اخبار

الأحد، ٢٠ مايو ٢٠٠٧

الهرم .. الهرم .. الهرم


الأخ مفيد فوزى كان بيستضيف الأخ زاهى حواس على الأخ التليفزيون المصرى من كام يوم والأخ زاهى هو رئيس المجلس الأعلى لشوية الآثار الباقية.. أنا كنت قاعد عند الأسطى حمادة الحلاق اللى كان قاعد يقص شعرى اللى هوه ثروة قومية زى ما قلت قبل كده ..وعلى حين غرة لقيت الأستاذ مفيد بيسأله ويقول له : إيه رأيك فى الزبالة اللى ورا الهرم الأكبر والمنظر الغير الحضارى ده؟؟ لقيت الدكتور زاهى بيرد : دى مشكلة شعب يا أستاذ مفيد مش حكومة .. احنا عملنا سور والناس برضه رمت الزبالة ورا السور.. نعمل ايه يعنى ؟؟؟ وبعدين الناس دى لازم تعرف انها لازم تحافظ على الهرم ده لأنه في معنى كلامه يعنى سبب الخير اللى احنا فيه ده كله ..وخللى بالكم من كلمة الخير ده كله
أنا أول ما سمعت الكلمة اتنفضت على كرسى الحلاقة وقلت فى حسرة :وأنا اللى كنت فاكر ان أبويا كان له دور فى الخير اللى انا فيه ده .. الراجل ده فضل يضحك عليا ويقول انه بيسافر ويتغرب عشان العيلة والخير لينا وطلع ده كله وهم .. بعد العمر ده كله اكتشفت ان صاحب الفضل الحقيقى بعد ربنا طبعا هوه الهرم
وفضلت اتخيل ازاى الهرم كان بيصحينى من النوم الصبح عشان أروح المدرسة ويدينى المصروف .. وازاى صمم انه يربينى أحسن تربية حتى لو اتهد حجر حجر.. وازاى كان رحيم معايا لما عمى الصغير الهرم منقرع شافنى مع بنت الجيران وقال له سيب الواد يعيش.. وازاى أول ما اتخرجت شغلنى وادانى مرتب محترم وجوزنى وخلانى أخلف مش عارف ازاى وكبر عيالى والمشكلة انه مش صاحب الخير ليا أنا بس .. ده لكل المصريين ..يعنى م الآخر كلكم ولاد هرم واحد .. يعنى احنا أخوات فى الهرم بالصلاة ع النبى
واحد هيقول لى يا عم مصر بيجيلها خير كتير غير الهرم يعنى .. منين يا حسرة ؟؟؟ اوعى تقول لى قناة السويس ... انت بتصدق كلام الناس اللى بيقول لك نصيب الفرد المصرى من القناة كل يوم الصبح 7 دولار؟؟؟ تيجى ازاى يا عم ؟؟ أنا كل اليوم الصبح باقف فى الشباك محدش بييجى بظرف فيه فلوس ولا حاجة .. وبعدين سألت ابويا قال لى الله يكون فى عون الحكومة أصل يابنى فيه دول تانية عايزة تحفر قناة تانية وتكون أوطى من بتاعتنا عشان المية تنزل فى الواطى ويرووا قبلنا .. ويقفلوا الهويس وفؤادة تيجى تفتحه .. وياعينى يا عينى .. عينى ع الولد
ولما سألت جدى قال لى يابنى هوه احنا عندنا قناة اسمها السويس.. وكمان أنا سمعت ان قناة السويس دى اللى جاى على قد اللى رايح .. يعنى مش ملاحقين يصرفوا مرتبات الموظفين اللى فى القناة لدرجة انهم جايبين شوية مراكب كل موظف ينزل ياخد بقية مرتبه لفـّتين فى القناة ع السريع بالمركب
واحد تانى هيقول لى فيه كمان خير السياحة والآثار .. هيه فين الآثار يا حسرة ؟؟ دول كلهم هاجروا برة البلد بعد موسم الامتحانات .. نفرتيتى بعد ما خلصت آداب آثار راحت تكمل فى ألمانيا ومش راضية تيجى عشان النفس.. ده غير كل يوم بيكتشفوا ميت حتة مهاجرة برة البلد
مما سبق يتضح ان فعلا الهرم هوه السبب بعد ربنا فى الخير اللى احنا فيه ده كله .. وخللى بالك لازم قبل ما تطلع من بيتك تبوس ايد الهرم واوعى تزعق له عشان كده عيب وعقوق
أنا مش زعلان من ان الهرم موجود يعنى .. أنا بس زعلان من كلمة الخير ده كله .. نسيت أقول لكم وأنا راجع بقى ورايح اركب من الموقف بتاع العربيات لقيت اتنين سواقين ماسكين بعض مبهدلين بعض شتايم والذى منه عشان مين فيهم هيحمّل عربيته قبل التانى فى الموقف.. واحب اعرفكم ان أجرة العربية كلها تلاتة جنيه ونص .. أول ما شفت المنظر افتكرت كلام الأخ زاهى والخير اللى احنا فيه .. ضحكت ف سرى وقعدت أغنى : الهرم .. الهرم .. الهرم .. ينفع فى شتا أو صيف

هناك ٤٤ تعليقًا:

vision يقول...

عسل يا اشرف ثكر ثكر ..ألمرادى فالجون بس انا مش عارفه اصلاا اعيط ولا ادحك ولا اروح ارمى زباله ورا الهرم بس فعلاا كفايه الخير الى احنا فيه

سجدة يقول...

ايه الحقد الدفين دا فعلا الهرم هو سر الخير الكبييييييييييييييير
اللى احنا عايشين فيه ولا القناة
انت ناسى القناة دى بتعمل ايه
وبدخل ايه لمصر
هو يعنى علشان محدش بيديك فلوس فى ايدك تعمل كده
طب اهو انت بتنزل من الشارع تلاقى مفيش طابور عيش العيش بتوزع بسهولة
دا من ايه من خير قناة السويس
ولا المكيروباصات رخيصة ولا بيذلوا الناس علشان تركب ولا اى حاجة
حكم

BaTresYa يقول...

الهرم دا حبيبي ..دنا حتى ساكنه جنبه وكل يوم الصبح بسلم عليم ويقول لي معاكيش نص جنيه سلف فأرد عليه وأقول له لسه مسلفاه لصقاره دا بيننا عشرة عمر

sakayar يقول...

هس هس ... وطي صوتك للهرم يسمعك يفتكرك بتتريق عليه يحرمك م الميراث
كويس إنك عرفتني علشان أنا مبعرفش أرمي الزبالة فين

YHYيــوســف الـمصـرى يقول...

جبار يا اشرف والله يخرب بيت هرمك قصدى دمك
يا عم انت زعلان من الهرم ليه
يطول عمره (يزهزه)عصره ينصره على من يعديه هى هىء
بتعرف تخطف الضحكة من قلوبنا والله يا اشرف
ومش هتنازل على لقبك فاكهة المدونين
تحياتى لك يا باشا واتمنى اشوفك قريب
وابقى زور البلوج بتاعى علشان وحشته وبيسأل عليك ديما
سلام يا باشا

مصطفى حسان يقول...

إيه يا عم أشــــرع .. قصدي أشرف
انت بقيت متخصص فراعنة وزاهي حواس واللا إيه ؟؟

أنا خايف بعد شوية أجي الاقيك مسمي البلوج حفيد اخناتون واللا حاجه

مدونة كسبان يقول...

بوست (مفيد) يا أشرف
انا اتفرجت على البورنامج ياأشرووف
زاهى بك حواس بيقول ان عنده ألاف شغالين فى الأثار ومش بيلاقوا فلوس يقبضوهم
ده غير الناس اللى كل يوم بتيجى تقف بالساعات قدام مكتبه علشان
نفسهم يشتغلوا من غير فلوس
كله علشانه-الهرم ياأشرف

أهو كل الناس دى ياأشرف
بتشتغل علشان بتحبه-الهرم يعنى

وكل الناس دى معندهاش كاريزما علشان
تطلع فى التليفزيون
الا الراجل صاحب أكبر وأفضل كاريزما
د.زاهى

بجد والله بينى وبينك..انا بتفرج على الراجل ده ببقى عايز أقوم من قدام التليفزيون انام فى المتحف المصرى أو
جوه الهرم
عنده كاريزما وحضور غير عادى


أما عن مفيد فوزى

فهو راجل جان
بيقول للبنت اللى بتشتغل حكم
انت عندك كام سنه؟

البنت قالت له تدينى كام سنه
المعلم العفريت قال لها النظاره بس
علشان أشوف عينيكى


أنا كل ده عادى جدا جدا جدا

سؤال أهبل بقى ومحيرنى

هو هيعرف عمرها من عينيها ازاى؟؟

خالص تحياتى ياأشررررررررررررروف

انتظار مؤقت يقول...

نموووت نموووت و يحيا الهرم نمووووت نموووت و يحيا الهرم ..انت عملتها يا هرم ؟؟ صحيح بلد تحفه

ضـوء الـقـمر يقول...

لا لا يا اشرف مكنش العشم ده جدك الكبير الهرم تقول عليه كده برضو
تيب انا هروح اشتكيله بقه وهقوله ان اشرف اخويا في الهرم بيتريق عليك وهخليه كمان يحرمك من الخير ده كله
ومش بعيد يرحلك برة مصر ماهي البلد بتعتة بقة
ههههههههههههههههه
بوست كالعاده فطسني من الدحك يا اشرف
قلتلك ميت مرة قبل كده هيجيلي سكته قلبيه خف عليا بقة شويه دي حتى ايام امتحانات مش هتبقة انت والامتحانات كمان :p

ساعه الغروب يقول...

بجد مش عارفه اقولك ايه

انت فنان فى اللعب بالكلمات

بجد اى خبر عينى بتقع عليه صدفه فى اى مكان ويكون بيحرق الدم بقول يا رب يكون اشرف كتب عنه عشان اعرف اعادل ضغط الدم وانا بقراه

الخبر بيكون بيعلى الضغط وكلامك بيوزنه


بجد شكرا ليك
بس قبل ما امشى

الا هو مش الهرم دا اللى كان كخه الاسبوعين اللى فاتوا وكانوا عايزين يخرجوه من عجايب الدنيا السبع

!!!!!!!!!!!!!!!!!!!

بجد حاجه تجيب شلل باسرع ما يمكن

ربنا يخليك لينا تخفف عنا الاخبار كدا دايما

شكرا ليك بجد

:)

Shower-Mirror يقول...

جرى ايه يا عم اشرف ...

انت هاتخبط فى الهرم كمان و الا ايه ؟؟؟

انت عايز تكفر يا جدع انت ؟؟؟؟

لوسمحت

انت تهرج براحتك ... و تكتب شعر زى مانت عايز

انما تعيب فى الهرم لأ لأ لأ ...

:
:
:

عايز تخبط فى حد خبط فى فيصل انما الهرم لو سمحت لأ

ههههههههههه


يا كفره يا ناكرين الجميل

Reema يقول...

عسسسسسسسسسسسسسسسسسسسل يا اشرف كالعادة:))))))
, كتر من البوستز امانة, ماشي؟

قلب يحترق يقول...

مالك بقناة السويس يا أستاذ أشرف

عامة أنا كنت بحوشلك السبعة دولار معايا بس بما انك بتحقد ع القناة فمفيش بقي

عموما ماااااااااشي يا ابني دول حتي لو مش بيدوك فلوس كفاية ساعة قبل المغرب بشوية كدة لما تروح تقعد ع القناة و الجو هناك بجد أكتر من رائع

بردو مفيش فلوس انت بقت ليك ثروة معايا و دليل ادانتك هو البوست ده

تهمة اهانة القناة

ومش بعيد يحبسوك
ههههههههههههههههه

حقى اهرتل يقول...

طبعا شاعر
غصبن عنك
حتى ان قلت ان انا مجنون
تطلب منى قصيده دا بعدك
لازم تلبسلى الببيون
طبعا معدتش محتاج تعرف انا مين
وبعدين ناقص دبدوب لازم يرجع عشان الناس بتخسر بعضها

رينـــــــــــا يقول...

ههههههههههههههههههههههههههههههههههه
ههههههههههههههههههههههههههههههههه
والنيعمه انت عثل

ياسيــــــــــدى
خليه عايش الوهم ان الخير دا كله بسبب الهرم

بس ال قولى
لو الحكومه متنضفش وتحافظ على الاثار دى
اللى هى مصدر للنهب طبعا بالنسبه ليهم
الشعب يعمل ايه :D:D

انا لو من الشيعب اتحد كدا واروح املاها ربــــــــــــــش
علشان يدورا على حته تانيه ينهبوا منها :D:D:D

فوكيره يقول...

الا هو فين الخير ده يا اخويا

ده لولا البركه وستر ربنا

كان زمان نص شعب مصر شبه المواطن المطحون على حق

خوفووو ... خفرع...منقرع ...
هو الى ملبسنا هووو

Rivendell** يقول...

الثنائي المرح

مفيد وزاهي


اكتر اتنين نفسي اشوفهم متعلقين عالفلكة في البلد دي غير اخوانا البعدا



وانت ليه يا بابا تعمل في نفسك كدا
ولا انت كنت بتنتحر بالسم البطيء


هههههههههههه

بس عسل يا اشرف

أحمد سلامــة يقول...

ياااااااااااااااااااه
بجى حتة الجيبنه النستو دي
هي اللي جايبه لينا الخير دا كولاتهو
ياحلاوة يا ولااااد
عمااار يا مصر
يا ام الدنيا
يا بوووووي
كلام زين
زين جوي جوي يا ابا الحج اشرف بيه
اهيه
امال ايه

-----------------------------
وميرسي لوصفك إياي بالأمور :)

LAMIA MAHMOUD يقول...

يعني الهرم سر الخير وانت مسكت في قناة السويس ونسيتوا المحميات الطبيعية والاثار اللي باقيين على رأيك ومش عارفة كانوا بيقولوا قلنا حنبني وبعدين بنينا السد العالي
وbla bla bla bla


وهو اية؟؟!

تيرا را را را را را را

علا من غزة يقول...



هي حكاية التريقة على الهرم الي ماشي في البلد اليومين دوووول

يعني مش كفاية اكتب بالرصاص الي مش عاجبه حاجة في حتة الهرم كلها

اما انتو صحيح شعب مابيعجبوش العجب ولا الصيام في رجب

هههههههههه

لا بس بجد انا مش عايزة اتدخل واجيب في سيرة جدكم الكبير !! واذا كان جدكم الهرم فأنا والحمد لله مليش جدود خالص
يا عم ده احنا في عرض طوبة حتى مش لاقيين
مش تحمدو ربنا عالنيعمة اللي انتو فيها

:)

šσяšαяαα يقول...

تعرف تقول هرم هرمنا ضرب هرم هرمكو زى ماهرم هرمكو ضرب هرم هرمنا؟

بعدين الزباله دلوقت اصبحت معلم سياحى زيها زى الاهرام وحتشبسوت

مش عارفه انا مضايقين نفسكو عليه ايه يعنى

وسلملى على قناة الساويس

Amr Ahmed يقول...

ادعوله ادعوله
يخرب بيت ابوه


يارب خليلنا الهرم

الا مش الهرم ده بتاع فيلم الكتكات

انت بتستعماني ياهرم

Unknown يقول...

شوف بقه يا عم أشرف، انا فعلا كنت قبل ما أقرا البوست ده كان مزاجىوحش جدا و عمال أفكر يا ترى الخير اللى كل المصريين ده سببه ايه و اللى تجاوز الحدود المصرية و بدا ينتشر و يتغلل ف ارجاء الوطن العربى و بعد كلام الاخ الفرحان المحتاس أقصد زاهى حواس ،اطمنت و عرفت احنا ف الخير ده ليه و بدأت أقول كفاية كده و لازم ندارى ع شمعتنا عشان تقيد و تزيد لان فيه دول تانية فيها بطالة و خريجين جامعات ع القهاوى بالعبيط ، و كمان السعار عندهم غاليه جدا تصور فيه عندهم شقق وصل ايجارها 150 و 200 جنيه ف الشهر لاء و ايه كمان مححد المدة تصور ، وكمان عندهم فساد ف كل الهيئات و المصالح اللى بتتعامل مع الجمهور يعنى لو رايح تجدد رخصةعربيتك أو تدفع فاتورة تليفونك لازم تدفع لك عليها زيادة حوالى خمسين قرش زيادة تتصور فيه كده ، لاء و ايه رغيف العيش عنده وصل اربعة و خمسة قروش حسب حجمه ، صحيح متوفر بس فيه شوية عيوب بسيطة ف الدقيق المستخدم يا اما تالف او مسرطن ،لاء و ايه فيه بعض الدول التانيه فيها رجال أعمال معاهم فلوس البلد كلها و تاخدها و تسافر و خلعــــون ، كل البلاد دى شغالة أر علينا عشان معندهاش هرم واحد ، أمال احنا بقه اللى عندنا تلاتـــــة

محمد مصطفى يقول...

ههههههههههههههههههههه
يا عم حرام عليك تعبتنا من الضحك

Unknown يقول...

دلوقتى بس عرفت يعنى آيه انت بتستعمانى يا هرم
مدونة جامدة احييك عليها

Esmeralda يقول...

ايه ولاد هرم واحد ده؟؟؟
ما كل واحد يحافظ على كلامه بقى
انا بنت ناس برضه

و بعدين احمد ربك انه فضل متمسك بالبلد عشان ولاده و مهجش شاف له عقد بره

حاجه تفقع

zordeak يقول...

الهرم الهرم الهرم


أصفر ودمه خفيف

الهرم


يطلع فى شتا او صيف


هوا اييييييييه

يا عم

يا عم

:p


انت متعرفش يا اشرف اللى فيها

الهرم هو اللى مأكلنا

هو

هو اللى مشربنا

هو

هو اللى مشبعنا

أمال

ده انا متفق حتى معاه انى بعد ما اخلص يشوفلى عروسة بنت حلال ويجوزنى

امال انت فاكر ايه ؟

ده الهرم يااااباااااااا

;)

Shiko يقول...

طبعا يا اشرف الهرم خيره مغرقنا
دى كانت بدايه منطقية واستهلال لابد منه
اما بالنسبه لموضوع الزباله دى كلها شكليات
لازم عمو زاهى يتغاضى عنها
زعلان قوى على الهرم مايشوفوا مساكن الايواء والبشر اللى عايشين وسط الزباله
حالنا بيفكرنى بالمثل الشعبى "من بره هله هله ومن جوه يعلم الله"
هاقولك ايه حسبى الله ونعم الوكيل

نفسنا يقول...

تم أفتتاح العدد الأول من مجلة نفسنا
نتمنى منكم زيارتنا

Unknown يقول...

عيب كده
كل مره تغلط في رمز من رموز مصر
مره نفرتيتي ومره الهرم, ينفع كده يعني؟

وعلي فكره قناة السويس بتدخل اكتر من كده كمان, بس انت عارف الحكومه مصاريفها كتيييييييير
ماهي لازم تصرف وتتمنظر عشان منظرنا قدام الدول التانيه, يعني كله لينا بردو
قدرو بقي

admelmasry يقول...

ههههههههههههههههههههه
مرة الهرم
ومرة الفيل
.
.
انا بقيتت اجي عشان اعرف هتغني ايه انهارده
.
.
تعرف اني لسه كنت هتخانق مع الهرم بتاعي
.
.
بس بعد الكلمتين دول
هاروح ابوس ايد الهرم وش ودقن
.
.
تحياتي يابرنس
والسلام

MaMaDo يقول...

كابتن كابتن
فرح مين ده
فرح اي يا عم دا اشرف نزل بوست جديد
يا راجل لما اروح اشوفه بقى


و بعدين بقى هو انا لسه هروح الهرم عشان ارومى الزباله
مش ينفع كده


و بعدين انا ماك يا باشا وخدها سياحه كده ليه
بعد ما الواحد كان فاكر ان الاهرمات انضف حاجه فى البلد طلعت اسخن
يعنى اعمل ايه امشى من البلد الفقر دى

aboud يقول...

انا مش عارف كذا مرة أسيب تعليق وأرجع مش لاقيه..الظاهر في مؤامرة وةلا ايه...يمكن لعنة الفراعنة أصابت المدونة.ههههههه..ماعلينا ربنا يستر.بس انت واحشني ياعم أشرف..وفرحان أني شفت صورتك وسمعت شعر بصوتك..

صباح الخير يقول...

والله ربنا يديلك على قد ماخليت الابتسامهتسعد قلوب كتيره
تيجى نقول ........السلام ..السلام ..السلام
طبعا انا قصدى مدينة السلام اللى بينادوا عليها فى ميدان رمسيس
ارجوكوا اوعى حد يفهمنى غلط

Unknown يقول...

ياسيدي الفاضل الخير اللي احنا فيه ايه؟
أنا سامعاه بودني دي اللي هياكلها الدود بيقول بعضمة لسانه برده اللي هياكلها الدود ان شاء الله ان ولا مليم من دخل وزارة السياحة بيدخل البلد
كله بيتصرف علي اللي بيقول عليها ترميمات وعلي أجور الموظفين وقعد يعدلك بقا ماعرفش معبد ايه فين بيترمم بكام مليون ده غير طبعا نسي يقول تمثال رمسيس الملك اللي نقله اتكلف أكتر من اللي دخليتهولنا آثار مصر السنين اللي فاتت كلها
وعلي رأيك اذا كان قناة السويس مابتجيبش فلوس
وحتي لو جابت تفتكر هنشوفها؟
لا نسمع عنها بس
يمكن الخير كله ده يقصد الخير اللي في بيته وبيت المسئولين
وربنا يخليلنا الهرم وقناة بنما....قصدي قناة السويس :)))

غير معرف يقول...

هههههههههههههههههههههه
بجد بوست جامد قووووى وظريف جداااا

انا اول مرة ازورك بس ان شاء الله مش اخر مرة

واتمنى انك كمان تزور البلوجة بتاعتى

ولك جزيل الشكر

smraa alnil يقول...

ماهو انت اللي غلطان يا اشرف
حد يروح عند الحلاق برضه
طب دة حتي عيب
ثم انت اصلا عندك شعر عشان تروح تحلق

ثم انت مالك بقناة السويس ولا حتي الهرم
ما تسيب الشعب يا يعيش يا حقود

basma saghir يقول...

لازم يكون للاكلام ده كمالة مش هينفع تشتم في الهرم وماما نفرتيتي ومتعتذرش
وبعدين يعني المفروض ان السبعة دولار بتوع كل يوم دول يادوبك يكفوا اجرة الميكروباصات وفزيتة دكتور انف واذن وحنجرة بعد ركوب الميكروباص
يبقى كدة احنا خالصين

ابو العربى يقول...

الهرم هو فى ذى الهرم
هو الى ماكلنا هو هو الى مشربنا هو هو الى مرقصنا هو

الكلام نوعان :كلام فارغ وكلام مليان كلام فارغ يقول...

حسدونا يا اشرف بعد اما كنت انا اول واحده تعلقلك وانت اول واحد تعلق لى
لا انا لازم احط خرزه زرقا على البلوج بتاعى وهاجيبلك واحده كمان
يلا
المهم ان البوست لذيذ جدا وبعدين هما نسيوا ان كمان ابو الهول هوه كمان ثروه قوميه على الاق لو مفيش جمال ممكن السياح يقعدوا عليه ويعملوا حصان
حسبي الله ونعم الوكيل

عايزه اشوفك
مها

أخف دم يقول...

ميرو
مش المرة بس .. أنا عسل علطول يا جميل بس انت ركزى.. مش أحسن كانوا يجيبولك كاميرا ديجيتال ما دام فيه خير كده؟
ــــــــــــــــــ
سجدة
فعلا احنا فى خير فظيع .. الحكومة ناقص تغير لنا هدومنا وتنيمنا ف سرابريرنا
ـــــــــــــــــــ
باتريسيا
عشان خطرى كلمى الهرم وسطة وقوليله أشرف محتاج تأمين للشقة الجديدة
ــــــــــــــــــ
سكايار وروميو
لو جدعان روحوا ارموا زبالة ورا الهرم عشان كل واحد يصرخ شلت يدىىىىىىىى
ــــــــــــــــــــ
يوسف باشا
ريحتك منى من البلوج أساسا وجيت أسكن جنبك .. على الله يطمر
ـــــــــــــــ
مصطفى ابن الدكتور
شكلها كده وزارة السياحة هتجيبلى شلل قريب قبل ما اكتب عن بقية الوزارات
ـــــــــــــــــ
جودة باشا
يا عم كاريزما مش كاريزما أنا عايز أعرف نصيبى فين من أم الهرم ده؟
ـــــــــــــــــ
انتظار مؤقت
نسيتى تقولى بالروح بالدم نفديك يا هرم ... مش ده بقية النشيد الوطنى؟؟
ـــــــــــــــــ
ضوء القمر العسل
يارب تكونى خلصتى الامتحانات على خير .. ده أهم حاجة .. وبالنسبة لموضوع الضحك ربنا يسعدك كمان وكمان ..
ـــــــــــــــــــ
رضوى
ربنا يكرمك يا رضوى وعلى فكرة هما مش كانوا بيفكروا يبشيلوه .. هما شالوه فعلا
ــــــــــــــــ
شاور ميرور
على فكرة المرة دى انت اللى ضحكتنى .. يا عم لا الهرم ولا فيصل .. ادينى خمسة جنيه وانا اقعد ف بيتنا واسكت
ـــــــــــــــــ
ريما
أنا كترت من البوست وانت اللى مش موجودة .. يارب يكون خير ..
ـــــــــــــــ
هبه
مش عشان يعنى انت ساكنة جنب القناة والراجل بتاع الفلوس بيفوت عليك الأول يبقى تدافعى عنها .. وبعدين يعنى مادام انت طيبة قوى كده ما تاخدى نصيبى معاك .. بطلوا جشع بقى
ـــــــــــــ
أحمد عبد الهادى
واحشنى يا احمد ياريت أشوفك قريب وسعيد بوجودك مدون جميل معانا
ــــــــــــــ
رينا
ربنا يكرمك انت اللى ستين عسل وثكر كمان بس على فكرة كلمة ف ودنك .. مفيش حلفان بالنعغمة عشان حرام .. ما تقوليش لحد بقى
ــــــــــــــ
فوكيرة
منورانى .. سيبيهم سيبيهم ليهم يوم .. واحنا لينا ساعة بس
ـــــــــــــــــ
سها
مكره أخاك لا بطل يا جميل .. أنا كنت باحلق أعمل غيه يعنى ؟؟؟ أمشى بنص دقن عشان خاطر سى زاهى ..
ــــــــــــــــ
أحمد سلامة
منورنى والله وتعليقك عسل وانت أمور حتى من غير ما اوصفك
ـــــــــــــــــــ
لميا
أحلى حاجة فيك انك دايما بتيجى تحطى جاز على النار المولعة أساسا
ما كفاية اللى انا فيه
ــــــــــــــ
علا
ربنا ينصركم يا رب .. وان كنا احنا عندنا الهرم .. فانتوا عندكم الأغلى طبعا المسجد الأقصى .. ربنا يرجعه وينصركم
ــــــــــــــ
صرصارة
واحتمال كمان يشيلوا الهرم عشان الناس تعرف تشوف الزبالة على نضافة
ــــــــــــــــ
عمرو أحمد
منور يا كبير .... ياريته كان هرم الكيت كات .. كنت قلت يا واد ده تمثيل .. إنما للاسف طلع البتاع اللى على كشكول سنة تالتة ده
ـــــــــــــــ
نيو إيمدج
ربنا يكرمك .. انت فعلا فوقتينى من اللى انا باعمله ده .. خلاص غلوش غلوش محصلش حاجة يا جماعة .. دى خناقة بين اتنين صعايدة بس
ــــــــــــ
مادو
يا عم مش بدل ما تموت زيى من البرنامج
ــــــــــــــــ
محمد بدرى
منورنى وياريت ماتبقاش زيارتك الأخيرة
ـــــــــــــــ
إزميرالدا
يعنى ايه انت بنت ناس ؟؟؟ يعنى انت من هرم تانى مثلا ؟؟؟ وبعدين مهما كنتى بنت هرم تانى فاحنا ولاد الهرم الأكبر يا أستاذة .. يعنى احنا الأصل .. حضاااااارة .. عراااااااااقة
ــــــــــــــ
أحمد باشا فؤاد
ياريت تجيب الأغنية دى مصورة يا احمد مع الأستاذة مى أو دينا .. عشان البلوج يطرى يعنى
ــــــــــــــ
شيكو
مش عارف أرد عليك ازاى وانا بارد متاخر .. بس ربنا يرحمك .. ويدخلك فسيح جناتك ويتجاوز عن كل سيئاتك ..
يااااااااااااااااارب
آميييييييييين
ـــــــــــــــــ
مجلة نفسنا
الزيارة وجبت
ـــــــــــــــــ
إسراء
جميل قوى والله ان الشعب متفاهم كده ومقدر ظروف الحكومة .. يبدو إن أنا الوحيد اللى مش وطنى هنا ..
ــــــــــــــــ
آدم باشا المصرى
واحشنا يا عم .. ارجع بقى بالسلامة عشان نشوفك
ـــــــــــــــ
مامادو
أنا لو منك وعايش فى البلد أسيبها واروح أى بلد تانية .. بلقاس مثلا
ـــــــــــــــ
عبود
انت اللى واحشنى يا عبود وربنا يجيبك تانى بالسلامة لأنك من فترة مش بتيجى
ربنا معاك
ــــــــــــــــ
صباح الخير
ربنا يجعلنى دايما سبب للابتسامة الجميلة دى اللى بتنور أحلى وشوش فى مصر
ـــــــــــــــ
فنان فقير
البلوج متراقب يا جدعان كل واحد يخاف على كلامه .. وقسم بولاق قريب
ـــــــــــ
ميدو
الزيارة واجبة طبعا وكمان ده رد جميل ..
ــــــــــــــ
إنجى
يا بنتى انت لسانك أطول منك ليه ؟؟؟ وبعدين ما انت زيى مش لاقية تاكلى .. اعملى اى حركة جدعنة من بتاعة زمان واعملى مظاهرة عيالى
ـــــــــــــــ
بيسووو
مش بعيد نكون احنا مديونين للحكومة
ــــــــــــــ
ضد الظلم
والله حاسس ان البلوج عايز فيديو مى عز الدين كمان
ــــــــــــــ
مها
ألف مبارك على الخطوبة الأول وان شاء الله هارقى نفسى قريب عشان نرجع لسابق العهد وده شرف ليا يا باشا
وأنا طبعا اللى أتمنى نشوفك ونكلمك كمان
ـــــــــــــــــــ

غير معرف يقول...
أزال أحد مشرفي المدونة هذا التعليق.
Unknown يقول...

يا بابا هرم و جده النيل ولا عمتو فيله عمو ابو الهول بيسلم عليك و قولك خد 20000ٌ$ هاتلك سناكس

abo-bder يقول...



تركيب كاميرات مراقبة بالرياض
فني تركيب ستلايت بالرياض
فني تركيب ستلايت بالرياض
فني تركيب وبرمجة الدش بالرياض
شركة قص اشجار بالرياض
فني
فنى
فنى تركيب ستلايت بالرياض
فنى
فني تركيب اثاث ايكيا بالرياض