اخبار

الجمعة، ٢١ نوفمبر ٢٠٠٨

نيلها هوه دمى !!


التعريف العلمى للماء:
الماء أصل الحياة فقد جعل الله منه كل شيء حى..تتكون الذرة منه من جزيئين من الهيدروجين وجزئ من الأكسجين.. ليس له لون ولا طعم ولا رائحة.. يوجد بصورته الطبيعية فى الأنهار وفى ماء المطر الصافى، وهو أساسى للحياة.

التعريف المصرى للماء:
الماء هو شيء هلامى لزج يتكون من جزيئين من التراب وجزئ من الكلور ليكون الناتج كتلة من هذا الشيء.. ينزل عادة من صنابير الماء الملوثة فى البيوت.. أحيانا بصورة متدفقة سائلة وأحيانا فى صورة كتل.. واحدة واحدة..وهذا بسبب تشبع المياه بكميات من الفطريات والجراثيم والأعشاب والطحالب تكفى المركز القومى للبحوث لمدة سنة كاملة لقدام.. ولهذا فإن الماء لم يعد للشراب فقط فى المجتمع المصرى بل أصبح غذاءا كاملا باعتبار أن "المية نازلة بخيرها"..ولهذا فإن الماء له طعم بعكس التعريف العلمى الخاطئ السابق الذى وضعه الأقدمون.. كما أنه له لون.. ولكن اختلف المحللون فى اللون الطبيعى للماء المصرى.. فمنهم من قال أنه مائل إلى الاحمرار ومنهم من قال أنه لبنى.. وآخرون أكدوا أنه "داخل على بييج".. ولكن أحد العلماء المصريين أكد أن لون الماء المصرى يتحدد حسب المنطقة المجاورة لمصدر الماء.. فإذا كان بجوار ماسورة للصرف الصحى فاللون أحمر.. وإذا كان بجوار مصنع زيوت فالماء سميك زيتى.. أما إذا كان طبيعيا _جاى من المصنع على هنا علطول_ فلونه يكون طبيعيا.. أخضر بالتأكيد!!
الماء المصرى له رائحة.. هذه حقيقة علمية أكدها المصريون وربما تكتشف هذه الحقيقة عندما تجد مواطنا يمسك كوبا من الماء ويرفعه ليشرب وفى نفس الوقت يسد أنفه بيده الأخرى.. أما معظم الشعب المصرى فقد تعود على رائحة الماء فصار شجاعا قادرا على الشرب بيد واحدة ورافعا شعار "ضربوا الاعور على عينه.. قال هيه خسرانه خسرانه"!!
الماء المصرى عنده كرامة شديدة لا يملكها أى ماء آخر فى العالم.. يكفى أنه عندما علم أن الدولة أصبحت تضيف كميات زائدة من الكلور عليه حتى شعر أنه بلا فائدة وأن كمية الكلور أصبحت أكثر منه شخصيا واكتشف أن الدولة أصبحت تضع ماءا على الكلور وليس كلورا على الماء.. بعد أن اكتشف هذا آثر أن يترك الجمل بما حمل ويترك الميدان للأخ "كلور" ليبرطع فيه.. فأصبح الشعب بحمد الله يشرب كلور صافى "بيور" مية فى المية!!
مصدر الماء الأصلى هو ماء المطر.. وربما يتساءل البعض وكيف يتحول الماء إلى لون آخر خلال رحلته من السماء إلى الأرض.. وقد أجاب العلماء المصريون على هذا السؤال بقولهم أن الماء يمر فى طريقه بكل السحابات السوداء المستوطنة فى مصر وكل تلوث الهواء وكل عودام السيارات الهاربة من الأرض إلى السماء مما يسبب تشبع الماء بهذه الهدايا العريقة لينزل مطعما بما لذ وطاب من الألوان والسميات..
كما أن نهر النيل هو المصدر الأرضى للمياه..ويسألنى البعض عن نهر النيل وهذا سؤال تطول إجابته.. ولكننى سأختصر قائلا أن نهر النيل كان نهرا عظيما يشق مصر من جنوبها إلى شمالها ويمد مصر بالماء والخير الوفير وكان به سد واحد اسمه السد العالى.. أما هذه الأيام ولأن العالم أصبح قرية صغيرة واحنا عمدتها بالصلا ع النبى.. فقد أصبح النيل ترعة صغيرة لا تكاد ترى بالعين المجردة.. تمد مصر بمزيج من الطحالب وورد النيل والمياه الملوثة بالزيوت المتسربة من المصانع العديدة الواقعة على ضفتى النيل إذا افترضنا أنه ما زال يملك ضفتين زى أى نهر محترم!!
وبفضل جهود الدولة فقد أصبح لنهر النيل أكثر من سد.. بل إن السدود العصرية صارت أضخم من السد القديم والملقب ظلما بـ"العالى".. فهناك سدود القمامة وسدود المصانع وسدود المخلفات الحيوانية والصناعية وسدود الحلل والأوانى التى تجلس بهم الست "سعدية" لتغسلها لأن الماء لا يصل إلى بيتها أو لأن ماء النيل الملوث أنضف من ماء الحنفية أو لأن "ما اسخم من سيدى إلا ستى"!!
ويمكنك عزيزى القارئ أن تتعرف أكثر على الماء من خلال تجربة عملية حيث يمكنك أن تنزل إلى بالونة الماء على أى موتور ماء فى عمارة محترمة _إذا افترضنا أن هناك معجزة والمية موجودة مش مقطوعة_ ويمكنك أن تجرب تنظيف هذه البالونة الذى يمر منها الماء إليك وستجد كمية لا بأس بها من الطين مصحوبة ببعض الطحالب الصغيرة وربما أعجبتك القعدة فجلست مشمرا قدميك أمام باب العمارة ومستخدما صنارة للصيد داخل البالونة بدلا من المرمطة أمام أى نهر!!

وفى الختام فإننى أحب أن أستنكر وأدين _كعادتنا دائما_ قول الأستاذ هيرودوت حين قال مخادعا :"مصر هبة النيل"..فقد أثبتنا بالدليل أنه غشنا أو أنه قد مات مغشوشا مثل امتحانات الثانوية العامة.. واللى مش مصدق.. آدى النيل..وآدى مصر!!

هناك ٢٨ تعليقًا:

مهندس مصري بيحب مصر يقول...

للأسف النيل ملوث
و من واقع دراستي للهندسة الصحية
و عملي ببعض مشاريع مياه الشرب
أؤكد لك إن محطات المعالجة لمياه الشرب حالياً لو تم تشغيلها بشكل سليم و مطابق للمواصفات فهي قادرة على إزالة الملوثات الفيزيائية من طمي و رمال و عكارة و أي جزيئات صلبة عن طريق أحواض الترويب و الترسيب و المرشحات الرملية و الزلطية
و يمكنها إزالة الملوثات البيولوجية من بكتريا و طحالب و غيرها عن طريق جرعات مناسبة من الكلور طبقاً للمواصفات تضاف للمياه المرشحة قبل توزيعها على المنازل عن طريق شبكة توزيع من المواسير

لكن تركيب و تصميم المحطات الحالية لا يؤثر على اي ملوثات كيماوية
يعني الصرف الصناعي و الزراعي الموجود في الترع بيمر من محطات التنقية و يوصل لمواسير مياه الشرب عادي خالص و بالهنا و الشفا
اما لو حصل أخطاء او إستهتار في التشغيل فممكن تلاقي عكارة في اللون او كميات كلور زيادة
ده غير طبعا الكسور الكتير في شبكة مواسير توزيع المياه التي تتسبب في إختلاط مياه الشرب بالمياه الجوفية الارضية و تلوثها بالأتربة و ربما مياه الصرف الصحي المتسربة من كسور مماثلة بشبكة الصرف الصحي

هي مشكلة كبيرة قوي
خصوصاً إذا عرفت إن نسبة الفاقد و المتسرب من مياه الشرب على مستوى مصر بالكامل هو 50% من الإنتاج

و أخيراً أحب اقولك إن المياه في مصر لونها نيلي
هو إنت ما درستش الوان قوس قزح و لا ايه ؟
:)

Ahmed يقول...

مياه الشرب في مصر أكبر دليل على عظمة الانسان المصري
فهو الكائن الوحيد القادر على العيش رغم كل مقومات الموت حوله

عماااااار يامصر

Ahmed يقول...

معلش شؤال مهم
ياترى فيه علاقه بين النيل والمقوله المشهوره "يادي النيله؟"

وشكرا

أميرة يقول...

هو نيلها هو دمي ؟؟

بس على كدة دة مابقاش دم بقى خليط من نوع آخر يدعى دم يتعمل عليه موضوع راخر مع اكياس الدم بقى يبقى تحفة

وفكرتني بالمقولة الشهيرة المصري هيفضل مصري النيل رواه والخير جواه

ودي آخرته في الآخر امراض الدنيا ياولداه

______
على فكرة يمكن اول مرة ابقى ضمن اول 10 تعليقات

الف تحية

عالم ماريونت يقول...

اية يا اشرف
قلبت علينا المواجع
دايما كدة في برامج الجمال يقولو اية:
لازم تشربي لتر او لترين ميه يوميا عشان جمال بشرتك
طبقا لنظريتك كدة الواحد بيسف يوميا لتر كلور
يادي النيلة
وقال اية
عشان الكلى حاولوا تشربو مية كتير
انا بموت في المية
بس اعمل اية بقى
كل ما اجي اشربها افتكر
تحياتي ليك
رنا

قلم رصاص يقول...

كلامك زين والله زين

فعلا دي حقائق لاينكرها احد

علي النعمه انت انجزت ياأشرف باشا

هو بعد مانهر النيل بقى تحت السري منتظر ايه منه يعني

ههههههههههههههههههه

تقبل مروري وتحياتي

غير معرف يقول...

مين بيلوث النيل ؟

إحنا :)


وبرة

مش هنلوثها


علشان ..مش عارفة ممكن يكون موجود قانون بده ولا لا


إحنا بس..محتاجين قانون


افتكرت أخويا لما جه..اتكلم عن جمال برة..وإزاي برة نضيف..وقام..بنفسه..رمى من الشباك..الورقة اللي في ايده..قلت له..ما انت دلوقتي..انت اللي جاي هنا..وترمي..قالي..مهي كدة كدة مش نضيفة..




العيب..فينا..ويمكن..محتاجين قانون في حاجات كتيرة..علشان نلتزم..ومنرميش حاجة في النيل..ونتعود شوية نصلح من نفسنا ونتغير :)

غير معرف يقول...

مصر هبة النيل

علشان هو نعمة من ربنا فعلا..


في الثانوي صح..أو في الإعدادي..أو في التاريخ..قالولنا..المقولة دي محتاجة تتعدل..وتبقى..مصر هبة النيل..والمصريين :)


..


لو بس احنا كمصرين..نكون قادرين على ده من تاني..لمصر دلوقتي :)

NilE_QueeN يقول...

انا شوفت الخير الموجود ف بالونة الماتور

Unknown يقول...

بصراحة ولا أكنى قريت حاجة خالص .. رافضة اعرف .. رغم انى عرفت .. فرافضة افهم .. رغم انى فهمت بردو .. فرافضة استوعب او اصدق او اتفاعل او اتفاهم او اى حاجة خالص

الماية اللى نازلة من الحنفية حشربها واطبخ بيها عادى خالص ولا كأنى شايفة حاجة .. العمر واحد والرب واحد

ده غير ان حل المشكلة اساسا اساسا اسسسساااسسسساااا مش فى ايدى انا .. فحتعب نفسى واتعب اعصابى واحرق فى دمى ليه وفى الاخر مالاقيش ماية تطفى الحريقة

أيها السادة الكرام

حسبى الله ونعم الوكيل بجد

Unknown يقول...

المشكله ان كل الكلام اللي انت قلته صح وموجود فعلا

ويرجعو يسألوا نسبة المرضي في مصر بتزيد ليه؟

/:

حاجــ عيال ــات يقول...

نيلها هو دمي
دي حقيقة أنا متأكده منها
ويمكن ده سبب تلوث دماء المصريين بالكامل حتى الأطفال
ماكنش في طفل ابتدائي ولا شاب في مرحلة الجامعه بيشتكي من هبوط بييجي أو دوخة أو او أو ...على حد قول أمي ...إلا في الزمن ده دلوقتي الشاب يساوي الشيب
وعشان كده تلاقي كل شباب المصريين نفسها تغير دمها أو تغير نيلها وتهاجر تدور على دم نضيف تقدر تعيش بيه
جميل كلامك يا أشرف
بالتوفيق

غير معرف يقول...

فعلا مشكلة. مياه النيل الملوثة تسبب الكثير من الأمراض و خاصة الفشل الكلوى.

سايكووو يقول...

باشا يا اشرف من يومك
طبعا فاكر المنصوره من زمن غير بعيد يجي بتاع 13 سنه كنت دايما اعدي ع الكوبري رايح جاي و على امتداد نظري يمين و شمال مكونتش بشوف سطح النيل .. ليه عشان طبعا ورد النيل اللي كان بيشرب ميه بالعبيط قوم ايه جابوا مكن ورفعوا و حطوه ع الشط..كنت بردوا اعدي مالاقيش سطح النيل اقصد يعني كان مغطى بطبقه زيتيه لامعه وافضل طول الطريق اسرح فيه.. وكل اتنين برده يسرحوا فيه .. شايفه السمك و هو بيزفلط زفاليط بين الزيت..و انا عامشه ياروح امك
بصراحه من ناحية كلور و مضاف اليه ميه فدي معاك حق مليون المية لكن في التراب دي بقى مالكش حق لان دي بتساعد على هضم و طحن الطعامالعسير ذي اللحمه اللي منعرفش معناها و العيش اللي معدناش بنشوفهاما الطحالب و الفطريات ده غذاء اولي يعني احنا قربنا شويه نعيش ذي اللي في الفضاء كله في انبوبه واحده
و جزاك و جزانا كل الخير
و عاش النيل مكلور مخضرا محمرا

vamomito يقول...

يصراحة فكرة حلوة اوي انك تتكلم على الموضوع ده
وسلملي على دمي

vamomito يقول...
أزال المؤلف هذا التعليق.
السينيور يقول...

يا عم عادي

بدل ما تتعبوا نفسكم في العصير

اهو بينزل جاهز من الحنفيات

وسلملى على اكوا وبركة اللى برده متعبيه من ميه النيل

دكتور حر يقول...

هو انت اللي مؤلف دي

ما شاء الله

للأسف هو ده نيلنا
وان شئت قول
نيلتنا


ربنا يكرمك ويسترها معانا

الفتى الحزين يقول...

يا راجل
بقى نيلها هو دمك
على كده بقى انا بشرب من دمك كل يوم



ـــــــــــــــ
طيب دلوقتى كلامك ده بتوجهه لمين
للحكومه علشان تضع قانين للحفظ على الميه
وتكون قوانين صارمه
صح؟؟؟؟
طيب فرضنا الحكومه عملت كده
ةحاكمت واحد على عدم الحفاظ على الميه
مش هقولك خد اعدام(مع ان ده المفروض يعنى)
وخد سنه واحده سجن
تفتكر باقى الشعب هيحافظ على الميه
لاء
ده ممكن يعمل مظاهره يطالب فيها ببرائه الشخص ده
ولو بتوجه كلامك للشعب
مش فى مثل بيقول اللى بيشيل قربه مخرومه بتخر عليه !!!!

غروب يقول...

ههههههه
مش ممكن

فعلا هم يبكي وهم يضحك

انا ضحكت لحد مروحى هتطلع وبكيت والله لان فعلا حالنا يبكي

ال مصر هبه النيل ال

على رايك المقوله المفروض تتغير خالص

مصر هبه الطين مثلا

اشكرك على الضحك وعلى البكاء

غروب

koukawy يقول...

و في النهايه بما ان .... نيلها هو دمي
يبقي نستخلص ان دماء الشعب المصري دماء معفنه و ملوثه
ياعععععععععععععععععععععععع
يعني انا لو حللت دم دلوقتي هلقيني كده

ola_barakat يقول...

وتروح بعيد ليه وبالونه موتور ليه يامعلم حط شويه ميه ف اي ازازه بلاستيك وسيبها يومين وتعال شوف لون الازازه بقي ايه ؟ طين طبعا
اسود علي راي عادل امام
بس سيبك انت
مصر بتبني المواطن يا بني وطبعا انت عارف ان البنا لازم يكون علي اساس فاحنا بناخد دلوقتي لاساس وهو طيني طبعا عشان بعد كده نرمي السقف والعمدان بقي ونتسفلت

أخف دم يقول...

صباح العسل والخيرات
وانا اللى كنت فاكر ان المية عمدى أنا بس كده.. اكشتفت ان عندكم المية طلعت أسوأ وأضل سبيلا.
ممكن كلنا نكشف شعرنا ونقعد فى ساعة مغربيةوندعى على الحكومة وجهاز المية ووزارة مياه الشرب والصرف الصحى.. ومش عارف ليه حاطين المية جنب الصرف الصحى فى الوزارة..جايز عشان الاتنين بقوا مع بعض دلوقتى سوا سوا..
يلا سيبوها لله واقروا البوست الجديد.
منورين دايما.
أشرف توفيق

rona يقول...

فعلا المصرى هو الكائن الوحيد الذى يعيش مع كل مقومات الموت

tqwa يقول...

يا عيني علينا يا مصريين في كل حاجه كده ضيعين ربنا يكون في عونا والله ويرحمنا برحمته الواسعه

غير معرف يقول...

هههههههههههههههه أنا كنت داخل اشوف مين دا اللى عامل فيها أخف دم

بس بجد تسلم كلامك جامد جدا

وللأسف حقيقي

أول زيارة ومش الأخيرة ان شاء الله

فرصة سعيدة يا أشرف

غير معرف يقول...

ممكن تقبلنى صديقة جديدة انا قرات كل الحاجات الجميلة اللى حضرتك كتبتها والرسائل الاقدم مع ملاحظة انى اتصالى حديث بالانترنت وكل وسائل المدنية الحديثة

pubg mobile يقول...

تنظيف منازل طرق للتخلص من الروائح الكريهة بالمنزل طرق التخلص من الفوضى بالمنزل ديكورات مطابخ طرق تنظيف منازل بالرياض في وقت قياسي
انواع سيراميك ارضيات وارضيات خشب تنظيف المطبخ وترتيبه