بتفتكر ربنا غير ساعه المشاكل
او عشان نهرب من ازمة فنقول ربنا بيقول كدة
معلش يا اشرف انت الكبير
اختك رنا

Mahmoud Bahgat يقول...

كل عام و فى واحد بقاله 27 سنة معنا ويارب يفضل معانا و غصب عننا هيفضل معانا و برضانا هيفضل معانا و ياريت يفضل معانا لانه بصراحة هيفضل معانا، واللى نعرفه احسن من اللى منعرفوش

مسدس صغير يقول...

ههههههههههههههه كل عام وانت بعيد عن الحاجات دى كلها. كل عام وانت راجل مفيش منه خوف....احلى حاجه بتاعة اللاعب اللى هرب على سويسرا والناس اتحمقت ليه طب والفلوس متحمقوش عليها ليه.ههههههه جميل اوى يا اشرف وكل سنه وانت طيب ومفيش مننا خوف

غير معرف يقول...

كل سنه وانته جميل

صبرني يارب يقول...

اشرف

انت حد موحيك علينا

طيب ياعم كل سنه وانت طيب وموجود وتغم منافسنا على العيد يا عم

قلم رصاص يقول...

هههههههههههههههههه

كل سنة وانت طيب ويبعد عنك وعننا الحاجات دي

انا برضه اللي عجبني زي أخويا مسدس صغير حتة احتراف كل فلوسنا في سويسرا ومحدش جاب سيره ههههههههه


عيد سعيد عليكم

TAFATEFO يقول...

وسيادتك برضه كده .. ولا انت مش كده زي الناس ولا ايه؟

أنا أول مره أشوف واحد يحاسب الضعفاء على ضعفهم .. ولا علشان سيادتك غني غنا فاحش ورأسمالي .. داير تعاير الناس الغلابه اللي ملهمش ظهر؟؟!!

عيب يا أستاذ أشرف بك .. عيييييييب

Soooo يقول...

على رأي طفاطيفو
هو انت يا شؤرف بيك عشان من الاعيان وبتاكل بطاطس وطعميه وتسيب الغلابه ياكلو سودوق وسمين .. هتتعالى علينا
حاشا وماشا
احنا بناكل سودوق وسمين عشان نحس بمعاناة المواطن المطحون .. اللي اتعمل سودوق


كل سنه وانت طيب يابرنز






سلاموووووووووووووز

TAFATEFO يقول...

@ soooo

كل عام وهو كده

رأسمالي .. اقطاعي

وهو مش من حقه يعاير الناس الغلابه من المصريين بفقرهم وجهلهم .. 50% على أقل أقل تقدير من المصريين مطحونين بين الجهل والفقر .. إن لم تكتمل المعاناه بالمرض

مش من حق حضرتك تعاير الناس بفقرهم وجهلهم

TAFATEFO يقول...

هخلص فيك القديم والجديد

قول حرمت

سايكووو يقول...

وتكون أخبار القتل فى مصر متصدرة يوميا شريط أخبار الجزيرة والعربية بينما تتصدر أنباء انتعاش الاقتصاد القومى وزيارات الرئيس شريط أخبار الفضائية المصرية!!

فعلا احنا بنشوف اخبارنا من بره و كاننا في برج عالي وفي نفس المكان بيحصل اللي ما يحصل و لكن عشان نشوفه محتاجين عدسه مكبره من بعيد و من بره عشان نشوفه

كل عام ونحن بين مطرقة الحكومة.. وسندان المعارضة.. ولا حد حاسس بينا!!

بلاش نقول على اللي فيها فاكر انت قلت ايه في بوكس اند بينز (اهوفي الاخر كله قابض)نقول و لا بلاش .. كفايه اصلا البوست و ميجروش رجلي معاك

مروه فايز

rona يقول...

كل عام واحنا لسه نيميين

غير معرف يقول...

وانت بخير ياختي يعودلك دايما بالخير يارب

هاني فؤاد

مواطن مطحون

محمد عتلم يقول...
أزال المؤلف هذا التعليق.
محمد عتلم يقول...

ياعم ادعيلنا بالرحمه ويجعلها اخر الاحزان
هيا بقت كده ولا ايه ؟؟؟؟
عموما فعلا كلامك مظبووووووووط جدا
والحياه انشاء الله هتكون حلوه وهاديه والجو جميل وطراوه والفلوس كتير والاهالى رائعين والابهات والامهات زى الفل والوظايف على افا من يشيل والاكل متوفر بشده ومن اجود الانواع والاصناف والهوا نضيف ومفيش زحمه خالص ومفيش اطفال شوارع ولا شحاتين ومتسولين والهدوم رخيصه والعربيات سعرها دايما فى النازل والضرايب اتلغت والحمد لله وكل ده كوم وان مفيش مشاكل فى الاسكان والشقق كوم تانى خالص .
انتا بس اللى شايف الحياه من منظور سن الخازوق بس لو شايفها من منظور عين النمله زى باقى الناس مكانش ده بقى حالك وحالى وحال الناس الغلابه كلهم.
احنا بس اللى مش واخدين بالنا وفاهمين غلط .عموما هيا سحابه وتعدى كلها شهرين تلاته وكل حاجه هتكون زى الفل بأذن الله والميه ترجع لمجاريها بس عايزك تدعى الصبح بدرى قبل الزحمه اصل الناس مقضياها دعا وبس وماحيلتهاش حاجه غيره
هاااا .... مبسوطه يا مصر ؟؟؟

محمد عتلم يقول...

على فكره اسف للازعاج بشده
اصلى نسيت اقوللك ان البنزين كمان سعره بالنسبه لمستوى دخل المواطن العادى رخيص جدا جدا
يعنى 1 لتر ب2 جنيه كفايه اوى اوى للاشعال نفس المواطن العادى اللى بيكلمك دلوقتى وطبعا انتا شخصيا هتعمل كده بنفسك وتولع فيا عشان انا زهقتك اوى بس كلامك هوا اللى خلانى اعمل فيك كده بس استحمل تأثير مقالاتك
(اقل من بنزين 95 مش هاقبل)

غير معرف يقول...

ياعم متقرش بس انت لسه شوفت حاجه ...كل سنه وانت منورنا

eman D. يقول...

وحضرتك طيب.

غير معرف يقول...

وجعت قلبنا يااشرف

kochia يقول...

ايه يا عم الكلام ده !!!
وانت طيب يا سيدي

تصدق القولون قام عليا ..
مع اني بكبت ونسياه من فترة

رشا عبد الرازق يقول...

ياااااااااااااه يا أشرف

عارف ضحكة الحسرة لما تكون مرة أوي .... عشان هيه حسره ...
بس حسره
ونقطة آخرالسطر ... وكل عام ويمكن كل عمر واحنا كده

ضحكتني بيها وانت طيب !

beroo يقول...

ايه ده دا عيد ده ولا ايه؟
بس مش مشكلة عيدنا برده هنعمل ايه
لا يجب ان تتمرد علي الحكومة يا رجل
وخاف علي نفسك بقي ها
مامتك محتاجالك
تحياتي
بيروو

عاشــــــ النقاب ـقــــة"نونو" يقول...

السلام عليكم ورحمة الله كل عام وانتم بخير ربنا يسترها يارب ونفوووووق

vamo يقول...

كل عام وانت مصري
كل عام وانت مصري
كل عام وانت مصري

عادي يعني
الناس اتعودت ومبقاش تفرق معاها
وايه يا عم انت بتغيب كده ليه
نفسي كل اما افتح مدونتك الاقي بوست جديد
ونفسي اشوفلك قصيده جديدة
ولا انت بطلت شعر بقى وشغلتك الصحافة والكتب
ايوة يا عم محدش أدك مش بحسد يا عم ربنا يزيدك
بس متغيبش علينا برضه يعني

عاشقه وغلبانه يقول...

كل سنه واحنا في الهم والفقر ده طول ما الحكومهناسيه اننا بني ادمين
اه والله ياجدعان بني ادمين بس واكلين مسرطنات وشاربين ميه مجاري وميتين تحت الصخور ومحروقين بماس كهربائي وطالعين من الفرن طازه

كل سنه وانتوا طيبين

reham يقول...

يا سيدى مش كفاية غربتنا؟..قلبت علييا المواجع..بس بقول ايه ؟ كل سنة وانت طيب..احنا متغربين برة وجوة..هى دى سنين الصبر يا ولدى..تحياتى ليك..بس أحب أزود كلمة..انت نسيت تجيب سيرة الصكوك..يا ريت والنبى حد يلحقلى سهمين فى أى حاجة..تحياتى مرة تانية من دكتورة مصرية على ارض الساموراى

GiGi world يقول...
أزال المؤلف هذا التعليق.
GiGi world يقول...

على فكره انتوا شعب مش بيعجبه حاجه مع انه متمرمغ سوري زي الحمار فى خيرالحكومه وباعاترافنا بما نحن فيه اذن يجب علينا ان نعتذر للحمار

Unknown يقول...

مش يمكن السنة الجايه نكون مختلفين يأشرف؟

محدش يعرف

أخف دم يقول...

السلام عليكم
كل سنة وانتوا طيبين يا أحلى ناس
وكل سنة والحاجات اللى كتبتها دى متبقاش موجودة والحياة الطبيعية ترجع لشعبنا الكريم تانى ..
كل سنة والضحكة دايما موجدة على وشوشنا والابتسامة الصافية ترجع لنا تانى واحنا بنعامل بعض.
كل سنة واحنا بنصل الرحم وترجع لمة العيلة وعدم التفكير فى المادة بس هوه اللى شاغلنا.
كل سنة وكل واحد فيكم رغم كل مشاكله واحباطاته بيحقق كل اللى بيتمناه واللى هيتمناه..
كل سنة وانتوا منورني هنا ف ىأخف دم بنضحك سوا وبنتعلم من بعض كلنا ونفكر سوا.
شيماء الجمال متشكر جدا ياشيماء وسعيد انك بتتابعى العبد لله فى الدستور.. ربنا يديم المودة وبجد قلتلك قى رد سابق على عدد كلمتنا بتاع كتابى بس يبدو انك مش بتقرى التعليق الأخير .. عموما انا بازورك دايما فى المدونة هاجيلك واقوللك فى بيتك .. فى مدونتك يعنى.. وحمد اللله ع السلامة من شرم.
طفاطيفو وسووووووو
انتوا هتعملوا عليا رباطية بقى وعصابة؟؟ برضه مهما عملتوا انتوا الاتننين اغنى اتنين فى مدونين مصر كلهم..كفاية ان واحد منكم قاعد يعمل مشاريع كل شوية وساكن فى انضف حتة فى المعادى والتانى من اغنى اغنياء مصر وعنده عربية وكام لاب توب وكمان موبايل من الغالى.. اقول ايه كمان يا سوووو انت وطفاطيفو؟؟ اوعوا تقربوا لى تانى اصل اقول على كل حاجة.
مروة فايز
يعنى هنتحايل عليك يعنى عشان تجيبيلنا الفيدوهات .. مكنش العشم يامروة.. ههههههه.. انا عارف ان اكيد النت عندك وحش بس معلش لو قدرتى يعنى.. وعموما منورانى يامروة واعى تقولى انا قلت ايه بالنسبة لكه قابض فى الندوة .. خلينا ماشيين جنب الحيط.
زورن: ان شاء الله قريب هتلاقى فيه قصايد .. بس القصايد انا مش بانشرها عشان الديوان الجديد بس .. معلش بس ان شا ءالله هانشر قريب.. وهازود البوستات عشان خطرك طبعا .ز ربنا يقدرنى بس ودعواتك
كل سنة وانتوا طيبين تانى يااحلى ناس
أشرف توفيق

vamo يقول...

الله يخليك ياباشا ده من زوقك
ومبروك مقدماً على الديوان
وانا بجد بموت في شعرك
وانا مستني الديوان

غير معرف يقول...

ياعم اشرف انت عملت زي المعدده هي يارب السنه الجايه تصحى ما تلاقيش لا رئيس بتلات ولايات ولا رئيس له ابن شكله يقرف ويارب تصحى السنه الجاية وتلاقي العيش حلو ومنور والميه نضيفه والمصري له كرامه ووظيفه يارب تصحى السنه اللي حاية تلاقي كل واحد بيتكلم براحته ومقال بيقيل وزاره ومافيش ولا حرامي في البلد ولا رقاصه هه يالا بقى علشان تبطل تكتب وسوقك يوقف وتبقى باير

غير معرف يقول...

شكرا لك يا اشرف على كلامك الجامد ده وانا بنشره لك في منتدى هندسة اسوان وبصراحة انا نفسي اقرا كتاب مبسوطه يامصر بس انا بعت لواحد صاحبي يبعتهولي لانه مشمتوفر عندنا في اسوان اخر بلاد المسلمين

غير معرف يقول...

استاذ اشرف كلماتك رائعه فعلا
عجبتنى جدا جدا
انا بنت مصر

Unknown يقول...

وانت طيب

pubg mobile يقول...

تنظيف غرفة الجلوس تنظيف الحمامات افضل الوان غرف النوم المودرن شركة تنظيف شقق بجازان تنظيف منازل بحائل شركة تنظيف منازل بالبخار بخميس مشيط شركة تنظيف بالبخار بجدة تنظيف المنازل بالرياض