اخبار

الأحد، ٢ ديسمبر ٢٠٠٧

الوليد هايص وانا لايص

الشتا دخل.. وقلت اروح بقى أجيب كام طقم شتوى..يوسف قال لى: فيه هدوم حلوة فى كارفور..أنا اقول له ياعم الأسعار هناك غالية وهوه يقول لى لا رخيصة وعلى طريقة حسين رياض لازم تغنى يامنعم قال لى هنروح كارفور يا أشرف
طبعا مادام احنا رايحين كارفور بقى لازم أجهز نفسى بمبلغ محترم.. طلَّعت الميتين جنيه اللى حِيلتى.. وقلت يللا انشالله ماحدّ حَوّش.. أنا هاجيب جاكت وقميص وبنطلون جينز وطبعا هاعزم يوسف عشان المشوار بقى والباقى يكفينى لآخر الشهر
دخلنا كارفور وانا فاكر ان المكان هيبقى فاضى.. كام واحد فى مصر يعنى معاه ميتين جنيه؟؟ لقيت المكان مليان ناس..أكيد الناس دى عاملين جمعيات بقى وقابضين الأول.. المهم مشيت فى المكان أدوّر على أىّ حاجة أساسا تمَنها أقلّ من ميتين جنيه مالقيتش..الجواكت القمصان البناطيل كله أغلى..الحاجة الوحيدة اللى كانت أرخص من ميتين جنيه باكو صابون حلو كده محترم.. بس مرضيتش اشترى باعتبار ان احنا خَدْنا صابونة من غير ما نشترى فوفَّرنا بقى
خرجت من المول بالميتين جنيه بتوعى وانا ماسك قميصى وشايف الناس طالعة محَمّلة حاجات.. وكأنى باقول لهم: استروا عليا الله يستر عليكم
المهم بعد ماروَّحت لقيت خبر لذيذ جميل بيقول ان الأمير الوليد بن طلال اتصنَّف أغنى أغنياء الشرق الأوسط برصيد عشرين مليار دولار
كام صفر دول؟؟؟
أكيد الراجل ده بقى بيشترى من كارفور..أيون حضرتك.. مافيش حد هيشترى مسطرة بخمسة جنيه من كارفور وهيَّه تمنها ربع جنيه من عند مكتبة ابو حمادة إلا الوليد بن طلال
سمعت ان الوليد جوَّز بنتُه قريِّب.. طب جوّزْها مِين.. أكيد جَوِّزها راجل غنى عشان يمكن الوليد طمعان فى فلوس جُوز بنته وللا حاجة..وأكيد لما عرسان كانت بتيجى لبنته كان السؤال التقليدى عندك كام صفر يابنى؟؟
طب الراجل ده معندوش بنت تانية طيب عايزة تتجوز؟؟ أنا اعرف واحد اسمه أشرف ساكن فى المعادى فى عمارة فيها أسانسير وربنا وبواب كمان والشقة شِرحَة وبِرحَة ويرمَحْ فيها الفار
مواصفاتى: أبلغ من العُمر اللى هيه عايزاه..لا طويل ولا قصير .. لا تخين ولا رفيع.. لا ابيض ولا اسمر..كلنا بصوت واحد نقول: عروستى؟؟ أعتمد على ربنا ثم نفسى وان شاء الله بعد الجواز هاعتمد على ربنا ثم فلوسها..أشارك فى الأثاث.. أثاث إيه بالميتين جنيه بتوعك ياعم؟؟ لا أنا هاشارك فى الأثاث بطقم كوبايات نضيف
يسألنى البعض حلوة البعض دى وإيه مواصفاتك فى العروسة بنت الوليد؟؟ أجاوب بكل صدق: عرجاء كسحاء حولاء شمطاء.. لو بنت الوليد هتبقى على قلبى هيفاء
لو باحب واحدة تانية هالطشها بالقلم علطول فداء للعروس.. واقول لها فى ليلة أقل جمالا من هذه الليلة ستأتين إلى خيمتى زاحفة يافرجينيا
يانهار يانهار لو بقيت جوز بنته وبقى معايا فلوس بقى..دانا هاعمل حاجات.. أولا هاروح كارفور.. لازم اتخلص من عقدة النقص بقى..بِفنـُوسى ياكـْناب
فيه ناس أنا شايفها فى آخر البلوج بتقول الغنى غنى النفس وهوه يمكن مش سعيد وأهم حاجة التقوى وربنا الوهاب واللى بيته من إزاز مايغيَّرش هدومُه فى الصالون
بكل فخر هابعت أجيب كبايتين عصير قصب للناس دى واروَّق المحل واقفلُه..اللى عارف رقم تليفون الوليد يجيبه من سُكات ومش عايزين نصايح
طب يعنى يا جدعان الواحد الموظف بيظبَّط بيتُه ازَّاى؟؟دا مرتبه كلُّه يجيب بيه مساطر بس من كارفور..طب ما ينفعش حد يقول لى الوليد بينزل كارفور امتى؟؟ جايز يبقى عنده شوية حَمشنة وجَدعنة ويقف فى وسط المول ويقول لصاحب المول مشاريب الناس دى كلها على حسابى.. قصدى طلبات الناس دى كلهاعلى حسابى.. دا لو الناس دى كلها طلبت وخَدت بعيد الشر بعيد الشر لحمة..يبقوا بيلعبوا فى كام صفر من الأوَّلانيين بتوعُه
يسألنى البعض دول غير البعض الأولانيين وإيه العلاقة فى البوست بينك وبين الوليد؟؟ اقول لكم: أنا كان معايا مبلغ بصفرين والراجل ده معاه مبلغ بحداشر صفر.. يعنى الفرق بينى وبينه يادوووب تسع أصفار..وماتنسوش انه أكبر منى سنا.. يعنى لو قسمنا الأصفار على فرق السن يبقى انا لازم أجيب كل سنتين صفر بالصلا ع النبى..والصفر الأخير ده احتمال يتعبنا شوية بس هنجيبه بعون الله
ويسألنى البعض كل البعوض بقى وهم يشهقون أيوة يشهقون فى المعجم يعنى يضربون صدورهم بأيديهم ويقولون يا لهوى وانت فاكر الصفر سهل؟؟ أقول لهم عارف ان الصفر مش سهل وان مصر بجلالة قدرها جاهدت كتير وتعبت عشان ربنا يوفقها وتجيب صفر ف كاس العالم.. بس بالعزيمة والإصرار ربنا هيوفقنا ونجيب اصفار كلنا..ونلعب بالأصفار لعب..وهنظبط عيالنا بقى.. خد ياحمادة صفرين وهاتلك شيبسى
وعلى رأى أم كلثوم وهيه بتغمز للوليد بن طلال وهيه بتقول
الصفر كله حبيته ليك .. الصفر كله

هناك ٤٤ تعليقًا:

WhItE HeArT يقول...

ههههههههههه

شكلك اتعقدت من كارفور ومن الوليد في نفس الوقت تعالى ياابني عندنا الكلية واحنا نديلك الاصفار اللي انته عايزها وانته ماشي ولا تتعب نفسك ولا تفكر في بنت الوليد ده حتى شكله رخم يبأه بنته هيبأه شكلها ازاي


عموما ربنا يرزقك بحداشر صفر زيه كده

رفقة عمر يقول...

بجد دمك خفيف فعلا معلش استحما كام سنه كمان وان شاء الله تحوش كدة وتشترى من كارفور اللى انت عايزة
واحنا هاندعيلك تجمع لفلوس بسرعه
ربنا يرزقك من حيث لا تحتسب اللهم امين يارب العالمين

أميرة يقول...

وانت ايه اللى وداك هناك يامرسى ؟؟

طب عيش على ادك وبطل النفسنة دى

اللى هتوديك فى داهية وبلاش تمشى ورا يوسف عشان هيوديك فى داهية برده P:

Unknown يقول...

ههههههههههههههههههه

انت ايه اللى وداك الاماكن دى
بس المهم انك منستش عصير القصب
ايه رايك نعمل مشروع انا وانت ونفتح محل عصير قصب فى كارفور
شوف بقى هنبيع الكبايه بكام
واهو كده تبقى رايح كارفور كل يوم وكمان ليك مسمار فيه
وبدل ما الوليد يقول المشاريب على حسابه قوله حاسب ده واجب علينا
والله دمك سكر حقيقى
تحياتى ليك يا اشرف

خمسة فضفضة يقول...

السلام عليكم ورحمة الله وبركاته

ياعالم يا شر بطلوا قر

الراجل هايلاقيها منين ولا منين

:-D

aya يقول...

اشرف
بينى وبينك كده
((لو عرفت الوليد بينزل امتى كارفور ابقى ادينى رنة)
متعرفش عنده ولاد صبيان ولا لا؟؟؟؟


اشرف بوست جامد جدا جدا

ومعلش
بكرة يبقى عندك 15 صفر يا عم مش 11

موجة يقول...

واضح انك بتكن للوليد بن طلال حب مش عادي هههههههه .. يا عم أنا رحت كارفور مرة واحدة مع واحد صاحبي اجيب بطاريات انرجايزر .. تصور اصل اقاموس الناطق من نزاهته مش بيشتغل الا بحجارات انرجايزر .. جبت اربع حجاير يوميها ب 12 جنيه من الصغيرة قوي .. و يومها ما كانش معايا الا صفر واحد ههههههههههههه
اتمنالك الصفر الثالث .. و بالتوفيق
بوست جمييييل

Gemini يقول...

هو انت كمان بتقر على الوليد؟؟
أصل أنا كمان مش عاتقاه من سايباه من ساعة ما عرفت ثروته
بس لما تبقى تتجوز بنته -بفضل دعواتنا طبعا- متبقاش تنسانا بقى

بجد دمك خفيف أوي ماشاء الله عليك
دي أول زيارة ليا بس اطمن مش الأخيرة انشاءالله

غير معرف يقول...

يا اشرف احنا كدة بنقطع على بعض انا كنت عايز اسال اذا كان عنده بنت ولا لا بس يلا متغلاش عليك بس ابقى افتكرنى بصفرين

beroo يقول...

ههههههههه
200 جنيه طب ليه بس تحويشة العمر
لا اخف دم
معلش بقالي كتير مجتلكش مدونتك
بس ايه الجمال ده
بيروو

حدوته مصرية يقول...

ههههههههههههه
وحشنى قرايتى لمدونتك يا اشرف يااخف دم بجد
معلش بقى ظروف الدراسة و غيره

بس بجد تحفة
و بعدين انا عايز شوية اصفار اعمل ايه بقى !!

cinderella يقول...

هههههههههههههههههه
كل ده علشان رحت كارفور انت ايه اساسا اللي بيوديك الاماكن دي
انا بجد مت من الضحك انت مش ممكن
فعلا دمك زي السكر
بس على فكره لو عرفت الوليد عنده اولاد بيدوروا على عروسه قولي بس ولو ربنا كرمني هجوزك حد من العيله واهو يبئى من ريحة المليارات
قصدي من ريحة الحبايب برده
ومن هنا لحد وقتها نبطل نفسنه كده علشان ربنا يكرمنا وانت عارف احنا مش بنحسد احنا بنقر بس

رينـــــــــــا يقول...

ههههههههههههههههههههههههههه
بجد تجنن ماشاء الله
كل دا بسبب كارفور
ياعم كنت قلتلنا وكنا قفلناه خالص :D
بدل ما يسبب هذا الهذيان العقلى بحلم الزواج من السيدة المصون بنت الملياردير الامير طلال
هههههههههههههههههههه

Unknown يقول...

هههههههههههههههه

الوليد ماعندوش غير ريم وخالد بس

يعني مفيش بنت تانيه للأسف

الراجل قال انه هيجوز بنته للي هي تختاره وان الشرط الوحيد اللي هيشرطه انه يكون سعودي

مجابش سيرة الأصفار يعني

بلاش حقد بقي عيب كده

vision يقول...

اكتب شعر يا اشرف وكفاتيه تخسرنا كل يوم عللى احنا فيه.....جتنا نينه فى حظنا الهباب

غير معرف يقول...

على فكرة بقا انت مش أقل من الوليد بن طلال ولا حاجة ..
وإيه يعنى ال 11 صفر اللى بتقول عليهم .. دا مفيش أسهل من الأصفار اليومين دول ..
وأنا بشوف المسرحية اللى كان الراجل بيقول للمدرس صفر واحد طيب يا أخى قول صفرين قول تلاتة انت دافع حاجة من جيب أبوك .. بصراحة مكنتش فاهم الراجل ده عايز إيه ..
بس تقريبا الراجل دا وقتها كان عارف قمة الصفر ..
بلاش تفكرنا يا عم أشرف الله يسترك عشان الحكاية مش ناقصة ..
وعلى فكرة بقا لو الوليد بن طلال ده جالى لحد البيت وعرض عليا بنته أنا مش هوافق إيه رأيك بقا ..
إهئ إهئ إهئ إهئ
---------------------------
يا جدعان احنا قاعدين نقر على الراجل وبنته وبنعكنن عليه هو و الغلابة اللى زيه هم زنبهم يعنى إنهم عندهم فلوس بالعبيط وسايبين الناس مش عارفة تروح كارفور زيهم ..
متسيبهم يا عم يروشوا بفلوسهم ولو مش عاجبك اعمل زيهم .. انت مين قاسم السماوي وللا مين ..
جتنا نيلة فى حظنا الهباب ..
-------------------------------
بقولك إيه يا أشرف أنا كنت محتاج 100 جنيه سلف من ال 200 اللى معاك عشان ناوى أروك كارفور بكرا واللى معايا ميكملوش أجيب حاجة ولا حتى الصابون اللى انت مرضيتش تشتريه ..
--------------------------
دا احنا مش عايشين يابا
سلام بقا كدا كفاية عشان أنا تعبت بصراحة ..
ويجعله عامر ..
أخوك / فنكوووووووووووووووش

WhatEver?!!! يقول...

شوف النفسنة والار على البنى ادمين

هو يعنى كان ذنبة ول يعنى كانى ذنبة انة معاه كام صفر كدة

بس والنبى لو شوفتة قولة لنى محتاجة دستة مساطر من عند كارفور

وانى سمعت ان فى ازمة مساطر فى كليلت الهندسة بجميع المحافطات

فيعنى لو ينزل مرة يعمل شوبنج فى كارفور ولا حاجة بيقى يظبطنا

اه صحيح قبل ما انسى
الف الف مبروك
ايوة يا عم اول جمورية بقى
بجد انا مبسوة اوى علشانك

يارب على طول كدة مشرفنا

zordeak يقول...

هع هع هع هع

ده انا بقول احنا حبايب واخوات واصدقاءات يعنى واصدقائين واصدقاؤن كمان


بعد العشم ده كله تقوم تروح كارفور

مكانش العشم يا اشرف

الواد يوسف فسد اخلاقك

وطلعت الاول يا برنس فى مسابقة الجمهورية وانا مكنتش اعرف اصلا ان فيه مسابقة وان فيه جمهورية

انا مش هعاقبك ولا هخلى اللعنات تحل عليك

ربنا كان كريم وخلاك عاقل ومفرتكتش الميتين جنيه عالصابون اللى فى كارفوور

عارف ليييه ؟

علشان تعزمنى حلاوة الاول جمهورية بالميتين جنيه دول

انا مش هقبل اقل من كيس قلبظ وشوية حرنكش

بس من كارفور

تجيبهوملى معاك فى كيس مكتوب عليه كارفور

والحرنكش يكون مختوم بختم النسر يا معلم

وسمعنى سلام انما للصبر حدود للست ام كلثوووم

:D

غير معرف يقول...

ازيك يا اشرف على فكرة انا عايزة اصحح معلوماتك شوية الوليد بن طلال عنده تسعة وعشرين مليار ونص مش عشرين بس و النص قبل التسعة و عشرين. انا مش عارفة انت نسيت تسعة مليار ونص ازاي اي نعم هما فكة بس برضوا ينفعوا في الزمن ده

زحل الفلكي يقول...

عقبال يا خويا مشوفك معاك صفر كبييييييييييير
بس على اليمين

هن في بورسعيد ممكن تجيبلك قميص
بمبلغ فيه صفر واحد بس
ايه رأيك بقا ؟؟

Lobna Ahmed Nour يقول...

طيب .. اهم حاجة لما تجيب شويةاصفار

بعد كام سنة كده ..

ابقى قولنا ..

ههههههه

kingmody يقول...

بجد بوست جميل جدا وعقبال ربنا ما يرزقنا بكام صفر كده :d

غير معرف يقول...

هههههههههه
فكرتنى مره من المرات القليلة اللى اتهورت فيها ودخلت كارفور وانا وزمايلى فى توكيل اديداس لقيت واحدة كتكوته ومعاها عيليلن كتاكيت برده حوالى 4 سنين وشبطانين فى كرة باسكيت ودى بتقولهم يا حبايبى عندكم غيرها اتنين احنا جايين نجيب كرة يد والواد يقول لها بليييييييز يا مامى راحت نادهه على البياع وتقوله بكام كرة الباسكيت دى قالها ب 700 جنيه راحت قايله خلاص هناخدها كانهم كانوا بيتكلموا على باكو بسكوت بنص جنيه

shirry يقول...

عاااااااااااااااااااااااااا
وانا اللي كنت فرحانة ان هيبقي في كارفور قريب مننا مكان مقلب الزبالة بتاع طنطا
وقولت بقي اني بقي بس خلاااااااااااص
الحلم اتبخر دا انت ب 200 جنيه
امال انا كنت هروح بكام
عااااااااااااااااااااااااااااااا
اما الوليد ف اللي اداله يدينا

كلكم ورايا
ااااااااااااااميييييييييييين

Amr Ahmed يقول...

هههههههههههههههههه
يادي المعادي

وملقيتش الا الوليد
يا راجل روح

Unknown يقول...

ألف مبروك يأشرف أول الجمهوريه

وطبعا لو مكنتش انت اللي تاخدها مين اللي ياخدها بس؟

(:

بجد ألف مبروك

Ma 3lina يقول...

هههههههههههههههههههههههه

يخرب عقلك الشغل كله اتفرج عليا و انا مسخسخة على نفسى كدا

بقى تروح كارفور بصفرين دا انت غنى و الله

بس حلوة حكاية كل واحد و صفره دى

بس سؤال هوا الصفر على الشمال و لا اليمين تفرق مش كدا و لا ايه ؟؟

basma saghir يقول...

الوليد ده حضرتك عبارة عن قطرة من الغيث وزي ما انت عارف ان اول الغيث قطرة وهو بقى في الاول وماخفي كان اعظم...في ناس لغنى بكتير بس مش ظاهرين في الصورة ماشيين على مبدأداري على شمعتك تقيد..بس الحقيقة ان دي مش شمعة دي حريقة كبيرة جدا زي حرايق الغابات كدة..ربنا يكفينا شر الفلوس

Unknown يقول...

ههههههههههههههههههههه

يرزقنى ويرزقنا ربنا واللى إعطا الوليد يعطينا يااااااااااااارب

أخف دم يقول...

هششششششششششششششششششششششششش
كل واحد عند بيته
يعنى أنا جاى أشكى همى ليكم .. ألاقى كل واحد جاى يشكى همه ويقر على الراجل هوه كمان؟؟
وكمان كل بنت تقول لى عايزة أتجوز ابنه..هيه خلاص سايبة؟؟
طب انا بكل حب وود وصدق عايز انهب الراجل .. انتوا تشتركوا معايا ليه؟؟
وشكرا ليكى يادعاء عشان جبتيلى شلل أكتر لما قلتيلى ثروته الحقيقية.. هيه ناقصة يادعاء؟؟
عموما ياولاد.. أنا مازلت أنتظر تليفون الوليد
وأتمنى أن يكون متابع المدونات.. ويلقى اسمه وصورته الكريمة فى بلوجى المتواضع
جايز يرش رشة جريئة ونغير شكل المدونة بقى.. ونملاها ترتر
ههههههههه
كل سنة وانتوا طيبين

rona يقول...

لالالا بوست جامد جدا ودمك خفيفبس انا بقى مش هقولك اتجوز ابنه لو الوليد نفسه ميضرش بس شوف بس هو نازل امتى كارفور

غير معرف يقول...

انا لسه جديد في قراية البلوج بتاعك ... بس انا ناوي كل ما ألاقي نَفسي مخنوق ولا مضايق ااجي اقرالي كام بوست من القدام بتوعك

yours, CD

د/اجدع بنوته يقول...

كارفووور حته واحده .. ما ناقص الا تقول انك فكرت انك تبص بصه ع هايبرون كمان ... يالهووووى

ده انت كده يبقى لازم يهدروا دمك

انت بتبص لفوق اوى يااشرف

ماله التوحيد والنور .. ولا بلاش

عايز تعمل شغل خد المتييين جنيه بتوعك واطلع ع كايرو موول

ولا جنينه موول ... هتعرف تشترى بيهم جوز شرابات زى الفل

بس الا صحيح ايه ال 200 جنيه دول اصلا .. ده ااقل بنطلون دلوقت معدى ال 180 اصلا

بالتوفيق انت والوليد وبناته

غير معرف يقول...


والله انا لما قريت بوستاتك اللي بعد دا
كت هابعتلك اقولك واسألك انتا ليه مسمي البلوج اخف دم يعني دا ثقة في خفة دمك ولا دي حقيقة علمية؟

بس بدأ يدخل ادمغي الاسم شوية
واتضح انك من ذوات الدم الخفيف والله

بوستك تحفة

عمر بوك ستورز يقول...

زورونا تجدون ما يسركم .


قائمـة من الكتب الأدبية والثقافية والفكرية المتنوعة للعديد من دور النشر

تحت سقف واحد، وبأسعار لا تقبل المنافسة


وعيد أضحى ...كويس :)

غير معرف يقول...

جميل ياأستاذ أشرف

غير معرف يقول...

بجد ياأستاذ أشرف ماشاء الله عليك على فكرة أناكنت بحضر نادى الادب فى كلية اداب وكنت بسمع لحضرتك حضرتك شخصية محترمة جدا جدا وبجد صاحب الدم الخفيف والقلب الطيب

غير معرف يقول...
أزال أحد مشرفي المدونة هذا التعليق.
غير معرف يقول...

الأخ الفاضل أشرف توفيق
أرجو الإنتباهإلى أن تعليق السيد"غير معرف" على موضوع الوليد بن طلال واللي كله بالياباني أوالصييني - الله أعلم_ ما هو إلا غطاء لمواقع إباحية، لايصح أن تكون في مدونتكم المحترمة
أرجو حذف التعليق حفاظا على سمعة المدونة وعدم خدش حياء الزوار
مع الشكر
حنان

غير معرف يقول...

ياعم الوليد مين ... انت بص بس في جسمك وفي صحتك وانت تعرف انك احسن من الوليد بكتير ... ما تبصش للمال المال يابني بيزول والصحة بتفنى ويبقى القناعة اللي هي كنز ماتفناش ... سيبك انت من كل ده وقارن نفسك بالوليد في النوم وفي الاكل وفي الراحة وفي عبادة ربك اللي هي اهم شي ... وفي صلاتك وصيامك وكل امور دينك ... اكيد راح تكون احسن منه بكتير ...طب بص لولادك وهم جنبك وانت مربيهم احسن تربيه وبعد مايتخرجوا بيكونوا بجوارك عشان يبروا ابوهم اللي رباهم على الخير والصلاح وبص في اولاد الوليد اللي يمكن مابيشفهمش في السنة الا مرة وحدة... بص في مراتك اللي قضت سنين عمرها وهي بتخدمك وانت ياعم الحج عامل فيها سي السيد وبص في الحياة الاجتماعية للوليد والخدم اللي هما قايمين عليه
بقولك ايه قوم واتوضاء وصلي ركعتين واحمد ربك بلا اصفار بلا كلام فاضي والله العظيم مش حتنفعك دي الاصفار لما تنزل بدونها في القبر

غير معرف يقول...

هههههههههههههههه 00000000000 يلا يعم روح كارفور

medo يقول...

ههههههههههه

Unknown يقول...

اشرااف،، اصحي من النوم يا ضنايا...
وابوس خدك ياخي ابقي اتغطي كويس ،،،،

abo-bder يقول...

شركة شحن اثاث من السعودية الى الامارات
شركة شحن عفش من الرياض الي الامارات-دبي