اخبار

الخميس، ١٠ مايو ٢٠٠٧

أقول لك شعر؟؟



أَقُولْ لِكْ شِعْرْ؟
..سؤال قلتُه بْمَلل ليها وانا مُخنوق
وصاحبي ويّا صاحبتها قُريّبْ منّنا قاعدين
..في رحلة شوق
..عينيه في عْـنيها مش داريين بكلّ الناس
..عيونهم مليانين إحساس
وحتى الرّمش مابيرمشّ
خايف لو تضيع نظره
ونظرتهم تساوي كتير
...ماهيش نظرة عيون وخلاص
..ْعيونُه مركبْ اتطوَّح في بحر عْـنيها بيعافـِر
..وحالف إنه راح يوصل.. ولو طول الحياه سافـِرْ
..وبحر عْـنيها -من حظي- مالوش مَرْسَى
..مالوش آخِرْ
..واقرَّب منها تتّاخِرْ
!!!ومش عارف أنا اعمل إيه
دا انا بالصُّدفه جايْ ويّاه.. وهيّه معاها بالصُّدفه
وانا واقف وكات واقفه
ولاجل الرَّحمه والرأفه
..قعدت معاها نتكلم
..ومِ الأوّل وهيّه عن الكلام صامت.. ما بتردّش
..حاولت اقنعها إن الفيلم مش صامِت.. ما بتردّش
!وإيه الحلّ في اللي انا فيه؟
* * *
أَقُولْ لِكْ شِعْرْ؟
باكلّمها ووِشّي ناحية اصحابنا
..باشوف إيه اللي كان حاصِلْ
..ولسَّه عيونه وِسْط عيونها بتواصِلْ
..ولسَّه إيديه في قلب إيديها بتواصِلْ
!!!وانا قاعد بعيد عنهم... وبيني وبينها ميت فاصِلْ
!وهاعمل إيه؟
مافيش مواضيع
وكل ما اشوف كلام بيضيع
..ولمّا اسأل
تجاوبني على قدّ السؤال بالظبطْ
..وانا اتلخبطت
مش عارف ألاقي سؤال تجاوبُه كمان
..عِرِفْت الإسم والعنوان
..عِرِفت المهنه والكليه واصحابها اللي كانوا زمان
..وعُقدتها مع العربي
..وكانت عِلمي مش أدَبي
ومن ذوقي.. ومن أدَبي
..مانيش عايزُه يكون تحقيق
..أنا عايزُه كلام موصول ما بينـَّا.. من صديق لصديق
ساعتها القـَعْده تِشْرِحْ قلبها وقلبي
..ولو يعني ماهيش طايقاني
!!ليه في الأصل جَتْ جنبي؟
* * *
أَقُولْ لِكْ شِعْرْ؟
..مافيش غيرُه
..ولو قـَعْدتنا هتطوّل.. مافيش غيرُه
..ولو هنعيدها مِ الأوّل.. مافيش غيرُه

:قالتْ لِي بإيدْها
سَمّعني
كما لو كنت انا يعني
..غريق تايه
وهيّه القشه... من غيرها هاباتْ مقتول
وفي الآخر.. بدأت أقول
..عن الأمل اللي تاه ما رجعش من خوفي
..عن الحب اللي كان وانشقّ بظروفي
وفجأه
لقيتها لفّتْ لي.. وبصّتْ لي
وحسّيت الأمل بيعودْ
..وأوّل مرّه بالمح لون عينيها السّودْ
..وانا موعود وقلبي بالعيون السّودْ
ما نقدر مرّه نحْكمهَا
..ومن يومْهَا
..وانا قاعد معاها هناك
..وباسرح جوّا ننّ العين
..وصاحبي ويّا صاحبتها.. قـُريّب منّنا قاعدين
عيوني مركب اتطوّح في بحر عْـنيها بيعافـِرْ
وحالف إنه راح يوصَل.. ولو طول الحياه سافـِرْ
..وبحر عْـنيها -من حظـُّه- مالوش مرسَى
..ْمالوش آخِر
..يقرّب منها تتـَّاخِرْ
واشوف صاحبي بيلمحنا بطرْف عْـنِيِه
:ويهمِس ليها بالرَّاحَه
!!أَقُولْ لِكْ شِعْرْ؟
* * *

هناك ٤٩ تعليقًا:

إبـراهيم ... يقول...

وااااااااااااو .........أولي يا ريس

.
.
يعني أنا أورد رد ، وأول تعليق ، و رقصني يا جدع .......... وبيقول لك سلااااام لعم أبو عصام تلوث ، لأنه علم عصام تلوث إزاي يفتح مطعم !
.
.
أي نعم هوا مكنش اتفاقنا على (أقول لك شـعـر) بس على العمومًا شعـرك كله حلووو ، وجمييل ...

عارفين يا جماعة القصيدة دي ليها قصـة

أصـل أشرف .................

اسكت بقى يا لسااااني ...:)


تحيااااااااتي يا أشـرف بيه

رينـــــــــــا يقول...

اولا شكرا يافندم على تلبيه رغبات المشاهدين:D :D :D :D

ياترى عنيها شكلها ايه؟؟؟

كلامك جميل ومحسوس

بس يابنى اتكل على الله كدا وقول متخافش

انت لسه هتستأذن :D

Esmeralda يقول...

يا سيدى يا سيدى

شاعر كمان؟؟؟؟؟

بس بجد و الله جميل ربنا يوفقك

مش عارفه ليه افتكرت اللنبى فى الحته بتاعه الشوق الشوق الحضن الحضن البوسه البوسه

غير معرف يقول...

مشاعير قوية قوي بس ايه كلها رومانتيكة يافندم

Amr Ahmed يقول...

هيييييييييييه

انا اول واحد سامع القصيدة دي
وحصريا من اشرف توفيق

يوم الفلانتين في الازهر بارك

وكنت عاوز اقولك اكتبها

بس هي روعة اما تتسمع منك يا ملعم

صباحة فل
اقولك شعر؟

هههههههههه

zordeak يقول...

يخرب بيت كده


مع انى عامل حظر على التعليقات ومبعلقش خالص ومبردش عندى كمان علشان مش فاضى خالص

ومكتئب شويتين

بس لما قريت الشعر العبقرى ده

بصراحة يعنى

مينفعش معلقش


أنت مفترى يا أشرف

وانا بحسد نفسى انى اعرف شاعر كبيير زيك

وهيكون واحد من التقال اوى فى مصر قدام ان شاءالله


وابقى افتكر انى قلتلك كده

:)

غير معرف يقول...

السلام عليكم ورحمه الله وبركاتة
فى البداية أنا بقد أعتذارى لحضرتك لخطأ حدث منى دون قصد أو عمد وربنا يشهد على ذلك
فى قصيد لحضرتك أسمها بخاف من الحكومة عجبتنى جدا فقمت بنقلها إلى ساحة الأخبار فى منتدى عمرو خالد مع ذكر أنها منقولة مع وضع رابط مدونة حضرتك
ومع الأسف لم أستاذن من حضرتك وحدث ذلك فى سهو منى ودون قصد
أرجو من حضرتك تقبل أعتذارى
ولو حضرتك تريد أن أطلب من مشرف المنتدى بحذف الموضوع فلك كل الحق فى ذلك
وأليك رابط الموضوع
http://forum.amrkhaled.net/showthread.php?t=102450
أرجو تقبل أعتذارى
أختك فى الله
أروى

مريم يقول...

حلوة اوىىىىىىىىىى

ضـوء الـقـمر يقول...

الله الله الله
بجد تحفففه يا اشرف
اقول ايه بس ولا ايه
دي جميلة جداااااااااا

مدونة كسبان يقول...

جامد موت ياأشرف
انا ياعم بقيت من زوارك الدائمين

نفسى أعلق فى أى مدونة أول واحد

بس للأسف مليش نصيب بقى


المهم استمر..

ياريت بقى شوية تعليقات بقى للعبد لله فى مدونته الجديدة

واللى اسمها مدونة كسبان

ولك كل الشكر



ياجمااااااااااااااااااااعه شوية تعليقات علشان استمر

الكلام نوعان :كلام فارغ وكلام مليان كلام فارغ يقول...

جميل اوى البوست ده يا اشرف
بجد عبقري
واحلى حاجه فيه
انه بسيط جدا
وسلس
مش معقد
وفعلا بيعبر عن مشاعر اى حد عهايز يتكلم
ايه العبقريه دي يا واد

ساعه الغروب يقول...

الاسلوب السهل الممتنع مش بلاقيه كتير الايام دى

بس بجد
مش عارفه اقولك ايه

البوست بجد مالوش اى حل

حلو اوى
وحاسه انى كنت شايفه المشهد كله قادمى

بجد حلو اوى اسلوبك

انا فعلا بعجز عن التعبير بعد قراءه كلماتك

ولا يسعنى الا رفه القبعه

:)


بجد انت فعلا فنان
اوى
اوى


شكرا ليك

لتذكيرى بمشاعر كلها سمو

اندثرت من زمان مع الزحام
والايام

شكرا ليك

rona يقول...

بجد يا أشرف باشا الشعر جامد موت حلو قوى وبجد بساطك فى الكلام جميله جدا وربنا يوفقك

BaTresYa يقول...

الله على الكلام العبقري بجد مش ممكن...تحفة والله ..يالهوي مش عارفه اقولك ايه والله اسلوبك يجنن اول واحد اشوفه بيكتب شعر طويل ومش ازهق من القرآءه ...وقدامك حل من اتنين يا تنزل كتاب ..يا تنزل كل يوم قصيدة وهه بقى

Ana keda يقول...

بص بقى يا اشرف بقى يبن الناس الكويسة بصراحة بدون انك جامدوالحجات الحلوة دىانت عاوز الناس مش تنزلك قبعة عاوزهم ينزلوا علم مصر ويحطوا قصيدة يا عم اانا مش بهيس والله هى اى نعم وقت الفجرية بس اقولك انا بدل اقولك شعر هقولك حاجة انت رجل جامد بجد جامد اخر حاجة

باكلّمها ووِشّي ناحية اصحابنا
..باشوف إيه اللي كان حاصِلْ
..ولسَّه عيونه وِسْط عيونها بتواصِلْ
..ولسَّه إيديه في قلب إيديها بتواصِلْ
!!!وانا قاعد بعيد عنهم... وبيني وبينها ميت فاصِلْ
!وهاعمل إيه؟

دى عجبتنى اوى اوى سلاموز بقى

مدونة كسبان يقول...

اسمح لى انى
أعلق تانى
وأقول لك
جامد والله ياأشرف
كمان المقطع الفيديو جامد
وطريقة الإلقاء والشعر نفسه جامده جدا
ياريت بقى مواضيع
شعر زى كدا كتيير

استمرررررر

خالص تحياتى

Shower-Mirror يقول...

جامده موز موز موز

ههههههه

فكرتنا بايام ماكان الواحد بيخرج مع اصحابه المرتبطين و يلقط رزقه


هههههههه

و على فكره انا عرفت مراتى بالطريقه دى

و ادينى دلوقتى باجرجر فى عيلين

ههههههههههههه


بس جامده بجد يا معلم

ابقى تعالى بقى ...مش كل مره هاجى اجيبك

YHYيــوســف الـمصـرى يقول...

اه ده يا صديقى
جميل اوى يا اشرف بجد وحبتها اكتر لما سمعتها منك
اقلك شعر ؟!ههههه
انت جامد يا فاكهة المدونين
وانا مصمم على اللقب ده
انت فاكهة المدونين وشاعرهم الجامد
موفق ديما ان شاء الله يا اشرف

Ma 3lina يقول...

يا ترى انا سمعتها و شفتها فين قبل كدا ؟؟؟؟

اه اه افتكرت

لما كنت رايح و راكب الحنطور و دوختنا معاك

بس على فكرة لما شوفتها حسيتها اكتر من لما قريتها دلوقتى

برده حضرتك ضفت كتير ليها

Rivendell** يقول...

تصفيق حااااااااااااااااد

جدا
جدا
جدا


عظمة على عظمة

;)

Yasmine Adel Fouad يقول...

يااااااااااااااه
كنت محتاجه قوى أقرأ حاجه بسيطة تدخل قلبى و اقول عليها الله

Unknown يقول...

مش هينفع اقول إن شعرك تحفة

قلتها قبل كدة

ولا إنك شاعر كبير

قالوها كتير قبلى

اقول ايه .. ايه ... ايه


إنت عـبــقــرىىىىىىىىى


وإبقوا إتفكروا الجمايل دى
:D

vetrinary يقول...

عشان قلبك
ماهوش فاضى
عشان عشقك
ملوش ماضى
عشان حبك
كلام فاضى
هقلك شعر
...............
الى ان يحين ادان العشا
هبعتر سنينى
ما بينى وبينك
وابعتر سكوتى
وهاجعل ملامحى
جندا لعينك
وعجل بموتى

سندباد يقول...

مساء الخير
دي اول زيارة ومتخافش مش هاتكون الاخيرة عجبني اوي الحالة الحلوة اللي فيها مدونتك احييك

قلب يحترق يقول...

أستاذ من يومك يا ابني

طبعا مش هقول حلو و جميل و مش عارف

ايه عشان انت مش محتاج الكلام ده

التواضع يا نااااااااااااااس

daddies little cuttie يقول...

omg i love ittttt .... amazing

احمد عبدالحي يقول...

يا اخي ارحم حتي يو تيبا
سيب حاجه للغلابه اللي قاعدين جنبك علي النت
يا ريس عسل
طبعا مش هقدر اقيم القصيدة مش عشان مش عارف بس عشان انا اصغر من اني اقيم شغل انا حافظه اصلا
قشطه يا ريس

LAMIA MAHMOUD يقول...

انت عارف رايي من اول مرة سمعتها في الازهر بارك يوم الفالنتاين بجد تحفة

من عبقرياتك فعلا

بجد بجد تحفففففففة


انا وكل اللي قاعدين قلنا كده

وقعدت اقولهم ده اشرف توفيق انا عارفاه

كانت صدفة سعيدة وكنت انا اسعد بالقصيدة والنبي نزلي بقى بتاعت الدبدوب

قصاقيص يقول...

تحفه بجد يا اشرف
يسلم قلمك وإحساسك
::::::::::
قدرت تعيشني المشهد وتفاصيله بكلماتك الجميله
:::::::::::::
المطلع الاستفهامي للقصيدة قوي اوي ويشد
:::::::::::::
هضمها ل "ناقص دبدوب" في الفافوريتس طبعا
تحياتي

Unknown يقول...

أشرف أنا دبستك في تاجات(((:
هرجع تاني ان شاء الله عشان أعلق علي البوست

غادة الكاميليا يقول...

عجبنى جدا كام مقطع من القصيدة عاليين فعلا بس هدخل تانى لتعليق أكبر تحياتنى وسمعنا عنك سمع خير وظننا مخبش
فعلا شاعر
تحياتى لحين العودة

غادة الكاميليا يقول...

كان لازم أدخل تانى أأقولك إنك دم خفيف جدا جدن جدن نننننننن
يخرب عقلك البلوج فظيع

غادة الكاميليا يقول...

لألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألألأ كفاااااااااااااايه أنا كنت مستعجله ومتأخرة وعايزة أخرج حراااااااااااااااااااااااااااام الناس اتلمت حوالي من صوت ضحكى شوف ربنا يجازيك طب يارب النت يفصل علشان أخرج بقى
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

Unknown يقول...

جمييييييييييييييييييييييييييلة
ورقيقة قوي

Shiko يقول...

ماشاء الله عليك
لاول مرة مش لاقيه كلام اقوله لك
ابيات شعر وجبة رومانسيه دسمه
اتمنى ان ربنا يديم عليك موهبتك وتفضل تسمعنا فى اشعار رقيقة كده
بين قوسين
"اشكرك على سؤالك الدائم عليا "

فبركة يقول...

بجد أنت جامد أوى
واللا أقولك؟ والله العزيم بجد انت جامد أوى
ههههههههههههه
لا استنى بقى عشان نتكلم بجد..أنت جاااااااامد أوى بجد
يخرب جمال أحاسيسك وكلامك اللى طالع من جواك داخل جوانا فى النخاشيش عدل
بجد يا اشرف والله العظيم انت عبقرى
بحبك وبحترمك وبتمنالك كل خير
يا عم الأمور

محمد البدري يقول...

وحشتني يا أشرف ووحشني شعرك وخفة دمك
يااااااااااااااااه والله زمان يا أشرف يا ابني عاوز اشوفك أجيبك منين
على العموم انت تعرف تجيبني زي عادتك
أنا في القاهرة مستنيك هتنورها لا بجد هتولعها
سلام مؤقت لغاية يوم 27

tamer afify يقول...

خدني الكلام لحد الآخر

اسلوب ذكي ومبدع

تحياتي

حدوته مصرية يقول...

هو فى اجمل من ده شعر
الله عليك قول كمان وكمان

ممكن اطلب منك تزور مدونتى خواطر نفس وتقرا اللى فيها بالسريع كده و تقولى رأيك لانه اكيد يهمنى

http://mohamedyasser.blogspot.com/

تحياتى

إبـراهيم ... يقول...

إنتا كمان نزلتها صوت وصورة ،، حلووووو قووووووووووي

تحياااااااااتي

أخف دم يقول...

إبراهيم باشا
يا عم ماتجيبش سيرة عصام تلوث أصله بييجى ع السيرة .. تعالى انت بس تانى المنصورة وأنا هاظبطك عند واحد تانى أنضف .. محسن تلوث
ـــــــــــــــــ
رينا
يا ست الكل أنا تحت أمر المشاهدين والمستمعين والقراء وبعدين الشرف ليا أنا
أما بالنسبة اتكل على الله وقول .. فياستى هيه أصلا ما اديتنيش فرصة عشان أقول اى حاجة .. كانت عاملة زى فيلم شهد ودموع بتاع محمد هنيدى مع عبد الوارث عسر بالظبط
ـــــــــــــــ
إزميرالدا
وشاعر كمان؟؟؟
داانتى مش متابعة بقى يا ستى .. دا انا أصلا الشعر هوه الأساس ..
وعلى فكرة اللمبى هوه اللى سارق منى الفكرة مش أنا اللى واخدها..
هههههههههه
وبعدين اللمبى لا شاف رمشها وعنيها السمرا ولا حاجة .. دا كان بيفكر فى البلوبيف البلوبيف
ـــــــــــــ
قلوب حائرة
وإيه العيب انها تكون كلها رومانتيكية يا فندم ؟؟؟
حد لاقى ؟؟ سيبونا .. ادونا فرصة بقى ...
ههههههههه
ـــــــــــــــ
عمرو أحمد حبيبى
يا عم عمرو أنا ليا الشرف انك سمعتها منى يا جميل ولو اعرف انها حلوة بالنسبة لك كده كنت كتبتهالك ولو على التيشرت يعنى ومضيت تحتها زى رونالدينيو
صباحك فل
ـــــــــــــــــــ
أحمد فؤاد
اللى بجد باستنى تعليقه عندى
دايما تعليقك يا احمد باحس فيه بالصدق والحب والمودة .. ربنا يكرمك يا جميل ويخلينى عند حسن ظنك .. والشرف ليا أنى اعرف واحد رقيق صافى زيك
ــــــــــــــــ
الأخت العزيزة جدا أروى
من غير استئذان يا اروى .. الشرف ليا انك تاخدى حاجة من شعرى فى اى منتدى .. ومجرد اعتذارك هوه شرف تانى ليا .. والأمر لا يستحق الاعتذار ده كله ..أنا دخلت وشفت الموضوع وشفت الردود .. ويكفينى ان الناس كلها الحمد لله عجبتهم القصيدة وقبل القصيدة عجبهم أروى اللى اتمنى تكون أحسنت الاختيار
مجرد وجودك عندى ياأروى شرف ليا وربنا يكرمك
كل اللى أطلبه لاى حد انه يكتب اسمى تحت اى قصيدة ليا بس عشان أحيانا منتديات بتنقل من بعضها وبتوه القصيدة على صفحات النت
ولو حضرتك عملتى بحث هتعرفى ان منتدى الأزهر اخد منك القصيدة بعدها بكام يوم .. ولو حضرتك ما كتبتيش اسم الشاعر كانت أكيد تاهت ..
شكرا ليك مرة تانية وربنا يكرمك ويتقبل يارب
سعيد بوجودك هنا بجد
ـــــــــــــــــ
مريم
ربنا يكرمك يا رب ومنورانى
ـــــــــــــ
ضوء القمر
البنوتة العسل بجد
أولا ربنا يوفقك فى امتحاناتك
ثانيا .. القصيدة حلوة عشان بتقراها بنوتة حلوة بس
منورانى دايما واوعى تغيبى عشان عامل لك حضور وانصراف
ـــــــــــــــ
جودة باشا ومدونة كسبان
انت اللى تستاهل الشكر والمدح يا جودة
مدونتك من أجمل المدونات ويكفى انك عامل مدونة عشان تساعد الناس الغلابة اللى زيى عشان يظبطوا مدوناتهم .. ربنا يكرمك ..
ويجعل الناس تستفيد من علمك وأنا أول الزاحفين إلى مدونتك دائما ان شاء الله
ــــــــــــــــ
مها
ربنا يكرمك يا مها على الكلام الجميل وبعدين دى مش أول مرة اكتب حاجة عبقرية .. انت عارفة كمية التواضع بتاعتى ..
ياواد؟؟؟
ماشى
ــــــــــــــــ
رودى
تعليقك دايما بيفرحنى عشان منسق وبسيط اكتر من قصيدتى نفسها
وحلاوة اى شعر انه يعبر ببساطة عن المتلقى عشان يحس بتوحد معاها .. وده أنا باحاول على قد ما اقدر اعمله ..
ربنا يكرمك مرة تانية
ـــــــــــــــ
رونا
انت اللى منورانى ويكفينى انك انت اللى قريتيه
ـــــــــــــــ
باتريسا
ربنا يخليلى لسانك العسل .. ومش عارف يا لهوى دى مدح وللا ذم ... بس ع العموم ربنا يستر .. كنت متخيلك وانت بتتفرجى على القصيدة وبتشدى ف شعرك مش عارف ليه
ههههههههههه
أما بالنسبة للكتاب فالديوان نازل بالفعل من فترة بس انت اللى مش متابعة بقى
وربنا يكرمك يا جميل
ـــــــــــــــ
أنا كده
ما بلاش علم مصر ينزل يا جميل .. هوه اللى مشربنا هوه .. هوه اللى ماكلنا هوه .. سيبيه مطرحه واقرى شعر زى ما انتى عايزه
ـــــــــــــــ
shower-mirror
والله العظيم تعليقك ضحكنى بجد .. وخصوصا الحتة بتاعة جارر عيلين دول..
ويا عم والله باجيلك بس انا فعلا مش باعلق كتير بس طبعا باستمتع بكتاباتك ومدونتك بلكون كمان ..
بعد كده هاعمل حضور وانصراف بس اطلع من موسم امتحانات العيال فى الدروس وانا هافوق لكم
ـــــــــــــــــ
يوسف باشا المصرى
يا عم ربنا يكرمك ويجعلنى قد اللقب الجميل ده ..دعواتك ونصايحك ليا بس .. عشان مفيش حد بيطلع لوحده .. لازم اخواته يبقوا معاه
ربنا يكمرك يا جميل وانا سعيد انى باسعدك والله
ـــــــــــــ
مرام ما علينا
مش عارف حاسس لهجتك مؤدبة المرة دى .. انت كنت زعلانة من حد ؟؟؟ أنا متعود انك بتدخلى مدونتى وانت فى ايدك قاموس المورد وبتذلينى بالإنجليزى بتاعك يعنى
ربنا يكرمك يا جميل .. وان شاء الله تشوفى حاجات احسن
وربنا معاك فى الشغل
ــــــــــــــــ
سها
التصفيق ليك انت عشان انت منورانى
شدى حيلك يا دكتور فى الامتحانات
ــــــــــــــــ
ياسمين الحرة
طب انت شفتى حاجة بسيطة حلوة .. مش تقولى الله بقى ؟؟؟ فين الله بتاعتك يا سيدى
هههههههههه
ربنا يكرمك يا ياسمين والبساطة هيه روح اى فن يا ياسمين لأن هوه ده اللى بيوصل للناس بغض النظر عن القصيدة دى أو غيرها ..
اكتبى عن الناس ومشاعرهم ومشاكلهم بكافة الوجوه توصلى لقلبهم وإحساسهم وتعاطفهم
ــــــــــــــ
ياسميييييييييين الإنسانة
أولا ربنا معاك فى امتحاناتك بس عشان دى أهم حاجة دلوقتى
وبعدين ربنا يكرمك .. عبقرى إيه بس ؟؟ احنا بس بنكتب اللى نحس بيه ..
لولا انى عارف ان كلامك من قلبك .. كنت افتكرت انك بترشينى عشان أدعيلك فى امتحاناتك
ـــــــــــــــ
veterinary
ياعم فيه حد يرد على قصيدة شعر بقصيدة جميلة زى دى؟؟
طب الناس تقرى قصيدتى وللا قصيدتك بقى ؟؟
هههههههههه
جميلة يا عم والله وربنا معاك ويوفقك
ــــــــــــــــ
سندباد
مستنى الزيارات الجاية عشان باعمل جرد كل آخر شهر على الناس اللى مش بتيجى وربنا يكرمك على الإطراء الجميل
ــــــــــــــــ
هبه أم قلب مولع
شدى حيلك فى امتحاناتك الأول ربنا معاك .. وبعدن انت عارفانى مش هاتكلم على نفسى ومش هاقول انى أحسن واحد فى مصر ولا حاجة .. لابد من التواضع عشان الواحد يوصل
ــــــــــــــ
بغالة حوشى
ربنا يكرمك والنور جاى من مدونتك على هنا مزغلل عنيا
ــــــــــــــ
أحمد عبد الحى
الشاعر الكبير
احنا طالعين سوا يا أحمد والقصايد طالعة على إيدك .. ربنا يخليك ليا يا جميل .. وزى ما انت حافظلى أنا حافظلك .. لأنك تستاهل يتحفظ ليك ..
ــــــــــــــــ
لميا
والله منورانى بجد .. وبتوحشنى تعليقاتك لو غبتى .. يا ستى ربنا يكرمك وسعييييييييد جدا ان القصايد عجبتك يوم الندوة .. وبعدين أنا بقى اللى كنت باقول للناس دى لميا محمود رغم انى مكنتش عرفتك اساسا!!!!
وبعدين يا استاذة ناقص دبدوب موجودة فى البلوج من زمااااااااااان .. وانت مش متابعة ولو قصدك انزلها فيديو فربنا يسهل ان شاء الله أنزل كل ندواتى
منورانىىىىىىىىىىى
ــــــــــــــــ
مى قصاقيص
الشاعرة الجميلة الرقيقة بجد
عشان إحساسك وشعرك صادق قدرتى تتجاوبى مع قصيدتى ..وتشوفى نقط القوة والضعف
شكرا على الإطراء الجميل ..
ومستنيين قصايد جديدة جميلة منك
ـــــــــــــــ
إسرااااااااااااااء
بطلى بقى يا غسراء .. انتى تغيبى تغيبى وتيجى وف غيدك مصيبة متغلفة بسلوفان اسمها تاج .. ارحمونا بقى ..
ادونا فرصة بقى .. ربنا يسهل واعصر على نفسى لمونة وأجاوبه
ــــــــــــــــ
صاحب البوابة
شكرا على سعيك لنشر الصرخة دى .. وطبعا الناس كلها قرأت التعليق والبوست بأكمله .. ربنا ينصره ويطلعه من الاعتقال .. هوه واللى معاه واللى زيه قادر يا كريم
ـــــــــــــ
غادة الكاميليا
محسسانى انك كنت مربيانى من صغرى وبتقولى ظننا مخابش فيك يا رافت والكلام الكبير ده
ههههههههههه
ربنا يكرمك .. وكويس ان عجبك كام مقطع من القصيدة كل مرة هازود مقطع حلو عشان يعجبك .. احنا لينا بركة اللا انت.. وبعدين انا مستنى انت مجيتيش
ــــــــــــــ
غادة الكاميليا
ههههههههههههههههههه
والله ضحكت وفرحت من تعليقاتك التانية
ربنا يخليك .. سعيد جدا انك فرحانة ومبسوطة من البوستات .. ربنا يجعلنا من الناس اللى بتوزع الابتسامة والفرحة على الناس
قومى بقى عشان تلحقى تنزلى
ـــــــــــــــ
فنان فقير
أحلى حاجة ف اسمك ان كلنا زيك كده
هههههههههههه
ربنا يخليك يا جميل ومنورنى
ــــــــــــــ
شيكو
سؤالى الدائم مش محتاج شكر يا شيكو .. احنا اخوات ولازم اطمن عليك لما سمعت انك مخنوقة اليومين دول او فيه ظروف وأدعو ربنا تكون الظروف خلصت ويهون عليك .. وبعدين زى ما قلتلك أنا تحت أمرك فى اى حاجة انت عايزاها لو ممكن اهون عليك أو اساعد يعنى
وبالنسبة للقصيدة .. شكرا على التشجيع الجميل والتعليق الأجمل فى جوانا ..
وشكرا على المتابعة كمان
ــــــــــــــــ
شريف باشا عبد الهادى
الصحفى الهمام
يا عم ربنا يكرمك عبقرى ايه بس.. أنا بس متواضع شوية فمتقولش الكلام ده قدامى عشان باتكسف أو قوللى قبلها عشان أدير وشى
هاقابلك فى القاهرة ان شاء الله قريب جهز العزومة
ــــــــــــــ
محمد البدرى
سين حلم لا ينتهى وعهد الله
يا عم ما تقلقش هاجيبك هاجيبك ان شاء الله .. أنا جاى القاهرة وهاشوف كل الناس وقاعد لكم بقى .. استقرار ان شاء الله .. أما نشوف الناس اللى كانت بتقول عايزين نشوفك هيعزمونا وللا ايه؟
ــــــــــــــ
تامر عفيفى
ربنا يكرمك يا ريس
ومنورنى والله
ـــــــــــــــ
محمد ياسر
المبدع الجميل
طبعا رحت مدونتك الأنيقة الجميلة طبعا بعد ما كنت متابع لمدونتك الأولانية بقيت متابع لمدونتين .. انتظر منى بس لما افضى بعد امتحانات العيال التحف دى .. رأى تفصيلى ان شاء الله أو هنتقابل أكيد فى القاهرة وتعزمنى برضه
ــــــــــــــ

admelmasry يقول...

باااااااااااااااااااشا
.
.
.
اللي الناس ما تعرفوش ان
اشرف توفيق
.
.
مش اسمه اشرف توفيق
.
.
اسمه اشرف اقولك شعر
.
.
بحبك يا برنس
ونفسي اشووووووفك

محمود عزت يقول...

إنت شاعر جميل :))

wael يقول...

بسيط وجميل جدا جدا جدا
اجمل ما فيه بساطته
رائع

إسلام منسي يقول...

استااااااااااااذ اشرف توفيق
وبصراحة انت فعلا اشرف توفيق (( الصفة ))
بص علشان انا بس رغاي حبتين
انا من يومين بالظبط قبل ما ارسل التعليق ده دخلت مدونتك صدفة
وبدأت اقرا من بدايتها خالص
انت رائع فعلا
لكن لما جيت للقصيدة دي
وقفت
افتكرت من سنة فاتت لما قريتها
فين مش فاكر
امتى بالتحديد مش عارف
ووقتها مكنتش اعرف اسم اللى كاتب
بس معلقة معايا
وكنت بحكيلها لاي حد
بتوصف فيها فعلا حالة ناس كتير لما ييجي واحد ياخد واحد صاحبه علشان يقعد ما صاحبة حبيبته اللى خارجة معاها علشان تقابل حبيبها
بجد مش لاقي كلام اقوله عن قدرتك الهايلة ودمك الخفيف الواضح فى كل مقالاتك وتواضعك الشديييييييييييد
ههههههههههههههههه
ياريت اتعرف عليك عن قرب
مستني اضافتك ليا على الميل اصل انا متواضع برضة وبخلي الناس هي اللى تضيفني :D
mr_right_714@hotmail.com
بجد بعد اذنك نفسي اتعرف عليك
ومبروك الكتاب اللى كان نفسي فعلا اجي حفلة توقيعه لولا ظروف الشغل ومواعيد المجلة
بالتوفيق دايما الى الملتقى

غير معرف يقول...

السلام عليك يا اشرف باشا
والله العظيم انت مثل الجوهرة العتيقة كلما مر عليها الوقت زادت تألق
صديقك احمد السعودى

غير معرف يقول...
أزال أحد مشرفي المدونة هذا التعليق.
Unknown يقول...

شكرا على الفيديو

وعلى القصيدة كمان

rana يقول...

ان المبيدات لها خطوره عالية على الصحة وخاصتا على صحة الاطفال ولذلك فان وزارة الصحة تنصح الاشخاص دائما بعدم التعامل او استخدام اى مبيدات ليست مصرحة من وزاره الصحة ويجب ان تتم عمليات رش المبيد لابادة والقضاء على الحشرات على ايدى مهندسين زراعين ويكونوا لديهم الخبرة والكفاءة المطلوبة ولذلك فنحن نقدم لكم خدمات رش المبيدات ومكافحة الحشرات فى شركتنا شركة رش مبيدات بالدماموفروعها شركة مكافحة حشرات بالدماموشركة رش مبيدات بالخبر وشركة مكافحة حشرات بالخبر وشركة مكافحة النمل الابيض بالدمامفان شركتنا تختلف عن الشركات الاخرى فنحن نستخدم مبيدات عالمية فهى مبيدات صناعة المانية وامريكية وحاصلة على تصريح وزراه الصحة ولذلك فهى لا تشكل خطوره على حياه الاشخاص فنحن فى شركتنا نكون حريصين كل الحرص على صحة عملائنا ونعمل دائما على تقديم الراحة والامان لهم فنحن كل مانسعى الية هو ارضاء عملائنا فاذا كنتم تعانون من الحشرات التى تتواجد فى منازلكم ولم تجدو الحل حتى الان فنحن نقول لكم قولوا وداعا للحشرات واهلا بمنزل سعيد هادئ وخالى من الحشرات المزعجة والضاره وان شركتنا لها فروع اخرى للتنظيف شركة تنظيف بالدمام وشركة تنظيف بالجبيل وذلك لان تواجد الحشرات يكون مرتبطا دائما بالمنزل النظيف وذلك لان الحشرات دجائما تحب ان تتواجد فى المناطق المتسخة الغير نظيف وتعتبرها ملجا وبيت تعيش به فى امان ولذا فنحن نعمل جاهدين على توفير الراحة اليكم فاذا اردتم الاتصال وطلب الخدمة
جوال رقم0558973863