اخبار

السبت، ١ نوفمبر ٢٠٠٨

الفنانة والقاتل والعمدة!


انفراد: التحقيق السرى فى قضية مقتل الفنانة أم السعد وأقوال القاتل عوضين أبو ضمرانى!!
ــــــــــــــــــــــــــــــــــــــــــــــــــــــــــــ
وصف الضحية
أ. الوصف الخارجى
الضحية ترتدى حداشر جلابية فلاحى فوق بعض عشان متتكشفش على رجالة..وترتدى خمس بناطيل قماش وفوقهم واحد جينز كما ترتدى اتناشر جوز شراب صوف وثلاثة أحذية وشبشب.. وتضع على رأسها كمية من القماش الملفوف لا يستطيع الطب حصرها.. وهذا لتخفى هذه العبقرية المتمثلة فى جمجمتها المصون ذات الأبعاد المختلفة!!
ب. التشريح الداخلى:
الضحية تملك جسدا أجارك الله! وقد كانت فنانة راقصة فنون شعبية فى مركز شباب القرية.. كما اتضح لنا أنها لجأت إلى عملية زرع سيليكون فى سمانة رجلها للإغراء الشديد مع أنها تضع على السمانة رباط ضغط شديد الصلابة لتخفى هذا الإغراء.. كما تبين لنا أن معدتها قد اهترأت تماما وذلك بسبب المبيدات المسرطنة التى يمتلئ بها الطعام المصرى.. وأيضا ليس لها إلا كلية واحدة وباستعمال الفكاكة أعتقد أنها قد ذهبت إلى مستشفى استثمارى من قبل لعمل عملية اللوز وهذا سبب اختفاء الكلية اليسرى!!
ويوجد اختفاء جزء من القلب.. وبالتأكيد الضحية قد باعت هذا الجزء بعد أن علمت أن سعره وصل الشيء الفلانى لكى تنفق على باقى العائلة.. وعلى رأى المثل حضرتك.. حتة من القلب وأعيش، أحسن من القلب كله واشحت !!
ويتبين لنا أيضا أن الضحية لا تملك أحبالا صوتية.. وهذا بالتأكيد بسبب أنه قد بح صوتها ألف مرة للمسئولين من أجل مياه الصرف الصحى التى أصبحت المشروب الرسمى للقرية!!
كما يتبين لنا أنها تملك ثلاثة أصابع فقط فى كل يد.. وهذا بالتأكيد نتيجة منطقية لأنها كانت تذهب كل يوم لطابور العيش عشان تجيب بجنيه عيش بس..وهذا أمر لو تعلمون عظيم.. وأعتقد أن الوحشية التى قطعت بها الأصابع لا تكون إلا فى طابور العيش فقط.. وده رأى طبى حضراتكم مش أى كلام يعنى !!
كما أنه من الملاحظ أنها كانت مصابة بالبله المنغولى.. وهذا المرض سببه الوحيد هو مشاهدة الأفلام والمسلسلات المصرية.. وربما كان هذا هو سبب الاكتئاب الشديد الذى كانت تعانى منه قبل مقتلها!!

التحقيق
سألنا المتهم عوضين أبو ضمرانى وكانت إجاباته على النحو التالى:
س: ما قولك فى المنسوب إليك من قتل أم السعد أبو جرجاوى فى بيت الحاج ابو دياب؟
ج: أنا باعترف ياباشا.. أيوة أنا قتلتها.. بس العمدة هوه اللى خلانى اقتلها.. هوه اللى حرضنى يعنى.
س: ولماذا حرض العمدة على قتل أم السعد؟
ج: اللى اعرفه انه كان بيكرهها من زمان عشان كانت بتاخد باتنين جنيه عيش فى اليوم مع ان المفروض تاخد بجنيه.. وده سبب بعض الحزازات بين النفساويات يعنى.
س: وما مقابل قتلك للمذكورة؟
ج: بسم الله الرحمن الرحيم.. الإجابة: مقابل "قتلك للمذكورة".. قتلك للمجهولة.. أنا شاطر يابيه دا انا طالع من سنة ساتـّة.
س: أنا اقصد يعنى العمدة اداك كام عشان تقتلها؟
ج: العمدة حول لى مبلغ كبير على حسابى فى بنك القرية.. وكمان ادانى كوبون عشان آخد بجنيه عيش كل يوم من الفرن من غير طابور؟
س: كم المبلغ الكبير؟
ج:اتفقنا على خمسين جنيه حضرتك.. بس هوه حول لى 34 جنيه بس يافندم.. وقال لى انه مفيش معاه فكة.. وال16 جنيه الباقيين هيجيبهم لى بعد ما ابج بطنها وأجيب له الحجاب الحاجز وهوه صاحى وبيلعب !!
س: وكيف ساعدك العمدة من بداية القصة؟
ج: العمدة هو الذى حدد لى مكان الضحية وتنقلاتها..حيث أنه قال لى أنها تسكن الآن فى بيت الحاج ابو سالم.. ثم اتصل بى وقال لى انها انتقلت إلى منزل الحاج ابو دياب.. وهو الذى أجَّر لى التوك توك الذى سأراقبها به.. كما أنه اشترى لى شنطة كبيرة ووضع لى فيها عيش وجبنة وحلاوة ولانشون لزوم السفر والزاد مع الفلوس.
س: وماذا فعلت بعدها؟
ج: أول ما نزلت رحت لمحل عطية ابو شقفة عشان أشترى فاس.. أصل البت أم السعد دى دماغها ناشفة ومش هتلين غير بالفاس.. ورُحت اشترى جلابية مقلمة خطوط بالطول من عند الواد ابو عوف _على فكرة يابيه الواد ده بيجيب حاجات حلوة قوى من ليبيا.. هوه ليه يابيه حتى الجلاليب بتاعتنا مش مكتوب عليها صنع فى مصر؟_ المهم رحت أجّرت أوضة جنب البيت بس كانت غالية قوى يابيه _ده كله عشان الناس اللى ناهبين الحديد والأسمنت والإيجارات بقت فى العالى_ وجبت لها فرختين على إنهم هدية عشان اعرف ادخل البيت.. أول ما شافتنى خافت يابيه. .أصلها خافت من الفراخ عشان انفلونزا الطيور.. هوه صحيح يابيه انفلونزا الطيور دى موجودة ف مصر وللا لأ؟؟ أصل كل تسع سنين يقولوا ان واحد مات منها.. يعنى هيه بتروح وتيجى بتتفسح يعنى وللا هيه موجودة أصلا وللا الحكومة عاملاها لعقاب المفسدين؟
س: اخلص ياعم ..وماذا حدث بعد أن دخلت لها الشقة؟
ج: طلعت الفاس من جيب الجلابية المقلمة بعد ما غيرت جلابيتى عشان ماحدش يكشفنى بس سبت الجلابية القديمة فى ايديا برضه عشان الكل يكشفنى!!.. وضربتها أربع ضربات على راسها.. بس باين ان البت كانت دماغها ناشفة حبتين مش عايزة تموت.. حاولت اقنعها بكام ضربة كمان لغاية البت ما بقت بتفرفر كده زى الأطفال اللى ماتوا فى مستشفى المطرية يابيه لما ماتوا عشان الكهربا اتقطعت كده.. أو زى الناس اللى ماتوا فى كل الحرايق اللى فاتت بسبب اسم الله عليه الدلعدى "الماس الكهربائى"!!
س: إذن أنت قتلت ام السعد فى عقر دارها؟
ج: لا يافندم.. أنا قتلتها فى الصالة!!
س: وما قولك فى الرسائل والاتصالات بينك وبين العمدة الذى حرضك على القتل؟
ج: يابيه احنا اساسا كنا بنتكلم أرضى عشان أرخص.. واتكلم أرضى يابن بلدى صوتك بقى واضح قوى عندى.. وكده يعنى.. وبعدين أنا المحمول بتاعى مفيش فيه رسايل غير من هريدى ولد عمى اللى مسافر الكويت وكلها "كلمنى وشكرا" !!
س: هل هذا اعتراف على قتلك ام السعد؟
ج: يابيه انت ليه بتدخل الهزار فى الجد؟؟ حد جاب سيرة القتل دلوقتى..العمدة اللى حرضنى وعندى الدليل.. الشنطة الكبيرة اللى سلمنى فيها ال36 جنيه.. أنا مخبيها تحت رجل الجاموسة اللى عندى فى البيت.. حتى اسألوا الجاموسة يابيه.

ملحوظة: بعد سؤال الجاموسة أقرت بالواقعة وأكدت كلام القاتل !!

هناك ٣٨ تعليقًا:

TAFATEFO يقول...

برضه الـ 12 شراب و الـ 3 جزم والشبشب

مسخرررررررررررررررررررررررررررره

Dr. wessam kabil يقول...

سعيدة قوي باسلوبك وب مبسوطة يامصر

أول زيارة متأخرة شوية .. وفاتتني ندوة اضافة اللي كانت في البلد وانت كنت موجود

فرصة سعيدة

همس يقول...

ايه البعزقه وايدك الفرطة فى تلبيس الضحيه كميات الهدوم دى

حرام عليك تعبت من كتر العد

والحمد لله ان الجموسة اقرت خلينا نخلص من القصه دى خالص



مستنين الجموسه التانيه قصدى القصه التانيه

ههههههه

Miss. Sosa يقول...

اهم حاجة اعتراف الجاموسة
فكرك لو الداموسة ماكنتش اقرت بالواقعه كان هيبقي شكلنا عار ادام اليونايتد ستاتس وسبيس تون قناة شباب المستقبل

هههههههههه

والله انت فظيع ذكرت كل مشاكل البلد بشكل فظيع

انا بتهيألي ننزل البوست ده لمقرر التاريخ بتاع اولي ابتدائي وعنوان الدرس هي ديه مصر يا عيال والسؤال في اخر الدرس استخرج مشاكل مصر من القطعة :D

دمت مبدعا

اهالينا زهقوا يربونا يقول...

ههههههههه

حلوة قوى مضمونا واسلوبا

أتعودنا منك على الحاجات الجميلة دى

مستنين جديدك دايما وابقى تعالى حدانا عندنا عيد ميلاد وبوفية مفتوح
هات خمس هدايا وتعالى
سامو عليكو

tota يقول...

ايه ده هو اسهم العمدة ما نزلتش فى البورصة ليه يكونش كان عامل عليها عمل

والمرحومة كانت جامدة قوى قوى ومتحصنة جامد بس ملابسات وملابس المرحومة اثبتت بما لا يدع مجالا للشك انها صرفت كل فلوسها على الملابس

وبعدين انت لخبطت الطب فى دماغى مكنتش اعرف انهم دلوقتى بيشيلوا الكلى عن طريق اللوز ده اتارى الدنيا داخلة فى بعضها خالص عند الفنانة
باعدين انت بوظت الساسبنس كان لازم فى الاخر تسيب اذا عرفت القاتل برغم اعترافه اتصل على رقم 000099999 لتفوز بجائزة قدرها كرتونة مياه معدنية وتذكرة سفر لزيارة موقع الجريمة


انت كنت مختفى فين كنت عايزة اهنيك على الكتاب واقولك الف مبروك انا لسه متابعاك

صبرني يارب يقول...

حلوه يا اشرف بجد مش مجامله

دمها خفيفه اوي يا اخف دم

م/ الحسيني لزومي يقول...

شارك ف الحملة الشعبية للقيد بالجداول الانتخابية وادعو غيرك
ضع بنر الحملة علي مدونك والبنر موجود علي مدونتي

عالم ماريونت يقول...

هههههههههههه
اشمعنى 36 جنية يعني؟
طبعا مدونة دمها خفيف جدا انت عارف اني كنت بعلق عندك من بدايات المدونة دي لما كانت خلفيتها سودا؟
وقتها مكنش عندي مدونة بس مدونتك انت وبيكيا وعايزة اتجوز كانت من اكتر المدونات اللي أثرت فيا واللي خلتني اعمل مدونة
بقالي يمكن سنة مفتحتش مدونتك واول بوست قريته كان البوست الي فات بس بجد مدونتك وحشتني اوي
تحياتي ليك ولطابور العيش اللي الناس قتلت بعض عشانه
ودايما من نجاح لنجاح
رنا

خمسة فضفضة يقول...

السلام عليكم ورحمة الله وبركاته

مبروك يا اشرف صورتك منوره في الدستور الاسبوعي

يا اخي انا شفت الصوره جمب الكلام فرحتلك اوي ، يعني من اولها كده الاسم والصوره كمان ( ماتخفش انا مش باحسد ان ابقر بس )

ربنا يوفقك يارب ونشوفك رئيس تحرير اد الدنيا


سلام

Unknown يقول...

هههههههه

طب هيعملو ايه مع العمده
هيسجنوه بجد ولا ايه؟

Unknown يقول...

بجد انت عسل
بس كده تبقي الجاموسه مشتركه في الجريمه

انت تسال والكمبيوتر يجيب يقول...
أزال المؤلف هذا التعليق.
انت تسال والكمبيوتر يجيب يقول...

دعوه
يسعدنا ان نسمع تعليقاتكم
على ما نطرحه من موضوعات فى برنامجنا الأذاعى وهو الأول فى الشرق الأوسط عن النت والمدونات من الأذاعه الرئيسيه لمصر ....موضوعاتنا تطرح فى مدونتنا...وتذاع التعليقات التى تكتبونها فى حلقات البرنامج وهو يذاع يوميا عذا الجمعه التاسعه وعشر دقائق صباحا على موجات أذاعة البرنامج العام
ونرحب بنشر بعض موضوعات مدونتك المتميزه
المدونه
http://netonradio.blogspot.com

غير معرف يقول...

اختك ام العيال
السلام عليكم من بلد الكفاح المسلح.. واخبركم ان عباس دخل الخيش .. لاء مش انتو يعنى اشرف طبعا حبيب قلبى بص يا اشرف هو انت ح يجرالنا معاك حاجه من الاتنين مالهاش تالت .. ياح تودينا فى داهيه .. يا ح تودينا ورا الشمس .. المهم انك ح تودينا فى حته و السلام .. بجد ربنا يكرمك و يوفقك ومن نجاح الى نجاح بأذن الله ... بقولك ايه يا ابو العيال .. انا دورت على الكتاب هنا فى اسكندريه و مش لاقياه و صيت كل بتوع الجرانين فى منطقتنا و المناطق المجاوره انهم يدورو عليه عامله حامله تدوير على مبسوطه يا مصر و مش لاقياه .. ماتعرفش هما بتوزعو فين بالضبط فى اسكندريه تكون خدمتنى يعنى عشان اعرف اتفشخر بقلب يعنى فى منطقتنا .. رغم انى زعلانه منك فى البوست اللى فاتت شكرت كل الناس ناااافر نااافر و ماجبتش سيرة ام العيال ماشى يا عم ربنا يسامحك ... المهم بلاش العتاب ... ح استن ترد عليا بقه ماتنساش ... يلا اسيبك فى رعاية الله

اختك ام العيال

غروب يقول...

ههههههه حلوه اوى يا اشرف

انا مش عارفه الناس عامله للبت دى اهميه ليه

انا لو منهم اعطب للقاتل براءءءءءءه

ody911 يقول...

ههههههههههههههههههه


لاء جامدة يا أشرف بجد


ربنا يحميك يابنى


مسخرة مسخرة يعنى

إنما بجد إيه أخبارك

يارب تكون دايما بخير

على فكرة كل ما ببقى مخنوق بجد

لازم أزور مدونتك وأضحك شوية على حالنا


عادى بقة
أودى مرسى علم

Unknown يقول...

يعنى الراجل عمل فيها معروف كده لما موتها
يلا آهى توفر باتنين جنيه عيش كل يوم
تحياتى

a7md Helal ( المهم ) يقول...

والله جامد يا ناس

بس حكاية القماش والعبقرية دي

احنا هنكذب

غير معرف يقول...

السلام عليكم ورحمه الله وبركاته
استاذنا
استاذ اشرف
والله زى العثل
رغم انى زعلانه منك اووى
ليه مش قولتلنا على ميعاد التوقيع فى المنصوره
عايزه احضروو
ياريت تعرفنا امتى عشان نلم الشله ونيجى نهنى
ياترى فيه اكل؟؟

قصاقيص يقول...

اشروووووووف
وحشتني جدا
ابقي اسال وعرفني اخبارك
فاضلي كام يوم واروح اقضي الويك ايند بتاعي في اوضة العمليات
......
كتابك "مبسوطة يامصر" انا اتقلبت فيه
مليش دعوه هجيب غيره وهتوقعهولي برضو

علي فكرة الواضح ان ام السعد كانت مقرشه اوي وقشيتها معدن...كل دي هدوم ياراجل ؟ ده انا لو عندي نصهم كان زماني بقيت عمدة

تسلم دايما يا اخف دم

مسدس صغير يقول...

انا عارف مين اللى قتل ام السعد وعندى شهود على كده ومستعد النيابه تستدعينى

dina يقول...

بصراحه بعد موضوع مهند
مش دخلت
بس لما وصلتلى المدونه تانى
موضوع رااااااااااااائع بجد
وطريقه كتابته كمان
نرفعلك القبعه

الصعيدى يقول...

بجد انا ندمان انى معرفتكش من زمان لكن اصحابى كلمونى عنك ولنا دخلت وشفت المكتوب بجد انت انسان خفيف الدم على فكره احنا مستنينك قريب جدا وده هيكون موضوع الساعه بالنسبه ليا انا دورت على كتاب مبسوطه يا مصر ملقتهوش وشفته مع واحد صاحبى بعد كده لكن رفض يخلينى اقرأه الابعد ما يخلصه الاول وبعدين انت لخبطت الطب فى دماغى مكنتش اعرف انهم دلوقتى بيشيلوا الكلى عن طريق اللوز ده اتارى الدنيا داخلة فى بعضها على العموم هنسأل ونشوف

Lady E يقول...

هي دي الكوميديا السوداء

بجد شر البلية ما يضحك

اسلوبك اكثر من رائع

تسلم ايدك

اقصوصه يقول...

هههههههههههههههه

اهم شي انه تم وبعون الله

الكشف عن هوية الجاني :)

تخاريف خاصه! يقول...

ههههههههههه

مش عارفين لولا شهاده الجاموسه كان الوضع هيبقى ايه؟!!

son's egypt يقول...

السلام عليكم
حلوة القصة
بس صعبان علي 16 جنية الي انضحك عليه فيهم

شيماء الجمال يقول...

أشرف ازيك
انا نسيت اقلك نزل تنويه عن كتابك في مجلة كلمتنا عدد شهر 10 :)
تنويه متواضع على قدي كده

سارة درويش يقول...

هههههههههههههههههههههههههههههه مع كل الهدوم دي كان لازم الفاس ما تجيبش نتيجة

عارف انه غبي أوي

لو كان غسل ببرسيل ما كنش حد كشفه ههههههههههههههه

مبروووووووووووووك حفلة توقيع مبسوطة يا مصر في المنصورة كان نفسى احضر بس للأسف يوميها عندي محاضرات والوقت متأخر أوى

ياااااااااااااااريت تعمل واحدة كمان في طنطا في ناس كتييييييييير نفسها بجد تشوفك وتسمع منك شعر أو تيجي عندنا ندوة في الكلية بجد ليك جمهور كامل عندنا

اهو ده عيبه يقول...

مش ممكن يا اشرف انت بجد كلامك كارثه
بقى قتلها علشان 50 ج وكمان مش كاملين

بجد بجد اسلوبك تحفه

الكلام نوعان كلام فارغ وكلام مليان كلام فارغ يقول...

كالعاده فظيع واكتر من رائع انت هتتسبب في وفاه كثير من البلوجرز بسبب الضحك
نصيحه كفااااااااااااااايه
سلامى ليك

bastokka طهقانة يقول...

اسقاط هايل جداااااااااا
احييك

اوروفوار

أخف دم يقول...

ياصباح الفل
معلش اتأخرت عشان البرد كان مبهدلنى وكمان موضوع الندوات والذى منه.
خمسة فضفضة الله يكرمك يا دكتورة واصبرى انت بس شوية وهتلاقى صورتى على الغلاف من برة فى الدستور الأسبوعى.. جايلك يامصر.. وألف حمد الله ع السلامة من العمرة والله متابع ويارب تكونى دعيت لنا كلنا هناك ربنا يكشف عننا الغمة.
أم العيال
ازيك يا جميل.. معلش على الانشغال اليومين اللى فاتوا وربنا يكرمك على كلامك الجميل.. الكتاب خلال أيام فى اسكندرية وهاحط أماكن التوزيع فى المدونة عشان تجيبيه ان شاء الله ومين عارف ممكن أنا بنفسى أجيلك هناك ونوقع كمان على الكتاب .. ربنا معاك وسلامى للجميع عندك وكل أهل اسكندرية.
شيماء الجمال العزيزة
منورة ياشيماءدايما ومتابع كل تغطياتك وبوستاتك والله.. وياريت معلش لو العدد موجود عندك أو عندك عدد زيادة تجيبهولى.. ممكن نتفق على معاد لو ممكن آخده منك.. وممكن عن طريق الإيميل يبقى كويس قوى.. لو مفيش مانع وابقى شاكر جدا بجد..وشكرا على الكتابة عنى أصلا.
سمو الأميرة سارة
ربنا يسهل فى حفلة طنطا دى بس عموما الجامعات هيه اللى بتدعينى مش انا اللى بالقح جتتى يعنى .. يعنى مش بإيدى والله يا سارة بس ربنا يسهل ان شاء الله وانا اللى عايز آجى عندكم عشان اتشرف بيكم وياريت سلامى ليك يكون وصلك من شريف ديكستر.
وفى الختام يارب تكونوا بتضحكوا دايما هنا ومبسوطين وقبل كل حاجة تفكروا كمان مش ضحك وخلاص.
أشرف توفيق

أحلى حياة يقول...

هههههههههههههه

جامدة بجد D:D:D:

koukawy يقول...

ههههههههههههههههههههههههههههه
طب احل الفزوره و للا اقول عروستي؟؟؟؟؟

laila elshowaishan يقول...

بجد مدونتك خطييييييييررة يا أشرف
ربنا يوفقك

pubg mobile يقول...

شركة ترميم بالرياض خدمات منزلية بالرياض شركة شحن بالرياض شركة تسليك مجاري بالرياض شركة فحص فلل بالرياض شركة فحص فلل منزلك