اخبار

الثلاثاء، ٤ سبتمبر ٢٠٠٧

استحمِلى


..استحمِلي
..جايْ لِك مع الفجر اللي راجِعْ مهما موج بحرِك عِلِي
..لا يهمّني.. بُعد السَفَر
..ولا حتى سُورِك والغَفَر
..ولا خندق اليأس اللي بإْيدِيكي اتحفَر
..هَانْدَهْ واقول لِك: يا حبيبتي
..أسمع غُناكي وتنزلي
..استحمِلي
..فاضِل مَفِيش
..وعشان نعيش
..لازم يصبّرنا الأمل
..وماتسأليش إيه اللي ممكن يتعمل
!!دا البدر عايش في السما بْيصبُر لحدّ ما يكتمَل
الحلم قرَّب.. قرَّبي
مدِّي إيديكي وْجرَّبي
..وماتِيْئَسِيشْ مِ الحبّ.. لمّا بيتولد ويعيش عفيف
..واطَّمِّني.. أنا مش ضعيف
..ومانيش جبان
..لكن بابان طيِّب قوي
..وباحبّ اكون ابسط من الناس كلها
..لكنْ فى نفسى باكون قَوِى
لا الدنيا تكسر قلبي يوم
..ولا حدّ فيها يهزِّني
..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
..استحمِلي
..أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟
ازَّاي تغنِّي وتلعبي
وف قلبي عُودِك.. ملعبك؟
ازَّاي تذاكري.. ماتنحتيش إسمي فْ قلوب على مكتبِك؟
ازَّاي هتمشي ماتحلميش
إنك تقابليني في أقربْ مُنحنَى؟
ازَّاي تنامي وْتحلمِي بْفارس يجيلِك عَ الحصان
َ!وماكُونش انا؟
وان يوم قِدِرتي على الفراق.. هتكمِّلي؟
..استحمِلي
..دمعِك كِتِر
..حتى امّا اشوف ضحكِك.. بتنزل دمعه تايهه بتعتذِر
..دمعِك طريقي للكسَل
دا انا لما اشوف دمعه فْ عيونِك
..نسْج قلبي بيتنَسَل
..وبيتغسَل
!!من دمع عينِك... والخجَل
..ضحكه فْ عيونك... أبتدي بيها اللي جيّ
..بسمة شفايفِك... قلبي يفضَل بيها حيّ
..خليكي جنبي.. نخلِّي كلّ الدنيا ضيّ
..واستحمِلِي
لكِنْ
..يا نبْض النبْض فيَّه.. وْحِلم عمري وْفرحتُه
..لو يوم رماكِي اليأس في إْيدين الملَل
..ونَدَه خلاص قلبِك عليكي بْدون أمَل
..هاتي الرسايل.. والهدايا.. والصوَر
..بصّي بْخيالِك عَ اللي فات.. والذكريات
..افتِكْري ضحكةْ قلبنا فْ يوم اللُّقا
..افتِكري دمعة قلبنا فْ يوم الشّقَا
..افتِكري كلّ شريط حياتنا وحبِّنا
!!وانسِيه بقَى
..انسِي حبيب ضيَّعْتِي قلبه بْدون سبَبْ
..كان كلّ ذنبُه
..إنُّه قال لِك لمّا شافْ قلبِك تِعِبْ
..استحمِلي"
..جاي لِك معَ الفجر اللي راجِعْ
... "مهما مُوج بحرِك عِلِي

هناك ٤٦ تعليقًا:

أميرة يقول...

الله اكبر انا اول تعليق

يااااااااه مش ممكن يااشرف رائعة هايلة بجد مش عارفة اقولك ايه

قلمك حساس بدرجة فوق الوصف

عجبنى اوى الجزء من اول انا وانتى وردة فى احلى جنة

لغاية الاخر

القصيدة كلها اكثر من رائعة

لكن دة اكتر جزء عجبنى لانك بتوصف تفاصيل تحس بيها كل بنت

بحييك يااشرف على القصيدة الرائعة وسعيدة انى اول رد

ضـوء الـقـمر يقول...

الله يا اشرف بجد تحفة
خدتني لعالم تاني خالص وانا بقرأها
احييك بجد على كل كلمة كتبتها

انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟
ازَّاي تغنِّي وتلعبي
وف قلبي عُودِك.. ملعبك؟
ازَّاي تذاكري.. ماتنحتيش إسمي فْ قلوب على مكتبِك؟
ازَّاي هتمشي ماتحلميش
إنك تقابليني في أقربْ مُنحنَى؟
ازَّاي تنامي وْتحلمِي بْفارس يجيلِك عَ الحصان
َ!وماكُونش انا؟
وان يوم قِدِرتي على الفراق.. هتكمِّلي؟

اكتر جزء عجبني :)
تحياتي يا اشرف

أحمد سلامــة يقول...

ممتازة يا اشرف
موسيقى مكتوبة فعلا
من العنوان للسطر الأول/ الاخير
تسلم ايدك

Unknown يقول...

بجد تحفه ياأشرف

حلوه اوووي بجد

اتخيلتك وانت بتلقيها(:

أكيد لازم تستحمل

حسام مراد يقول...

جامده ياباشا بجد استحملى
بجد استحملى
ونهايتها فظيعه
.جاي لِك معَ الفجر اللي راجِعْ
... "مهما مُوج بحرِك عِلِي

تقبل ارق تحياتى
سلامووووووووووووووووز

sahr يقول...

اول زيارة ليا
وبجد جميلة اوي تسلم ايديك
تحياتي

عبسميع يقول...

جامدة جدًا يا ريس
بجد والله من أحلي القصايد اللي قريتهالك

وانا عندي كده موهبة علي قدي في الإلقاء ولقيتها تحفة لما بتلقي كمان أول ما هشوفك هخليك تلقيها يا ريس

تحياتي
هشوفك قريب(ان شاء الله)
محمد

Desert cat يقول...

ما شاء الله على رقة كلماتك واحساسك اللى فوق الوصف
بصراحة انا لو منها بعد الكلام الحلو ده مضطرة استحمل
لاء بجد يسلم كيبوردك ياباشا

غير معرف يقول...

مش قادرة اقول غير الله عليك يا اشرف كتييييييييييير حلوة لا مش حلوة بس بتجنن شو هالاحساس الرائع
انا قريت مرة ورجعت عدتها تاني و تاني
مش قادرة اقول غير انك شاعر عظيم ورائع
على فكرة لو هي مش قادرة تستحمل هي اللي خسرانة في ناس كتير ممكن تستحمل بس تسمع كلام جميل زي ده هههههههههه

beroo يقول...

انا وانتي ورد في احلي جنه عبيرها واصل للسما
لو يوم قسمتي الورده لازم كل نص هيترمي
دا انا قلبي فوق كفك نما
ايه الكلام الجميل ده لا والله انت فعلا عبقري ومش اخف دم بس لا دا انت احلي وارق دم
تحياتي علي الجمال ده
سلام
بيرو

rona يقول...

بجد يا اشرف جمييل جدا انا رحت لعالم تانى غير عالمنا ده ربنا يكرمك وتكتب اكتر

غير معرف يقول...

ياسلام حلو اوى وكل جزء احلى من اللى قبله

Halawa يقول...

كل أما أشوف القصيدة دي

بتعب جدنننننننننن

ربنا يوفقك يا أستاذ يا ملك

انت أملنا بجد

chimera يقول...

ايه ده !! بجد يا أشرف مش لاقية كلام يتقال..
كنت مستمتعة بكل سطر بقراه لدرجة انى اريتها 3 مرات :):)
......................
طبع السنابل يا حبيبتي يشدِّني
لو فاضيه... ترفع راسها فوق
لو فيها حَبّ... بتِنحِني!!
استحمِلي
أنا وانتي ورده فْ أحلى جنّه عبيرها واصِل للسَما
لو يوم قَسَمْتِى الورده... لازم كل نصّ هيترمَى
.....................
وحشنى الكلام معاك يا أخف دم
و تسلم ايدك

إبـراهيم ... يقول...

يااااااااااهي يا أشرف ، قد إيه واااحشني شِعرك السهل قووووي الممتنع قوووي ، حقيقي ، حقيقي ، حقيقي تحفــــة

؟.
شديدة الخطارة القصيدة دي

أو هي في الحقيقة ... خطيرة الشدادة

يعني جامدة جدًا
.
.
استحملي
استحمِلي
..أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟


كم أنت راااائع
و أشرف ، وأظرف وأحلى شاعر عامية ف مصر
.
.
مصر
.
تعيشي يا مصر

حسام يقول...

والله بصدق وأمانه القصيدة دى من أجمل ما قرأت في شعر العامية، إحساس راقي وموسيقي تنساب بلا مجهود كأنها خرير الماء في أحد جداول الأندلس
استحملي
..فاضِل مَفِيش
..وعشان نعيش
..لازم يصبّرنا الأمل
..وماتسأليش إيه اللي ممكن يتعمل
!!دا البدر عايش في السما بْيصبُر لحدّ ما يكتمَل
عجبني بشده المقطع ده
وكمان ده
طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
سيدى أنت مبدع حقيقي
تحياتي الفرحة بك
حسام عبد اللطيف
جماعة مغامير الأدبية

رانيا منصور يقول...

فعلاً

متشكرة اني جيت هنا


مودة..

n يقول...

اللــــــــــــه
بجد روعة
ربنا يزيدك

محمد مصطفى يقول...

جميل النص يا أشرف كالعادة
عجبني الجزء ده بالذات
طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني

YHYيــوســف الـمصـرى يقول...

السلام عليكم
اشرف باشا حبيبى وصديقى العزيز جدا
قصيدة جمدة اوى زى ما عودتنا
متخفش قرتها فى سرى محدش سمعنى ههههه انت عارف انى اجمد واحد فى ألقاء الشعر :D
ههههههه
وحشنى والله يا باشا ويارب اشوفك قريب على خير
.......
الحياة حلوة يا مان ;)وكله تمام
تحياتى

رينـــــــــــا يقول...

السلام عليكم ورحمه الله وبركاته
كل عام وانت اللى الله اقرب وعن المعصيه ابعد ان شاء الله
كل عام وانتم با الف خير

كراكيب نـهـى مـحمود يقول...

تسلم ايدك بجد تحفه تحفه تحفه
فنك يا عم القاهرة بتسالك عليك

Mohamed Hesham Safa يقول...

جميلة جدا وفيها احساس عالي ...

تحياتي
استمر ...

والسـ ختام ــلام

bota يقول...

السلام عليكم

بجد كنت محتاجه اقرا حاجه فعلا زي كده تخليني اغسل كل همومي بجد بعد ما قرتها ارتحت كتير لانها جميله اوي وبسيطه

مشكور على احساسك الرائع ربنا يوفقك

Rana يقول...

كنت فاكرة ان ماحدش بقي بيكتب بالاحساس ده بما ان الدنيا اتملت مدونات ...كنت هقول روعة وجميل ومؤثر بس لقيته كلام مكرر وممل ،لا أملك سوى الشكر العميق للشخص اللى (بعتنى) هنا!:(

شقاوة شعب يقول...

على فكرة بجد عبقرى
بجد بجد عبقرى

ماشاء الله لا قوة الا بالله

وكل سنة حضرتك طيب
وربنا يتقبل منا ومنك رمضان ويبلغنا ليلة القدر ان شاء الله

Unknown يقول...

كل سنة وانت طيب

ورمضان كريم (:

فى القلب يقول...

..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني


واللهى كل حرف أبداع
مش ممكن
رووووووووووووعه
مبدع بطريقه عبقريه

alqassam يقول...

ازيك يا باشا

فينك من زمان يا عم

كل سنة وانت طيب وربنا يثبتنا

اخوك :القسام

حدوته مصرية يقول...

جميلة جدا يا اشرف
انت شاعر جميل جدا

و بوست ادهم صبرى ضحكنى جدا
انت تحفة

تحياتى

Eman Eltaher يقول...

الشعر جميل جدا بجد

القصيدة تحفة و جميلة جدا

ما شاء الله عليك

الواحد بقى مش عارف أنهو قصيدة أحلى


بداية القصيدة ف منتهى الروعة


ربنا يديم قلمك
و احاسيسك الجميلة

و خلاص انا حرمت أكتب شعر تانى !!!!!!!!! هههههههههه
مش بعد ما هقرا قصيدة جميلة و شعر جميل كده هكتب يعنى !!!!!!!!!!! ههههه

و كان يا ما كان
كانت بتكتب شعر إيمان

بجد خلينا ف القصيدة
أكتر جزء عجبنى فيها

أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه
ازَّاي يعيش قلبك ثواني ماكُونش فيه؟
ازَّاي تقومي الصبح مابْقَاشْ حلم عايش بتشوفِيه؟
..ازَّاي عينيكي تشوف بشر
!مايكونش وشِّي فْ أيّ واحد تلمَحُه؟
أنا ننّ عينك.. يبقى بسّ ازَّاي عيونك يجرحُوا؟

تحياتى لقلمك الحساس و المبدع
و تحياتى ليك

SHADOW.GIRL يقول...

متتخيلش السعادة اللى انا فيها لما بالصدفه طلعت قصيدتك قدامى.....بجد شكرااا على اللحظات السعيدة دى....إحساسك مالوش حل

3ashe2elro7 يقول...

..وماتِيْئَسِيشْ مِ الحبّ.. لمّا بيتولد ويعيش عفيف
..واطَّمِّني.. أنا مش ضعيف
..ومانيش جبان ..لكن بابان طيِّب قوي
..وباحبّ اكون ابسط من الناس كلها
..لكنْ فى نفسى باكون قَوِى
لا الدنيا تكسر قلبي يوم
..ولا حدّ فيها يهزِّني
..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني

يسلم احساسك الحلو و كتابتك و دايما محافظ عليهم

كل سنه وانت طيب رمضان كريم

نهى جمال يقول...

..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
..استحمِلي
..أنا وانتي ورده فْ أحلى جنّه عبيرها واصِل للسَما
..لو يوم قَسَمْتِى الورده... لازم كل نصّ هيترمَى
..دا انا قلبي فوق كفِّك نَمَا
زهَّر.. وكل زهوره قاعدالِك تغنِّي
ازَّاي تعيشي فْ لحظه وانتي بعيده عنِّي؟
..طبْ جرَّبي
..انسيني يوم
..وقولي لي بس ازَّاي هتنسي وهتعيشيه

-----

دمعة بتقولك

شكرا

بحجم الجمال هنا

el_assel يقول...

جميلة جدا يا أشرف والله
بس علي فكرة
أكيد هي اللي خسرت
وانت طلعت كسبان

مواطن زهقان يقول...

بجداحساس رائع
ومشاعر هايلة ياباشا

Unknown يقول...

قصيدة جامدة بجد
انا كنت باجي عشان اقرا حاجات تضحكني
ومكنتش متخيلة ان شعرك حلو قوي كده
مع انى سمعت عنك كشاعر في مهرجان العامية بتاع الساقية
نزل اشعارك ع البلوج
ومتعنا

أخف دم يقول...

لو كانت قصيدتى حلوة فانتوا كتبتوا بكلامكم الجميل ورأيكم الرائع وأحاسيس الصدق اللى جواكم أحلى من قصيدتى ميت مرة..
الحب موجود والمشاعر والأحاسيس موجودة وهتفضل موجودة.. ولسة الحب والمودة بين الناس مهما اختلفت الظروف وطغت المادة وغيرها من متقلبات الحياة..
ده مش مجرد كلام عشان يناسب الموقف بس .. ده كلام أنا مؤمن بيه جدا وعارف انه صح
لكل اللى سألنى على الإحساس المتفرد.. الإحساس ده موجود عند شعرا كتير شباب فى مصر وأحسن منى كمان.. وربنا يوفقنا جميعا
واللى شرفنى وقال ان قصيدتى أحلى ما قرأ فده وسام على صدرى طبعا .. وربنا يقدرنى أكون دايما فى قصايدى الجاية عند حسن ظنكم جميعا
كل سنة وانتم جميعا طيبين وبخير
ورمضان كريم عليكم وعلينا
وربنا يديم الحب والمودة بيننا

one true thing يقول...

والله الواحد مهما قال ع القصيده دي
مش هيقدر يوصف اعجاب بيها يتشل الكلام عندها وتلمع العين في وقت قريتها
انا كنت كل يوم بقراها من الديوان
كنت بحس انها عاليه جدن ومش هيجي زيها
انا بدخل كتير ومش بعرف اكتب حاجه بس القصيده دي بتخليك عاوز تكتب كلام غير الكلام
بتحسسني انك جوه الابيات بتعزف الحان
بحب حتهواطَّمِّني.. أنا مش ضعيف
..ومانيش جبان ..لكن بابان طيِّب قوي
..وباحبّ اكون ابسط من الناس كلها
..لكنْ فى نفسى باكون قَوِى
لا الدنيا تكسر قلبي يوم
..ولا حدّ فيها يهزِّني
..طبع السنابل يا حبيبتي يشدِّني
لو فاضيه... ترفع راسها فوق
!!لو فيها حَبّ... بتِنحِني
..استحمِلي
عندها بقف وبحس اني عاوزه اصقف واقول الله
كل سنه وحضرتك طيب
تحياتي يافندم

Lobna Ahmed Nour يقول...

اقول ايه .. قلم مبدع واحساس عالي

غير معرف يقول...

جميلة يا اشرف بجد خلتني ابكي

انت شاعر ولا ايه؟
حسيت فيها معاناة واحد بيحب واحدة في الزمن اللي جاي
تحياتي
د.منوسي
http://drmanosy.blogspot.com/

غير معرف يقول...

نفسي اتعلم الشعر زيك يا مان القصيده فعلا جميله اوي يامان
ياريت تكتب في مواضيع كتير اوي ميش رومانسيه بس علشان ممكن نموت من الحب

l0ma يقول...

انا عارفة ان القصيدة دى قديمة وغالبا انت بطلت تقرا تعليقات عليها والا كنت مسحت تعليق يامان الى قبلى دة وعموما انا كان لازم اشكرك على كل حرف كتبتة فيها نورلى طريقى وهدانى لقرار مش عارفة اخدة من زمان بجد شكرا دة غير طبعا ان القصيدة فى حد ذاتها اكتر من رائعة انا جسمى قشعر منها بجد تسلم

ابراهيم الشيخ يقول...

اخي العزيز اشرف انا بعتز بيك جدا لانك من خريجي جامعه المنصورة اللي بطلع عباقره زيك وانا فكرك من نادي الادب واعرف انك موهوب جدا في الخط العربي وانا كنت بحضر معاك ومع االشاعر مصطفي الجزار وانا بج بقولك القصيده جميله جدا وان شاء الله من نجاح لنجاح يا اشرف

د. محمد رضا يقول...

اشرف

القصيدة غير عادية

بالغة الروعة والجمال


حقيقي

انت بدعة

تقبلني

ana يقول...

جميله اوى