اخبار

الخميس، 3 يوليو، 2008

دعاء المسروقين تدوينيا


يارب اللى سرق منى حاجة.. يكون تليفونه بايظ من زمان ومايشتغلش إلا الشهر ده بعد ما ولاد المفترية زودوا الفواتير وقيمة الاشتراك

يارب اللى سرق منى حاجة.. تطلع له فسفوسة فى مكان حساس رِجله يعنى .. ولما ييجى يقعد عليها على رِجله يعنى مايعرفش يقعد

يارب اللى سرق منى حاجة .. يشوف الإعلان بتاع وقفة مصرية يفضل واقف ومحدش يقف معاه.. يبقى على كوبرى قصر النيل شايف الأسدين قاعدين وهوه واقف زى عود القصب

يارب اللى سرق منى حاجة .. أبوه يفصل الدش عشان القنوات إياها .. وبتاع الوصلة يشيلها عشان مادفعوش فلوس الشهر.. ومايبقاش قدامه إلا تامر أمين فى البيت بيتك وجلسات مجلس الشعب

يارب اللى سرق منى حاجة.. يدخل انتخابات نادى الزمالك عشان مرتضى منصور يجيب ملف اسود بعمايله من ايام ما كان فكرة قليلة الأدب فى دماغ ابوه قبل ما يتجوز أمه

يارب اللى سرقت منى حاجة.. يكتشفوا انها ساقطة ثانوية عامة فيرجعوها ثانوية تانى وتيجى صورتها فى تقرير العاشرة مساءا بعد امتحان الفيزيا وهيه ماسكة الموبايل وبتعيط وبتقول لمامتها : ده ذنب أشرف ياماما .. عاااااااا

يارب اللى سرق منى حاجة .. أجيله أنا فى الأحلام كده وتبقى أحلام من نوعية أحلام فيلم معالى الوزير .. ومايعرفش ينام إلا ف مكانين .. الحمام أو قدام قصر الرئاسة عشان يتبوأ فى أمريكا اللاتينية بقى

يارب اللى سرق منى حاجة .. يحلم وهوه نايم بكل الوزرا واحد واحد .. وكل واحد منهم بيضربه على قفاه .. ولما قفاه يورم وييجى يقوم مفزوع .. أطلع له أنا بقى على باب الحلم وأقول له: ارجع يامعفن .. لسة رئيس الوزرا

يارب اللى سرق منى حاجة.. ابوه يسافر ويضطر باعتبار انه راجل البيت انه هوه يقوم الصبح يقف فى طابور العيش .. أنا عارف انه عقاب صعب بس هوه يستاهل يعنى

يارب اللى سرق منى حاجة.. يجيله دور برد جامد .. تبقى فتحة من مناخيره فيها زكام.. والتانية بتسيـّل يعنى.. ويقعد بقى يتنطط عشان مش ملاحق لا شهيق ولا زفير.. بتبقى حركة صعبة بصراحة

يارب اللى سرق منى حاجة.. ييجى يدفع فاتورة التليفون يكتشف انه عليه فاتورة 300 جنيه دولى وهوه أصلا مش مركّب دولى

يارب اللى سرق منى حاجة .. ييجى يصب الدور التانى يكتشف ان ناقص سيخ حديد.. يروح فى طابور الحديد عشان يجيب سيخ .. يكتشف ان كل الحديد فى السوق السودا وسعره 8 تلاف جنيه.. يرجع محسور ويعيط .. ييجى ابوه يلومه ويقول له: لو كنت محترم ومسرقتش حاجة من أشرف .. كان ربنا رزقك بسيخ .. روح يا سيخ ربنا ياخدك

يارب اللى سرق منى حاجة ..يبقى من ضمن الخمسة مليون شاب اللى كل شهر بييجى خبر تعيينهم فى الأهرام الصفحة الأولى ولا عمرهم شافوا تعيين..المفروض ان حكومتنا عينت مليار شاب دلوقتى.. باعتبار ان حكومتنا بتعين شباب الصين

يارب الجرنال اللى سرق منى حاجة.. يكتشفوا انه قال على الوزرا انهم بيدخلوا الحمام زى البشر العاديين .. فيترفع على الجرنال قضية سب وقذف بعنوان " قضية حمامات الوزرا" زى صحة الرئيس كده

يارب الموقع اللى سرق منى حاجة.. كل أعضاؤه ينسوا الباسوورد فجأة.. والسيرفر يقع.. والاسم يتسرق.. والدنيا كلها تتقلب..ومتبقاش فيه حاجة عدلة.. زى فيلم حين ميسرة

يارب الصحفى اللى سرق منى حاجة .. تدور الأيام عشان حظه النحس ويشتغل مع عبد الله كمال أو كرم جبر عشان يشوفهم كل يوم.. يللا بقى

يارب البرنامج اللى سرق منى حاجة .. كل المعدين والمقدمين يحصل لهم زى حسين رياض فى رد قلبى .. لما اتخرس عشان أبو إنجى مش عايز يجوزها لابن الجناينى.. ويطلعوا بقى فى البرامج كلها يقولوا : هـَبا هـَبا .. ويبقى إعلان القناة : قناة الخـُرْس الفضائية ترحب بكم

هناك 60 تعليقًا:

Romio 88 يقول...

مش مصدق

مش مصدق

وربنا المعبود مامصدق انا اول واحد يشوف البوست

يبنى ده انا وربنا لقيتك وحشتنى قمت قلت اخش اشوف اشرف يمكن كتب حاجة جديدة
على العموم يا اشرف باشا

امييييييييييييييييييييييييييين

بس بلاش حكاية العيش دى والنبى :D :D :D

Ahmed Shokeir يقول...

Post of the day
(:

خمسة فضفضة يقول...

السلام عليكم ورحمة الله وبركاته

يا خباااااااااااار يا اشرف
دانت قلب اسود اوي ولا البدنجان الرومي في عز الموسم بتاعه اللي هو اليومين دول يعني :)))))))))

طب يارب اللي سرق من اشرف حاجه يجيلو ويحط عليه ويفيض علي اللي حواليه


ملحوسه :

لقيت بثينه كامل العدد اللي فات من الدستور الاسبوعي ناشره امتحان العربي بتاعك وبتقول انه جاها في ايميل ومش عارفه صاحبه
وسؤال هنا يطرح نفسه : هل بوثبوث هاتدخل ضمن الناس المدعو عليهم اعلاه ؟؟؟

سلام

MAYODA يقول...

ايه داااا
انا جايه بعد 45 دكيكه بسسس
لقيت تنبيه عندي جيت
عسل اوي بجد ..بس بلاش حكاية الدش يفصل دي..اصله فاصل عندي اعااااا
وبشوف تامر امين كل يوم
من غير ما اسرق حاجه من حد والله ...

عاشقة الحب يقول...

هههههه

الله المستعان .. ربنا على الظالم

Unique يقول...

ههههههه

ربنا معاك .. تحياتي

زهرة الياسمين يقول...

ههههههههههههههههههههههههههههههههههههههههههه
يستاهل
هو اللى جابه لنفسه
آمين آآآآآآآآآآمين

GeHaD-----(male) يقول...

اول حاجه احب اقولها امين امين يارب العالمين

ثانيا فعلا هههههههههههههههه انت باين عليك اتنشلت كتير اوي اوي ربنا يكون في عونك احسن حاجه اخرم جيبك
هههههههه

تحياتي علي البوست الرائع

الله...الوطن...أما نشوف يقول...

هههههههههههههه!!!
يا رب اسمع منه يا رب!

Ma 3lina يقول...

يا بنى شاورلنا بس على اللبيسرق منك و احنا نقطعه :)))

semsema يقول...

ماشاء الله مدونة في قمة الروعه
واللهم اميييييين
بس انا لي طلب مش طلب سرقة بس طلب نقل وحقوق النقل محفوظة
ها موافقة ولا .......؟
سعيدة بزيارتي لمدونة حضرتك خفيفة الدم
وان شاء الله ضيف تقيل مش همشي منها
تحياتي

ayman badr يقول...

ايه يا عم اشرفكل دى دعوات ربنا يعينك على اللى بيسرقوا شغلك ومجهودك دول كشفت راسى ودعيت معاك
تحياتى

كلام وخلاص يقول...

امين يارب
تحفة كالعادة
ربنا يوفقك

مـحـمـد مـفـيـد يقول...

يخرب عقلك يا اشرف
بعد كل ده محدش هيقرب للمدونه خالص

بيسوو يقول...

بلاش العيش يا اشرف حرام بجد...وكمان بلاش موضوع المناخير علشان بتضايق قوي لما بتبقى مزكم

يارب يروحوا سانت كاترين في شهر 8 علشان يحمروا من كتر الشمس ويلتهبوا وتقوم انت حاطط على الالتهابات ملح خشن...نياهاهاهاهاهاهاها شريرة انا مش كدة؟

:):)

Amr Fekry يقول...

:D

واحدة مفروسة يقول...

هههههههههههههه
حلوه قوي....
ياريت تيجي تزورنا فى مدونة فرنسا و الرايق
سلام

TAFATEFO يقول...

آمين

على فكره رحت التكعيبه النهارده كان نفسي أشوفك لقيتك مشيت .. وقلت لـ عادل محمد انه لازم يخليني أقابلك.

محمود محمود يقول...

أيه ياعم الكلام اللى يخوف دا أنا لما كنت بقول انى هاسرق منك الكتاب كنت بهزر ... أه وربنا بهزر ياعم وبلاش حكاية الفسفوسه دى أصل من ساعة ماقريتها وانا مش عارف أقعد على (رجلى) مع انى ماعنديش رجل قصدى فسفوسه
وانا ياعم لقيت واحد يبيع لى قصايده وفيهم قصيدة الحلزونه عارفها؟ بتاع مرجان أحمد مرجان يعن مش مضطر أسرقك دلوقتى عشان مش مستعد للفسافيس

المهم فعلا أنا عاوز الكتاب زى ماوعدتنى يعنى اعمل حسابى فى نسخه وياريت تقولى أقابلك ازاى وماتكونش عزومة مراكبيه ينفع؟

NilE_QueeN يقول...

دا انت موجوع اوى من الحراميه دول

ربنا يستجيبلك يا عم

سمو الأميرة سارة يقول...

ههههههههههههههههههههههههههههههههههههههههههههههههههههههههههههههههههههههههههه

آآآآآآآآآآآآآآمييييييييييييييييييييييييين ياااااااااااااااااااااااارب

محمد سلامة يقول...

البوست ده يا صديقي الإنترنتي للأسف أقل بكتير من بوستاتك السابقة الرائعة أنت أجمد من كده بعض المقاطع في البوست يمكن حزفها بسهولة و مش هتفرق على سبيل المثال و ليس الحصر
1

يارب اللى سرق منى حاجة.. تطلع له فسفوسة فى مكان حساس رِجله يعنى .. ولما ييجى يقعد عليها على رِجله يعنى مايعرفش يقعد

2

يارب اللى سرق منى حاجة.. يجيله دور برد جامد .. تبقى فتحة من مناخيره فيها زكام.. والتانية بتسيـّل يعنى.. ويقعد بقى يتنطط عشان مش ملاحق لا شهيق ولا زفير.. بتبقى حركة صعبة بصراحة

3

يارب البرنامج اللى سرق منى حاجة .. كل المعدين والمقدمين يحصل لهم زى حسين رياض فى رد قلبى .. لما اتخرس عشان أبو إنجى مش عايز يجوزها لابن الجناينى.. ويطلعوا بقى فى البرامج كلها يقولوا : هـَبا هـَبا .. ويبقى إعلان القناة : قناة الخـُرْس الفضائية ترحب بكم

هذه المقاطع يا صديقي عالة على النص أشعر و كأن الغرض منها تطويل النص فقط بلإضافة إلى أن المقاطع الأخرى مفيهاش الحرفية الجامدة اللي كانت في البوستات السابقة بلفظ أخر ( الصياعة )
البوست مش في حجم أشرف توفيق لدرجة اني فكرت في انك سرقه من حد
أنت أكبر من البوست ده و عندك أحسن من كده كتير
بس معلش أنا عارف أن مفيش فنان بيفضل دايما على مستوى القمة
أحيانا بينزل شوية بس بسرعة بيرجع يرتفع تاني لأنه موهوب حقيقي و أنت كده يا برنس
أنا طبعا بقول كده لأني بغير على الفنان الحقيقي و لولا أن أنت حد جامد مكنتش ضيعت و قتي في كتابة التعليق ده

محمود ماجد يقول...

انا زعلان جداً لأن رغم إن علاقتي بعالم التدوين بقالها اكتر من سنتين إلا إني ما اكتشفتش المدونة دي غير النهاردة ،

ايه المدونة الجامدة دي يا عم انت ، فظيعة بجد ،

Miss. Sosa يقول...

آمين آمبن آمبن

ربنا يبعد عنك الحرامية والحراميين

قطعت قلبي يا شيخ والدمعة هتفر من عيني

وبعد ماصعبت عليه كدا انا خلاص قررت اساعدك

تعمل ايه يا عبرحيم

تعمل ايه يا عبرحيم

تعمل ايه يا عبرحيم

بص يا سيدي الحل بسيط

احنا هنعمل عمل وندفنه تحت بانر المدونة

اه صحيح انت ماعندكش بانر

خلاص هنفدنه تحت عتبة التعليقات

علشان كل ما يمد ايده ويسرق يتعلق من لغاليغوه وبكدا يبقى حلت عليه لعنة اشرف وديه اسود من لعنة حتشبسوت والعن من لعنة آمون رع

يلا يا سيدي اي خدمة وما نجلكش في حاجة وحشة يارب

سلااااااام

Sometimes يقول...

ياااااااااااه ده انت شايل بجد منهم

بصراحه عندك حق
بس ده معناه ان انت كويس وكويس اوى كمان

ربنا يقدملك الخير فى كل خطوة يارب ويوفقك

لماضة يقول...

ههههههههههه
وانا بدعي معاك يا اشرف وبقول امين
ويارب يدوسه اتوبيس سياحي فاخر من اياه

أحمد كمال يقول...

تصدق بالله يا أشرف ؟ يا أخي قول لا إله إلا الله ..

أنا أول مرة أضحك و أنا بقرأ مدونة بالشكل ده ، و ده معناه إما إنك أخف دم فعلا ، أو مراتي كانت حطالي حاجة في المكرونة ، و في كلا الحالتين اللهم اجعله خير :)

تحياتي

موناليزا يقول...

ههههههههههههههههههههههه
آمين آمين آمين
انت وانا وكل اللى اتسرق منهم

محمد فكري يقول...

ربنا يسمع منك يا أشرف....
انا عاوز أقوللك إني هاسرق منك الأدعية دي كلها ههههههههههه وأدعي بيها..
لأن موقف السرقة صعب...انا عارف..
والأصعب لما الحرامي يبقى مخه تخين..ويحب يعدل في القصيدة.. هههههههههه
يللا ربنا يستر..
سلام يا باشا

Mohamed Hamdy يقول...

رغم انى بكره السرقه الالكترونيه
بس دعاء حديد عز وافران العيش ده بجد عذاب لا تتمناه لألد اعداءك

تحياتى .. انت عبقرى بجد

No Fear يقول...

السلام عليكم
اللهم أمين
خصوصا الفسفوسة
بدل البهدلة دي كلها روح أعمل محضر في القسم علشان مش هيعملوا لك حاجة و أبقي وريني هتدعي تقول عليهم أية؟

كلبوشستان يقول...

يا ساتر يارب دا انت قلبك اسود اوي
فيها ايه يعني يا اخي لما مواطن شريف يساعد اخوه المواطن الشريف بردك بكام بوست على كام صورة على حتتين فيديو
على العموم يا سيدي ربنا يكفينا شر السارقين ودعاء المسروقين
وبوست قليل يمنع بلاوي كتير وياهنياله مدون الخير
كان معكم محدثكم كلبوش

مجنونة وبكيفي يقول...

لا دا انتا شكلك واصل وزعلك وحش

ربنا يتوب عليك من الحرامية والنشالين :d

sakayar يقول...

أبو اشرف حبيب قلبي
اذاعة ابوظبي ترحب بكم وبتقولك
وربنا انا ما سرقت حاجة وابويا كان سافر وانا كنت بعمل العقاب ده بس وربنا ما سرقت
بس دلوقتي سافرت وانا سبته يتعاقب هههههههههههههه
وحشتني طحن جدا
وبعدين بالنسبة للدعاء فمعنديش غير كلمة واحدة
آآمييييييييييييييييين

mostafa rayan يقول...

اشرف حبيبي معني ان كل دول يسرقوا منك انك راجل جامد قوي
وانا ياعم بدعي وراك وبقول امييييييييينننننننننننن

shady يقول...

يا رب يا اشرف اللي سرق منك حاجة يقرا البوست دا تجيله جلطة ربنا يوعده بدكتور خايب يدخلعه في غيبوبة ويفضل علي جهاز الانعاش طول عمره بيحلم بصوت التلفزيون بعد انقطاع الارسال .. شششششش

يا رب اللي يسرق منك بوست يقعد سنة مع عبسميع في شقة واحدة

يا رب اللي سرق منك بوست يرقا مقالات مكمتاز القط يوميا ولا كفاية عليه مقال واحد .. حرام اكتر من كده

يا رب اللي سرق منك حاجة تبقا مليته مش معتمدة

روح يا شيخ ربنا يديك علي قد نيتي

Dr_Nightwing يقول...

مش عارف بطل ضحك

:)

FaceMoon يقول...

ههههههههه كالعادة ادخلت البسمة الى قلبى
واكيد اللى سرق منك حاجة اكيد اكيد جرالة حاجة واحتمال يكون مات بعد الدعوات دى كلها
ويارب يارب اللى سرق منك حاجة ربنا يهدية بقى ويعقل
تحياتى
اة نسيت اقول اميييييييييين

مغرم ..ولكن يقول...

ربنا يكفيك شر العين
وكل الحرامين
الرفيع منهم والتخين
وطويل الكفين
واحمر العين
رقيتك واسترقيتك من كل عين
ولو حد سرقك وزعلان
بجيب لك كحك وبنين

شيمـــــاء يقول...

يا رب اللى يجيى عليك
يدوسه اتوبيس سياحى فاخر عادل امام عارفه

أحسن تـستاهـل يقول...

من بؤك لباب السما
والسامعييييييييـن يقولوا آميييييييييين

مها ميهوووو

دعاء مواجهات يقول...

هههههههههههههههههههه

اية بس الجمدان دة

اول مرة اجى هنا وبجد ندمت اوى

فعلا اخف دم

تحياتى لكل الدعوات الجامدةوآمين ياارب

بيس

منتظراك عندى لااازم..

esraa يقول...

هههههههههههههههه

تحفه يأشرف بجد

أمين ياسيدي عشان محدش يسرق منك حاجه تاني

(:

maioya يقول...

هوا تقريبا
اللي هايسرق هايخاف
يجي تاني
امييييييييييين

Do not Press F1 يقول...

السلام عليكم
بجد دمك خفيف موووووت

روح يا شيخ يارب كل اللى يسرق منك فكرة بوست يجيله شلل رباعى فى الكبيورد بتاعه ويجيله فايرس فى جهازه
قول آمين

آآآمين

سلاموز

ياسمين حميد يقول...

هههههههههههههههههههه
دمك خفيف حتى في الدعاء

يارب اللي يسرق من أي مدون يشرب شراب الصراحة ويفضح نفسه (أفتكر كدة كفاية عليه)
قولوا آمين

حمامة يقول...

يالله

ده انا مخنوق منهم اوى

هو انت اتسرقت كام مرة بقى على كده

يارب يا سيدى يهدى الجميع :)

محمد الكومي يقول...

المهم تكون كاشف راسك و انت بتدعي لحسن الدعاء ده كله يطلع على فاشوش

مجرد فتاة يقول...

هههههههههههههههه

جميل جدا يا أخ أشرف

مش معقولة كول دا هيحصلي ؟

لا لا متفهمش غلت انا مسرقتش منك حاجة
باستثناء
الغسالة
والبوتاجاز
والتلاجة
والراديو
وأهم حاجة المحفظة

يعني أظن ان دي مسمهاش سرقة دي مجرد استعارة للأبد ههههههههه

وانت أكيد شخص كريم ومش هتمانع

موضوع جميل في الحقيقة
بس لو كانت ساعة إجابة

يبقى الله يكون في عون اللي سرق منك

هوا اللي جابه لنفسه كان ييجي يسرق مني ومش هقوله حاجة

غير

يارب اللي سرق مني حاجة يتحول لضفدع مراته خلعته في نوص شهر العسل


سلاموز بالمانجا اللي هنعصرها

مليش دعوة انت اللي كاتب الحياة مانجا ولازم نعصرها :$

سلامي للجميع

مجرد فتاة يقول...

سوري مش انت اللي كاتب ... آسفة !!

اربعين سنة ستيوتند يقول...

تحفة جداااااااااااااااااا
رائع و موهوب و رهيب
و يا رب اللي ميعلقش علي البوست ده و يقول انه حلو ويندوزه يقع

NoRaaMaHdy يقول...

ههههههههههههههه

يانهار ابيض دا انت شايل قوى فى قلبك

ربنا معك ويرحمك من نشلين النت قول امييييييييييييييين

تحياتى (:

شموسة يقول...

اشرف..

إيه كل الدعا ده؟
الله يهديه ويكون في عونك ..
انا عارفه انه مومقف صعب.
بس انت اترك امرك لله

شموسه

L0vElYGh0sT14 يقول...

يارب اللى سرق منى حاجة .. أجيله أنا فى الأحلام كده وتبقى أحلام من نوعية أحلام فيلم معالى الوزير .. ومايعرفش ينام إلا ف مكانين .. الحمام أو قدام قصر الرئاسة عشان يتبوأ فى أمريكا اللاتينية بقى.
أههههخخخخخ حلووة والله حلوووة
بجد البوست جميل والكلام فيه أجمل
أههخخخ أحترماتي

أخف دم يقول...

السلام عليكم ورحمة الله وبركاته
يا أهلا بأحلى ناس
أحمد باشا صبح .ز مش مصدق ليه بس ياكبير؟؟ ياعم احنا اخوات واتشرف بيك هنا بجد.. لو اعرف انك هتفرح اعمل لك كل يوم بوست جديد واتصل بيك عشان تعلق الأول.. منورنى يا احمد
الدكتورة خمسة فضفضة
منورانى طبعا وبثينة كامل أنا بعت لها إيميل وردت عليا بكلام جميل جداومواساة على اللى بيحصل معايا يبقى أكيد هيه مش من المدعو عليهم
الدكتورة ما علينا : مش ملاحق اشاور والله .. كل ما اقفش واحد .. الاقى جرنال اشتغل.. اشتم فى جرنال واروح له الاقى برنامج قاله.. لما خلاص بقيت شاكك ان الحاجات دى بتاعتى
سمسمة
المدونة مدونتك فى أى وقت .. اتفضلى خدى اللى انت عايزاه بس ياريت تكتبى الاسم عشان غيرك بس يعرف.. وربنا يكرمك على شعورك وعلى استئذانك
تفاتيفو
انا اللى اتشرف بيك وبمعرفتك يا راجل.. حدد المعاد والمكان وتسليم البضاعة وانا تحت أمرك
منورنى
محمود محمود
والله مش عزومة مراكبية يامحمود وانا تحت أمرك بجد والديوان موجود .ز وممكن نتقابل قريب فى حفل توقيع الكتاب الجديجد ان شاء الله .. وساعتها هنتعرف ونحدد المواعيد اللى تناسبنا بقى واحنا اصحاب اساسا
محمد سلامة باشا
يامحمد مش لازم كل البوستات تبقى خفيفة الدم كده لو هيه فعلا كده يعنى
وبعدين قدر مرارة الحسرة اللى انا فيها من السرقات دى ياعم.. وعموما هحاول اظبط البوستات الجاية ياكبير
ربنا يكرمك تانى على ثقتك وعلى معرفتك
مستنيك قريب فى حفلة التوقيع
أحمد كمال يارب اكون اخف دم بالنسبة لك فعلا .. ويارب تكون المكرونة حلوة برضه عشان منغلطش يعنى منورنى ياجميل
وأخيرا
ربنا يكرمك يا جماعة على وقوفكم جنبى وعلى ضحكم اللى بيفرحنى والله.. ودعواتكم ليا وضد اللى بيسرق أجمل وأحلى واخف دم منى بكتير
ربنا يديم المعروف دايما ويخلينا لبعض ودعواتكم ليا فى الكتاب الجديد
سلام يا أحلى ناس

appy يقول...

يا رب اللى يزعلك يروح فى اى حته وميرجعش منها وكل ما يلاقى نفسه هيرجع يغلط تانى ههههههههههه

Dr/ walaa salah يقول...

السلام عليكم ورحمة الله وبركاته

اسجل اعجابي مره اخرى بمدونتك ا/اشرف وبدمها الخفيف والظريف


وايضاً بحب اسجل إعجابي الشديد بكلماتك في خواطرك واشعارك

غير معرف يقول...

ma shaa Allah
Really, fantastic
God bless you

غير معرف يقول...

A片,A片,成人網站,成人影片,色情,情色網,情色,AV,AV女優,成人影城,成人,色情A片,日本AV,免費成人影片,成人影片,SEX,免費A片,A片下載,免費A片下載,做愛,情色A片,色情影片,H漫,A漫,18成人

a片,色情影片,情色電影,a片,色情,情色網,情色,av,av女優,成人影城,成人,色情a片,日本av,免費成人影片,成人影片,情色a片,sex,免費a片,a片下載,免費a片下載,成人網站,做愛,自拍

情趣用品,情趣用品,情趣,情趣

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品
情趣用品,情趣用品,情趣用品,情趣用品.情趣,情趣,情趣,情趣.
視訊聊天室

情色,AV女優,UT聊天室,聊天室,A片,視訊聊天室


UT聊天室,視訊聊天室,辣妹視訊,視訊辣妹,情色視訊,視訊,080視訊聊天室,視訊交友90739,美女視訊,視訊美女,免費視訊聊天室,免費視訊聊天,免費視訊,視訊聊天室,視訊聊天,視訊交友網,視訊交友,情人視訊網,成人視訊,哈啦聊天室,UT聊天室,豆豆聊天室,
聊天室,聊天,色情聊天室,色情,尋夢園聊天室,聊天室尋夢園,080聊天室,080苗栗人聊天室,柔情聊天網,小高聊天室,上班族聊天室,080中部人聊天室,中部人聊天室,成人聊天室,成人

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه