اخبار

الاثنين، ١٠ نوفمبر ٢٠٠٨

نصلك أينما كنت

تحديث
بجد مش متخيلين مدى الفرحة بوجود الناس دى كلها فى حفل توقيع المنصورة..وابتسامة الناس اللى قاعدين فى الحفلة طول اللقاء.. أتمنى ان الجميع يكون استمتع باليوم زى ما انا استمتعت.. والناس حبايبنا اللى ملحقوش نسخ من الكتاب يومها.. فيه دفعة تانية من النسخ هتبقى فى بوك اند بينز المنصورة تانى..والنجاح ده لينا كلنا بفضل الله.
كعادتى الغبية دايما مش باهتم بتصوير وتسجيل الندوات بتاعتى.. فياريت بقى خدمة بسيطة كده من كل حد كان بيصور الحفلة فيديوهات أو صور أو القصائد يبعتها على الإيميل..مضغوطة أو يقسمها هوه.. أنا كنت شايف موبايلات على جميع الأنواع.. خليكوا حلوين وابعتوا الصور والفيدوهات أحسن لكم..كفاية ان مفيش ولا واحد جابلى هدايا حفلات التوقيع..ولا حتى تلاجة باب واحد اديال من القديمة..
تسلموا دايما.
على فكرة قريبا حفل فى جامعة المنصورة.. انتظرونا
ـــــــــــــــــــــــــــــــــــــــــــــــــــــــــــ
يا أهالى البلوجات الكرام
وها قد أتى الموعد المنتظر للأخوة والأخوات أهالى الأقاليم الكرام
حفل توقيع الطبعة الثانية من "مبسوطة يامصر؟" فى مكتبة بوك أند بينز فى المنصورة على المشاية وهذا يوم الأربعاء 12 من نوفمبر الساعة السادسة مساء.
ياريت تنورونا جميعا وتبقى قعدة لذيذة وتعارف اصحاب اكتر من مجرد توقيع.
مستنى كل أصحابنا وحبايبنا فى المنصورة وكل الأقاليم المجاورة عشان الناس اللى مقدرتش تيجى حفل التوقيع فى القاهرة..نصلك أينما كنت.
وبرضه ياريت ماتنسوش هدايا حفلات التوقيع اللى اتفقنا عليها قبل كده.. أيوة بالظبط كده.. التلاجات والغسالات والموبايلات اللى بكاميرتين وبرضه نحن نقبل الفلوس الكاش عشان نريح الزبون.
وده لينك الجروب بتاع المدونة
http://www.facebook.com/group.php?gid=13390151587
وده لينك الجروب بتاع مكتبة بوك أند بينز والإعلان عن الحدث الرهيب الفظيع الشنيع
http://www.facebook.com/event.php?sid=bc508238b1095537f3b5ae275bc71a56&refurl=http%3A%2F%2Fwww.facebook.com%2Fs.php%3Fsid%3Dbc508238b1095537f3b5ae275bc71a56%26q%3D%25D8%25AD%25D9%2581%25D9%2584%2B%25D8%25AA%25D9%2588%25D9%2582%25D9%258A%25D8%25B9%26init%3Dq%26n%3D-1%26o%3D4%26s%3D10%26sf%3Dp&eid=47580712568
يللا مستنيكم هناك
سلام يا اجدع ناس

هناك ٢٣ تعليقًا:

Unknown يقول...

عقبال ماتيجي عندنا يارب

صبرني يارب يقول...

الف مبروك يا اشرف
والله هاحاول اجي ربنا يسهل

بس انا مش جايبه حاجه معايا ياعم

شوف انت هاتقدملنا ايه بقى

ياسمين حميد يقول...

أينما كنت أينما كنت؟
طيب ولو كنت في ألمانيا؟
بانتظار جديدك، اشتقنا لتدويناتك خفيفة الظل

Lady E يقول...

هحاول احضر ان شاء الله

وياريت توزيع الكتاب ميبقاش في المنصورة بس يبقى في معظم المحافظات

ربنا يوفقك
دمت بخير دائما

حاجــ عيال ــات يقول...

هحاول آجي يعني لو خلصت الكوافير قبل معادالحفلة بساعتين ممكن آجي
ولو الفستان اللي كنت حجزاه من فرنسا وصل برده ممكن آجي
يعني في أمل يا أشرف بس خللى والدتك تدعيلك قبل ماتخرج وتقول يارب يجعلك في كل خطوة جهاد مشالي
سلام مؤقت

vamomito يقول...

طب بتقبل شيكات
ولا ممكن نحولك رصيد
هههههههه
ربنا يزيد من طوابعك ياباشا

غير معرف يقول...

اختك او العيال
اولا يا سيدى ربنا يزيك و يبارك على حفلات توقيع الكتاب ... اللى نفسى اعرف هو بيتباع فين عشان اجيبو ايه يا ابو العيال مش عايز تقولى الكتاب بيتباع فين ليه خايف من الحسد .. يا عم احنا مش من المنصوره احنا من اسكندريه .. و بجد مش لاقياه خالص قولى بس بيتوزع فين .. و تانى مره و اخر مره ح اسالك و على العموم الف مبروك كمان مره ... و اللى بيحبنا مايضربش نار عندنا
اختك ام العيال

عالم ماريونت يقول...

العزيز اشرف توفيق:
حقيقي فرحانة موووت انك هتيجي تنور البندر بتاعنا والمنصورة اكيد هتعجبك موت وان شاء الله تكون حفلة توقيع جامدة جدا وعقبال الكتاب التاني والتالت
ربنا يكرم بس وميكونش بس عندي شغل واعرف اجي
المكتبة رائعة وتقريبا مفيش منها كتير هتعجبك اوي
ان شاء الله اشوفك في المكتبة
ربنا يوفقك
رنا

غلبان ... وليا لسان .... DeXTeR! يقول...

إبسط ياعمنا هنزرك بكره :)

بس موش هنسي البيك رولز :P

و تبقي جدع بأه لو جيبت نص كباب مشكل

هع

حاجــ عيال ــات يقول...

الحفلة كانت جميلة ياأشرف ..والحقيقة ماكنتش عاوزة أمشي ..لكن الوقت بالنسبة لي كن مستحيل
ويارب المزيد من النجاحات وان شاء الله أحضر حفلة توقيع الديوان الشعري الثاني

yas يقول...

الحفلة كانت جميلة واستمتعت جدا بالشعر ماعلينا انا الواحد اساسا كان متنح وعايز ينام بس الحفلة كانت حلوة اوى وعقبال الحفلات الكتير الجاية ان شاء الله

غير معرف يقول...

آسفة للتعليق :)

لكن

بالتوفيق لحضرتك

لأني كمان من المنصورة

وبجد بفرح بيكم جدا..بأي حد من المنصورة بشوفه في أي مكان..بينجح وربنا يوفقه فعلا :)


بالتوفيق لحضرتك ان شاء الله :)


أختك :)

غروب يقول...

الف مبروك يا اشرف ......طبعا الحفله كانت زى الفل والبت جهاد لحقيت تجيب فستانها من فرنسا وانا للاسف جيت بفستان قديم من امريكا الجنوبيه

بس بجد اتبسطت اووووووى

يارب كده تيجى تانى في الطبعه الخمسين من الكتاب الالف

غروب

فوكيره يقول...

الفرحه بيبقالها طعم تانى بجد في وسط الاهل ومع ولاد البلد

:)

تستاهل كل خير يا استاذنا بجد

غير معرف يقول...

ايه ياعم أبو دم خفيف
فين مواضيعك اللى كنا بنستناها بدال مانت حولت المدونة لوسيلة دعاية عن كتب سيادتك
اكتب موضوع كويس بقى ياراجل
مستنيينك يا أشرف

سارة درويش يقول...

انا متغااااااااظة امتى حفلة توقيع طنطا ؟؟؟؟؟؟

أخف دم يقول...

ياصباح الفل
ألف الفألف شكر لكل الناس اللى باركوا وهنوا عشان حفلة التوقيع
ألف ألف شكر لكل الناس اللى تعبت نفسها وجت سواء من المنصورة أو محافظات تانية أو مراكز تانية والناس اللى مرضيتش تروح لغاية الساعة عشرة بالليل
شكرا للناس اللى استحملت أربع ساعات حفلة توقيع مش عارف عمرى ما شفت حفلة توقيع اربع ساعات.. ومش عارف انتوا استحملتونى ازاى.
ألف شكر لكل اللى مقدرش ييجى يومها عشان الظروف وان شاء الله نتقابل مرة تانية وتالتة.
ألف شكر لكل الكاميرات والموبايلات والناس اللى وقفت طول الحفلة تصور كل دقيقة.. وياريت بس تبعتولى الحاجات زى ما اتفقنا.. الناس بتوع الجروب بياكلوا وشى على موضوع التصوير ده.. استروا عليا الله يستر عليكم..
إسراء ربنا يسهل وقريبا هتبقى فى بورسعيد حتى لو جينا نشوفكم بس كفاية علينا.
أم العيال
كمان كام يوم واهاكتب لك كل منافذ التوزيع فى اسكندرية ودعواتك عشان يمكن آجى أنا كمان مع الكتب أو بعدهم بشوية.. سلامى لكل أهل اسكندرية.
سمامصر مش عارف بتعتذرى على التعليق ليه.. دى مدونتك تعلقى فيها فى اى وقت ومنورانى دايما.
فوكيرة ربنا يخليك انت وكل الناس اللى بيدعولى واللى معايا علطول وقريبا هنتشرف بيكم فى بورسعيد عشان بجد وحشتنى قعدتكم وأكلات السمك الحلوة.
واحد وخلاص
طيب ياعم متزقش.. حد يكره ان الناس تشاركه فرحته ويقول للناس هوه عمل ايه او ايه الجديد عنده.. وكمان مع كل جديجد باكتب بوست برضه عشان الناس متزهقش.. انت اللى مستعجل ياجميل وده شرف ليا طبعا.. عموما يارب البوست الجديد يعجبك.. ومتزقش تانى.
سمو الأميرة سارة..حفلة توقيع طنطا بعد حفلة توقيع اسوان علطول..هههههههه دعواتك بس.وان شاء الله نتقابل قريب.
متشكرين ياجماعة وربنا يديم المعروف
أشرف توفيق

غير معرف يقول...

لأ أنا مابزقش أصل أنا قريت كتابك وكل ماقرأ المدونة اقراه تانى هو انا ماوراييش الا الكتاب ده؟
وبعدين انت مافيش أحسن من كتاباتك فمتحرمناش منها ربنا مايحرمك من أى حاجة حلوة وربنا يوفقك دايما
اصل لما قريت اللى انا كتبته فى تعليقى اللى فات لقيته رخم أوى وانا مش قصدى والله
أنا أسف يا أشرف
اقبل اعتذارى واكتب حاجة

غير معرف يقول...

نسيت أقولك ان انا مفقوع عشان ماقدرتش احضر حفلة التوقيع بجد والله ولقيت نفسى بحقد على كل اللى حضروا غصب عنى بما فيهم انت
اشمعنى انا ماحضرش وانت تحضر يعنى؟

Mahmoud Bahgat يقول...

بصراحة الكتاب عجبنى جدا و كنت رائع فيه و اوقات كتير اوى كنت بقع على ضهرى من كتر الواقعية اللى بتحكى بيها لانى بفتكر مواقف حصلت لى فعلا و تقريبا بنفس الشكل خاصة كأس الجامعات قسم خطابة، حاجة واحدة خنقتنى جدا و هفترض انك مالكش يد فيها، الكتاب ناقص أربع صفح، بجد!!! اكيد انت متقصدش هتقولى تلاقيك مصور الكتب من واحد صاحبك و نسى يصور لك الصفح دى، اقولك ده انا لفيت ميدان التحرير ساعتين بحالهم عشان ألاقى سى سلينترو بتاعك وفين وفين لما فهمت ان باب العمارة هو نفس الباب اللى بيطلع على مكتبة البلد و دخلت تايه و مش عارف هدور فين ولا فين وفوجئت ان "مرمى"-لا أقصد أى اهانة لكن ده اللى حصل- فوق شوية كتب جنب الموزمزيل الكاشير فقلت لها انا عايز كتاب اشرف توفيق مبسوطة يا مصر راحت ادتهونى بطراطيف صوابعها و رامياه جوه كيس ورق من بتاع البرتقان زمان ده كاتبين عليه مكتبة البلد و الموقع بتعها قولت يمكن حركة جديدة دفعت العشرة جنيه و مشسيت مبسوط انى لاقيت الكتاب و اشتريته بكل سهولة و يسر، روحت و مسكت الكتاب وقلت اقرا صفحتين اتنين بس وفجأة لقيت الصفحة فاضية صفحة كام "66 و 67" وتخيل الكتاب شدنى قده ايه صفحتين لاقيت نفسى فى صفحة 66 بس صدمت لانى كان ممكن اكمل الكتاب فى قعدة واحدة لم ينتهى الموقف عند هذه اللحظة فقد استشطت غضبا -حلوة دى- وقلبت الكتاب اشوف اضحك عليا فى كام صفحة تانى و لقيت وراها بصفحتين برده"70،71" صفحتين تانين فاضيين بيض زى الصينى بعده غسيله مع انى جبت عدسة مكبرة قولت لا يكون مكتوب بخط رفيع و مأأت عينى مش شايف اى حاجة و جبت مظهر الحبر السرى قلت لا يكون كلام سرى و خايف الرقابة تحذفه و برده مفيش حاجة بتظهر قعدت اقرا الكلام اللى قابله كلام عادى مفيش حاجة تمنع ان الكلام يستمر اخيرا قولت ده أكيد خطأ مطبعى مفيش غير أبو أشرف اللى هينصفنى و يرد لى اعتبارى و يبعتلى الصفحتين دول او يوصى مكتبة البلد يغيرو لى الكتاب بعد ما وقعت عليه يجى سنوتشين طعمية و طبق فول بالزيت الحار على كام بقعىة كاتشب ماكدونالدز والله مش هارديز ، على فكرة انا خفت اروح من نفسى كده للمكتبة اقولهم انا عايز اغير الكتاب لان ليا سوابق فى موضوع تغيير الكتب ده كنت فى رابعة ابتدائى و جبت كتاب سلاح التلميذ فى اول السنة من مكتبة جنب المدرسة و بعد ما روحت ماما قلبت فى الكتاب لقيت اكتر من اربع صفح فاضيين -برده مش عارف ايه الحكاية- بكل سلامة نية قالت لى روح غير الكتاب رحت قال لى صاحب المكتبة ده اخر كتاب عندى و الشركة بطلت طبع لان الموسم خلص لكن ممكن يكون عندها مرتجعات هات ابدله من مرتجعات الشركة فوت عليا بعد يومين و خد كتاب جديد بدله -عشان مطولش عليكوا- الحمد لله استلمت الكتاب فعلا قبل الامتحانات باسبوعين و كانت فرحة ما بعدها فرحة ولا فرحة الشبكة الجديدة اللى جابوها للشعب الشومبونجى واخدت الكتاب بالحضن و قررت انى مرجعش كتاب غير لما استلم بداله و قصص تانية كتير مع كتب المدرسة اللى نصها كان بيبقى ورق ابيض و مينفعش ترجع الكتاب و خاصة كتب النماذج اللى كانت صفح الاجابة بيضا زى ما يكون قصدين لانهم مش عارفين اجوبة الاسئلة اللى حاطينها، شكرا لسعة صدرك لو قريت الكلام ده كله وشكرا لتنفيضك لو نطيت للسطر ده على طول و شكرا لك لو بدلت الكتاب و متشكر على الاخر لو رضيت عليا و هكون اتعس واحد فى الدنيا لو مسحت الرد ده و مش عارف هأعمل فى نفسى ايه لو معملتش لنت اى حاجة من اللى فاتت دى مرسى جدا ليك و فى انتظار كتب تانية من تأليفك. سلام

سارة درويش يقول...

هههههههههه مش عارفة ليه حاسة اني هشوف المشمش قبل ما اشوف حفلة توقيع في طنطا :((
السلام وصل على فكرة .. بس انا زعلانة ازاي بس تسيب عم دكستر يقول عليا مستخسرة فلوس المواصلات ؟؟
انا والله ما استخسرتش اصلي كنت واثقة اني لما هاجي هاجي مع اي حد .. مع اخويا مع ماما مع بابا أي حد كبير اتثكلن عليه ويدفعلي هههههههههه
ان شاء الله قريب هتوصلك دعوة رسمية من الكلية علشان تنورنا في ندوة .. الموضوع دلوقتي في مكتب وكيل الكلية .. يا مسهل يااااااااارب

غير معرف يقول...

السلام عليكم ورحمة الله وبركاته
انا بهنيك بكلامك الى اسعدنى واسعد ناس كتيرة من اسلوبك الممتع لنا انت سعدك من المنصورة وانا سمعت ان سعدك بتكتب و
عامل كتبوياريت تقولى على اسم الكتاب وفين مكانه فى اى مكتبه
وهتسعدنى اكتر ازا رديت بسوالى
والف مبروك ومستنين النجاح الدائم
وكل سنة وانت بخير
الراسله حياتى كلها لله

pubg mobile يقول...

المدونة خدمات الصيانة خدمات الصيانة بالدمام خدمات الصيانة بالرياض خدمات الصيانة بالمدينة خدمات الصيانة بجدة خدمات الصيانة بمكة